الثلاثاء، 30 سبتمبر، 2008

عيد كميل

كل سنة وانتم طيبين ومعيدين
ومن الكحك والبيتي فور مش محرومين
ومودكم حلو ومش متضايقين ولا زعلانين

أهلا أهلا بالعيد مرحب مرحب بالعيد هيه هيه هيييييييييييه

حاولوا تتخيلوا أغنية يا ليلة العيد لأم كلثوم لأني حطاها ع البلوج وهي مش راضية تشتغل عاااا
بجد أنا سعيدة جدا جدا بكل المدونين الرائعين اللي سبقوني وعيدوا عليا بجد انا متشكرة جدا وربنا ميحرمنيش منكم
ومعلش اعذروني على قلة الرد على التعليقات الرائعة دي كلها بس انا متابعاها وبقرأها كلها وهرد عليها ان شاء الله

اسمحولي اريحكم مني شوية بقى الجماهير تناديني من فترة : (عودي يا هاميس , عودي لأتون , عودي لأخيتاتون , عودي لوادي النيل ) وأديني بسمع الكلام زي الشطورة وأن الأوان اني ارجع لبلدي البسبوسة علشان الكلية اللي بتطلعلي لسانها وبتقوللي هتيجي هتيجي
و كمان علشان حب الجماهير اللي كل شوية يقولولي هتنزلي مصر امتى (كيكي , كيارا , مستر هاني زينهم , ده غير اصدقائي , وزميلاتي في الكلية)

ياريت أي حد ضايقته يسامحني لأن الله أعلم هنتقابل تاني ولا لأ

انا متابعة كل التعليقات عالبوست ده واللي فات وبشكركم كلكم وبجد هتوحشوني انا هتابع الردود وبدخل النت من الموبايل بس صعب او يكاد يكون مستحيل اني ارد على التعليقات اذا كان بدخل بس عالبلوج وبلاقي مسج بكرهها جيالي (لقد نفذ رصيدكم برجاء اعادة شحن البطاقة )

لا اله الا الله

استودعكم الله الذي لا تضيع ودائعه


الجمعة، 26 سبتمبر، 2008

ايطاليانو

صفحة من مذكراتي كنت كاتباها في بدايات المدونة وقلت انشرها عالمدونة دلوقتي علشان المود mood الرمادي اللي مش لطشيف اللي انا فيه فمش عايزة اكتب حاجة فيها استئكاب اغير بقى وربنا يكرمني واطلع من المود ده لأنه طول قوي وانا زهقت منه
--------------------------------
هو في ايه
لا بجد بجد في ايه
البلوج بتاعي بيزوروه الايطاليين يا جودعاااااان بغض النظر عن اي جنسيات تانيه بيزوروا المدونة
ويمشوا وميسيبوش اي انطباع لكن اخواننا الايطاليين موصريين جدا جدا اني ازور المدونات بتاعتهم
( وفي مدونات ايطالية جميلة جدا طبعا عرفت ده من ترجمة المدونات دي)
ولو حصل وتجاهلت تعليق ليهم في التشات بوكس بيكتبوه تاني مفيش اي مشكله وبالايطالي والانجليزي علشان ميكونش عندي حجة
على اساس ان الجامعات المصرية الموقرة بتعلم كويس علشان ابقى ضليعة في اللغة الانجليزية يعني
طب هما عرفوا منين اني بعشق اللغة الايطالية وكان نفسي اتعلمها في الكلية كلغة تانيه بدل الفرنساوي اللي
مزهقني في حياتي علشان الداكتور بتاع المادة متعلم بطيخي مش فرنساوي
(داكتور حامض ربنا ينتقم منه)
الايطالية لغة لذيذه فيها عبق التاريخ والبيتزا والمكروووووونة واللزانيا اللي بموت فيهم
بجد مش بهزر لغة قوية يا سلااااام لما تلاقي حد بيقول جررررااااااتسي سينيوري
ولا يمكن كانوا حاضرين معانا محاضرة تاريخ اوروبا في اولى ( كل لية وانتا تتخن) يوووووه اقصد كلية
في المحاضرة دي كل الموجودين معلوماتهم كانت فظيعة عن ايطاليا لدرجة ان زميلة لينا كانت في البنش اللي ورايا
وقالت مش ايطاليا دي بتاعت برج بيتزا المائل طبعا انا فطست من الضحك وقلتلها لأ ايطاليا دي بتاعت
برج مكرونة اللي اتصلح حاله ومبقاش مايل وكمان الداكتور جاب الخريطه وقالنا ها مين هيطلع ايطاليا من الخريطة
على فكرة هي على شكل حاجه مشهورة
انا افتكرت انها على شكل شوز بكعب عالي فقلت لزميلاتي اللي معايا في البنش
فزميلة لينا سمعت كلامنا وقلت للدكتر يا داكتور عارفاها ايطاليا دي على شكل كوتشي في الخريطه
(معلش سمعت غلط او بتضيف معلومات من عنديها )
انا خلاص كنت في المحاضره نفسي اقوم اصرخ واقول يا ناس يا هووووو ايطاليا دي فيها كذا وكذا وكذا وهي اصل الحضارة الاوربية
بس مين وانتا اذ ناديت اسمعت حيا
ولكن لا حياة لمن تنادي

الأحد، 21 سبتمبر، 2008

حلم من أجمل أحلامي


بيت جميل جدا عالبحر وفيه جنينة كبيرة فيها كل الورود اللي بحبها (ورود بمبي وأبيض وأحمر وفل

وياسمين ولافندر وأشجار كتير فيها كل الفواكه اللي بحبها وعارفاها واللي مش عارفاها)
وانا هناك مع حبيبي (المجهول حاليا) وكل اللي بحبهم , وكمان فيه بيسين (حمام سباحة ) لما تعوم فيه تلاقي السمك بألوانه الزاهية الجميلة حواليك وكمان لو غطست بتتنفس عادي جدا ومش ممكن تتعب




والجو المحيط بالبيت انا اللي بختاره سواء كان مطر او شمس خفيفة

وبمجرد ما بفكر في حاجة بلاقيها قدامي (وده الحمد لله ساعات بيحصل معايا في الدنيا وحتى لو نسيت الحاجة اللي اتمنيتها الحمد لله بلاقيها اتحققت ولو بعد فترة كبيرة)

الحياة هناك جميلة واكثر من رائعة وجيراني ناس حبوبين جدا وطيبين وانا بحبهم وهما بيحبوني وكلنا فرحانين مفيش حزن ابدا والبيت كإنه لؤلؤة أو دهب والعطور والنور ظاهرين فيه

بس للأسف مش قادرة اروح للبيت ده وللحياة الجميلة دي لأني مش بعمل ليها وبتمناها كتير وبفكر فيها ويمكن هي من اقوى الأسباب لأستمراري في حياتي علشان حاسة ان ربنا سبحانة وتعالى مش هيخذلني و في يوم من الأيام هروح للحياة الجميلة دي

يا ترى خمنتوا انا بتكلم على ايه ؟؟؟
انا بتكلم على بيتي اللي بتمناه في الجنة واللي بحاول اعمل ليه بس مش عارفة
كل ما اقول اتقدمت خطوة برجع 100 خطوة وحاسة ان الخير قليل اوي واللي بيساعدوا على الخير قليلين جدا جدا جدا لكن الشر كتير واللي بيساعدوا عليه في كل مكان وكمان بيزينوه وبيخلوه بشكل حلو مع انه في الحقيقة كل الشر هلاك

يا رب انتا وحدك عارف ان حياتي مبقاش ليها اي طعم وحاسة انها ايام وبقضيها وفي شباب وبنات كتيرحاسين نفس الاحساس لكن دي ارداتك ومشيئتك وحكمتك وعدلك يا اعدل العادلين وانا راضية بقضائك
يا رب كل كلامي عن بيتي اللي بتمناه في جنتك ميجيش ذرة من بيوت الجنة ونعيمها ويا رب انتا القادر على اجابة دعائي يا ملك الملوك واغنى الاغنياء اللهم تقبل مني واستجب يا ارحم الراحمين
يا رب انتا عارف اني مش ممكن استحمل ذرة من عذاب النار اللهم انك كريم عفو تحب العفو فأعفو عنا
يا رب يا أرحم الراحمين وأكرم الأكرمين ارضى عنا ويسر حياتنا
يا ربي يا عظيم يا حليم يا من له الاسم الاعظم والاسماء الحسنى انا متأكده اننا هندخل الجنة برحمتك مش بعملنا
ولكن يسر لنا طاعتك وحببنا فيها لترضى عنا وتباهي بنا الملائكة
يا رب قلت انا عند ظن عبدي بي وانا ظني بيك انك رحمان ورحيم وكريم وبتحبنا وانعمت علينا نعم كتير منها الاسلام فأتمم نعمك علينا وارضى عنا واعتقنا من النار


اللهم اجعل كلامي خالصا لوجهك الكريم

(يا جماعة انا كنت كاتبة البوست ده في الاجندة بتاعتي ومكنتش ناوية اكتبه على المدونة علشان خايفة ان الموضوع يدخل فيه رياء مثلا وخايفة ان الردود تضيع ثواب دعائي بس كتبته لغرض واحد بس علشان اللي بيفكر في احلامه في الدنيا بس ومقضيها ويائس ومخنوق
حياتنا التانية برضه تستحق الأحلام والرجاء من الله سبحانه وتعالى
وعلى فكرة فكرة البوست اخدتها من احد برامج الداعية عمرو خالد هو قال الفكرة دي وانا نفذتها بس لسه مش قادرة اطبقها صح)

الأربعاء، 17 سبتمبر، 2008

نظرات فتاة في العشرين



تشعر بالتعجب كلما نظرت الى نفسها في المرايا

تتعجب من هذه التي تراها انها فتاة انطبعت على ملامحها معالم الزمن وليتها كانت ملامح السعادة ولكنها ملامح الأحزان ...

في كل مكان تذهب اليه تنظر الى وجهها في المرايا والى ملامحها لعلها تجد تلك الطفلة الضائعة منها والتي يريد الجميع ان يقتلها بداخلها

وفي المساء حينما تختلي بنفسها وتغلق باب حجرتها الكبير عليها تتأمل أيام حياتها وتفكر في المستقبل وتعود لها الذكريات

كم تشعر بوحدة كبيرة وخوف من الحياة والناس والأيام والمستقبل فالخوف يملأها من كل شيء ...

تذهب بشغف الى المرايا وتقف امامها فتأتي فكرة الى خيالها

تذهب الى ملابسها فتختار ثوبا بلون امواج البحر وصفاء السماء فلطالما عشقت هذا اللون منذ طفولتها

وعندما ترتدي الثوب تشعر براحة كبيرة ثم تختار ’حلي تعشقها لكي ترتديها فهناك الخاتم ذو الثلاث وردات الصغيرة وايضا هناك اقراطها ذات القلوب الصغيرة اللامعة وتنظر الى نفسها في المرايا وقد عادت اليها الطمأنينة فتعثر على طفلتها اخيرا لأنها تنتمي الى عالم الصغار وليس لعالم الفتيات المزيف

الأربعاء، 10 سبتمبر، 2008

معاد الكلية قرب

في البداية احب اقولكو وحشتوووووووني جدا جدا جدا جدا من هنا لبعد بكرة
وان ’بعدي عن البلوج مش سببه الوحيد رمضان لأن اكيد انا اكتر حد مقصر في العبادات في رمضان لكن في اسباب تانيه كتير ومنها ان الكمبيوتر شارب كابتشينو كتير جدا ومخرف اخر تخريف
*******************************************************
ندخل بقى في الموضوع
أنا كنت حاسة ان السنة اللي فاتت هي سنة الليسانس مع اني كنت لسه في سنة تانيه
لأن بجد كانت سنة دراسية خنيقة وكنت بحلم انها تبقى اخر سنة في الكلية ولكن مش كل الاحلام بتتحقق لسه شهر بالظبط ان شاء الله وارجع الكلية تاني
طبعا انا نفسويا مضايقة جدا اني هرجع الكلية تاني واشوف الكائنات الحية اللي فيها
ولو سألتك انتا كلية مصرية تقوللي اييييييه ؟؟؟
قوللي : يبقى هتطلعوا من الكلية زي ما دخلتوها مش فاهمين حاجة في تخصصكم ودراستكم والكائنات الحية الكابيرة بتتحكم فيكم وبتجيب لكم كتب غالية اوراقها صفرا ونص كلامها ممسوح وبتقرأوها بمكبر
وقابلوني لو عرفتو تذاكروا م الكتاب اللي بينزل قبل الامتحان بأسبوع او اتنين
وكمان علشان توهبوا حياتكم للعلم تستنوا المحاضرة ساعتين تلاته اربعه عاااااادي جدا ما انتو فاضيين
والتقديرات عييييييب لما تسألوا عليها
التقديرات محجوزة لأولاد الدكاترة وناس تانيه ملكوش دعوة بيهم (بلاش الحقد ده)
اما عن الكلية فلما تسأل عن المكتبة يبصوا لك بنظرة الرعب ويقولولك انتا بتتكلم في ايه القراءة دي رفاهية
احمدوا ربنا ان في مدرج (واللي بيقول الكلام ده الدفعة اللي قابلنا واللي بيقولوا ان مكنش عندهم مدرج )
طب بلاش المكتبة خليها معمل الصوتيات واللغات يردوا عليا : معمل ايه هو انتي فاكرة نفسك في طب ولا زراعة ولا علوم (مع ان اي كلية في الدنيا بتدرس لغات لازم يكون فيها اوضة للصوتيات واللغات بلاش معمل اللي بتزعل الناس مننا دي)
للأسف مش شايفة اي ميزة في الكلية بتاعتي غير شهادة الليسانس اللي هتشهد بإني ضيعت 4 سنين من عمري في تعليم يقال انه جامعي بس ملوش لازمة ولازم لما احب اشتغل اكمل دراستي كورسات في الجامعة الامريكية او في القنصلية البريطانية
كان انطباعي عن الكلية صح من اول مرة شوفتها قلت لزميلاتي واحنا في سنة اولى
(الكلية دي جابو الطلبة الاول فيها على ما ربنا يفرجها ويجهزوها ويبنوها )
وكمان العميد طمننا ان الكلية هتتجهز وتكون مية مية بعد 10 او 15 سنة ع الاقل ان شاء الله
واللي هيستنفع بيها اولادنا يعني الموضوع مش بعيد عننا يعني بلاش نكون جاحدين ومنفسنين !!!!!!!!!
ربنا يصبرني عليكي يا كلية ويعدي السنتين اللي باقيين لي فيكي على خير

الثلاثاء، 2 سبتمبر، 2008

مغلق للتحسينات

بسم الله الرحمن الرحيم

انا كتبت بوست من شوية ولأنه اخد مني وقت كبير في كتاتبه فضميري انبني ومسحت البوست
اهيء اهيء اهيء ولذلك علشان مأحسش بتأنيب الضمير قررت اني اتابع المدونة والمدونات التانيه فقط اليومين دول وخصوصا اني حاسة بالمسؤلية لأن في ناس كتير اضافوا المدونة بتاعتي عندهم وبيتابعوها وعلشان كمان احنا في رمضان وحاسة ان الوقت بيجري بسرعة جدا وانا كمان بجري معاه بس مش لاحقة انفذ كل حاجة عايزة اعملها الشهر ده في رمضان

كل سنة وانتوا طيبين وبجد اذا سمح وقتي هعمل مواضيع جديدة لكن اذا مسمحش فأنتم بجد كلكم على بالي
وخصوصا في صلاة التراويح بتيجوا على بالي علشان تلخبطوني يا حلويين هوصي ابلة ظاظا عليكم


استودعكم الله واستودعكي الله يا مدونتي يا حبيبتي