الاثنين، 30 نوفمبر، 2009

كده كتير وانا زهقت + تحديث لdr.norahaty

تحديث : بجد بجد بعتذر يا د. نورا انا قرأت التعليقين بتوعك وعجبوني بجد ورفعوا من روحي المعنوية بس لأني كنت بقرأهم بسرعه من الموبايل وصاحيه من النوم ومسافرة اتلخبطت واخترت رفض وحاولت ارجع الكومنتات تاني معرفتش بجد بجد بعتذر

*********************************************

أول تدوينة ( المقدمة) ده أول بوست كتبته في المدونة ياريت تقرأوه

انا بجد مكنتش عايزة اتكلم في الموضوع ده لكن خلاص بقى over أوي أوي أوي

انا لما عملت مدونة كان هدفي اني اتعلم واعمل صداقات وأخوات وكنت متفائلة جدا وفعلا عرفت بنوتات وناس من أرقى وأحلى الناس من التدوين أولهم كيكي أختي اللي لسه متقابلناش لغاية النهاردة ومع ذلك وقفت معايا في كل موقف ضايقني وكل ازمة اتعرضت ليها وبعد كده عرفت ناس تانيه كتير وبدأت الوجوه تظهر والصورة تبان حبه حبه العالم اللي كنت فرحانه بيه بدأ يظهر ناس غريبه فيه بالظبط زي ما بابا قاللي لأنه كان معترض اني اعمل مدونة وكان رأيه ورأي ناس كتير ان النت عموما عالم مزيف وكله بيكدب على كله بس انا مسمعتش الكلام

المهم قضيت وقت جميل جدا وعرفت ناس بجد رائعين ومدونتي كانت مكاني المفضل اللي بفرح فيه وبهرب فيه من أي حاجه مضايقاني وعمري ما كنت اتخيل ابدا ان يجي اليوم ومدونتي نفسها تضايقني

كتير سألوني انتي عاملة موديرشن ليه

الاجابة اني عاملة موديريشن لأن في تعليقات غريبة بتجيلي وبضطر احذفها وقولت لصاحبها بكل ذوق تعليقاتك غير مرغوب فيها ومع ذلك عنده اصرار انه يتابع المدونة وبيكتب تعليقات مستفزة وانا خلاص زهقت مش كل ما هدخل مدونتي هضايق
صديقة ليا قالتلي عتاب الندل اجتنابه بس خلاص طفح الكيل زي ما بيقولوا

انا حبيت التدوين وحبيت مدونين كتير بقوا فعلا جزء من حياتي ومش هقول اسماء لأن الأسماء كتير وخصوصا بعد لقاء المدونين في المنصورة لأني لما شفت اصحاب المدونات اللي اعرفها واللي حتى مش عارفاها فعلا حسيت اننا أسرة واحدة وحسيت بألفه وود واحترام بيننا كلنا وصعب عليا اني أقول انه
لو استمرت المضايقات وقلة الذوق دي انا هحذف المدونة ووالله العظيم انا بتكلم بجد لأن بصراحة كده كتير وانا عمري ما هنزل للمستوى ده وأرد ردود مش لطيفة على اي حد بيستفزني

الأحد، 29 نوفمبر، 2009

خاين والخيانة في دمه+ تحديث

تحديث : الحمد لله وصلنا بالسلامة عند خالتو حبيبتي مع ان ربنا استجاب دعائي والجو بيمطر طول الطريق :) وكنت مهييسة أخر تهييس :) من كتر المطر وان شاء الله بكرة هنسافر قاهرة ام عز اتمنى ان الجو يكون حلو
انا بكتب من اتصالات يو اس بي مودم :) ربنا يخلي لنا التكنولوبيا

--------------------------
تفتكروا اللي في الصورة ده حب بجد؟ ولا عرف أصلا معنى الحب؟ ولا يعرف ان في حاجة موجودة في الحياة اسمها حب؟ معتقدش
لما البكاء والدموع يبقى عادي جدا بإسم الحب والحبيب ولا همه دموع حبيبته وهو السبب في دموعها وحزنها واكتئابها
لما تزرع له في كل يوم ورده ترويها بدمها ودموعها وحبها وتعطرها بأغلى وأحلى عطر عندها وفي نفس الوقت ياخد منها الوردة ويديها لوحدة تانيه
لما الحب يبقى حاجز للنجاح يبقى حب مريض - الحب بيقوي مش بيضعف-
لما الحب يبقى في الضلمة زي الخفافيش بيتخبط في الحيطان مش في النور كل الناس تفرح بيه والمحبوبة تبقى فخورة بدبلة الخطوبة او الجواز في ايدها يبقى مش حب تبقى سرقة ووهم مش هيتحقق
لما تحب أوي وتخلص أوي وتلاقي مقابل ده خيانة وغدر وخداع يبقى انتا اخترت غلط
لما تفتكري انك الوحيدة في حياته وتكوني فرحانه انك في قلبه وان قلبه ليكي لواحدك وفجأه تلاقي كل البنات حافظه كلامه !
لما يرجع لك ندمان مش عشان أي حاجة غير انه اناني وبيحب نفسه وشاف ان محدش حبه واهتم بيه جدا غيرك ومع انه مخترش طريقك ومشي في طريقه مع واحده تانيه بس برضه الخيانة في دمه
لما تكوني شايفاه قمر في السما وهو مش كده وكل الناس بيصرخوا حاسبي ده سراب خداع ميستاهلش ثانية واحدة من حبك وتتناسي كلام كل الناس وتحطي ايدك على ودانك وتقولي لأ انا متأكده انه غير كده وفجأه تلاقيه فعلا كده وأفظع من كده كمان
لما يفضل يقلل صورته في عنيكي ويقللها ويقللها ويبقى عندك فرصة تدوسي على صورته وتكسريه وتخليه يدوق طعم الألم بس متعمليش كده مش علشانه لا سمح الله لأ علشانك متعودتيش تأذي حد وعلشانك مش هتنزلي للمستوى ده
لما تكوني بتدعيله ودلوقتي مبترتاحيش غير لما بتدعي عليه
يبقى حبيتي خاين مقدرش حبك ولا هيقدر حب أي حد واتأكدي انه بيحب نفسه وبس
ملحوظة صغنونة : يمكن اتأثرت شوية بالروايات اللي بندرسها بس ساعات الحقيقة بتكون أغرب من الروايات
ملحوظة تانيه : انا مسافرة على نفس ذات الطريق اللي عملت فيه حادثة :) ويارب الدنيا متمطرش لأني مش ناقصه حوادث تانيه :)
ملحوظة كمان : بلوجر بيهيس ومش عايز يسيب مسافات
اي خدعة نكد بنكد انا كمان بعرف انكد وطالما كل اللي حواليا راكبين موجة النكد ف يلا بينا نكتئب وعلى رأي الشاعر محدش واخد منها حاجه

الأربعاء، 25 نوفمبر، 2009

عيد سعيد


نفسي اعرف مين سعيد ده اللي كل عيد بيبقى عيده (عيد سعيد) وليه ميكونش عيد اي حد غير سعيد :)
أهلا أهلا بالعيد مرحب مرحب بالعيد
هيه هيه هييييييييييييييييييييييييييييييييه هيه هيه هيييييييييييييييييييييييييييه
غنوا معايا غنوا وقولوا ورايا قولوا كتر يارب ف أعيادنا واطرح فيها البركة وزيد جانا العيد اهو جانا العيد جانا العيد اهو جانا العيد
كل سنة وكل المسلمين بخير وكل زوار وقراء مدونتي بصحة وسعادة ويارب السنة الجاية نبقى متجمعين على جبل عرفات
بكرة ان شاء الله وقفة عرفات وصيام اليوم ده مستحب جدا وبعد بكرة العيد هيييييييييييييييييييه وفي اجازة من الكلية 10 أيام عشر أيام بحالهم أحمدك يارب :)
العيد ده حبيبي بجد بينقذني من أزماتي المالية بيجي في وقته بصراحه :) مستنية العيدية بجد
ومن هذا البوست الجميل بأدعو كل المدونين انهم يجيبوا بلالين أو بلونات :) الاتنين واحد ونلعب بالبلونات ونعمل زينة في البيت علشان نحس ان في فعلا عيد مش عايزة العيد يبقى أكل وخلاص عايزاه يبقى عيد بجد ويديلنا طاقة سعادة لباقي السنه
وبمناسبة الأكل محدش يبقى رومانسي ويتعلق بالخروف أو بالبقرة أو أي حاجه هتتدبح لأن في سنة من السنين كان عندنا خروف قبل العيد بأسبوعين وكنت بأكله وبلعب معاه وبنجري ورى بعض وبقرأ له الأشعار بتاعة كتاب اللغة العربية برضه وهو كان عالسطح فكنت بقوله شايف القمر يا خروف يعني كانت قصة حب ملتهبه :) امنعوا الضوحك
وعلى فكرة الخروف مكنش بيأكل غير من ايدي ومكنش بيتكلم مع حد غيري برضه مكنش بيرضى يتكلم مع بابا :)
وبابا سماه الخروف البصباص :)
المهم لما جه يوم العيد وشوفت الخروف بيدبح وأكلت منه عييت وأكلت منه مرة واحدة بس وبعد كده مأكلتش منه تاني فبلاش حد يبقى عاتفي أوي كده لأن كده مش صح والخروف أصلا مخلوق علشان يبقى أضحية دي شغلته في الحياه
عايزين نفرح بجد لأن الفرح بقى عزيز أوي في زماننا
ربنا يفرحنا جميعا

الاثنين، 23 نوفمبر، 2009

Bedazzled


Bedazzled
فيلم جميل بجد واتاخد منه فكرة فيلم طير انت
الفيلم فكرته بإختصار ان البطل اللي فوق في الصورة بيبع كيانه "روحه" للشر مقابل ان الشريرة اللي في الصورة برضه :) تحقق له 7 أمنيات المهم حققتله 6 أمنيات بس كل مره كانت بتبوظ له أمنيته هو كان نفسه ان بنوتة بيحبها تحبه المهم في الأخر متمناش أخر أمنيه
واتحررت روحه من الشر مع انه لو كان طلب أخر أمنيه كانت روحه هتفضل في الجحيم طول حياته
المهم لفت انتباهي جمله قالتها الشريرة : الحكاية مش حكاية نعيم وجحيم
النعيم والجحيم احنا اللي بنصنعهم ، النعيم والجحيم احنا الي بنصنعهم
احنا اللي بنصنعهم !

الأحد، 22 نوفمبر، 2009

كلمتين وبس


كل اناء ينضح بما فيه ومن السهل ان تنخدع في حد بعض الوقت لكن مش ممكن حد يخدعك كل الوقت

واللي يعيش بجد ياما يشوف وعلى رأي جاهين بانو بانو على أصلكو بانو

وعجبي !!

الجمعة، 20 نوفمبر، 2009

لا تصالح ومش هصالح

مينفعش اطلاقا مطلقا بالتلاته
مينفعش خالص مالص بالص
مينفعش نيفر نيفر نيفر مش ب بوكيه ورد وكادو هنسى واسامح

ال جاي وجايب كام وردة
فاكر ده يرجع ليالينا
لو كان الورد يجي بفابدة
كانوا كل اتنين زرعو جنينه

مش بإحراج اني اسلم هسلم واقول بالسلام احنا بدينا بالسلام ترا را ردت الدنيا علينا بالسلام ترا را اوكي سلمت بس كان سلام فاتر جدا انا زعلانه من نفسي اوي بس مينفعش مينفعش غير كده فعلا ماما عاملت تنت كويس جدا علشان مهما كان احنا مسلمين وان جالك قليل الأصل بيتك لا تعاتبه ولا تفرط فيه بس انا مكنتش كده كان باين على ملامحي رفض اي صلح كنت سخيفه اوي وزعلانه من نفسي اوي بس لكل فعل رد فعل اول مرة احس اني عايزة ارمي الورد في أقرب زباله ومفتحتش الكادو لغاية دلوقتي ازاي حد بيكرهني من اعماقه وياما أذاني وبيتمنى فشلي وزعلي ودموعي واصالحه بسهولة كده لأ مش ممكن أصالح تنت لسه فاكره تصالح دلوقتي تنت وصلتني لأخر درجات الكره تنت خسارة اني اكتب كلام عنها لأن مجرد ذكر اسمها بيغير مودي وبيخليني مضايقة ان في حد كده في الدنيا لا تصالح افتكرت قصيدة أمل دنقل لا تصالح كلها احلى من بعضها

لا تصالح
أترى حين أفقأ عينيك
ثم أثبت جوهرتين مكانهما
هل ترى؟
هي أشياء لا تشترى .......
هل يصير دمي - بين عينيك- ماء؟
أتنسى ردائي الملطخ بالدماء
تلبس فوق دمائي ثيابا مطرزة بالقصب؟

خير خير انا كنت هرمي الورد في الباسكت الكبيره واكتفيت اني ارميه تحت الكنبه لأني بحب الورد عاااااااااا حتى لو جاي من ناس غريبه -----------------------

---------------------------------

ملحوظة : مقولتش اسم تنت ومش بقول تنت رقة ولا حاجه لا سمح الله ده تقليل من شأن الشخصه اللي بتكلم عنها مش اكتر لأنها للأسف من الكثير التافه اللي انتشروا في مجتمعنا

ملحوظة بره الموضوع مش انا قولت معرفة البنوتات كنوز كلمت مرمر وشيما كونفرنس وغيرولي المود تماما بجد اجمل واطعم واحلى بنوتات هما والحجه كيكي اللي صحتني من احلاها نومه النهارده على فكره شيما شيف هايله قالت لنا على طريقة عمل البطاطا اي حد عايز وصفة البطاطا ياخدها من شيما :)

ربنا يباركلي في صداقتكم يا أحلى بنوتات

الخميس، 19 نوفمبر، 2009

هزيمة الحزن بالإبتسامة :) والتحرر من القيود



مين فينا دمه متحرقش امبارح وزعل واتضايق واتنرفز واتخنق طبعا كلنا أو أغلبنا

امبارح كان عندي طاقة سلبيه كبيرة تكفي بلدين وقولت استغلها والحقيقة لولا ماما ربنا يباركلي فيها ويرضى عليها شجعتني مكنتش عرفت استغلها
عملت اسينمنت كان مطلوب مننا وكنت غواصه في بحر جوجل :) وجمعت معلومات كتير عن الأسينمت والرواية اللي كنت بعمل بحث عنها

سبحان الله بعدها ارتحت اني عملت حاجة كبيرة كانت مطلوبة مني واني مفضلتش حاطة ايدي على خدي ودمي محروق وخلاص

والنهاردة رحت الكلية بعد غياب وقدمت الأسينمت وناقشت الدكتر فيه والدكتر اعجب جدا بطريقة البحث وبالأفكار اللي ناقشتها فيه فحسيت بالفرحة اكتر اني عملت حاجة وليها قيمة وفي نفس الوقت لقت قبول عند مدرس المادة وفي نفس ذات الوقت ان شاء الله هدخل كورس H.R جديد يوم السبت وراجعت شوية مبادئ من مبادئ الH.R النهاردة منها مبدأ الحب غير المشروط لأن أي علاقه مشروطة بين الناس لازم تبوظ ويدخل فيها الشيطان ويبوظها اكتر علشان كده اغلب علاقات الصداقة او الحب أو الزواج بتنتهي نهاية مأساوية علشان حاطين لها شروط مش معنى كده اطلاقا ان حد من الطرفين يجي على كرامته


الاعتذار بيكون بكلمة بعتذر عن كذا لأن كلمة أسف أو أسفة اوsorry بتتقال في الكوارث وحالات الوفاة وكده بس ونفس المعنى ده في اللغتين العربي والانجليش


كمان في الاعتذار لو كنا جروب مثلا بنعمل مشروع معين كلنا مشتركين فيه يبقى مينفعش واحد هو اللي يتحمل ذنب الباقيين ويعتذر عنهم الاعتذار بيكون عن نفسك وبس


كمان في الاعتذار :) الاعتذار بيكون على قدر الخطأ يعني مينفعش حد يهدد حد ويخوفه ويروعه وممكن يضربه كمان وبعدين في الاخر يقوله كركركو كنت بضحك معاك ويعتذر وخلاص لازم يكون الفعل مساوي لرد الفعل يعني لو حد عمل كده واعتذر من غير تصليح اخطائه يتأكد ان عمر عمر عمر ما حد هيسامحه مهما قعد يقول انا بعتذر من هنا للسنين الجايه لأن الاعتذار مش ممكن يرجع ثانيه من الثواني البشعة اللي كانت في الخصام ثواني الحزن والدموع والزعل والاكتئاب والتعب والمرض أحيانا نفسجسمانيا


في رأيي الشخصي المتواضع جدا ان كل اعتذارات الدنيا مش بتساوي ثانيه راحت من العمر ولو حد زعل حد او جرحه قدام الناس لازم برضه يعتذرله قدام نفس الناس


لسه هقول ايه تاني ؟ أيوة دكتر اسلام بيقول عليا اروبة انا اروبة؟ ! يعني ايه اروبة اصلا سألت عن معنى الكلمة دي قالولي ذكية هي بتهيألي كلمة كويسة صح أكيد كويسة يعني

وديت لدكتر اسلام النهاردة البوستات اللي كتبتها عنه مطبوعه من المدونة وزميلاتي قالولي اني ذكية ذكية ذكية فعلا يعني علشان أقول لدكتور عندي في الكلية رأيي فيه بصراحة بس عادي ان شاء الله خير


كمان بجد الحمد لله بحب حياتي أوي الفترة دي بحاول بقدر الإمكان احافظ على روح الطفله اللي بحبها جوايا وكمان طاقتي الايجابيه

ومهما حد حاول يضايقني يحاول من هنا للسنة الجايه ينسى بجد بجد ينسى هفضل متفائلة وفرحانه

واحساس رائع احساس التحرر من القيود حاسة اني كنت ال3 سنين اللي فاتوا في الكلية كنت مقيده وخايفة اسأل واستفسر عن اي حاجة في دراستنا السنة دي بقى مختلفه تماما حاسه اني واثقة ف نفسي ومفيش حاجة خايفه منها ايه يعني لما اسأل واتناقش وافهم انا في سنة رابعه :) بجد لما نتحرر من القيود السلبيه اللي في حياتنا زي الخوف واليأس والاحباط والحزن والعجز وغيرهم كتير لما نتحرر من كل ده حياتنا بتبقى أحلى وأجمل


أخر حاجة احب أقولها في كلمة كاتباها في أول صفحة من كشكول محاضراتي عجباني أوي وبحبها اوي وبتطمنني أوي هي للإمام الشافعي رحمه الله :

( علمت أن رزقي لن يأخذه غيري فأطمن قلبي )


دمتم فرحانين ومطمئنين واوعوا حد ينسى

الأربعاء، 18 نوفمبر، 2009

علشان وقفنا وقفة رجالــــــــة


رسالة جتلي من كيكي بعد الماتش بتاع مصر والجزائر وقلت لازمن ولابندق انشرها عالمدونة

عندما نشعر بالخوف والظلم من الحياه

ونشعر بإنهيار أحلامنا

يجب أن نتحد جميعا ونقف وقفة رجل واحد ونصرخ ونقووووووووووول :



العنــــــــــــــــــب العنـــــــــــــــــــــــب العنـــــــــــــــــــــب

علشان كلوا يحرم يقف وقفة رجالة تاني لو كانوا وقفوا وقفة ستات كانوا كسبوا

ملحوظة : الكلام ده كله هزار وربنا يعدي اليومين الجايين على المصريين على خير

معلش هي الرياضة مكسب وخسارة واللي هيزعل اكتر من كده هيبقى بيضايق نفسه عالفاضي لما كل حاجة تتظبط في بلدنا وميبقاش فاضل الا الرياضة وقتها يبقى نزعل لكن دلوقتي زعلنا مش هيفيد

الاثنين، 16 نوفمبر، 2009

صور لقاء المدونين وغيرها

عندي كذا بوست عايزة اكتبهم في نفس ذات الوقت لكن علشان احساس طفلة رومانسية طلبت مني بوست الصور فكان لازم انشر الصور عالمدونة اي خدعه يا احساس طفلة تصدقي في مدونين قالولي وانا في اللقاء اني احساس طفلة وكنت بقولهم انا رووووووووح رووووووووووح طفلة وشوية وكنت هحضر أرواح :) ان شاء الله المرة الجاية نبقى طفلتين اللقاء روح طفلة واحساس طفلة :) كمان شيما كانت عايزة تشوف الصور اللي صورتها يوم اللقاء هما مش كتير يا شيما هما 4 صور بس وباقي الصور مش صور اللقاء لكن صور متنوعة علشان بحب التصوير :) وكل الصور بعدستي


نيل المنصورة الساحر وقت الغروب على رأي فاتيما لازم اهل المنصورة يبقوا مبدعين علشان عندهم الطبيعة الرائعة دي


دي صورة السفينة تيتانك :) اللي جابها صلاح مسدس صغير وابراهيم كاتب مصري علشان ناخد رحلة في النيل وطبعا ما شاء الله ابراهيم أول واحد ركب في السفينة


دي السفينة من بعيد تقولوش مركب من مراكب الشمس بتاعت الفراعنة :) هي فعلا كان شكلها من أيام الفراعنه بس الوقت اللي قضيناه فيها كان جميل أوي بجد وفي الصورة عالمركب ابراهيم كاتب مصري ونوران بنت خيخة ما شاء الله الاتنين ركبوا بسرعة واللي واقفين على سلم المركب صلاح مسدس صغير كان بيحاول يظبط الخشبة اللي في الصورة علشان نعدي للمركب من عليها :) الحمد لله على ما جيت اطلع للمركب كانوا شالوا الخشبة غريبة الأطوار دي وفاتيما وداليا اخدوا ايدي علشان اركب المركب


ده كوبري للقطارات وطالما للقطارات يبقى بيعدي من فوقه قطارات أكيد يعني :)

لغاية هنا انتهت صور اللقاء لأني كنت مستمتعة بالصحبة وبالطبيعة واليوم كله على بعضه فمكنتش بصور :) طبعا الصورة دي مش انا اللي مصوراها بس في سؤال يطرح نفسه عن الورد فجبت صورة الورد الأغنية اللي شغالة على البلوج دي "بينك وبيني لتامر حسني" بجد بحبها أوي ومشغلاها 24 ساعة بس عندي استفسار صغنون
" زي عود الورد لما الورد يحضن في الجنايني" هو الورد بيحضن الجنايني؟ يمكن

دي صورة الطيارة في أخر رحلة لينا واحنا راجعين من سلطنة عمان واحنا في مطار السيب في سلطنة عمان كل الناس طالعين الطيارة وبيبصولي مين البنوتة الرايقة اللي بتصور دي وبرغم ان كان معايا هاندباج كانت معذباني وكنت كمان شايلة جوجو الدبدوبة أيون الدبدوبة بتاعتي محدش يستغرب مش انا قولت روح طفلة مش عايزة تكبر ولا مقولتش انا :) اشتريتها على اخر لحظة فمكنش في مكان احطها في الشنط ومع ذلك كنت بصور وبعيش أجمل ما في اللحظة زي فودافون :)


دي صورة الطيارة من جوه أكيد يعني :)

دي صورة لمقابر المسيحين عجبني منظر السحاب مع الهدوء والسكينة والوقار في المكان على فكرة الطريق ده توهنا فيه في القاهرة يوم الحادثة ومقابر المسيحين جنب مقابر المسلمين


دي بقى مقابر المسلمين جنب مقابر المسيحين والمكان ده فعلا هاديء جدا وفيه سكينة مش طبيعية وسبحان الله كنا بنصور المكان ده ومكنش في بالنا اطلاقا اننا هنعمل حادثة بعدما نسيب الطريق ده بدقائق وكان ممكن جدا نبقى معاهم :) فعلا صدق مين قال العمر لحظة وربنا بيقدر ويلطف بجد الحمد لله


ختامها مسك ده مسجد وضريح النبي عمران أبو مريم العذراء في صلالة في سلطنة عمان بحب المسجد ده جدا وللأسف مفيش فيه مصلى للنساء مرة رحت مع بابا صلاة الفجر وعلشان مفيش مصلى للنساء قعدت في العربية وأول لما سمعت صوت الإقامة صعب عليا صلاة الجماعة تفوتني فنزلت ووقفت في أخر أخر أخر صف في مصلى الرجال وصليت فعلا وراهم واول لما الامام خلص صلاة رحت جري على العربية وكإني مكونتش بصلي وراهم نياهاهاهاها وقلت لبابا اني صليت وراهم بس بجد الصلاة يوميها عمري ما هنساها كنت فرحانة أوي




طبعا لسه في صور كتير كنت عايزة انشرها بس مش مشكلة ملحوقة علشان البوست ميكونش طويل اكتر من كده :)

دمتم بخير وفي حفظ الله

الأربعاء، 11 نوفمبر، 2009

كلام متبعتر




* بصرف فلوسي في كروت الموبايل والشوكولاتة


- ايه التفاهات دي ؟


* والكتب والكورسات والورد :)


* كل ما بدخل المكتبة ببقى هتجنن وأشوف كتابي وسط الكتب وكل ما بقرأ كتاب وبلاقي فكرة من افكاري في الكتاب بحس اني اتأخرت أوي بس لسه مفاتش الأوان


* غرقانة وسط الكتب والأوراق والحياة متلونة بكل الألوان بتفوت بسرعة أوي ومفيش وقت خالص وكده أرحم بكتير
من ان الوقت يكون بطيء ويقتلني في كل ثانيه
* كل حاجة لما يبقى عندي 21 سنة
طب وليه البطاقة والرخصة قبل ال21 سنة حاجة تضايق بجد شيزوفرينيا
* كده كتير لتالت مرة مش بتردي على اتصالاتي وكل مرة بنفس الأعذار
مليت من الأعذار يا صاحبتي اعتقد دي بداية النهاية ولو استمرت هتبقى فعلا النهاية عالأقل لما نشوف بعض تاني أقدر أقولك وحشتيني
لكن كده بجد صعب فاكرة لما قولتلك مش هسمح لحد يضايقني في حياتي ؟
* شيما مدونتك بتجنني لغاية لما بفتح التعليقات لازم اجي مدونتك 10 مرات لغاية لما اعرف أعلق
تصدقي طلعنا اخوات حتى في الاغنية اللي بنحبها وبنحب ندندنها :) بكتب اسمك يا حبيبي عالحور العتيق بتكتب اسمي يا حبيبي ع رمل الطريق
فيروز فعلا ليها سحر خاص وبتودينا لعالم تاني
ان شاء الله لما نتقابل المرة الجاية هنغني فيروز وهنشرب فيروز كمان نياهاهاهاها :)
* مصر والجزائر وكأس العالم مش فارقة كتير كسبنا أو خسرنا
أكيد هفرح لو كسبنا لكن برضه مش هزعل لو خسرنا

الاثنين، 9 نوفمبر، 2009

تفاصيل يوم الندوة الثقافية مع الاعلامي أ/ سيدعلي في كليتنا



صورة لكليتنا النهاردة طبعا نظيفة وأحلى من أي يوم

طبعا الكلية النهاردة كانت حاجة تانيه خالص جايلنا في الندوة الثقافية الكاتب الصحفي ومقدم برنامج 48 ساعة أ/ سيد علي طبعا انا مش متابعة برنامج 48 ساعة دايما يعني ساعات بشوفه لكن كنت عايزة احضر الندوة علشان اشوف ايه اللي هيحصل فيها

طبعا ملقتش مكان اركن فيه الكتكوتة من الزحمة اللي كانت في شارع الكلية وكمان علشان رحت بدري نسيت الكارنيه والبطاقة واي اثبات شخصية وفوجئت على بوابة الكلية ان أم ابراهيم بتقوللي افتحي شنطتك _ قال أيه بيفتشوها – بس هي بصت فيها لقت الكتب فقالتلي اتفضلي هي وظبابيط الأمن
دخلت الكلية لقيت بلونة كبيرة مكتوب عليها اسم الاعلامي الضيف , رحت المدرج الرئيسي عندنا في الكلية _ مدرج المسرح_ لقيته زحمة ومكاني اللي بقعد فيه فضوه علشان الدكاترة يقعدوا فيه
المفروض اللقاء كان يبدأ الساعة 10 انا رحت الكلية الساعة 10 ونص ومكنش لسه بدأ
فاتت ساعة وبرضه مبدأش والتانية ولسه برضه الضيف مجاش اخيرا بدأوا الندوة الساعة 1 الا خمسة




دي صورة الاعلامي سيد علي وهو داخل المدرج طبعا الصورة مش واضحة أوي


طبعا المدرج اتغيرت معالمه واتفرش سجاد وبقى فيه مراوح والستاير اتقفلت ومكتب الدكاترة اتفرش وحطوا عليه ورد والكلية اتنظفت وكمان شارع الكلية اتنضف وعارفين مين اللي عمل كل ده؟ اتحاد الطلبة وطلاب اعلام هما اللي رتبوا ونظفوا بإيديهم فعلا الكلية كانت حاجة تانيه النهاردة



بدأ الحوار بكلمة الدكتورة جيهان اللي بجد تعبت جدا في الاعداد للندوة دي وعملت مجهود كبير جدا لإنجاح الندوة وبعدين أيات من القرأن الكريم بعدها العميد قال كلمة وبعدها نائب العميد وأخيرا الاعلامي أ_ سيد علي اتكلم وقال كذا حاجة منها ملحوظته ان المدرج كله بنات ومكنش شايف الاولاد فقال ما شاء الله عدد البنات اللي بيتعلموا ومحجبات زاد جدا عن السنين اللي فاتوا بس فين الاولاد فالاولاد قالوله احنا هنا يا عيني كانوا قاعدين في بنشين اتنين وباقي المدرج كله بنات :) اصلا الرجالة ماتوا في الحروب

وبعدين اتكلم في كذا موضوع واخيرا جه وقت الأسئلة وحيث اني مش اعلام انا انجليزي وحيث كمان اني لسه عارفه موضوع الندوة امبارح قبل ما اروح عالبيت على طول وقولتلهم انا معاكو ومقعدش وضبت الكلية معاهم فكان لقسم اعلام الاولوية في الاسئلة وكنت هتجنن لازم أسئل فكتبت سؤالي في ورقه ووديتها مع اتحاد الطلبة لدكتورة جيهان بس للأسف عدد طلبة اعلام اللي سألوا كان كبير بس على مين هسال يعني هسأل وكمان أسئلة كتير من الي كنت عايزة اسألها في طلبة غيري سألوها



المهم خلصت الندوة وقناة المحور عملوا لقاء مع أ/ سيد علي ومع العميد ونائب العميد وبعض الدكاترة وطبعا صوروا الندوة وبالتالي صورونا بس مصوروش معانا وكان في زحمة غير طبيعية من الطلبة
فكان في مصور فوتوغرافي وحد كان من قناة المحور تقريبا فالمصور بيقوله : شوفت يا عم شعبية الاستاذ سيد كبيرة
رد عليه الشخص ده وقال له : يا عم ولا شعبية ولا حاجة دول بس عايزين يتصوروا في التلفزيون
انا اتعصبت وحسيت بالاهانه معنى كلامهم اننا تافهين فقولت للمصور والشخص اللي كان معاه : على فكرة احنا مش عايزين نتصور في التلفزيون ولا حاجة بس في قدامنا شخص ليه قيمة في المجتمع وليه مكانة فعايزين نستفيد بخبرته مش أكتر



وعلى فكرة انا اصلا ميهمنيش تصوير التليفزيون لأني عارفاه كويس لأن بابايا اعلامي وليه اصحاب مخرجين وصورت كذا برنامج للأطفال وغنيت مع الفنانة نادية مصطفى وقالتلي وقتها انتي أصغر كورال شوفته في حياتي
وقررت اني هاروح ومش مهم التصوير اللي قالولنا عليه بإعتبار اننا متميزين وفعلا كنت همشي بس افتكرت اني لسه مسألتش الأسئلة اللي عايزة أسئلها بتاعت المدونين وبالتحديد أسئلة الجميلة داليا قوس قزح وبالرغم من الزحمة وأسئلة عشرات الطالبات قدرت اني أسأل الاعلامي أ/ سيد علي عن التدوين وكانت أسئلتي



انا : إيه راي حضرتك في التدوين ع الانترنت ؟ ده سؤال المدونين عايزين يعرفوا اجابته من حضرتك

أ/ سيد علي : من أعظم الحاجات اللي حصلت العشر سنين اللي فاتوا ومن أروعها

أنا : طب يا فندم في صحفيين في جريدة الأهرام قالوا ان المدونين أولاد الشوارع ؟ ( على فكرة ده حصل ومعنى الكلام اننا مش صحافيين ولا بنكتب حاجة كويسة)

: لأ طبعا دول " سفلة" التدوين شيء رائع

أنا : وفي رأي حضرتك ازاي ممكن نحمي حقوق الملكية الفكرية ع الانترنت ؟

: ده موضوع كبير أوي لازم تكتبي فيه وكلكوا تكتبوا فيه وتفتحوا باب النقاش وتعملوا جروب

الحمد لله عرفت اسأله 3 أسئلة بحالهم والحمد لله برغم انه مكنش عنده متسع من الوقت الا انه جاوبني وكان مهتم جدا

المهم بعدها رحت اوضة العميد وقعدت مع الدكاترة والعميد ونائب العميد ومخرج ومصور ومعدين قناة النيل للتعليم العالي ايون قناة المحور مشيوا مع الاعلامي بتاعهم لكن اللي صوروا بعد كده قناة النيل للتعليم العالي


وكان في تورتة كبييييييرة وتخيلوا كمان قعدت مع الدكاترة على الترابيزة بتاعتهم وأكلت التورتة معاهم ومعرفتش اكمل طبقي كان في دكاترة عايزين يولعوا فيا ازاي طالبة واقعد معاهم في اوضة العميد ومش كده وبس كمان على نفس الكراسي ونفس الترابيزة :)

واللي خنقهم اكتر اني صورت مع قناة النيل للتعليم العالي كنت كل شوية بأجل التصوير وكنت اخر موهبة وانا بغني خير اللهم اجعله خير العميد بصلي بصة رعبتني ف اتلخبطت وغنيت مقطع صغير جدا من بكتب اسمك لفيروز وحسيت اني أخدت كل اللي في القاعة لعالم تاني كلهم كانوا مبهورين ولما مكملتش غنا

المخرج والمصور قالولي ليه كده مكملتيش ليه قولتلهم العميد بصلي أصله عايز يصور :) صورت قبل العميد تخيلوا مكنش عايزني اصور علشان سيادته يصور الاول مع ان في 3 مواهب صوروا قبلي بس برضه صورت قبله نياهاهاهاها صحيح مش كتير بس برضه قبله


المهم بجد كان يوم لذيذ هو مرهق شوية بس لذيذ وانا رايحة البيت وصلت دكتورة جيهان بيتها قريب جدا من بيتنا والكلام معاها ممتع جدا بس كانت عايزاني اركز معاها ومش مهم الطريق :) طبعا انتو عارفين اني مكنتش مركزه مع الطريق معناها ايه بس الحمد لله عدت على خير وكان بجد يوم جميل
ومش ممكن ابدا انسى كتاب ما فعله العيان بالميت لبلال فضل اللي استمتعت بقرائته طول اليوم قبل الندوة
أخيرا كليتنا بقت كلية أخيرا

الأحد، 8 نوفمبر، 2009

خبر عاجل وياريت الجميع يدخلوا بسرعة


بصوا بقى صلوا على النبي كمان زيدوا النبي صلى وكل من ليه نبي يصلي عليه (شكلي في فرح تقريبا)


عرفت النهاردة من كلية الأكاليم اللي انا فيها ان بكرة ان شاء الله ان جايلنا صحفي ومذيع اسمه سيد علي هو تقريبا مقدم برنامج 48 ساعة على المحور وهو كان جاي لقسم اعلام وانا روحت اتحاد الطلبة وسجلت اسمي في الحضور وهتكلم عن المدونين ان شاء الله في أسئلتي

طبعا انا قسم انجليزي يعني مليش علاقة بإعلام غير ان ليا صحبات منهم فأستأذنت الدكتورة اللي مسؤلة عن اللقاء وطلعت عسولة أوي شبه الدكتورة جيهان اللي كانت جايه في فيلم مورجان احمد مورجان

المهم من هنا للصبح الساعة 10 او 11 قولولي ايه الأسئلة اللي تحبوا اني أسألها عن لسانكم ليه
هدخل النت من الموبايل وانا هناك ان شاء الله

احتمال يعملوا انترفيو معايا على اعتبار اني من مواهب الكليه بس الله اعلم ده هيحصل ولا لأ انا متوتورة شوية بس خير ان شاء الله


بالنسبة لتعليقات البوست اللي فات بشكركم فردا فردا وان شاء الله هرد عليكم فردا فردا


ادعولي اصحى بدري أساسا علشان أروح :)

السبت، 7 نوفمبر، 2009

لقاء مش أي لقاء (موضوع للغيظ فقط)

أيون بغيظ كل اللي محضروش وكنت مفتقداهم جدا واللي لازم يكونوا موجودين معانا اللقاء الجاي ان شاء الله

امبارح كان يوم لذيذ بجد مرمر أميرة على كوكب مهجور يا عيني غلبتها على ما صحتني من النوم لأني بطبيعة الحال مش بصحى بدري من النوم وكمان يوم الجمعة يوم الويك اند اللي ما بصدق انام فيه براحتي وخلاص أخيرا صحيت وببدأ في اللبس وهوب الكهربا قطعت وابتديت أقلق وأقول مش هروح اللقاء لكن نزلت مع انتيمتي (مامتي) وقابلت أميرة ومامتها وروحنا الموقف وركبنا من هناك

اتعرفنا اكتر انا وأميرة ودردشنا كتير طول الطريق وبعدين لما وصلنا موقف المنصورة مرمر كلمت صبرني يارب وكان تليفونها غير متاح فكلمت نوران أم شريف السكرة وقالت لنا انهم لسه في مستشفى الأطفال روحنا هناك وانا دخلت بتحفظ (داخله بنك الدم بقى بيني وبينه عداوة) ما شاء الله لقيت العدد كبير وأول حد شوفته كانت صبرني يارب وأول حاجة أقولها ليها كانت فين شيما :) قالتلي اللي لابسة اصفر هناك وكان في بنوتة جنب شيما هي كمان لابسة أصفر :) ف اتلخبطت وبعدين سلمت على شيما وبجد حسيت اني اعرفها من زمان وللأسف مخضتهاش ب بوكيه الورد :) المرة الجاية يا شيما أوعدك اني هخضك بس من غير بوكيه ورد علشانك سبتيه في كوك دور عااااااااااا عااااااااا عااااا
وشوفت خالد همس الأحباب فقولتله انا ليدي ومدونتي روح طفلة مش عايزة تكبر فقال لي بكرة تكبري ان شاء الله :)


وطلعنا من المستشفى وانا مع شيما ودخلنا المسجد سوى سمعنا خطبة الجمعة وبجد كانت جميلة جدااا
وصلينا سوى ياه على الروحانيات الجميلة اللي كنا فيها وطلعنا من المسجد اتجمعنا وروحنا على كوك دور مشيا على الأقدام وبجد طلع مكان كويس قضينا فيه وقت جميل واتغدينا سوى انا وشيما وبنت المنصورة واختها وضحكنا من قلبنا وكمان كنت قاعدة فلقيت نوران بنت خيخة جت سلمت عليا وعلى مامتي من غير ما اعرف انها نوران وانا هموت واتعرف عليها اساسا وسألت عليها وبعد كده عرفت انها هي اللي سلمت عليها بجد بنوتة جدعة وعسولة أوي و مش خيخة ولا أي كلام

بعدها طلعنا على نادي الأطباء في طلخا عالنيل بجد نادي شيك وأجمل ما فيه انه عالنيل وكنا هنقعد قدام النيل بس مش عارفة مين اللي اقترح اننا نقعد في قاعة كان فيها كوشه طبعا محدش قعد عالكوشة نياهاهااهاها سيبنا الكوشة وقعدنا على ترابيزة كبييييييرة يرمح فيها الخيل تلاتين يوم ما يجيب أخرها (طبعا لأن الخيل مربوطة هاهاهاها) واتعرفت بشوية من الموجودين منهم :

فاتيما العسولة والرقيقة وروحها بجد جميلة جدا والحضونة بتاعتها ادمااااان بجد حضنها مش أي حضن اخدت حضن منها مرتين ربنا يرجعلك يوسف يارب وميتحرمش من حضنك :)

ونوران بنت خيخة كنت بحبها من مدونتها ولما اتعرفت بيها امبارح حبيتها أكتر

حلم كان بنوتة لذيذة و شقية ودخلت قلبي بسرعة وحسيت اني اعرفها من زمان


شيما حبي يا حبي مكنتش عايزة يفوت فسوة وانا مش معاها بجد هي فعلا اختي الكابيرة شخصية تتحس اكتر من انها تتوصف بالكلام لأن الكلام مش هيوفيها حقها وعملت امبارح مجهود كبير جدا علشان اللقاء الجميل ده


رحيل وايمان بنوتتين عسولين وحلوين جدا فرحت جدا لما اتعرفت عليهم وصلينا سوى علشان يبقى تعارف وعيش وملح وصلاة كمان :)


بنت المنصورة وأختها بنوتتين زي العسل حسيت اني اعرفهم من زمان وكمان بنت المنصورة طلعت زومل من نفس ذات الكلية :)

ابراهيم كاتب مصري بجد انسان ذوق وجدع جدا وكفاية انه برضه زومل في نفس ذات الكلية

صلاح مسدس صغير المحامي بتاعنا مرح وذوق جدا وهو وابراهيم جابلونا مركب علشان ناخد جولة في النيل

أميرة مرمر بجد انا بحبك جدا ولولا انك شجعتيني مكنتش حضرت اللقاء ده بجد انتي بنوتة جميلة أوي

عاشقة وغلبانه : طلعت مرحه طلعت مرحه هييييييييه كنت كل ما بدخل مدونتها بزعل ويمكن اعيط كمان بس لما شوفتها لقيتها بنوتة زي القمر ومرحة وعسولة

صبرني يارب : عسولة جدا وجميلة جدا ومرحة وكانت عاملة جو جميل ل اللقاء وأول حد شوفته في اللقاء وحسيت بالاطمئنان

افتقدت جدا خالتو ستيتة حبيبتي وكلنا سألنا عليها ونفسي اشوفها في أقرب وقت
وكمان افتقدت ايمان ايمي حبيبتي واحساس طفلة رومانسية يارب اشوفك لما ترجعي من اليابان او اجيلك اليابان
وشباك موارب منار الدكتورة بتاعتنا ويوم جديد عرفت انها اتكلمت في التليفون بس امتى مش عارفه عااااااا كان نفسي اشوفك وبسمة انور سالت عليكي اول لما وصلت وقالولي انك مجيتيش مخمصاكي وشاب فقري برضه عرفت انه مش جاي والانجينير احمد ابو العلا بجد كان يوم جميل وفاتك وكيكي عوووو حبيبتي أي خدمة اتصلت بيكي في اللقاء وانتي متصلتيش بيا في أي لقاء روحتيه شوفتي بقى (وش بيطلع لسانه)
ديدي كان نفسي اشوفك بجد

طبعا الرحلة النيلية كانت روعة واتعرفنا فيها على بعض اكتر وبجد منظر الطبيعة ياخد العقل وفاتكو نص عمركو ياللي محضرتوش اللقاء


وكمان بعد اللقاء اتمشيت مع مامتي على النيل ومفيش ولا تاكسي جاي فاضي كلهم كانوا مليانين لغاية لما اخيرا لقينا تاكسي وتوهنا لغاية لما وصلنا لمكتبة بوكس اند بينز وكل ما اسأل على كتاب يقولولي خلص بس جبت كتابين حلوين

بجد يا مامتي انا بحبك اوي وانتي فعلا انتيمتي واليوم كان جميل بوجودنا سوى


ملحوظة : هجمع كل الصور اللي كنت عايزة انشرها عالمدونة وال3 صور بتوع يوم اللقاء وهنشرهم كلهم في بوست لواحديهم ان شاء الله


الاثنين، 2 نوفمبر، 2009

معجزة صحيت بعد الموت


كان ياما كان يوم الجمعة اللي فاتت كان في بنوتة ومامتها رايحين يزوروا خالة البنوتة وطلعوا ع القاهرة ومن القاهرة راحوا جمهورية المنوفيه وهما في الطريق ضلوا الطريق وطلعوا على طريق تاني خالص غير اللي بيمشوا فيه وكانت نجاة بتكمل الصورة وبتقول في الmp3 طويييييله طويييييييله يا سكة العاشقين تيرا طوييييييلة طويييييييييله على العاشق طويله يا عيني والجو كان جميل والشمس خفيفه وفجأه الجو بقى ممطر مطر خفيف وهما ماشيين في طريق كبير مكون من خمس حارات يعني طريق كبير ويستحمل ان 5 عربيات يمشوا جنب بعضيهم بس القاهريين الله يعمر بيتهم كانوا بيمشوا 7 او 8 او احيانا 9 عربيات جنب بعض وكانوا عاملين زحمة وهرجله كبيره جدا

وفضلت البنوتة ومامتها ماشيين لغاية لما الحمد لله دخلوا في الطريق الصح طريق القناطر المنوفيه _ وهيلا هيلا في القناطر رحلة جميله في القناطر كلنا عيله في القناطر _ دي اغنية كنت بحبها وانا طفله

كانت البنوتة عندها بداية دور برد وكانت صاحية بدري ومنامتش كويس والجو بدأ يمطر على الطريق السريع ما بين القناطر والمنوفيه وكأن المطرة كانت مستنياهم المطرة بدأت خفيفه والبنوتة كانت ماشية بسرعة والطريق كان عامل زي الثعبان كله منحنيات فمامة البنوتة قالت لها هدي السرعة شوية فالبنوتة – وبراءة الأطفال في عينيها – بصت للمراية الصغنونة لمحت وراها 3 عربيات منهم عربية بيجو بيضا ظهرت فجأه
وداست البنوتة على الفرامل بكل قوه علشان تهدي السرعه ووقتها فقدت السيطرة على الكتكوتة

الكتكوتة راحت منها يمييييييين بكل قوووووووه يعني كان ممكن تخبط في العربيات اللي وراها او جنبها ففكرت ان الفرامل فيها مشكله فضغطت أكتر على الفرامل مرة تانيه فالكتكوتة راحت منها شماااااال ناحية السدود الأسمنتيه اللي بتبقى بين الطريقين وفجأه البنوتة حست انها مش شايفه أي حاجه ومش قادرة تسيطر على الكتكوتة ومش قادرة تسمع كلام مامتها بوضوح في الوقت ده الكتكوتة خبطت في السدود الأسمنتيه 3 مرات والكتكوتة لفت منها وبقت في الاتجاه المعاكس ووقفت بعد طبعا ما اتخبطت من كل النواحي في الوقت ده كان صاحب العربية البيجو البيضا وقف عربيته ونزل وقف الطريق للبنوتة ومامتها لأن ده طريق سريع والحادثة حصلت في منحنى يعني العربيات اللي جايين مندفعين عمرهم ما هيشوفوا الكتكوتة ولازم يخبطوا فيها ولو كان ده حصل كانت الكتكوتة والبنوتة ومامتها بقو كفته كل ده والمطر بقى ينزل بغزارة كبيرة جدا وحجب الرؤية شويه

نزلت البنوتة ومامتها وهما الاتنين كان الفاصل بينهم وبين الموت ثواني وشافوا الخبطات بتاعت الكتكوتة وكانوا متوقعين انها بقت كفته من قدام من شدة الخبطات لكن الحمد لله اللي حصل خبطات خفيفه بالنسبه للحادثه وخدوش في دهان الكتكوتة والبنوتة اعصابها باظت فمامتها أصرت انها تكمل سواقة الكتكوتة وكمان مامة البنوتة كانت اعصابها بايظة بس حاولت تكمل سواقه كل ده وصاحب العربيه البيجو موقف الطريق للبنوته ومامتها وواقف تحت المطر والبنوتة ومامتها مكانوش شايفينه وبعد الحادثة وقفت عربيات كتير علشان تساعد البنوتة ومامتها بس اللي فعلا ساعدهم الشخص صاحب العربيه البيجو واللي المطرة بهدلته وهو موقف الطريق واللي قال للبنوتة ان سبب الحادثه انها ضغطت على الفرامل والمطرة لسه خفيفة والأرض في الوقت ده بتبقى عامله زي الصابون مزحلقه فمينفعش الضغط على الفرامل وقتها

الشخص ده انتظر لغاية لما البنوتة ومامتها ركبوا الكتكوتة ومشيوا وهو ركب عربيته ومشي بس مظهرش في مراية الكتكوتة ولا ظهرت عربيته في الطريق تاني علما بإن مفيش طريق متفرع من الطريق السريع يعني من المستحيل انه يكون دخل شارع جانبي – عارفه ان في ناس ممكن متصدقش الكلام ده بس هو ده اللي حصل –

والبنوتة كانت حاسه ان في ملائكه حواليها اول لما خبطت في السدود الاسمنتيه حست ان في ملائكه بتحميهم ده كان احساس قوي مسيطر عليها وكان نازل عليها سكينه غير عاديه

ملحوظة : البنوتة ومامتها هما انا ومامتي وقلت انشر موضوع الحادثة لأسباب كتير منها

اولا : اني اترعبت على كل المدونين والغير مدونين اللي بيتعاملوا مع العربيات وكان جاي على بالي قبل الحادثه على طول ديدي ربنا يحميها ويسلم طريقها يارب
ف خالتو ستيتة والانجينير احمد ابو العلا ومرمر على كوكب مليان ناس :)
وديدي وappy ومستر هاني زينهم ربنا يسلم طريقكم ويحميكم ومحدش يفرمل والجو فيه مطرة

ثانيا : الحمد لله فعلا حسيت بمعنى العناية الالهيه في الوقت ده
بجد ربنا سبحانه وتعالى جميل اوي

ثالثا : في عربيه نقل اتقلبت واحنا جايين في طريق المنصورة دمياط معنى كده ان الحوادث ف المطر منتشرة جدا فكان لازم اكتب عنها

رابعا : شباب كتير بيبقى نفسهم يموتوا مع أي مشكله بيواجهوها ومفيش عندهم امل في الحياه
لو اتعرضوا لحادثة زي دي وكانوا أقرب للموت من الحياه هيفهموا ان الحياه غاليه اوي وان العمر لحظة
عن نفسي حاسه اني اتولدت من جديد وشايفه الحياه بنظرة جديده

خامسا : أميرة على كوكب مهجور اول صديقة تعرف عن الحادثة ومن وقتها بتكلمني الصبح وبالليل واحيانا بعد الغدى :)
علشان تطمن عليا انا ومامتي ربنا يكرمك يا مرمر يارب وبجد انتي انسانة جميله جدا وكلمة شكرا قليلة أوي عليكي
كيكي قلب الام اللي معايا بقلبها في كل الحوادث اللي بعملها ربنا يكرمك ويباركلي فيكي
بجد ربنا يخليكوا ليا