الجمعة، 24 ديسمبر 2010

حب الوطن فرض عليا





ايه كلكوا عليا ولا ايه رواية سفينة نوح من جهة والتلفزيون من جهة وكمان الجرائد من جهة تالتة
كل دول بيشتموا في بلدي ؟! طيب هنستفيد ايه كلنا لما نفضل نقول لها انتي وحشة انتي قاسية انتي اتغيرتي وبتتبعي مقولة : عشان ما نعلى ونعلى ونعلى لازم نطاطي نطاطي نطاطي ! طب وأخرتها ايه
صعبانة أوي عليا يا مصر عارفة أنا جاية النهاردة وكان نفسي أقول كلام كتير تاعبني منك لكن عارفة انتي كبيرة وهتفضلي طول عمرك كبيرة يمكن في كتير مش حاسين بقيمتك وفي كتير بيجرحوا فيكي لكن أنا عايزة أقولك اني بحبك واني لسه شايلالك ذكريات جميلة
وان برغم بعدي عنك لسه نفسي ارجع أعيش فيكي وأكمل دراستي فيكي

عارفة اني بفرح أوي لما بلاقي ناس في مراكز مرموقة مثقفين وأدباء وفنانين عرب بيقولوا احنا كنا بندرس في مصر
عارفة الأسبوع اللي فات عرفت شخصيتين عظيمتين والقاسم المشترك بين الشخصيتين انهم درسوا في مصر في جامعة القاهرة وفي جامعة الأسكندرية عارفه انهم بيتمنوا يرجعوا يوم من أيامك أصلهم حبوكي فترة دراستهم عندك
كان بإيدهم يختاروا أي بلد في العالم يدرسوا فيها لكن اختاروكي انتي عارفه ليه لأن فيكي روح مش موجودة في الدنيا كلها فيكي سحر وحنية وطيبة عارفه انك موجوعة لأن كل ده مداري لكن في وقت الشدة ولادك اللي بجد بتظهر جدعنتهم عارفة كام مرة ولادك بيساعدوا وبيعملوا الخير من غير أي مقابل من غير حتى ما يقولوا أساميهم عارفه حتى لو شكلهم شباب تايه ومش في دماغه لكن برضه فيهم جدعنه لسه مقدرش الزمان يمحيها

عارفة يا بلدي من فترة سمعت هشام الجخ بيقولك : بتخلفينا ليه لما انتي كارهانا ومن وقتها كل لما أزعل منك يجي في بالي بتخلفينا ليه لما انتي كارهانا ومين اللي قال انك كارهانا انتي كنتي فرحانه ومتفائلة بينا وبتحبينا وعندك أمل فينا وعارفه اننا ممكن نداوي جروحك وجينا احنا زودنا جروحك وانتي أصيلة ولا يوم اشتكيتي مننا عارفة قلبي وجعني لما شوفتك جريحة بتنزفي على صفحات مكتوبة بخط مش خط ولادك خط غريب عنك بيجرح فيكي لأنك هنتي على ولادك فهنتي على كل الناس
ااااااااااااه يا بلدي أنا دلوقتي بقولك بحبك بحبك بحبك مهما يقولوا الناس عنك

السبت، 18 ديسمبر 2010

عندما نحب الأشرار


كل أو معظم البنات بيحبوا النموذج ده من الولاد

الولد اللي حواليه بنات كتير هيموتوا عليه الولد الوسيم الشيك الذكي والمرح

المتميز في دراسته والموهوب والجريء وبيعمل مفاجأت حلوة مش متوقعه واللي شخصيته قوية

واللي شايف كل البنات مش من مستواه وناقص سعاد حسني الله يرحمها تغنيله يا يا يا واد يا تقيل يا يا يا مشيبني

ياااااااه ده انا بالي طويل وانت انت عاجبني

ادوارد بطل فيلم ورواية twilight في الجزئين فيه صفات كتير من صفات الولد المحبوب وسيم وقوي وسريع ومتميز في دراسته والبنات كلها هيموتوا عليه وهو مش معبر ولا واحدة ورومانسي وحمش في نفس الوقت وبرغم كل ده حب بطلة الرواية ايزابيلا اللي كل الناس بينادوا عليها بيلا

فيلم twilight الأول والتاني من أروع الأفلام اللي شوفتها السنة دي اتأخرت سنة كاملة اني أشوف السلسلة دي من الأفلام الجزء الأول انتاج 2008 والتاني انتاج 2009 ومكنتش متحمسة اني أشوفهم لكن من اول لما شوفت شوية من الجزء الأول على mbc max عملت داون لود للفيلمين وكل شوية عمالة اتفرج ع الجزئين شوفت twilight اكتر من 6 مرات لغاية دلوقتي

أنا متأكده ان الرواية دي بتدرس حاليا في الكلية عندنا لأن أيام الكلية كان عندنا دكتر متحمس ليها جدا وكان متأكد اني شوفت الفيلم مش عارفه ليه :)

في نوعين من الأفلام نوع مباشر مبيبقاش فيه رموز ونوع رمزي بيعتمد على الرمزية وممكن تفهم الفيلم الرمزي بشكل عادي أو تفسره بشكل أعمق وتفك رموزه على حسب فهمك الشخصي

الفيلم والرواية من النوع التاني فيهم رموز كتيييييييييييير والعدد في الليمون

بعض الشخصيات :-

ادوارد مصاص الدماء وجواه وحش وقاتل وناس كتير لو عرفوا حقيقته مش هيعرفوه أصلا وفي نفس الوقت حنين ورومانسي وقادر يحتوي بيلا ويسيطر على الوحش اللي جواه معاها ومش كده وبس ده كمان بيحميها حتى من نفسه وهي البنت عايزة ايه غير كده ان يكون في سند ليها وواحد بيحبها وبيخاف عليها ويحميها حتى من نفسه – ادوارد ده هيجنني الكاتبة كتبت دوره بشكل خرافي-

ايزابيلا أو بيلا : بنت وحيدة ضعيفة منطوية ودماغ -ذكية- بتعمل حساب للزمن وبتحب التحدي ادوارد شدها ليه ومن أول نظرة حبته حتى بعدما عرفت حقيقته كانت خايفه وبتقاوم خوفها بحبها وده اللي بيحصل مع كل بنت بتحب دايما بتقاوم خوفها بحبها حتى بعدما تعرف ان حبيبها مصاص دماء !

دكتر كولين أبو ادوارد : -قمر يخوااااااتي قمر- مصاص دماء لكن رقيـــــــق وطيب أخر 100 حاجة

شكل ادوارد واخد الرقة منه :)

تشارلي : على طوووووول جد مشوفتوش ولا مرة بيضحك أو بيهزر مش بيظهر عواطفه ويمكن طبيعة عمله في البوليس مأثره فيه أووووووي

جايكوب أو جيك : حيرني أوي شوية احس انه طيب وشوية احس انه مش طيب شخصية متناقضة جدا

أليس : بنوتة لذيذة ومرحه وكلها حياه بتقدر تشوف رؤى عن المستقبل وساعات مع بيلا صاحبتها بتنسى انها مصاصة دماء

أكتر مشاهد بحبها في الفيلم

1- لما بيلا وادوارد بيكونوا قاعدين جنب بعض في المختبر وبيطلعوا النتائج زي بعض ايييييه وحشني المختبر اللي كان في مدرستي في اعدادي كان شكله زي المختبر اللي في الفيلم

2- لما بيلا كانت واقفة جنب عربيتها العتيقة وزميلها فقد السيطرة على عربيته الضخمة والعربية كانت هتخبط بيلا وادوارد جري عليها وأنقذها ووقف العربيه بإيده – حمش حمش يعني مش أي حاجه-

3- لما كان في أولاد تيييت كتير بيتحرشوا ب بيلا وكانوا ناويين يغتصبوها وادوارد جالها في الوقت المناسب وأنقذها منهم

4- طبعا مشهد الرقص السلو في أخر الفيلم حاجة كده خيال بجد من أول الديكور للرقص نفسه ل لبسهم وحوارهم سوى

5- في الفيلم الجزء التاني twilight saga : new moon المشهد اللي بيلا فيه بتجري ورى ادوارد في الغابة بعد فراقهم وبيجي عليها الليل فبتستسلم لحزنها ويأسها في الغابة وبتقع من التعب وتكملة المشهد غاية في الروعة بيوصف حالة ما بعد الفراق ببراعة أنا بعتبر المشهد ده عبقري بجد بيلا في حالة حزن وقاعدة على فوتيه صغير وروحها بتكبر حبة بحبة ومع ان عندها 18 سنة لكن بتحس في ملامحها انها بقت في أخر مراحل الشيخوخة والوقت بيمر وهي زي المشلولة من الحزن وشايلة حمل تقيل أوي وشايفه الحياة بتتغير من حواليها وهي وحيدة زي ما هي

بيمر شهر أكتوبر اللي فيه حياه والناس رايحه وجايه وبيجي شهر نوفمبر والخريف وورق الشجر الأصفر الذابل اللي زي روحها مالي المكان وبيجي الشتا اللي مليان ثلوج زي بالضبط احساسها تجاه الدنيا والحياه وكل ده بيمر ومش قادرة تتخطى ضعفها وحبها لإدوارد مالي تفكيرها مع انه هو اللي فرط فيها وسابها وبتبدأ ترجع لحياتها وتقعد في نفس الأماكن اللي كانت بتقعد فيها مع ادوارد والمشاهد بعد كده بتوصف مراحل البعد والفراق بدقة كبيرة أوي .

6- مشهد بيلا وهي بترمي نفسها في البحر من على الجبل علشان بس تشوف ادوارد

7- مشهد بيلا وهي بتحمي ادوارد من انه يظهر في الشمس ويبان أنه مصاص دماء .

الفيلم كله على بعضه الجزء الأول والتاني عجبوني جدا بس أخذت على الفيلم حاجة واحدة بس ان الكاتبة عندها حبة عنصرية لأن الشخصيات اللي عندها لا مبالاة وشريرة هما شخصيتين سود أول واحد زميل بيلا اللي كان هيموتها بسبب تهوره في قيادة عربيته الكبيرة ولورانت اللي كان عايز يموت بيلا يعني مفيش ولا واحد بشرته سودا كويس في الفيلم :(

الكاتبة برعت في تصوير الشخصيات والحوار ومصاصين الدماء والذئاب موجودين فعلا جوه البشر والبرودة والدفء وكل التضاد اللي في الرواية موجود في الناس

لو كانت كاتبة الرواية عربيه كانوا هيمنعوا روايتها ويقولوا عليها أقاويل ومكانوش هيسمحوا للرواية انها تتحول لفيلم علشان موضوع الذئاب ومصاصين الدماء ده.

أنا بقييم الفيلم بالنسبة لي 8.5 من 10 وعرفت دلوقتي أن في جزء تالت للفيلم اكيد هشوفه ان شاء الله .

-------------------------------
تحديث : الجزء التالت من الفيلم طلع شوربة :(

الاثنين، 13 ديسمبر 2010

ازاي؟


مش عارفة ليه المشاعر السلبية والسيئة بتبقى قوية أوي أقوى من المشاعر الإيجابية أحيانا
لما قعدت مع نفسي وبصيت في المدونة لقيت ان في أحداث كتير فيها تعتبر بتعبر عن حياتي حاجات حصلت فعلا وحاجات محض خيال بتمنى انها تحصل وحاجات مش عايزاها تحصل وحاجات متغاظة منها فكتبت عنها
الغريب بقى ان معظم المواقف اللي بتستفزني علشان اكتب عنها مواقف سلبية مواقف تضايق ومحبطة
ازاي الأحداث السيئة في حياتنا ليها كل القدرة دي انها تستفزنا وتخرجنا من شعورنا وتخلينا نعيش مود زي الزفت فترة وتخلينا حاسين بالألم برضه فترة
ازاي ناس أغبيا ياخدوا من وقتنا كل ده وهما مجرد قمامة البشر ووقتنا أغلى من أننا حتى نفتكرهم ونفتكر غبائهم
هي عادة الحياة نرى بوضوح اللون الأسود على الصفحة البيضاء - الزملكاوية- ولا نرى الخط الأبيض - الزملكاوي- في الصفحة البيضاء الزمالكاوية :)

السبت، 11 ديسمبر 2010

سياسة الأمر الواقع


واحنا أطفال بنعمل حاجات مجبرين عليها
بنروح المدرسة كل يوم الصبح بدري ولازم نكتب الواجب ولازم نذاكر ولازم ننجح

100 حاجة وحاجة لازم ننفذها 100 حاجة مفروضة علينا دي الحاجة الوحيدة اللي كانت بتخليني نفسي أكبر برغم اني كنت بحب حالة الطفولة جدا بس كان نفسي أخلص من كل سياسة الامر الواقع

ولما كبرت – مش اوي يعني- بالتأكيد عرفت ان حتى الكبار بيعانوا أحيانا من سياسة الأمر الواقع ومش بيبقى قدامهم أختيار

سياسة الأمر الواقع بترتبط أحيانا بالإبتزاز العاطفي وبعضها بيرتبط بالإحراج انك لازم تعمل الحاجة الفلانية علشان متتحرجش أو علشان متحرجش حد قريب منك

انا اليومين دول بتعرض لسياسة الأمر الواقع – مش عارفه مين اللي وقعه-

أول حاجة في واحد يعرف بابا للأسف مصري عيلته معاه فطلب من بابا اني اذاكر انجليش لأولاده الأطفال بنت وولد لسه في ابتدائي وباباهم ومامتهم بيشتغلوا ومش فاضيين يذاكروا لهم حد واخد باله من الطلب؟ اذاكر لهم مش أديهم درس هناك فرق

فبابا وافق ولأن معنديش مشكلة اني أذاكر للأطفال بالعكس ده انا هراجع لغتي معاهم ولأن بابا خلاص ادى كلمة لصاحبه وافقت اني أدرس للأطفال وبدأت سلسلة السخافه منهم ومن أهلهم

الأطفال فعلا واضح ان مفيش وقت ان اهلهم يربوهم أو يعلموهم وكانوا صعبانين عليا وكنت باجي على نفسي وبعلمهم وبشرح لهم والحمد لله مستواهم اتحسن كتير جدا في الإنجليش ودي اكتر حاجة كانت مفرحاني ومعرفاني ان تعبي معاهم مش رايح هدر وفي يوم جت مامتهم تكلمني وبتقولي أصل أنا قولت لصحبتي ان ولادي في الدرس ! ودرس معناها اني باخد منهم فلوس وهما تقريبا صدقوا نفسهم ان ولادهم فعلا بياخدوا درس عندي مش انا أصلا متطوعة اني أذاكر لهم وحصل كذا موقف ضايقني من الأطفال وأهلهم وبين معدنهم وقلت خلاص مش هذاكر لهم تاني وجت من عند ربنا سبحانه وتعالى وكان في اجازات كتير وأكيد محدش بيذاكر في الأجازة لكن حاليا عمالين يكلموا بابا ويتصلوا بيا علشان أرجع أذاكر للأطفال تاني وأنا مش عايزة أشوفهم تاني مش أذاكر لهم ومتوقعة ان الايام الجاية مش بس يتصلوا بيا لكن كمان هيزوروني وانا مبحبش أحرج حد بس في نفس الوقت خلاص قفلت منهم

سياسة الأمر الواقع برضه واحده من الناس مصريه عرفت اننا مصريين فقالت تتصاحب علينا وعندها اصرار رهيب انها تصاحبني ومفيش أي حاجة مشتركة تخليني أصاحبها ونبقى أصدقاء وهي انسانة سمجة وقليلة الذوق ومرضيتش اديلها رقم تليفوني فلفت وقالت لماما انها عايزة رقم تليفوني وكل شوية تتصل بيا وأنا مش برد تعرف بقى ان انا مش طايقاها ومش عايزة صداقتها دي لأ في ناس مبتفهمش وسياسة الأمر الواقع علشان ابقى ذوق ومحرجهاش اني اتكلم معاها كويس لما تيجي تزورنا

الحالتين اللي فاتوا فيهم ابتزاز عاطفي

الحياة بتفرض علينا سياسة الأمر الواقع

أمر واقع ان شوية تافهيين مش عارفين حاجة في المجالات المختلفة في المجتمع يبقوا نجوم واعلاميين ودكاترة جامعة

أمر واقع ان مصر ميبقلهاش هوية لا في لبس ولا في حياه ولا في أي حاجه حتى الأكل المصري مزيج من الأكل الشامي وباقي مطابخ العالم

أمر واقع ان طالما قمة الهرم بايظة يبقى الهرم كله لازم يبقى بايظ الا في حالات نادرة أوي

أمر واقع ان بكرة جاي ولو اتفرض علينا الأمر الواقع بعض الوقت مش هيتفرض كل الوقت وبإيدنا هنغيره

الأربعاء، 8 ديسمبر 2010

حدث لفتاة عادية

تلك الليلة التي تعلمت فيها كثيرا كانت ليلة مختلفة عن كل الليالي فقد سكن الليل ونام الجميع وساد الهدوء ولم يبقى الا أنا أعاني ما أعانيه من الحمى والألم حيث لا طبيب ولا أهل ولا حتى أصدقاء فقط وحدي مع الألم الذي يفتك بي ويزداد أكثر كلما مر عقرب الثواني وكأن عقرب الثواني يلدغني

ماذا أفعل؟

وفي غمرة ما أعانيه تذكرت سيدنا أيوب وما عاناه ليس فقط في مرضه ولكن في كل جوانب حياته

وتذكرت ايضا انه كان يرجع الدودة التي تأكل في جسده وتبتعد عن جسده لمكانها ويقول لها أن هذا رزقها وعليها أن لا تبتعد عنه

يا الله أي ألم هذا الذي كان يعانيه ورددت : يا حبيبي يا سيدنا أيوب صبرت كتير

يا حبيبي يا سيدنا أيوب مكنش في على أيامكم مسكنات

نظرت للأدوية المسكنة من بعيد ولم أشأ أن أتناول المزيد منها لأن اللي بيزيد عن حده بينقلب لضده

وفي لحظات تذكرت لماذا لا أشكو لخالقي مما أنا فيه وأدعو أن يفك كربي وأن يخفف ما أعانيه من ألم وأن يشفيني

منعني الألم وتخاريف الحمى من الصلاة فتوضأت وبدأت بالدعاء كان صادقا للغاية ومن واقع ما أشعر به

وشعرت اننا مش لواحدنا في الدنيا لينا رب اسمه الكريم ، دعوت الله وأنا على ثقة تامة بأنه القدير الرحيم دعوت الله وأنا واثقة أنه يراني ويسمعني وهو الوحيد سبحانه القادر على اجابة دعائي وبرغم انني كنت مازلت اتألم الا انني شعرت بروحانية كبيرة وبراحة نفسية هائلة

وأشفقت على الذين لا يعتقدون في وجود اله أو يعرفون بوجوده ويكفرون به الناس دي مش فاهمين حاجة


اخيرا بعد الدعاء استطعت النوم بعمق لأول مرة منذ أيام وأستيقظت لأجد أنني لم أعد أشعر بالألم وزالت الحمى

ف ابتسمت وظللت مبتسمة وممتنة لساعات وحمدت الله وتأكدت أن الله معنا وأن المعجزات لا تحدث للأنبياء فقط ولكنها تحدث لبشر عاديين أيضا خلقهم الله بيديه الكريمتين ونفخ فيه من روحه.

الجمعة، 3 ديسمبر 2010

منوعات من واقع الحياة

-بيب بيب زمالك بيب بيب زمالك

زمالك يا مدرسة لعب وفن وهندسة

مبروك فوز الزمالك 4-3 النهاردة بجد الزمالك لعب كويس جدا النهاردة وخصوصا شيكا

وعقبال الدوري وعلى أي حال بالدوري أو من غيره برضه هفضل أحب الزمالك وأشجعه

- الانتخابات لا تعليق الا بقول سعاد حسني وجاهين في فيلم المتوحشة : " مش برضه أحسن نقتصر بدل ما نضرب بالألم- مش برضه احسن نقتصر بدل ما يضرب فينا الألم.

- مبرووووووووووك لقطر على الفوز في تنظيم كأس العالم 2022 وبرغم اني مبحبش جموع الشعب اللي مبتحبناش في قطر وبرغم ان قطر مساحتها صغيرة جداااااااااا كدولة لكن بجد أثبتوا ان الدولة مش بالمساحة الكبيرة ولا بالسكان الكتير وأنا فرحانه ليهم لسببين أولا ان قطر دولة عربية وأمريكا كانت مرشحة لتنظيم كاس العالم 2022 وفشلوا وبعدها كمان أوباما قال ان ترشيح قطر خطأ كبير! وتاني حاجة لأن من زماااااان وانا في اعدادي بنوتة قطرية سألتها : انتوا بتكرهونا ليه ؟ فقالتلي : انتوا مين؟ فقلت لها : انتوا القطريين فقالتلي مين اللي قال كده احنا بنحب مصر وانا بحب المصريين وبحب جدا معلميني وزميلاتي المصريين مبروك يا قطر وعقبال كل الدول العربية لما نشوفها في احسن حال

- عاصفة ثلجية تجتاح الدول الأروبية منهم المانيا وبريطانيا والمطارات متوقفة والمواصلات شبه متوقفه –طلعوا بشر زيينا مش سوبر بشر ومش عارفين يحلوا الأزمة دي- لأول مرة ابقى فرحانة اني مسافرتش لندن حاليا :)البرد السنة دي جاي بكل قوة وانا جربت فظاعة البرد السنة دي مرتين مرة لما كنا في مسقط ودرجة حرارة الجو وصلت ل15 درجة ومرة من يومين لما كان عندي حمى واسناني بتخبط عالجيران ومش قادرة أقوم اطفي التكييف البرد مبيرحمش علشان كده بقولكم شوفوا موضوع البؤجة الشتوية عند أ- خالد همس الأحباب http://hams07.blogspot.com/2010/11/blog-post_21.html وهنيالك يا فاعل الخير والثواب

- أحب أقول ان اللي بره مصر وبيفهم مش مريح دماغه ومش مرتاح من اللي بيحصل في مصر ده بيجيله النكد على طبق من فضة سواء من الاعلام المتعفن أو مباشر من المصريين ال..... اللي في الغربة واللي نفسي أشوف مثال واحد بس يدل ان الناس دي مصريين وحضارة 7000 سنة لكن كلهم مجمعين انهم يشوهوا صورتهم وكأنهم نفسيا بقو مدمنين انهم يبقوا – عكس عاليين- .

ويا حاسدين الناس مالكم ومال الناس ده كل قلب في ألم ولكل واحد كاس وربنا يحمينا من العين لأني بعاني منها حاليا وبتسائل سؤال بريء اومال لو كنت بحضر ماجيستير أو لقيت شغل كان هيحصل ايه !

(جمعة مباركة)


السبت، 27 نوفمبر 2010

تهطل الهطل هطلا

ايه كمية الهطل المنهطل علينا كالأمطار في التلفزيون ده تفتح التلفزيون تلاقي واحد فلاح بيقول ايه انا هنتخب اللي معاه مصلحتي حاجة كده يعني اصل غالبا انا مبتفرجش على الحاجات اللي تحرق الدم دي بمر عليها مرور الكرام وبعدين تلاقي صور لمدارس وخلفية بتقول بنينا 3000 مدرسة ومش عارفة كام مستشفى والخ الخ الخ انجازات رهيبة بصراحة
انجاز لما تتبنى مدارس وجامعات ونسبة الجهل تزيد
انجاز لما تتبنى مستشفيات ونسبة المرض تزيد
انجاز لما يشتغل أقل من 10% من الشباب
ايه الهبل اللي بيحصل في الاعلانات دي
ولا اعلان تاني متصور على الطريقة الامريكية ان المحقق أمريكي قاعد مع واحد بيقول له اتكلم علشان اساعدك وفي الأخر الواحد ده بيقوله هتكلم وهدي صوتي : هنتخب
لولولولولوي ستار ميكر سمعنا صوتك
والاعلان بتاع النجوم اللي واقفين طابور ورايحين ينتخبوا يا سلاااام هما مش لا مؤاخذه واخدين فلوس ع الاعلان ده لكن يا ترى هيعملوا كده في الحقيقة !
واعلانات تانيه فيها كمية هطل لا يصدقه عقل وبعيده عن أرض الواقع بعد شديد
ده غير بقى اعلانات الوفد المستفزة برضه اللي كفاية اوي اني اعرف ان السيد البدوي اللي خرب الدستور فيه علشان اكره الحزب باللي فيه جمعاء
حقيقي الشعب كله عارف الانجازات الكبيرة اللي مرت وبتمر بيها بلدنا
وكلنا عارفين ان بلدنا احسن بلد في العالم بالتأكيد - كانت كده أيام الفراعنة وحاليا احسن بلد بالكلام بس-

الحكاية من اخرها ان لو كان في انتخابات نزيهه لاتحاد الطلبة اللي هبطوا علينا بالبراشوت هتكون في انتخابات نزيهه في أي حاجه مهمه في مصر عمركو في حياتكو شوفتو حد يطلع رحلات الجامعة برقم البطاقة أنا شوفت كليتنا كانت كده واتحاد الطلبة والكلية كلها كانت وتني وتني وبتنتن أصلهم بيدو كورسات كمبيوتر وانجليزي ببلاش واللي معاهم بينجح بأعلى الدرجات وبيشوف الهنا كله اما الباقي خليهم نايمين وخلي الكورة تنفعهم

للاسف حظي العاثر قادني النهاردة لاني اشوف بداية برنامج 48 ساعة ولقيت الباشمهندز الاعلامي الأستاذ سيد علي بيقول واحد قابله في النادي - ايوه لو مكانش الناس دي تروح النادي مين هيروح- وقال له ان دايرتهم مفيش فيها حد يصلح للانتخاب فقاله لو مفيش حد صالح للانتخاب انتخب واحد مسيحي
يا سبحان الله ايه اللي حصل للراجل ده ! ده انا انبهرت بثقافته لما جه كليتنا وقبل الندوة اتحاد الطلبة بقو يترجوا الطلاب علشان يحضروا الندوة وانا مكنتش عارفه مين اللي جاي اساسا الندوة حتى لما عرفت الاسم مكنتش عارفه مين يعني بيعمل ايه

يا حضرة الاعلامي احنا بننتخب بالدين ولا باللي هيفيدنا انا عندي انتخب واحد معندوش دين أصلا بس هيراعي مصالح دايرته ولا اني انتخب واحد متدين بأي دين بالإسم بس وبعدين عالمة الذرة المذيعه اللي في نفس البرنامج اللي مش فاكره اسمها عملت اضافة واضافت كتير الحقيقة انه لو مش لاقيين حد ننتخبه ننتخب المرأه اللي في دايرتنا ياااااااه ايه ده يا شيخة انتي بتجيبي الكلام ده منين فعلا قطعت جهيزة قول كل خطيب الحقيقة هي دائما بتضيف اضافات زي دي .

خبر عاجل : كان في موقع مليان كتب pdf والموقع ده مرتبط بجوجل والموقع اتشال بكل الكتب اللي فيه انا زعلانه هيبقى لا قراءة تعييش في عالم خيالي ولا عارفين نعيش في عالم واقعي بجد والله ده حرام

الأربعاء، 24 نوفمبر 2010

ماركة مسجلة



صباح ومساء الورد على حسب التوقيت المحلي أحب انوه في البداية ان الموضوع ممكن ميهمش الشباب وقد فعذر من بعجر

عرفت الأسبوع اللي فات معنى انك تكون مشغول لدرجة ان ميبقاش في وقت للنت وبجد احساس لطيف جدا ورخم في نفس الوقت تركيبة غريبة :)
الكام يوم اللي فاتوا قضيتهم في مسقط
في فروقات كتير بين مسقط وصلالة يعني في مسقط مثلا في كليات ومعاهد كتير جدا لو عايزة أدرس أي حاجه هلاقيها وطبعا البريتش كونسل وامديست هناك
أما عن أسعار أي حاجة ففي فرق كبير بين الأسعار في مسقط والأسعار في صلالة زي الفرق بين الأسعار في القاهرة وفي دمياط المفروض ان العواصم في أوروبا والدول المتقدمة بتبقى كل حاجة فيها أغلى لكن العكس صحيح في مسقط وفي القاهرة الأسعار أقل من المدن البعيدة
ودي حاجة غاظتني بصراحة لأن الأسعار في صلالة زايدة بطريقة مبالغ فيها جدا بالنسبة لمسقط

اكتر حاجة فرحتني في الرحلة دي هو اني حققت حلم بسيط من أحلامي والحلم بإختصار بدأ بإني كنت بشوف محلات ماركات الماكياج العالمية ومكنتش بحب أدخل المحلات دي وطالما مش هشتري أضيع وقتي ليه فكنت بشوفها من بعيد لبعيد وفي يوم وأنا في تانيه كليه كنت مع زميلة بنشوف الاكسسوارات والميك أب وهي اشترت ميك أب من ماكس فاكتر فقولتلها انتي متأكده ان ده الأصلي ! وطبعا كانت ماركة مقلدة ميك أب ماكس فاكتور وقالتلي يومها : احنا عمرنا ما هنقدر نشتري ماكس فاكتور الأصلي !!!!!! قولتلها ليه يعني ان شاء الله هنجيبه بس أكيد مش دلوقتي -أيام الكلية- المهم في العيد بعد العيدية وشوية مدخرات اخيرا اشتريت lipstick من ماكس فاكتر ومن ريميل لندن والeye shadow من صبايا مكياجي وبلاشر كمان وكلهم ماركات مشهورة وطبعا كنت فرحانه جدا يوميها اني اشتريتهم أخيرا واكتشفت اكتشافين أول واحد أن كل lipstick في الدنيا فيه كمية رصاص رهيبة والرصاص أقل حاجة بيجيب تخلف عقلي وليه أضرار تانيه كتير - وده يفسر ليه كتير من الممثلات والمذيعات أغبيا لكن يا ترى المذيعين والممثلين الأغبيا عذرهم ايه
وعلشان كمية الرصاص دي لازم يكون في بلسم شفاه أو مرطب شفاه قبل الlipstick .

تاني اكتشاف أكتشفت ان الإنسان كل ما بيعدي مرحلة في حياته بتيجي مرحلة تانيه أعلى منها يعني الطموح والأحلام ملهاش سقف .

عرفت ماركات تانيه بنفس أسعار ماكس فاكتور زي مايبلين ونيفيا وريميل وبوبا وريفلون وماك وفي ماركات تانيه تعتبر تحف مش ميك أب لأن تصميم شكل علبة الماكياج نفسها شبه تصميم المجوهرات والماركات دي أغلى بكتير من ماكس فاكتور وأخواتها زي كلينك ولوريال وديور وشانيل ودول طبعا هبقى مجنونة لو اشتريتهم بالأسعار دي - حاليا- .

الشوبينج أو التسوق متعة بجد وبيريح نفسيا وبيفرح بشرط ان الإنسان يشتري احتياجاته مش يبقى مبذر ويشتري حاجات ويرميها زي ما ناس كتير في دول كتير غير بلدنا طبعا بيعملوا كده.

ويا سلام بقى لما دخلت محلات الميك أب في كارفور طبعا عايزين يبيعوا لي كل حاجه حتى لو كانت مش مناسبة لنوع بشرتي لكن لأني عارفه ايه اللي مناسب ليا كنت بشتري اللي انا عايزاه وبس ودي نصيحة لأي بنوتة بتشتري ميك أب محدش هيقولك ايه المناسب والأحسن ليكي ومحدش هينصحك لازم انتي تكوني عارفه ايه المناسب ليكي وأسماء واستخدامات الميك أب علشان اللي بيبيعوا في المحلات يهمهم انك تشتري وبس ميهمش أي حاجة تانيه .

لاحظت كمان ان الأجانب بيشتروا من أغلى محلات وأغلى مولات تقريبا بتفكرهم ببلدهم علشان كده بيشتروا منتجات بلادهم
الغريب بقى اني مشوفتش ولا ماركة ماكياج عربيه كله امريكي أو ايطالي أو بريطاني أو حتى تركي لكن مفيش مصري أنا عارفة ان ايفون ماركة مصرية لكن فين منتجاتها بره مصر ! يعني انا لما أحب أجيب منتج مصري افتكر مصر بيه مش بلاقي غير أكل ملوخية او مشروب فيروز أو جبنة مصرية لكن منتجات حقيقية مفيش .

بدأت في قراءة رواية سفينة نوح في العيد وانا مسافرة في الطريق وكمان وأنا راجعه في الطريق ومن كتر واقعيتها بتباطأ في تكملة قرائتها لأن لغاية دلوقتي فيها حاجات كتير جدا مؤلمه لأنها للأسف واقعيه نصيحة محدش يقرأها في العيد أبدا :(

الاثنين، 15 نوفمبر 2010

هابي خروووووووف

ملحوظة : رديت على كل تعليقات البوستات من أول بوست حاجة حلوة لغاية اخر بوست :)

كعادة الأعياد –ما عدا الفلانتاين- تملأني بالسعادة وتأتي الأيام قبل العيد كالعد التنازلي لإنطلاق الفرح في قلبي

لأول مرة منذ 4 سنوات أقضي عيد الأضحى مع أسرتي مجتمعين سويا فكم من مرة قضيت العيد وحيدة أو كان حولي الكثير من الناس وكنت أيضا وحيدة ولكن هذا العيد أشعر بالونس والدفا والحب كل منهم يغمر قلبي

هذا العيد الذي أنقذنا الله سبحانه وتعالى به فلو لم يفدي الله سبحانه وتعالى اسماعيل ابن نبينا ابراهيم عليه السلام بذلك الكبش العظيم لكنا نحن الأبناء في مأزق كبير

أعشق خروف العيد ولي مع كل خروف حكايات اتذكرها كل عيد وابتسم ولا أعترف بأي بقرة أو جمل أو جاموسة أو أي شيء يضحى به في العيد سوى الخروف

في هذا العيد أتمنى أن تغمر السعادة قلوب كل من أحبهم وقلوب كل الناس

كل عام وانتم بخير وهابي فتة وهابي خرووووف وهابي عيدية:)

ملحوظة : محدش ينسى يسيب العيدية مع الكومنت ولو في شوكولاته ممكن برضه :)


الخميس، 11 نوفمبر 2010

رصيد في البنك

حد حاسس ان الوقت بيفوت بسرعة ؟ وبسرعة جدا كمان فجأه بنلاقي الصبح بقى العصر والعصر بقى العشاء واليوم خلص والأسبوع خلص والسنة الجديدة جاية واللي بعدها كمان هتيجي بسرعه والعمر بيعدي

الوقت هو ده الرصيد الحقيقي اللي موجود في بنك عمرنا واللي كلنا بلا استثناء مش مقدرين قيمته

ويمكن لأني عارفة اننا عايشين وقت محدد اسمه عمرنا فعايزة أعمل كل حاجة في وقت واحد وفي نفس الوقت مكنتش ببقى عارفة أعمل كل حاجة فمكونتش بعمل أي حاجة وبكتئب زي شباب كتير

لغاية النهاردة وأنا لوحدي في أوضتي وقافلة باب الأوضة ومستمتعة بالتكييف حاولت أكتب كذا حاجة بس كل مرة كنت بحس انه مفيش فايدة في كلامي مش هيغير حاجة ولا هيصلح حاجة ولا هيدي معلومة معينة ولا هيبقى له لازمة أساسا فدخلت على اليوتيوب بالماوس اليمين :) بدأت بالمطربين اللي كنت بسمعهم وللأسف مبقتش احترمهم لأنهم سارقين الأغاني وبيضحكوا على الجمهور العربي ومش عارفة هل يا ترى احنا بنحترم الموهوبين علشان موهبتهم ولا علشان شخصيتهم ولا علشان الاتنين موهبتهم وشخصيتهم ومريت بفيديوهات جيولوجيا وجغرافيا للأثار ولأماكن اسلامية ومرورا كمان بفيديوهات لدكتور مصطفى محمود وأخيرا القشة التي خلتني أقوم افتح باب الأوضة ومخففش من حالة الرعب اللي كنت فيها ومازلت فيها بس مش للدرجة اللي كنت فيها الا أذان الفجر والقرأن في الإذاعة حسيت اني هديت شوية شوفت حقائق علمية بتحصل للإنسان لما بيتحلل وشوية فيديوهات تانيه بنفس المعنى يمكن لو كنت درست الحاجات دي في طب أو علوم مكنتش اتفزعت كده لكن اللي اتأكدت منه ان طلاب طب مبيعرفوش يناموا في الأول لما بيتصدموا بالكم الكبير ده من المعلومات عن الانسان

طلعت من كل الحاجات اللي شوفتها وعرفتها بكلام الجميلة Tears في البوست اللي فات :" و اقولك حاجة كمان...كثرة العلم بتتعب القلب....الجهلة عايشيين مرتاحيين و مش خايفيين من بكرة و لا فاهمين المصايب اللى ح تحصل و لا عندهم وعى عن الامراض و بيعرفوا يناموا بسرعه " ده كلام صحيح جدا وحقيقة من زمان متأكده منها

ذو العقل يشقى فى النعيم بعقله و أخو الجهالة فى الشقاوة ينعم

كل الحقائق اللي عرفتها النهاردة بتقول : اعمل لدنياك كأنك تعيش أبدا واعمل لآخرتك كأنك تموت غداً

ودي نصيحة مامتي ليا دائما – ربنا يباركلي في عمرها- يعني انا متفائلة وبحب الحياة وفي نفس ذات الوقت عارفة ان في آخرة بعد الحياة

وبمناسبة الوقت اللي بيجري بسرعة النهاردة خامس يوم في أيام ذي الحجة وعيد الأضحى قرب

كل سنة وانتوا طيبين وفرحانين وربنا يبارك في عمري وعمر كل اللي بحبهم وربنا يبارك في عمركم وتستمعتوا بيه – هابي فتة-

ع الهامش : وش مكسوف جدا انا لسه مردتش على كل التعليقات في ال3 مواضيع اللي قبل ده بس بدأت الرد على بوست حاجة حلوة وان شاء الله هرد على التعليقات النهاردة ، انا حاسة اني في الفصل ومعملتش الواجب وانا بكتب الملحوظة دي :)))

ملحوظة تانيه : شكرا يا Mano على النصيحة في البوست اللي فات


الخميس، 4 نوفمبر 2010

سبب ونتيجة

معرفة معاد انتهاء الحياة على الأرض يؤدي الى " جحيم"

معرفتنا بالغيب أو الأقدار المخبأه لينا يؤدي الى " ملل"

عدم معرفتنا بطبيعة الناس انهم مختلفين في كل حاجة تؤدي الى " الجهل"

نسيان ان ربنا سبحانه وتعالى خلقنا شعوبا وقبائل لنتعارف مش لنتحارب تؤدي الى " فوضى"

تصديق كل ما نسمعه ونراه وأحيانا نشعر به "سذاجة "

أن تمشي في ذات الطريق وأنت تعلم أن النهاية ستتكرر " غباء"

------------------------------------------

اللي فات ده كلام كاتباه من أول امبارح وعايزة انشره عالمدونة بس يال الهول عايزة أرد على تعليقات البوستات اللي فاتت الأول وبما اني بتلاكع في الرد على التعليقات فقلت هنشر البوست الجديد وهرد على تعليقات ال3 بوستات في نفس الوقت ان شاء الله ولما ارد على التعليقات هشيل الملحوظة دي

في حاجتبن كمان عايزة أقولهم :

لقد اتخذت قرارا أريدكم ان تُعينوني عليه

انا لسه مبطلة شوكولاته النهاردة ولمدة شهر كبداية وده قرار حاسم وصارم وقاسي وفوق الفظيع لأن أنا والشوكولاته بيننا علاقة حب وصداقة قوية من زمان ف اني ابعد عنها دي حاجة مش سهلة ولسه بقى لما ان شاء الله اروح الهايبر وأشوف قسم الشوكولاته أكيد هاخد معايا مناديل :) وبالتأكيد لما بتبطل حاجة بتفضل تفكر فيها طول الوقت فمن الصبح كل أنواع شوكولاته من جلاكسي بأنواعها لكادبوري لكيت كات الأحمر اللي ينفع هدية عيد الحب المصري النهاردة :) وتوبليرون وتويكس :'( على بالي

ع الهامش : اللي يلاقي حبيبو مقرب منه واللي يلاقي حبيبه بيسأل عنه ملهوش حق يخاف ، كل عيد حب وانتوا في هنا وحب

الاثنين، 1 نوفمبر 2010

كال هو نا هو

العنوان مش تخريف كال هو نا هو يعني غدا قد يكون أو لا يكون ممكن يجي وممكن ميجيش بس بالهندي :)

ده اسم فيلم رهيب ونهايته منيله بنيله –واقعية- وكمان اسم أغنية في الفيلم على اسم الفيلم عجبتني جدا- اغاني الفيلم كلها حلوة أصلا- وكمان الموسيقى التصويرية رائعة

احنا اتضحك علينا واحنا أطفال لما كانوا بيقولوا لنا في نهاية القصة وعاشوا في سعادة للأبد أو وعاشوا في تبات ونبات وجابوا صبيان وبنات ودخلوهم مدارس لغات :)

الفيلم فيه قصة حب من نوع سلطة الخضار علاقة حب من النوع المكلكع اللي فيه 3 أطراف وفي في أخر الفيلم حتة لئيمه بتبين تفكير المنتجين اللي بيؤمنوا بتناسخ الأرواح والكارما والدهارما والكلام اللي بعتبره فارغ أحيانا

لو حد هيشوف فيلم هندي عموما يحضر نفسه لكذا حاجة هيرقص وهيغني وهيحب وهيعيط وهيفرح وهيحزن م الأخر نصيحة لمشاهد الفيلم الهندي شوف الأفلام الهندي لواحدك علشان ميقولوش عليك اتجننت على كبر أو شوفه مع حد بيحبك علشان يمسحلك دموعك التي ستجري أنهاراً

عرفت الفيلم من اليوتيوب اذ فأجه لقيت نفسي عايزة اسمع أغنية لفضل شاكر اسمها انا اشتقتلك بقالها كتيييييير وسمعتها كذا مرة بالصدفة لكن لقيت كلماتها جايه على بالي وأكتر كوبليه بحبه : حبيبي يا حبيبي أنا اشتقتلك انا بحنلك متل شمعة على غيابك انا عم دوب حبيبي يا حبيبي سهر عينيي بيهون عليي اذا بعرف انت راجع بعد الغروب

الأغنية بتعبر أوي عن قصة الفيلم

محدش يعتبرني بقول الفيلم جميل وحلو وشوفوه الفيلم فعلا قصته قويه والمشاعر فيه بزيادة اوي وبيعيط فلو حد شافه يبقى على مسؤليته انا مليش دعوة

اللي بيعجبني أوي في الأفلام الهندي ان كلها رقصات جميلة أوي باللبس الجميل بتاعهم وغنا وفي كل الأفلام الهندي اللي شوفتها مفيش لقطة واحدة خارجة بعكس كتير من الأفلام الأمريكية

اللي طلعت بيه من الفيلم الحالة اللي انا عايشه فيها من السنة اللي فاتت من ساعة ما العربية اتهبلت وانا بسوقها وعملت بينا دوخيني يا لمونه وخبطت في الحاجز الأسمنتي اللي بيفصل بين الطريقين السريعين 3 مرات وبعدين لفت تحت المطر

في الوقت ده مكنش بيفصل بيني وبين الموت – انا وماما- الا تكة مجرد ثواني وبرغم اللي مش مصدقينني أنا كنت حاسة ان المكان كله ملائكة بتطمئننا والاحساس ده لقيت ماما بتتكلم عنه من غير ما أقولها لما طلعنا من الحادثة اللي كانت مميتة مليون في المية لولا رحمة ربنا سبحانه وتعالى وقرأت بعد كده في علم النفس ان اللي بيتعرض لحوادث مش شرط يموت من الخبطات ممكن يموت من الخضة نفسها وعلشان كده انا بعتبر كل يوم في حياتي هو هدية من ربنا سبحانه وتعالى ساعات بنسى بس برجع افتكر تاني ان الدنيا مش دايمة

لازم كلنا نعتبر كل دقيقة في حياتنا هدية من ربنا سبحانه وتعالى لينا بيقول لنا فيها اتقدموا واتعلموا واعملوا حاجة كويسة في حياتكم وانفعوا الناس وحبوا بعض واعبدوا الله مش عبادة بس لكن كمان معاملة والأخلاق وافرحوا واضحكوا وانجحوا دي الحياة في حد ذاتها هدية

في أمل طالما احنا لسه عايشين

الأربعاء، 27 أكتوبر 2010

حاجة حلوة



اليومين دول بجد نفسي أكتب حاجة حلوة – شوكولاته- :) نفسي أقول خبر حلو سواء عام أو خاص وبحلم كتير اليومين دول اني كاتبه بوست عالمدونة مكون من صورة وسطر واحد بس I am going to London :)دي خامس سنة يبقى نفسي اسافر انجلترا بعد 4 سنين في الكلية درست حاجات كتير عن بريطانيا ومن كتر ما كنت بفكر فيها كنت بحلم اني فعلا زورتها عندي احساس قوي اني هكتب البوست ده قريب مع ان لسه مفيش أي دليل يقول اني ممكن اسافر لندن بس متفائلة انه في خلال 2011 ان شاء الله هزور انجلترا وده حسب قانون الجذب وحسب تفائلوا بالخير تجدوه

قانون الجذب بيقول اننا عاملين زي المغناطيس بنجذب كل حاجة بنفكر فيها بإحساس قوي سواء سلبي او ايجابي

اللي عايز يعرف اكتر عن قانون الجذب يشوف فيلم the secret وعلى فكرة في ناس بيعارضوا قانون الجذب لكن لو فكروا شوية هيلاقوا ان قانون الجذب في أدلة كتير عليه في ديننا

نفسي أشتري digital camera وشوفت امبارح أسعار الكاميرات ومعجبنيش الا أغلى واحدة فيهم :) علشان فيها كل المميزات اللي انا عايزاها وأكتر صورها نقية وعالية جدا وبلوتوث وتصوير عادي وفيديو وtouch screen واللي عرفته لما بحثت عنها عالنت فيها GPS وممكن تدخل على النت منها لو في شبكة Wireless

الدنيا علمتني طالما هشتري حاجة يبقى اجيبها صح حتى لو غالية يا مجيبهاش قلبي بيقولي هاتي الكاميرا وصوري كتير ناس وأماكن يمكن متشوفيهاش تاني وفي نفس الوقت عقلي بيقوللي انا مش محتاجة الكاميرا بشكل مُلح كل الحكاية اني بحب التصوير جدا وممكن أجيب الكاميرا ومصورش بيها كتير! أنا محتارة بشكل كبير جدا ياللي جيبتو كاميرات قبلي وصادفتكم مشاكلي تنصحوني بإيه وايه احسن نوع في الكاميرات؟

حد يصدق؟! مطرش الجرجير تامر يا حوستي أخد جائزة احسن مطرب في افريقيا أحسن ايه ؟!!!!!!!!!! مطرب !!!!!!!!!!! ازاي يعني مطرب منين وهو يعني ايه مطرب اصلا ده لما بيغني لايف بينشز نشاز ملوش أخر ده غير كلمات اغانيه الهايفه زي دماغك خليها تاكلك وأمثلة تانيه كتيرانا ساعات بسمع تامر في فرح مثلا في الشارع او الهايبر لكن مش بسمعه مخصوص يعني الجائزة دي ملهاش غير تفسير واحد أدفع اكتر تكسب اكتر

  • بطلت اشوف برنامج اوبرا وينفري مع انه اخر موسم ليها لأنها مبينة أمريكا زي يوتوبيا ولأنها بتخليني أقارن بيننا وبينهم

صحيح أمريكا فيها مميزات كتير ومرتبطة بالحلم الأمريكي كل ما تشتغل اكتر كل ما تكبر اكتر لكن برضه امريكا فيها عنصرية وتمييز واللي مش مصدق يشوف فيلمين pursuit of happiness وفيلم

My name is khan ولو في فرصة يقرأ في الأدب الأمريكي لغاية لما يقدر يروح امريكا ويشوف الكلام ده صح ولا غلط !

* بطلت كمان اشوف البرامج الحوارية لانها بتسوء سمعة مصر بجد مش أي كلام وبتجيب احباط واكتئاب خصوصا 48 ساعة و90 دقيقة والحياة اليوم

  • هو ليه كتير من مدربين التنمية البشرية بيقلدوا أ- ابراهيم الفقي !

* هي الدنيا ضبابية ومش مفهومة في وطننا العربي ولا أنا اللي شايفة كده بس يعني لو حبيت اعرف الأماكن اللي بتقدم منح دراسية هعرفهم ازاي؟ ولو حبيت أجيب شجرة عيلتي لسابع جد برضه مش هعرف اسأل مين ؟!

طيب هما قفلوا الدستور ليه وقفلوا القنوات الدينية دلوقتي ليه ما نفس القنوات بقالها كام سنة بيعملوا كل اللي بيعملوه في منهم متشددين جدا والاعلانات التجارية المضللة والشات المستفز وشوية معلومات دينية مفيدة طب اشمعنى دلوقتي ؟! وكمان عايزين يقفلوا الفيس واشمعنا الفيس ما في تويتر وبلوجر كمان

الهي اللي يقفل الفيس يقعدله في عينه وف عافيته قادر يا كريم

كل ده يثبت شعار المرحلة _ الشفافية _ *_*


* من شوية كنت بكلم زميلتي في الكلية كانت رايحة شغلها اللي من غير مرتب علشاننا لسه خريجين جداد وكل شغل محتاج خبرة فأي مكان بتقدم ورقك فيه بيقولولك حاجتين هنتصل بيك ولو اتصلوا بيك يبقى العمل بدون أجر شهرين تلاتة – استهبال يعني- فبتقوللي كانت راكبة الميكروباص فواحدة سألتها انتي بتشتغلي ايه قالتلها مترجمة بتقوللي نظرتها ليا وكلامها معايا اتغير واحترمتني اوي وقالتلي انتي راكبة ميكروباص ليه ما تجيبي عربية بدل المرمطة دي وبصتلها على انها بخيلة :) وتقدر تجيب كل يوم عربية :) صحيح الصيت ولا الغنى

جاي على بالي أغنية : احلم معايا ببكرة جاي ولو مجاش احنا نجيبه بنفسنا نفضل نحاول في الطريق كتر الخطاوي تدلنا على حلمنا
يارب حقق احلامنا

الخميس، 21 أكتوبر 2010

تفاصيل بسيطة


" مش عارف هل بتقصدي حد معين مريتي بتجربة معاه للدرجة اللي توصلك لهذا الحد من الغضب اللي ربما أكون حسيته في كلامك لدرجة وصفك الشباب عالنت بإنه سيس " جزء من تعليق على البوست اللي فات لمدون بحترم كتابته وفكره لكن الواضح انه مبيحترمش حد لأنه سألني سؤال شخصي مش فاهمه هيستفيد ايه لما يعرف اجابته يعني هيضره بإيه أو هيفيده بإيه؟ ومين اللي ادى لحضرته الحق يسألني ويتدخل في اللي ملوش فيه في حياتي الشخصية !!!!!!!!!! ويعمل اسقاط على شخصيتي وهو ميعرفنيش اصلا الا من خلال مدونتي اللي ضايقني فعلا ان المدون ده المفروض من كتابته يتفهم انه مثقف على أي حال يا أ-محمد ناصر الدين الهلالي Please in your next comment try to show some respect or please do not comment or read my blog at all

في بوست عند شاب فقري بيقول كتير من اللي عايزة اقوله كفى ووفى فعلا إلى غير معرف

------------------------------------------

بفكر انزل مصر بعد العيد بس عايزة حوالي شهر علشان ارتب حياتي تاني في مصر

يوم هاخده في التنقل ما بين مطار داخلي ومطار دولي ومواصلات لغاية لما اوصل لبيتنا

واسبوع علشان نعمل صيانة للكتكوتة لأني سايباها تعبانه أصلا وكمان البطارية هتتشحن لأن بقالها كام شهر مشتغلتش وأسبوع زيه لغاية لما نظبط البيت وأفضي شنطتي

دايما في الأفلام بشوفهم اول لما يوصلوا من السفر بيشيلوا كل حاجاتهم من الشنطة وانا مش كده انا بحب احتفظ بشنطتي وبالتيكت بتاعها وباخد اللي بحتاجه منها وخلاص

وعالأقل شهر علشان أرجع الانترنت وشهر كمان لغاية لما أزهق وابقى عايزة أسافر تاني :)

هنا وحيدة وهناك وحيدة مش فارقة كتير لكن اللي فارق معايا بجد

لما كنت بحس الاحساس اللي انا حساه دلوقتي كنت بروح رأس البر ع اللسان أقعد قدام البحر ساعة ساعتين وأروح النيل أجيب أيس كريم كاساتا فانيليا متقطع فيه فواكه ومش ممكن انسى ايس كريم الليمون

وفي الطريق بسمع موسيقى هادية أو أغاني رومانسية وبرجع تاني متفائلة ومرحة

في مصر بتصل بكيكي وتفضل تقوللي ما تيجي بقى وأقولها يا بنتي اجي ايه بس هو سهل كده ما تيجي انتي

تقوللي ياريت

بقعد عالنت 24 ساعة بيسرق وقتي بطريقة غريبة لكن هنا بتحكم في الأوقات اللي بدخل فيها النت ودي حاجة مضايقاني :(

مع ان الصورة الكبيرة مش رائعة الجمال لكن فيها تفاصيل بسيطة بتسعدني ^ أشيائي الصغيرة^

منظر الشمس وهي داخلة أوضتي الصبح ومش مخلياني اعرف انام ،

الهوا اللي جاي من شباك أوضة بتطل على راس البر من بعيد ،

بوكس اند بينز بكل حفلات التوقيع والأمسيات اللي بتعملها ،

كوك دور المنصورة وأكله اللذيذ

كورسات التنمية البشرية وأمسيات مكتبة مبارك والجيم وحواديت البنات هناك

كورس الموسيقى اللي نفسي أدرسه

ودبلومة الترجمة اللي محتارة فيها اخد ترجمة فورية ولا ترجمة تحريرية ولأ اسيبني من الترجمة وأخد لسانيات وصوتيات كل ده في بلدي برغم ان الصورة اللي يشوفها من بعيد يلاقيها سودا لكن فيها شوية الوان حلوة

على رأي جدتي الله يرحمها رب هنا رب هناك

كل اللي بيفرق بس بين مكاني هنا ومكاني هناك تفاصيل بسيطة