الجمعة، 19 أكتوبر، 2012

عودة

إفتقدت هنا إفتقدت هنا كثيرا بالرغم من وجود أماكن كثيرة لي عالإنترنت الأن كالفيس بوك وتويتر إلا أنه كما يقولون ما الحب إلا للمكان الأولي :) أعتذر لكل من أتى ووجد المدونة مغلقة فقد كانت مغلقة في وجهي أيضا لأنه تم حجبها من شبكة الإنترنت العمانية لفترة ولا أعلم حتى الأن السبب ! ولكنها عادت أخيرا .

4 شهور كاملة مرت بدون أن أكتب هنا بدون أن أمارس البوح لمدونتي المقربة ، 
4 شهور دبت الحياة في أناس وخبت في آخرين
حيا من حيا ومات من مات ، 4 شهور أثرت بي وأثرتُ بها
عن ماذا أكتب عن إسكندرية الساحرة أو سفري أو عن رمضان أو عن كتابة الC.V أو رحلة البحث عن عمل أو التوفيق من الله في إيجاد عمل ؟
 أكتب عن الطرق التي نمشيها ثم نسلك طرقا أخرى لم نحسب لها يوما حساب أم أكتب عن الكتب والأفلام والأشخاص الملهمين أم عن الويك إند الحبيب الذي بت أنتظره وكما تقول نجاة القريب منك بعيد أو أنا بستناك أنا أنا وليلي شمعة سهرانة في ليلة حب وأهلا حلوة :) عن علامات ورسائل القدر أم عن كل لبيب بالإشارة يفهم . 

لدي العديد من الحكي والبوح و"الحكايات" كما قالت صديقة ولكن الساعة تخطت 
ال 12 وانتهى الويك إند وسيتوجب علي أن أركض كما سندريلا لألحق بعملي غدا الذي أستيقظ له من السادسة صباحا ولولا والدتي العزيزة لما إستيقظت أبدا . لكم ولنفسي : كونوا بخير وإلى أن نلتقي :)

السبت، 2 يونيو، 2012

غيوم قوس قزح


العناوين : دائما ما يرهقني البحث عن العناوين والبدايات ويرهقني ايضا افتعال النهايات أو كتابتها


كيف يستطيع الإنسان أن يكتب حين يعلم ان هناك بضعة متطلفون يقرأون كتاباته – الى كل المتطفلون الذين يعلمون أنفسهم جيدا أنا لا أتقبل أن تقرأوني في كلمات فلتنسوا انني اكتب ولتذهبوا وتهتموا بشئونكم-


في هذه الأيام أستمع للعديد من حكايا الفتيات اللاتي جرحهن أنهن خلقن من ضلع رجل والضلع بحاجه الى قلب يحميه ويحبه بحاجه الى مشاعر حينما تكون كاذبة تجرح وتؤذي جراح تستهلك السنوات الكثيرة في مداواتها.


تغير الكثير من أفكاري منذ التخرج من الجامعة ومنذ التخرج من الثانوية العامة أيضا
أنا لم أشعر انني تخرجت في الجامعة أو درست في كلية وأشعر ان أخر مرحلة دراسية توقفت عندها هي الثانوية العامة !

لم أكن أتوقع أبدا أن ادخل الجامعة في دمياط

الجامعات الإقليمية المصرية عديمة الفائده ولم تستطيع الثورة أن تغير ذلك قررت أن أدخل نفس الجامعة في الدراسات العليا وفكرت في انها خطوات جديدة تمحو القديمة

وقوبلت بالتعسف وعنت رئيس قسم اللغة الإنجليزية وحينها قررت أنه : "عبوهم" ولن أكمل دراستي العليا فيها توقفت عند هذا الحد وأكتفيت من هذا التخلف ، كنت أشعر انني سأجن لو وقفت مكبلة الأيدي ولم أفعل أي شيء أخر بدأت في تعلم أشياء جديدة وأخذت خطوة جريئة وهي أن أدرس لإمتحان وضعته جامعة انجليزية عريقه "كامبريدج"
أحب هذه التجربة واردد في نفسي أه كم أخشى غدي هذا وأرجوه اقترابا ، كنت أستدنيه لكن هبته لما أهابا
وتوكلت على الله وأرجو أن يوفقني .

الكلمات لا تخلد بدون الإحساس بها ولا حتى الأشخاص فالأشخاص لا يخلدون في قلوبنا بغير الأحساس بهم


أعلم جيدا أنني فريدة من نوعي أجمع بين ثقافات عدة فأنا وافدة في بلدي ووافدة في البلد الأخرى ، مختلفة هنا ومختلفة هناك أيضا لا شيء يشبهني ولا أشبه أحدا .

حلمت بأشياء كثيرة رومانسية ولكن كما قالت صديقتي على الشبكة العنكبوتيه هي بضعة سنوات وستستيقظي من الحب والرومانسية ذات الطابع الهوليودي .

لا اعلم لماذا أشفقت على المرأه في السعودية من منعها من قيادة السيارة ففي ذلك ظلم بين لها وتعامل على انها قاصر علما بأن الأطفال في السعودية يقودون السيارات .

من اسوأ الأشياء التي حدثت في عهد الثورة فوضى المرور وفوضى السائقين المتخلفين جدا

مشيت على عدة طرق سريعة منذ عدة أيام وعدة سيارات كانت تمشي في الإتجاه المخالف بدون أن يراقبها رقيب أو يردعها رادع هذا غير سيارات النقل الثقيل التي تمشي دائما على يسار الطريق علما بأن العربيات الثقيلة يجب أن تلزم اليمين وحدث ولا حرج عن المارون المسطلون الذين يقولون لك بكل الطرق دوسني وحينما تنبههم ينظرون لك كأنك أذنبت في حقهم وأزمة البنزين الغريبة والة التنبية التي يستخدمها المصريون بطريقة تثير الأعصاب والflasher الذي لا يستخدموه أو يستخدموه بطريقه خاطئه لدرجة انني أشعر أحيانا أن غلاء السيارات بشكل مبالغ جدا فيه هو عقاب يستحقه المصريون لأن كثير منهم لا يعلمون شيئا عن أداب الطريق .

الثلاثاء، 10 أبريل، 2012

Random (way to Egypt


في البداية بعتذر عن تأخير الجزء الجديد من القصة مع ان illusionist كتب الجزء الجديد رائع جداااااااااا بس لسه منشروش :) بعتذر مرة تانيه هخلص من الامتحان ان شاء الله وهنشر الجزء الجديد

* الshopping مع الأصدقاء متعة ومع الأهل ...... بس عالأقل أحسن من الshopping لوحدك !! وأكيد السفر نفس الموضوع مع اني مجربتش السفر مع الأصدقاء ولا مرة حتى أيام الجامعة !!!!!!!!

* بحب أوي اللحظة اللي الطيارة بتجري وبتسيب فيها الأرض وبتطلع لفوق وتطير بحس ان حياتنا كلها كده ودي رحلة البحث عن النجاح والسعادة بنبدأ نستعد للرحلة وبعدين نمشي شوية بشوية "على أدنا" وبعدين نجري ونبقى مش ملاحقين من المشاغل والمشاكل كمان
وفجأه نلاقي نفسنا طرنا وحققنا أحلامنا "وده للي يصبر" ويهزم الإستسلام ...

* طيارتنا اتأخرت ساعتين يعني بداية الرحلة لوز لوز لووووووووووز - لعله خير-

* لاب توبي البطارية بتاعته في الضياع وملحقتش اشتري بطارية تانيه وانا دلوقتي في المطار واللاب كان هيفصل فلقيت جنبي فيشة ووصلت اللاب بالشاحن " حركة حلوة في وسط الخنقة"

* والنبي حد يجاوبني امتى أهلنا هيعترفوا اننا كبرنا ويعاملونا على الأساس ده؟ يعني القانون ادالنا حقوقنا في التعامل الرسمي من بطاقة ورخصة قيادة وسفر من غير مرافق ومن غير استئذان من حد كمان الا ضميرنا وأخلاقنا وأهلنا مش واخدين بالهم

* بابا على فكرة الخوف اللي ملوش مبرر ده يخنق

* شعور حلو أوي لما بقول إني في دراسات عليا وكلها كام سنة ان شاء الله وهبقى مترجمة :) مهما المحبطين حاولوا يوقفوني أو يخوفوني برضه هتمسك بأحلامي ومش هقول موتوا بغيظكم هههههههههههههههه

* مش عايزة اتكلم في السوياسة علشان بتتملكني رغبة مكبوتة اني أشتم وناس كتير هتزعل مني بس بجد اللي بيحصل في مصر لا يرضي عدو ولا حبيب

* علشان محدش ضامن عمره ولسه قدامي طيران وطريق سريع ومغامرات كده :) أنا مستحيل أدي صوتي لعمرو موسى أو شفيق أو طبعا عمر سليمان ومعاهم بالمرة أبو سماعين وشاطر شاطر أبو سماعين ده حكايته حكاية مع احترامي لكل مريديه ومحبيه في حد في الدنيا ميعرفش جنسية الحاجة والدته؟ لو ميعرفش يبقى عقوق ولو يعرف ومخبي يبقى كذب والأتنين أسوأ من بعض

* برضه اتكلمت في السياسة !!!

* الله يرحمك يا أ. عبد الوهاب مطاوع كان نفسي أقابلك في حياتك أنت بتعبر عن أرائي بطريقة راقية ونبيلة

* د. ابراهيم الفقي الله يرحمك مش متخيلة مصر من غيرك

* إيناس يا حبيبتي خلصي قراءة كل الكتب اللي عندك وبعدين أشتري جديد " نصيحة لنفسي"

* الله يوفقك ، الله يعطيكي العافية لسه اللهجة الأردنية الفلسطينية بترن في وداني

* بكره أوي الناس اللي وقت السفر عموما بتفضل تتنحنح وتسبل مش عارفة بيستفيدوا من كده إيه؟

* سمعت شوية إنجليش حلوين من native speaker كان بيتكلم في التليفون دي من احدى فوائد السفر برضه :)

* السيطرة على الأعصاب حلوة والهدوء وقت الإنفعال صعب بس مفيد

* بحب أغنية somebody's me لإنريكي مع إنها أغنية كئيبـــــــــــــة -فعلا للناس فيما تعشق مذاهب-

* الماليزيين بجد فخر للمسلمين في التنظيم والتدين والرقي وكل حاجة عدى من قدامي جروب ماليزي من شوية والله شكلهم يفرح وتفتخر انهم مسلمين

* النت ده اختراع بجد :) مش عارفة كنت هقضي كل وقت تأخير الطيارة ده ازاي من غيره :) أكيد يا كان هيبقى ف ايدي كتاب أو برغي مع إحدى صديقاتي أو بتناقش مع مامتي

* عندي امتحان يوم السبت لولولولولولي زغرتي يا اللي منتيش غرمانة

* أيون أنا المجنونة الطموحة المتفائلة واللي بتحب بلدها ونازلة لبلدها في انتخابات الرئاسة ومش خايفة حد عنده اعتراض؟


الجمعة، 10 فبراير، 2012

حينما يموت الأب الروحي


كان بيقول انه مش هيكمل السنة دي وتقاريره الطبية بتقول كده وانه بيسافر في محافظات مصر كلها علشان ينمي ويفيد أهل بلده لأنه في الستينات وان عاش النهاردة مش هيعيش بكرة ، قلبي انقبض وانا بسمع كلامه ده في أول وأخر محاضرة حضرتها ليه
كان نفسه ياخد جائزة نوبل وان كان اخد اللي اعظم منها حبه واحترامه ودعواتنا ليه في قلوبنا وعلمه اللي هيستمر منقوش في عقولنا وحياتنا صدقة جاريه له
د. ابراهيم الفقي انتقل الى رحمة الله النهاردة الصبح نتيجة لحريق في بيته هو وأخته ومربيته والله اعلم مدبر ولا لأ بس مش غريبة شوية ان كل علمائنا والشخصيات المصرية الناجحة بتموت موتات مش طبيعية !!

اللهم ابدله دارا خيرا من داره واهلا خيرا من اهله وادخله الجنة واعذه من عذاب القبر ومن عذاب النار .
اللـهـم عاملة بما انت اهله ولا تعامله بما هو اهله .
اللـهـم اجزه عن الاحسان إحسانا وعن الأساءة عفواً وغفراناً.
اللـهـم إن كان محسناً فزد من حسناته , وإن كان مسيئاً فتجاوز عن سيئاته .
اللـهـم ادخله الجنة من غير مناقشة حساب ولا سابقة عذاب .
اللـهـم اّنسه في وحدته وفي وحشته وفي غربته.
اللـهـم انزله منزلاً مباركا وانت خير المنزلين .
اللـهـم انزله منازل الصديقين والشهداء والصالحين وحسن اولئك رفيقا .
اللـهـم اجعل قبره روضة من رياض الجنة ,ولا تجعله حفرة من حفر النار .
اللـهـم افسح له في قبره مد بصره وافرش قبره من فراش الجنة .
اللـهـم اعذه من عذاب القبر
اللـهـم املأ قبره بالرضا والنور والفسحة والسرور.
اللـهـم إنه فى ذمتك وحبل جوارك فقه فتنة القبر وعذاب النار
انت أهل الوفاء والحق فاغفر له وارحمه انك انت الغفور الرحيم.
الإعلام المصري كالعادة زفت زفت زفت في نقل الأخبار وتقدير الشخصيات المصرية العظيمة والحداد عليهم

ان العين لتدمع والقلب ليحزن وإنا على فراقك يا د. ابراهيم لمحزونون ولا حول ولا قوة الا بالله

http://justbabygirl.blogspot.com/2011/09/blog-post_23.html

الخميس، 2 فبراير، 2012

حـــــــــــــــــداد


وحدونا في الحزن فمصر اليوم والمصريين جميعا في حالة حزن ويكسو قلوبنا الأسود رحم الله من ماتوا فقبل الأمس سقطت عمارة على أهلها في دمياط وكان الحزن عنيفا على من عرفوا سكان العمارة ومن لم يعرفوهم وبالأمس توفى 73 لأنهم يشجعون بلدهم وتمنوا الفرحة فيها مات الشباب من كل المحافظات ليس من القاهرة فقط كما يدعي ضيقوا الأفق فالحزن موزع على مصر بأكملها

بلدنا التي بها أكبر نسبة شباب يموت فيها الشباب ويحكم فيها الشياب !!

لم يعد اليوم يشبه البارحة لقد تغيرنا لم أعد أحزن وحدي على الشهداء والضحايا فالكرة التي خدرت الناس بالأمس وأنستهم 1000 روح انسان ضحايا العبارة والكرة التي أشعلتنا غضبا في مباراة مصر والجزائر في السودان هي أيضا التي وحدت حزننا على اختلاف تفكيرنا وثقافتنا

دولة الظلم ساعة ونهاية الظلم قربت جدا جدا جدا

البقاء لله في ضحايا عمارة دمياط والتعازي لأهلهم وربنا يصبرهم والبقاء لله في ضحايا أحداث الأمس من الطرفين والتعازي لأهلهم وربنا يصبرهم وان شاء الله ناخد حقهم وحق اللي راحوا قبلهم ولا حول ولا قوة الا بالله

الاحساس اللي حاسة بيه من يومين ميتوصفش حزن على حزن يارب هون وصبرنا ...

الاثنين، 30 يناير، 2012

سنة تالتة ابتدائي


أنا درست لأطفال ولكبار لكن بالرغم من كده سنة تالتة ابتدائي مأثرين فيا بطريقة كبيرة هحكيلكو شوية عليهم

سنة تالتة ابتدائي أنا اعتمدت معاهم أسلوب اللعب علشان يحبوا اللغة ويتعلموا ده غير أن فيهم كتير شطار كمان فبيساعدوني أني ابتكر العاب جديدة وحاجات تفرحهم

سنة تالتة ابتدائي هما الفصل اللي بيفضلوا طول اليوم يسألوني أستاذه متى حصتنا؟ ولما الحصة بتاعتهم تقرب وأقولهم انا عليكم الحصة الجاية يفضلوا يقولوا هيه هيييييييييه هييييييييييه ويتنططوا علينا انجليزي علينا انجليزي هيييييييييييه

سنة تالتة ابتدائي هما " الفصل البسكوتة" اللي مشاعرهم بتظهر عليهم على طول وأنقياء أوي لسه متعلموش الكدب والنفاق

سنة تالتة ابتدائي هما الوحيدين اللي بيبقوا عايزين يشيلوا الشنطة بتاعتي او اللاب توب وبيحبوا يساعدوني

امبارح خرجت خروجة اجبارية مع ماما وجيراننا برغم اني كنت تعبانة شوية ولقيت طالب من تالتة ابتدائي أول لما شافني برق وكإنه شاف نجمة سينما :) وجري عليا وسلم عليا واللي انا اتفاجئت بيه انه كان عايز يبوسني طبعا انا وشي احمر مع ان الطفل بيتصرف بعفوية قولتله كلام أهبـــــــــــل تبريرا اني مش هينفع أبوسه طبعا الواد يا عيني اتحرج وانا طلع عليا شبح يلا نمشي يلا نمشي حتى ماما متعرفش انا اتعصبت كده ليه :) مبحبش طلابي يشوفوني وأنا تعبانه وهما كانوا كتير في "ماكس" امبارح

سنة تالتة ابتدائي لو ربنا أراد ورجعت شغلي هيبقى علشانهم وبس

سنة تالتة ابتدائي أكتر أطفال هفتقدهم لما ارجع مصر ان شاء الله علشان الدبلومة اللي قالوا امتحاناتها في شهر 5 ومازلت مستغربة لغاية دلوقتي من ان الكلية يقدموا الامتحان ويخلوه بدري اوي كده !!

سنة تالتة ابتدائي لازم أتصور معاهم إن شاء الله وأخليهم ذكرى جميلة عندي

الاثنين، 23 يناير، 2012

أم الدنيا محتاجة كالسيوم

> الفقرة دي مجنناني من كتاب في خدمة السلطان لإيان جاردنر وبقرأه حاليا
الكتاب ده جالي بالصدفة ولما بدأت قرائته عرفت انه ضروري جدا الواحد يعرف تاريخ المكان اللي هو عايش فيه ويا سلام لو كان من وجهة نظر محايدة وهقسم الكلام لمرحلتين قبل وبعد :

الفقرة اللي جاية مقتبسة من الكتاب النسخة العربية ص35

قبــــــــــــــــل : " لم تكن هناك طرق معبدة في عُمان – بضم العين- حتى بداية السبعينات، وكان هناك مستشفى واحد، ومدرسة ابتدائية واحدة ، ولم تكن هناك هواتف ، ولا بنية أساسية من أي نوع جدير بهذه التسمية ، سوى قنوات قديمة لتوزيع المياه. وكان من غير المسموح به قانونا الاستماع إلى الموسيقى أو لبس النظارات الشمسية.
وكانت بوابات مسقط المسورة تغلق ليلا ، وإذا كنت في الخارج وتريد أن تدخل، فالأمر أسوأ مما تتوقع ، أما إذا أردت التجول داخل المدينة ليلا فعليك أن تحمل فانوسا. ...... وبمزيد من التدقيق ، كان المرء يجد درجة من التداعي في المباني تبعث على الكأبة ، وانعداما تاما تقريبا لأية مرافق نافعة، سواء كانت قديمة أو حديثة وكانت السوق – إذا استطعت العثور عليها- يباع فيها ما قلت قيمته أو اهميته . ...... لقد كانت هذه العاصمة منطقة مكتظة بالمباني البالية الوسخة المكسوة بالغبار وكانت مسقط في أعين الجميع – ما عدا المولعين بالجزيرة العربية القديمة- بمنزلة مكان للنفايات . "

بعــــــــــــــــد : البلد دي اللي الكاتب بيتكلم عليها كانت كده في السبعينات احنا دلوقتي في الألفية التانية يعني مر حوالي 40 سنة البلد دي بيجيلها مصريين من أوائل الثمانينات يشتغلوا فيها – قبل ما أتولد- أما عن رؤيتي الشخصية فكفاية أوي إني أقول اني دخلت سلطنة عمان من غير فيزا بالطريقة التقليدية :) من غير ما أضطر اني أقف في طابور طويل وأخد ختم الفيزا زي بلدي قبل الثورة كنت بقف بالثلاث ساعات استنى تأشيرة الدخول لبلدي وبعد الثورة وقفت حوالي نص ساعة أما في عمان فدخلت في 5 دقائق دخلت على بوابة الكترونية واتعاملت مع تعليمات الكمبيوتر والكمبيوتر سجل لي التأشيرة من غير ختم وتعقيدات اني دخلت البلد :)
ثانيا البلد اللي الكاتب وصفها بإنها مكان للنفايات دلوقتي من غير مبالغة بتبرق من النضافة أنا خرجت من المطار وبرغم اني جيت قبل كده كذا مرة لكن كنت مستغربة من نضافة الشوارع بالطريقة دي ده غير حاجات تانية كتير قولتها قبل كده "

في تجارب كتير لبلاد كتير قبلنا بدأوا من الصفر ودلوقتي بقوا بلاد متقدمة وده مثال لدولة عربية كانت حاجة ودلوقتي بقت حاجة تانيه خالص

ان مصر ترجع تاني لمجدها ولدورها الاستراتيجي وتبقى زي ما بنتمناها دي حاجة مش مستحيلة لأنها حصلت قبل كده مصر بس محتاجة شوية كالسيوم فقدته في السنين اللي فاتت واللي قبلها من الظلم والاستبداد وقلة الضمير والفساد و.......

مصر هترجع أنا متأكده سواء اليوم ده قريب ولا بعيد

تحية لكل اللي نفسهم مصر تبقى أحسن بلد في الدنيا وتحية لأمهات وأهل الشهداء وتحية للثورة "المستمرة"
وأنا مش مع احتفالات 25- يناير "بكرة" حتى مش مع الاحتفال بعيد ميلادي يوميها "26" يناير

اليوم ده لازم نقف دقيقة حداد على أرواح كل شهدائنا اللي لسه حقهم مرجعش ولا اهاليهم ارتاحوا لازم نكمل مشوار بدأناه لأن اللي يوصل لنص السكة ويقف كإنه متحركش من مكانه أصلا !!

لا تيأسوا أن تستردوا مجدكم ** فلَرُبَّ مغلوب هوى ثم ارتقى

مَدت له الآمال من أفلاكها ** خيطَ الرجاءِ إلى العُلا فتسلَّقا

فتجشَّموا للمجد كلّ عظيمة ** إنّي رأيت المجد صعبَ المرتقى

من رام وصْلَ الشَّمس حاك خيوطها ** سبباً إلى آماله وتعلَّقا (حافظ ابراهيم – تحية للناشئين)

كلنا حاطين ايدنا على قلبنا وبنقول يارب بغض النظر عن مجلس الشعب الكوميدي ضحكوني كتير النهاردة :)

الأحد، 8 يناير، 2012

ترقص وحيدة


هي طفلة تعشق الرقص وترقص حتى لو لم يكن هناك أي موسيقى فالموسيقى تسري في قلبها وروحها

صغيرة هي على وضع مساحيق التجميل ولذلك هي تعشق تنوع الألوان في ملابسها وتعشق الفساتين المنفوشة وفساتين السهرة والفرح

طفلة ترى كل شيء مميز حتى خيوط شمس الصباح ترى فيها ألوان قوس قزح وتشعر منها بالدفء وتربت الشمس على كتفيها فتدفئ روحها وتشعلها نشاطاَ

طفلة تحب اللعب والفوضى وتغمر الجميع بالمرح وتعشق الصخب والهدوء والأيس كريم والشوكولاته :)



كبرت قليلا الأن تمنت منذ فترة ليست ببعيدة أن يشاركها أحد رقصتها ومن يومها لم ترقص أبدا

لم تعد تشغل الموسيقى بصوت عالي وتغني معها الا " كل فين وفين"

كبرت قليلا لكي تستطيع وضع مساحيق التجميل ولكنها لم تعد تحبها بما فيه الكفاية ولكنها تفضل شرائها وربما رجع هذا لأنها من صغرها تعشق الألوان وتفضل اقتنائها في أي شيء :)

كبرت قليلا حتى نسيت المراجيح والألعاب واليوم في غفوة قليلة من الزمن عنها عادت للتتأرجح بين السماء والأرض على " المرجيحة"

كبرت قليلا لترى الكثير من الأشياء عادية ولكنها ليست كذلك فكل دقيقة جديدة في الحياه هي مميزة فلن تأتي مرة أخرى ولن تعود

كبرت قليلا وتفتقد طفولتها وتعتزم أن تعيش اجمل مراحل عمرها وتأخذ أفضل ما أحبته في طفولتها



الجمعة، 6 يناير، 2012

ذكريات جيل الثمانينيات


# UP 20ده هاشتاج على تويتر عجبتني فكرته وقولت أتكلم شوية على جيلي جيل العشرينات

• احنا الجيل اللي طلع على أيامه كل الحاجات الجديدة وقبله مكنتش مشهورة أو " مكنتش موجودة" زي الدش والكمبيوتر اللي كان بادئ بطريقة بدائية خالص والجيل برضه اللي شاف اللاب توب والبلاي ستيشن


• جيل لحق اخر شوية من بلده وهي هوليود الشرق


• جيل مجلة ماجد وسمير وبلبل وميكي وفلاش ورجل المستحيل وروايات للجيب


• جيل أغلبه بيحب فيلم ميل جيبسون Brave heart وyou have got mail لميج رايان وتوم هانكس وجيل أغلبه حافظ أغنية تايتانيك لسيلين ديون وشافوا الفيلم أكتر من مرة .

• الجيل اللي شاف تطور الموبايل من "فردة شبشب" لغاية ما بقى تاتش

• جيل الأتاري ولعبة ماريو وسباق العربيات والدبابات وهو نفس الجيل اللي شاف الأيباد وأي فون والبلاك بيري ...

• الجيل اللي درس في ابتدائي في "مصر" لغاية سنة خامسة ابتدائي بس والجيل اللي شهد رجوع سنة سادسة ابتدائي تاني

• جيل لحق الأكل البيتي قبل الوجبات السريعة والديلفري

• جيل كان في على أيامه أكلات دلوقتي مبقتش معروفة زي ال "بوفتيك"

• جيل بقلظ وماما نجوى وعمو فؤاد وبوجي وطمطم الأصلي وبكار

• جيل الشيخ الشعراوي يوم الجمعة وبرنامج العلم والإيمان

• جيل أماني وأغاني وجيل ميلودي ومزيكا

• جيل اليتيمات عاطفيا والأحلام الضائعة اللي بنحاول نرجعها

• جيل صداقة الفيس بوك اللي الأصدقاء فيه غالبا مجرد رقم بيزيد أو بيقل

• جيل الصداقة والحب من وراء شاشة كمبيوتر وجيل الهدايا مجرد صور عالمواقع الإلكترونية

• جيل الناس المزيفين الكتار أوووووي والحسد والحقد والوحدة والمدنية المزيفة

• جيل الثورات العربية وكلمة حق ضد الظلم الجيل اللي شايل روحه على كفه

• جيل كلمتين وبس لفؤاد المهندس وأبلة فضيلة والى ربات البيوت وصباحك معطر مفتح مزهر وبالسلامة يا حبيبي بالسلامة :) والجيل اللي شاف كل ده راح ومفضلش منه غير أبلة فضيلة

• الجيل اللي لحق المسحراتي في رمضان ولمة العيلة عالسفرة والفانوس الأصلي بشكله الأصلي مش الصيني زي دلوقتي

• الجيل اللي كان بيشوف مدرسين الإنجليزي والكمبيوتر "نجوم سينما" والجيل اللي شاف استغلال المدرسين وبدأت في عهده الدروس الخصوصية عيني عينك

• الجيل اللي كان فيه الطلاب مع بعض مسلم ومسيحي متصاحبين وبيذاكروا سوى لأن الدين ملوش علاقة بالصداقة

• الجيل اللي البنات فيه كانوا رومنسيات أوي وفي نفس الوقت بقوا عمليات أوي واختلفت طموحاتهم واولوياتهم ومتطلباتهم في شريك الحياة

• جيل أغاني فولا فولا وكوكو واوا والبطة أنتيكا وكاك كاك أنا الفرخة واحنا الكتاكيت وكان في بنت اسمها تررم والساعة ف ايدك كام يا عمو الساعه كام :)

• جيل أغنية ماكارينا ورقصتها كمان والرقصات السلو في الأفراح :)

ذكريات :)