الدنيا سما واحدة

الوجه الأخر من القصة بقلم ومهارة The illusionist

 من هنا

لأ مستحيل .................. مش معقول !!!!

لأ أدري لما طال الطريق هكذا وفي برودة الجو شعرت بحرارة الخوف والقلق تتسلل لكل خلية من خلاياي

اللهم أجعلني سبب في انقاذ المصابين في الحادث ، الغيوم ممتلئة عن أخرها يبدو أنها ستمطر قريبا

أزحت أكوام البشر المتجمعين في دائرة حول المصاب ولم أصدق عيناي من الصدمة إنها دعاء صديقتي حامل في شهورها الأخيرة وممدة على الأرض تنزف وحولها بعض النساء لا يعرفن ما يفعلن لكي يسعفنها !!

يختلف شعورك كطبيب حينما تعالج أشخصا لا تعرفهم وحينما تعالج المقربين منك وكأنك تعالج نفسك

فلا يوجد طبيب يستطيع أن يعالج نفسه !! ويزيد الوضع سوء حينما تعالج الغرباء  في حين أن أحبائك بعيد عنك ولا تستطيع علاجهم أو أن يتألم أقرب الناس اليك ولا تعلم كيف تعالجهم .

   دعاء يا حبيبتي الحمد لله على السلامة انتي هتبقي كويسة أنا معاكي متخافيش والإسعاف جاي دلوقتي

تحبي أتصل بماما أو بعادل؟ أشارت لي دعاء : أن لا أحدثهم  .. هذه هي دعاء صاحبة الشخصية القوية تعتمد على نفسها دائما ولا تحب أن تقلق أقرب الناس إليها أو تجعلهم يتعاطفون معها ...

مرت الدقائق بطيئة ، حزينة وكئيبة

بالكاد وصلت سيارة الإسعاف وصلت بعد أن ابتهلت الى الله أن ينقذ دعاء صديقتي وأخت أغلى الناس

وصلت سيارة الإسعاف بعد أن كاد قلبي يتوقف من تسارع دقاته لماذا دائما في بلادنا تتأخر سيارات الإسعاف وتتأخر سيارات الإطفاء وتتأخر سيارات الشرطة ويتأخر كل شيء ونقول في أمثالنا كل تأخيرة وفيها خيرة

أبدا التأخير هنا لا خير فيه فكل ثانية تأخير يمكن أن تقضي على حياة من نحب .

عرفت دعاء في" الثانوية العامية"  زي ما كنا بنسميها  :)مكنتش في مدرستي لكن اتقابلنا في درس الكيمياء وكانت موهوبة جدا وشطورة جدا وكنا بنتنافس أنا وهي جدا في الحصول على لقب ^ الأولى^ ودائما كنا بنبقى الأولى والأولى مكرر :)

أنا جبت مجموع "طب" كلية القمة وسيدة الكليات الأولى :) وطبعا رغباتي كلها كانت كلية طب والقصر العيني تحديدا

يوم لما كنت بكتب الرغبات كنت عايزة أكتب طب القاهرة بس وأمشي مكنتش متخيلة اني ادخل جامعة تانيه غير جامعة القاهرة أو كلية طب تانيه غير طب القصر العيني ، أما دعاء برغم مجموعها الكبير فقررت انها تدرس التصميم عموما وبالتحديد الديكور والأزياء وقدمت في منح كتير لأوروبا وفازت بمنحة في باريس عاصمة النور

كانت فرحانة بيها جدا وبرغم معارضة كل اللي يعرفوها الا اني كنت بشجعها أنا وعائلتها انها تدرس اللي بتحبه

حتى لو هتسافر وتتغرب لكن كنا واثقين في قدراتها على النجاح والتأقلم في أي مجتمع ...

دعاء كانت دائما مبدعة وأنيقة من أيام ثانوي ومش غريب إني أشوفها سايقة عربيتها لواحدها وهي في أخر شهور الحمل لأنها بتتحمل ومستقلة مش بعيد انها كانت بتتألم وضغطت على نفسها وبرضه خرجت من البيت

وصلنا القصر العيني بعد أن مررنا بزحمة المرور غير الطبيعية كانت الحركة فيه غير طبيعيه لم أفهمها ولكن كل الأطباء كانوا مشغولين كالعادة ولكن اليوم كانت الإيقاع سريع أكتر ويظهر الإهتمام على التمريض وهذا من عجائب الدنيا السبع أن تهتم الممرضات بالمرضى كأن تشرق الشمس في منتصف الليل مثلا أو أن يصبح السراب شيئا مفيد ولكن لا ألوم على الممرضات فهم في الأول وفي الأخر بشر ولهم طاقة ولا يوجد مقابل مجزي لكي يتحملوا تعب المرضى الا اذا كانت عينهم على الحسنات  والثواب في الدار الأخره وقليل من يفكرون في ذلك هذه الأيام .

من حسن حظي انه يبدو أن مي غادرت المستشفى وإلا كانت هتنكد عليا والموضوع مش ناقص أنا اصلا متنكده علشان دعاء اللي أسعفتها إسعافات اوليه والجميع منشغلون ومنهمكون في العمل حتى أن طبيبة النساء والتوليد اعطتني بعض الإرشادات لكي أفعلها لأنها مشغولة بحالات أخرى لدرجة أنه ليس لديها وقت لترى دعاء وأصبحت مسؤلية دعاء في عنقي يا إلهي أثقلت كاهلي صديقتي تتألم ومن الممكن أن تصاب بمضاعفات وليس بيدي شيء ولا يوجد عندي المهارة الكافيه لإنقاذها فأنا مازلت امتياز ولم أصادف حاله مثل حالة دعاء من قبل .

مرت الدقائق بطيئة , كئيبة ومخيفة وأنا لا أتحرك من أمام سرير دعاء وأشكر الله أنني وجدت لها سرير في هذا الزحام والصخب الذي يملأ المستشفى ففي العادة الكثير من المرضى يأتون ويرحلون بدون أن يجدوا مكانا لهم

ولكن ماذا أفعل أنا احاول أن أجد مكانا لي لكي أعالجهم وأكون في عونهم . دقت الساعة الثانية عشر

ذكرتني الدقات بقصة سندريلا ، لم أدرك أن قصص الصغار واقعية فنحن نلتفت دائما للنهايات السعيدة ونغض الطرف عن معاناة أبطال القصص في سبيل رؤيتنا للنهايات الجميلة المبهجة التي عادة تكون "وعاشوا في تبات ونبات وخلفوا صبيان وبنات ودخلوهم مدارس لغات "

سمعت طرقات بالباب ذهب صوت الطرقات بأفكاري ، كانت طبيبة النساء دكتورة سامية  عبد العظيم . دخلت دكتورة سامية لتطمئن على دعاء وتفاجئت انني موجودة قالت : دكتورة أمل انتي لسه هنا؟

قلت : أيوة يا دكتورة سامية دي دعاء صديقة عمري

قالت : ان شاء الله هتكون بخير اطمني عليها . اتصلتي بحد من أهلها

وكأنني تذكرت : نسيت خالص أتصل بحد أهم حاجة هي دلوقتي

قالت : بس برضه اكيد أهلها قلقانين عليها

في تلك اللحظات رن هاتفي الجوال : والدتي اسمها على موبايلي حبيبة حياتي كما أسمتها جدتي رحمها الله وكما أشعر نحوها فوالدتي اسمها حبيبة . اخذت هاتفي الموبايل وخرجت من الغرفة

قالت لي : انتي فين يا أمل من الصبح متصلتيش بيا ولا طمنتيني عليكي وموبايلك كان مقفول

اجبتها : أنا كنت .. أنا دلوقتي .. وسادت فترة قصيرة من الصمت اختنقت فيها بالبكاء وخرجت بره المستشفى لأستنشق بعض هواء الليل خالي الهموم . دعاء هنا في المستشفى يا ماما دعاء عملت حادثة وهي دلوقتي بين الحياه والموت

قالت : لا حول ولا قوة الا بالله بعد الشر عليها إيه اللي حصل

قلت : لقيتها النهاردة عامله حادثه مع عربيه تانيه على الطريق بالصدفة

قالت : وهي عامله ايه دلوقتي؟

قلت : نايمة مش حاسه بالدنيا ودكتورة سامية بتكشف عليها دلوقتي .

قالت : وقولتلي لطنط رشا ولا لسه؟

قلت : مش عارفه اكلم مامتها ولا عادل يا ماما خايفه عارفه اني المفروض اتصل بيهم وأطمنهم بس كده هقلقهم أكتر .

قالت : أنا هكلم طنط رشا وأقولها وهجيبها وأجي

قلت : ربنا يخليكي ليا يا ماما لأني مش هعرف اكلمها ومش هرجع البيت الا لما دعاء تبقى كويسة

قالت : خدي بالك من نفسك يا حبيبتي

قلت : وانتي كمان خدي بالك من نفسك يا حبيبتي

انتهت المكالمة وجريت على غرفة دعاء وجدت حاله من القلق والتوتر تسود الغرفة ودكتورة ساميه قالت لي في خطورة على الجنين ، لازم ندخلها أوضة العمليات دلوقتي حالا

وبالفعل بدأنا نجهز دعاء لغرفة العمليات كل ذلك وأنأ أحاول أن أتمالك نفسي من الإنفعال صديقة عمري في حالة خطيرة وهي بين يدي الله الأن هو الوحيد الذي يستطيع انقاذها .

 أوشكنا على دخول غرفة العمليات فقالت دكتورة سامية لازم حد يوقع على إقرار لأن حالتها خطيرة وممكن نضحي بالجنين فقلت : زوج دعاء مسافر حاليا ومامتها وأخوها جايين

د. سامية : لازم تدخل أوضة العمليات دلوقتي حالا وإلا هتموت هي والجنين النبض بيقل وحالتها الصحية مش مستحملة تأجيل .

قلت : بس ده أول طفل لدعاء مش قادرة اوقع على الإقرار

د.سامية : أحيانا لازم نضحي بحاجات غالية في سبيل حاجات أغلى لازم توقعي وتنقذي حياة صاحبتك

Random (way to Egypt

في البداية بعتذر عن تأخير الجزء الجديد من القصة مع ان illusionist كتب الجزء الجديد رائع جداااااااااا بس لسه منشروش :) بعتذر مرة تانيه هخلص من الامتحان ان شاء الله وهنشر الجزء الجديد

* الshopping مع الأصدقاء متعة ومع الأهل ...... بس عالأقل أحسن من الshopping لوحدك !! وأكيد السفر نفس الموضوع مع اني مجربتش السفر مع الأصدقاء ولا مرة حتى أيام الجامعة !!!!!!!!

* بحب أوي اللحظة اللي الطيارة بتجري وبتسيب فيها الأرض وبتطلع لفوق وتطير بحس ان حياتنا كلها كده ودي رحلة البحث عن النجاح والسعادة بنبدأ نستعد للرحلة وبعدين نمشي شوية بشوية "على أدنا" وبعدين نجري ونبقى مش ملاحقين من المشاغل والمشاكل كمان

وفجأه نلاقي نفسنا طرنا وحققنا أحلامنا "وده للي يصبر" ويهزم الإستسلام ...

* طيارتنا اتأخرت ساعتين يعني بداية الرحلة لوز لوز لووووووووووز - لعله خير-

* لاب توبي البطارية بتاعته في الضياع وملحقتش اشتري بطارية تانيه وانا دلوقتي في المطار واللاب كان هيفصل فلقيت جنبي فيشة ووصلت اللاب بالشاحن " حركة حلوة في وسط الخنقة"

* والنبي حد يجاوبني امتى أهلنا هيعترفوا اننا كبرنا ويعاملونا على الأساس ده؟ يعني القانون ادالنا حقوقنا في التعامل الرسمي من بطاقة ورخصة قيادة وسفر من غير مرافق ومن غير استئذان من حد كمان الا ضميرنا وأخلاقنا وأهلنا مش واخدين بالهم

* بابا على فكرة الخوف اللي ملوش مبرر ده يخنق

* شعور حلو أوي لما بقول إني في دراسات عليا وكلها كام سنة ان شاء الله وهبقى مترجمة :) مهما المحبطين حاولوا يوقفوني أو يخوفوني برضه هتمسك بأحلامي ومش هقول موتوا بغيظكم هههههههههههههههه

* مش عايزة اتكلم في السوياسة علشان بتتملكني رغبة مكبوتة اني أشتم وناس كتير هتزعل مني بس بجد اللي بيحصل في مصر لا يرضي عدو ولا حبيب

* علشان محدش ضامن عمره ولسه قدامي طيران وطريق سريع ومغامرات كده :) أنا مستحيل أدي صوتي لعمرو موسى أو شفيق أو طبعا عمر سليمان ومعاهم بالمرة أبو سماعين وشاطر شاطر أبو سماعين ده حكايته حكاية مع احترامي لكل مريديه ومحبيه في حد في الدنيا ميعرفش جنسية الحاجة والدته؟ لو ميعرفش يبقى عقوق ولو يعرف ومخبي يبقى كذب والأتنين أسوأ من بعض

* برضه اتكلمت في السياسة !!!

* الله يرحمك يا أ. عبد الوهاب مطاوع كان نفسي أقابلك في حياتك أنت بتعبر عن أرائي بطريقة راقية ونبيلة

* د. ابراهيم الفقي الله يرحمك مش متخيلة مصر من غيرك

* إيناس يا حبيبتي خلصي قراءة كل الكتب اللي عندك وبعدين أشتري جديد " نصيحة لنفسي"

* الله يوفقك ، الله يعطيكي العافية لسه اللهجة الأردنية الفلسطينية بترن في وداني

* بكره أوي الناس اللي وقت السفر عموما بتفضل تتنحنح وتسبل مش عارفة بيستفيدوا من كده إيه؟

* سمعت شوية إنجليش حلوين من native speaker كان بيتكلم في التليفون دي من احدى فوائد السفر برضه :)

* السيطرة على الأعصاب حلوة والهدوء وقت الإنفعال صعب بس مفيد

* بحب أغنية somebody's me لإنريكي مع إنها أغنية كئيبـــــــــــــة -فعلا للناس فيما تعشق مذاهب-

* الماليزيين بجد فخر للمسلمين في التنظيم والتدين والرقي وكل حاجة عدى من قدامي جروب ماليزي من شوية والله شكلهم يفرح وتفتخر انهم مسلمين

* النت ده اختراع بجد :) مش عارفة كنت هقضي كل وقت تأخير الطيارة ده ازاي من غيره :) أكيد يا كان هيبقى ف ايدي كتاب أو برغي مع إحدى صديقاتي أو بتناقش مع مامتي

* عندي امتحان يوم السبت لولولولولولي زغرتي يا اللي منتيش غرمانة

* أيون أنا المجنونة الطموحة المتفائلة واللي بتحب بلدها ونازلة لبلدها في انتخابات الرئاسة ومش خايفة حد عنده اعتراض؟

صوت الذكريات

الوجه الأخر من القصة بقلم ومهارة

illusionist

من هنا

أمال : أبلة !!! قلت في نفسي يلا أبلة أبلة يا خسارة 6 سنين دراسة طب والسنة الامتياز اللي لسه مش عايزة تخلص ولسه مشوار الدبلومة والماجيستير ويحيينا ربنا لو أخدت دكتوراه وزمالة ....كده هبقى راهبة العلم

لحسن حظي انشغل سائق التاكسي بالحديث في اختراع القرن الحالي ولعنته أيضا "الموبايل"

سرحت مع الموسيقى الهادئة الرقيقة فعالمنا الصاخب سريع الإيقاع يحتاج إلى بعض الهدوء والسكينة

أستمع الأن الى سيمفونية شهرزاد رائعة هي مازلت أعشقها منذ طفولتي والى اليوم وكنت اظنها موسيقى عربية ولكن أكتشفت انها موسيقى روسية لريمسكي كورساكوف كل هذه الروعة أتت من البلاد الباردة من عمق الجليد لتوقظ شيئا خفيا في مشاعري لا أعلم ما هو كلما أستمع لهذه السيمفونية أتذكر ذكاء شهرزاد وفطنتها لقد تخطت حاجز الخوف من إنسان "المفروض" أن يكون أحب حبيب لديها وأجبرته على إحترام حياتها و واستطاعت أن تشعل الجو بالقصص والتشويق برغم أن داخلها خوف من أن يكون مصيرها كمصير باقي زوجات شهريار .... بعدها استمعت لموسيقى الرائع عمر خيرت موسيقى عمر خيرت لها مذاق خاص تجعلك تعيش جو تاني ومعزوفات المبدع مروان أنور وبحيرة البجع وYanni

أضاء موبايلي نظرت فوجدت رسالة من سارة :

واحد دكتور جايب لخطيبته ورده و بيقول لها : شايفه الورده دي ؟ فقالت له : أيوه .. فبعد الورده شوية و قال لها : طب و كده ؟ :)) مساء الفل

رديت على الرسالة : يا هناها يا هناها اللي تتجوز دكتور عيون :) وحشاني يا ساسو

ردت سارة : مش أكتر مني ، انتي في القصر طبعا دلوقتي يا إمتياز :)

http://www.youtube.com/watch?v=yhNRYhFkPko

رديت : في طريقي يا ساسو أنا إمتياز ومش هجيب جاز :D مش كنت اشتغلت عيانة بعد الضهر أحسن؟!

سارة :ومين يعالجنا يا دكتورتنا ؟ توصلي بالسلامة سلميلي على قصر الأطباء بدكاترته وعيانينه وحقنه وأدويته :)

: من عينيا يا سارة قلبي

انا دلوقتي فعليا دكتورة خلصت البكالريوس والمحاضرات والسكاشن والروندات وبدأت في مرحلة جديدة

في ناس بتفتكر أن الإمتياز فترة راحة من المذاكرة وتعب البكالريوس وقبلها الثانوية العامة لكن بالنسبة لي سنة الإمتياز دي مرحلة التعليم الذاتي خلاص مبقاش التعليم سهل زي أيام البكالريوس ولازم أعلم نفسي بنفسي علشان أبقى دكتورة تستحق الأمانة الضخمة دي واللقب الغالي ده

يقول مصطفى صادق الرافعي : إذا لم تزد شيئا على الدنيا كنت أنت زائدا عليها

وأنا ناوية أسيب بصمتي في الدنيا وأبقى ماهرة في شغلي وربنا يقدرني برغم كل المصاعب اللي بتقابل طبيب الإمتياز انه لسه خريج جدا ولا هو طالب واخد وضعه في الكلية ولا نايب واخد وضعه في المستشفى .

دائما سنوات الكلية بتبقى كإننا بنبني مبنى في الأول أيام الكلية بنبدأ نحفر في الأرض ونحط الأساس وبعد التخرج بنبدأ نعرف إزاي نبني على الأساس اللي حفرناه وجهزناه علشان يبقى أحسن مبنى علشان كده في أي مكان بنروحه بعد التخرج من أي كلية بيشترطوا الخبرة لأن التعليم الذاتي والتجارب الحياتية مهمة جدا زي الدراسة الجامعية ويمكن اكتر وعلشان كده في ناس كتير ناجحين مكملوش دراستهم لكن عرفوا ازاي ينموا قدراتهم ويعلموا نفسهم ومروا بتجارب حياتيه كتير خلتهم أثرياء من الناحية المعرفية .

أتذكر جيدا متى قررت أن أصبح طبيبة تعلو وجهي ابتسامة مشرقة كالتي تبدو على ملامحي الأن حينما أتذكر

كنت أجمع الأطفال وأرتدي بالطو وردي يشبه البالطو الأبيض للأطباء وأعمل فيها دكتورة وأكشف عليهم

حتى في مرة وصفت الدواء لطفل وكان الدواء حقنة وبالتأكيد من سيعطيها له لكي يشفى؟ بالطبع أنا القلب الرحيم :D بحثت كثيرا في منزلنا عن إبرة (حقنة) كي أعطيها للصغير الذي لم يتجاوز العام إلى أن وجدتها وملئتها بالماء وأخبرت الأطفال الأخرين أن يجهزوا الطفل المريض للحقنة ويمسكوه جيدا :) يا عيني عليه وماذا أفعل وقد كان البيبي مكلبظ وزي القمر وعايزاه يخف؟ واستجاب الأطفال لأوامري بحماس وملئتهم رغبة شريرة بأن يروا غيرهم يأخذ حقنة أخيرا :)

أغلقنا باب غرفتي وحضرت الحقنة وأمسك الأطفال بالطفل وخلاص كنت سأعطيه الحقنة ..... ولكن كتب الله له عمر جديد فقد دخلت والدتي غرفتنا فجأه وقالت لي : قفلتوا الباب ليه؟ بتعملوا ايه؟

أجبتها : البيبي عيان بكشف عليه وهديله حقنة علشان يخف

لم تعاقبني والدتي ولكن أخذت مني الحقنة وأرسلت الطفل لوالديه قبل أن أرسله أنا ليصبح طفل في العالم الأخر

بعدها تكلمت معي بهدوء وقالت لي : يا حبيبتي علشان تبقي دكتورة لازم تدخلي كلية الطب علشان تقدري تكشفي على الناس وتساعديهم وتخففي الامهم

أمال : وأدخل الطب دي إزاي يا ماما؟

والدتي : تدخلي المدرسة وتبقي شطورة ومتفوقة وتطلعي الأولى وبعدها تدخلي كلية الطب وتبقي دكتورة

وكانت أمي تغني لي دائما : حبيبتي بكرة تكبر وتروح المدرسة ويقولوا بنت شاطرة ونمرها كويسة

وأقول دي بكرة تكبر وهتبقى مهندسة فأرد عليها سريعا بحماس : دكتورة يا ماما هطلع دكتورة

وقد كان ! كنت متفوقة في جميع أعوامي الدراسية وكنت دائما الأولى ولا أرضى بأقل من ذلك وكان الجميع يناديني بالدكتورة أمل – اختصارا لإسمي- وحتى في هدايا عيد ميلادي كان الأهل يكتبون لي في كروت المعايدة الدكتورة أمل

ضحيت بالعديد من الأشياء في طفولتي وأيام شبابي لكي اكون الأولى دائما وتعلمت مبكرا جدا أن لكل شيء ثمن ولابد من دفعه وليس الثمن دائما مادي فقد يكون معنوي كالحرمان من نزهة جميلة مع الأسرة أحرم منها بسبب المذاكرة او اللعب مع من في سني لفترات طويلة أو حفلة لمطرب تأتي مع امتحاناتي ويحضرها جميع صديقاتي ما عدا أنا أو حتى حضور فرح من أفراح أصدقائنا أو عائلتنا .

أيام قضيتها في الإنعزال في غرفتي كالسلحفاة أتقوقع داخل غرفتي لأيام لأذاكر وتمر أوقاتي بين الكتب

أعتزل العالم بما للعزلة من وحدة وقسوة وحرمان من الصحبة والونس فصاحبت الكتب وتونست بالعلم وصرت كالراهبة ينير طريقي العلم ويواسيني الإيمان بالله لأنن أشعر بقربي الدائم منه حتى لو حدث ما يحزنني أو يبكيني ربي معي .

انتبهت ان التاكسي واقف منذ فترة ولا يتحرك في زحمة من السيارات والطريق مغلق تماما

فسألت سائق التاكسي : هو الطريق واقف كده ليه؟

: شكلها حادثة كبيرة

نظرت من نافذة التاكسي وعلى امتداد البصر وجدت سيارة وشاحنة من الزحمة لم أرى معالمها ولكن شي ما دفعني للنزول من التاكسي ربما أساعد وانقذ المصابين

أنا هنزل هنا . دفعت حساب التاكسي وركضت بإتجاه الحادث تتسارع دقات قلبي كمقطوعة كسارة البندق كلما اقترب ولا أعلم السبب وأخترقت الزحام وحينما أقتربت قليلا لم أصدق ما أرى

لأ مستحيل .................. مش معقول !!!!

لازال شيء ما

الوجه الأخر من القصة برؤية illusionist

-- اسمك ايه؟

- أنا؟

-- أيوة في حد غيرك هنا؟

- باسم

ايه اللي أنا قولته ده وسألته عن اسمه ليه أصلا

خلاص يا ضميري حقك عليا مش هعمل كده تاني عارفة انك مش هتسيبني النهاردة وهتفضل تأنبني طول اليوم

أكملت الإستماع لقائمة الأغنيات التي اخترتها بعناية لدرجة انني سرحت معها ودندنت

"بكرة بيخلص ها الكابوس وبدل الشمس بتضوي شموس وعلى أرض الوطن المحروس راح نتلاقى يوما ما "

سألني باسم فيروز دى اللى بتسمعيها ؟

نظرت إليه فجأه برغم اندماجي مع روعة صوت جوليا ومع الكلمات الوردية للأغنية

وبالكاد سمعت سؤاله

كنت أرغب في عدم الرد ولكنني جاوبته بإقتضاب لأ , جوليا بطرس

أومأ برأسه وتغيرت ملامحه قليلا برغم الجدية الشديدة التي تبدو عليه

يبدو أنه لام نفسه على سؤاله ...

أتى الجرسون ومعه شوربة الكريما مفضلتي والطبق الرئيسي دجاج على طريقتي المفضلة لن تجد مثل هذا الطعم في أي مكان أخر في العالم ولا المنظر الرائع ولا الاجواء الدافئة الا في مطعم الوردة البيضاء

دار حوار بين المتطفل على طاولتي "باسم" وبين الجارسون لم أسمع ماذا قالوا لأن رائحة الطعام وطعمه أخذتني لمكان بعيد لعالم أخر مواز غير العالم المادي الحالي . أنهيت طعامي وأتى الجارسون يحمل القهوة كانت رائحتها فواحة وعبقها يملأ المكان ...

-- الحساب لو سمحت

- ثواني _ كان الجرسون منهمك بالكتابة وبطلبات الأخرين –

( لم يهتم الجارسون بطلبي وهذه هي طبيعة الحال في خدمة العملاء في بلادنا عدم الاهتمام لو راح زبون هيجي بداله 100 نادرا لما تلاقي مكان متكامل)

قمت من مكاني لكي أغسل يدي وفتحت موبايلي ربما يكون حدث شيء مهم انها روح الطبيب دائما قلق ويفكر في الأخرين وفي تلك اللحظة رن هاتفي وجدت اتصال من صديقتي بسمه

بسمه : الو يا أموله

أمال : أيوة يا بسبوستي

بسمه : فينك النهاردة المستشفى قالبين عليكي الدنيا

أمال : ليه خير؟

بسمه : اتصلوا بيكي كذا مرة موبالك مقفول واتصلوا ع البيت ومي اتصلت بيا

أمال : طالما فيها مي يبقى ربنا يستر

بسمة : وخصوصا انتي عارفاها بتحبك أد ايه !!

أمال : بتحبني جدا جدا موت يعني . انتي كده قلقتيني جدا

بسمة : اجري عالمستشفى أكيد في حاجة مهمة

أمال : طيب هكلمك بعدين .. سلام

بسمه : سلام

عدت الى طاولتي وطلبت الحساب مرة أخرى فقال لي الجارسون : فين الحساب؟

الجارسون : خلاص وديته وأخدت الحساب

أمال : ازاي مين اللي دفع؟ !!!!

الأستاذ دفع حسابك نظرت بتعجب للجارسون

وسألته الأستاذ مين؟ قال لي اللي كان معاكي

قلت له : انا مش معايا حد وأخذت الفاتورة من يده وأخرجت النقود من محفظتي وبحثت بعيني في المكان لأرى أين هو الأستاذ المحترم الذي دفع حسابي !! وجدته يتحدث في الموبايل

قلت له بنبرة حادة : انت دفعت حسابي ليه؟

أشار بيده مفيش مشكلة مما زاد من غضبي وأردت حينها أن أكسر الموبايل على رأسه ولكنني تماسكت فلم يكن عندي وقت لهذا ولم أشأ أن أفسد يومي أكثر من ذلك ف مي ستفسده بالتأكيد بعد قليل

تركت له النقود بسرعة في مكانه على الطاولة ووضعت فوقها مفاتيح سيارته ومشيت مسرعة من المطعم

أخذت أول تاكسي : قصر العيني لو سمحت

سائق التاكسي : ماشي يا أبلة

أمال : أبلة !!!

.... يتبع

أن تكون طالب ترجمة

ده موضوع كتبته من حوالي شهر وبنشره دلوقتي ولسه مش عارفة هكمل في الدبلومة ولا لأ

طلابي النهاردة سنة تانية اعدادي بيقولولي : أستاذه متسيبيناش أستاذه لا تتركينا وقعدوا يتحايلوا عليا علشان اكمل الترم معاهم

وباقي طلابي متمسكين بيا برضه صعب عليا جدا اني اسيبهم قبل امتحاناتهم والأصعب عليا اني اسيب امتحاناتي وسنة كاملة دراسة تروح عليا وخصوصا ان الكلية قدموا معاد الامتحان 5 شهور والله كان قلبي حاسس وانا بقدم ان ده ممكن يحصل لكن قولت لنفسي دي حاجة مش معقول تحصل :D

أن تكون طالب ترجمة :

يبقى لازم تحفظ Medical

terms ومش بس مصطلحات طبية لأ دي مع تعريفاتها كمان ومعاهم أعراض الأمراض كمان ده غير مصطلحات باللاتيني مبتترجمش بالقاموس أصلا :) بجد بجد ده أكتر من اللي أنا بحلم بيه :) مش عارفة ايه اللي ممكن يسعدني أكتر من كده :)

الموضوع أنه كان في ورق في مادة الترجمة العلمية وطبعا لازم أنزل الكلية علشان أجيبه وكنت محبطة هروح الكلية ازاي انا ! الحقيقة روحتها كذا مرة في الحلم وفي نفس ذات الوقت جروب الدبلومة على الفيس كانوا بيتكلموا عن مدى صعوبة ورق الترجمة العلمية المهم خير اللهم أجعله خير بنوتة من زميلاتي مشكورة عندها الورق ده نسخة الكترونية وبعتتلي الورق بعد عنااااااااء أخيرا هشوفه هيييييييييييه

بصيت للورق بكل حب وشوق وإذ فجأتن لقيت الدمعة هتفر من عيني وبقول في سري ايه ده كله ايه ده كله

30 صفحة مختلفين عن بعض

في حاجات الحمد لله فهمتها وحاجات تانيه عظيم بيمين ما فاهماها ولا هفهمها في القريب العاجل :) الورق ده فكرني ب"الأحياء" في ثانوية عامية كانت مادة غلســـــــــة

كنا بندرس لما ذبابة جناحها أحمر وذبابة جناحها أخضر يتجوزوا ويخلفوا ذرية صالحة يجيبوا ذبابة لون جناحها ايه :) أيامها كان هاين عليا أوقف كل ذبابة وأقولها لون جناح أفراد عيلتك الكريمة ايه انطقي !!

في حد هيسألني ويقوللي انتوا ليه بتاخدوا ترجمة علمية؟ طبعا الإجابة معروفة علشان نترجم للأطباء والصيادلة طبعا - حاجة تشيب الكتكوت-:))

هي كلية طب كده ، بتحب الصحبة الصالحة فبتوزع شوية من المواد بتاعتها على كذا كلية في صيدلة تلاقيها وفي تربية رياضية وفي علوم بس اللي مكنتش اعرفه انها هتيجي حدانا في الكلية :)

المصطلحات دي عايزة دكتور/ة أو صيدلاني/ة يشرحولي اللي مش فاهماه وبالتالي شكلي هأجل فهم اللي مش فاهماه لغاية لما أرجع بلدي العزيزة وكل ما أقول انا راجعة الاقي الأهل والأصدقاء بيقولولي أثبتي مكانك مفيش شرطة ولا جيش والامن بقى : احمي نفسك بنفسك !! معقول أغيب 3 شهور الأمور تتطور كده :(

نيجي لتاني مادة ترجمة أدبية :) ومطلوب مننا نترجم قصة قصيرة يعني مثلا من 25 ل 50 صفحة :) حاجة كده تفرح القلب الحزين :) ومش كده وبس مطلوب مننا بحث عن المصطلحات السياسية وترجمة قصص من عربي لإنجليزي

والترجمة التتبعية الكيوت الجميلة لسه مش عارفة ايه اللي مطلوب فيها هي كمان بس مبدأيا مطلوب مذاكرة جزئين من كتاب بيتكلم عن الذاكرة والعقل وحاجات لطيفة كده .

وعلى رأي سارة زميلة الكفاح والدبلومة العلم مش بالساهل يا إيناس :)

ولا يبقى إلا أن نقول من طلب العلا يطلع بالأسانسير :(

نهاية شيء ما

عمل مشترك يجمع


illusionist

Lady E


الوجه الاخر من القصه

من هونا عند illusionist


لا أعلم ما الذي أصابني اليوم أستيقظت من نومي وقررت أن أتمرد على الروتين الممل اليوم لن أذهب لعملي وسأذهب في نزهة مع نفسي وسأغلق الاختراع اللعين المسمى بالموبايل لكي لا يزعجني أحد من العمل
اليوم الشمس خفيفة دافئة في يوم شتوي أنيق . امسكت بورقتي العزيزة التي كتبتها بالأمس فقد قررت بالأمس أن أكتب ماذا سأفعل في حياتي لأن دوامة الحياة أخذتني واختباراتها لي متلاحقة للدرجة التي جعلتني لا أقوى حتى على التقاط أنفاسي بحرية ،،، فالحياة أصبح إيقاعها سريع جدا لدرجة انها تدور بنا وتنسينا أنفسنا ، في الورقة كتبت :

بسم الله الرحمن الرحيم

أنا أمال عمري 25 سنة _ ربع قرن_ طبيبة بشرية ومهمتي في الحياة هي مساعدة الناس وتخفيف همومهم وألامهم واشعر انني في مكاني الصحيح في المناخ الغير صحيح فالطب والصحة في بلادنا أصبحت تجارة خالصة الأغنياء لهم العلاج والفقراء لهم الألم وهذا ما يتعبني وهذا ما أحاربه طوال الوقت
أضع أمام عيني دائما قول الله سبحانه وتعالى " وَمَنْ أَحْيَاهَا فَكَأَنَّمَا أَحْيَا النَّاس جميعا " وهذا ما يشجعني على الاستمرار مهما كانت العقبات .

جهزت كل شيء للنزهة بعض قطع الشوكولاتة التي سأهديها للصغار في طريقي لكي أرسم على قلوبهم البهجة
ومحفظتي التي دائما أنساها وأنسى معها نقودي والأيبود جهزته على أغاني فيروز ونزلت بسرعة على السلالم
شغلت الأيبود ومشيت ترافقني نغمات فيروز مشيت ومشيت الى أن وصلت بجوار النيل يا الله كم أحب هذا المخلوق العظيم أحب الشمس حينما تتلألأ على أمواجه الهادئة وأحب الطيور وهي تطير بفرحة حوله وأحب الدولفين الذي يطل بين الحين والأخر من بين أمواجه الساكنة بإختصار أنا احبه في كل حالاته .

قادتني خطواتي لمطعم أحبه مطعم الوردة البيضاء اعشق أسمه ولي معه ذكريات جميلة فقد كان أبي يصطحبنا له وأنا طفلة وكانت جلساتنا الجميلة والمضحكة أيام الجامعة كلها فيه
كما أن منظر النيل والطبيعة منه أكثر من رائع ...

فتحت باب المطعم لأتفاجئ بأنه يمتلئ عن أخره ولكن لحسن حظي وجدت طاولتي المفضلة متوفرة فهي بعيدة عن كل الزحمة والصخب وهي تحمل عطر ذكرياتي جلست وطلبت أكلتي المفضلة وغرقت في التفكير ...

وفجأه أفقت من أحلامي على صوت يقول لي : ممكن كرسي يا أنسة ( قطع حبل أفكاري)
رددت : نعم؟ !! – كان قصدي أن يعيد كلامه لأنني لم أسمعه جيدا-
ف رد : كرسي عاوز المطعم كله فاضي زي ما انتي شايفة – وطلع بيستظرف كمان- :(
رديت بحدة : وأشمعنى انا يعني !!! – حتى المكان بتاعي واحد معرفوش يقاسمني فيه –

فكرت للحظات أن أترك له المكان وأمشي ولكنني مازلت لم أتناول طعامي ولم أستمتع بطاولتي المفضلة
ولكنني وافقت أن يأخذ كرسي ويمشي فجلس الى نفس الطاولة ... أحسست بالضيق والأدهى إذا أتى أصدقائه وشاركوني طاولتي معه هذا ما ينقصني وفي وسط تأملاتي وأفكاري قلت له بعصبية : اسمك إيــــــــــــــــه؟

حينما يموت الأب الروحي

كان بيقول انه مش هيكمل السنة دي وتقاريره الطبية بتقول كده وانه بيسافر في محافظات مصر كلها علشان ينمي ويفيد أهل بلده لأنه في الستينات وان عاش النهاردة مش هيعيش بكرة ، قلبي انقبض وانا بسمع كلامه ده في أول وأخر محاضرة حضرتها ليه

كان نفسه ياخد جائزة نوبل وان كان اخد اللي اعظم منها حبه واحترامه ودعواتنا ليه في قلوبنا وعلمه اللي هيستمر منقوش في عقولنا وحياتنا صدقة جاريه له

د. ابراهيم الفقي انتقل الى رحمة الله النهاردة الصبح نتيجة لحريق في بيته هو وأخته ومربيته والله اعلم مدبر ولا لأ بس مش غريبة شوية ان كل علمائنا والشخصيات المصرية الناجحة بتموت موتات مش طبيعية !!

اللهم ابدله دارا خيرا من داره واهلا خيرا من اهله وادخله الجنة واعذه من عذاب القبر ومن عذاب النار .
اللـهـم عاملة بما انت اهله ولا تعامله بما هو اهله .
اللـهـم اجزه عن الاحسان إحسانا وعن الأساءة عفواً وغفراناً.
اللـهـم إن كان محسناً فزد من حسناته , وإن كان مسيئاً فتجاوز عن سيئاته .
اللـهـم ادخله الجنة من غير مناقشة حساب ولا سابقة عذاب .
اللـهـم اّنسه في وحدته وفي وحشته وفي غربته.
اللـهـم انزله منزلاً مباركا وانت خير المنزلين .
اللـهـم انزله منازل الصديقين والشهداء والصالحين وحسن اولئك رفيقا .
اللـهـم اجعل قبره روضة من رياض الجنة ,ولا تجعله حفرة من حفر النار .
اللـهـم افسح له في قبره مد بصره وافرش قبره من فراش الجنة .
اللـهـم اعذه من عذاب القبر
اللـهـم املأ قبره بالرضا والنور والفسحة والسرور.
اللـهـم إنه فى ذمتك وحبل جوارك فقه فتنة القبر وعذاب النار
انت أهل الوفاء والحق فاغفر له وارحمه انك انت الغفور الرحيم.

الإعلام المصري كالعادة زفت زفت زفت في نقل الأخبار وتقدير الشخصيات المصرية العظيمة والحداد عليهم

ان العين لتدمع والقلب ليحزن وإنا على فراقك يا د. ابراهيم لمحزونون ولا حول ولا قوة الا بالله

http://justbabygirl.blogspot.com/2011/09/blog-post_23.html

حـــــــــــــــــداد

وحدونا في الحزن فمصر اليوم والمصريين جميعا في حالة حزن ويكسو قلوبنا الأسود رحم الله من ماتوا فقبل الأمس سقطت عمارة على أهلها في دمياط وكان الحزن عنيفا على من عرفوا سكان العمارة ومن لم يعرفوهم وبالأمس توفى 73 لأنهم يشجعون بلدهم وتمنوا الفرحة فيها مات الشباب من كل المحافظات ليس من القاهرة فقط كما يدعي ضيقوا الأفق فالحزن موزع على مصر بأكملها

بلدنا التي بها أكبر نسبة شباب يموت فيها الشباب ويحكم فيها الشياب !!

لم يعد اليوم يشبه البارحة لقد تغيرنا لم أعد أحزن وحدي على الشهداء والضحايا فالكرة التي خدرت الناس بالأمس وأنستهم 1000 روح انسان ضحايا العبارة والكرة التي أشعلتنا غضبا في مباراة مصر والجزائر في السودان هي أيضا التي وحدت حزننا على اختلاف تفكيرنا وثقافتنا

دولة الظلم ساعة ونهاية الظلم قربت جدا جدا جدا

البقاء لله في ضحايا عمارة دمياط والتعازي لأهلهم وربنا يصبرهم والبقاء لله في ضحايا أحداث الأمس من الطرفين والتعازي لأهلهم وربنا يصبرهم وان شاء الله ناخد حقهم وحق اللي راحوا قبلهم ولا حول ولا قوة الا بالله

الاحساس اللي حاسة بيه من يومين ميتوصفش حزن على حزن يارب هون وصبرنا ...

سنة تالتة ابتدائي

أنا درست لأطفال ولكبار لكن بالرغم من كده سنة تالتة ابتدائي مأثرين فيا بطريقة كبيرة هحكيلكو شوية عليهم

سنة تالتة ابتدائي أنا اعتمدت معاهم أسلوب اللعب علشان يحبوا اللغة ويتعلموا ده غير أن فيهم كتير شطار كمان فبيساعدوني أني ابتكر العاب جديدة وحاجات تفرحهم

سنة تالتة ابتدائي هما الفصل اللي بيفضلوا طول اليوم يسألوني أستاذه متى حصتنا؟ ولما الحصة بتاعتهم تقرب وأقولهم انا عليكم الحصة الجاية يفضلوا يقولوا هيه هيييييييييه هييييييييييه ويتنططوا علينا انجليزي علينا انجليزي هيييييييييييه

سنة تالتة ابتدائي هما " الفصل البسكوتة" اللي مشاعرهم بتظهر عليهم على طول وأنقياء أوي لسه متعلموش الكدب والنفاق

سنة تالتة ابتدائي هما الوحيدين اللي بيبقوا عايزين يشيلوا الشنطة بتاعتي او اللاب توب وبيحبوا يساعدوني

امبارح خرجت خروجة اجبارية مع ماما وجيراننا برغم اني كنت تعبانة شوية ولقيت طالب من تالتة ابتدائي أول لما شافني برق وكإنه شاف نجمة سينما :) وجري عليا وسلم عليا واللي انا اتفاجئت بيه انه كان عايز يبوسني طبعا انا وشي احمر مع ان الطفل بيتصرف بعفوية قولتله كلام أهبـــــــــــل تبريرا اني مش هينفع أبوسه طبعا الواد يا عيني اتحرج وانا طلع عليا شبح يلا نمشي يلا نمشي حتى ماما متعرفش انا اتعصبت كده ليه :) مبحبش طلابي يشوفوني وأنا تعبانه وهما كانوا كتير في "ماكس" امبارح

سنة تالتة ابتدائي لو ربنا أراد ورجعت شغلي هيبقى علشانهم وبس

سنة تالتة ابتدائي أكتر أطفال هفتقدهم لما ارجع مصر ان شاء الله علشان الدبلومة اللي قالوا امتحاناتها في شهر 5 ومازلت مستغربة لغاية دلوقتي من ان الكلية يقدموا الامتحان ويخلوه بدري اوي كده !!

سنة تالتة ابتدائي لازم أتصور معاهم إن شاء الله وأخليهم ذكرى جميلة عندي