الأربعاء، 30 ديسمبر، 2009

إشراقة سنة جديدة

بصو بقى في البداية سموا وصلوا علشان معنديش استعداد اطلاقا ان البونية تتحسد او تتحقد واللي
مش هيعمل كده بجد هزعل منه وهعرف بس مش دلوقتي كمان شوية يوم القيامة ان شاء الله :)




يا خلاثي ع الطعامه بيقولوا انها شبهي وانا بقول مستحيل الطعامه دي مش شبهي هتجيبوا للبونيه اكتئاب من وهي مولودة :)
كنت نايمة الصبح في امان الله واذ فأجة الاقي مامتي بتقولي شيماء جابت بنوتة عقبالك يا شيما يا صبحتي يااااااارب (اتقالتلي عقبالك دي كتير النهاردة)
نزلت بالليل وجبت ورد علشان اول حاجة تشوفها النونو تبقى الورد (ده على اساس انها بتشوف يعني البيبهات بيبقى لسه حاسة البصر عندهم مش مكتملة لما بيتولدوا وبتبدأ حاسة البصر تكتمل شهر بعد شهر كل ما البيبي يكبر)
رحت لشيماء وسلمت عليها وكانوا لسه بيلبسوا النونو اللي اختاروا لها اسم مؤقت " اشراقة" عجبني الإسم مع انه صعب شوية في زماننا ومش هيتفهم بسهولة
سألوني عن اقتراحاتي في اسم للبيبي بس انا مع فكرة ان انتوا سموا بنتكو ا او ابنكوا براحتكوا دي من واجبات الأمومة والأبوبه وبعدين اقترحت قبل كده على مرات عمي انها تسمي بنوتتها مريم لأني بحب الإسم ده اوي على اسم مريم ام سيدنا عيسى وفعلا سمت بنوتتها مريم وما شاء الله مريم جايبالي صداع كل ما انام تيجي تصحيني وتندهلي بإسمي على اساس اننا اصحاب يعني:)
نرجع للنونو طبعا كان نفسي اشيلها اوي اوي بس طبعا مقولتش اني عايزة اشيلها - مكنتش عايزة ابقى خنيقه - المهم اول لما لبسوها وكلفتوها في البطانيه جابوهالي وشيلتها ويااااااااااااااااااااااااااااااااااااااه عالإحساس أول العنقود اللي هي انا على رأي جدتي الله يرحمها اني اول ما العين شافت شايلة اخر العنقود من البنوتات في عيلتنا
أول مرة اشيل بيبي لسه مولود وعمره ساعات ، شيلت قبل كده بيبي كان عمره يومين لكن بيبي عمره ساعات حاجة تانيه خااااااالص واحساس تاني احساس جميل اوي من زمان محستوش
بالرغم ان شعوري تجاه مامة البيبي وباباها -عمي واللي الناس متعرفوش انه يبقى اخو ابويا- عادي يعني ولا بحبهم ولا بكرههم بس البيبي البنوتة حاجة تانيه خاااااااااااالص حبيتها ايوة انا حبيتها مش قادرة انسى ضحكتها - مع انها لسه مضحكتش -
احساس البشرة الناعمة بتاعة البيبي وبسم الله ما شاء الله كإنها عاملة ميك اب بس ميك اب رباني مفيش احلى منه وحاجة صغنونة كده لسه مترمطتش في الحياه ولسه بريئه ورقيقة وزي الموج بتتحرك على رأي تامر ياحوستي
كنت كل ما بلمس وشها بتفتح بقها فكرتني بكارتون نيمو بالبطابيط الصغننين اللي كل ما يشوفوا سمكه يقولوا عليها اكل اكل اااااااااكل :)
ايديها صغننين اوي وبرضه شبه ايديا :) وايديها الصغننين كانوا بردانين اوي وكنت بدفيهم لها - طالعه لبنت عمها -
اكتر كلمة اتقالتي النهاردة عقبالك وعقبال ما نشلك ( هيشلوني) نياهاهاهاهاها
ع الهامش : قررت اني اروح الفرح بتاع ابن خالي ان شاء الله
مع ان عندي امتحان يوم الخميس الصبح وبعدها سفر 3 او 4 ساعات الله اعلم الطريق هيبقى عامل ازاي بس ان شاء الله يبقى فرح جميل وامري لله هلبس فستان سهرة لونه ذهبي في البرد اللي احنا فيه ده عااااااا
ان شاء الله 2010 تبقى سنة جميلة انا متفائلة ، كل سنة وكلنا في هنا

الأحد، 27 ديسمبر، 2009

شمعة الروح


الكلام اللي باللون الأحمر مقتبس من مسرحية
Othello
by shakspeare
بتصرف

" الأن سأطفى الشمعة وسأطفى الشمعة ، ولكن يمكنني استعادة نور الشمعة ولكن كيف يمكنني استعادة نورها الى الحياة بعد أن ..... أن ، لا لن أريق دمائها "

بعض الناس بنحبهم لكن منقدرش نقرب منهم فهم في البعد أحلى وهم في البعد أرقى

"ان هذه الأنفاس العطرة الساحرة ، قادرة على ان تقنع العدل بكسر سيفه "

دايما لازم قرار حاسم ، أيوة أو لأ ، في البداية بيخاف ومش بيصدق وبيبقى نفسه الوقت يقف وبيفضل يفتكر في اللحظات الحلوة مع حبيبه والوعود البراقه والأحلام الملونة ويأجل معاد الفراق على اد ما يقدر

" لا مزيد من القبلات ، انها أخر قبلة ، قبلة الموت والنهاية "

وبيبدأ يدرك حبه بحبه ان مفيش داعي للتأجيل بالعكس الفراق هيبقى أحسن دلوقتي هيبقى أهون مش هيمر يوم في وهم مش هيمر يوم تاني في خداع وزيف وخيانه


" حقا يجب أن أذرف الدموع ولكنها دموع قاسية أم انها أحزان السماء "

لما يبدأ يقتل أحلام زرعها جواه لما يبدأ يتخلص من الوهم ، لما يبدأ يتألم ويتألم ويتألم وميحسش بطعم أي شيء الا بطعم الألم المر

" يجب ان تموت لكي لا تخون غيري "

لو كان الموت حل للجروح كان كل اللي اتعرض للخيانه موت اللي خانه لكن لأ الحياه هي الحل الموت راحه لأمثاله خليه يعيش ويتعذب ويتألم ويعاني ويموت في كل ساعه بدل ما يموت مرة واحدة ويرتاح

- اصبحنا كعقارب الساعة لا نتقابل أبدا ولكن يمشي كل منا في طريق في دائرته المفرغه وحتى لو تقابلنا ثواني لا نعرف من نكون ثم نعود للأفتراق والإغتراب من جديد اتسائل لما التقينا فدائما أسباب الفراق معروفه لكن اسباب اللقاء مجهولة - يا عيني يا عيني عالإبداع برافو عليا انا شطورة :)

السبت، 26 ديسمبر، 2009




يرضيكي يا جوجو (الدبدوبة بتاعتي) يقدمو امتحاناتنا ويخلوها 9/1 وباقي الامتحانات 20/1 وكمان يوم ويوم انتي عارفة يا جوجو اننا أصلا مش بنذاكر الا ايام الامتحانات يبقى هنذاكر امتى معلش يا جوجو ما انا بقيت في سنة رابعه

عارفة يا جوجو اخيرا هخلص دراستي وتبدأ ملامح حياتي تظهر او ده اللي انا بحلم بيه وطبعا مليون حاجة هتقف في طريقي وتكسر جناحاتي أصلها باينة من دلوقتي جناحاتي بتتكسر لما قربت ابقى مش عارفة اطير ومع ذلك لازم نتفائل برضه وبكرة احلى والكلام الحلو ده


عارفة يا جوجو في ف كليتنا حالات كتير للانفلونزا العادية وال اتش ون ان ون وادارة الكلية عارفين ومطنشين واحنا الطلاب عارفين ومطنشين وعايشين حياتنا عادي سلامنا متغيرش وبنشاتنا الزحمة برضه متغيرتش ومفيش اي اجراء وقائي اتخذته الكلية عادي جدا حياتنا ماشية بالبركة ، بيقولوا الحياه زي ما بنشوفها وانا مش قلقانه من الانفلونزا الجديدة لأنها لسه ضعيفه المشكلة لو طورت نفسها وحتى لو اتطورت مش هخاف منها :)

يا ترى ايه معنى الفرح ؟ هو الفرح حفلة ودي جي ورقص وطبعا اغاني شعبيه غريبه وفستان أبيض وبدلة سودا او بيضا (على حسب نفسوية العريس او الموضة ) ولا الفرح بيبدأ من جوه العريس والعروسة من فرحتهم ببعض ، هو الفرح ساعتين وبيعدوا ولا الفرح بيبقى بين اتنين هيكملوا عمرهم مع بعض وهيتنفسوا نفس الهوا وهتجمع بينهم نفس المساحه وهيشوفوا بعض كل يوم ( اهو يوفروا في فواتير التليفون وكروت الموبايل) بجد ايه معنى الفرح

والسؤال اللولبي ده من زمان في بالي بس فكرت فيه تاني اصل فرح الواد ابن خالي يوم الكريسماس

ولازم نروح او بمعنى اصح لازم نسافر علشان نروح طيب اروح الفرح علشان انكد على العروسة؟ البونية بتغير مني جداااااا مع اني بريئة برائة الذئب من دم ابن يعقوب معملتش اي حاجة تخليها تغير ومع ذلك جيت على نفسي وفهمت انها غيرانة فأوهمتها ان في مشروع خطوبة قريب بعدها هي فرحت وارتاحت نفسيا وانا زعلت وكرهت نفسي علشان كدبت علشان ارضي واحدة أقل ما يقال عليها انها تافهه ومعندهاش ثقة في نفسها ، أنا بجد محتارة أروح هنكد عالبونية مروحش هنكد على العريس :( لأنه مأكد على ماما كذا مرة انها لازم تيجي وكمان مش عارفة شعوري هيبقى ايه لما اشوف واحدة اضطرتني اني اكدب اكيد مش هبقى مرتاحة

ده غير ان الجو برد على فساتين السهرة وجو الأفراح أصلا بيبقى خنيق وبيبقى المفروض طول الوقت ان الحضور يكونوا مبتسمين ومزقطتين ومرسومين بيبقى جو كله مش طبيعي

شوفتي يا جوجو حياة البني أدميين مكلكعة ازاي احمدي ربنا انك دبدوبة

الأربعاء، 23 ديسمبر، 2009

ليه كده ! عن الانجينير احمد ابو العلا

yesterday is a history
tomorrow is a mystry
but today is a gift that is why it is called the present

ده شعار مدونة الانجينير م. احمد أبو العلا واللي بفتح المدونة بتاعته النهاردة ملقتهاش موجودة وكمان البروفايل غير متاح !!!!

أخر مدون كنت اتوقع انه يسيب التدوين ويقفل مدونته في صمت وأول مدون كان بيشجعني اني استمر في التدوين ومقفلش مدونتي

أحمـــــــــــــد أبو العلا يقول...

يادي النيله هما الناس دول وصلولك انتي كمان

بصي ياليدي انا مش هقولك كلام انتي عارفاه
مش هقولك ان الدنيا فيها الحلو والوحش والنت زي الدنيا والكلام ده
بس هقولك قفل المدونه ده مش صح
انتي عامله زي المسؤل اللي شاف واحد بيعاكس واحده على الكورنيش راح طلب هد الكونيش
وكده هيحرم ناس كتير بتستمتع فيه وناس عايشه
بصي بأه ومن الآخر لو فكرتي تقفلي المدونه معنديش غير بلاغ صغير لشرطه المدونات ودول بعيد عنك ملهمش عزيز وهيعرفوا يوصلولك لو كنتي فين وعلى فكره مش هيكون عندك فرصه للدفاع, هيتحكم عليكي على طول وبرضه المدونه هتتفتح (وش مطلع لسانه)كل سنه وانتي طيبه وصلي على النبي كده واستهدي بالله وسيبك من الناس ديه
30 نوفمبر, 2009 08:36 م


ده غير تعليقات تانيه كتير خلتني انسى موضوع اني أقفل المدونة مهما تعرضت لمضايقات من ناس غبيه

وده تعليق تاني لما قلت اني هاخد استراحة من التدوين

Eng. Ahmed Abo El-Ella يقول...
لو كان ينفع كنا قلنا ماشي الدنيا بتتقدم قدام مش بترجع وراااه

احنا نقدر نقفل الموبيل والتليفونات والميل والبلوج
بس النتيجه اننا هنبعد عن عالم مبيتقفلش
على العموم ياريت متتأخريش علينا

انا بجد حزينة على مدونة جميلة كنا كلنا بنحب نقرأها تتقفل بسهولة كده وكأن ملناش حق فيها ولا لينا حق اننا نعترض لما تتقفل

وزعلانة اكتر على مدون أحسبه على خير ولا ازكي على الله احد مدون محترم وعلى خلق ومثقف وبحترم رأيه جدا يستسلم للظروف ايا كانت ويقفل مدونته

الثلاثاء، 22 ديسمبر، 2009

ربع جرام



فاكرين من شهرين كده اتكلمت على رواية ربع جرام في البوستات دي دماغ نام ننا هو و
دعاء السكينة

اللي شاف الرواية دي هيعرف انها لسه في الأسواق وبتتباع ب50 جنيه وطبعا مش اي حد ممكن يشتريها ده غير الطبعة الخاصة اللي شوفتها في مكتبة الشروق في المطار ب 95 جنيه ما شاء الله حاجة تحبط :)
المهم انا لقيت الرواية في مكتبة مبارك عندنا وفرحت جدا وقرأتها وبجد عجبتني جدا


يااااه مش مصدقه أخيرا خلصت قراءة رواية ربع جرام 635 صفحه أول مرة اقرأ كتاب كبير كده (الكلام ده من شهر وشوية)

بجد بجد الرواية أرهقتني كانت في شنطتي في كل مكان في الكلية وفي السفر وعند خالتو حتى أيام كورس التنمية البشرية وأخدت شوية تعليقاااات كتيييييير وأشهر تعليق كان (ربع جرام؟) يعني ايه ربع جرام؟؟

فكنت بقول ربع جرام هيروين :) ودايما كنت بلمح نظرة التعجب مع نظرة يا ضنايا يا بنتي ايه اللي خلاكي تقرأي حاجات غريبة كده في عيون أي حد بيسأل

اما تعليق بابا فكان أنا بكره الرواية دي – لأني كنت بسهر في قرائتها وبقعد مع نفسوياتي كتير علشان اخلصها –

وتعليق زميلاتي في الكليه : طب خلصي كتب الكلية الفظيعه اللي ورانا الأول وبعد كده اقرئي براحتك – بصراحه عندهم حق-

وتعليق غادة لما كنا في كورس التنمية البشرية تصفحت الكتاب وقالتلي زمالة المدمنين المجهولين وقعدت تهزر فالمستر قاللي استنيها تحت وضحكنا كلنا بجد الرواية كانت من أساسياتي الأيام اللي فاتت من حوالي شهر وشوية

الرواية بدأت بتقديم الشخصيات والشخصية الأساسية صلاح اللي حكى حكايته مع المخدرات طول الروايه وفي البداية وضحوا ان المخدرات كان تأثيرها كويس عليهم وازاي بدأوا بالخمور والحشيش لغاية لما دخلوا في سكة الهيروين وكنت متغاظة في بداية الرواية ان الأبطال عايشين حياتهم وكويسين ومحدش أصلا مكتشف انهم بيتعاطوا مخدرات

في الفترة دي كنت حاسة اني عايشة مع أبطال الرواية وشايفاهم لأن لما بقرأ رواية أو أي حاجة وأكون حباها بتقمص الشخصيات واندمج في الاحداث وأعيش معاها فكنت حاسة اني هتجنن قريب :)

أكتر شخصيات أثرت فيا

طبعا شخصية صلاح (صاصا) الشخصية الرئيسية واللي الرواية بتتحكى على لسانه شخصية ذكية جذابة أنيق ومرح ودون جوان وساعات الادمان كان بيخليه دون بس من غير جوان
بدأ الادمان في سن صغير أوي بدأ بخمور وحشيش


والادمان غير طبيعته تماما وخلاه يسرق ويأذي الأشخاص اللي حواليه بس عالأقل الشخص المدمن بيبقى مريض لكن يا ترى اللي بيسرق ويأذي مشاعر غيره وهو مش مدمن عذره ايه ؟
بعد رحلة الشفاء من الادمان صلاح بقى انسان تاني رائع

رامي ريكو : زميل وصاحب صاصا ومن شلته كان مهتم أوي بنفسه وكان مدلل جدا لكن للاسف بعد الادمان اتغير تماما وبقى مبهدل وخس جدا وفي النهاية اتمسك في قضية مخدرات اتجار ودخل السجن ووالدة اللواء في الجيش مستحملش الخبر واتوفى في نفس اليوم


راندا : طول الرواية بقول عليها غبيه جدا مش هقول عليها اكتر من كده


البوست الجاي ان شاء الله هكمل باقي الشخصيات اللي أثرت فيا من الرواية واجتماعات المدمنين المجهولين وعلاقتها بالتنمية البشرية

الأحد، 20 ديسمبر، 2009

اعمل اييييييييييييييييييييييييييييه


مآااااااااااااسي وكوارث وبلاوي ده منهجنا السنة دي بإختصار

بدأ العد التنازلي للإمتحانات وزي النهاردة ان شاء الله هيبقى اول امتحاناتي وفي عندي امتحانات شفوي الله اعلم هيحددوها امتى بس الأكيد انها هتبقى في اول شهر واحد

يعني انا عايزة اذاكر وبعد محايلة لنفسي وتوبيخ لنفسي برضه علشان اذاكر وفيلم التجمد الفظيع في الشتا اللي احنا فيه ده

الحمد لله الحمد لله مسكت الكتاب هيييييييييييه بقالي كتير مبمسكش كتاب من كتب الكليه طيب ده تطور رائع

فتحت اول موضوع في اول chapter ما علينا اني كنت باخد الكلمات بالشبه واترجمها وتطلع غلط يعني مثلا rarely أقرأها really وهكذا

مش دي المشكلة اطلاقا المهم بعدما قرأت اول 4 سطور لقيت ان الموضوع فيه ناس فقراء والناس دول قرروا انهم يبيعوا اطفالهم لحد دلوقتي عادي بتحصل وبنسمع عنها كل يوم بيبعوا اطفالهم علشان يعلموهم صح ويربوهم مش فقراء لكن اللي حصل في المقال انهم بياخدوا الأطفال لغرض تاني خالص وهو الأكل !!!!!!!!!!!!!!!

بيبيعوا الأطفال علشاااااان يتاكلوا

يعني واحدة تقول لجوزها انا عملالك شوربة بيبي بالصلصة يا ابو بؤله

وابو بؤلة وام بؤلة وبؤلة نفسه يقعدوا كده على السفرة او الطبلية او الترابيزة او اي حاجة وياكلوا بيبي


والكلام ده مش في مصر لكن في ايرلندا في القرن ال17 بس في المقال رموا كلمه كده تحرق الدم اللي هي الكلام ده كان بيحصل من زمااااااان قبل الحضارة في بلادهم لكن دلوقتي بيحصل في بلاد العالم التالت والحدق يفهم قصد الكاتب ايه

مشكلتي اني بتأثر بالحاجات اللي بقرأها بحسها اوي وبعيش مع ابطالها ودي حاجة بتتعب اي قارئ بيعيش جوه الأحداث

طب انا اعمل ايه دلوقتي افتح كتاب الاقي فيه قصة واحد بيتعدم واحلامه ولحظات موته

كتاب تاني الاقي فيه وصف لأكل الأطفال وان الناس من فقرها باعوا الأطفال للأغنياء علشان ياكلوهم ولو اني معتقدش ان الفقر يوصل للدرجة دي

كتاب تالت عطيل وديدمونة والغيرة القاتلة والخيانة هو خانها لما صدق انها خانته وخانها لما قتلها وبين ان جريمة قتلها حادثة ووقع سقف البيت عليها بعد ما خنقها وخان نفسه لما انتحر لما عرف انها بريئة

كتاب رابع مدرسة الفضيحة "سلطة" مش عارفه مين بيحب مين ومين اتجوز مين حاسة اني تايهه بين الأبطال ومأساه برضه

كتاب خامس انعدام البرائه اطفال همجيين ومتوحشين بيحبوا مناظر الدم والدمار وبتوصل بيهم الهمجيه لأنهم يقتلوا بعض وياكلوا بعض برضه

.......... الخ

اذاكر ازاي انا كل ده الله اعلم وهستوعب كل المآسي دي ازاي الله اعلم برضه


(( اللهم لا سهل إلا ما جعلته سهلا، و أنت تجعل الحزن إذا شئت سهلا))

السبت، 19 ديسمبر، 2009

l'm not well


I'm not well
I can not study
my mobile phone disappear
vodafone go to hell really i hate your company

الجمعة، 18 ديسمبر، 2009

ارجوك لا تكن صديقي


قبل الموضوع : ان شاء الله هرد على باقي تعليقات البوست اللي فات انا بس لسه في حالة هدوء وتأمل مش عارفه ليه

الصورة دي امبارح بإعتبار ان النهاردة بقى 18 الوقت العصر من كوك دور راس البر من قدام اللسان


حسيت اني مخنوقة جدا ولازم اغير جو وطلعنا بعد الكلية على راس البر دايما لما بشوف البحر برتاح والجو كان مغيم جدا ومطر وبعدها ظهرت الشمس وحسيت انها دفئت روحي بعد الغيوم وبعدها مطرت تاني :)


كنت بعشق المطر بس بعد الحادثة اللي عملتها في المطر بقيت مش ببقى مرتاحه في المطر ومع الوقت رجعت احب المطر تاني

"وطموحي .. هو أن أمشي ساعاتٍ.. وساعاتٍ معكْ.تحت موسيقى المطر..وطموحي، هو أن أسمع في الهاتف صوتكْ..عندما يسكنني الحزن ...ويبكيني الضجر.." قصيدة سعاد الصباح وغناء ماجدة الرومي

بس يا وااااااااائل في ناس قاعده وبتبص علينا ( انا في حالة اذبهلال تام ) ايه اللي انتوا بتعملوه ده وكمان مش مخبوطين يوووووه مخطوبين
مامااااااااا بيمسك ايديها لأ وعايز يبوسها كمان الواد ده عبيط ولا ايه الهبل ده ايييييييييييييييه الهببببببببببببببل ده وائل خد باله واحترم نفسه


ع اللسان البحر غضبان وموجه عالي يمكن علشان عارف


فضلت تحب فيه سبع سنين وصبرت على ظروفه واستحملت كتير وجابت منه اول طفله وهو جابلها انهيار عصبي وفقدان مؤقت للنطق

هموت جوايا حزن كبير عليها ، غلطتها انها حبت من لا يستحق الحب حبت اناني

ربنا يرحمها يارب الحب خطيئتها الوحيدة مش معقول تتعذب عليها باقي حياتها


"أنا محتاجة جداً لميناء سلام وأنا متعبة من قصص العاشقين، وأخبار الغرام وأنا متعبة من ذلك العصر الذي يعتبر المرأة تمثال رخام "


"كن صديقي
ليس في الأمر انتقاص للرجولة غير أن الرجل الشرقي
لا يرضى بدورٍغير أدوار البطولة.."
مللت من الشرقي وفقدت اي امل لمعنى الصديق فهو للأسف لا يدرك معنى الصداقه بمعناها البريء النقي
- احنا اخوات
- طبعا
وبعدها
- انتي الفراشه اللي بتلون حياتي وانتي وانتي وانتي وسلام معطلكيش ده كان مجرد كلام
انتي صدقتيني اخص عليكي لعلمك انتي الغلطانه يا وحشه بقى تصدقيني برضه لأ بجد اخص عليكي
- بس احنا اتفقنا نكون اصدقاء ليه كده ليه حطمت الصداقه دي للأسف كان وهم يا خسارة !
يا خسارة صورتك في عينيا ! مكنش ليه اي لازمه انك توهمني بالحب علشان تحتفظ بصداقتي
جيت تكحلها موتتها !!!!!
ان الأوان ان تطوي صفحات الألم والغدر وتنسى
ان تنثر باقي رماده في البحر فقد تحطمت صورة الفارس النبيل
ان تحيا كأن شيء لم يكن
ان تغسل قلبها بقطرات المطر وتطهره من بقايا الأوهام
ان الأوان ان تتذكر انه لا صداقه مع شرقي ولا حتى غربي فقط لأنها شرقيه
" هقفل الباب وامشي لبعيد ، هاخد خطوات جديدة تمسح القديمة ...... دلوقتي بس هقدر امشي من تاني " رحاب بسام ارز باللبن لشخصين

الثلاثاء، 15 ديسمبر، 2009

حكايات الصباح

ليست قصص ولكنها قصيرة (العنوان ده مأخوذ من كتاب عمر طاهر جر ناعم)

شعور :

الساعه 7 صباحا عندي محاضرة كمان ساعة ونص
منمتش من امبارح علشان أعرف اروح الكلية ومع ذلك مليش نفس اخطي خطوة بره باب بيتنا
حالة من الصمت بتسيطر عليا عايزة اسكت وبس مش عايزة اتكلم يمكن بكتب لكن مش عايزة اعمل اي حاجه
حاسة اني بتجمد وايدي لما بكتب في الأجنده بتبقى كتلة من التلج وحركتها بطيئة جدا
حالة من السكوت في اليقظة وحالة من الكلام في النوم وعجبي !

ضاكطور او بمعنى أصح طوووور :

رحت لضاكطور العيون وانا عيني بتوجعني بس مش أوي وبعد انتظار 3 ساعات كان نفسي اديلو بالبوكس في مناخيره
ودلوقتي بعدما استعملت القطرة الأجنبية اللي
كتبهالي عيني بتوجعني اوي اوي اوووووي
ومنك لله يا فخري
الهدوم :

هي الهدوم بردانة أوي كده ليه مع انهم حاضنين بعض في الدولاب !


اصوات :

صوت فيروز وانغام وعلي الحجار وعمر خيرت وزقزقة العصافير
واحساس غريب النهاردة عايزة انزل من البيت الاقي كل الناس شفافين محدش في الشارع غيري
واسيب خصلات شعري للهواء والبرد ومش عايزة أشوف أي حد ولا حد يشوفني
ومع ذلك هنزل الكلية وهلاقي ناس كتير رايحه وجايه وهفضل لابسة الحجاب
لسه نص ساعه عالمحاضرة ومضطرة انزل بسرعه جدا
ادخل المطبخ واعمل مج قهوة بالفانيليا اتأخر اكتر عن المحاضرة

الجو بره :

افتح باب بيتنا تقابلني موجة عنيفة من البرد احضن كشكول المحاضرات والكتب واتدفى بالمج الاستانلس اللي فيه القهوة بالفانيليا اللي اكيد مش هحلق اشربها الا بعد المحاضرة
وأغير رأيي في موضوع الحجاب ده حجابي حبيبي تسلملي يارب

حنين

اعدي على بيت جدو واتخيله بيدعيلي زي كل يوم وانا نازلة الكلية - الله يرحمه -

" ر
بنا يوفقك وتنجحي وتخلصي الكلية "

" ربنا ينصفك نصفة كبيرة لغاية ما كل الناس يستغربوا ويحكوا ويتحاكوا عن نصفتك " دعوة جدو وخالة ماما الله يرحمهما

" بطلي جنان وامشي واحدة واحدة

- متأخرة يا جدو انا هطيييييييير مش همشي

- ربنا يكفيكي شر طريقك ويبعد عنك ولاد الحرام

ياه اخدتني الذكريات يا خبر ابيض اتأخرت اوي عالمحاضرة
تممت عالكوتشات ودورت الكتكوتة وقرأت الأذكار وطرت ع الكليه
الحمد لله وصلت في معادي ركنت الكتكوتة والدكتر بيركن عربيته بس هو دخل بعربيته جوه الكلية
ما شاء الله عربيته سودا موديل السنه اوباااااااا ملاكي دمياط علشان كده المحاضرة الساعه 8 ونص

في المدرج :

دخلت المدرج وبعدها بثواني دخل الدكتر وعملت مناوشات مع الشخصيات القميئة والهلامية اللي كانوا قاعدين في تاني بنش مكاني ومع اني مسالمة جدا بس ده مكاني ومبفهمش غير فيه ايووووووون بتلكك :)

الكائنات الهلامية : انتي عارفة انفلونزا الخنازير والنفس
انا : على فكرة ده مكاني اصلا وانتوا ضيوف عليه
كان نفسي اقولهم اوي انا اخدت دوش قبل ما انزل من البيت انتوا بقى بقالكم كام سنة ما اخدتوش دوش ؟ يا بتوع انفلونزا الفرافير بس بلاش الطيب احسن ومش بحب احرج حد

في المحاضرة :

بدأت المحاضرة والدكتر قال لنا اللي قلبه ضعيف او مكسور يطلع بره المحاضرة من دلوقتي لأن محاضرة النهاردة هتوجع وتكسر القلب فكرت اخرج فعلا من المحاضرة وخصوصا اني كنت بردانة بشكل غريب
فعلا المحاضرة كانت توجع القلب وتجيب الغثيان والدوخة من التعبيرات الدموية وجريمة زنا المحارم اللي ارتكبها اوديباس من غير ما يعرف والمصيبة انه جاب اطفال كمان والملكة امه انتحرت وهو فقأ عينيه ووضع مكانهما حجرين اهئ اهئ اهئ ما اسوأها من محاضرة منيلة بنيله معلش هي المحاضرات كده قسم ونصايب
منك لله يا شكسبير اوديباس على التوالي واثيللوا في ترم واحد عاااااااااااااااااااا عا


على الطريق :

بعد المحاضرة خرجت مع رشا علشان تشتري لجوزها ورد والبونيه ازبهلت ان معايا عربيه وسألتني بتاعت مين قولتلها بتاعت واحد صاحبي نياهاهاها مكدبتش ما هو بابا صاحبي وأخويا وباباتي وسالتني بتعرفي تسوقي كويس ولا عملتي حوادث؟ قولتلها عملت حوالي عشر او حداشر حادثة بس قالتلي هههههههههه بتهزري صح
قولتلها لا والله بتكلم بجد هتركبي ولا لأ؟ قالتلي يلا اهو نموت شهداء قولتلها خليكي متفائلة
بس بصراحة كانت اسئلتها كتير عن العربية وقالتلي نفسي انا وجوزي في عربية زي دي قولتلها يا بنت الحلال واحدة واحدة انتوا لسه بتجهزوا شقتكوا وواحدة واحدة ان شاء الله هتجيبوا عربية احسن من دي كمان انا من سنة كان معايا فوفو وكنت باخد كمية تريقة لا تتخيليها – مبحبش انا نظام الأر ده – زميلاتي بيركبوا معايا بقالهم كتير عمرهم ما علقوا على العربية ولا مرة مع اني دايما بوصلهم
جبنا الورد ووصلتها ورجعت على مكتبة مبارك مكاني المفضل ورجعت تاني رحت الكورس دووووخه والله دوخة ، اشتريت مصاصات من اللي فيهم لبانه وبائعة الحلوى انا مسمياها كده استقبلتني ب ابتسامتها الجميلة وقالتلي وحشتيني انتي فين؟ قولتلها انا اهو :) وفتحت اول مصاصة واهي حاجة تشغلني علشان منمش وانا في الطريق وعليت الام بي ثري منك لله يا ضاكطووووووووور عيني بتووووجعني ااااااه يا عيني
ووصلت العيال صحباتي وكان المفروض اخد
ماما ونروح مشوار وعديت من قدام ماما ومأخدتش بالي ان ماما واقفة اصلا مستنياني كنت بناااااااام بس لما رجعت شوفت ماما
يقطع النوم وسنينه
الامتحانات قربت أوي والمراقبين هيراقبوا اربع فترات واحنا اللي هنتبهدل وهو ده التطور الطبيعي لسنه رابعة بيحتفلوا بينا

الجمعة، 11 ديسمبر، 2009

استفتاء



لا تجبر الإنسان ولا تخيّره
يكفيه ما فيه من عقل بيحيّره
اللي النهارده بيطلبه ويشتهيه
هو اللي بكره ح يشتهي يغيّره
عجبي !!
من غير كلام ورغي كتير موضوع ان الانسان يعمل كتاب ويبقى عليه اسمه والكتاب ده يبقى شاهد ليه او عليه لباقي عمره حاجه تخوف وحاجه مش سهلة وعلشان كده عايزة رأي قراء المدونة بكل صراحه في كتاباتي ومن غير مجاملة لأن اللي هيجاملني يبقى بيضرني لأن لسه الكتاب هيعدي على دار نشر وحاجات تانيه كتير والموضوع طلع اكبر ما كنت اتخيل وعايز شهور وشهور
وما خاب من استشار انا اخدت رأي ناس كتير رأيهم قيم جدا بره المدونة
وأي رأي يهمني جدا اني اعرفه
على فكرة انا فتحت التعليقات للغير معرف
دمتم بخير

الأحد، 6 ديسمبر، 2009

لكن سمائك ممطرة وطريقك مسدود مسدود يا بنتي

بحب الصورة دي يا سلام لو فعلا امشي وسط السحاب

مش عارفة ليه بعد الأجازات بيكون في حالة ارهاق عامة النهاردة معظمنا كان شكلنا غريب في الكلية هي الأجازة بتريحنا وبتدينا دفعة للحياه ولا بتخلينا نرتاح وناخد ع الأجازة ؟

المهم حصلت حاجات كتير النهاردة اخترت لكم منها

خير اللهم اجعله خير خلصت الكلية وقولت أروح الشهر العقاري اسأل ممكن اسجل كتابي ومواضيعه ازاي وايه الخطوات اللي هعملها وكده من باب العلم بالشيء مش أكتر

المهم اني رايحة وجايه في طريق المحكمة اللي فيها الشهر العقاري كل يوم ومش عارفه مكانه ضللت الطريق في الأول وبعدين دخلت المحكمة ولقيت ما شاء الله كل المحاميين لابسين فورمال (رسمي فهمي نظمي ) ما شاء الله شكلهم يفرح بدل وحاجات كده بس هو محدش قال لهم ان الجرافت السودا معناها حداد؟ !!!!!! ما علينا

كان في انتخابات تقريبا لأن كان في زحمة غير طبيعية من المحاميين وواحد عمال يتكلم عن الغد المشرق البسام وقاعدين يسمعوه

المحكمة متواضعة جدا المهم دخلت اوضة كده مش مكتوب عليها اي حاجه علشان اسأل فين الشهر العقاري لقيت الموظفة نايمة
فسألت موظفين كانوا قاعدين جنب بعض هو فين الشهر العقاري قالولي هو ده قولتلهم اصل مفيش اي حاجة مكتوبة تقول ان هنا الشهر العقاري ( انا مسمياه شهر العقارب)
وسألتهم عن اني عايزة اسجل كتاب وشوفوا الحوار اللي حصل بس هوصف الأوضة الأول اللي كان قاعد فيها الموظفين

أوضة كبيرة فيها شباك واحد بيطل على مبنى تاني والأوضة مفيش فيها ابسط قواعد النظافة كلها تراب وشكل البلاط مش باين اساسا والدهانات بتاعت المكان باهتة بطريقة غريبة , انا وقفت شوية بقول الله يكون في عون الناس اللي بيشتغلوا هنا بجد حاجة صعبه يعني حاجه متشجعش عالشغل أصلا

أنا : السلام عليكم لو سمحت عايزة اعرف ممكن اعمل ايه علشان أسجل كتاب

الموظف : كتاب ؟

أنا : أيوة كتاب او مواضيع لكتاب

الموظف : كتاب ازاي يعني انتي كاتبة كتاب

أنا : أيوة

الموظف : كل الي بيحصل هنا هبل وعبط كل اللي هقدر أعمله اني اثبتلك التاريخ وخلاص عليكي وع القاهرة

أنا : القاهرة !!!!!!!!!!!!!!!!!!!!!!!!!!!!!!! اومال الشهر العقاري هنا فايدته ايه

الموظف : الشهر العقاري هنا مبيعملش حاجه للكتب كل اللي ممكن اعمله اني اثبت التاريخ وخلاص

أنا : التاريخ !

الموظف : بصي انا هقولك في مكان للكتب في القاهرة اسمه دار المصنفات الفنية في العجوزة عارفاها ؟

أنا : ....................

الموظف : طب بلاش عارفة وزارة الثقافة

أنا : ........................

الموظف : يبقى مش عارفاها هي المصنفات دي اللي هتفيدك هي في العجوزة والعجوزة في الجيزة على كورنيش النيل طبعا

أنا : وليه الشهر العقاري هنا مش بيسجل حاجه انا بسمع انهم بيسجلوا الخواطر او الأشعار او أي حاجه مكتوبة في القاهرة عادي

الموظف : اول مرة اسمع الموضوع ده

أنا : يعني الحل اني اروح القاهره :(

الموظف التاني : بصي ممكن تروحي رأس البر الشهر العقاري هناك هيسجلوا لك عنوان كل حاجه كاتباها في الكتاب

انا : وخلاص هنفجر عنوان طب والعنوان هيفيد بإيه ما ممكن الفكرة اصلا تتسرق انا عايزة أسجل الأفكار علشان حقوق الملكية الفكرية

الموظف : وهو في حد بيسرق الأفكار

أنا : في سري ياااااااااااااااااااااارب صبرني أيوة في ناس بتسرق الأفكار وبتنسبها لنفسها

الموظف : خلاص يبقى تروحي القاهرة

أنا : متشكرة جدا

وخرجت من المحكمة وانا مش شايفة قدامي وجوايا دموع مخنوقة يعني علشان أسجل الكتاب بس لازم اروح القاهرة اومال دار النشر بقى وباقي الخطوات هعمل فيها ايه

روحت الكتكوتة وفتحت الام بي ثري لقيت انغام بتقول دلوقتي أحسن - اني اعرف ان الطريق مكلكع دلوقتي احسن - ولسه هتنزل دموعي جت الأغنية اللي بعدها انغام برضه مهزومة ضعيفة مليش طموح قلت نيفر نيفر نيفر نيفر ناجحة وقوية وطموحة خير ان شاء الله

وفي الوقت اللي بحس ان الحياه فيه جايه اوي على احلامي ونفس السؤال بيجي في بالي هو ليه كل ما أقرب من تحقيق أحلامي الاقيها بتبعد عني يعني خلاص همسكها الاقيها طلعت تجري وتلاشت عن الأنظار
بفتكر حولم الله يرحمه لكن سمائك ممطرة وطريقك مسدود مسدود بس انا مش هستسلم ويا انا يا السفارة في قلب العمارة :) قاهرة قاهرة وانا هخاف يعني ولا ايه

وزي ما الموسيقار عمار الشريعي بيقول : في دنيتنا المجروحة ملناش الا الأحلام وانا اخدت الجملة دي وعدلتها وخليتها

في دنيتنا المجروحة ملناش الا الأحلام يمكن في يوم نقدر نحققها

ومفيش حياة من غير أمل وأميرة وإيمان :)

السبت، 5 ديسمبر، 2009

أقول ولا بلاش :)



بعد الانتخة والأجازة لابد ولا مفر ان يكون عندنا امتحانات شفوي طول الأسبوع الجاي

بالنسبة للبوست اللي فات قبل ما أقول بطلب الأمان :) طيب اقول ولا لأ

أقول ولا لأ ؟

يلا هقول وأمري لله حبايبي الحلوين اللي بيدرس English Art لازم ولا بد ولا مفر انه مياخدش الكلام بمعنى واحد يعني لازم يحلل الكلام ويفصصه ويفهمه ويعرف ما وراء الكلام ويستنتج كذا معنى ويطلع للقصة القصيرة او المقال أكثر من معنى وبكدا المقال او القصة بتكون ثرية

ودي اسمها الكتابة الرمزية أخت رمزي :) وحيث ان عندي امتحانات فقلت اجرب الأسلوب الرمزي ده البوست اللي فات وانا بكتب الموضوع بيبقى عندي كذا معنى بفكر فيه غير المعنى الواضح والصريح اللي كل اللي قرأوا البوست اللي فات فهموه

ولو فكرتوا في البوست اللي فات ومأخدتهوش زي ما هو ظاهر بالضبط هتلاقوا معاني جديدة :)

تاني حاجة على اعتبار اني قولت اول حاجة انا مش عارفة ليه مش برتاح للقاهرة زحمة ودوشة ولما بروح بالكتكوتة بحس ان شوية وهيجيلي انهيار عصبي مع اني مش بدخل وسط البلد والأماكن الزحمة يمكن اسكندرية زحمة بس فيها حبيبي البحر فمش بحس بالغربة لكن القاهره بحس انها غريبه هي بعد الساعه 1 بتكون ساحرة وبتبدأ الزحمة تقل لكن لسه خوفي من القاهرة زي ما هو وخصوصا لما بشوف عربيات الاسعاف اللي مش عارفه توصل للمستشفى من كتر الزحمة والحقيقة انا سميتها عربية الاتلاف لأن المريض بيتلف لغاية لما يروح المستشفى ويكمل تلف هناك :(

تالت حاجة بفرح أوي وبحس ببهجت :) لما اسمع كلام المدونين عن مدونتي

كلام خالتو ستيتة حبيبتي اللي بجد بجد نفسي اقابلها جدا لما قالتلي بحب اقرأ كلامك وحاجات تانيه كتير :)

كلام سومة لما قالتلي على فكرة انتي بتكتبي حلو أوي يا خبر ابيض انا حالتي وقتها اني كنت تعبانه جدا ونايمه بعد ما سمعت الكلمتين دول حسيت ان شوية وهطير في السما لأن نبرة صوتها مكنش فيها مجامله لكن كلام بجد

خالتو المصرية حبيبتي هي بقى لها كتير مش بتدخل المدونات بس برضه بحب رأيها جدا في أي حاجه بكتبها

وأخيرا أميرة كل ما بنتكلم بتفاجئني انها فاكرة بوست من المدونة وبتقتبس حاجات منها وبتقولهالي :) هيييييييه مع ان برضه قبل كده قالتلي انها مش بتحب المدونات اللي بيكون فيها يوميات :) ده على اساس اني بكتب شهريات مش يوميات

بجد بجد شعور جميل لما تلاقي حد مهتم بكلامك يمكن وأكيد ميكونش أحلى كلام ولا انا كاتبة بمعنى الكلمة انا بس بحب الكتابه ومن غير التشجيع ده اعتقد اني مكنتش هقدر استمر وعلشان كده بجد شكرا

الجمعة، 4 ديسمبر، 2009

نهاية الدنيا + تحديث


تحديث : يا جماعه انا مقولتش اطلاقا ان صحبتي مريضة نفسيه ومستحيل اسمح لحد انه يقول عليها كده

هي كل الموضوع انها في حالة حزن ومش قادرة تكمل حياتها وتفرح وده تعريف الاكتئاب

دموع لساعات متواصله وصداع ويأس واحباط وخوف وملل ولا مبالاه ومش عايزة تشوف حد ولا تكلم حد ولا تذاكر ولا تخرج ولا حتى بقت بتفرح من أي حاجه






وبصفتي صحبتها الانتيخ حاولت اطلعها من المود 100 مرة ومعرفتش طب اعمل ايه ؟ اعمل ايه قرأت شوية عن الاكتئاب وأدوية الإكتئاب وعرفت الأتي :-





التأثيرات الجانبيه لأدوية الإكتئاب أفظع من الإكتئاب نفسه ده غير ان الدوا تأثيره مش بيظهر الا بعد اسبوع او اكتر من استخدامه :(



الأعراض الجانبية للإكتئاب

ميل للنوم


تفكير بالانتحار


قلة تركيز


اضطرابات القلب واضطرابات هضمية وادمان للدواء ....الخ


يبقى كده اللي يجيله اكتئاب من الدنيا وبلاويها يقعد ساكت ومكتئب وخلاص ويفكر في طريقه يعدي بيها الوقت ويهدر ايامه يوم ورى التاني


انا اسفة يا صاحبتي مش عارفة اعمل ايه اول مرة احس ان انسانة غالية عليا ومش عارفة اساعدها


وسلامتها ام حسن م العين وم الحسد وسلامتك يا حسن من رمش اللي حسد

وسكر حلوة الدنيا وتجيب السكر

الأربعاء، 2 ديسمبر، 2009

ذكريات الطفولة


امبارح سمعت حدوتة أبلة فضيلة الصبح والغنوة اللي بعديها وكمان شوفت فيلم ice age بجد فيلم جميل أوي
حدوتة أبلة فضيلة كانت جزء اساسي من صباحاتي الطفولية وكنت فاكرة ابلة فضيلة هي الفنانة كريمة مختار وفضلت الفكرة دي عندي لغاية لما في يوم سألت ماما وقالتلي ان ابلة فضيلة مش كريمة مختار :)
بمجرد ما سمعت الحدوتة افتكرت البنوتة الصغنونة اللي حبيتها اوي واللي محتفظة بصورتها وهي في اولى ابتدائي في المحفظة بتاعتي
واللي لما زميلاتي في الكلية او صحباتي بيسألوني معاكي صورة ليكي بقولهم أيوة دي أنا وبوريهم الصورة دي :)
حاسة ان عمري وقف عند الفترة دي لأنها كانت من أجمل فترات حياتي
مدرسة اللغات وكل المدرسين اصحاب بابا وكلهم كانوا بيدلعوني وزميلاتي كانوا مفروسين مني :) اشمعنى انتي اللي بيدلعوكي ومهتمين بيكي كده
شيتوس والشوكولاته "شكوكو" انا كنت مسمياها كده هي شوكولاته بتبقى سايحه وبتتاكل بمعلقة صغنونة وال لوليتا في الفسحة
طابور الصبح اللي مكناش بنشوف فيه اي حاجه من طلاب ثانوي الطوال واللي كانوا بيقفوا في الطابور قدامنا
مدرسة الاعدادي اللي جنب مدرستنا ويوم الزلزال لما مدير المدرسة قال لنا ان لو حسينا بهزة الزلزال ننزل تحت الديسك وفضلت اتدرب طول اليوم ازاي انزل تحت الديسك واتخيل الطوب واقع على الديسك وواقع جنبنا ومع ذلك لما حصلت هزة ومع اننا كنا اطفال الا اننا التزمنا بأمكننا ومخفناش عكس مدرسة الاعدادي بنات اللي كانت جنبنا كلهم صرخوا وخرجوا من المدرسة وفزعونا معاهم
هما اللي كانوا اطفال مش احنا :)
حفلات المدرسة والفستان الأبيض المنفوش أبو وردة حمرا بتاعي
والحواديت اللي مستر محمد مدرس الموسيقى كان بيحكيها قبل ما نطلع على المسرح " مرة واحد صياد ضاع منه خاتم كان بيحبه
وبعدين اصطاد سمكة كبيييييييرة فتحها ملقاش الخاتم :) وبعد سنة , سنة كامله اصطاد سمكة كبيرة جدا فتح السمكة لقى جواها سمكة متوسطة وجوه السمكه المتوسطة سمكة صغيرة وجوه السمكه الصغيرة سمكة اصغر منها وبرضه الخاتم مش موجود :) "
تدريباتنا على الأغاني ورقصاتها وانا مكنتش عارفه ايدي اليمين والشمال وكنت بلخبط بينهم فقالوا لنا الايد اليمين اللي بناكل بيها وبنكتب بيها وكان معانا بنوتات بيكتبوا بإيدهم الشمال وكنا متلخبطين اخر لخبطة في البروفات
أغنية القطن قطننا طارح فوق أرضنا ولبسنا الفلاحي والمنديل ابو أويه هو اسمه كده كان شكلنا زي العسل والميك اب بتاعنا كان صعيدي ليه مش عارفه
يوم الأجازة وصلاة الجمعه وبرامج الشيخ الشعراوي
ألبوم عايدة الأيوبي و بعض أغانيها اللي كنت ناسياها واللي لما سمعتها تاني بعد طول غياب حسيت بنفس المشاعر اللي كنت بحسها وانا طفله لما بسمعها وكنت متخيله ان مفيش ناس كتير عارفين عايدة الأيوبي بس في الفترة الأخيرة لقيت فاطيما حبيبتي وشيما وأميرة بيتكلموا عنها وفي أخر كورس أخدته كنت انا وأية زميلتي بنغني أغاني عايدة الأيوبي وعلى فكرة الاغنية اللي في البلوج اهداء ليهم لأني بحبها أوي وشيما فكرتني بيها
الشوكولا و المشروب اليومي اللي كنت بتضايق منه عسل ابيض بالليمون علشان ميجيليش برد ومع ذلك كان بيجيلي برد مفيش فايده :)
انا بحب أوي الفترة دي من حياتي ولما بنقعد في الكلية انا وزميلاتي اللي كانوا في مدرسة اللغات بيبقى أحلى وقت وبنفتكر مدرستنا كانت جميلة أوي والحياه كانت جميلة أوي وان شاء الله اللي جاي جميل برضه
طول ما جوايا الذكريات الجميلة دي هفضل روح طفلة مش عايزة تكبر
يارب الأجيال الجايه يستمتعوا بطفولتهم ويعيشوها صح لأني حاسه ان الاطفال دلوقتي كبروا قبل الأوان