كلام متبعتر

* بصرف فلوسي في كروت الموبايل والشوكولاتة

- ايه التفاهات دي ؟

* والكتب والكورسات والورد :)

* كل ما بدخل المكتبة ببقى هتجنن وأشوف كتابي وسط الكتب وكل ما بقرأ كتاب وبلاقي فكرة من افكاري في الكتاب بحس اني اتأخرت أوي بس لسه مفاتش الأوان

* غرقانة وسط الكتب والأوراق والحياة متلونة بكل الألوان بتفوت بسرعة أوي ومفيش وقت خالص وكده أرحم بكتير من ان الوقت يكون بطيء ويقتلني في كل ثانيه

* كل حاجة لما يبقى عندي 21 سنة

طب وليه البطاقة والرخصة قبل ال21 سنة حاجة تضايق بجد شيزوفرينيا

* كده كتير لتالت مرة مش بتردي على اتصالاتي وكل مرة بنفس الأعذار

مليت من الأعذار يا صاحبتي اعتقد دي بداية النهاية ولو استمرت هتبقى فعلا النهاية عالأقل لما نشوف بعض تاني أقدر أقولك وحشتيني

لكن كده بجد صعب فاكرة لما قولتلك مش هسمح لحد يضايقني في حياتي ؟

* شيما مدونتك بتجنني لغاية لما بفتح التعليقات لازم اجي مدونتك 10 مرات لغاية لما اعرف أعلق

تصدقي طلعنا اخوات حتى في الاغنية اللي بنحبها وبنحب ندندنها :) بكتب اسمك يا حبيبي عالحور العتيق بتكتب اسمي يا حبيبي ع رمل الطريق

فيروز فعلا ليها سحر خاص وبتودينا لعالم تاني

ان شاء الله لما نتقابل المرة الجاية هنغني فيروز وهنشرب فيروز كمان نياهاهاهاها :)

* مصر والجزائر وكأس العالم مش فارقة كتير كسبنا أو خسرنا

أكيد هفرح لو كسبنا لكن برضه مش هزعل لو خسرنا

تفاصيل يوم الندوة الثقافية مع الاعلامي أ/ سيدعلي في كليتنا

صورة لكليتنا النهاردة طبعا نظيفة وأحلى من أي يوم

طبعا الكلية النهاردة كانت حاجة تانيه خالص جايلنا في الندوة الثقافية الكاتب الصحفي ومقدم برنامج 48 ساعة أ/ سيد علي طبعا انا مش متابعة برنامج 48 ساعة دايما يعني ساعات بشوفه لكن كنت عايزة احضر الندوة علشان اشوف ايه اللي هيحصل فيها

طبعا ملقتش مكان اركن فيه الكتكوتة من الزحمة اللي كانت في شارع الكلية وكمان علشان رحت بدري نسيت الكارنيه والبطاقة واي اثبات شخصية وفوجئت على بوابة الكلية ان أم ابراهيم بتقوللي افتحي شنطتك _ قال أيه بيفتشوها – بس هي بصت فيها لقت الكتب فقالتلي اتفضلي هي وظبابيط الأمن
دخلت الكلية لقيت بلونة كبيرة مكتوب عليها اسم الاعلامي الضيف , رحت المدرج الرئيسي عندنا في الكلية _ مدرج المسرح_ لقيته زحمة ومكاني اللي بقعد فيه فضوه علشان الدكاترة يقعدوا فيه
المفروض اللقاء كان يبدأ الساعة 10 انا رحت الكلية الساعة 10 ونص ومكنش لسه بدأ
فاتت ساعة وبرضه مبدأش والتانية ولسه برضه الضيف مجاش اخيرا بدأوا الندوة الساعة 1 الا خمسة

دي صورة الاعلامي سيد علي وهو داخل المدرج طبعا الصورة مش واضحة أوي

طبعا المدرج اتغيرت معالمه واتفرش سجاد وبقى فيه مراوح والستاير اتقفلت ومكتب الدكاترة اتفرش وحطوا عليه ورد والكلية اتنظفت وكمان شارع الكلية اتنضف وعارفين مين اللي عمل كل ده؟ اتحاد الطلبة وطلاب اعلام هما اللي رتبوا ونظفوا بإيديهم فعلا الكلية كانت حاجة تانيه النهاردة

بدأ الحوار بكلمة الدكتورة جيهان اللي بجد تعبت جدا في الاعداد للندوة دي وعملت مجهود كبير جدا لإنجاح الندوة وبعدين أيات من القرأن الكريم بعدها العميد قال كلمة وبعدها نائب العميد وأخيرا الاعلامي أ_ سيد علي اتكلم وقال كذا حاجة منها ملحوظته ان المدرج كله بنات ومكنش شايف الاولاد فقال ما شاء الله عدد البنات اللي بيتعلموا ومحجبات زاد جدا عن السنين اللي فاتوا بس فين الاولاد فالاولاد قالوله احنا هنا يا عيني كانوا قاعدين في بنشين اتنين وباقي المدرج كله بنات :) اصلا الرجالة ماتوا في الحروب

وبعدين اتكلم في كذا موضوع واخيرا جه وقت الأسئلة وحيث اني مش اعلام انا انجليزي وحيث كمان اني لسه عارفه موضوع الندوة امبارح قبل ما اروح عالبيت على طول وقولتلهم انا معاكو ومقعدش وضبت الكلية معاهم فكان لقسم اعلام الاولوية في الاسئلة وكنت هتجنن لازم أسئل فكتبت سؤالي في ورقه ووديتها مع اتحاد الطلبة لدكتورة جيهان بس للأسف عدد طلبة اعلام اللي سألوا كان كبير بس على مين هسال يعني هسأل وكمان أسئلة كتير من الي كنت عايزة اسألها في طلبة غيري سألوها

المهم خلصت الندوة وقناة المحور عملوا لقاء مع أ/ سيد علي ومع العميد ونائب العميد وبعض الدكاترة وطبعا صوروا الندوة وبالتالي صورونا بس مصوروش معانا وكان في زحمة غير طبيعية من الطلبة
فكان في مصور فوتوغرافي وحد كان من قناة المحور تقريبا فالمصور بيقوله : شوفت يا عم شعبية الاستاذ سيد كبيرة
رد عليه الشخص ده وقال له : يا عم ولا شعبية ولا حاجة دول بس عايزين يتصوروا في التلفزيون
انا اتعصبت وحسيت بالاهانه معنى كلامهم اننا تافهين فقولت للمصور والشخص اللي كان معاه : على فكرة احنا مش عايزين نتصور في التلفزيون ولا حاجة بس في قدامنا شخص ليه قيمة في المجتمع وليه مكانة فعايزين نستفيد بخبرته مش أكتر

وعلى فكرة انا اصلا ميهمنيش تصوير التليفزيون لأني عارفاه كويس لأن بابايا اعلامي وليه اصحاب مخرجين وصورت كذا برنامج للأطفال وغنيت مع الفنانة نادية مصطفى وقالتلي وقتها انتي أصغر كورال شوفته في حياتي
وقررت اني هاروح ومش مهم التصوير اللي قالولنا عليه بإعتبار اننا متميزين وفعلا كنت همشي بس افتكرت اني لسه مسألتش الأسئلة اللي عايزة أسئلها بتاعت المدونين وبالتحديد أسئلة الجميلة داليا قوس قزح وبالرغم من الزحمة وأسئلة عشرات الطالبات قدرت اني أسأل الاعلامي أ/ سيد علي عن التدوين وكانت أسئلتي

انا : إيه راي حضرتك في التدوين ع الانترنت ؟ ده سؤال المدونين عايزين يعرفوا اجابته من حضرتك

أ/ سيد علي : من أعظم الحاجات اللي حصلت العشر سنين اللي فاتوا ومن أروعها

أنا : طب يا فندم في صحفيين في جريدة الأهرام قالوا ان المدونين أولاد الشوارع ؟ ( على فكرة ده حصل ومعنى الكلام اننا مش صحافيين ولا بنكتب حاجة كويسة)

: لأ طبعا دول " سفلة" التدوين شيء رائع

أنا : وفي رأي حضرتك ازاي ممكن نحمي حقوق الملكية الفكرية ع الانترنت ؟

: ده موضوع كبير أوي لازم تكتبي فيه وكلكوا تكتبوا فيه وتفتحوا باب النقاش وتعملوا جروب

الحمد لله عرفت اسأله 3 أسئلة بحالهم والحمد لله برغم انه مكنش عنده متسع من الوقت الا انه جاوبني وكان مهتم جدا

المهم بعدها رحت اوضة العميد وقعدت مع الدكاترة والعميد ونائب العميد ومخرج ومصور ومعدين قناة النيل للتعليم العالي ايون قناة المحور مشيوا مع الاعلامي بتاعهم لكن اللي صوروا بعد كده قناة النيل للتعليم العالي

وكان في تورتة كبييييييرة وتخيلوا كمان قعدت مع الدكاترة على الترابيزة بتاعتهم وأكلت التورتة معاهم ومعرفتش اكمل طبقي كان في دكاترة عايزين يولعوا فيا ازاي طالبة واقعد معاهم في اوضة العميد ومش كده وبس كمان على نفس الكراسي ونفس الترابيزة :)

واللي خنقهم اكتر اني صورت مع قناة النيل للتعليم العالي كنت كل شوية بأجل التصوير وكنت اخر موهبة وانا بغني خير اللهم اجعله خير العميد بصلي بصة رعبتني ف اتلخبطت وغنيت مقطع صغير جدا من بكتب اسمك لفيروز وحسيت اني أخدت كل اللي في القاعة لعالم تاني كلهم كانوا مبهورين ولما مكملتش غنا

المخرج والمصور قالولي ليه كده مكملتيش ليه قولتلهم العميد بصلي أصله عايز يصور :) صورت قبل العميد تخيلوا مكنش عايزني اصور علشان سيادته يصور الاول مع ان في 3 مواهب صوروا قبلي بس برضه صورت قبله نياهاهاهاها صحيح مش كتير بس برضه قبله

المهم بجد كان يوم لذيذ هو مرهق شوية بس لذيذ وانا رايحة البيت وصلت دكتورة جيهان بيتها قريب جدا من بيتنا والكلام معاها ممتع جدا بس كانت عايزاني اركز معاها ومش مهم الطريق :) طبعا انتو عارفين اني مكنتش مركزه مع الطريق معناها ايه بس الحمد لله عدت على خير وكان بجد يوم جميل
ومش ممكن ابدا انسى كتاب ما فعله العيان بالميت لبلال فضل اللي استمتعت بقرائته طول اليوم قبل الندوة
أخيرا كليتنا بقت كلية أخيرا

خبر عاجل وياريت الجميع يدخلوا بسرعة

بصوا بقى صلوا على النبي كمان زيدوا النبي صلى وكل من ليه نبي يصلي عليه (شكلي في فرح تقريبا)

عرفت النهاردة من كلية الأكاليم اللي انا فيها ان بكرة ان شاء الله ان جايلنا صحفي ومذيع اسمه سيد علي هو تقريبا مقدم برنامج 48 ساعة على المحور وهو كان جاي لقسم اعلام وانا روحت اتحاد الطلبة وسجلت اسمي في الحضور وهتكلم عن المدونين ان شاء الله في أسئلتي

طبعا انا قسم انجليزي يعني مليش علاقة بإعلام غير ان ليا صحبات منهم فأستأذنت الدكتورة اللي مسؤلة عن اللقاء وطلعت عسولة أوي شبه الدكتورة جيهان اللي كانت جايه في فيلم مورجان احمد مورجان

المهم من هنا للصبح الساعة 10 او 11 قولولي ايه الأسئلة اللي تحبوا اني أسألها عن لسانكم ليه

هدخل النت من الموبايل وانا هناك ان شاء الله

احتمال يعملوا انترفيو معايا على اعتبار اني من مواهب الكليه بس الله اعلم ده هيحصل ولا لأ انا متوتورة شوية بس خير ان شاء الله

بالنسبة لتعليقات البوست اللي فات بشكركم فردا فردا وان شاء الله هرد عليكم فردا فردا

ادعولي اصحى بدري أساسا علشان أروح :)

لقاء مش أي لقاء (موضوع للغيظ فقط)

أيون بغيظ كل اللي محضروش وكنت مفتقداهم جدا واللي لازم يكونوا موجودين معانا اللقاء الجاي ان شاء الله

امبارح كان يوم لذيذ بجد مرمر أميرة على كوكب مهجور يا عيني غلبتها على ما صحتني من النوم لأني بطبيعة الحال مش بصحى بدري من النوم وكمان يوم الجمعة يوم الويك اند اللي ما بصدق انام فيه براحتي وخلاص أخيرا صحيت وببدأ في اللبس وهوب الكهربا قطعت وابتديت أقلق وأقول مش هروح اللقاء لكن نزلت مع انتيمتي (مامتي) وقابلت أميرة ومامتها وروحنا الموقف وركبنا من هناك

اتعرفنا اكتر انا وأميرة ودردشنا كتير طول الطريق وبعدين لما وصلنا موقف المنصورة مرمر كلمت صبرني يارب وكان تليفونها غير متاح فكلمت نوران أم شريف السكرة وقالت لنا انهم لسه في مستشفى الأطفال روحنا هناك وانا دخلت بتحفظ (داخله بنك الدم بقى بيني وبينه عداوة) ما شاء الله لقيت العدد كبير وأول حد شوفته كانت صبرني يارب وأول حاجة أقولها ليها كانت فين شيما :) قالتلي اللي لابسة اصفر هناك وكان في بنوتة جنب شيما هي كمان لابسة أصفر :) ف اتلخبطت وبعدين سلمت على شيما وبجد حسيت اني اعرفها من زمان وللأسف مخضتهاش ب بوكيه الورد :) المرة الجاية يا شيما أوعدك اني هخضك بس من غير بوكيه ورد علشانك سبتيه في كوك دور عااااااااااا عااااااااا عااااا
وشوفت خالد همس الأحباب فقولتله انا ليدي ومدونتي روح طفلة مش عايزة تكبر فقال لي بكرة تكبري ان شاء الله :)


وطلعنا من المستشفى وانا مع شيما ودخلنا المسجد سوى سمعنا خطبة الجمعة وبجد كانت جميلة جدااا
وصلينا سوى ياه على الروحانيات الجميلة اللي كنا فيها وطلعنا من المسجد اتجمعنا وروحنا على كوك دور مشيا على الأقدام وبجد طلع مكان كويس قضينا فيه وقت جميل واتغدينا سوى انا وشيما وبنت المنصورة واختها وضحكنا من قلبنا وكمان كنت قاعدة فلقيت نوران بنت خيخة جت سلمت عليا وعلى مامتي من غير ما اعرف انها نوران وانا هموت واتعرف عليها اساسا وسألت عليها وبعد كده عرفت انها هي اللي سلمت عليها بجد بنوتة جدعة وعسولة أوي و مش خيخة ولا أي كلام

بعدها طلعنا على نادي الأطباء في طلخا عالنيل بجد نادي شيك وأجمل ما فيه انه عالنيل وكنا هنقعد قدام النيل بس مش عارفة مين اللي اقترح اننا نقعد في قاعة كان فيها كوشه طبعا محدش قعد عالكوشة نياهاهااهاها سيبنا الكوشة وقعدنا على ترابيزة كبييييييرة يرمح فيها الخيل تلاتين يوم ما يجيب أخرها (طبعا لأن الخيل مربوطة هاهاهاها) واتعرفت بشوية من الموجودين منهم :

فاتيما العسولة والرقيقة وروحها بجد جميلة جدا والحضونة بتاعتها ادمااااان بجد حضنها مش أي حضن اخدت حضن منها مرتين ربنا يرجعلك يوسف يارب وميتحرمش من حضنك :)

ونوران بنت خيخة كنت بحبها من مدونتها ولما اتعرفت بيها امبارح حبيتها أكتر

حلم كان بنوتة لذيذة و شقية ودخلت قلبي بسرعة وحسيت اني اعرفها من زمان

شيما حبي يا حبي مكنتش عايزة يفوت فسوة وانا مش معاها بجد هي فعلا اختي الكابيرة شخصية تتحس اكتر من انها تتوصف بالكلام لأن الكلام مش هيوفيها حقها وعملت امبارح مجهود كبير جدا علشان اللقاء الجميل ده


رحيل وايمان بنوتتين عسولين وحلوين جدا فرحت جدا لما اتعرفت عليهم وصلينا سوى علشان يبقى تعارف وعيش وملح وصلاة كمان :)


بنت المنصورة وأختها بنوتتين زي العسل حسيت اني اعرفهم من زمان وكمان بنت المنصورة طلعت زومل من نفس ذات الكلية :)

ابراهيم كاتب مصري بجد انسان ذوق وجدع جدا وكفاية انه برضه زومل في نفس ذات الكلية

صلاح مسدس صغير المحامي بتاعنا مرح وذوق جدا وهو وابراهيم جابلونا مركب علشان ناخد جولة في النيل

أميرة مرمر بجد انا بحبك جدا ولولا انك شجعتيني مكنتش حضرت اللقاء ده بجد انتي بنوتة جميلة أوي

عاشقة وغلبانه : طلعت مرحه طلعت مرحه هييييييييه كنت كل ما بدخل مدونتها بزعل ويمكن اعيط كمان بس لما شوفتها لقيتها بنوتة زي القمر ومرحة وعسولة

صبرني يارب : عسولة جدا وجميلة جدا ومرحة وكانت عاملة جو جميل ل اللقاء وأول حد شوفته في اللقاء وحسيت بالاطمئنان

افتقدت جدا خالتو ستيتة حبيبتي وكلنا سألنا عليها ونفسي اشوفها في أقرب وقت
وكمان افتقدت ايمان ايمي حبيبتي واحساس طفلة رومانسية يارب اشوفك لما ترجعي من اليابان او اجيلك اليابان
وشباك موارب منار الدكتورة بتاعتنا ويوم جديد عرفت انها اتكلمت في التليفون بس امتى مش عارفه عااااااا كان نفسي اشوفك وبسمة انور سالت عليكي اول لما وصلت وقالولي انك مجيتيش مخمصاكي وشاب فقري برضه عرفت انه مش جاي والانجينير احمد ابو العلا بجد كان يوم جميل وفاتك وكيكي عوووو حبيبتي أي خدمة اتصلت بيكي في اللقاء وانتي متصلتيش بيا في أي لقاء روحتيه شوفتي بقى (وش بيطلع لسانه)
ديدي كان نفسي اشوفك بجد

طبعا الرحلة النيلية كانت روعة واتعرفنا فيها على بعض اكتر وبجد منظر الطبيعة ياخد العقل وفاتكو نص عمركو ياللي محضرتوش اللقاء


وكمان بعد اللقاء اتمشيت مع مامتي على النيل ومفيش ولا تاكسي جاي فاضي كلهم كانوا مليانين لغاية لما اخيرا لقينا تاكسي وتوهنا لغاية لما وصلنا لمكتبة بوكس اند بينز وكل ما اسأل على كتاب يقولولي خلص بس جبت كتابين حلوين

بجد يا مامتي انا بحبك اوي وانتي فعلا انتيمتي واليوم كان جميل بوجودنا سوى


ملحوظة : هجمع كل الصور اللي كنت عايزة انشرها عالمدونة وال3 صور بتوع يوم اللقاء وهنشرهم كلهم في بوست لواحديهم ان شاء الله

معجزة صحيت بعد الموت

كان ياما كان يوم الجمعة اللي فاتت كان في بنوتة ومامتها رايحين يزوروا خالة البنوتة وطلعوا ع القاهرة ومن القاهرة راحوا جمهورية المنوفيه وهما في الطريق ضلوا الطريق وطلعوا على طريق تاني خالص غير اللي بيمشوا فيه وكانت نجاة بتكمل الصورة وبتقول في الmp3 طويييييله طويييييييله يا سكة العاشقين تيرا طوييييييلة طويييييييييله على العاشق طويله يا عيني والجو كان جميل والشمس خفيفه وفجأه الجو بقى ممطر مطر خفيف وهما ماشيين في طريق كبير مكون من خمس حارات يعني طريق كبير ويستحمل ان 5 عربيات يمشوا جنب بعضيهم بس القاهريين الله يعمر بيتهم كانوا بيمشوا 7 او 8 او احيانا 9 عربيات جنب بعض وكانوا عاملين زحمة وهرجله كبيره جدا

وفضلت البنوتة ومامتها ماشيين لغاية لما الحمد لله دخلوا في الطريق الصح طريق القناطر المنوفيه _ وهيلا هيلا في القناطر رحلة جميله في القناطر كلنا عيله في القناطر _ دي اغنية كنت بحبها وانا طفله

كانت البنوتة عندها بداية دور برد وكانت صاحية بدري ومنامتش كويس والجو بدأ يمطر على الطريق السريع ما بين القناطر والمنوفيه وكأن المطرة كانت مستنياهم المطرة بدأت خفيفه والبنوتة كانت ماشية بسرعة والطريق كان عامل زي الثعبان كله منحنيات فمامة البنوتة قالت لها هدي السرعة شوية فالبنوتة – وبراءة الأطفال في عينيها – بصت للمراية الصغنونة لمحت وراها 3 عربيات منهم عربية بيجو بيضا ظهرت فجأه

وداست البنوتة على الفرامل بكل قوه علشان تهدي السرعه ووقتها فقدت السيطرة على الكتكوتة

الكتكوتة راحت منها يمييييييين بكل قوووووووه يعني كان ممكن تخبط في العربيات اللي وراها او جنبها ففكرت ان الفرامل فيها مشكله فضغطت أكتر على الفرامل مرة تانيه فالكتكوتة راحت منها شماااااال ناحية السدود الأسمنتيه اللي بتبقى بين الطريقين وفجأه البنوتة حست انها مش شايفه أي حاجه ومش قادرة تسيطر على الكتكوتة ومش قادرة تسمع كلام مامتها بوضوح في الوقت ده الكتكوتة خبطت في السدود الأسمنتيه 3 مرات والكتكوتة لفت منها وبقت في الاتجاه المعاكس ووقفت بعد طبعا ما اتخبطت من كل النواحي في الوقت ده كان صاحب العربية البيجو البيضا وقف عربيته ونزل وقف الطريق للبنوتة ومامتها لأن ده طريق سريع والحادثة حصلت في منحنى يعني العربيات اللي جايين مندفعين عمرهم ما هيشوفوا الكتكوتة ولازم يخبطوا فيها ولو كان ده حصل كانت الكتكوتة والبنوتة ومامتها بقو كفته كل ده والمطر بقى ينزل بغزارة كبيرة جدا وحجب الرؤية شويه

نزلت البنوتة ومامتها وهما الاتنين كان الفاصل بينهم وبين الموت ثواني وشافوا الخبطات بتاعت الكتكوتة وكانوا متوقعين انها بقت كفته من قدام من شدة الخبطات لكن الحمد لله اللي حصل خبطات خفيفه بالنسبه للحادثه وخدوش في دهان الكتكوتة والبنوتة اعصابها باظت فمامتها أصرت انها تكمل سواقة الكتكوتة وكمان مامة البنوتة كانت اعصابها بايظة بس حاولت تكمل سواقه كل ده وصاحب العربيه البيجو موقف الطريق للبنوته ومامتها وواقف تحت المطر والبنوتة ومامتها مكانوش شايفينه وبعد الحادثة وقفت عربيات كتير علشان تساعد البنوتة ومامتها بس اللي فعلا ساعدهم الشخص صاحب العربيه البيجو واللي المطرة بهدلته وهو موقف الطريق واللي قال للبنوتة ان سبب الحادثه انها ضغطت على الفرامل والمطرة لسه خفيفة والأرض في الوقت ده بتبقى عامله زي الصابون مزحلقه فمينفعش الضغط على الفرامل وقتها

الشخص ده انتظر لغاية لما البنوتة ومامتها ركبوا الكتكوتة ومشيوا وهو ركب عربيته ومشي بس مظهرش في مراية الكتكوتة ولا ظهرت عربيته في الطريق تاني علما بإن مفيش طريق متفرع من الطريق السريع يعني من المستحيل انه يكون دخل شارع جانبي – عارفه ان في ناس ممكن متصدقش الكلام ده بس هو ده اللي حصل –

والبنوتة كانت حاسه ان في ملائكه حواليها اول لما خبطت في السدود الاسمنتيه حست ان في ملائكه بتحميهم ده كان احساس قوي مسيطر عليها وكان نازل عليها سكينه غير عاديه

ملحوظة : البنوتة ومامتها هما انا ومامتي وقلت انشر موضوع الحادثة لأسباب كتير منها

اولا : اني اترعبت على كل المدونين والغير مدونين اللي بيتعاملوا مع العربيات وكان جاي على بالي قبل الحادثه على طول ديدي ربنا يحميها ويسلم طريقها يارب
ف خالتو ستيتة والانجينير احمد ابو العلا ومرمر على كوكب مليان ناس :)
وديدي وappy ومستر هاني زينهم ربنا يسلم طريقكم ويحميكم ومحدش يفرمل والجو فيه مطرة

ثانيا : الحمد لله فعلا حسيت بمعنى العناية الالهيه في الوقت ده
بجد ربنا سبحانه وتعالى جميل اوي

ثالثا : في عربيه نقل اتقلبت واحنا جايين في طريق المنصورة دمياط معنى كده ان الحوادث ف المطر منتشرة جدا فكان لازم اكتب عنها

رابعا : شباب كتير بيبقى نفسهم يموتوا مع أي مشكله بيواجهوها ومفيش عندهم امل في الحياه
لو اتعرضوا لحادثة زي دي وكانوا أقرب للموت من الحياه هيفهموا ان الحياه غاليه اوي وان العمر لحظة
عن نفسي حاسه اني اتولدت من جديد وشايفه الحياه بنظرة جديده

خامسا : أميرة على كوكب مهجور اول صديقة تعرف عن الحادثة ومن وقتها بتكلمني الصبح وبالليل واحيانا بعد الغدى :)
علشان تطمن عليا انا ومامتي ربنا يكرمك يا مرمر يارب وبجد انتي انسانة جميله جدا وكلمة شكرا قليلة أوي عليكي
كيكي قلب الام اللي معايا بقلبها في كل الحوادث اللي بعملها ربنا يكرمك ويباركلي فيكي
بجد ربنا يخليكوا ليا

دعاء السكينة

l

" اللهم امنحني السكينة لأتقبل الاشياء التي لا أستطيع تغييرها .... والشجاعة لتغيير الأشياء التي أستطيع تغييرها ... والحكمة لمعرفة الفرق بينهما "

دعاء جميل جدا ورائع قرأته كذا مرة في رواية ربع جرام اللي أخيرا الحمد لله قربت أخلص قرائتها واللي اتغير مجرى أحداثها خالص

ان شاء الله هحكيلكوا شوية من أحداث الرواية بس دلوقتي خلونا نتأمل في الدعاء , بجد دعاء مريح جدا والنهاردة الصبح كنت بردده وانا رايحة الكلية وحسيت بسلام وراحة مقدرش أوصفهم

يوم ألقاك ...

أشعر أن المسافة بيننا قد طويت وقد أقتربت مني واقتربت منك حتى انني أكاد ان أسمع وقع خطواتك

أكاد أن أراك كما أرى أشعة الشمس الذهبية على وجهي كل صباح وحينما أستيقظ من النوم وكلي يقين بأن كل يوم جديد يقربني من قربك

هل تعلم؟ ان أبواينا أدم وحواء قد افترقا واستمر بعدهم سنوات وسنوات الى أن جمعهم اللقاء

سنوات وأيام قضياها في البعد والخوف والتفكير في المجهول ولكنهم كانا على يقين ان اللقاء قريب

وحينما التقيا كان لقائهم يغلفه الفرح والحب والهناء والسعادة وأصبح يوم لقائهم يوم لكل المسلمين وسمي الجبل (مكان لقائهم) ب جبل (عرفات) لأنهم تعارفوا هناك بعدما تاهت أرواحهم سنوات وسنوات

هكذا أنا وانت فقد تعارفنا وتألفت أرواحنا حينما كنا هناك يوم شهدنا بوحدانية الله الواحد الأحد يوم شهدنا انه ربنا سبحانه ولا رب سواه يومها همست لي أنه كما تلاقينا هنا سنتلاقى هناك (في الحياة) فأطمني ولا تقلقي وانتظريني وها أنا على وعدي وعهدي معك وعندي يقين بأني سأراك وستضيء النجوم ويبتسم القمر وتغني العصافير ويلمع الماء على صفحات النيل من الفرحة وأنا بقربك وأخيرا ستقول لي الكلمة التي انتظرها بكل شوق وسأقول لك الكلمة التي خبأتها في قلبي وأدخرتها لك

لك وحدك

ف الى ذلك اليوم
أشتاق اليك يا رفيق روحي

هدية لكل المدونين ولغير المدونين برضه :)

الفيديو دا اهداء ل احساس طفلة حبيبتي ود. ستيتة خالتو حبيبتي ول شيما اللي دايما مختلفه معايا بس حبيبتي برضه ولمرمر على كوكو مهجور حبيبتي ولبسمة أنور حبيبتي برضه كلكن حبيباتي في الله

وطبعا انا حاولت انزل الفيديو ومعرفتش فجيبتلكم اللينك بتاعه من اليوتيوب علشان تتفرجوا عليه لأن نفسي كل الناس تشوفه وخصوصا اللي فاقدين الأمل في حياتهم

الفيديو ده شوفته في كورس الH.R وحسيت بإني طايرة وروحي المعنوية مرتفعه

والأغنية اللي هتشوفوها فضلت تتكرر جوايا وتحسسني بالتفاؤل والأمل

اتمنى ليكوا متابعة حلوة وسعادة كبيرة ومتأكده ان الفيديو والاغنية ان شاء الله هتعجبكم

http://www.youtube.com/watch?v=pDGW8nbXv-s

يوم من أجمل أيام حياتي

طبعا كلنا بتحصل لنا منغصات لو ركزنا فيها بنشوف اليوم كله مش لذيذ لكن المفروض نسيب الحاجات المش لذيذه تخبط دماغها في الحيطة ونركز في الحاجات الجميلة اللي حصلت في يومنا وبالتالي في عمرنا كله

النهاردة نزلت كالعادة من غير الكتكوتة علشان كانت عند الميكانيكي - ومع بابا برضه- وطبعا الانسان لما بياخد على راحة وعربية ورفاهية بيبقى متمرمط من غير العربية دي وطبعا كنت متأخره على المحاضرة بسبب المواصلات الجميلة المهم كان نفسي الاقي تاكسي وفات حوالي 3 دقايق وانا بستنى تاكسي واحد ومفيش وكأن كل التاكسيات انقرضت وطبعا كنت متغاظة ان المحاضرة المفروض بدأت وانا لسه مروحتش الكلية وفجأه لقيت 3 تكسيات وقفوا قدامي وانا أختار :) يا ربي فرحت بجد ( الحمد لله)

رحت الكلية لقيت محاضرتنا اتأجلت ساعة فرحت اكتر اني هلحق المحاضرة من أولها وكان عندي كورس تنمية بشرية في المكتبة وكده المحاضرة اتأجلت ومش هحضر الكورس في معاده لكن كان عندي يقين اني هروح الكورس من أوله وقد كان الكهرباء قطعت في المدرج – هو مدرج صغير- والجو كان حر جدا ومع ذلك المحاضرة كانت رائعة كانت محاضرة دكتر حمدي شاهين والحقيقة لولا محاضرات دكتر حمدي ودكتر اسلام اعتقد اني مكنتش هقدر اكمل في الكلية
واخدنا المحاضرة وخلصنا قبل معاد كورس التمية البشرية ب3 دقائق ولحسن حظي ان الكلية جنب المكتبة اللي فيها الكورس ووصلت الساعة 2 بالضبط في ميعادي :)

في الكورس شوفنا جزء من فيلم ل الممثل ايدي مورفي وكان بيقول لإبنه الصغير متستسلمش وخليك قوي ابنه عمره حوالي 4 او 5 سنين وبعدها جت أغنية غاية في الروعة بالانجليش طبعا عن تحقيق الأحلام وعدم الاستسلام والايمان بأحلامنا والسعي للحصول عليها
وحصلت كذا حاجة في الكورس رفعت من معنوياتي منها اننا كنا بنتقسم جروبات والمستر قسم الجروبات ومطلعتش مع زميلتي دعاء اللي قاعدة جنبي فمسكت ايدي وقالت للمستر ليدي معانا الا ليدي
يااااااااه معقول حد اتعرفت عليه امبارح ويحبك في الله كده؟ الحمد لله
ده غير اني الحمد لله استفدت كتير من الكورس ده وطورت حياتي للأحسن

رجعت من الكورس يادوب دخلت البيت وأكلت معلقتين من الغدى عالسريع وبابا قاللي يلا هننزل علشان عيد ميلاد خالتو النهاردة – خالة بابا –

وهي الكابيرة دلوقتي كل الجيل اللي قبل جيل بابا الله يرحمهم لسه بس طنط ليلى ربنا يبارك في عمرها – خالة بابايا –
وعند طنط ليلى كان هناك بناتها وأطفالهم
والأطفال هما ( جومانا ودينا وسارة وخالد ) دينا وسارة وخالد كلهم في الحضانة وطبعا مش بيروحوا الحضانة وموضوع الغاء الحضانات ده عمل ازمة عند معظم الأطفال وخلاهم زهقانين

دينا كانت كل شوية تسألني مالك بس؟ كنت بقولها عايزة أنام يا دينا
دينا : نامي
أنا : انام ازاي وانا قاعدة معاكو
دينا : عادي نامي وانتي قاعدة
انا : هو انتي بتنامي وانتي قاعدة ؟ ولا بتنامي في السرير
دينا : بنام وانا قاعدة وضحكنا احنا الاتنين
وده كان كلام دينا معايا كل 5 دقايق

واللي كان مش مخليني أكلم أي حد الا هو خالد عنده خمس سنين بس ما شاء الله متحسش انك بتكلم طفل بجد شعلة ذكاء ربنا يحميه

طول ما احنا قاعدين كان بيقوللي بصي هغنيلك ومش أي اغاني دي أغاني هو مألفها وقتيا ارتجال
في أغنية بتقول وحشتييييييني وبتوحشييييييييني يا وحشااااااني
بصي بقى انتي قرعة دي أغنية تانيه :) ودي رسالة موجهه لحبيبته الأولانيه ياسمين

وغنى لي أغاني تانيه كتير وقبل ما نمشي من عند طنط بشوية صغيرين خالتو بتقول له هتتجوز دينا يا خالد؟ قال لها لأ أنا مش هتجوز الا المزة ؟ فخالاته قالوله مين المزة دي يا خالد قالهم رد مكنتش متوقعاه خالص : ليدي مش هتجوز غير ليدي فأنا رديت عليه وقولتله مين؟ قاللي انتي (شكل خالد عينه بتوجعه تقريبا) :)

وبابا قعد يهزر معاه ويقوله مش موافق فقال لبابا بص انا هتجوزها من غير ما توافق
وساب الكلام مع بابا وفضل يبص لي لدرجة اننا كلنا قولناله مالك يا خالد ؟ وبعدين كنت بكلم جومانا فجه خالد مسك ايدي

فأخدت ايده وقولتله شوفت بقى ايدي وايدك شبه بعض بس ايدي كبيرة شوية وايدك صغنونة
قاللي أيوة بصي بقى أنا هجيبلك فستان فرح جميل أوي وهتجوزك
قولتله : جواز كده على طول من غير خطوبة يا خلودة
قاللي : نتجوز الأول وبعدين نعمل خطوبة فضحكت

ولما جيت أمشي قام وسلم عليا وقاللي الوصايا العشر

1- انتي كده عسولة اوعي تطخني ( من التخن يعني) لكن ممكن تخسي شوية وتبقي زي جومانا

2- خدي بالك من شنطتك

3- خدي بالك من هدومك

4- خدي بالك من موبايلك

5- بصي خدي بالك من كل حاجة

وانا خارجة حدفلي بوسة في الهوا كمان ( اطفال رومانسية جدا) بيتهيألي لو كنت مخطوبة فعلا مكنش خطيبي هيبقى رومانسي كده رومانسية ممزوجة بالبرائة

الحمد لله اليوم ده كان جميل فعلا ويارب كل أيامنا تبقى جميلة بس احنا نركز عالجميل اللي فيها ونسيب أي حاجة مش جميلة