حرقة دم زادت من اول امتحان

كل سنة وانتوا طيبين بمناسبة العام الهجري الجديد واقتراب العام الميلادي وربنا يتولانا برحمته في السنة الجديدة

في وسط الأحداث اللي تحرق الدم اللي عايشين فيها جاية الامتحانات تحرق دمنا اكتر

انا متأكده ان الامتحانات هتيجي صعبة اشمعنا هي يعني اللي مش هتنكد علينا

امتحاناتي هتبدأ من بكرة ان شاء الله وعندي مادة غلسة اسمها النقد criticism ومتأكده ان الامتحان هيجي صعب زي السنين اللي فاتت

ربنا يسهل ادعولي وان شاء الله البوست ده هيكون يومياتي في الامتحانات اللي ربنا يخلف ظني وتكون يوميات لطيفة

واليوميات هتبدأ من بكرة ان شاء الله

----------------------------------------------------------------

النهاردة 30/12/2008 زي ما توقعت حصل

اول امتحان جه طويل جدا وصعب جدا جدا وجه من أسخف جزء في المنهج

وملحقتش أحل كل الأسئلة

منك لله يا اللي حطيت الامتحان

وكمان رحت اللجنة متأخره علشان كان في مظاهرات والامن كان قافل الطريق وافتكرت كلام للفنان عادل امام في فيلم مورجان احمد مورجان : وهنا بقى نعمل شارع علشان الطلبة لما تحب تعمل مظاهرات ونجيب كام كاوتش محروق وكام واحد من الكلية يمثلوا دور الأمن

حسيت بكده والأمن قافل الطرق والدنيا زحمة ومش عارفة اوصل للكلية

اوكي احنا متعاطفين مع غزة وزعلانين من اللي بيحصل لكن يا ترى الحل في المظاهرات اللي بتوقف الطريق؟؟

كانت هتنفع بإيه المظاهرات لما تعطل واحد عن الامتحان او تعطل مريض انه يوصل للمستشفى او تعطل حد رايح ينقذ اي حاجة

المظاهرات النهاردة بالنسبة لي كانت عاملة زي الزار اللي بشوفه في الافلام العربي مجرد حاجة بتطلع غضب الناس لكن ملهاش لازمة من وجهة نظري

غير انها بتبوظ المرور وبتملا الدنيا لجان وعربيات مصفحة وحاجات غريبة

---------------------------------------------------------

نورتي حياتي تاني يا أنتيمتي الغالية

امبارح رحت استقبلت انتيمتي حبيبتي من المطار القديم اللي مطلعش قديم واضحك علينا يا رجالة المطار القديم مبقاش قديم والمطار الجديد مبقاش جديد (حد فهم حاجة) اللي راح المطار قريب هيكتشف ان المطار القديم اتغير وبقى حاجة تانيه بقى مطار استايل وصالة 3 لسه مفتوحة من اسبوع بجد المطار امبارح كان شكله تحفه وصورته صورتين ولقيت الناس كلها بتبصلي وبيقولوا بعيونهم ايه الهبل ده حد يصور المطار او بيقولو ناس رايقة لكن معلش كله يهون علشان خاطر أحلى عيون (انتوا طبعا مش انتوا بتقرؤا بلوجي يبقى انتوا اكيد في مصر :)

دي الصورة الأولى واحنا داخلين صالة 3 ولا مطار اروبا

ودي الصورة التانيه من صالة 3 وانا بنتظر صحبتي الانتيخ

وأقولكو سر بس اوعو حد يقوله ويفتن عليا

انا كان نفسي الاقي حد من المدونين اللي بيزورا مدونتي في المطار ويكونوا جايين صدفة

اما بالنسبة للمطار الجديد اللي بالنسبة للمطار ده موقف ميكروباص فأنا كنت مصوراه من كام شهر لما رجعنا من عمان
وهو ده المطار اللي بنسافر وبنيجي عليه دايما
واخترت لكم صورة للمطار من بره علشان تعملوا مقارنة بس بين المطار القديم ومش قديم وبين المطار الجديد ومش جديد

الجو امبارح كان برد فظيع وصحبتي حبيبتي عملت لفتة لطيفة خلتني فرحانة جدا كلمتني والطيارة لسه بتتحرك في المطار
وسمعت صوت الطيارة وهي بتتحرك وكأني كنت معاها وفضلت مستنية صبحتي نص ساعة بعد مكالمتها وقعدت على الكراسي اللي هناك وببص على الركاب اللي راجعين من السفر وفي زحمة كبيرة جدا ولقيت بجد ومن غير مجاملة قمر نور المطار وفضلت اقول معقول صحبتي وانا مش مصدقة عنيا انها اخيرا في مصر كأن غيابها كان حلم طويل ومش عايز يخلص مع انها سافرت أأقل من شهر
واخيرا قمت وسلمت عليها وكنت حاسة اني في حلم جميل مش مصدقة انه الحمد لله اتحقق


أحسن حاجة في الدنيا الحب والأخوة في الله
بتحب حد لأنك بتحبه مش منتظر منه مقابل وبتلاقي ان حبك ده مش بيضيع لكن بتحس بحب غير مشروط
والحب والصداقة النقية بالشكل ده بقت نادرة جدا اليومين دول فالحمد لله ان ربنا رزقني بصديقتي انتيمتي وصديقاتي كلهم اللي بحبهم كلهم في الله
ربنا يحفظ كل اهلنا اللي بنحبهم واحبائنا واصدقائنا أمين يا رب العالمين

يا ساعة بالوقت اجري

يا ساعة بالوقت اجري(لغاية بكرة بس) خلي الحبيب يجي بدري

وبعد كده اوعي تجري علشان نلحق نذاكر قبل الامتحانات

انا فرحاااااااانه وحاسة اني طايرة في السما (وده احساس كنت مفتقداه جدا)

صحبتي الانتيخ راجعة من السفر بكرة ان شاء الله (ربنا يحفظها وترجع بالسلامة) ده غير اني هروح استقبلها في المطار يعني هسافر :)

وانا بحب السفر خصوصا اليومين دول علشان اخرج من الموود الغريب بتاع خنقة المذاكرة والابطال اللي كلهم بينتحروا او بيتقتلوا في الروايات اللي بندرسها

ياااااااااه اد ايه وحشتيني يا صبحتي ربنا ميحرمنيش منك ابدا

رومانسية حزينة وفاض بيا

كفاك تلعب دور العاشقين معي وتنتقي كلمات لست تعنيها
كم اخترعت مكاتيباً سترسلها واسعدتني ورود سوف تهديها
وكم ذهبت لوعد لا وجود له
وكم حلمت بأثواب سأشريها
وكم تمنيت لو للرقص تطلبني وحيرتني ذراعي اين القيها؟
نزار قباني
***********************************
اسفة اني مش برد على التعليقات في المدونة لكن والله انا متابعاها كويس ومخلصة رصيدي على النت من الموبايل وبفرح جدا لما بلاقي تعليق جديد وطبعا مازال النت فاصل عندي بس ان شاء الله هرد على كل التعليقات في يوم من الايام :) اول لما النت يرجع ان شاء الله

**************************
متشكرة جدا لكل المدونين الرائعين اللي بيسيبوا تعليقات وانا متابعه مدوناتكم لكن مفيش وقت اني اسيب تعليقات
وحشتوني وادعولي علشان انا بدأت الامتحانات الشفوي ولسه اسبوع عالفاينل وانا مرعوبة عااااااااا

شوز ورى شوز

كان يا مكان في قديم الزمان وايام لما كان عندي بتنجان حضرت حفلة من حفلات واحد فنان واسمه هشام عباس
والحفلة دي مكنتش في مصر المهم الحفلة كانت عالبحر ففي نص الحفلة طلع شاب من وسط الجمهور ورمى هشام بالرمل في عينيه وقال له الغنا حرام وفي ثانية اتجمع الامن حوالين الشاب وطحنوه من الضرب وهشام اتكلم كلمتين وغنى اغنيتين وطلع في حماية مشددة من الشرطة وروح في عربية الشرطة كمان والشاب اتنفخ طبعا
طب ليه بقول الكلام ده علشان امبارح كنت نايمة وصحيت على خبر انهم ضربوا بوش بالشوزات (جمع شوز) فكنت متخيلة ان عراقيين اتلموا حواليه وضربوا بكذا شوز وبعدين فتحت المدونة بتاعتي ولقيت مدونات اتكلمت عن الموضوع فقلت ادخل عاليوتيوب واشوف ايه اللي حصل لقيت صحفي واسمه منتظر الزايدي مراسل قناة البغدادية رمى بوش بالشوز وياريته جه فيه لكن بوش اخد الموضوع بهزار علشان صورته متتهزش وده اللي فهمته من الفيديو اللي ع اليوتيوب واتأكدت من ظني تاني يوم لما شوفت قناة الحياة

المهم مطرب اترمى عليه رمل فاللي رمى عليه رمل اتضرب واتنفخ ما بالنا برئيس اترمى عليه شوز وده مش أي رئيس ده امريكاني
الله يكون في عونك يا منتظر اكيد هيموتوه خلية خلية علشان يعذبوه

الطلاسم بااااااااااطل باااااااااطل

ملحوظة متابعة البوست ده واللي قبله

صحيت من عز نومي على رنات صحباتي الله يجازيهم وعلى ضميري اللي كل شوية بيئنبني ويقوللي عندك 7شيتات و2 اسينمنت ومعملتيش الا واحد يتيم منهم من زماااااااااان
كان عندك اجازة اسبووووووووع
انا : يا ضميري يا حبيبي دي مش شيتات دي طلاااااسم وانا مش بفهم في السحر يا عم الحج
ضميري : سحر مين حد قالك تطلعي حمامة من الحلة ده كام شيت يعني هو حلهم حاجة صعبة لما انتوا مش اد الكليات بتدخلوها ليه
انا : كليات مين يا عم الحج صلي على النبي هو اللي احنا فيها دي كلية دي كابوس
ضميري : ايوة ما هي حجة اللي مش بيحب يذاكر مسح السبورة
انا : نعم تقصد مين
ضميري : ولا حاجة ربنا يوفقك
انا : شكرا اميـــــــــــن يسمع منك ربنا يخويا انا واللي زيي
وبعد كلمات ضميري قضيت الليل بطوله ببص للشيتات واسيبها وابص للتلفزيون ثم للنت ثم للكتاب 5 ثواني ثم احط الشيتات في الفايل file وارميها عالمكتب وانسى الشيتات
واهو فات اسبوع على ده الحال واهو جه يوم الجمعه اللي كل الشيتات والواجبات اتراكمت عليا فيه عاااااااااااااا
طبعا مش عارفة انام علشان قضيت الاسبوع نوم وحان وقت المسؤلية قولت اشغل موسيقى هادية تريح اعصابي وانا بذاكر اخترت السيديهات وانها تشتغل ابداااااا مش عايزة تشتغل
وبعد نص ساعة اخيرا اشتغلت وبفتح اول شيت وبقول بسم الله الرحمن الرحيم لقيت السؤال خير اللهم اجعله خير بيقوللي : حللي شخصية البطل نفسويا وتأثير الاماكن ومشاعر الاشخاص اللي كانوا معاه عليه وحللي نفسية مراته ونفسية عياله ونفسية الاشخاص اللي اتأثر بيهم وازاي ده اثر في جو القصة مع الاستشهاد بنصوص من الرواية ؟؟؟؟؟؟
طبعا الكلام ده كله بالعنجليزي والمطلوب اني احلل شخصيات الناس دي كلها وانا والله بريئة يا بيه ولا عمري شفت الناس دي ولا عارفاهم وبعدين احللهم ليه هو انا لا سمح الله دكتورة تحاليل ولا دكتورة نفسوية وبعدين دي نميمة وانا لاااااا اقبل :) بجد ايه الكلاكيع دي ولسه ده اول سؤال والبقية تأتي
وكمان لا بد ان اترجم علشان افهم اللي بكتبه عااااااااااااااااا

يا عيني يا عيني عالبنوتة
الشيتات بااااااطل بااااااااااطل
وكما يقول الاعلان
العربية اللي حيلتي باظت بااااااااااظت بااااااااااااظت
وجواز جود من اربيلا باااااااااااطل بااااااااااطل (ابطال الرواية) هما يتجوزوا واحنا ندفع تمن غلطتهم

عليك اللحمة بالبطاطس يا جود انتا واربيلا وسو بالمرة عااااااااااااا

من بين كل الروايات اللي درسناها الترم ده انا متأثرة جدا برواية هاملت وخصوصا بشخصية اوفيليا Ophelia
البنوتة الرقيقة الطيبة المصدومة في حبها من هاملت اللي كان بيحبها جدا بس للأسف صارحها بحبه لما ماتت !!
ومن حبها ليه وتجاهله ليها اتجننت ووقعت في النهر وماتت وجنازتها كانت محزنة جدا
دايما اوفيليا بتيجي على بالي مع انها شخصية في رواية بس قلبي بيتكسر وبحس بحزن شديد عليها لما بقرأ الرواية او بذاكرها
الرواية كلها جميلة وتجيب احباط لأي حد يقرأها وكفاية ان كل ابطالها بيموتوا ما عدا هوراشيو صاحب هاملت الانتيخ
اللي هاملت بيقوله وهو بيموت (معلش خليك في الحياة واستحمل انك تعيشها دي تضحيتك ليا علشان تحكي حكايتي !!) انا بقى عاملة زي هاملت رجل الاقوال اللي بيأجل كل حاجة في حياته

وزي اوفيليا الرومانسية اللي عايشة في عالم تاني
عارفة ان عندي امتحانات وبقول هذاكر ومش بذاكر عندي حالة من الاحباط والملل من الكلية والدكاترة والامتحانات
واستبحس الامتحانات بدأ معايا
مش عايزة كلام عتاب من أي حد عايزة بس تدعولي
سلام

-----------------------------------------

كلام جاديد : ساعات بتحس انك في وسط الضلمة واليأس تايه مش شايف حاجة ولا فاهم حاجة ومخنوق من كل حاجة
ويجي نور من بعيد مكنش في بالك انك تشوفه والنور ده ياخد بإيدك وينور ويدفي حياتك في البرد اللي احنا فيه ده :)
من شوية كنت بشوف قنوات التلفزيون ووقفت على قناة كايرو سينما وكان في فيلم هندي شوفت اخر مشاهد فيه
وكان بيتكلم على بنوتة مكنتش بتشوف ولا بتسمع ولا بتتكلم وذاكرت ونجحت واتخرجت من الكلية وكانت بتتكلم
يوم التخرج وبتقول التخرج ده اخد منكم (من الاشخاص العاديين) 20 سنة ( اللي انا مستكتراهم على الدراسة) لكن اخد مني 40 سنة
يااااااااااه ايه الصبر والارادة دي واحنا اللي ربنا سبحانه وتعالى انعم علينا بالسمع والبصر بس مع ذلك مخنوقين ومكتئبين ومش عارفين نذاكر خلينا نغير نفسنا وحياتنا ونذاكر بجد و نشتغل بجد في حياتنا ونخلي عندنا امل وتفاؤل ونفوق بقى من الاحباط وان شاء الله ربنا مش هيضيع تعبنا

يا انا يا انتا

بعد المقدمة الطويلة عن اني مخنوقة ومضايقة من حاجات كتير اهمها النفاااااااااق اللي الناس بقت فيه بدليل ان لما بركب فوفو (عربيتي المتواضعة)
بيتريقو عليها وبيضايقوني لكن لما بسوق عربية بابا بحس بنفاق من نوع تاني ونظرات حقد لكن كلمات من وجهة نظرهم كويسة (كلام عيونهم غير كلام لسانهم)
ده ميمنعش ان في ناس طيبين وراقيين بس انا مخنوقة وبفضفض يمكن مكونش انا لوحدي اللي حاسة بكده (حد فهم حاجة؟؟)
وبعد الغم ده نغير الموضوع
النهارده تغلبت على ضيقي من الكلية ورحت الكلية وكان عندي صراع اخد التطعيم ولا لأ وخصوصا ان كان اخر يوم للتطعيم في الكلية النهارده وعديت ع المكان اللي بيقعدوا فيه الكتيبة البيضا والزرقا (الممرضات الفاتنات) وملقيتهمش
(احسن برضه) واتحسم الصراع جوايا وحسيت اني مزقططة وفكرة(لالا للتطعيم لا لا لا لا)بتاعتي انتصرت ومش هاخد تطعيم في الكلية كفاية بقى تطعيمات مكانوش بيقولولنا بتاعت ايه اصلا في المراحل الدراسية قبل الكلية

وطلعت المحاضرة لقيت الضاكتورة بتخلص في المنهج وبتقولنا كل سنة وانتوا طيبين
طب ما تبقي انتي طيبة وتدينا تقديرات وبلاش الامتحانات الفظيعة بتاااااااااعتك (والله مليش نفس ابص في الكتاب بتاع مادتها لاني عارفة التقدير اللي هاخده مهما ذاكرت فراكنة مادتها عالرف)المهم نزلت من المدرج وسمعت اعلان ضحكني في وسط رخامة الكلية : ( على الطلبة اللي مأخدوش تتعيم (تطعيم) الحزبة (الحصبة) سرعة التواجه والمرواح للمكتبة علشان ياخدوا التتعيم (التطعيم) ) فضلت افكر شوية يعني ايه حزبة وتتعيم بس فهمت في الاخر :)
وزميلاتي الحلوين كل ما اسأل واحدة اتطعمتي ولا لأ تقوللي بكل فخر وتباهي (طبعا اتطعمت) وكأنها بتقوللي (انا مصري وابويا مصري حضارة7000 سنة)
ويقولولي معقووووول متطعمتيش وكأني ارتكبت جرم شنيع وواحدة من زميلاتي اعرفها شكلا لقيتها دخلت في الحوار وبتقوللي ليدي متخافيش انا اخدت التطعيم وفضلت ساعتين اتألم بس
مش عارفة عرفت اسمي ازاي لكن طمنتني بصراحة :( واخدتني من ايدي وفجأه لقيتني قدام الممرضة وادبست في التطعيم وانا عندي فوبيا اصلا (محدش يقوللي فوبيا يعني انيميا الله يكرمكو)
فوبيا بشكل مبسط يعني ان الانسان يخاف من حاجة خوف شديد وبتوصل انه يغمن عليه لما يتعرض للشيء اللي خايف منه
والحمد لله الحمد لله اكتشفت ان مش عندي فوبيا من الحقن (مع اني زهقت الممرضة لغاية لما اخدت الحقنة) لكن اللي اكيد انه عندي فوبيا الدم عااااااااااااا (تبعا تبعا علشان انا رقيقة) وفعلا دراعي وجعني ساعتين بعد التطعيم مع ان الحقنة صغنونة خالص
واحساس ان الواحد يروح بمزاجه ياخد فيروس يدخله جسمه ده احساس مش حلو حتى ولو كان الفيروس ده مضعف او ميت بس برضه بيعمل دربكة في الجسم (التتعيم)
وبعدين كان علينا سيكشن والمعيدة الشوريرة زهقتنا وانا كل تفكيري في التطعيم وبفكر زي شخصيات شكسبير (السم يسري في جسدي اذن هو الرحيل الرحيـــــــــل الوداع يا كلية
احسن برضه هخلص منك هييييييييه) ولا رحيل ولا حاجة واديني بكتب اهو

كل سنة وانتوا طيبين ومن الفتة مش مكتريين ماااااااااااااء

ليه ليه ليـــــــــــــــــــه؟؟؟!!!

ليه ليه ليه ليه ليييييييييييييه حظـــــي معاكي يا كليه كدااااااااا
في الامتحانات تفتكريني وفي عز الرحلات والحفلات بتنسيني
ولما وصلت تالتة خنقتيني وزهقتيــــــــــني وجننتيـــــــــني
لغاية لما خلاص قربتي تموتيني
روحي يا شيخة منك للـــه
يا كلية يا وحشة
********************

ماشي يا دنيا ماشي
عمالة بتجرحيني وعن احبابي بتبعديني
ومعنداني ولا مرة بتليني
بس عارفة ...
وحياة دموعي وسهر الليالي
وحياة قلبي اللي بتستضعفيه وبكل قوتك بتحاولي تموتيه
وحياة كل ثانية عشتها في حزن
وحياة كل الآمي وانيني
مش هستسلم خلاص تعبت م الاستسلام
مش هستسلم وايه تفيد الآلام
مش هستسلم لأني اتعودت
خلاص اتعودت على جرحك وغدرك وطعناتك المسمومة
*********************

امتحانات الفاينل بتاعت كليتنا الموقرة اتحددت يوم 30 من الشهر الحالي اللي هو شهر 12 يعني لسه باقي ع الامتحان 29 يوم بما فيهم يوم الامتحان ده غير الشفوي اللي كمان كام يوم والمفائجات الغير سارة (الامتحانات المفاجئة اللي الدكاترة بيفرسونا بيها)
اول مادة المفروض نمتحنها مش فاكرة فيها غير كلمتين وبس ((ان هذا النقد مضلل)) وقلقانه جدا ومع ذلك بمسك الكتاب 5 دقائق وابقى كده ذاكرت جدااااااااااااا
والغريب اني بحب القراءة جدا اليومين دول وبقرأ الكتب من الجلدة للجلدة زي مثلا كتاب مسرحية هاروت وماروت للكاتب : علي أحمد باكثير
وكتاب حكايات غريبة بين السماء والأرض للكاتب محمد احسان عبد القدوس وبقرأ كتب تانيه كتير مش بكملها .

واني بحب القراءة ده معناه اني بقرأ اي حاجة الا كتب الكلية وانا عارفه ان ده تقصير مني بس حقيقي مش عارفه فيه ايه؟؟؟!!

نص حالة

اللي بيننا نص حالة

نص الحب اللي يمكن نصها التاني استحالة

استحالة ...

استحالة نرتبط ابدا ببعض

كل ما نحاول نقرب نلقى بعد

زي ما يكون اللي بيننا شئ غريـــــــــب

لعنة الحــب اللي بتزل الحبيــــــــب

واللي بيننا نص حالة

واللي عشنا العمر نحلم بيه نلاقيه

بين ايدينا ولسه بندور عليه

زي كدبة عايشة جواها الصراحــــــــة

نص ضحكــــة , نص فرحــــــــة , نص راحــــــــــة

استحالة

نص الحب اللي يمكن نصها التاني استحالة

استحالة

أصالــــــــة من ألبوم نص حالة

تهييس وفضفضة في نفس الوقت

(قلبي يا طير مروح يا مروح في الغروب يا غريب عن الصحاب وغريب عن الدروب
عطشااااااان الميه في ايديا
حيراااااااااان مش لاقي مراسيه)
الكلمات دي من اغنية من البوم في عشق البنات لمنير ومامتي قالتلي انها كانت اغنية لتتر مسلسل بس واحد غير منير اللي كان بيغنيها
ما علينا المهم انا حاسة بالكوبليه ده من الاغنية اوي وخصوصا ان لما الدنيا بتضيق بيا اوي بحب اسافر فقلبي زي الطير المروح ومعظم حياتي قضيتها وبقضيها مسافرة
وانا اخدت بنصيحة دكتر عمرو اللي قالهالي البوست اللي فات ((تتوضى وتصلى ركعتين لله وتجرى لحضن اهلك واصحابك الللى بجد تحياتي)) وفعلا سافرت عند خالتو من اخر بوست ليا وكانت معنوياتي مرتفعه جدا
واخيرا لسه راجعين من السفر امبارح ورجعت للكلية النهارده وطبعا كل زميلاتي زعقولي على اني مجيتش الكلية كل ده حتى في الكورس المستر قاللي انتي موتتي ولا ايه؟؟!
ماما صحتني من النوم وكنت بهييس بتقوللي اصحي يا نونة بقولها هو اللحن بقى كده اصلا اليومين دول واي كلمات بتتركب على لحن جاهز وخلاص ماما
بتقوللي لحن ايه ؟؟ انا في دماغي البوم حد معين بس مش عارفه ليه قولت لماما لحن الموبايل معدش عندهم ذوق في الموسيقى ( علما بإن رنة السنبه في الموبايل رنة من رنات نوكيا)
ماما : موبايل ؟؟ طب قومي قومي علشان متتأخريش
انا في الوقت ده صحيت وبعدها بشوية قعدت اضحك انا وماما عالموقف ده
المهم العربية استندلت كالعاده ومرضيتش تدور النهارده ورجعت لشحورة المواصلات (شحورة يعني شحططة او بهدلة)
وما شاء الله لقيت في اسبوع واحد غياب عن الكلية والكورس اتراكم عليا 3 شيتات ده غير الاسينمنت (الله المستعان)
ونزلت انا وزميلاتي المكتبة علشان نشتري الكتب الباقيه والشيتات ووقفنا في زحمه وطوابير ولا طابور العيش
وبعدين رحنا مدرسة اسراء اخت ايمو زميلتي في الكلية علشان نطمن عليها لانها لسه طفله صغنونة وعندها حساسيه ودايما تعبانه
دخلنا المدرسة شكلها جميل وواسعة لكن دوشة جدا واطفال اولى وتانيه ابتدائي في الدور الرابع (تخيلوا لما اطفال يطلعوا سلم كبير زي ده كذا مره في اليوم)
وبرغم جمال المدرسة الا انها خنقه ومكتومة حسيت ان مفيش فيها اكسجين ويا عيني عالمدرسين اللي شوفتهم بلاش انم بقى عليهم
لكن بجد كان شكلهم اي حاجة تانيه غير مدرسين ازاي ممكن الاطفال يحترموا مدرس مبهدل ومنكوش والشوز بتاعه مقطع والمفروض انه بياخد مرتب
ايوه صحيح مش بيكفي حاجة لكن ده مش مبرر كافي لان المدرس يمشي مبهدل
ده غير الفصل اللي لما شوفته حسيت ان النهاية الطبيعية ان الاطفال دول يجيلهم تخلف عقلي او يدخلوا كلياتنا اللي برضه هتجيب لهم تخلف عقلي
الله يكون في عونك يا اسراء وعون ملايين الاطفال زيك
-------------------------------------------
نيجي بقى لموضوع تطعيم الحصبة كل البنوتات اللي اعرفهم ملهومش سيرة غير التطعيم واللي اخدت التطعيم واللي لسه زي حلاتي مأخدتوش ومش ناويه تاخده بس كل الدنيا بتقوللي بدام انتي قبل العشرين لازم تاخدي التطعيم

بس انا مش هاخده واللي يحصل يحصل
-------------------------------------------
ناس كتير متعلمين مش عارفين يعني ايه فوبيا ف ان شاء الله هكتب بوست عن فوبيا مش معروفة اوي اسمها فوبيا الدم
-------------------------------------------
عاجبني جدا البوم اصالة كله والبوم تامر عاشور والبوم حماقي ماعدا اغنية ناويها بكرهــــــــــــــــــها جداااااااااااا

ياااااااارب صبرني

تعمل ايه لما الضربة تجيلك من اقرب الناس ليك؟؟؟؟؟؟؟؟!!!!!
تعمل ايه لما تشوف الحب في عيونهم وبكل ود تحبهم ويكون جزائك انهم يطعنوك في ظهرك؟؟؟؟؟؟؟؟؟؟؟؟!!!!!!!!!
تعمل ايه وانتا في حضن بلدك وحاسس بالغربة؟؟؟؟؟؟؟!!!!!!!!
تعمل ايه في الدنيا اللي معنداك وكل ما تقوم توقعك وتفضل مذهول وشريد؟؟؟؟؟؟؟!!!!!!
تعمل ايه لما تحس ان فات 20 سنة من عمرك وانتا لسه واقف مكانك؟؟؟؟؟؟؟؟!!!!!!
تعمل ايه لما تلاقي الحياة من حواليك سودا وكلما تنور شمعة الدنيا بتطفيها؟؟؟؟؟؟؟؟!!!

مش هنطبل مش هنهييس وأكيد هنسافر

جه في بالي اغنية منير المفضلة عندي (( أشكي لمين واحكي لمين دنيا بتلعب بينا توهنا سنين ولا عارفين بكرة جايب ايه ليــــنـــا )) النهاردة كنت بكتب بوست على مشكلة كل يوم اصعب شعور ان الانسان
يصحى من النوم الصبح غصب عنه لكن استفزني حاجة تانية فقولت هكتب عنها
نزلت من البيت انا وماما الساعة 4 علشان نروح نصلح العربية ونروح للدكتور
وبعدين لقيت كائن اقل ما يقال عنه انه غبي راكن عربيته بالعرض ورى عربيتنا ومكنش في مكان ااقدر اطلع منه وفضلنا ساعة ندور على صاحب العربية علشان يشيل عربيته وبعد ساعة جه يتمخطر ورجع بعربيته ومقالش حتى كلمة أسف كان نفسي جدا حد يضرب الكائن ده بالبوكس في مناخيره
وطبعا الساعة بقت 5 والدنيا زحمة يا دنيا زحمة ندور على مكان نوقف فيه الكتكوتة مفييييش

طب بلاش الميكانيكي خلينا نروح للدكتور الأول طب فين المكان اللي هنركن فيه ؟؟؟

ساعتين بلف في شارع الميكانيكي وعند العيادة بتاعت الدكتور ومش لاقيه مكان للوقوف فيه وخلاص مبقتش قادرة اسوق لأني اصلا تعبانة ده غير ما شاء الله الشوارع المكسرة والعجل والموتوسيكلات اللي فاكرين الطريق بتاعهم وبيمشوا يتمخطروا قدامك وكمان التكاتك والعربيات الكارو وغيرهم اللي بيمشوا عكس اتجاه الطريق والمشاة الحلوين اللي بيمشوا في نص الشارع وبعضهم لما بيعدي الطريق بيشاورلك علشان تقف له اصل جناب الوزير هيعدي الشارع وياريتهم بيبقوا ناس كبار في السن دول بيبقوا في سن الشباب

واللي زاد وغطى عربية كانت هتخبطني فاضطريت اقف صف تاني ثواني على ما اتفادى العربية التانية

وجه الباش أمين شرطة ربنا ياخده وكتبلي مخالفة اني واقفه صف تاني قولتله انا مش واقفه واللي حصل كذا كذا

قاللي خلاص انا كتبت المخالفة وهتدفع يعني هتدفع بس وحياة اللي خلق الكون لهقدم فيه شكوى بكرة ان شاء الله في المرور بعد كل ده وانا على اعصابي وماما كل شوية تقوللي يا بنتي بطلي عصبيتك دي انا خايفة تعملي حادثة و انا بجد تعبت ورفعت الراية البيضا وعلى رأي عمنا جاهين

مرغم عليك يا صُبح مغصوب يا ليل

لادخلتها برِجْليَّا ولا كانلي ميل

شايلنِّي شيل دخلت انا في الحياة

وبكره ح اخرج منها شايلِّني شيل

عجبي !!

1-وفي النهاية احب اقول مش مهم يبقى عندك عربية المهم تلاقي مكان تركنها فيه

2- كلمة قالها كاتب صحفي وانا موافقة جدا على رأييه

احنا مجتمعنا مجتمع الزحام وعايش بأخلاق الزحام خد واخطف والغايب مالوش نايب

3- بدل ما تروح للدكتور او الميكانيكي اطلب الشفا من عند ربنا ليك ولعربيتك انتا هتكفر ولا ايه :)

وقال ايه بيقولو مش هنبطل مش هنسيب مش هنسافر

قصدهم مش هنبطل نحرق في دمنا

مش هنسيب مكاننا في العباسية فاضي

واكيد مش هنسافر لأن بعد كل الضغط العصبي ده هيجيلنا شلل اطفال

يلا كل حد يحكيلي عن يومه وبيصحى ازاي من النوم في الصباح الباكر

وايه المواقف الطريفة او الخنيقة اللي بتتعرضوا ليها
وادينا بندردش ورانا ايه ورانا ايه

حريييييقة بس الحمد لله قدر ولطف

ملحوظة : كنت ناوية اني مكتبش في المدونة تاني ابدا لكن الكلام اللي قالوه كل المدونين اللي بحبهم وبثق في كلامهم يدوب الحجر ده غير انه حصل حاجة النهاردة مكنتش اتخييل انها ممكن تحصللي في حياتي برغم اني كنت حاسة انها ممكن تحصل اذا كان مجلس الشورى اتحرق يبقى اي حاجة ممكن تحصل وخفت عليكم جدا فقولت احكيها يمكن حد يستفيد منها

الموبايل : تيرا را تا تيرا را تن تن تن تن (بيرن بمقطوعة موسيقية اسمها دمي ودموعي وابتسامتي)
وكانت اللي بتطلبني كيكي ومكنتش قادرة ارد عالموبايل وبعد اصرار كيكي واتصالاتها الكتير رديت عليها
كيكي : ايه يا بنتي مبتروديش ليه
انا : مش عايزة اخسرك رصيد
كيكي : تخسريني ايه وبتاع ايه انا عايزة اتطمن عليكي
انا : عايزة تطمني عليا علشان الحادثة صح اومال لو عرفتي اللي حصل النهاردة
كيكي : ايوة يا بنتي ايه ده ايه اللي حصل النهاردة؟؟؟ قولي
انا : مفيش كان في حريقة عندنا بس
كيكي : (صوت مفزوع) ايه ايه اللي حصل ده وازاي حصل
حكيت لكيكي الموضوع بالتفصيل وهي مكانتش راضية تقفل الا لما اتطمنت ان مفيش حد حصلله حاجة الحمد لله
وياعيني خلصت رصيدها وقالتلي انتو محسودين جدا مش طبيعي اللي بيحصل معاكو ده ربنا يستر من المكالمة الجاية كل لما اكلمك يا بنتي الاقي حاجة حصلتلك كويس انك مموتيش ده انتي كده عجزتي مش بقيتي نوننة (ربنا يكرمك ويحميكي ويرضى عليكي يا كيكي والله بتعبك معايا
انتي القلب الكابير والاخت والصديقة اللي احسبها على خير ولا ازكي على الله احدا )

بإختصار موضوع الحريق ده كان عبارة عن يوم القيامة بس مصغر ومهما اتكلمت فيه مش هقدر اوصل الصورة كاملة

الموضوع بدأ بإني لقيت ماما بتجري ع الشباك وبتقولي اقفلي اللي ف ايدك ده اصلي كنت فاتحة الموبايل بصوت عالي وبسمع اغنية فيروز اديش كان في ناس واول لما قفلت الموبايل سمعت صوييييت صوييييت والله اصوات مرعبة فتحت الشباك ولقيت نار الله الموقدة تحت في الجنينة الصغنونة لأن فيها كشك خشبي كبيييير حد رمى عليه حاجة مولعة فولعت في الكشك

انا شوفت منظر النار وجه على بالي الجيران اللي الحريق تحت شقتهم على طول عمي ومراته وبنته مريم وبلا شعور جريت من غير حتى ما البس الحجاب ( ياااارب سامحني انا مكونتش في وعيي ) ولقيت النار وصلت شقة عمي وطالعه من الشباك ومرات عمي بتصرخ وبتنده عمي بصريخ
وانا واقفة مذهولة ومش قادرة اتصرف جريت بمريم على بره الشقة وفضلت واقفة ع السلم انا ومرات عمي كإني في دنيا تانيه لو كبيت ميه ع الشباك هتزيد النار اكتر احنا اخدنا كده في الفيزيا

وفجأه لقيت ماما شدتني ع البيت وقالتلي خدي البسي الاسدال (اسدال الصلاة) يا ليدي وكأني انتبهت وقولتلها هه اااه صحيح انا ازاي خرجت كده من غير حجاب وندمت جدا وفضلت استغفر ربنا سبحانه وتعالى وشيلت مريم وهديت مامتها بس هيهات مهديتش وفضلنا نقول يا رب الطف بينا , لا حول ولا قوة الا بالله , إنا لله وإنا اليه راجعون
و في نفس الوقت ماما بتملا مية هي ومرات عمي وبيودوها للناس وبيطفوا الحريق وانا شايلة مريم اللي كانت ماسكة فيا جدا ومرعوبة وبتعيط (مريم عندها سنة وشهرين) وبحاول اخليها متعيطش واطلع بيها من جو الحريق الخانق لان الدخان كان في كل مكان وكان ممكن نموت مخنوقين
وفضلت ادعي ربنا سبحانه وتعالى وهديت مريم وانا اللي عيطت

وشوية والاطفاء والاسعاف والبوليس جه والحمد لله فات ساعة ونص والحريق خلص على خير بس بعد ما خلص على اعصابنا وكلنا لا شعوريا عيطنا وقولنا الحمد لله قدر ولطف الحمد لله ولقينا رجلينا مش شايلانا

في خسائر مادية كتير لكن مفيش خسائر بشرية الحمد لله الا حروق بسيطة في ايد عمي
سبحان الله شوفت شظايا النار بتدخل من شباك بيتنا وبمجرد ما بتدخل النار بتنطفي لواحدها الحمد لله

وبجد لازم اقول حاجات مهمة جد ا :

1- لازم كل بيت ميخلاش من طفاية حريق هي ب120 جنيه تقريبا يعني حتى لو مفيش حد في مقدوره انه يجيبها يحوش لغاية لما يجيبها بجد الطفاية مهمة جدا وبتنقذ ارواح كتير وحاجات كتير لأن النار بتتحرك بسرعة في اقل من ثواني بتكون اكلت كل شيء

2- لازم نقرأ ونتعلم ازاي نواجه مواقف زي الحريق او الزلازل او اي نائبة من نوائب الدهر لان ثقافة ادارة الازمات عندنا مفقودة ومحدش يقول الكلام ده بعيد عني ومش ممكن يحصللي حتى لو حصل واحنا في الدراسة او الشغل او اي مكان نتعلم نعرف نتصرف ازاي وربنا يبعد اي حاجة وحشة عنكم وعننا

3- الاهتمام بالأطفال مهم جدا في وقت الأزمات لأنهم بيبقوا منهارين والازمة دي بتأثر في نفسيتهم طول العمر

4- حسن الظن بربنا سبحانه وتعالى والثقة انه مش ممكن يضيعنا

5- اكتشفت اني مبعرفش اصوت واصرخ

6- متقولوش اني نحس بقى لأن اختبارات ربنا سبحانه وتعالى نازلة ترف عليا
الحمد لله على كل حال ونعوذ بالله من حال اهل النار

ملحوظة : هرد على التعليقات بتاعت البوست اللي فات ان شاء الله

اخر تاج وشكرا لكم

يااااااه الحقيقة مش عارفة أقول إيه

اشكركم ع ال100 تعليق اللي في البوست اللي فات

ولا عالورد اللي ملا البلوج ولا عالايميل اللي اتملا رسائل

ولا عالموبايل اللي مبطلش رن كل الناس بتسأل عليا بعد الحادثة (طبعا مفيش حاجة من دي حصلت)

مفيش حد سأل عليا في البلوج غير mohamed ghalia

وأكيد انا ممتنة جدا للتعليق ده وشكرا ليك يا اخي الكريم محمد

مش عارفة ليه خطر على بالي كلام الفنان نور الشريف في فيلم المصير لما قال ( انا بكتب ليه ولمين)

انا هجاوب على التاج ده ان شاء الله ويمكن يكون اخر تاج واخر بوست اكتبه في المدونة

وهحل التاج علشان فكرته الرائعة وهحله يمكن يوصلني او يوصل اي حد فكر يقرأه للسعادة المفقودة

بسم الله ابدأ

السؤال الأول:ماهى السعادة من وجهة نظرك؟

السعادة شعور نسبي بيختلف من انسان للتاني بس مبيختلفش عليه اتنين انه من احلى المشاعر اللي ممكن الانسان يحس بيها

بيتمناها أي انسان بيعيش في الحياة وكلنا بنحاول نوصل للشعور الجميل والغامض ده و كل انسان بيوصل للسعادة بطريقته وعلى حسب فهمه للحياة

السؤال الثانى: كيف تصل إلى السعادة؟

السعادة ليها طرق كتير جدا على حسب شخصية كل انسان

بس انا بصل للسعادة بإني اسمع موسيقى بحبها او اشوف فيلم بحبه او اتكلم مع شخص بحبه

او ازور مكان بحبه

السؤال الثالث: هل السعادة وهم أم أنها حلم صعب؟

السعادة في الدنيا محددة مش مطلقة بمعنى ان في عز الفرح والسعادة لازم يكون في تنغيص وحزن

لكن السعادة الكاملة في الجنة علشان كده السعادة الكاملة وهم وحلم صعب تحقيقه في الدنيا وده من وجهة نظري المتواضعة

السؤال الرابع: هل السعادة طريق للنجاح ؟وضح؟

أكيد الانسان لما بيكون سعيد بيقدر ينجح في حياته لأن السعادة بتعطيه امل و تفاؤل وحب للحياه
السؤال الخامس: ماهى أكثر اللحظات التى شعرت فيها بالسعادة؟

اول مرة شوفت المسجد النبوي واول مرة اصلي في الروضة الشريفة وانا مدركة ان الروضة الشريفة روضة من رياض الجنة ، ولما زرت قبر النبي ايوب , ولما نجحت في امتحان القيادة لأني اخدت رخصة القيادة بعد عذاب وبعد تاني امتحان , ولما بشوف ضحكة طفل جميل وبريء لسه متعبتوش الحياة , ولما والدي ووالدتي بيكونوا راضيين عني
السؤال السادس:هل ممكن أن تحقق كل شىء؟

بالنسبة لي صعب احقق كل شيء

لكن بالنسبة للانسان عامة ف ممكن يحقق كل شيء ليه لأ؟
السؤال السابع: السعادة تجعلك تقبل على الحياة أم لا؟

السؤال ده شبه السؤال الرابع

أكيد السعادة بتجعل اي انسان يقبل على الحياة بكل حب
السؤال الثامن: هل أحسست يوما انك وصلت لقمة السعادة؟

ايوة اخر مرة زرت الروضة النبوية الشريفة لأني دخلتها انا مع والدتي وصلينا ودعينا في أ جمل مكان في الأرض الروضة الشريفة فعلا روضة من رياض الجنة وبحس بقمة السعادة والسكينة والرحمة وانا هناك
السؤال التاسع: لماذا تمر أوقات السعادة بسرعة؟

هي دي سنة الحياة بتسرق الفرح مننا اومال هتبقى دنيا ليه بقى ما هي دنيا علشان الحاجات الجميلة فيها مش بتكون دايما جميلة
السؤال العاشر: هل ترى السعادة فى التدين؟

أكيد في سعادة في التدين بس لما يكون التدين وسطي مش متشدد

سؤال الحادى عشر: هل أنت متفاؤل وعندك أمل؟ وضح؟

احيانا ايوة و احيانا لأ
السؤال الثانى عشر: إذا شعرت بالحزن ماذا تفعل؟

على حسب الموقف غالبا بحكي لوالدتي عن سبب حزني

او بعمل زي حنان ترك في مسلسل سارة وبناااام كتييييير لغاية لما انسى سبب الحزن ده

او بصلي او بقرأ قران او بسافر
السؤال الثالث عشر: هل يستمر معك الحزن فترة ام ينقضى فى الحال؟

على حسب الموقف برضه بس غالبا بيستمر فترة
السؤال الرابع عشر: ما رأيك فى الأفراد المتشائمين

احيانا بيكون عندهم حق في تشائمهم بس مفيش حاجة في ديننا اسمها تشائم

قال رسول الله صلى الله عليه وسلم (( تفائلوا بالخير تجدوه))

حادث على الطريق

النهاردة كان يوم عادي في اوله مكنتش عايزة اروح الكلية وفعلا فوتت محاضرتين والمحاضرة التالتة كانت الساعة 2 الضهر واضطريت انزل الكلية علشان مامتي متزعلش وقد كان
وحصل ما لا يحمد عقباه عملت حادثة جديدة تنضم لمجلد الحوادث اللي عملتها قبل كده بالفوفو بس حوادث الفوفو اسهل شوية من حادثة بعربية بابا
اللي حصل ان العربية كانت في وسط عربيات كتير ولما طلعت لقيت عربية عمي العزيز راكنها صف تاني فكان لازم ارجع بالعربية لغاية اخر الشارع والف من اخر الشارع علشان مخبطش عربيته علما ان الشارع ده رايح جاي والعربيات بتيجي مندفعه فيه فكنت خايفة جدا وبحاول ان حركتي تكون سريعة و فعلا رجعت بالعربية بسرعة وفجأه طاااااااااااااااخ ده صوت اصطدام شنطة العربية ببرميل زبالة ضخم والمشكلة انه مكنش باين في المراية و كل الناس بصولي لما سمعوا الصوت ده بما فيهم عمي ومحدش فكر اساسا انه يقوللي حصلك حاجة؟؟ ونزلت اشوف ايه اللي حصل لقيت جزء من الشنطة اتطبق وطلع الدهان بتاعه والفلاشر اتفشفش
معرفتش اعمل ايه بس اتضايقت واتعصبت جدا ان عمي واللي الناس متعرفوش انه يبقى اخو ابويا طنشني بس عادي داين تدان
شوية ووقفت بالعربية وانا اعصابي تعبانه ومش شايفة قدامي (ودي مش مبالغة ) كلمت ماما في التليفون وياعيني فزعتها ومامتي حبيبتي طمنتني وهدأت من روعي ودعتلي وكانت كل 5 دقائق بتتصل علشان تطمن عليا وحتى بعد الكلية لما روحت البيت لقيت انها في حالة يرثى لها وقلقانة جدا عليا
طبعا قضيت اليوم في نكد ودموع بس مع نفسي وبعيد عن زميلاتي
وهيهات انه ميبانش عليا اني مضايقة وبعد المحاضرة زميلاتي لاحظوا اني متغيرة وحكيتلهم عالحادثة ووصيتهم يدعولي دايما وانتوا كمان امانة عليكم تدعولي لأن دعاء المسلم لأخوه المسلم بظهر الغيب مستجاب
وبابا كلمنا بالليل فبيقوللي اخبارك ايه يا نونا والكتكوتة عاملة معاكي ايه فقلبت الموضوع هزار
وقلت لبابا طول ما عربيتك معايا لا تقلق اطلااااقا
قاللي : ااااه ربنا يستر عملتي ايه في العربيه
انا : سليمة يا بابا بس برضه طول ما عربيتك معايا لا تقلق اطلااااااقاااااا :)

بابا : يعني بسيطة يعني

انا : الحمد لله وطول ما الكتكوتة معايا لا تقلق اطلاااااقاااا

من شوية نزلنا انا ومامتي نشوف الخبطة بتاعت الحادثة وماما قالتلي ان كده سعر العربية هيقل جدا لما نبيعها

ربنا يجعلها اخر الحوادث واخر الأحزان وقدر الله وما شاء فعل

**************************
وشكرا يا كيكي قلب الأم يا جميلة مش غريب وقوفك جنبي اصلا لأني عارفة انك اختي الانتيم
ونجاملك يوم فرحك ان شاء الله بس مش انا اللي هزفك بقى علشان انا غاوية حوادث ههههههه

ما بين حاضري وأمسي (بوست 2 في 1)

اول امبارح كتبت كلمات وكنت في قمة الحزن وامبارح حسيت ان عندي صبر ورضا بكل شيء يكتبه ربنا سبحانه وتعالى
هكتب الكلمات وهحكيلكم ايه اللي حصل معايا امبارح

قلبي حزين
وأرى دموعي تنهمر علها تطفئ ما بقلبي من هموم تحرقني
أراحل انتا عني وتاركني لحياة مخيفة
أأعدت حقيبتك للسفر وقررت أن تنساني
قل لي يا حبيبي من يبقى لي بعدك
من سيخاف علي ويحميني
خائفة انا عليك من شرور الدنيا
وخائفة عليك من خيوط ضوء وهمي تنسيك شمسك المضيئة
قل لي يا حبيبي الى متى البعاد
لقد سئمت من لعب دور الفتاة المسؤلة الناضجة
لست كذالك فأنا مجرد طفلة لم تستطع ان تكبر بعد
واحتاج اليك
فليحفظك الله لنا يا أغلى حبيب في حياتي

وبعد كتابة الكلمات دي وقبل الفجر بشوية نمت ونامت معايا دموعي
وبعد ساعة ونص بالضبط ماما صحتني من النوم بمعجزة علشان
السواق اللي كان هيوصل بابتي المطار حصلتله ظروف ومش هيقدر يسافر واحنا هنسافر مع بابتي كنت عايزة اكون مع بابا اطول وقت ممكن لكن هو كان رافض تماما اننا نروح معاه المطار وقاللي كام ساعة مش هتفرق يعني ومع ذلك ربنا سبحانه وتعالى استجاب دعائي وروحنا معاه المطار هييييييييه

احنا بيننا وبين المطار 300 كيلو تقريبا- يمكن اكتر ويمكن اقل بس دي مسافة تقريبية-
واحنا في الطريق شوفنا حوادث كتير وبابا كان قلقان علينا جدا واحنا راجعين
اول حادثة عربية صغنونة وجميلة جدا اتدمرت مع انها لسه جديدة بس الحمد لله صاحبها نجى من الحادثة الرهيبة دي واكيد ده المهم
وتاني حادثة هي الاصعب سواق الميكروباص اتبهدل واخدوه على مستشفى( يا الدفع يا الموت الدولية)
وهناك الدفع بالدولار لأنها مستشفى خاصة و دولية
وصلنا المطار وبابا خلص اجرائات سفره وماما اصرت انها تسوق الكتكوتة في القاهرة
معظم عربيات القاهرة مخبوطة وبجد لولا ستر ربنا وذكاء مامتي كان زماننا مرجعناش من القاهرة لأن السواقين بجد مفيش عندهم ادنى مسؤلية ولا حتى ذوق والعربيات اللي بتغلط اكتر حاجة هما الاتوبيسات والتريلات والمقطورات الكبيرة ودول صعب تفادي اخطائهم
الحمد لله ربنا حمانا من حوادث كتير على الطريق كان ممكن تودينا الدار الأخره فورا وكل ده من تهور السواقين اللي مفيش عندهم ابسط قواعد القيادة الأمنة وال بيقولوا قانون الغرور الجديد ال

اخدنا ريست شوية في الطريق ونزلنا صلينا وراجعين العربية تاني انا اللي هسوق بقى
الكتكوتة مرضيتش تدور ابداااا المفتاح مرضاش يدخل في الكونتاك
وفكرنا ان الكهربا فصلت مثلا
والشخص المسؤل عن المسجد كلم لنا كهربائي
وفي عربية ناس لما صلوا وطلعوا من المسجد وقفوا يساعدونا
هما زقوا العربية بتاعتهم قدام عربيتنا يعني باب عربيتهم قدام الكبوت بتاع عربيتنا وكان في شخص واقف بين العربيتين وحصلت غلطة بشعة مني
حاولت ادور العربية ودارت فعلا ونطت على الشخص اللي واقف بين باب عربيته وبين كبوت عربيتنا
يعني كان هيتعمل كوفتة و والله لغاية دلوقتي مش عارفة ربنا سبحانه وتعالى انقذه
ازاي والحقيقة هو طلع انسان كويس جدا وقاللي الحمد لله انا سليم متخافيش
و كان قلقان على عربيته لا تكون اتخدشت اكتر ما كان قلقان على نفسه
الغريب بقى ان الاشخاص اللي ساعدونا دول كانوا ملتحين وبرغم كده كانوا شيك جدا وذوق جدا
وانا كانت فكرتي وحشة جدا عن كل الناس الملتحيين كنت بحس انهم متشددين جدا في الدين
وان اخر حد ممكن يساعد الناس هما

وبعد لما مشينا على الطريق لغاية لما وصلنا البيت كنت عمالة اقول الحمد لله . الحمد لله
ربنا قدر ولطف الحمد لله

وبعد شوية ماما شغلت موسيقى البوم مسلسل نور وبجد حسيت اني ارتحت نفسويا وقدرت اكمل الطريق لما سمعت الموسيقى الرومانسية الحالمة دي بجد موسيقى جميلة جدا كل يوم لازم اسمعها مع اني مشوفتش الا حلقة واحدة من المسلسل ومش شايفة مهند ده وسيم يعني بس بيقولو انه كان رومانسي جدا مع نور
ويا سلام على منظر الشمس الجميلة لما بتميل على النيل وكأن امواجه اتحولت لدهب سبحان الله ده جمال الدنيا اومال جمال الجنة ايه بقى

وفي الأخر نطلع من البوست الكابير ده بشوية حاجات منها :

1- لازم نبقى قويين لما حد بنحبه يسافر ومنعيطش طول الليل علشان منصدعش ومنصحاش من النوم من النوم عنتيننا منفوخة

2- الحوادث مسؤليتنا كلنا السواقين علشان سرعاتهم الجنونية مع ان الطرق مش مساعدة والمشاة على الطريق ووقوفهم في نص الطريق ببرود شديد ولا مبالاة بالعربيات المندفعة واللي مش هتقدر تقف في الوقت المناسب

3- ربنا معانا في كل وقت وخلقنا وبيحمينا وبيحبنا مش زي الرأي الغريب للكاتب توماس هارديز اللي بيقول ان ربنا خلقنا علشان ينتقم مننا ويعذبنا !!

4- الصبر في الشدائد مش اول لما نتعرض لمحنة نتضايق ونتذمر ونقول ليه كده يا رب

5- القرأن الكريم وذكر الله سبحانه وتعالى والاستغفار بيهدي النفس وبيخرج من الشدائد

6- المفروض منتخدعش بالمظاهر ومنحكمش على الناس الا لما نتعامل معاهم

7- الموسيقى الجميلة مش المبتذلة والطبيعة الرائعة من احلى الحاجات في الدنيا

الحمد لله اني مش شاب

من فترة قريبة روحنا محل داماس (اللي نانسي عجرم بتعلن عنه)علشان نشوف اسعار الدهب ففي قلب بيتعلق في السلسلة عجبني جدا كان قلب صغنون متلون بألوان الطيف وبجد كان شكله رائع سألت عن سعره وحسيت اني اتجمدت في مكاني لما عرفت سعره بجد كان غالي جدا لدرجة لا يصدقها عقل طلعنا من المحل وانا بقول الحمد لله اني مش شاب الحمد لله مش مطلوب مني مهر وشبكة ( انا اللي هيجيلي مهر وشبكة ان شاء الله :))) ) اذا كان سعر قلب صغنون كده اومال اسعار اطقم الدهب اللي بتيجي في الشبكة ايه بقى (الله يكون في عون الشباب)
والحمد لله اني بنوتة مش شاب
وفي موضوع الدهب برضه بنت خالتي راحت تجيب الدبلة امبارح عقبالكم كلكم لو لسه متخطبتوش او مخطبتوش :) فاختارت دبلة وتوينز او بعض الناس بيسموه محبس وكمان خاتم صغنون وخفيف كل ده بكام بقى حضروا نفسكم للصدمة الحاجات البسيطة دي بألفين ونص جنيها مصريا (وده غير الشبكة)
فلما سمعت الرقم ده قلت الحمد لله اني بنوتة مش شاب

نيجي بقى لحاجة تانية غير الذهب وننتقل لمرحلة ما قبل يوم الزفاف
كنت انا وصحباتي عند الكوافيرة فحبيت اسألها على تكاليف حجز العروسة عندها وسألتني هي العروسة محجبة ولا هتعمل فورمة في شعرها قولتلها محجبة صدمتني وقالتلي 700 جنية ما شاء الله يوم واحد بس وقبله 4 مرات ماسك ب700 جنيه ولو العروسة مش محجبة ف هتتكلف اكتر على حسب طول شعرها وكثافته يعني ممكن تعدي ال1000 جنيه واعتقد ان المتعارف عليه ان العريس هو اللي بيدفع فلوس الكوافيرة

والحمد لله اني بنوتة ومش شاب

ده طبعا غير مصاريف الخطوبة والشقة والموبيليا وفستانين الخطوبة والفرح وقاعة الفرح وباقي مصاريف الفرح ومش هقول شهر العسل لأن غالبا مفيش ناس كتير بتسافر في شهر العسل وطبعا انا مذكرتش مصاريف المناسبات اعياد الفطر والاضحى وعيد الحب وعيد الميلاد ...... الخ وكل ده عالعريس الغلبان والله صعبانين عليا

ونطلع من هذا البوست اللي أكيد خنق اي شاب بيقرأه انه : بالرغم ان البنوتات مظلومين في مجتمعنا الذكوري بلا شك لكن بيجيلهم يوم وبياخدوا حقهم ولو مرة وبالرغم ان البنوتات بيجيبوا حاجات بيسموها الرفايع الا انها مش رفايع ابدا ومرهقة ماديا ومعنويا لأن البنوتات مش أي حاجة بترضيهم وبيلفوا كتير لغاية لما يلاقوا الحاجات اللي في خيالهم وبيدورا عليها وبجد الحمد لله اني بنوتة والله يكون في عون الشباب واعتقد بعد كل الكلام ده لازم الزوج والزوجة يقدروا بعض لأن هما الاتنين تعبوا لغاية لما بنوا مملكتهم الصغنونة الف مبروووك يا بنت خالتو ويا دبلة الخطوبة عقبالنا كلنا بس بعد الكلية لأن صاحب بالين كداب

انا فرحانة جدا جدا ليكي وعقبالي بعد الكلية ان شاء الله لوووووووووولي

حودافون هنسرقك يعني هنسرقك

شركة حودافون المحترمة سرقوا رصيدي 100 مرة وقال ايه عاملين اعلان عن النت بجنية في اليوم من الموبايل

يا سلام اومال ليه بياخدوا 10 جنية

ليه مفيش صدق وليه مبيقولوش سعر النت من الاول انه مش ب 1 جنيه مصري في اليوم بل ب 10 جنية ولكن نسيو الصفر

الكلام مش واحد اصلا و كل الحاجات في المحروسة بالشكل ده يقولو حاجة وتلاقي الواقع حاجة تانيه
والله انا زهقت ليه بلدي واسفة في اللفظ متخلفة كده

طب ما هي عمان دولة عربية برضه بس كلمتهم واحدة ولما بيعلنوا عن خدمة بتكون بجد مش هبل زي هنا

في بلدي العزيزة بيتحججوا بزيادة السكان مع ان في بلاد سكانها اكتر من هنا مليون مرة وعايشين كويس

طبعا مسكتش على سرقة الرصيد دي واتصلت ب خدمة العملاء واتصلت 4 مرات ومكنوش بيردوا واخر مرة لما زهقوا ردت عليا واحدة سنيورة سألتني عن اسمي وقولته ليها 3 مرات سيادتها مكانتش سامعه

وقولتلها عن رصيدي خلص ليه انا عايزة اعرف ايه المكالمات اللي انا عملتها علشان الرصيد يخلص بالشكل ده مش النت ب جنية واحد في اليوم

قالتلي ايوة طبعا بس انا مقدرش اطلع بيان المكالمات من الكمبيوتر دلوقتي اتصلي بينا بكرة (زي فوت علينا بكرة)

بجد؟؟؟؟؟!!!!!!!! متقدرش تطلع بيان المكالمات دلوقتي على اساس ان اللي قدامها ده مش كمبيوتر لكن كيس جوافة وبيطلع البيانات بعد 24 ساعة

قمة الهبل بجد انا كان هيجيلي سكتة قلبيه من كتر الانفعال اللي كنت فيه لو مكنتش كتبت البوست ده

منهم لله اللي وصلوا البلد للحال الغريب ده

واخيرا قررت اني هرمي خط حودافون في الزبالة وهجيب خط ام نبيل اما نشوف ايه اللي هيحصل

يوم أخر من حياتي

تنويه :بجد انا عارفة اني مقصرة جدا في اني اعلق عند كل المدونين اللي بحب اتابعهم بس اللي لازم تتأكدوا منه اني بزور كل المدونات ومتبعاها بس مش بعرف ارد لان بجد معنديش وقت خالص حتى البوستات بكتبها بين المحاضرات في الكلية وكمان النت عندي فاصل فبدخل النت من الموبايل او بالدايل اب
-----------------------

كالعادة لازم اصحى من النوم بدري علشان اروح للمحروسة من عين الحساد كليتنا الموقرة
بابا حبيبي ربنا يشفيه وميحرمنيش منه يا رب بيصحيني من النوم كل 5 ثواني ( ليدي قومي علشان الكلية)

وماما كل 3 ثواني ليدي قومي إتأخرتي عالكلية

في الأخر بضطر اقوم غصب عني لأن خلاص النوم بيكون طار من عنتيني

قال يعني رايحة اكسفورد ولا كامبريدج

وكالعادة برضة بقف قدام الدولاب نص ساعة اختار هلبس ايه؟؟؟!

وبعد تثاقل لبست ونازلة من البيت ماما قالتلي كلمة كل يوم (( كل يوم احضر الفطار اللي بتحبيه وانتي متفطريش )) وانا مبررة موقفي : معلش بقى يا مامتي مليش نفس واتأخرت عالسيكشن

وبابا حبيبي وصلني ياااه من فترة كبيرة موصلنيش الكلية واخر مرة وصلني زميلاتي حسدوه يا عيني

وقالولي اول لما دخلت الكلية : مبروك الخطوبة لما انتي اتخطبتي معزمتيناش ليه

انا : اتخطبت ؟؟؟؟؟!

زميلاتي : بلاش انكار مش القمر اللي بيوصلك ده خطيبك

انا : خطيبي ازاي يعني ده بابايا

زميلاتي : واو باباكي ازاي ده أمور اوي

انا (وانا بغلي من جوايا من كلامهم)والله بابايا خلاص بقى يلا نلحق المحاضرة
وبعدها على طول رجلاية من رجلتين بابتي اتكسرت كسر خفيف ومقدرش يوصلني تاني الكلية وبصراحة انا خفت عليه اوي وقلتله ميوصلنيش الكلية تاني وحكيتلو ع اللي حصل مع زميلاتي
الكلام ده كله افتكرته واحنا في طريق الكلية الى جانب اني كنت مخنوقة من اني رايحة الكلية اصلا

فبابا لمح اني مضايقة ومكشرة وقاللي : مالك يا نوننة (اسمي برضه)
قلتله : مضايقة يا بابا رايحة الكلية واتأخرت عالسيكشن
قاللي : كإنك رايحة جامعة القاهرة هو ناقص ايه على جامعة القاهرة يعني الساعة طيب
تن تن تن تن تن تن تن تن

انا : :) :)

وصلنا الكلية وانا بسلم على بابا قاللي : افتكري تن تن تن تن تن تن تن تن

انا : :) :)ماشي يا بابا سلام

طبعا فضلت ادور على مكان السيكشن وتايهه وبعد فترة وصلت لمكان زحمة واوضة شبه اوضة الفيران
فيها البني ادمين كإنهم في علبة سردين وعرفت ان ده عقاب اللي يدخل كلية حكومية
المعيدة العتيدة قالتلنا هتشرح للجروب التاني كمان 3/4 ساعة قلنا كويس هتكون الزحمة دي خفت
ورحت انا وباقي زميلاتي المكتبة علشان نشتري باقي الكتب
وللأسف رجعنا لقينا المعيدة الشوريرة بدأت السيكشن التاني قبل معاده بربع ساعة
وتخيلو المشهد رؤوس فوق بعضيها وبنوتات قاعدين ع الشبابيك واحنا في الدور التاني عايزين ينتحروا تقريبا
وموجة حر طالعة من السيكشن ومفيش ولا ذرة اكسجين
وقفت شوية ع الباب انا وحشد هائل من البنوتات وكنت بسمع شوية وبطلع اتنفس شوية وخلص السيكشن ومحاضرة الدراما

وطلعت من الكلية وماما اصرت اني اسوق الكتكوتة علشانها تعبانة

لأول مرة اضطر اسوق الكتكوتة بتاعت بابتي في عز الزحمة وشكلها غارت من فوفو حبيبتي اللي وحشتني وجت في عز الزحمة ووقفت فأجه والعربيات اللي ورانا كانت هتعملنا سندويتش لولا ربنا ستر

ومحمد ثروت وقتها كان بيستفزني وعمال يغني حلوة حلوة الدنيا حلوة يا حياتي حلوة بيك في الكاسيت ومخليني مش مركزة

وبعد شوية لما الكتكوتة دارت بضحك مع ماما و بقولها ما احنا لو كنا مشغلين شريط حماقي مكنتش الكتكوتة عطلت ماما ضحكت وقالتلي ايوة هو العيب في الشريط المرة الجاية نسمع حماقي :)

بس بجد كان يوم لذيذ
واهو يوم مر من ايام حياتي بيقربني من ان يبقى عندي عشرين سنة

ايييييه يلا حسن الختام

سلام