الخميس، 6 نوفمبر 2008

اخر تاج وشكرا لكم


يااااااه الحقيقة مش عارفة أقول إيه

اشكركم ع ال100 تعليق اللي في البوست اللي فات

ولا عالورد اللي ملا البلوج ولا عالايميل اللي اتملا رسائل

ولا عالموبايل اللي مبطلش رن كل الناس بتسأل عليا بعد الحادثة (طبعا مفيش حاجة من دي حصلت)

مفيش حد سأل عليا في البلوج غير mohamed ghalia

وأكيد انا ممتنة جدا للتعليق ده وشكرا ليك يا اخي الكريم محمد

مش عارفة ليه خطر على بالي كلام الفنان نور الشريف في فيلم المصير لما قال ( انا بكتب ليه ولمين)

انا هجاوب على التاج ده ان شاء الله ويمكن يكون اخر تاج واخر بوست اكتبه في المدونة

وهحل التاج علشان فكرته الرائعة وهحله يمكن يوصلني او يوصل اي حد فكر يقرأه للسعادة المفقودة

بسم الله ابدأ


السؤال الأول:ماهى السعادة من وجهة نظرك؟

السعادة شعور نسبي بيختلف من انسان للتاني بس مبيختلفش عليه اتنين انه من احلى المشاعر اللي ممكن الانسان يحس بيها

بيتمناها أي انسان بيعيش في الحياة وكلنا بنحاول نوصل للشعور الجميل والغامض ده و كل انسان بيوصل للسعادة بطريقته وعلى حسب فهمه للحياة


السؤال الثانى: كيف تصل إلى السعادة؟

السعادة ليها طرق كتير جدا على حسب شخصية كل انسان

بس انا بصل للسعادة بإني اسمع موسيقى بحبها او اشوف فيلم بحبه او اتكلم مع شخص بحبه

او ازور مكان بحبه

السؤال الثالث: هل السعادة وهم أم أنها حلم صعب؟

السعادة في الدنيا محددة مش مطلقة بمعنى ان في عز الفرح والسعادة لازم يكون في تنغيص وحزن

لكن السعادة الكاملة في الجنة علشان كده السعادة الكاملة وهم وحلم صعب تحقيقه في الدنيا وده من وجهة نظري المتواضعة

السؤال الرابع: هل السعادة طريق للنجاح ؟وضح؟

أكيد الانسان لما بيكون سعيد بيقدر ينجح في حياته لأن السعادة بتعطيه امل و تفاؤل وحب للحياه
السؤال الخامس: ماهى أكثر اللحظات التى شعرت فيها بالسعادة؟

اول مرة شوفت المسجد النبوي واول مرة اصلي في الروضة الشريفة وانا مدركة ان الروضة الشريفة روضة من رياض الجنة ، ولما زرت قبر النبي ايوب , ولما نجحت في امتحان القيادة لأني اخدت رخصة القيادة بعد عذاب وبعد تاني امتحان , ولما بشوف ضحكة طفل جميل وبريء لسه متعبتوش الحياة , ولما والدي ووالدتي بيكونوا راضيين عني
السؤال السادس:هل ممكن أن تحقق كل شىء؟

بالنسبة لي صعب احقق كل شيء

لكن بالنسبة للانسان عامة ف ممكن يحقق كل شيء ليه لأ؟
السؤال السابع: السعادة تجعلك تقبل على الحياة أم لا؟

السؤال ده شبه السؤال الرابع

أكيد السعادة بتجعل اي انسان يقبل على الحياة بكل حب
السؤال الثامن: هل أحسست يوما انك وصلت لقمة السعادة؟

ايوة اخر مرة زرت الروضة النبوية الشريفة لأني دخلتها انا مع والدتي وصلينا ودعينا في أ جمل مكان في الأرض الروضة الشريفة فعلا روضة من رياض الجنة وبحس بقمة السعادة والسكينة والرحمة وانا هناك
السؤال التاسع: لماذا تمر أوقات السعادة بسرعة؟

هي دي سنة الحياة بتسرق الفرح مننا اومال هتبقى دنيا ليه بقى ما هي دنيا علشان الحاجات الجميلة فيها مش بتكون دايما جميلة
السؤال العاشر: هل ترى السعادة فى التدين؟

أكيد في سعادة في التدين بس لما يكون التدين وسطي مش متشدد

سؤال الحادى عشر: هل أنت متفاؤل وعندك أمل؟ وضح؟

احيانا ايوة و احيانا لأ
السؤال الثانى عشر: إذا شعرت بالحزن ماذا تفعل؟

على حسب الموقف غالبا بحكي لوالدتي عن سبب حزني

او بعمل زي حنان ترك في مسلسل سارة وبناااام كتييييير لغاية لما انسى سبب الحزن ده

او بصلي او بقرأ قران او بسافر
السؤال الثالث عشر: هل يستمر معك الحزن فترة ام ينقضى فى الحال؟

على حسب الموقف برضه بس غالبا بيستمر فترة
السؤال الرابع عشر: ما رأيك فى الأفراد المتشائمين

احيانا بيكون عندهم حق في تشائمهم بس مفيش حاجة في ديننا اسمها تشائم

قال رسول الله صلى الله عليه وسلم (( تفائلوا بالخير تجدوه))

هناك 11 تعليقًا:

Sometimes يقول...

انتى يا بنتى انا قرأت اول كلمتين
ايه اخر تاج دى
انا بصراحه مش قادرة اكمل قرايه بس لازم اكمل علشان اعرف اسبابك

Sometimes يقول...

ليدى
كل الناس تقريبا مشغولة دلوقتى متنسيش احنا فى فترة دراسه واللى وراه شغل وكده
اذا كنتى انتى نفسك مشغولة ولا ايييييييييه؟
وبعيدن تعالى هنا
انتى اساسا بتكتبى عشانك انتى علشان نفسك

عموما انا حاسه انك كتبتى كده فى لحظه انا عارفه انتى عايزه تعرفى معزتك عندنا

بجد حرام عليكى تحرمينا منك
ووالله انا حبيتك فى الله من اول مره رديتى فيها عندى
فاكره انتى قولتيلى ايه؟

ربنا يوفقك الى ما يحبه ويرضاه
حمد الله على سلامتك يا حبيبتى

د/ رامي شهاب الدين يقول...

فى البداية أنا شخصيا يعتذر عن عدم السؤال ، لكن والله العظيم بجد كان عندى ظروف منعتنى حد من مجرد تواجدى فى مدونتى الشخصية

عموما لازم نعترف برده بالتقصير فى حقك .. ومن هذا المنطلق أنا بعتذر نيابة عن الباقيين وبقول أنا آسف .. فهل هذا يكفى؟

ده كبداية يعنى .. لكن فى نفس الوقت مش عايزين نخسرك كمدونة عزيزة إعتدت زيارة مدونتها

أتمنى أن نرى جديدك

دمتى بكل الود .. تحياتى الغالية

كـــيــــــــارا يقول...

ياااااااااااااه

اولا انا لو عندي كرديت حالا كنت هتصل بيكي انا لسه فاتحه المدونات النهارده وانتي عارفه ان كنت في اجازه تدوينيه يعني عمري ماهتاخر عن اختي الصغيره ابدا

ليكي حق تزعلي ياباشا

بس والله انا مااعررف خالص

المهم
مش عاوزه اسمع اخر بوست واخر تاج

ده انا عندي 9 تاجات يبنتي هوديهم لمين لما مش ابعتلهم لزهورتي

mohamed ghalia يقول...

أختى العزيزة
رجاء تفكرى كويس فى كلامك
منقدرش ابدا نستغنى عنك
صدقينى فى ناس كتيره مشغولة فى إمتحنات أعمال السنة ممكن يكونوا مخدوش بالهم من كتاباتك
صحيح انتى اتعرضى للظروف الفترة الى فاتت وكنتى محتجاهم جنبك بس خلى قلبك كبير وصدقينى هتلاقيهم دايما
أختى العزيزة
إجاباتك عن السعادة رائعة
استمتعت كثيرا بها
أرجو من الله عز وجل ان تكون سبب فى سعادتك وأن يسعدك الله دائمالاوسبك من العربيه الى عامله المشاكل دى
تحياتى لشخصك الكريم أختى العزيزة
ميرسى على قبول التاج ده شرف كبير ليا
دمتى بود
فى إنتظار جديد مواضيعك
رجائا فى إنتظارك

blue-wave يقول...

بطلى عبط
مفيش حاجه اسمها اخر بوست
احنا عايزينك وسطنا ومش هانسيبك تمشى
معلش والله انا نوباتشى بقالى 4 ايام وعلشان كدا سامحينى
وليس على نايب القصر العينى حرج
مش كدا ولا ايه؟؟؟؟

كلمة حق يقول...

كلمات جميلة أتفق معكى فى أغلبيتها وقد أختلف معكى فى بعض النقاط يمكنك قراءة إجابتى
وقبل ما أمشى تفائلى خير هتستمرى فى الكتابة بإذن الله
الى اللقاء

هانى زينهم يقول...

لو كل حاجة بتتاخد كدة ما كانش حد عرف حد . فى مثل بيقول من حالك واعذر اخوك .. فاكرة لما اعتذرتى عن التعليق عشان كنتى مسافرة ؟؟ حد زعل منك لده ؟ ولا الناس قدرت ؟؟
طبعا مش طبيعى ان ما حدش يعلق على بوست زى اللى فات ده بس مين قال اننا شفناه وما علقناش ؟ انا شخصيا كنت فى اختبارات كادر المعلمين ولسة مخلص امبارح ووالله ما شفته الا انهارده لانى بقالى اكتر من اسبوعين ما اعرف حاجة عن النت ولا فضيتله . فاكبرى بقى غصب عنك وبلاش الانفعال ده .
ثانيا اف الف سلامة وفداكى 100 عريبية فى النهاية هى حتة صفيح .
ثالثا بقى انا التاج ده مبعوتلى ممكن تقوليلى بعد اجاباتك الجامدة دى انا هاقول ايه ؟؟ مين اللى يزعل من التانى بقى ؟
صدقينى كل واحد له عذره وما تظلميش حد والحمد لله انك بخير وللمرة المية ما تزعليش منى ولا من اى حد قصر فى الرد لانك عارفة غلاوتك عندنا .وطبعا ما فيش حاجة اسمها اخر بوست والا والله هازعل منك بجد وهاعتبر ان ده استهانة منك باى حد قرى عندك بوست وعلق عليه وانا متأكد انك عمرك ما هتعملى كدة والمسامح كريم .

جـيـداء يقول...

عارفة انا لو بكتب عشان حد كنت قفلت مدونتى دى من زماااااان قوى ..
لما بحس الاحاسيس دى بسيب المدونة شوية ، شهر شهرين و بعد كدة لما الاقى نفسى عاوزة ارجع برجع :)

شفقة هانم واحسان بك يقول...

انتى وحشتينا جدا جدا جدا كمان انتى اكتر واحدة بعتز بيها بجد
لكن للاسف كنت مستغربة انتى فين ومابتزورناش ليه
عموما حمدالله على السلامة
واوعى تسيبينا

Lady E يقول...

Sometimes
د/ رامي شهاب الدين
كـــيــــــــارا
mohamed ghalia
blue-wave
كلمة حق
هانى زينهم
جـيـداء
شفقة هانم واحسان بك

شكرا ليكم بجد على تعليقاتكم اللي مش عارفة ارد عليها من جمالها
ربنا يوفقكم وميحرمنيش منكم