الخميس، 23 أكتوبر 2008

حودافون هنسرقك يعني هنسرقك

شركة حودافون المحترمة سرقوا رصيدي 100 مرة وقال ايه عاملين اعلان عن النت بجنية في اليوم من الموبايل

يا سلام اومال ليه بياخدوا 10 جنية

ليه مفيش صدق وليه مبيقولوش سعر النت من الاول انه مش ب 1 جنيه مصري في اليوم بل ب 10 جنية ولكن نسيو الصفر

الكلام مش واحد اصلا و كل الحاجات في المحروسة بالشكل ده يقولو حاجة وتلاقي الواقع حاجة تانيه
والله انا زهقت ليه بلدي واسفة في اللفظ متخلفة كده


طب ما هي عمان دولة عربية برضه بس كلمتهم واحدة ولما بيعلنوا عن خدمة بتكون بجد مش هبل زي هنا

في بلدي العزيزة بيتحججوا بزيادة السكان مع ان في بلاد سكانها اكتر من هنا مليون مرة وعايشين كويس

طبعا مسكتش على سرقة الرصيد دي واتصلت ب خدمة العملاء واتصلت 4 مرات ومكنوش بيردوا واخر مرة لما زهقوا ردت عليا واحدة سنيورة سألتني عن اسمي وقولته ليها 3 مرات سيادتها مكانتش سامعه

وقولتلها عن رصيدي خلص ليه انا عايزة اعرف ايه المكالمات اللي انا عملتها علشان الرصيد يخلص بالشكل ده مش النت ب جنية واحد في اليوم

قالتلي ايوة طبعا بس انا مقدرش اطلع بيان المكالمات من الكمبيوتر دلوقتي اتصلي بينا بكرة (زي فوت علينا بكرة)

بجد؟؟؟؟؟!!!!!!!! متقدرش تطلع بيان المكالمات دلوقتي على اساس ان اللي قدامها ده مش كمبيوتر لكن كيس جوافة وبيطلع البيانات بعد 24 ساعة

قمة الهبل بجد انا كان هيجيلي سكتة قلبيه
من كتر الانفعال اللي كنت فيه لو مكنتش كتبت البوست ده

منهم لله اللي وصلوا البلد للحال الغريب ده

واخيرا قررت اني هرمي خط حودافون في الزبالة وهجيب خط ام نبيل اما نشوف ايه اللي هيحصل

هناك 26 تعليقًا:

كـــيــــــــارا يقول...

ههههههههههههههههه

شكلك كنتي بتتصفحي نت

مش داخله شات

الشات بجنيه في 24 ساعه

اما التصفح

كل 5 ميجا بخمسه جنيه تقريبا

mohamed ghalia يقول...

كده يبقى أكيد كنتى بتعملى دونلود
أو بقى يبقى العيب من الشركة
على العموم من فودافون لموبينيل ياقلبى لا تحزن
تحياتى
دمتى بود

funckydoctor يقول...

هههه
أم نبيل النت أغلى كتيييير
بس أنا بدخل من حودافون ومش بيخس كتير يعنى
على حسب التصفح بس أكيد مش جنيه فى اليوم أكتر كتير
منهم لله بقى

Lady E يقول...

كـــيــــــــارا: بتضحكي يا كوكي ده انا محروق دمي ومخنوقة
وبعدين انا قولت اتأكد فسألت ع النت في الفرع الرئيسي لحودافون عندنا وكمان سألت خدمة العملاء والاتنين اكدولي ان التصفح بجنية واحد في اليوم وحتى في داونلود 3 ميجا بايت مجانا قال يعني

وانا كنت بتصفح بس مش بعمل داون لود وفجأه لقيت الرصيد طااااار وطبعا مستحيل يرجع تاني عاااااا

Lady E يقول...

mohamed ghalia: كلا البتة مكنتش بعمل داون لود بريئة يا بيه

وايه ده كده هتاخد صفر في الشفوي اومال فين اتصالات نسيتها ولا ايه

دمت بخير ومش مسروق رصيدك

Lady E يقول...

funckydoctor:يبقى هما مستقصدني بقى كل ما احول رصيد بعدها على طول يخلص عاااااا

شكرا ع النصيحة يا دكتر وربنا يوفقك في امتحان الباطنة ويكفيك شر الديناصورات

Rannon يقول...

ههههههههههههههه
حودافون يا بنتي أحسن الوحشين

انا جننوني مرة بتوع خدمة العملاء بسبب مشكلة في الرسايل وقرفوا عيشتي كنت بكلمهم كل يوم صبح وليل

لحد ما حد يعرف حد في الشركة حلهالي

بس مع الاسف بحب حودا فون مش بقدر اغيرها

كمان ليا بريستيجي لأني من الخطوط المميزة وكل سنة في شهر 9 بيكلموني ياخدوا رايي في الشبكة والخدمة وحاجات كدة وبقول كل حاجة :))

معلش بقى يا أوختي عوضك على الله

هانى زينهم يقول...

اهلا بك فى مصر !!
welcome in egypt !!
هى دى مصر يا ليدى !!
يمومين كمان وانتى تقدمى طلب لجوء سياسى لموزمبيق.
يا ستى بس هى ترسى على مشكلة نت دى تبقى كدة عنب !!
انتى ايه اللى جابك من عمان ؟ عموما طول ما انتى فى المحروسة اتعودى على كدة وصدقينى ام نبيل دى اسوأ و أضل سبيل .

e_emy يقول...

هههههههههههه

كل ده ........

بعدين حاجه مش جديدة انتى ف مصر يابنتى
ولســــــه... ربنا يستر

ومبروووك ع الخط الجديد (:

Lady E يقول...

Rannon: ايه الناس ال vip دي ايوة ياعم يا بختيكي

امانة عليكي في شهر 9 الجاي لما يكلموكي قوليلهم على موضوع الرصيد ده
لأن عارفة لو سرقوه مره كنت قلت غلطة مثلا لكن كده كتير بصراحة

وفعلا عوضي على الله
سيبك انتي اهم حاجة اني اطمنت عليكي
والحمد لله على سلامتك

Lady E يقول...

هانى زينهم : هههههههه يومين ايه بس يا مستر انا من دلوقتي بقول لبابا خدني معااااااك عمان تاني بس للأسف مضطرة افضل في بلدي الحبيبة علشان اخلص الدراسة في كليتي الموقرة عاااااا

Lady E يقول...

e_emy : ايه التفاؤل ده بتبشريني انه ولسه يا ايمي عااااااا ماشي ربنا يستر

الله يبارك فيكي يا قمرايا

الازهرى يقول...

لو عايزة نصيحتى

اعملى زيي فليسقط التليفون من الاساس

وارميه


تحياتى

blue-wave يقول...

على فكرة
ام نبيل زيها زى حودا فون
كلهم بيسرقونا
زى امهم الكبيرة
الشركه المصريه للإتصالات

MaGn0liA... يقول...

اه صح انا جربت فودافون و كانوا كويسين جدااااا

موبينيل هما اللى بجد حاجه لا تطاق

بس انا بحترم فودافون من زمان و لسه الى الان

ريم يقول...

ههههههههههه
طب انا تبع حودافون بردو بس مش في مصر
و ساعات بخش عالنت مايخدش مني ايتها حاجة
و ساعات تانية بخش الاقي الرصيد بيودعني.. :)
هما بحالات باين
:)

كلام على بلاطة يقول...

a,tn
شوفى احنا خلقنا لنسرق من حيث المبدأ
لكن يمكن تكونى مش عارفة تستخدمى الجهاز كويس
حملى برنامج اوبرopra mini
لمجانى
تحياتى

علاء عارفين يقول...

ههههههههههه

اي حد يسرقنا عادي . . هو في حد بيتكلم ولا بيقول لأ

اذا كان البنات في الشارع بيتهانوا كل يوم ولسه شايفين من كام يوم أول قضيه اترفعت

هو مشكلتنا اننا شعب مسكتين بينضرب على قفاه وبيسكت

حسبي الله ونعم الوكيل

romansy يقول...

ههههههههههههههههه
انا بقى رميت التليفون بالخط
مش عاوز اى حاجه خوفت احسن يخدوا ضريبه على استخدامى تليفونى
وبعدين ولا يهمك
انتى قدها وقدود

Lady E يقول...

الازهرى : ياريت عندي الارادة اللي عندك
علشان أأقدر ارمي التليفون زيك :(

انا للاسف مقدرش استغنى عنه

شكرا على تعليقك ونورت االمدونة

Lady E يقول...

blue-wave: ياريت السرقة في التليفونات وبس يا دكتر

نورت البلوج بعد غياب يا دكتر

Lady E يقول...

MaGn0liA... : انا كنت بحترم حودافون لكن دلوقتي للأسف مش بحترم ولا شركة من الشركات ال3

نورتي البوست يا قمرايا

Lady E يقول...

ريم : هيييييه ريم تحولت من متابعة صامتة الى متابعة بتقول رأيها الحمد لله

هما فعلا شكلهم بحالات يا ريم

بس حالاتهم معايا انهم يخلصولي الرصيد

نورتي البلوج يا قمرايا ومتحرميناش من تعليقاتك الجميلة

Lady E يقول...

كلام على بلاطة : أهلا بحضرتك

يااااه كلمة حضرتك كبيرة جدا خلقنا لنسرق!!!! صعبة بجد

شكرا على تعليق حضرتك وهدور على البرنامج

Lady E يقول...

علاء عارفين : أهلا بيك

عندك حق احنا شعب بيحب يتكلم في حق بعضه بس لكن مش بيتكلم علشان يدافع عن حقه للأسف

شكرا لزيارتك الجميلة وتعليقك اللي للأسف واقعي

Lady E يقول...

romansy: ههههههه والله عندك حق
ده الحمد لله انهم مش بياخدوا ضريبة على التنفس هو ده اللي ناقص
وبعدين يا رومانسي الضرايب مصلحتك اولا :)

بس بجد دي شجاعة منك انك ترمي التليفون