الأحد، 26 أكتوبر، 2008

الحمد لله اني مش شاب

من فترة قريبة روحنا محل داماس (اللي نانسي عجرم بتعلن عنه)علشان نشوف اسعار الدهب ففي قلب بيتعلق في السلسلة عجبني جدا كان قلب صغنون متلون بألوان الطيف وبجد كان شكله رائع سألت عن سعره وحسيت اني اتجمدت في مكاني لما عرفت سعره بجد كان غالي جدا لدرجة لا يصدقها عقل طلعنا من المحل وانا بقول الحمد لله اني مش شاب الحمد لله مش مطلوب مني مهر وشبكة ( انا اللي هيجيلي مهر وشبكة ان شاء الله :))) ) اذا كان سعر قلب صغنون كده اومال اسعار اطقم الدهب اللي بتيجي في الشبكة ايه بقى (الله يكون في عون الشباب)
والحمد لله اني بنوتة مش شاب
وفي موضوع الدهب برضه بنت خالتي راحت تجيب الدبلة امبارح عقبالكم كلكم لو لسه متخطبتوش او مخطبتوش :)
فاختارت دبلة وتوينز او بعض الناس بيسموه محبس وكمان خاتم صغنون وخفيف كل ده بكام بقى حضروا نفسكم للصدمة الحاجات البسيطة دي بألفين ونص جنيها مصريا (وده غير الشبكة)
فلما سمعت الرقم ده قلت الحمد لله اني بنوتة مش شاب

نيجي بقى لحاجة تانية غير الذهب وننتقل لمرحلة ما قبل يوم الزفاف
كنت انا وصحباتي عند الكوافيرة فحبيت اسألها على تكاليف حجز العروسة عندها وسألتني هي العروسة محجبة ولا هتعمل فورمة في شعرها قولتلها محجبة صدمتني وقالتلي 700 جنية ما شاء الله يوم واحد بس وقبله 4 مرات ماسك ب700 جنيه ولو العروسة مش محجبة ف هتتكلف اكتر على حسب طول شعرها وكثافته يعني ممكن تعدي ال1000 جنيه واعتقد ان المتعارف عليه ان العريس هو اللي بيدفع فلوس الكوافيرة

والحمد لله اني بنوتة ومش شاب

ده طبعا غير مصاريف الخطوبة والشقة والموبيليا وفستانين الخطوبة والفرح وقاعة الفرح وباقي مصاريف الفرح ومش هقول شهر العسل لأن غالبا مفيش ناس كتير بتسافر في شهر العسل وطبعا انا مذكرتش مصاريف المناسبات اعياد الفطر والاضحى وعيد الحب وعيد الميلاد ...... الخ وكل ده عالعريس الغلبان والله صعبانين عليا

ونطلع من هذا البوست اللي أكيد خنق اي شاب بيقرأه انه : بالرغم ان البنوتات مظلومين في مجتمعنا الذكوري بلا شك لكن بيجيلهم يوم وبياخدوا حقهم ولو مرة وبالرغم ان البنوتات بيجيبوا حاجات بيسموها الرفايع الا انها مش رفايع ابدا ومرهقة ماديا ومعنويا لأن البنوتات مش أي حاجة بترضيهم وبيلفوا كتير لغاية لما يلاقوا الحاجات اللي في خيالهم وبيدورا عليها وبجد الحمد لله اني بنوتة والله يكون في عون الشباب واعتقد بعد كل الكلام ده لازم الزوج والزوجة يقدروا بعض لأن هما الاتنين تعبوا لغاية لما بنوا مملكتهم الصغنونة الف مبروووك يا بنت خالتو ويا دبلة الخطوبة عقبالنا كلنا بس بعد الكلية لأن صاحب بالين كداب
انا فرحانة جدا جدا ليكي وعقبالي بعد الكلية ان شاء الله لوووووووووولي

هناك 28 تعليقًا:

blue-wave يقول...

علشان تعرفوا بس وتعذرونا:))

Lady E يقول...

blue-wave : كان الله في العون يا دكتر

وبصراحة الشباب يستاهلوا لأنهم لو متعبوش في تكاليف الزواج هيبقى الموضوع سهل وكل يوم هيتجوزوا عروسة جديدة

والله يكون في عونك بقى وراك 5 ع

mohamed ghalia يقول...

مبروك لبنت خالتك
عشان تعرفوا بس اننا بنتعب قد ايه
تحياتى

romansy يقول...

يا سلام عليكى ايوه كده اخيرا لقينا حد حاسس بالشباب وامعاناه الكبيره اللى بيشوفها بس اقولك الحقيقه بالرغم من المصاريف الكتيره دى بجد
الا لما الاقى اميرتى كله يهون علشانها بس بشرط
تكون بتحبنى زى ما بحبها واكتر

البحث عن أنا شىء جنونى يقول...

ما بالك بقى اللى اتجوز مرتين وخطب بتاع 3 او 4 مرات

ربنا يكون فى عونه هههههههههههههههه

☼♫♪ عمــاد الدين يــوسف ☼♫♪ يقول...

علشان تعرفي احنا بنتعب علشانكو اد ايه
وفي الاخر يقولو حقوق المرأه
هههههههههههههه

تحياتي

e_emy يقول...

ههههههههههه
الاحسن محدش يتجوز

الـ مبروووووووووك ــــف لبنت خالتك
وعقبالك يارب (:

هانى زينهم يقول...

الله يسامحك بتعايرينا عشان احنا شباب ؟!!
معلش بس برضه حقنا بناخده لما بتيجوا عندنا ؟!
سيبك انتى اللى عاجبنى انك من ساعة ما رجعتى وموضوعاتك بقت مرتبطة بينا اوى وواقعية اوى وبتلمس مشاكلنا بجد ؟؟
موضوع اكتر من هايل وتسلم دماغك !!

Sometimes يقول...

الله يكون فى عونهم
بس برضه يا ليدى ما البنات برضه عليهم كتير
مش المفروض هتجهز وكده ويا عينى اهلها بيبقوا عاملين ازاى

مبروك لبنت خالتك وعقبالك بس صدقينى مفيش صاحب بالين ولا حاجه
عن تجربه شخصيه
انا مجيبتش تقدير الا لما اتخطبت
ههههههههههههههههههههههههههههههههههه
اكيد برضه مش كل الناس زيى

اخبار ام نبيل معاكى ايه؟
على فكره انا بحبها اكتر من اى حد تانى

عارفه لما باباكى حسدوه
ده حصلى يا ليدى والله
بجد ربنا يخليهم لنا ويبارك لنا فيهم ويفضلوا منورين حياتنا على طول بصحة وهنا يااااااااارب

مش تزعلى منى على تأخيرى بس على طول والله فاكراكى
سلام يا قمر وربنا يوفقك ويحميكى

عايش علي الهامش يقول...

ياه كل ده لا طيب انا هصرف نظر بقي عن الجواز .... والمشكله ان بعد كل ده يقولو الستات مظلومين في الدنيا دي
بلاشه جواز وخلاص احسن ونشوف بقي مين هيكون مظلوم ساعتها


شكر لك

ريم يقول...

عارفة ؟
احنا ممكن نقول بردو انه البنات ساعات بتبقى غلطانة عشان بتطلب طلبات مهولة كده .. لو هي بتحبه فعلا و عايزة تكمل حياتها معاه فعلا و لو هو شاب مجتهد و طموح و ملتزم و اخلاقه كويسة يبقى اكيد هترضى بأي حاجة يجيبها لها ..
طب عارفة .. و والله بيحصل و انا شفته بيحصل .. و ناس كويسة مادياً كمان.. واحد راح اتقدم لواحدة و والدها قاله انا مش هشترط عليك اي حاجة، اعمل اللي انت عاوزه و جيب اللي تقدر عليه.. الشاب طبعاً بقى محرج جداً من رقي الرجل ده و بقى نفسه يعمل كل حاجة عشان خطيبته.. و هما ناس بجد في منتهى الرقي و اهلهم دبلوماسيين و البنت مش عايزة اقولك يعني : مثالية في كل حاجة ..
فكون اني اطلب طلبات فظيعة كده مش يزود من قيمتي.. الموضوع في الآخر بيعتمد على الرجل و الست..
او يمكن انت كمان كان قصدك كده بس انا سرحت و ماخدتش بالي..
يا خبر شفتي انا رغاية ازاي :)
بوست جميل و كان بقالي كذا يوم عايزة اخش اشوفه ..
و عقبالك يااا رب :):):):)

علاء عارفين يقول...

أهو انا بقى شاب مش بنوته

ربنا يتولانا

كـــيــــــــارا يقول...

فاكره يانونا

الموضوع اللي كنت نزلته بتاع حياه شاب

فاكره انا قلت فيه ايه

Lady E يقول...

mohamed ghalia: الله يبارك فيك

ربنا يعينكم مع انكم بصراحة تستاهلوا

دمت بخير دائما

Lady E يقول...

romansy : أومال ايه مش كل البنوتات مفتريين يعني احنا عارفين معاناة الشباب والله يكون في عونكم

وربنا يوفقك وتلاقي الأميرة اللي بتدور عليها

Lady E يقول...

البحث عن أنا شىء جنونى: ههههههه ليه هو الحج متولي

وبعدين ربنا يعينه ليه بقى حد قاله يخطب ويتجوز كده ؟؟؟ يستـــــاهل

Lady E يقول...

☼♫♪ عمــاد الدين يــوسف ☼♫♪ : يا عيني بجد بتضحوا
انتوا بتتعبوا شوية وبعدين تتعبوا البنوتات طول العمر

وبعدين لو هنتكلم على حقوق المرأه فحقوقها فعلا ضايعة في حاجات كتير
عالأقل المرأه دي مش بتعرف تمشي ف الشارع اليومين دول وهي حاسة بالأمان
واظن دي ابسط الحقوق !!

شبــ اون لاين ـــاب يقول...

انا ع كده حتنجد

حرام عليكى عرفتينى الحقيقه المره دى ليه

قال يعنى مش عارفها!!!

ههههههههههههه


---------------------------

انا مش حقول غير كلمه واحده بس
ارزقنا بالحلال يارب
زى ما كركر قالها


ده احنا حندفع فلوس لما نفكر اننا ننتحر

بس عارفه

العروسه بجد تستاهل حتى لو طلبوا منى ادفع عمرى كله
بس ادعيلى انتى اقدر اتقدملها




--------------------------
كان معكى من امام الكيبورد
واحد مخه لاسع شويه
شبــ اون لاين ـــاب
الاسكندريه
--------------------------

Lady E يقول...

e_emy : ههههههه مش كده برضه
بلا جواز بلا وجع قلب
احنا بنقول كده دلوقتي عادي لكن يوم لما يدق قلبنا ويبقى الموضوع جد هنغير تفكيرنا خالص

الله يبارك فيكي يا قمرايا
عقبالك وعقبالي وعقبال كل البنوتات والشباب

دايما بتعطري المدونة بمرورك يا قمرايا

Lady E يقول...

هانى زينهم : ايه روح الانتقام اللي عندك دي يا مستر ((معلش بس برضه حقنا بناخده لما بتيجوا عندنا ؟!))
الزواج مش تخليص حق لكن ده حياة كاملة كلها مودة ورحمة

وبالنسبة للموضوع فأنا كتبت فكرته وشوية منه في الاجندة بتاعتي وكنت لسه مسافرة يعني ملوش علاقة بإني رجعت من السفر :)

دمت بخير دائما يا مستر

Lady E يقول...

Sometimes :
الله يكون في عوننا وعونهم يا قمرايا
وانا قولت في البوست ان البنوتات بتجيب حاجات اسمها رفايع بس هي
مش رفايع ابدا ومرهقة جدا ماديا ومعنويا
بس برضه الأهل هما اللي بيعملوا كده في نفسهم لأن كتير منهم بيجيبوا حاجات
ملهاش لازمة بس لازم يجيبوها على سبيل المنظرة بس

الله يبارك فيكي يا قمرايا
اكيد مش كل الناس عسولين زيك :)
بجد دي ميزة مش موجودة عند اي حد
بالنسبة لشخصيتي صاحب بالين كداب وبجد مقدرش اذاكر كويس وانا مخطوبة
وبعدين انا هستعجل ليه يعني

وبالنسبة لأم نبيل ف لسه بدور على رقم حلو

و فعلا الأب والأم اغلى اتنين في حياتنا وملناش غيرهم بعد ربنا سبحانه وتعالى
ربنا يستجيب دعواتك الجميلة يا قمرايا
وانا متأكده من كلامك لأنك دايما على بالي
ربنا يكرمك ويرضى عليكي

Lady E يقول...

عايش علي الهامش : ايه ده انتا بخيل ولا ايه يا عايش
مش عايز تتجوز علشان توفر كل المصاريف دي
ربنا يعينك عليها ان شاء الله

وفعلا في ستات كتير مظلومين في الدنيا لكن الحمد لله الاسلام نصف المرأة
والمجتمع مش بينصفها ابدا
بدليل انك مش شايف ان في ستات مظلومين
واعتقد انتا بتقول بلاش جواز دلوقتي علشان لسه ملقتش الانسانة اللي يدقلها قلبك
لكن لما تلاقيها ان شاء الله أكيد نظرتك هتتغير

Lady E يقول...

ريم : اكيد كلامك سليم يا قمرايا
بس عارفة ساعات بيكون المجتمع هو السبب في المشكلة وبيضغط على العريس والعروسة واهلهم
بمعنى ان مثلا كتير بيعملوا فرح بتكلفة كبيرة جدا جدا فوق طاقتهم المادية لدرجة انهم ممكن يعيشوا في الديون فترة كبيرة علشان الوجاهة الاجتماعية مش اكتر في حين ان ممكن جدا انهم يعملوا فرح بتكلفة اقل ويقضوا شهر العسل مثلا في مكان بيحبوه او يجيبوا حاجة محتاجينها في البيت لأن بطبيعة الحال معظم الشباب بيكونوا لسه في بداية حياتهم وبيكونوا نفسهم

واللي والد البنوتة ده عمله هو اللي الرسول صلى الله عليه وسلم وصى بيه
ولأن زي ما قلتي هما عيلة راقية ودبلوماسية ف ده تصرف جميل متوقع من ناس راقيين زيهم
وياريت الناس ياخدوهم قدوة

وجميل انك شايفة ان دي طلبات فظيعة لكن للأسف بنوتات كتير شايفين انها من اساسيات الزواج
و فعلا مش الطلبات الكتير دي اللي بتزود قيمة العروسة و الرسول صلى الله عليه وسلم قال (( أقلهن مهورا
أكثرهن بركة)) بس ياريت الناس تفهم ده

وبعدين ارغي براحتك يا قمرايا البلوج بلوجك
بجد انا بكون سعيدة جدا لما بشوف تعليقاتك الجميلة زيك
وعنيكي حلوين لأنك شوفتي البوست حلو وعقبالك يا قمرايا بس في الوقت المناسب ان شاء الله
دمتي في حفظ الرحمان

Lady E يقول...

علاء عارفين :
ايه اليأس ده
خلي شعارك لو لم اكن شابا لوددت ان اكون شابا
ربنا يعينك

Lady E يقول...

كـــيــــــــارا :
انتي عارفة اني بحب كل المواضيع اللي بتكتبيها يا كوكي واكيد قرأت الموضوع ده
بس منه لله النسيان
متزعليش يا كوكي هشوف الموضوع تاني ان شاء الله

Lady E يقول...

شبــ اون لاين ـــاب : أهلا بيك
بعد الشر عليك من النجدة
ابتدي حوش بقى وربنا يعينك
وبجد تفكير حلو جدا الرزق بالحلال ربنا بيبارك فيه
وياااارب تقدر تتقدم للعروسة اللي بتحبها وترتبط بيها
وتعيش احلى ايام حياتك معاها

mohamed ghalia يقول...

أختى العزيزة
ليكى تاج عندى ياريت تقبلية
فى إنتظار إجاباتك
تحياتى

Lady E يقول...

mohamed ghalia : متشكرة جدا على هديتك الجميلة يا أخي الكريم

انا شوفت التاج اسئلته جميلة والغرض منه نبيل جدا

بس متنتظرش الاجابة حاليا خالص لأن عندي تاج قبله لسه معملتوش عاااا

متشكرة جدا مرة تانيه