الأحد، 29 يونيو 2008

كان هيحصل إيه؟؟!

متخيلة لو بهبهات (ابهات)الجيل الغلبان بتاعنا مقابلوش مامات الجيل الغلبان بتاعنا برضه كان ايه اللي حصل؟؟؟!!

كان اللي هيحصل كالأتي : ( لأ مش أغنية حماده هلال)
أووولا : مكانوش هيتجوزوا وبالتالي مكانوش هيخلفوا حضاراتنا الجيل الغلبان ( دماغ والله ايه التفكير العاقل و المتعقل ده )
ثانيااااااا : مكنش جيلنا هيبقى موجود وبالتالت ( ما انا قولت بالتالي قبل كده ) مكنش هيبقى غلبان وكحيان وصدمان وعدمان وبتنجان ,مكنش هيبقى فيه زيادة سكانية ولا زحمه ولا دوشة بدليل شوفو الافلام بتاعت التلاتينات لغاية السبعينات كانت هدووووء ومفيش زحمه والحياة ميت فل وتمناشر (شوفتو جيلنا الغلبان عمل ايه في الدنيا لما جالها تبعا مش أي حد)
رابعا :
مكناش احنا الشباب هنحس بالشيخوخة واحنا في أحلى مراحل الحياة الفترة اللي بيسموها ربيع العمر بقت صيف العمر حر ودوشة وزحمة أو شتاء العمر كلية وامتحانات وبرررد وانفلونزا
حد هيسألني طب فين
ثالثا هقولو محبش الارقام الفردية نعم في اعتراض ولا حاااجه(طبعا في ناس خدت بالها وفي ناس ولا على بالها هههههه )
سادسا :
أيوة سادسا صح مش خامسا
مكنتش كل بنوتة هتمني نفسها بفارس الأوهام اللي جاي سايق عربية كرولا بيضا موديل سنة 2122
(حلو الرقم ده ههههه )وفي الأخر يبصبص لغيرها يوم الفرح او في شهر العسل ( عسل اسود على الرجالة اللي بالشكل ده ) وبعدها قدامها حلين تخلع او تتخلع والخلعان مش معناه الطلاق بس دي ممكن تخلع من الدنيا كلها يعيني ( تبعا المرأه رقيقة وقارورة بتنكسر بسرعه) ولو خلعت كده من الدنيا وقتها تبقى خسرت الدنيا والأخره !!!!
عاشرا : مكنش كل شاب وشابة بيفهموا جالهم احباط ومش فاهمين ومكبوتين اجتماعيا وسياسيا واقتصاديا فبينطوا على أول مركب متهالكة وطالع عنيها أو بيقعدوا يستنوا الفرج اللي عمره ما هييجي ( ايه الاستكئاب ده )
وزي ما بتقول الاغنية الشهيرة المشهورة بتاعت ثلاثي أضواء المسرح :
(( لو كانوا سألونا قبل ما يولدونا عارفين كنا نقول ايه ,كنا نقول اعتقونا قبل ما تولدونا في العهد اللي احنا فيه , يرضيكي يا ماما حوا , يرضيك يا بابا أدم ))
ولكن في الأخر ده قدرنا ومشيئة ربنا سبحانه وتعالى وأكيد احنا مخلوقين في الزمن الدميل ده لحكمه يعلمها رب العالمين
الدنيا مش وحشة اوي كده دايما احيانا بتكون
وردي وردي وردي وردي على رأي صفاء أبو السعود بس انتو بصولها بنظرة
طفلة مش عايزة تكبر

الجمعة، 27 يونيو 2008

أول تدوينة ( المقدمة)









بسم الله الرحمن الرحيم




السلام عليكم ورحمة الله وبركاتة


الحمد لله الذي هدانا لهذا وما كنا لنهتدي لولا أن هدانا


بقالي شهور بفكر أعمل بلوج وبعد تفكير كتير وحيرة كبيرة ( ايه السجع ده هههه ) الحمد لله أخيرا عملت المدونة

وبجد أنا سعيدة جدا أن هيبقى لي أسرة كبيرة من المدونيين والمدونات وعشاق الكتابة والثقافة والفضفضة بوجه عام

لأن الأسرة دي تفكيرها مختلف عن التفكير اللي ماشي حاليا وهو تفكير الطناش والضياع ( وأنا يعني هغير الكون)

أتمنى بجد اننا نجتمع على خير ومفيش حد يجرح في حد أو في المدونة لأن في بنوتات كتير بيعانوا في مدوناتهم من الناس اللي
مش بيعرفوا يفرقوا بين النقد والتجريح والشتيمة , اللي عايز ينتقد حاجة معينة ياريت ينقد معنديش أي مشكلة لكن المشكلة الحقيقة في اللي
مبيعرفوش يعني إيه نقد بناء ؟

هدفي الأول من المدونة الفضفضة بدل ما أكلم نفسي أو الدبدوب بتاعي - لا سمح الله - اتكلم معاكم أحسن ولا ايه
وتبادل الأفكار والثقافة
أما عن اسم المدونة طفلة مش عايزة تكبر ده أكتر اسم قريب مني وقريب من ناس كتير جدا حاسين ان جواهم طفل عنيد بيحاول البقاء


وبيظهر في أوقات كتير وممكن جدا وانا متأكده ان نسبة مش قليلة من الشخصيات العامة والمرموقة وحتى الناس العاديين أطفال مش عايزة

تكبر لكن ساعة الجد جد بنبقى كبار أوي وبنتحمل اي مسؤلية أن شاء الله المدونة تكون ذات قيمة ومحدش يزهق منها

والله ولي التوفيق


lady E