الأحد، 2 نوفمبر، 2008

ما بين حاضري وأمسي (بوست 2 في 1)

اول امبارح كتبت كلمات وكنت في قمة الحزن وامبارح حسيت ان عندي صبر ورضا بكل شيء يكتبه ربنا سبحانه وتعالى
هكتب الكلمات وهحكيلكم ايه اللي حصل معايا امبارح

قلبي حزين
وأرى دموعي تنهمر علها تطفئ ما بقلبي من هموم تحرقني
أراحل انتا عني وتاركني لحياة مخيفة
أأعدت حقيبتك للسفر وقررت أن تنساني
قل لي يا حبيبي من يبقى لي بعدك
من سيخاف علي ويحميني
خائفة انا عليك من شرور الدنيا
وخائفة عليك من خيوط ضوء وهمي تنسيك شمسك المضيئة
قل لي يا حبيبي الى متى البعاد
لقد سئمت من لعب دور الفتاة المسؤلة الناضجة
لست كذالك فأنا مجرد طفلة لم تستطع ان تكبر بعد
واحتاج اليك
فليحفظك الله لنا يا أغلى حبيب في حياتي

وبعد كتابة الكلمات دي وقبل الفجر بشوية نمت ونامت معايا دموعي
وبعد ساعة ونص بالضبط ماما صحتني من النوم بمعجزة علشان
السواق اللي كان هيوصل بابتي المطار حصلتله ظروف ومش هيقدر يسافر واحنا هنسافر مع بابتي كنت عايزة اكون مع بابا اطول وقت ممكن لكن هو كان رافض تماما اننا نروح معاه المطار وقاللي كام ساعة مش هتفرق يعني ومع ذلك ربنا سبحانه وتعالى استجاب دعائي وروحنا معاه المطار هييييييييه

احنا بيننا وبين المطار 300 كيلو تقريبا- يمكن اكتر ويمكن اقل بس دي مسافة تقريبية-
واحنا في الطريق شوفنا حوادث كتير وبابا كان قلقان علينا جدا واحنا راجعين
اول حادثة عربية صغنونة وجميلة جدا اتدمرت مع انها لسه جديدة بس الحمد لله صاحبها نجى من الحادثة الرهيبة دي واكيد ده المهم
وتاني حادثة هي الاصعب سواق الميكروباص اتبهدل واخدوه على مستشفى
( يا الدفع يا الموت الدولية)
وهناك الدفع بالدولار لأنها مستشفى خاصة و دولية
وصلنا المطار وبابا خلص اجرائات سفره وماما اصرت انها تسوق الكتكوتة في القاهرة
معظم عربيات القاهرة مخبوطة وبجد لولا ستر ربنا وذكاء مامتي كان زماننا مرجعناش من القاهرة لأن السواقين بجد مفيش عندهم ادنى مسؤلية ولا حتى ذوق والعربيات اللي بتغلط اكتر حاجة هما الاتوبيسات والتريلات والمقطورات الكبيرة ودول صعب تفادي اخطائهم

الحمد لله ربنا حمانا من حوادث كتير على الطريق كان ممكن تودينا الدار الأخره فورا وكل ده من تهور السواقين اللي مفيش عندهم ابسط قواعد القيادة الأمنة وال بيقولوا قانون الغرور الجديد ال

اخدنا ريست شوية في الطريق ونزلنا صلينا وراجعين العربية تاني انا اللي هسوق بقى
الكتكوتة مرضيتش تدور ابداااا المفتاح مرضاش يدخل في الكونتاك
وفكرنا ان الكهربا فصلت مثلا
والشخص المسؤل عن المسجد كلم لنا كهربائي
وفي عربية ناس لما صلوا وطلعوا من المسجد وقفوا يساعدونا
هما زقوا العربية بتاعتهم قدام عربيتنا يعني باب عربيتهم قدام الكبوت بتاع عربيتنا وكان في شخص واقف بين العربيتين وحصلت غلطة بشعة مني
حاولت ادور العربية ودارت فعلا ونطت على الشخص اللي واقف بين باب عربيته وبين كبوت عربيتنا
يعني كان هيتعمل كوفتة و والله لغاية دلوقتي مش عارفة ربنا سبحانه وتعالى انقذه
ازاي والحقيقة هو طلع انسان كويس جدا وقاللي الحمد لله انا سليم متخافيش
و كان قلقان على عربيته لا تكون اتخدشت اكتر ما كان قلقان على نفسه
الغريب بقى ان الاشخاص اللي ساعدونا دول كانوا ملتحين وبرغم كده كانوا شيك جدا وذوق جدا
وانا كانت فكرتي وحشة جدا عن كل الناس الملتحيين كنت بحس انهم متشددين جدا في الدين
وان اخر حد ممكن يساعد الناس هما

وبعد لما مشينا على الطريق لغاية لما وصلنا البيت كنت عمالة اقول الحمد لله . الحمد لله
ربنا قدر ولطف الحمد لله

وبعد شوية ماما شغلت موسيقى البوم مسلسل نور وبجد حسيت اني ارتحت نفسويا وقدرت اكمل الطريق لما سمعت الموسيقى الرومانسية الحالمة دي بجد موسيقى جميلة جدا كل يوم لازم اسمعها مع اني مشوفتش الا حلقة واحدة من المسلسل ومش شايفة مهند ده وسيم يعني بس بيقولو انه كان رومانسي جدا مع نور
ويا سلام على منظر الشمس الجميلة لما بتميل على النيل وكأن امواجه اتحولت لدهب سبحان الله ده جمال الدنيا اومال جمال الجنة ايه بقى

وفي الأخر نطلع من البوست الكابير ده بشوية حاجات منها :

1- لازم نبقى قويين لما حد بنحبه يسافر ومنعيطش طول الليل علشان منصدعش ومنصحاش من النوم من النوم عنتيننا منفوخة

2- الحوادث مسؤليتنا كلنا السواقين علشان سرعاتهم الجنونية مع ان الطرق مش مساعدة والمشاة على الطريق ووقوفهم في نص الطريق ببرود شديد ولا مبالاة بالعربيات المندفعة واللي مش هتقدر تقف في الوقت المناسب

3- ربنا معانا في كل وقت وخلقنا وبيحمينا وبيحبنا مش زي الرأي الغريب للكاتب توماس هارديز اللي بيقول ان ربنا خلقنا علشان ينتقم مننا ويعذبنا !!

4- الصبر في الشدائد مش اول لما نتعرض لمحنة نتضايق ونتذمر ونقول ليه كده يا رب

5- القرأن الكريم وذكر الله سبحانه وتعالى والاستغفار بيهدي النفس وبيخرج من الشدائد

6- المفروض منتخدعش بالمظاهر ومنحكمش على الناس الا لما نتعامل معاهم

7- الموسيقى الجميلة مش المبتذلة والطبيعة الرائعة من احلى الحاجات في الدنيا

هناك 16 تعليقًا:

blue-wave يقول...

يا سلاااااااااااااام
بجد كويس اوى الحاجات اللى طلعتى بيها دى كلها
والحمد لله ربنا ستر على الراجل كنتى هاتفرميه يا مفتريه:))

Lady E يقول...

blue-wave : كده يا دكتر انا مفترية؟
الله يسامحك ده بدل ما تقوللي الحمد على السلامة

انا اتعلمت حاجات اكتر من كده بس مكتبتهاش كلها علشان البوست كبير شوية
مش بيقولو برضه السفر فيه 7 فوائد
نورت يا دكتر
دمت في حفظ الرحمان

romansy يقول...

اهم حاجه فى الاخر انك استفدتى من حاجات جميله قدرتى تنفعينينا بيها
عندك حق لازم الصبر على كل شئ والاستغفار دول فعلا اهم حاجه
ربنا يحميكى يارب

هانى زينهم يقول...

ومان وانا باحضر الدبلومة قريت ان من سمات الشخصيات الرومانسية الانفعال الشديد وتضخيم الاحساس بالحزن والفرح وفى الحقيقة ما كنتش مقتنع اوى الا لما قريت البوست اللى فات بتاعك والبوست ده .
عموما ربنا يخليلك بابا وماما وما يحرمكيش ابدا من حد بتحبيه ويهون سفره عليكم ويرجعه بالسلامة . وثانيا ما تاخديش كل حاجة على اعصابك كدة ومادام بتسوقى يبقى لازم تكونى اهدى شوية عشان ما تعمليش لنفسك مشاكل اما الكام نصيحة اللى فى الاخر فربنا يجازيكى عنهم خير .

mohamed ghalia يقول...

أختى العزيزة
ربنا يرجعلك بابا بالسلامة
جميل قوى انك تتعلمى وتقفى مع كل موقف تتعرضيله
ربنا يحفظك دايما
تقبلى تحياتى
دمتى بود
ليكى تاج عندى
فى إنتظار إجاباتك عليه

Lady E يقول...

romansy:أتمنى فعلا اني اكون قدرت أفيد أي حد قرأ البوست و افيد نفسي
لأن في حاجات كمان بنصح نفسي بيها زي موضوع الصبر لأن انا الحمد لله بصبر شوية
لكن لو فضلت في موقف صعب مدة كبيرة بفقد الصبر ده للأسف
جزاك الله خيرا على الدعاء الجميل ده بجد انا بحب الدعوة دي جدا
ربنا يحمي المسلمين جميعا يا رب
شكرا لمتابعتك الجميلة للمدونة وتعليقاتك الرائعة دائما
دمت في حفظ الرحمان

Lady E يقول...

هاني زينهم : ياااه يا مستر شخصيات رومانسية
ودي ليها علاج ولا دي حالة ميؤوس منها ولا ايه :)
قرأت البوستين ولقيت فعلا ممكن يتحس اني بضخم في الاحاسيس
بس انا بجد بكتب اللي بحس بيه من غير اي تضخيم
وربنا يستجيب دعائك يا مستر لأن بجد مفتقدة بابا جدا
وبالنسبة لأعصابي بحاول احطها في التلاجة بس للأسف في مواقف كتير ببقى عصبية جدا فيها بس بتبقى مواقف تستحق العصبية فعلا
يعني مثلا لما تكون ماشي بسرعة100 كم/ ساعة على الطريق السريع وتلاقي
حد بيعدي الطريق وفجأه يقف في طريقك بكل برود ومهما نبهته مش بيتحرك من مكانه واقف وكأنه بيقولك لو كنت شاطر دوسني
ماذا تفعل لو كنت مكاني؟؟
مكنتش اعرف ان البوستات بتاعتي بتتحلل نفسويا
بعد كده مش هعرف اكتب تاني عاااااا
دمت في حفظ الرحمان وجزاك الله خير

كيكى يقول...

حبيبة قلبى
دة مش بوست 2*1
لا
دة بوست35431 *1
بجد
ايييييييية بجد الجاحات الحلوة دى كلها
فعلا السفر لى 7
فوائد ونونتى حبيبتى
بتعرف ازاى تستفيد كويس اوى
حمد الله على السلامة يا قمر
وان شاء الله بابا يرجع بالسلامة
تسلمى يا غالية
واسفة على التاخير سورى مكنتش هنا
امواااااااااااة
عووووووووووووووووووووووو

funckydoctor يقول...

حمد الله على السلامة
والراجل المسكينة كان هيروح فيها
بس بعد اللى انتى استنتجتيه مافيش كلام ينقال :)

☼♫♪ عمــاد الدين يــوسف ☼♫♪ يقول...

ربنا يصبر كل من فارق احبته ، واسال الله العلي العظيم ان يحفظ والدك الكريم ويرده بسلامه وعافيه

تحياتي

norahaty يقول...

السلام عليكم
ورحمة الله تعالى وبركاته
ربنا يرد كل مسافر وغائب
سالم غانم إن شاء الله تعال
واهم حاجة عايزة اقولها
قبل ما أمشى اوعى تنامى
وانت معيطة ......فاهمة !!
حذار ثم حذار ثم اتنين حذارى
مش كويس النوم وانتى معيطة
المرة دى ربنا ستر ويارب دايمآ
تحياتى ليكى ولكلامك الى من القلب

Lady E يقول...

mohamed ghalia: ربنا يكرمك ويستجيب دعائك

وانا متشكرة جدا على التاج بس اعتذر عن اجابته في الوقت الحالي ياريت تسمحلي اني أأجل اجابته شوية

Lady E يقول...

كيكى : هههه ماشي يا كيكي كده بقى انا بعرف استفيد كويس اوي؟؟ بدليل اني عملت حادثة النهارده
امشي يا بت انتي من هنا صبحتي كل الفترة دي ولسه معرفتينيش

وانا عارفة انك مكنتيش موجودة يا قمرايا والله كنت مفتقداكي جدا عالمدونة

تسلميلي يا حبيبتي
دمتي في حفظ الرحمان

Lady E يقول...

funckydoctor : الله يسلمك من كل شر

الحمد لله ربنا انقذه بأعجوبة

شكرا يا دكتر

دمت في حفظ الرحمان

Lady E يقول...

☼♫♪ عمــاد الدين يــوسف ☼♫♪ : اللهم أمين ربنا يكرمك يارب

دمت في حفظ الرحمان

Lady E يقول...

norahaty : وعليكم السلام ورحمة الله وبركاته

اللهم أمين ربنا يستجيب دعواتك الجميلة يا دكتورة نور والله وحشني كلامك

و4 حذاري انا عارفة اخطار النوم والانسان متضايق وبيعيط بس مش انا اللي بختار اني اعيط او احزن يعني
ربنا يبعد عننا الأحزان جميعا يارب
نورتيني يا دكتورة وبجد اسعدتني زيارتك مرة تانيه