السبت، 31 يناير، 2009

يا فاشل ... يا فااااااااااااشـــــــــل


كلمة خالتو المشهورة ايام الامتحانات دايما تقولي انا وبنتها يا فاشل يا فاشل قابلوني لو فلحتوا
وانا بقولها وكأني مش فاهمة : أقابلك فين يا خالتو ؟؟
وانا في الامتحانات كنت رافعه شعار أهي جت يا مجتش بقى وأكيد انا ندمانة على الشعار المهبب ده دلوقتي بس الحقيقة اول مره الامتحانات اللي فاتت ميجيليش استبحس الامتحانات بصورته اللي بيجيلي عليها كل سنه (العيى التام او الموت الزئام )
ايوة صحيح كنت ببقى مصدعة طول يوم الامتحان ومخنوقة اليوم اللي قبل الامتحان كله وكان لازمن ولابند اصحى مفزوعه من النوم (يوم الامتحان )على اساس ان راحت عليا نومه ومروحتش الامتحان مع ان ماما حبيبتي ربنا يكرمها ويحفظها كانت بتصحيني وتفطرني بالعافيه قبل ما انزل اللجنه ولازمن ولابند برضه نتخانق سوى علشان افطر انا مبحبش افطرررررررررر وبعدين تقوللي بالتوفيق والنجاح مع قبلة اموية
( مش في قبلة ابوية يبقى في قبلة اموية ولا ايه) قبل ما انزل علشان اروح الانطحان
وسبحانك يارب كل ايام امتحاناتي تقريبا كان فيها مظاهرات علشان اللي ما تتسمى ازرائيل واكيد كنت بتأخر ع اللجنه (علشان الطرق مقفولة بسبب المظاهرات) وفي مره من المرات (يوم امتحان الرواية) فوفو عطلت وكان في مظاهرات وبابا مكنش فاضي يوصلني الامتحان فأخدت تاكسي بعد عذاب وروحت ال (كل لية وانتا تتخن) الكلية لقيتهم قافلين
بوابة الكلية ولسه هتشاكل لقيت الامن فتح البوابه وكل الناس اللي جوه الكليه من اصغر فراش لأكبر حيتان (ضكاتره) بيزعقولي علشان التأخير طب وانتوا عارفين اتأخرت ليه يا شوية اغبيا ??
انا كنت نازلة قبل معاد الامتحان بوقت كافي اني اوصل بفوفو المهم وقتها في ضكتور بتاع قسم لغة عربيه بص علينا اللي كنا رايحين متأخر وقال لنا ولو قولنالهم متأخرين ليه هيقولو مواصلات رديت عليه بصوت ضعيف لا وانتا الصادق دي المظاهرات بس بصراحه حرق دمي طول اللجنه وفضلت فاكره كلامه وهو اصلا انسان منافق بكل معنى الكلمه يعني بيطلع على قناة دينية وعامل فيها شيخ وفي القناة دي بيلبس جبة وقفطان وسبحه وحاجات كده وفي الكلية بيلبس بدلة وبيعمل فيها مهم وهو ما علينا (مش دول اللي بيمثلوا ديننا ) الاسلام كله تسامح ومحبه مش تجهم وعبوس وكلام جارح
كان نفسي اقوله الكلمتين دول في وشه بس للأسف لما خلصت امتحان كان مشي

المهم سيبنا من ذكريات الانطحانات دلوقتي انا بجد حاسة بالفشل يعني مثلا مش متميزة في دراستي اللي اخترتها لسببين بسببي وبسبب الروتين والامخاخ المزفته
بسببي : مبحبش المذاكرة اطلاقا مطلقا بالتلاته
بسبب الضكاترة : الكتب ورقها اصفر ومنيله بنيله ونص الكلام ممسوح ولما كان بيجيلي هس هس وافكر اذاكر من الكتاب كنت بصدع وبيجيلي عته في فص الجمجمه الشمين علشان الخط صغير جدا ولا صور ولا احزانون ده غير ان الكتب اسعارها غالية جدا مقارنة بجودتها المنيلة بستين نيله وكمان في ضكاترة بتستخسر فينا التقديرات تصدقوا في واحدة منهم قالتلنا انا اتمرمطت على مخت الدكتوراه ولازم امرمطكو زي ما انا اتمرمطت والضكتورة دي وعينتها بهديلهم اغنية ( اشوف فيك يوم ع اللي انتا عملته فيا ) و ( ولا بد من يوم معلوم تترد فيه المظالم ابيض على كل مظلوم واسود ومنيل على كل ظالم)

وكمان حاسة بالفشل لأني مش ست بيت شاطره يعني بكره شغل البيت موووووووووت ممكن اعمله احيانا على مضض لكن مش على طول
بحب المطبخ احيانا برضه مش في كل الاوقات لكن يوم لما بطبخ بعمل اكل على حق بابا بيقوللي انتي نفسك حلو جدا في الاكل (طبعا بيجاملني هو وماما)

وحاسة بالفشل لأني بدرس الانجليش من خماشر سنه منهم 3 تخصص في المدعوقه الكليه وكنت داخله الكلية بأحلام وردية وعلى اساس ان الانجليش ده هيبقى لغة لغة يعني وفوجئت ان الدفعه بتاعتنا منهم ناس كتير مبيعرفوش الالف من كوز الدره ونطقهم في الانجليش يهلك من الضوحك
يعني مثلا قبل كده في بنت من دفعتنا بقولها لو سمحتي عايزة الfile

قالتلي :عاه ؟؟؟؟؟ ( وبؤها مفتوح زي نفق الازهر)
انا : البتاع اللي بيتحط فيه الورق ( كنت ناسيه اسمه)
ردت : مين دهو
انا : افتكرت اسمه الملف ممكن الملف بتاعي
صحبتها قاعده معاها : يا بت فايل يعني ملف كسفتينا بقالك سنتين في انجليزي ومنتيش عارفه
انا مشيت قبل ما يجيلي شلل رباعي (طلعت معانا في دفعتنا)

ومرة تانيه رحت الكلية متأخر ع المحاضرة واضطريت اقعد في البنشات اللي ورى في اخر المدرج ولقيت بنتين ورايا بينطقوا الكلام(الانجليش)بطريقة فطستني من الضحك وكانت جنبي زميلتي عمالة تسكت فيا علشان منطردش من المحاضرة مش فاكره الكلمات اللي كانوا بيقولوها لكن اخر كلمه واحده منهم كانت بتقول للتانيه الداكتور قال ايه خليه يسبلها تاني ولا انتي اسبليهيه اسبليهيه
انا : اسبليها واشربي مايتها :)

ولا يوم لما صبئت عن الدين الجديد وقولت لزميلاتي طالما احنا في الكلية وبنقعد وقت طويل سوى ومش لاقيين حد نتكلم معاه انجليش تعالوا نتكلم انجليش سوى علشان ننمي اللغة والصوتيات عندنا فكلهم برقولي وقالولي : النبي عربي يختي نتكلم انجليزي ليه احنا

وزميلة تانيه قالتلي : انتي جايه من باريس في علبه ( حد يفهمني يعني اييييييييييه)

وكفاية كده ولو ليا نفس اكمل باقي الحاجات اللي حاسه اني فاشله فيها هكملها

سلاموووووووز بالفراولة والموز

الجمعة، 30 يناير، 2009

زيارة لطبيب الأنف والأذن وكمان الحنجرة

بصينا على اللوحة اللي مكتوب عليها اسم الدكتور بتاع الانف والاذن والحنجرة ومكتوب عليها استشاري انف واذن
وحنجرة فقلت لماما ايه ده يا ماما ده الدكتور طلع استشاري مش دكتور يعني الناس بيستشيروه بس عااااا وماما قالتلي (والله مش فاكرة قالتلي ايه) المهم يعني عرفتني ان استشاري دي حاجة كويسة يعني وبعدين راعوا اني مكنتش بسمع كويس وقتها يعني (وداني كانت مسدودة فهفتكر ازاي)
المهم طلعنا العيادة في الدور التاني وكانت العيادة بسم الله ما شاء الله زحمة لدرجة ان كان في واحد واقف عالسلم
دخلنا العيادة وماما قعدت ومكنش في مكان اقعد فيه الا كرسي كان بتاع الممرضة اللي في العيادة المهم طلعت الممرضة من اوضة الكشف
وماما دفعت كشفين ليها وليا (ماما عندها نزلة انفل وزا جامدة ربنا يشفيكي يا مامتي يا حبيبتي) انا السابقون ومامتي اللاحقون والممرضة سألتني على الاسماء قلتلها اسم مامتي واسمي قالتلي على اسمي مدام ليدي وعلى اسم مامتي انسة قولتلها العكس بس اهي بشرة خير برضه :) مش عارفة تفائلت ليه

المهم شوية كده وسألت الممرضة

انا : هو احنا هندخل امتى؟؟
الممرضة : بعد 5 كشوفات ان شاء الله
انا : وده من ايه علشان الحسد ولا ايه
الممرضة : ههههههههههه لا والله هي جت كده
ومرت ربع ساعة واحنا قاعدييييييييييين وناس داخله وناس خارجه
ومر نص ساعة واحنا برضه قاعدييييييييين

انا : الممرضة تقريبا قصدها خمس كشوفات في خمسه
ماما : هما فعلا خمس كشوفات اللي دخلوا والباقي استشارة

وفي خلال النص ساعة كان في بنتين مايعين قاعدين يتكلموا ويضحكوا بصوت عالي وانا مش طايقة نفسي من كتر الصداع اللي عندي ونفسي اقولهم بجد انتو معندكوش دم احنا في عيادة مش في نادي المهم مسكت نفسي وقولت بلاش مشاكل اصبر على بنتين السو يا يكشفو يا تجيلهم ............ تاخدهم واخيرا جت لبنت منهم مكالمة تليفون من باباها وفضل يزعقلها وانا في سري مش شمتانة بس بصراحة كنت فرحانه فيها علشان تستاهل وبعدها على طول دخلوا كشفوا ومشيوا

وانا عمالة ارتب افكاري هقول ايه للدكتور ايوة هقوله وداني مسدودة ومناخيري ملووحة وحنجرتي زهقت مني وبحب النوم اد عنيا بعد اذنك يا دكتر ياريت تكتبلي انتي نوم

وانا متأكده اني اول ما ادخل للدكتور ويسألني بتشتكي من ايه هقوله اشتكي لمين يا بيه (زي فيلم سندريلا بتاع صباح)الشكوى لغير الله مذلة






المهم فات ساعة الا عشر دقائق واخيرا دخلنا عند الدكتور (دكتور كوبارة كده وقور وما شاء الله وشه منور وشكله بيقول ان سنه اكبر من باباتي )
وقولنا السلام عليكم فرد علينا السلام وبعدين بص لماما ونفضلي خااالص وسألها بتشتكي من ايه
قلت صباحه تطنيش المهم ماما قالتله عندها ايه وفي الوقت ده وانا شايله هم هيكشف على وداني ازاي بربطة الحجاب الغريبة اللي انا عملاها دي مع انها ربطة بسيطة بس صعب تتفك
المهم كتب لماما روجيتة مليانة ادوية وليها اعادة كشف وبعدين انتبه ان في كائن بشري واسمه ليدي موجود في العيادة وفجأه لقيته بص نحيتي وابتسم وقاللي بتشتكي من ايه يا ليدي : (انا في سري ليدي كده هو احنا اصحاب ولا ايه) المهم فاكرين الكلام اللي كنت عايزة اقوله طااااااااار ولقيتني بقوله ودني مسدودة وبعد فسوة من الزمن قولتله لأني بسمع بالسماعات في وداني
الدكتور : طب وريني ودانك
انا : (في سري) وداني مين اللي تشوفها هيهات هيهات )حاولت اهوي الحجاب ولا فايدة لدرجة ان الدكتور اتدخل وقاللي انتي رابطة الرابطة دي ازاي؟؟ قولتله بالدبابيس المهم بعد عناء شاف وداني وقاللي ان وداني عايزة تتغسل
انا : (في سري برضه طب متنساش الشاور جل ) ودني اليمين ولا ودني الشمال
الدكتور : الاتنين
انا :(بإندهاش) الاتنين؟؟؟!
انا برضة : كل ده من السماعات
الدكتور : انتي بتلبسي سماعات ايه
انا : سماعات التليفون
الدكتور : ؟؟؟؟؟؟ (استغرب)
انا : أأقصد سماعات الموبايل والكمبيوتر كمان
الدكتور : السماعات ملهاش تأثير كبير هي بس بتخلي الشمع يسد الودان ومش مشكله انك تلبسي السماعات بس ابقي وطي الصوت
انا : بإبتسامه كلها هبل انا بعلي الصوت عالأخر (مش بحب اسمع اي حاجة في الهيدفون او السماعات الا والصوت اعلى حاجة)
الدكتور : الصوت العالي بيأثر على عصب السمع جدا وبيضعفه وبيعمل مشاكل انتي في غنى عنها
انا : بابا قاللي نفس الكلام برضه
وغسل وداني ولاول مرة احس ان وداني من جواها منتعشة وبتوجعني في نفس ذات الوقت والحمد لله على طول وقتيا
وداني مبقتش مسدودة وسمعت كويس المهم الدكتور سابني تاني وكلم ماما فانا بلبس الحجاب وفأجه لمحت ايييييه لمحت مكتبة مليااااااانه كتب ما شاء الله بجد وقفت قدام المكتبة ونسيت اني في عيادة اصلا ولقيت الدكتور بيقوللي : يا ليدي يا حبيبتي في مرايه هناك (ااقدر اربط الحجاب كويس يعني)
انا : ( ح ايه حبيبتي ازاي يعني التار ولا العار حد معاه سكينه اغزه بيها يا جماعه )لا انا ببص على الكتب بسم الله ما شاء الله مكتبة جميلة جدا
الدكتور : (هو قال حاجة بس انا مسمعتش بصراحة بس شكله دكتور مثقف ما شاء الله مكتبته فيها امهات الكتب الاسلامية وكتب من مكتبة الأسرة وقواميس انجليش ..الخ)
وخرجنا للريسبشن بتاع العيادة ما شاء الله كانت مليانة اكتر من الاول حتى في ناس قاعدين عالسلم من كتر الزحمة ما
شاء الله ربنا يكتر من عيانينك يا دكتر
ونستفيد من البوست ده شوية حاجات

1- محدش يستخدم القطن بتاع الأذن لانه مش بينضف الشمع بتاع االاذن بل بالعكس بيدخل الشمع جوه الودان ويتجمع لغاية لما الودان تتسد خاااالص ومحدش يقوللي اومالننضف وداننا ازاي

2- لو حد عايز يسمع بسماعات الايبود او الموبايل يبقى لفترة مش كبيرة وبصوت مش عالي وعلى فكرة كمان السماعات بتساعد على تجميع الشمع جوه الودان مما يعمل على سد الودان

3- ربنا يشفي كل مريض يا رب ويجعل كل لحظة الم وكل تعب وارهاق في ميزان حسنات كل مريض

4_ I have 2 ears the world is mine


الحمد لله دائما وابدا على نعمه


الأربعاء، 28 يناير، 2009

قمر الأقمار


ملحوظة : مسحت البوست اللي فات لأني كنت مخنوقة شوية فيه وكنت بكتب بعصبية وكويس ان كان لسه محدش علق عليه

جلست في نافذتي أُناجي القمر فهو رفيق ليلي في ايام الحزن و البرد والظلام
ايها القمر العالي يا من تنير ليلي تُرى هل تسمعني؟؟ هل تشعر بوحدتي؟؟
ايها القمر حيرتني في امرك فكلما اراك أحس انك حزين ودموعك تنهمر
اتدري اشعر انك وحيد بالرغم من وجود النجوم حولك
اتدري ايضا اشعر ان النجوم هي فيض من دموعك الحزينة
يا قمر كم تمنيت ان اجلس بقرب حبيبي فيقول لي (شايفة القمر يا ليدي)
فأرد عليه (طبعا شايفاه هو انا عميت ولا ايه)
يا قمر يا من تنير ليل العاشقين بأشعتك الفضية
با من تصبر الحيارى والراحلين بعيونك الجميلة
يا قمر يا رفيق حياتي ويا ساكن قلبي
فكك بقى من الكلام ده كله وادفع الايجار اللي عليك
ايون مش كل اخر شهر ادور عليك ومش بلاقيك
فيرد القمر قائلا : ايتها الحسناء (حسناء مين يا عم انا ليدي ) الا يكفيكي ان نوري يضيء قلوب البشر
يا عم القمر كلامك ده مبيأكلش عيش ما في لمبات ونجف ممكن تضيء قلوب البشر
اذن فلا تنظري الي وتهمسي لي بدموعك ايتها الفتاة
لالالا انتا بتتكلم ازاي انتا مش عارف بحبك ازاي يا قمر
فأنتا القديم الجديد البهي العنيد
حبيبي الذي ارى ضوئه من خلف نافذتي فتطمئن روحي
شكرا لك يا قمر يا اجمل قمر
يا قمر الاقمار يا احلى من كل الاقمار الصناعية
ملحوظة برضه : البوست ده ارتجال تماما مكنتش محضراه

الاثنين، 26 يناير، 2009

باركولي يا بنـــــــــوتات دخلت العشريـنـــــــــــــــات

دقات الساعة بتعلن اني دخلت مرحلة جاديدة من حياتي وبقى عندي عشريــــــــــــــــــن سنة

معقول خلاص عديت مرحلة ال teens وبقيت


twenty

بجد انا مش مصدقة اني عشت لغاية لما بقى عندي عشرين سنة

عمري ما تخيلت اني ممكن اعدي من حاجات كتير واوصل للعشرين
منها الحوادث الكتير اللي كنت بعملها بفوفو والكتكوتة والطيارات اللي كانت بتفكر تقع وانا فيهـا :) والاحباط النفساوي اللي بكون فيه ساعات واللي كافي انه يموت جمل وحاجات تانيه كتير لكن الحمد لله عشت لغاية لما بقى عندي 20 سنة

بمشي في الشوارع وأقول يااااه الشارع ده من خماشر سنة مكنش كده والبيت ده كان موجود ومازال موجود من كام سنة وفعلا الدنيا اتغيرت من ايام ما اتولدت لغاية النهاردة (حاسة اني عشت كتير اوي) :))
وبقول لماما لما ان شاء الله اكلم ولادي واقولهم انا من مواليد 1989 مش هيستوعبوا هيقولوا اني مولودة في قرن تاني
20 سنة شوفت فيها حاجات كتير واتعلمت حاجات كتير وزرت بلاد كتير وحبيت ناس كتير وفارقت ناس كتير وعدت عليا مواقف صعبة وايام صعبة وعدت عليا مواقف كنت طايرة فيها من الفرحة وايام سعيدة
مش هقول دلوقتي على اي حاجة كانت مش سعيدة في العشرين سنة اللي في حياتي علشان ده يوم مش عايزة احزن فيه ولأن الأحزان كتير أوي لدرجة اني حسيت اني أميرة الأحزان في يوم من الايام خلينا في المواقف السعيدة
من اكتر المواقف اللي كنت طايرة فيها من السعادة لما كنت عاملة بريزنتيشن بالانجليش في مسابقة بين المدارس وانا في ثانوية عامية وكنت بتكلم وبشرح افكاري بالانجليزي قبل طبعا ما اقرر اني عايزة ادرس اداب انجليش وقدرت اوصل افكاري بصورة حلوة واخدت المركز الأول بالرغم ان كان في بريزنتيشنات جامدة وكلهم كانوا بيتكلموا انجليش بطلاقة


ولما اخدت لقب الطالبة المثالية وانا في 5 ابتدائي وكنت الاعلامية اللامعة في الاذاعة المدرسية في كل المراحل الدراسية واخدت شهادات تقدير
ومع كل جايزة تفوق وشهادة تقدير كنت ببقى طايرة من الفرحة

وموقف كمان كنت طايرة فيه من السعادة لما اخدت الرخصة ياااااه مكنتش مصدقة اني حليت امتحان الكمبيوتر بتاع القيادة اخيرا وجبت 100% يعني حليت الامتحان كله صح وكمان عديت من امتحان القيادة بالعربية وبعدين تالت يوم من الامتحان رحت واخدت الرخصة واول مرة امشي على الطريق كان يوم الجمعة واول مشوار اعمله بالعربية كان للمسجد علشان نصلي الجمعة وده كان حلم من احلامي _اني اروح المسجد يوم الجمعة وانا سايقة العربية- وكنت طايرة من الفرحة لما حققته
السنة دي حاسة اني اتغيرت وحاسة ان طاقة ايجابية جت وسكنت جوايا ومخلياني شايفة الدنيا بمبي بمبي بمبي

و بعض الاقوال اللي الناس قالوهالي السنة دي
(( انتي وش الخير عليا كل ما بشوفك قبل الامتحان برتاح والامتحان بيجي سهل )) زميلتي في الكلية واسمها ام هاشم

(( مينفعش ترتبطي بأي حد لأنك مش اي حد انتي طيبة اوي وعسولة وحبوبة ومريحة (على اساس اني كنبة مثلا او مخدة ايه مريحة دي مش عارفة ) واخلاقك عالية ومؤدبة)) مرات عمي

اما عن المقربين مني فقالوا عني :
(( انتي النور اللي بينور حياتي )) , (( انتي حنينة جدا)) ماما
(( انتي زهرتنا وريحانتنا )) بابا وانا برد عليه واقول ياسمينتنا يا بابا بلاش ريحة نتنتا دي والله انا لسه مخلصة البرفيوم
(( يا ام صوت حنين )) كيكي انتيمتي وبهديلها اغنية ومن الشباك لأرميلك حاااااااالي (شوفتو صوتي حلو ازاي نياهاهاها)

الحمد لله اني كملت العشرين ويا رب تجعلها عشرين سنة شاهدة ليا مش عليا يارب
يارب اكرمني وقربني منك ومن طاعتك لأن مفيش حياة الا بيك


كل سنة وانا طيبة :)


ونبدأ في حفلة عيد الميلاد


دي شوكولاته بيضا لعشاق الشوكولاته البيضا وانا اولهم



ودي جاتوهات صغنونة لكل المدونين اللي بيزوروا مدونتي واللي اول مرة يزوروها






وده ايس كريم في يناير ايس كريم في مدونتــــي

ودي تورتة رقيقة جدا ولونها اكتر لون بحبه جاتلي هدية من المنتدى اللي انا عضوة فيه وعازمكو عليها
على فكرة في نفس ذات اليوم كان عيد ميلاد السندريلا سعاد حسني الله يرحمها فياريت كلنا نقرأ الفاتحة على روحها

السبت، 24 يناير، 2009

مواقف طريفة


ولأن الامتحان اللي جاي بعد كام ساعة أخر امتحان وختامها مش مسك خالص بصراحة و هينكد عليا فقلت افرفش البوست ده وبلاش نكد مش هيبقى كل حاجة فيها نكد يعني
كل المواقف حصلت معايا النهاردة لما كنت على الطريق السريع :
النهاردة وانا ماشية على الطريق السريع وفأجه لقيت قدامي سرب من الجموايس بيعدي الطريق واعمل ايه اعمل ايه فرملت العربية واديتهم كلاكسات علشان انبههم وقعدت اقول يالهوي يالهوي يالهوي يالهوووووووووووي يا عيني الجموايس شكلهم سمعوني وانا بستغيث كده فسرعوا من خطواتهم وجريوا (كإنهم بشر) بس برضوا عدوا قدامي ووقفت على اخر لحظة في حين ان باقي العربيات والموتوسيكلات عدو من وسط الجموايس عادي يخبطوهم مش مشكلة بقى وبعد الخضة دي قعدت اضحك على منظر الجموايس وهما بيجروا علشان يعدوا الشارع وحسيت انهم حسوا بيا وانا مخضوضة
وكان في لجان كتير على الطريق النهاردة وكل شوية اقول هيييييييييييه هيسألوا على الرخصة بتاعتي اخيرا بقى ليها لازمه
واجهز الرخصة والاقيهم بيقولولي اتفضلي يا فندم يا سلااااااام مع ان العربية اللي قدامي كانوا موقفينها طب اشمعنا بقى
المهم في لجنة من اللجان اتفاجئت بيها وكعادتي مكنتش رابطة الحزام وفضلت اربط في الحزام وانا داخله على اللجنة والامين شرطة وزميله شافو اني مش لابسه الحزام وقلت عليه العوض اكيد اخدت مخالفة ويا عيني هدفع خمسين جنيه وفضلت نفسي تلومني المهم عديت لقيتهم برضه بيقولولي اتفضلي يافندم (تقريبا انا مهمة ومش عارفه ) المهم مشيت من اللجنة ولبست الحزام وفضلت ابوسه واقوله يا حبيبي يا حزام
يا حبيبي يا حزام
والعربيات سريعه جدا فاكرين انهم ماشيين فوق السحاب مش ماشيين في طرق مكسرة يعني انا كنت ماشية على 120 وفي عربية جت عملت زوووووو من جنبنا معنى كده انه كان ماشي على 150 مثلا
ولا لوحات الارقام الجديده بتاعت العربيات حروفها مش مفهومه وممكن تتفهم غلط يعني مثلا واحد كان مكتوب على عربيته (و ط ي) يعني لو قرأناها بالفتحة ممكن تكون واطي وهما نسيو الالف ودي ااقل كلمة ممكن تتفهم من الحروف الغريبة دي ده في حروف تانيه بتكون كلمات افظع

-----------------------------

زي ما توقعت الامتحان ده اصعب امتحان انجليش مر عليا من يوم ما دخلت الكليه وبقول انجليش علشان امتحانات الفرنساوي في الكلية السنين اللي فاتت كانت بنفس صعوبة امتحان النهارده
كلنا خارجين من الامتحان واجمين ومتنحين من الامتحان والسيد الضاكتور جاب اسئلة هو لاغيها
واللي زاد وغطى ان ايدي اليمين كانت بتوجعني جدا قبل الامتحان ومش عارفه من ايه فكل ما كنت بحاول اكتب كانت بتوجعني جدا وانا حاليا بكتب بإيدي الشمال عاااااااا


الأربعاء، 21 يناير، 2009

ليس كل ما يلمع ذهبا


من شوية كلمت زميلة من زميلاتي في الكلية عالايميل وقلت فرصة نراجع شوية حاجات في المادة اللي جاية المهم مراجعناش ولا حاجة
وكعادتها فضلت تقوللي مش عارفة اذاكر مش عارفة اركز وتوترني اكتر ما انا وهي اصلا دحاحة وانا متأكده من كده زي ما انا متأكده انها دخلت النت علشان تاخد هدنه شوية من المذاكرة المهم في وسط الكلام لقيتها بتقوللي :
انتي مش في اخبار مش هتتخطبي ولا لسه؟؟؟؟
واتفاجئت بسؤالها الغريب ده في الوقت ده يعني احنا في ايام امتحانات والمادة الجاية متكلكعة بالكلاكيع وانتي بتفكري في اني هتخطب ولا لسه ثم اني اصلا مش بعرف اخبي فرحي او حزني الاتنين بيظهروا عليا يعني لو كنت هتخطب كانت شافت قلوب وورد مرسومين في عنيا من غير ما اقول حاجة
المهم كلام زميلتي فكرني بشوية حاجات منها
اولا : كنت في الكلية في يوم وزميلتنا س1 بتتكلم عن الخطوبة وفرحانة بقى وبتتمنظر على الجروب اللي كانت قاعدة معاهم وبعدين قالتلهم فاكرين فلانة اتخطبت فردت بنت تانيه وقالتلها مش هي مخطوبة فردت س1 وقالتلها انتي لسه فاكرة دي سابته من زماااان واتخطبت للواد تومة
(يعني في بنات بتبدل في الخطاب وبنات تانيه مش لاقيه خطاب وفي وجهة نظري ان الفئة دي من البنات حتى لو كانوا جامعيين بيوافقوا بأي حد بشرط انه يجيب شبكه ومهر غاليين ويعمل لها فرح احسن من فرح بنت عمتها )
ثانيا : احنا كنا جروب مكون من 6 بنوتات قبل الجامعة وكل البنوتات اتخطبوا واتجوزوا ما عدا انا :) وكلهم بيحسدوني على اني متجننتش زيهم وكلهم مجمعين على انهم ضيعوا فترة جميلة من عمرهم منهم اللي مكملتش تعليمها علشان الجواز ومنهم اللي زهقت من المسؤليه ومنهم اللي حست ان عمرها اتسرق منها ..... الخ
ثالثا : وانا في تانيه ثانوي من كام سنة زميلتي وصبحتي اتخطبت وبعدين مامتها كلمتني في التليفون تعزمني على الخطوبة وقالتلي كلام مش ممكن انساه
(( متزعليش يا ليدي بكرة يجيلك اللي يحبك ويقدرك انتي بنوتة حلوة وعسولة ومثقفة .....)) وفضلت تقوللي كلام كتير على اساس اني عنست وهي بتواسيني وقفلت الخط من هنا وحكيت لماما على كلام طنط وفضلنا نضحك ونهزر على اني خلاص بقى عنست وبقى عندي 150 سنة ويلا حسن الختام
4- في الوقت اللي انا بفكر فيه انا عملت ايه في الحياة وحاسة اني ضيعت حياتي وبفكر ايه الحاجة المفيدة اللي ممكن اعملها واتعلمها وبحاول اظبط شوية حاجات في شخصيتي زي العصبية مثلا في الوقت اللي كل الناس فيه بتكلمني على موضوع العرسان والارتباط
طب وهو انا علشان يبقى ليا لازمه في الحياة لازم اتخطب دلوقتي ولا الاول اخلص دراستي واثبت ذاتي وانضج شوية فكريا وابقى فعلا مستعدة لتحمل مسؤلية الزواج وبعدها افكر بقى في الخطوبة والارتباط والجواز
5- زي ما في مضايقات وضغوط على البنات انها تتخطب في برضه ضغوط على الشباب انهم يخطبوا ويتجوزوا
يعني مجتمعنا مش سايب حد في حالة
مستنية مناقشاتكم ...


الثلاثاء، 20 يناير، 2009

حكاية امتحان


خالق الأكوان يا ربــــــــــا تعالى يا عظيما ليس الاك المجيب
يا عظيما ليس الاك الــــــه يا غنيا ليس الاك الحسيب

الكلام ده ملوش علاقه بالموضوع بس مش عارفة ليه الكلام ده عمال يتردد في دماغي زي ما تكون دماغي مشغلة سي دي النشيد ده
********************************

بابا : مالك يا ليدي حاسس انك قلقانة من الامتحان الجاي
ليدي : انا فعلا قلقانه جدا من الامتحان الجاي يا بابا لأن اسئلة الامتحان مبنية على الحفظ وانا مش بحب احفظ فالمشكلة لو حفظت ونسيت كلمة السؤال كله هيطير
بابا : ذاكري بس وخليها على الله

ليدي : ونعم بالله

وبعد شوية
ماما : احنا هنخرج شوية علشان الجو يبقى هادي وتعرفي تذاكري براحتك
انا : قصدك مذاكرش براحتي خدوووووووووني معااااااكو عاااااااااااااااا
ماما : بكرة لما تخلصي امتحان ابقي اخرجي معانا براحتك
انا : لاااااا بكرة ايه هو حد ضامن عمره لبكرة
ماما : مذاكرتك اهم حاجة دلوقتي
انا : المذاكرة دي اخر حاجة الواحد يفكر فيها

وبعد شوية .

تليفوني رن اه اه تررن تررن واللي ردت اه يا عيني صوتها احن
ماما : الو ايوة يا ليدي اخبار المذاكرة ايه
انا : كويسة وبتسلم عليكي يا ماما اندهالك تكلميها ؟
ماما : بطلي هزار واقفلي المدونة وذاكري
انا : يا فقساااااااااني يا ماما بس حضرتك عارفه اني بكرررررررررره الحفظ ومش عارفه اذاكر
********************

المادة اللي جاية بعد كام ساعة دي اسمها مقال او بلغة الاعجميين Essay
وازاي ازاي ازاي اوصفلك يا حبيبي ازاي ان المادة فظيعة ازاي يا حبيبي
مع ان المفروض ده يكون اسهل انطحان بس انا متوجسة خيفة منه (بتكلم بالنحوي ادي اخرة الانطحانات)

هي الأرض بتتكلم عربي الأرض الأرض
حد قال انها بتتكلم عنجليزي لا سمح الله
يعني كده انا بخالف الطبيعية الكونية والجيولوجيا الميتفيزيقية والمصاعد الهوائية التنفسية والأرانب بالملوخية( ولو حد عارف معنى الكلام ده يقوللي )

وايييييييييه انا بكره الانطحانات واقولها لو اتسأل

خير خير ان شاء الله خير
واللي تخاف منه ميجيش احسن منه ان شاء الله

*******************
تحديث : مش عارفة الامتحان كان صعب ولا كويس وانا حليت كويس ولا لأ بس اكيد هعرف لما النتيجة تظهر
الامتحان الجاي notes in linguistics :((((((

السبت، 17 يناير، 2009

مبروووووووووك بجد الف الف مبروووووووووووووك








بالطول بالعرض الأحمر العماني هز الأرض

انا بشجع الفريق الاحمر من وانا في ثانوية عامة وبجد فرحاااااااااااااااانة ان اخيرا عمان أخدت كأس الخليج اللي تستحقه فعلا

الف مبروووووووك بجد من كل قلبي لكل العمانين ولكل صحباتي وليـــــا

صحبتي الانتيم بعتتلي رسالة بتقوللي انا مش مصدقة اننا فزنا ألف مبروووووووووووووك

وأحلى حاجة بجد انهم منسيوش ان غزة لسه محتلة وعملوا علم كبيــــــــــــــــر جدا مكتوب عليه قلوبنا وتعاطفنا مع غزة



الجمعة، 16 يناير، 2009

صمتاً


لأن اللي انا حاسة بيه بعدما شوفت صور لأطفال غزة مش ممكن يتعبر عنه بأي كلام هسيبكم مع نشيد لاحمد ابو خاطر

رفعت النشيد عالنت وحطيت لينكه في نهاية الموضوع علشان اللي عايز يحمل النشيد
ملحوظة : لو سمعت النشيد بقلبك لاااااااااازم عينك تدمع (ربنا يصلح الاحوال)


صمتاً أصِيخي واسمعي يا أَمّتي ما عُدت أصبر أن يموتَ بياني

شِعري يُراودُني لأقذفَ جمرةً مما حوى صدْري منَ النيران

ما عاد يحْوِيني سُكوتي والبُكا أنا لستُ مَجْبُولاً على الخُذلانِ

أنا في يميني الشَّمسُ تُشْرقُ عزةً وأنا الثُّريا همَّةً وتفاني


أنا مُسْلمٌ والمَجدُ يقْطُرُ كالنَّدى والعِزُّ كُلّ العزِّ في إيماني

أنا للحياةِ رواؤها ودواؤها وأنا الشِّهابُ إذا بدى سَتراني

يا أمّتي انتزعوا صباحَكِ عنوةً فمتى يعود الصُّبْح للشُطْآن

يا أمّتي آن الأوانُ لصحوةٍ فاستبشِري بالفجر في بُرْكاني

يا أُمّتي انتَزِعي لِواءَ حضارةٍ فالكون في صَخَب بلا رُبَانِ

ما عاد يعرف للرّشادِ طريقةً أنت المؤمّل...أنت لي عنواني

حارت عقول النّاس بين مذاهبٍ لا تهتدي بالنور من قرآني

تجري وراء الغرب في لهثِ وهل سيحقّقُ الغربًًُُ الغريق كياني

تجري وفي العينين ألفُ تساؤلٍ

عزّ الجوابُ .. فذاك ما أبكاني

عبثت بنا أيدي اليهود وحفنةً ممن يبيع الدين للشيطانِ

في كل يوم تُستباحُ مدينةٌ أين الذين تهزّهم أحزاني ؟ّّ!

أين الذين تشدّقوا بعروبةٍ وجنين تصفعُ وجهَ كل جبانِ

أين الحقوق وقد أُبيدتْ أمةٌ؟!وأنا الملامُ إذا صرختُ: كفاني

سَل مدّعِي حفظ الحقوق لهرَّةٍ هلْ هرةٌ أولى من الإنسان؟؟؟؟؟؟؟؟؟؟!!!!!!(ااااااااااااه من كل قلبي)

كلُّ الحقوقِ مُصانةٌ في عُرْفِهِم إلا حُقوقَكِ أمّةَ القرآن

!إني وإن يكن البكاء نقيصة أبكي لحالك سائر الأزمان

وآظلُّ أنْسُجُ بالقصيدةِ بَيْرَقاً حتّى يرفرفَ إن بدتْ أكفاني

الخميس، 15 يناير، 2009

من غير عنوان

لتالت مرة من بداية الامتحانات اتاخر ع الامتحان ربع ساعة بسبب المظاهرات (لا تعليق)
ولما متأخرش من المظاهرات فوفو تعطل واتأخر برضه !!
--------------------------------

يا تامر حسني اتلهي
من فترة وانا كاتبة عن تامر حسني ومش راضية انشر كلامي في البلوج لكن خلاص بقى زهقت من اللي بيسموه ملك الجيل
ملك جيل ايه ؟؟؟؟؟ تامر بيغني لفلسطين وهو زور في اوراق الجيش بتاعته اساسا يعني واحد بيتهرب من جيش بلده هيدافع عن بلد تانيه ازاي يعني ؟؟ مش قادرة افهم بصراحة ان عنده احساس اساسا باللي بيحصل ومش فاهمه ايه غرضه من اغنيته
وقال ايه تامر فلته بيكتب وبيلحن معظم اغانيه دي بالذات مش مصدقاها
وبصراحة لو تامر ملك الجيل يبقى ملك جيل التافهيين

--------------------------------
الكابتن شوبير استفز كل زملكاوي في برنامجه بعد ماتش الاهلي والزمالك
جاب شوية كومبارس لابسين احمر وبيهتفوا للاهلي وبيقولوا على الزملكاوية اللي معاهم في الاستديو قاعدين ليه ما تقومو تروحو !!
والله ولا كأننا في حضانة وبنغيظ بعض
ايه الاسلوب السخيف ده ؟؟؟؟؟؟

--------------------------------
في زميلتين معايا في الكلية كل ما يشوفوني وانا ماشية بالعربية لاااااااازم اعمل حادثة
اول مرة قولت انا بيتهيألي
وتاني مرة مختش بالي اوي وقول اكيد صدفة
انما تالت مرة اتاكدت ان عيونهم مش كويسة
ربنا يستر

-------------------------------

لسه 3 امتحانات واخلص امتحانات الحمد لله

-------------------------------

كان في دماغي كلام كتير جدا لكن كل الكلام طار اول لما بدأت الكتابة :(
المهم وحشتوووووووني

الجمعة، 9 يناير، 2009

ومازال الصداع مستمرا...

نام وارتاح يأتيك النجاح عاااااااااااااااااااااا

انا الحمد لله زهقت من الامتحانات عندي امتحان خنيق بكرة المادة خنيقة والدكتورة خنيقة انا مسمياها دكتورة المقبول

يمكن الصداع اللي مش راضي يروح عندي ده من كرهي للمادة دي اللي اسمها ادب مقارن compartive litrature

عندنا 3 مسرحيات الاولى مسرحية روسية والتانية امريكية والتالتة بريطانيه والمفروض نقارن بينهم

خيييييييييييير ان شاء الله انا مش متفائلة اطلاقا وخصوصا اني شفت امتحان التخلفات بتاع السنة دي وكان صعب جدا وفيه حوالي 7 اسئلة

منهم 3 اقتباسات

(quotations)
والمطلوب التعليق عليهم علما ان كل اقتباس المفروض يتحل اقل حاجة في 6 صفحات ده لو مكنش اكتر واكيد امتحاننا بكرة هيجي اصعب من امتحان التخلفات والمشكلة الحقيقة بعد صعوبة الاسئلة ولفها ودورانها هتبقى الوقت زي امتحان النقد بالضبط

وعلى رأي كيارا لازم اشلكم معايا اومال اتشل لوحدي يعني؟؟؟ عااااااااااااا

ولا حول ولا قوة الا بالله وحسبي الله والله العظيم

الأربعاء، 7 يناير، 2009

كل سنة وانتا حبيبي






كل سنة وانتا طيب ومن قلبي قريب والسنة دي معايا واللي جاي ويايا يا أغلى الحبايب يا سكر ودايب يا كل الحبايب كلك خير وطيب

فاكرة كل حاجة حلوة عملتهالي وعلمتهالي طول عشرين سنة الا كام يوم

فاكرة لما كنت نايمة وبحلم بصوت عالي وبقول الألوان الألواااان ونزلت الساعة 1 بالليل جبتلي الالوان اللي كان نفسي فيها وعملتهالي مفاجأة الصبح قبل ما اروح المدرسة

فاكرة لما عييت وانا في سنة تالتة ابتدائي وكان عيا جامد وكنت بتاخد الدوا اللي كان طعمه وحش جدا معايا علشان تشجعني اني اخد الدوا

فاكرة اول مرة سافرت وانا طفلة ومن حبي ليك عييت فترة طويلة ومخفيتش الا لما شفتك

فاكرة اول مرة قابلتني في المطار وجبتلي عروسة جميلة جدا

فاكرة لما اخترتلي وعلمتني في احسن مدارس

فاكرة حاجات كتير حتى قسوتك عليا فاكراها ودلوقتي بقول ان قسوتك أحن من قسوة الأيام

بابا حبيبي كل سنة وانتا طيب وبكل خير وصحة وسعادة

وكل سنة وانتا الى الله أقرب

وفي عيد ميلادك اللي هو مع عيد ميلاد السيد المسيح (سيدنا عيسى) بتمنى ربنا يحفظك ويحميك وينصرك ويكرمك ويفتح لك ابواب الخير والسعادة

بنتك المُحبة : lady e

الاثنين، 5 يناير، 2009

الدنيا بتمطر نـــــــــــــــار

مش عارفة اقول ايه عندي كلام كتير وافكار كتير حرماني من النوم وتوصلت الى اني لا أجيد فن الكلام بس لازم اتكلم

النهاردة الفجر الباب بتاعنا خبط تخبيط عنيف طبعا نطيت من السرير مفزوعة
طلع جيراننا الموقرين جايين يصحونا بهمجية علشان نودي بنتهم المستشفى مع ان احنا مش اصحاب اوي مع جيراننا دول ومع ان عندهم موتوسيكل ومع انهم كمان ناس مش ودودين وغالبا بيضايقونا بس في وقت الشدة مستعانوش بحد غيرنا لأنهم عارفين ان مفيش حد قلبه طيب غيرنا هينزل الوقت ده وفي البرد ده يروح المستشفى معاهم !!
اخدت اول شال على البيجاما بتاعتي ولبست حجابي بسرعة ونزلت معاهم كانت طفلة صغنونة ومامتها وباباها ونزلت في عز البرد وانا بتكتك واسناني بتخبط عالجيران شيلت غطا العربية وسخنتها وطلعت بيهم ع المستشفى

وطبعا في المستشفى الكل كان نايم وطبعا برضه المستشفى مستواها زي الزفت لأنها للأسف مستشفى عامة وامكانياتها محدودة
كنت اول مرة (الحمد لله) ادخل المستشفى دي لأن وانا في سن الطفلة دي بابا وماما (ربنا يحفظهم ويرعاهم) كانوا بيودوني لدكتور متابع حالتي من وانا بيبي بالرغم انهم كانوا زي اي زوجين شابين في بداية حياتهم الزوجية لسه بيكونوا نفسهم وبيبنوا حياتهم لكن كانوا مهتمين بيا وبيعملوا اي حاجة علشاني بعكس اللي شوفته النهاردة ناس الحمد لله متيسرين جدا ماديا لكن مستخسرين يودوا بنتهم لطبيب/ة اطفال !!

المهم ان الطفلة مطلعش عندها حاجة نزلة برد بسيطة وحرارتها كانت طبيعية
اللي ضايقني جدا ومخليني عايزة اعيط بعد ما رجعنا من المستشفى الاخوة الجيران سابوني لوحدي اركن العربية واغطيها (وطبعا غطيتها غلط وبسرعة ) وكمان راحوا اتكلموا بكل ود مع الناس اللي محدش منهم بيحترمهم ولابيعبرهم ومع ذلك على قلبهم زي العسل وانا وبابا وماما مهما عملنا من خير فيهم واحترام ليهم كأننا معملناش حاجة
والناس اللي بتعاملهم معاملة بقسوة وقلة احترام هما اللي بيحترموهم وعجبي !!

:((((((((((((((((((((((((((((((((((((((((((((((((((((((((((

الزمان : الساعة 12 الظهر قبل الامتحان بتاعي بساعة
المكان : الجيران برضه بس جيران تانيين
الحدث : سمعت كلام بحدة وزعيق وتخبيط وضرب طلع الكلام ده بين مين ومين بين اخين (يعني اخ واخوه)
مركزين معايا اخ واخوووووووووووووووووه
الاخ الصغير بيشتم الاخ الكبير مع ان الاخ الكبير سمعته طيبة جدا بين الجيران
وعجبي !!

الزمان : 12 بالليل
المكان : جيران تالتين
الحدث : برضه اخين بيتخانقو مع بعض وبيضربوا بعض الله اعلم بإيه
اخوااااااات بتاااااااااااكل في بعض واكيد كل ده م الفلوس وعجبي !!

الزمان : الساعة 2 قبل العصر
المكان : في الشارع وانا وزميلاتي راجعين من الكورس
الحدث : واحدة زميلتي عايزة تروح في المظاهرات ودار بيني انا وهي حوار
زميلتي : هي الساعة كام دلوقتي ؟؟؟؟
انا : الساعة 2
زميلتي : يا خسارة تفتكروا هلحق المظاهرة
انا : مظاهرة !! انتي عايزة تمشي في مظاهرة؟؟
زميلتي : طبعا علشان غزة
انا : علشان غزة ؟؟ وغزة هتستفيد ايه بالمظاهرات لو عايزة تفيدي غزة بجد روحي اتبرعي بالدم في المستشفى
وانا هاجي معاكي وتشجعيني نتبرع سوى ده عمل بجد لغزة مش مجرد كلام
زميلتي : اتبرع بدمي ليه م ابويا بيدفع لهم فلوس (لغزة)
انا : عرفتي ان الموضوع موضوع كلام وشعارات وخلاص
المظاهرة مش هتعمل حاجة
زميلة تانية : والله عندك حق فعلا مجرد كلام لكن مفيش افعال

خلاصة الكلام :-

غزة كشفت لنا حاجات كتير مكناش مكتشيفنها في نفسنا
وخلتني افكر لو كانت السما بتمطر نار هنا زي غزة يا ترى كان هيبقى تصرفي ايه وانا مستنية الموت كل لحظة
وخلتني افهم حدودنا كويس واعرف اننا امة ضعيفة ومغلوبة على امرها ولو فعلا اتفتح باب الجهاد زي ما الناس بتقول
بلدنا هتدمر في دقيقتين لأنها حرب غير متكافئة هما معاهم كل حاجة
الوحدة حتى لو بيكرهوا بعض فظاهرين انهم متوحدين
واحنا هنا الاخ بيقتل اخوه هما معاهم تكنولوجيا واسلحة مش موجوده عندنا
علشان كده مبقيتش اشوف اجتياح غزة لكن متابعه اخبارها من بعيد
مقدرش اشوفها وابقى متكتفة مش عارفة اعمل حاجة
واللي يحزن اكتر واكتر يا سادة يا عرب ان لو شوفتو الخرائط الجديدة في تليفون او غيره هتلاقوا مكتوب فيها اسرائيل بالبنط العريض مكان فلسطين
اتمنى يجي اليوم اللي نرجع فيه تاني عظماء !!


السبت، 3 يناير، 2009

تحية ل2009 في بدايتها



الحمد لله راحت سنة بكل أحزانها ونكدها وخنقتها ولحظاتها القليلة الحلوة وجت سنة جاديدة نتمنى من الله ان تكون سنة حلوة وكميلة وعسولة وبطبوطة وفرخوخة وكتكوتة وبالمرة أنفلونزا الطيور ههههههههههههههه (مش في طيور يبقى في انفلونزا الطيور اللي خلصت عند كل العالم ما عدا في مكان معين انتوا عارفينه وايييييييييييييه)

بصوا بقى في السنة الجديدة في فرح وفي زعل بس انا هركز على الفرح اللي في حياتي وهحاول بقدر الامكان اني اتجنب الاحزان (هيييييه حلوة حلوة حلوة ايه الكلام الجامد ده)

وفي البداية احب اقولكو اني اتكتب عني في الجرانين يا بوي وده بس علشان المدونين وغير المدونين اللي قرأوا مدونتي واحبوها واضافوها في المفضلة عندهم وكمان تابعوها
بجد من غير دعمهم ليا مكنتش مدونتي
طفلة مش عايزة تكبر ليها وجود اصلا (هي المدونة ايه غير شوية قراء وبوستات فوق بعض)
شكرا ليكم من كل قلبي بجد بحبكم في الله وبحترمكم
وشكر خاص ليكي يا اسماء انك كتبتي عن مدونتي في جريدة العالم اليوم في العدد بتاع يوم الخميس 25/12/2008 العدد اللي دايخة عليه لغاية النهاردة ومش لاقياه عاااااا
بجد يا اسماء انا لما شفت ان رئيس التحرير أ- عماد الدين أديب كنت فرحانة جدا
وعلى فكرة عملتلكو دعاية كتير أي خدمة بس المشكلة في ان مفيش اعداد كتير بتوصل للمحافظات وخصوصا عدد يوم الخميس


الحمد لله السنة الجديدة وشها حلو عليا والامتحان النهاردة كان زي السكينة في الجاتو عكس الامتحان اللي فات
بس يارب اكون اتوفقت للإجابات النموذجية واخد تقدير بقىىىىىى




سلاموووووز