الثلاثاء، 28 سبتمبر 2010

مش كل بني أدم انسان 1


" وانا ويايا بعيش زي المليونيرات وأحلم وانا معييش ملعنش الأزمات " ده كوبليه من أغنية لمدحت صالح وشريف منير كانت بتيجي زمااااان أيام طفولتي والأغنية دي بشكل أو بأخر غرست فينا كجيل ان الفلوس فائدتها الأساسية علشان تجيب اللي صاحبها محتاجه علشان تعيشه في مستوى كويس وعلشان هو اللي يتحكم فيها مش هي اللي تتحكم فيه .

على مدار دراستي كانت مُدرسات الإنجليش مثل يحتذى بيه في كل حاجة في اللبس ومعاملة الطلاب وخفة الدم والثقافة

دائما مدرسات الإنجليش كانوا شيك وحلوين – حتى لو محطوش مكياج- ومرحين حتى انا فاكرة في سنة من سنين ثانوي كنا مسميين مدرسة الإنجليش " باربي " ده طبعا غير البيرفيوم بتاعهم اللي كان بيهفهف ع المدرسة كلها ولا لما تدخل على أوضة مدرسين الإنجليش يا سلام تلاقي بقى صور للطبيعة وصور أطفال متعلقه في الأوضة وكتب تشارلز دكنز وشكسبير وارنست همنجواي وغيرهم موجودة في مكتبة صغيرة في الأوضة

ده غير معطر الجو برائحة الورد أو التوت والفراولة اللي بيستقبلك أول لما تفتح باب اوضة المدرسات ويا سلام لو رحت أوضة مدرسات الإنجليش ساعة الفسحة وتشوف مدرسات الإنجليش كل واحدة جايبة كرواسونايه ومعاها مج نيسكافيه أو حتة بيتزا وعصير فريش حاجة كده تحسسك انك في فرنسا من فرط الرقة والجمال ويمكن ده من الأسباب اللي خلتني أدرس انجليش ان كان نفسي ابقى من الناس الجميلة اوي دي

درسلي انجليش مدرسات من جنسيات كتيييييييير هنديات على عمانيات على عراقيات على اردنيات على مصريين ومكانتش الصورة الرقيقة دي بتختلف برغم اختلاف جنسياتهم نفس الشياكة يمكن مدرسة وحيدة من مدرسات الإنجليش كلهم اللي كانت مستقوية ومفترية علشان كنت رافضة اخد مجموعة أو درس عندها لأني مكنتش محتاجة دروس اصلا بس هي فضلت ورايا لغاية لما اخدت درس معاها مع باقي الفصل – مرغم اخاك لبطل – بس ده ميمنعش انها كانت شيك شيك يعني الشعر اللي متظبط عند الكوافير واللبس المنسق والشيك والاكسسوار اللي لايق على اللبس حتى في الجامعة الدكاترة والدكتورات كانوا شيك جدا من ناحية اللبس

نقدر نقول عليه زمن الفن الجميل لأن اللبس والظهور بمظهر جميل فن - دي كانت الصورة أيام دراستي اما الصورة دلوقتي -

يتبــــــــــــــع علشان انتوا بتضايقوا من الرغي الكتير :)

الجمعة، 24 سبتمبر 2010

الحل السحري

بعد البوست اللي فات اتأكدت من كلام الشاعر أحمد شوقي الله يرحمه ان المصائب يجمعن المصابينا وكلنا مرينا بالكلاكيع والمنفسنين في حياتنا المهم نبقى أقوى ومنسمحلهمش يأثروا على احلامنا وطموحنا ناخد استراحة بقى من الحاجات اللي تضايق
---------------------------------------------

علشان نعرف حياتنا كويس لازم نقرب أوي من نفسنا وعلشان نقرب من نفسنا لازم ندخل جواها ونعرف أكتر عنها
عندي الحل السحري لمعرفة النفس والقدرات نجيب ورقة فاضية أو صفحة وورد فاضية :) ونعمل قوائم
ونبدأ بقائمة للحاجات اللي انجزناها في حياتنا
– اهم انجازاتنا-
قائمة طويلة لأحلامنا وطموحاتنا – مش أقل من 101 هدف روحاني ومادي وجسدي وعلمي -
قائمة بأحسن صفاتنا وأكتر حاجة بنحبها فينا
قائمة للناس اللي بنحبهم ومنقدرش نستغنى عنهم وأدوارهم رئيسية في حياتنا
– لازم نسأل عنهم لو كانوا بعيد عننا -
قائمة بالأشخاص والأحداث اللي احنا ممتنين لهم
قائمة بأكتر حاجات بتعملها وبترفع من روحك المعنوية وبتسعدك
– في حدود المقبول محدش يشرب سجاير ويكتب ان دي اللي بتفرحه ! -
وأخيرا قائمة بالكلمات الانجليش او أي لغة تانيه بنعرفها
أنا عملت كل القوائم دي مش كلهم مرة واحدة ونتائجهم سحرية وبتحفز بجد
-------------------------------------
" احنا بندن أيوة ف مالطا جايز مرة نصلح غلطة لما هننطق كلمة حق" امبارح كنت في مدونة only hope وسمعت أغنية عجبتني أوي وربنا ما يوريكوا لما بتعجبني أغنية بفضل اسمعها كتييييييييييير كتقليد انها عاجباني وفرحانه بيها الأغنية اسمها كلمة حق لفريق بساطة وحبيت اشاركها معاكو وده لينك الأغنية :
http://www.mawaly.com/music/Basata+Band/track/44949

الأحد، 19 سبتمبر 2010

وتستمر المعاناة



المشهد الأول : بشوف في التلفزيون حفلة الويلكم بارتي بتاعت الجامعة الأمريكية اللي بتتعمل كل أول سنة للطلاب الجدد بيعرفوهم بالجامعة وبالطلاب اللي بيدرسوا في الكلية

المشهد في كليتنا : مجرد طلاب تايهين مش عارفين يروحو فين ولا يعملوا ايه و بعد شهر من الدراسة والحياة لسه ضبابية ومفيش جدول نزل بالمواد والكتب منزلتش

مشهد الساعات المعتمدة : الكليات اللي بتعتمد على نظام الدراسة بالساعات المعتمدة انت اللي بتختار المواد يعني ممكن تاخد مواد من سنة تانيه واولى مع بعض وتختار المواد اللي تدرسها والدكتر اللي بيشرحها ليك ولازم تعرف الدكتور ده مؤهلاته ايه وبيتعامل ازاي مع الطلاب - ده لو في جامعة أجنبية-

المشهد في كليتنا : في سنة اولى مستنيين طول النهار الدكتر انه يتكرم ويتعطف ويحن علينا علشان يشرح لنا المحاضرة ومن حقه يضيع لنا وقتنا عادي جدا وأهلنا موافقين ان وقتنا يضيع وبيقولوا ما كل الكليات كده - معلش اصبروا اصلكو تاني دفعة في الكلية-

المشهد التاني الدكتور بيقول للطلاب : مطلوب منكم تعملوا أبحاث وتطلعوا وتقرأوا وتتفاعلوا دي حياتكم وده مستقبلكم ولازم تبقو متميزين

المشهد في كليتنا : احفظو المكتوب ده زي اسمكم انا عايز بصمجيه مبتفهمش قدامي !

المشهد التالت : طبعا ممكن تستفسري عن أي حاجة ايه اللي مفهمتيهوش بالضبط؟

المشهد في كليتنا : مش مطلوب مننا اننا نشرحلكو حاجة ! كويس أوي ان احنا بندي الخطوط الأساسية في المحاضرات

المشهد الرابع : انتو هتاخدوا الشهادة وتشتغلوا وتبقوا أشخاص فعالين في المجتمع

المشهد في كليتنا : انتو هتاخدو الشهادة وتقعدوا في البيت أو حد لاقي شغل اليومين دول

المشهد الخامس : كلكم متميزين ومبدعين وجاوبتم كويس في الامتحان

المشهد في كليتنا : كلكو تستاهلوا السقوط ............... قابلوني لو فلحتو

طيب عايزين طالب اتعرض لكل السلبيات دي وقابل ناس بيروقراطيين و .... ومنفسنين وكلهم امراض نفسية وقابل 2 او 3 بس كويسين يعمل ايه
طالب اتخرج لقى نفسه ماشي في الضباب مش فاهم أي حاجة في اي حاجة ولا عارف ايه علاقة دراسته بسوق العمل طب بلاش دي لو عايز يقدم ماجيستير في جامعات تانيه يعمل ايه او عايز يعمل اي حاجة يعمل ايه

انا عايزة افهم بجد احنا اتعلمنا ؟ هو التعليم ده اسمه تعليم ؟ انا مش زعلانة على الكلية ولا كان نفسي اكمل دراسة فيها لأني كنت هاخد الماجيستير وبرضه امشي في الضباب والله مكنتش هتفرق وكنت هضيع كمان كذا سنة في حياتي من غير اي فايدة
انا اخترت الأختيار الصح حتى لو كان الأصعب وحتى لو كل الناس فضلوا يلوموني انا مش فاهمه ليه الناس بقو محبطين اوي كده ليه كل السلبيه دي ليه لما تلاقي نفسك فرحان ومتفائل يقولولك الدنيا سودا والحياة منيله مش كفاية اتعلمنا او اتعلمت تعليم جامعي مينفعش ببصلة كمان زعلانين اني ضيعت الفرصة علشان اكمل في الدايرة المفرغة

انا اسفة هطلع من الدايرة المفرغة ولو رجعتلها مش هرجع طالبة

الجمعة، 17 سبتمبر 2010

فضفضة لابد منها



الحقيقة معرفناش نقول ايه اصل انتي كلامك كله شخصي :) ومش بنعرف نرد ونقول ايه
يا اعزائي لا تقلقوا اطلاقا مش مطلوب منكم انكم تقولوا اي حاجة بس المطلوب منكم بجد بعد ال10 دقائق او اقل او اكتر اللي هتاخدوا فيها من وقتكم وتقرأوا كلامي تطلعوا بحاجة من كلامي سواء الحاجة دي قيمة او فكرة او حتى احساس ولو ده محصلش يبقى لازم فورا متقرأوش أي حاجة مش مفيدة لأن الوقت أغلى من الذهب ولو راح منقدرش نرجعه تاني.
وبالنسبة لطريقة كتابتي فمش أنا اللي مخترعاها في مدارس في الأدب اسمهم المدرسة الرومانسية ومدرسة شعراء المهجر ومدرسة أبوللو وغيرهم كتاباتهم ذاتية وكل اللي بيكتبوا بتبقى كتاباتهم فيها بعض الذاتية بس الفرق انهم مبيتكلموش عن نفسهم بشكل مباشر.

النهاردة جربت امشي من غير كعب ومع ان الكعب اللي بلبسه مش مؤذي ويعتبر زي الشوز العادي بس عالي شوية الا ان وأنا لابسة الشوز العادي كنت حاسة ان عندي فلات فوت زي بالضبط لما الغني بيبقى في مستوى عالي وبعدين بينزل فبيبقى مش قادر يتأقلم أما الفقير فمعندوش اللي يخسره وفي العصر المبارك اللي احنا فيه كلنا فقراء الى الله .

الحساسية زادت عليا النهاردة في الهايبر معقول كل الكمية دي من البشر حاطين برفيوم قوي وفي وسط الخليط المعقد ده من الروائح بيعلن مناخيري احتجاجه التام وبيقفل بيعاقبني - الدكتور قاللي ابعد عن الملوثات - هو البرفيوم والتكييف ملوثاااااااااااات !


الهايبر النهاردة كان زحمة اوي علشان خلاص بعد بكرة المدارس ومليان أطفال بيختاروا شنطهم وزمزمياتهم وأقلامهم وكشكولاتهم ولحد السنة اللي فاتت انا كنت زيهم - سبحان مغير الأحوال- وسمعت طفل بيجادل مامته في الشنطة اللي هتشتريها ليه وبيقولها هو انتي اللي هتروحي بيها المدرسة ولا أنا فكرني بالذي مضى واختياري لشنطة المدرسة بالذات أي نعم أنا مكنتش اجرؤ ارد على مامتي كده بس كنا غالبا بنوصل لحل يرضي جميع الأطراف واحساس غريب تملكني النهاردة في وسط الأدوات المدرسية معرفش ده اسميه احساس تعود ولا فراق ولا حنين ولا ايه انا بجد مش عارفه
اندمجت في وسط الكتب اللي في الهايبر وكان في كتابين ناوية اجيبهم من اخر مرة رحت فيها الهايبر وفي هوجة الكتب الجديدة ملقيتش الكتابين وحسيت بزعل على الكتابين وبعدين سبت ركن الكتب ورجعتله تاني على امل اني الاقي الكتابين اللي بدور عليهم وفعلا لقيت واحد
برتكولات صهيون والتلمود وفرحت اوي اني لقيت الكتاب من كام سنة كنت في مسابقة في اللغة العربية وبعدين موجهين اللغة العربية اتكلموا عن التلمود كان عمري وقتها بالكتير 14 سنة واول ما رحت معرض الكتاب اللي كان في راس البر لقيت الكتاب وجبته بس محدش وافق اني اشتريه لأني كنت صغيره والمعلومات اكبر مني !!!!!!!!! اما دلوقتي فأكيد أقدر اقرأ أي حاجة
الكتاب التاني بابا فاجئني بيه انه موجود قاموس اكسفورد انجليزي انجليزي عربي فرحت بيه اكتر ما فرحت بأي كتاب وبالرغم ان القواميس الالكترونية استخدامها اسهل من القواميس العادية لكن انا بحب قاموس اكسفورد

زميلاتي في الكلية هيتقابلوا الأحد الجاي علشان يستلموا مستخرج من الشهادة وأنا طبعا مش هكون معاهم والنهاردة اتكلمنا كونفرانس
وقالولي هتنزلي مصر امتى ! السؤال ده بيجنني فردت زميلة من زميلاتي يا بنتي دي بتحب الغربة ! قولتلها الغربة غربة النفس مش المكان وبعدين مشكلة اللي بيسافروا انهم اغراب جوه وبره بلدهم فالغربة مش حاجة جديدة عليا
طيب هما عرفوا منين اني بحب الغربة ! عاشوا معايا ولا شافوا حياتي ولا هو اي حد سافر بره البلد يبقى بيمشي على دهب والدنيا بتمطر عليه ألماس ومرتاح وكأنه في الجنة طالما بره بلده :(


الثلاثاء، 14 سبتمبر 2010

عن غذاء الروح أتحدث



بعدما كنت نسيت موضوع التاجات اللي مش بحبها جالي تاج عجبني عن الكتب وأسئلة التاج شغلت ذاكرتي ولأني موجوعة أوي ومعدتي بتوجعني من مواضيع كتير منها وضع الكتاب والكُتاب –بضم الكاف- و احوال دور النشر اللي بتاخد 90% وبتدي الكاتب 10% من كتابه يعني الرقاصين بياخدوا اكتر من الأدباء والعلماء – عصر موازينه مقلوبة- ولأن في ناس معينة نفسهم نفضل جهلة وجهال ومغيبين طول عمرنا ولأن ابراهيم المعلم صاحب دار الشروق للنشر قال في حواره في البيت بيتك : ان في واحد بيقول شراء الكُتاب أرخص من شراء الكتب ودي حاجة مخلية الدنيا سودا في عيني علشان واحد حمار معاه شوية فلوس يبقى فاكر انه ممكن يشتري عقول وقلوب ناس مبدعة بقى البني أدمين أرخص من كتبهم !!!!!

أكيد مترددتش اني أجاوب على أسئلة التاج ودي حاجة بسيطة مننا كمدونين تجاه الثقافة والمثقفين المهضوم حقها وحقهم :(

ما هي كتب الطفولة التي بقيت عالقة في ذهنك ؟

في طفولتي لغاية اعدادي كنت مهووسة بمجلة ماجد كنت أغلب أيام الأربعاء لازم أجيبها وكمان ميكي وفلاش وسمير وكنت بقرأ قصص قصيرة متفرقة فاكرة منها قصة المرأه التي غلبت الشيطان مش فاكرة مين الكاتب بس القصة دي علقت معايا فترة وعرفت انها اتعملت فيلم وانا في رابعة ابتدائي قرأت أرض النفاق ليوسف السباعي وفي خامسة ابتدائي قرأت جدر البطاطا هو السبب :) الحرام ليوسف ادريس لفت نظري اسم الكتاب وعرفت برضه ان الروايتين اللي قرأتهم اتحولوا لفيلمين

من أهم الكتاب الذين قرأت لهم؟

أي حد في الدنيا بيخصص وقت للكتابة وبيستمتع بالكتابة وهو بيكتب والشعور ده بيتنقلي من خلال الكلمات وبيخليني أحس بالكلمات وأشوفها وأنا بقرأها يبقى أهم كاتب سواء كان كاتب مشهور أو مش مشهور

صحفي أو مدون أو حتى طالب كاتب موضوع تعبير على ورقة كراسة

دي مش دبلوماسية لكن دراستي للأدب خلتني أحترم أي حد عنده ملكة الكتابة

من هم الكُتاب الذين قررت أن لا تقرأ لهم مجددا؟

هي غالبا كتب مش كُتاب أي كتاب ممل مش بكمله لكن ممكن اقرأ لنفس الكاتب كتاب تاني ويعجبني فمش بحكم على الكاتب من حاجة واحدة بس قرأتها ليه وكمان اللي ممكن يخليني مقرأش لكاتب تاني انه يكون مزيف بيدعو للمدينة الفاضلة وهو أخر واحد ممكن يتكلم عنها مفيش انسان كامل بس الكذب حاجة مقدرش احتملها دي الحالة الوحيدة اللي ممكن تخليني مقرأش لحد بيكتب بالطريقة دي تاني مجددا .

في صحراء قاحلة ، أي الكتب تحمل معك؟

ده على أساس اني في صحراء قاحلة هبقى في حالة تسمحلي بالقراءة وسط كل أهوال الصحراء

أكيد الكتاب اللي أحب يكون معايا في الوقت العصيب ده كلام ربنا سبحانه وتعالى القرأن الكريم

علشان لو نجيت أبقى عملت حسنات كتير ولو موتت يبقى ختامها مسك

ما هو الكاتب الذي لم تقرأ له أبدا ، وتتمنى قراءة كتبه ؟

أي كاتب مقرأتلوش أكيد أتمنى قراءة كتبه

ما هي قائمة كتبك المفضلة؟

هو أنا مش عارفة يعني ايه كتابي المفضل يعني كتاب حبيته أوي ولا كتاب ممكن اقرأه تاني

هعتبرها كتب حبيتها

حبيت أوي كتاب دكتورة هالة سرحان مذكرات طالبة بعثة أمريكا خبط لزق وطول ما أنا بقرأ مش مصدقة ان كاتبة الكتاب هي المذيعة اللي قالوا عليها بتسوأ سمعة مصر !!!! حاجة غريبة بجد

فتيات الليل الحقيقيين الشعب كله عارفهم والموضوع مش محتاج فبركة والحدق يفهم .

عجبني أوي كمان كتاب جر ناعم لعمر طاهر لأنه كتاب كوكتيل مش بيتكلم عن حاجة واحدة بس وأثر فيا أوي

كمان رواية ربع جرام لأني قضيت فيها وقت كبير وكانت معايا شهر كامل بقرأ فيها وواخداها معايا في كل حتة

الكتاب رائع جدا من وجهة نظري

كتاب وظيفة ما تمت لمايكل محسن لأني لسه متخرجة جديد وفهمني شوية الحياه ماشية ازاي بالنسبة لما بعد الدراسة والبحث عن وظيفة

كتاب الرجال والمال والشوكولاته لمينا فان براج كتاب أكثر من رائع من الكتب اللي أحب أحتفظ بيها في مكتبتي واقرأها كذا مرة

طبعا القائمة قابلة للزيادة

ما هي الكتب التي تقرأها الأن؟

مشكلتي حاليا أني بقرأ في كذا كتاب في وقت واحد مش مركزه في حاجة واحدة يعني من كل فيلم أغنية

وساعات كوكتيل الكتب ده بيزهقني ومقرأش ولا أي حاجة

اللي بعت الدعوة ؟

المدون محمد ناصر الدين الهلالي علشان ياخد درجات أعمال السنة :) يارب تاخد الدرجات النهائية أمين

أصل أنا عندي كلكيعة كبيرة من ناحية الدرجات والتقدير لأني ياما اتظلمت فيهم


شكرا ليك

أرسل الدعوة لمدون واحد على الأقل من أجل مشاركتنا في القراءة؟

ذكرياتي حبيبتي

خالتو ستيتة

فراشة


Silver eyes

Sony2000


ليساندرا

واحد وخلاص

Admin

Rack yourminds

RHS

FAW


الخميس، 9 سبتمبر 2010

قائمة الأمنيات في ليالي الأعياد


في الصباح أفتح عينياي فيملأني الأمل- صباح الفل- أنوي أن أجمع الأمنيات التي أتمناها وأحلم بها ويبهجني تحقيقها وأتمناها في ليلة العيد لعل هذا يكون – فال حلو- أن تتحقق أمنياتي وتبهجني مثلما تأتي الأعياد لتبهجنا – المفروض يعني انها بتبهجنا- أفكر وقبل أن تأتي أمنياتي أتذكر أننا أمة فقدت القدرة على الحلم والتمني منذ زمن ولو أعطي لنا المصباح السحري فلن يعرف الكثير منا ماذا سيفعل بالأمنيات السبعة

بدأت الكتابة في ذهني وكانت الأمنيات كثيرة ثم توقفت فليس بالتمني وحده تتحقق الأمنيات – مفيش بابا نويل هيحققها لي – يجب أن أسعى لتحقيق الأمنيات بنفسي ولكن هناك أمنية واحدة فقط لا أستطيع أن أسعى لها وحدي يجب أن تكون مع من أحبهم يجب أن أتشاركها مع من حولي

اتمنى أن أفرح وأبتهج وأسعد من كل قلبي وأن يزورني موكب الفرح

أن يكون الفرح في حياتي أساسي والحزن كومبارس– ده حتى العيد فرحة- أريد الفرحة الحقيقة بقوة وأبحث عنها في كل مكان وهسأل عنها موج البحر وفيروز الشطآن :)

فاقد الشيء بيدور عليه وبالتالي معندوش منه علشان يعطيه وأنا أرغب بشدة أن أسعد وأٌسعد

أتمنى أيضا في المستقبل القريب أن أكتشف القاهرة والإسكندرية بكل ما فيهما من سحر وروعة - طبعا مش بيكونوا كده دائما-

من الفظيع أن يرتبط معنى العيد عند المصريين بتنفيض البيت والإرهاق الشديد الذي يسببه هذا التنفيض فلا نستمتع بالعيد وهنا في صلالة يرتبط العيد بالبخور والعطور والحلويات التي يمتلأ بها الهايبر وبتجديد المنزل وتغيير شكله وبرغم كل ده مش لاقية ولا وردة طبيعية يتيمة في صلالة كلها لأني بحب الورد جدا خصوصا في الأعياد بس للأسف هنا مش لاقياه .

أشعر بأن فيروز تغني في قلبي ليلة عيد ليلة عيد الليلة ليلة عيد .... صوت ولاد تياب جداد وبكرة الحب جديد وتملأني أم كلثوم بهجة ب يا ليلة العيد أنستينا وجددتي الأمل فينا يا ليلة العيد

أحب الأغنيتين كثيرا خاصة عندما تقول فيروز وبكرة الحب جديد وعندما تقول أم كلثوم هلالك هل لعنينا فرحنالو وغنينا

أنا أستحق الفرحة وفي العيد سأنسى كل ما لا أستطيع تحقيقه الأن وسأنسى الهم العام والخاص

سأنسى اجتماع صديقاتي للخروج يوم العيد – وأنا مش معاهم- وسأنسى الرغي مع صديقتي المفضلة بالنص ساعة لغاية لما تزهق من كتر الرغي وسأنسى الحزن الجاثم على قلبي في يوم العيد وأطرده شر طرده كلما جاء بدون استئذان

سأفرح لأن الله جعل لنا مواسم للفرحة فــــــــلــــنـــــــفــــــــــــرح

-------------------------------------

ع الهامش : الصورة اللي فوق دي فيها أول تجاربي مع الفوتوشوب

السبت، 4 سبتمبر 2010

امسك حرامي


التلفزيون حرامي والنت كمان حرامي وحرامي ومليون حرامي في بعض ولأن لسه أقل من أسبوع على العيد ان شاء الله كل سنة واحنا جميعا بخير وبعد العيد مبيتفتلش كحك فهتكلم شوية عن المسلسلات اللي تابعتها طشاش

من قبل رمضان وأنا كنت متأكده اني هتابع عايزة أتجوز علشانه كتابة المدونة والكاتبة غادة عبد العال وكنت بتابعه في الأول لدرجة اني كنت مش بخرج من البيت الا لما أشوف الحلقة وفضل الوضع ده على ما هو عليه كام حلقة وبقول يمكن تمثيل هند الover يتغير لكن التمثيل هو هو وكمية الهطل هي هي وهند بتصرخ أكتر منها بتتكلم وبما اني قرئت الكتاب والمدونة فالمسلسل مش حلو زيهم
وبقيت بشوف المسلسل بظروفها ومبزعلش لو فاتت أي حلقة

اللي لاحظته ان في مسلسلات كتير بتتكلم عن الزواج وتأخر سن الزواج زي المسلسل اللي لمحت اسمه نعم أنا مازلت أنسه ومسلسل زهرة وأزواجها الخمسة ده غير كمان عايزة أتجوز مش شايفة ان موضوع تأخر سن الزواج أو الزواج محتاج مسلسلات كتير ورغي كتير

مسلسل شيخ العرب همام عجبني برغم اني كنت متوقعة انه ميعجبنيش مشوفتوش كله زيه زي باقي المسلسلات بس أكيد هشوفه في الإعادة

نيجي لحكايات وبنعيشها بطولة ليلى علوي من السنة اللي فاتت وأنا معجبة جدا بكلمات التتر لأيمن بهجت قمر ده غير كمان أن المسلسل بالنسبة لي فضل عالقمة من السنة اللي فاتت
الجزء الأول متابعتوش كله لكن الجزء التاني شدني جدا ومتابعاه وفي فرق انك تشوف مسلسل وتضييع وقتك وفي فرق انك تطلع من كل مشهد بقيمة ، عينك تشوف حاجة راقية زي تمثيل ليلى علوي المتميز جدا والأكثر من رائع كمان وباقي الممثلين كمان مثلوا كويس بس معظم أسمائهم رايحة من بالي


كليوباترا معجبتنيش خاااااااااااااااالص هما بدأوا اعلانات مسلسل كليوباترا قبل رمضان بكتير وفي الفترة دي كنت بدرس 3 مسرحيات في الادب المقارن عن كليوباترا وكان نفسي أوي يجي المسلسل وقتها لكن لما شوفت شوية حلقات من المسلسل لقيت كليوباترا مبتعملش حاجة غير انها بتتزين وبتتعطر طول النهار وبتحب أي حد تشوفه ومنفضة للحكم وهي المفروض حاكمة أكبر بلد في الوقت ده ده غير طبعا اللبس اللي مش فرعوني والميك أب اللي أخر موضة وشخصية كاري اللي مش موجودة أصلا في التاريخ

أما أهل كايرو فكان مفاجأة بالنسبة لي في الأول مكنتش مهتمة اني أشوفه خصوصا ان المسلسل اسمه أهل كايرو ف اضايقت انه مسموش أهل القاهرة ليه كايرو يعني ايه الفزلكة دي بعد كده فهمت أن أهم الاحداث في المسلسل تمت في فندق اسمه كايرو بلازا - على ما أعتقد-
فكده يبقى طبيعي ان المسلسل يبقى اسمه اهل كايرو وبعدين في مرة من المرات لمحت اسم بلال فضل في تتر المسلسل ولأن انا متحيزة شوية للكُتاب اللي بقرأ لهم فقولت أتابع المسلسل وفعلا شدني وكل الممثلين فيه مثلوا كويس جدا بس أوقات بحس بملل وتطويل زيادة عن اللزوم في الأحداث لكن المسلسل في المجمل جميل ومشوق وطبعا كلمات التتر لأيمن بهجت قمر مع ألحان وليد سعد مع غناء حسين الجسمي فالتتر طالع خرافي بجد جميل جدااااااا ويا سلام لما الجسمي بيقول لبط ابنها مين يسايرو :) نطقنا الجسمي المصرية الأصلية

وأخيرا برنامج مصري أصلي للكاتب الساخر والصحفي عمر طاهر بداية من أغنية التتر اللي كمان من كلمات عمر طاهر أغنية جميلة جدا ولما تسمعها ترجعلك شعور مفتقده شعور الفخر بإنك مصري وشعور الإنتماء ونهاية بالبرنامج اللي بيقدم معلومات جديدة عن حاجات كتير مصرية ، في حلقات عجبتني من البرنامج وفي برضه حلقات معجبتنيش بس البرنامج عموما مميز

ربع مشكل والكبير وأزمة سكر مش هقدر أكون عنهم رأي لأني بشوفهم تخاطيف أقل من طشاش كمان :)