الأحد، 27 سبتمبر، 2009

لتعارفوا ...

بسم الله الرحمن الرحيم

في البداية انا بعتذر علشان مش عارفة اتابع أي مدونة من المدونات علشان الكمبيوتر والنت عندي بعافيه شوية والكام اليوم الجايين مش هيبقى عندي كمبيوتر اساسا بس يارب ميكونش فات المعاد ويقولولي هنضحي بالكمبيوتر علشان ليدي تعيش :) انا بكتب دلوقتي والكمبيوتر عامل دوشة وبيفتح صفحات لوحده والنت بيهييس فبقالي شوية كتير بكتب في البوست


كنت محتارة أوي يا ترى أتعرف بالناس وأكون اجتماعية ولا كفاية أوي الناس الغريبة اللي شوفتهم في حياتي ومتعرفش بأي حد
المهم من فترة مش كبيرة أنا مش بصاحب حد زي كده اللي عايزني يجيلي انا مبروحش لحد :) يعني معظم صديقاتي عالنت او زميلاتي في الكلية أو أي كورس بروحه هما اللي بيطلبوا مني نكون أصدقاء وبالتالي مفيش أي مشكلة بنكون أصدقاء المهم مكونش أنا اللي طلبت الصداقة مع اني مكونتش كده اطلااااااقا ماما بتحكيلي وانا بيبي عندي 3 او 4 سنين اني كنت بصاحب الناس في الميكروباص او لما نكون راكبين اتوبيس ومسافرين وكنت بعزمهم كلهم على عيد ميلادي :)

المهم فعلا بدأت أقرر اني لازم اتغير وايه يعني اللي هيحصل لما أتعرف بالناس بس مشكلتي كانت حاجة واحدة حســــــــن النيـــــــــــة واللي بتوصل للسذاجة أحيانا يعني مثلا انا الحمد لله مش بكدب يبقى كل الناس زيي هيكدبوا ليه يعني ؟؟ انا بثق في الناس بسرعة يبقى كلهم طيبين وهكذا وفضلت اخد مقلب ورى التاني واكتشف الماسكات ماسك ورى التاني بس اللي زعلني مش اني أكتشفت كدب ونفاق ناس وثقت فيهم واعتبرتهم اخواتي لكن اللي ضايقني بجد انهم نزلوا من نظري بعد ما كنت بحترمهم وبقدرهم واللي ضايقني اكتر اني حتى مش ممكن أكلمهم تاني في يوم من الأيام الا لو حصلت معجزة واللي يضايق أكتر وأكتر انهم عمرهم في حياتهم ما هيعرفوا انهم كدبوا عليا او غلطوا في حقي لأني ببساطة انا اللي اكتشفت كذبهم فهما من وجهة نظرهم مكذبوش :)
وعلم النفس الاجتماعي بيقول ان المخطئ يلومه كل الناس الا نفسه وأن اكتر المجرمين والقتلة في العالم كانوا بيقولوا انهم بريئين وانهم معملوش حاجة غلط !! انا طبعا مش بقول ان الناس دول مجرمين او قتلة لكن اعتقد ان الكدب والنفاق بيساووا القتل بالضبط

وطبعا لازم أقول اني برضة عرفت ناس كويسين في حياتي وعرفت ناس كويسين عالنت وان عالم النت الكبير مغيرش فيهم ومخلاهمش كدابين او منافقين وموضوع النت ده عايزاله بوست اتكلم عنه بالتفصيل ان شاء الله

المهم في أية جميلة جدا في سورة الحجرات الأية رقم 13
قال تعالى : " يأيها الناس إنا خلقناكم من ذكر وأنثى وجعلناكم شعوبا وقبائل لتعارفوا إن أكرمكم عند الله أتقاكم "

فمعنى لتعارفوا ده معنى جميل جدا وأنا نفسي اتعرف بكل الناس بس للأسف في حواجز كتير بتمنعني

أولها حاجز الخوف يا ترى هيتقبلوني ؟ يا ترى هكون اضافة ليهم؟ يا ترى هيكونوا ناس كويسين ولا هاخد مقلب ينضم لأخواته المقالب اللي اخدتها في ناس كتير طلعوا عكس ما تخيلت

تاني حاجز مش مخليني أشوف صديقاتي المدونات او أحضر لقائات مدونين التخييل -لصديقات النت - يمكن طريقة كتابتي في المدونة خلت كتير من متابعين المدونة يتخيلوا اللي بتكتب الكلام ده بشكل معين وأنا مش كده يعني مثلا كلمت كذا بنوتة مدونة وكل بنوتة كانت متخيلة شكلي حاجة تانيه خالص يعني كل واحدة فيهم كانت متخيلة شكلي بطريقة ههههههه طب انا اعمل ايه انا ليا شكل واحد بس مش 100 شكل

وأخيرا هتوحشوني الأيام الجايه وعايزة ارائكوا في موضوع لتعارفوا وأدينا بنتعارف

ملحوظة : هكون متابعة كل الردود ان شاء الله من الموبايل

الخميس، 24 سبتمبر، 2009

من كل بستان وردة


ملحوظة النت عندنا خنيق خنيق خنيييييييق واييييييييييه


طبعا انا بحب اغاني فيروز جدا جدا جدا ومعلق معايا اليومين دول أغنيتها كنا نتلاقي وخصوصا الكوبليه اللي بيقول

يا سنيني اللي راح ترجعيلي ارجعيلي شي مرة ارجعيلي

وانسيني ع باب الطفولة تا أركض بشمس الطرقات

يا سنين اللي راح ترجعيلي ارجعيلي شي مرة ارجعيلي

وردي لي ضحكاتي اللي راحوا اللي بعدا بزوايا الساحات

يا سنين اللي راح ترجعيلي هترجعيلي يعني هترجعيلي
والا هطلع المطوة وأغوزك نياهاهاهاهاهاها (دي من عندي مش من فيروز)


غريبة الناس أغنية من جمالها مش عارفة اوصفها وكمان الكليب بتاعها حلو جدا - لو كنت عملت خاطر ليوم حلو عشناه في كده معقول يا ساتر مفيش كده في الحياة -

خير اللهم اجعله خير بفتح شنطة منسية النهاردة لقيت فيها اييييييييييه؟؟؟ لأ مش دهب ومورجان وياقوت أحمدك يااااااارب

لقيت كشكول كنت بذاكر فيه أيام الثانوية العامية وكاتبة أشعار وحكايات قرأتهم وانا مبتسمة مع ان أيام ما كنت كاتبة الحاجات دي كنت بكتبها وأنا مخنوقة وسبحان الله الأيام دول - بكسر الدال- في خواطر حسيتها أوي وأنا بقرأها وكإني لسه كاتباها دلوقتي
فعلا كل حاجة بتروح وبتتنسى في حياة الانسان الا الذكريات والعمل الطيب والكلمة الطيبة - ناس طيبين جدا جدا جدا الصراحة -


بفرح أوي لما الاقي زميلاتي في الكلية مهتمين بيا وكل شوية بيسألوا عليا وبيبعتولي ايميلات مع ان انا رخمة ومش مهتمة بيهم نفس الاهتمام ويا سلام لما عملت مقلب في دودو زميلتي بعد النتيجة وقولتلها مش هكون معاكو السنة الجاية يا عيني البونية اتخضت وازبهلت وكانت هتعيط وقالتلي حرااااااااام والله حراااااااااام - فكرت اني هعيد السنة - ودودو مأخدتش بالها اني بقولها السنة الجاية مش السنة دي لأن طبيعي اننا هنتخرج السنة دي ان شاء الله ومش هكون معاهم السنة الجايه :)

كلمة مش ممكن انساها قالتهالي هبة صديقة الطفولة اول ما دخلنا الكلية سوى قالتلي احنا احسن من طب يا بنتي فقولتلها يا سلاااااااام قالتلي طبعا الدكتور بيطلع يشتغل دكتور لكن احنا ممكن نبقى مترجمين أو صحفيين او حتى مدرسين يبقى احسن من طب ولا مش احسن - ههههههه وجهة نظر- وبالتالي من جمال الكلية هبة سابت الكلية من اول شهر واتجوزت وقعدت في البيت وده ان دل على شيء فيدل ان فعلا كليتنا أحسن كلية في الدنيا :)

الموسيقار الرائع عمار الشريعي خريج كلية الأداب قسم انجليش
الممثلة الجميلة اثار الحكيم خريجة كلية الأداب انجليش برضه
الممثل الوسيم أحمد عز خريج كلية الأداب انجليش
وأخيرا كلها كام شهر ان شاء الله وتنضم لكل الرائعين دول ليدي خريجة كلية الأداب انجليش :)
أخر كلية كنت ممكن اتصور اني أدرس فيها ف يوم من ذات الأيام ومع ذلك دي رابع سنة ادرس فيها بس يارب مطنشش محاضراتها زي السنة اللي فاتت





الجمعة، 18 سبتمبر، 2009

العيد عيدنا وهنعيد


أيون العيد عيدنا وهنعيد غصب عن أي حد وأي حاجه ممكن تضايقنا ومش هنلتفت لأي حاجه مزعلانا

لو رزقك ضيق بس صحتك الحمد لله كويسه يبقى انتا ف نعمة كبيرة أوي ومش مضطر تروح لدكاترة يدفعوك دم قلبك ويستغلوك ويقرفوا فيك ويزهقوك والخ الخ الخ ومش مضطر تاخد دوا غالي وبمواعيد محدده ومش بتعاني ودي نعمه تستحق انك تفرح بيها وتعيد

لو عندك شوية مشاكل صحية في غيرك نايمين على سراير بيقولو عليها بيضا ومش بيقدروا يتحركوا ومش بيقدروا حتى يساعدوا نفسهم لأ وكمان أخر الاخبار ان في ناس مش لاقيه سراير أصلا يبقى انتا احسن بكتير من غيرك وتستحق انك تحس بالعيد

لو اكتشفت كدب وخيانة وغدر وندالة صديق أو قريب أو حبيب ف لسه في 80 مليون غيره وأكيد في ناس جنبك وبيحبوك وبيساعدوك على تخطي ازماتك وانتا كسبت نفسك وبعدت عن غدره وكذبه وهو خسر احساسك بيه وحبك ليه يبقى برضه لازم تفرح وتعيد وتنفخ بلونات كمان

لو متوفقتش في دراستك او شغلك يبقى حاول وحاول وحاول وأكيد هتنجح وتوصل لأن لكل مجتهد نصيب واسعى يا عبدي وانا اسعى معاك وخليها على الله وبطل تنكد على نفسك وتحرم نفسك واللي بيحبوك من العيد

لو ضاعت منك حاجه جميله ف حياتك فتاكد انها لو كانت استمرت مكنتش هتفضل بجمالها وأكيد الجاي أحلى وأجمل بكتييييييييييير حتى لو لسه مش باين ولا شعاع من نوره فمسيرك هتشوف النور وهيملا كل خليه من خلاياك حب وفرحه وأمل ف اوعى تضيع عيدك لأنه مش هيرجع تاني

الدنيا مش بتستمر على حال الحزن بيتبدل فرحه والليل أخره نهار والشده بعدها فرج وطظ ف أي حاجه واي حد مضايقنا او بيفكر انه يضايقنا لأن داين تدان وربك يمهل ولا يهمل يبقى هنقعد نعيط ونكتئب ونبكي على اللبن ف البسكوت ليه خلاص عديها وعيد بقى وحس بالعيد وبلاش نضيع عيد ورى عيد هو يعني ف عمرنا كام عيد ده عمرنا كام سنه بنقضيها في السريع ومش هنقضيه فنكد علشان حاجات وناس متستاهلش

كل سنة وانتم بخير وكتير منكم طيبين وشوية كتير شوريرين :)

وبمناسبة عيد الفطر الكميل كل تعليق يجيب معاه كحكايه وبيتي فورايه وبسكويتايه وشوكولاتايه بالمره :)

وتهنئة خاصة بالعيد لمامتي وبابايا وخالتو اولا
وكيكي وأميرة على كوكو مهجور وشيما وخالتو المصريه وخالتو ستيتة وانوسه عاشقة الاحزان ودودو عاشقة الرومانسية واحساس طفله وديدي اللي وحشتني وselfmeaning وdrama queen و هاجر زعبل وموني و محاسن صابر وبسمة انور وشوكولاته والانجينير ويوسف وللطيوبين الي متابعين مدونتي اما الشوريرين فملهمش تهنئة

السبت، 12 سبتمبر، 2009

انا صار لازم ودعكم



مساء وصباح الخير والسلام عليكم وهاي _ في تحية أكتر من كده _ أي خدعه :)


حد شاف القمر النهاردة ؟ القمر النهاردة ليه طعم تاني حسيته مكسور وحزين وبيبكي ما علينا مش موضوعنا


انا جايه النهاردة علشان أقول اني ان شاء الله مش هكتب بوستات جديدة في المدونة فترة لسه محددتش هي اد ايه يمكن يوم يمكن اتنين يمكن اسبوع او اسبوعين يمكن شهر بس اكيد مش شهرين نياهاهاهاهاها ف ليا رجاء عند صحباتي الانتيخ متعملوش زي المرة اللي فاتت وتقلقوا عليا وتقلقوني عليكوا هي حاجه لذيذة لما تحس ان حد مهتم وبيحبك وبيقلق عليك وانا بحبكو جدا بس محتاجه اقعد شوية مع نفسوياتي واحسم شوية حاجات جوايا واحدد هرجع للبسبوسة امتى ان شاء الله وكذا حاجه تانيه ومش هقفل موبايلي لكن مش هستخدمه تمام؟ علشان محدش منكن يزعل مني

بالنوسبة للمدونة انا أسفة يا ديدي انا شيلت الغير معرف ودي خطوة كنت مأجلاها من فترة واتمنى انك تعملي اكونت علشان تتواصلي معايا في المدونة لأني بحب تعليقاتك وكلامك وانتي من اصدقاء المدونة الغاليين بالنسبة لي

وكمان شيلت الموديريشن بس ده ميمنعش ان اي كومنت هتضايقني لما ادخل عالمدونة هحذفها وعلى فكرة انا مش بمسح تعليق الا لو كان مضايقني سواء اسلوبه مش حلو بالنسبة لي او مجاملة زيادة عن اللزوم وانا مش بحب المجاملة الOVER

وأخيرا ده بوست مفتوح لأي حد عايز يقول اي حاجه عن المدونة والبوستات اللي فيها


كل سنة وانتم طيبين وعيد سعيد - كده انا اول حد يهنئكم بالعيد - هيييييييييييييييه

دمتم في حفظ الرحمان

الأربعاء، 9 سبتمبر، 2009

الصبر مفتاح الفرح



الصبر مفتاح الفرج والفرح كمان
زمان وانا طفله كان عندي قصة اسمها الصبر مفتاح الفرج والدنيا كانت مبهدله ومعانده ابطال القصة لكن هما كانوا أقوى منها وكانوا بيصبروا لغاية لما ربنا سبحانه وتعالى ساعدهم وكافئهم على صبرهم واتبدلت حياتهم من تعب ومشقة واحباط لسعادة ورضا وكانوا متقبلين الحياه بروح جميله أوي

الحقيقة انا مش فاكرة تقاصيل القصة بس فاكرة اني لما كنت بضايق او بزعل كنت بقرأ القصة دي وكنت بحبها اوي
ولاحظت ملحوظة صغنونة في القرأن الكريم لقيت في أيات كريمة كتير بتتكلم عن ثواب الصابرين ومكانتهم الكبيرة عند ربنا سبحانه وتعالى وانهم فائزين وربنا سبحانه وتعالى بيبشرهم بخير الدنيا والأخرة وقتها عملت وقفة مصرية :) بس مع نفسي ورجعت شوية فلاش باك ولقيتني فعلا افتقدت الصبر في كذا موقف اتعرضت ليهم وكذا موقف لسه هتعرض ليهم ويارب مفقدش صبري فيهم لأن الحياه كلها امتحانات للصبر وربنا سبحانه وتعالى يجعلنا من الراضيين والصابرين

ومع موضوع الصبر كنت بقرأ في القرأن الكريم فكان في سجدة فسجدت وفي سجودي افتكرت شخص ما عمري ف حياتي ما كرهت شخص زيه وعلشان محدش يتخض ده واحد ربنا سبحانه وتعالى خلاه ضاكطور و حطه في كليتنا علشان يختبر صبرنا والمتابعين لمدونتي هيعرفوا انا بتكلم عن مين حتى اسمه مش عايزة اقوله ولقيتني بدعي وبقول اللهم لا تمتني حتى تريني ثأري في فلان واللهم ارني ثأري في من ظلمني وبعد الدعاء ده اتخضيت قلت يا نهار ابيض طب ما انا ممكن حد يكون بيدعي عليا نفس ذات الدعاء وخفت بجد ولذالك اتمنى ان اي حد ظلمته يقوللي انتي ظلمتيني لأن كده ارحم من انه يدعي عليا

ويارب ربنا سبحانه وتعالى يرزقنا الصبر والرضا لأن من رأيي المتواضع أن الصبر والرضا هما أهم حاجتين في الحياه
وعلى فكرة الرضا مش معناه اني مكونش انسان\ة طموح\ة لكن الرضا انك تكون بتسعى لتحقيق احلامك وطموحاتك ومع ذلك متقبل نفسك ومتقبل حياتك ومتوكل على الله سبحانه وتعالى ومؤمن ان مبيخدش الروح الا اللي خلقها وان رزقك مش هياخده غيرك

شوية ملاحيظ بره الموضوع: النهاردة تسعة تسعه تسعه 3 تسعات
حد شاف القمر امبارح بجد كان جميل جمال ملوش مثال :) انا بحب القمر جدا جدا جدا



الخميس، 3 سبتمبر، 2009

اتكلم من الكيبورد

فشلت كل الجهود الحثيثة والمش حثيثة علشان أكتب بوست وبسم الله ما شاء الله لقيت كلام كنت عايزة أقوله بالحرف على مدونات تانيه (توارد الأفكار عامل عمايله )


وبإختصار كتير مننا كارهين بوجي وطمطم الجديد وفطوطة الجديد وانا مش حابه كمان تتر بوجي وطمطم اللي شيرين بتقول فيه بكل رقه ودلع _ تمتوته يا تمتم يا تماتم يا تمتاميه _
ومفيش أي حاجه من الحاجات اللي شوفناها في طفولتنا عملوها تاني وطلعت حلوة بالعكس عملوا صورة باهته ومشوهه منها

ثانيا من غير أولا : أكتر حاجه عاجباني من كل السلطه اللي بتيجي عالتلفزيون تترات مسلسل الأدهم الكلمات بجد جميله جدا للشاعر ابراهيم عبد الفتاح وكمان الأغاني جوه المسلسل للشاعر بهاء جاهين وكمان أداء لؤي جميل جدا وموصل احساس الكلمات واللحن يمشي برضه مفيش مشكله ولو مكنش في توزيع كويس اللحن مكنش هيبقى ليه لازمه وخصوصا انهم مستخدمين الكمنجات يظهر انهم عارفين اني بحبها :) ومن ضمن الكلمات اللي فاكراها وبحبها من مقدمة التتر الأول من المسلسل :

مبقولش أه م الغريب مهما يجرح
ولا يوجع الا قريب ف عذابي يفرح ............

يا دنيا ليه الأحبه نسيو الدفا والمحبه
الناس طمعها عماها حاسس ما بينهم بغربة
وليالي فوق احتمالي عالطيبين تقسى ......

وطبعا المسلسل قصته جميله واحمد عز ونهال عنبر الاتنين متميزين في أدائهم وكمان المسلسل بيناقش قضايا مهمة زي ظلم الأقارب والهجرة غير شرعيه
وكمان عجبني تتر النهايه من مسلسل اسماعيل ياسين والمسلسل ككل جميل جدا وبيبين اد ايه حياة الانسان المبدع واللي عنده هدف نفسه يحققه بتبقى صعبة وبيقوم من نقرة يقع في دوحديرة والدنيا بتلطش فيه لغاية ما بينجح وبيحقق هدفه ووقتها فرحته بتحقيق حلمه وانتصاره على الدنيا بينسيه تعبه والمه ومعاناته
كمان عجبني كلمات الشاعر ايمن بهجت قمر في تتر مسلسل ابن الأرندلي تتر النهاية مع انه كاتب كذا تتر وفيهم شبه من بعض
واحنا مفيش عندنا مشكله في الشعرا زي ما أيمن بهجت قمر قال في حواره مع الخنيق شوبير
وانا بأييد كلامه لأن الكلامنجيه كتير لكن قليل أوي اللي كلامهم بيبقى سهل وممتنع وبيدخل القلب زي اشعاره وان في ازمة ملحنين مش ازمة شعراء
شوية من كلمات تتر النهايه اللي دايما بتيجي على بالي من مسلسل ابن الارندلي :
ولا حد واخد حاجه معاه بلا هم
وكلنا
وكلنا ركاب سفينة نوح
وخبي مهما تخبي رايح فين وخبي مهما تخبي رايح فين
وقت الحساب تلقى الكتاب مفتوح
وطبعا مش ممكن انسى مسلسل ليلي مراد اللي كان جميل جدا طول ما كان بيمثل شخصية ليلى طفلة اول ما ليلى كبرت ومثلت شخصيتها مطربة سوريه باظ المسلسل ومبقيتش بشوفه عالسريع حتى زي باقي المسلسلات لأن المطربة السوريه مش عارفه تتكلم مصري كويس ده غير انها في كل مشهد بتغير صوتها وفي كتير من المشاهد بحس انها بتمثل فيلم كارتون مش مسلسل عن مطربة كلنا عارفينها وبنحبها الله يرحمها
واخيرا هل تعلم : ؟
ان محدش عارف الدراسه هتبدأ امتى ولا انا ولا زميلاتي ولا جروب كليتنا ع الفيس بوك ولا موقع كليتنا الموقرة وتقريبا ده سر من الأسرار الحوربيه وتقريبا كمان هيعملولنا مفاجعة سنة الليسانس ويجيبولنا الامتحانات قبل الدراسه ما انا خلاص بقيت متوقعه اي حاجه من كليتنا الحلوة
ان ايجيبت وحشتني جدا جدا وكمان الكتكوتة وحشااااااااني
وكيكي بتغيظني جدا وان أي حاجه بيعملها المدونين بتروح وانا لأ عااااااااا ليكي يوم يا كيكي وعلى فكرة انسي التلاته جنيه
ان تترات المسلسلات والحانها الفقيرة صحت جوايا حلمي القديم اني ادرس موسيقى دراسات حره ومش هأجل تحقيق الحلم ده ثانيه بعد ما اخلص الكليه المفتريه ان شاء الله
قبل ما ادخل الكليه قالولي موسيقى ايه بس ده علم لا ينفع وحرام عليكي تضيعي 4 سنين من عمرك في دراسه حاجه مش هتنفعك وبابايا ومامتي قالولي خلصي كليه وادرسي اللي انتي عايزاه دراسات حره وواضح ان بابايا مازال مش موافق مع ان وعد الحر دين عليه
واخيرا انا كتبت كل الكلام الغريب اللي فوق ده علشان صبحاتي اللي زعلانين اني مش بكتب في المدونة وقلقانين عليا وانا يا جماعه الحمد لله حية أرزق لا تقلقوا اطلاقا