الثلاثاء، 27 أبريل، 2010

يوم من أيام بنوتة





كنت رايحة للدكتور مع ماما النهاردة والمهم قلنا هنطلع بالأسانسير ، الأسانسير قديم أوي
وفي سلوك نازلة من سقف الأسانسير ومش متقفل من جوه فالحيطة باينة ومن جوه صاج وشكله رعبني ولا أحلى قصة رعب ، فقلت لماما بلاش الاسانسير نطلع الاربع ادوار احسن ومش مشكلة اني لابسة كعب عالي !

ركبنا الاسانسير دخلت برجلي اليمين وقلت اشهد ان لا اله الا الله من منظره وطلعنا الدور الرابع
الأسانسير صغير اوي ومساحته صغيرة اوي وجيت افتح الباب
المفاجئة ان مفيش باب ! في حتة حديد مصدية مغطية مكان الباب ! حاولت افتح الباب وأزقه تاني مفيش فايدة !
فماما طلعت الأسانسير دور كمان لقيته نفس الموضوع وبدات أحاول افتح الباب بيهستيريا وجه في بالي ان خلاص هنموت هنا ومحدش في العمارة كلها عارف اننا في الأسانسير وبدأت احس بدوخة وان روحي بتتسحب
وفجأه لقيت ماما بتقولي الباب أهو
الباب مكان الحيطة ! وخرجنا من الباب لقينا الدور كله مضلم ف اترعبت اكتر وافتكرت فيلم رعب كانت احداثه كده برضه أسانسير بايظ بيطلع لدور ضلمه مليان عفاريت وماما قالتلي يا خوافة ، انتي خوافة وانا كنت ماشية وركبي بتخبط ع الجيران ، ماشية بطريقة البجعه :)

المهم كان في زحمة كبيرة اوي عند الدكتور، فسبت ماما وروحت للجيم – النادي الرياضي – اللي قدام عيادة الدكتور
و دخلت الجيم ودي تالت مرة اروح واتصاحبت على البنوتات اللي هناك
الرياضة دي حاجة بجد جميلة جدا واللي شجعني عالرياضة الاعلانات اللي بتيجي اليومين دول بتاعت عملت رياضة النهاردة ؟ وكمان الرياضة بتخلص من التوتر واي مود وحش وبجد اللي مش بيعمل رياضة مش عايش
ومحروم من احساس ان عموده الفقري والهيكل العظمي كله يوجعه :)
المهم أفتكرت تاني موضوع الأسانسير وجه في بالي ان الانسان ده غريب اوي
الأبواب بتبقى موجودة حواليه بس بيركز في مكان واحد بس قدامه ومش بيبص حواليه وبيفضل يبكي قدام الباب المقفول زي ما قلت قبل كده


كنا بنوتتين في الجيم وجت بنوتة رفيعة جداااا ، البنوتة اللي معايا قالتلها ايه اللي جابك؟ انتي جايه تعقدينا ولا ايه ؟!!!! وضحكنا كلنا وبدأنا نتكلم وطلعنا احنا ال3 بندرس انجليش :)
البنوتة الرفيعة جدا خلصت تربية انجليش والبنوتة التانية في رابعه تربية انجليش وانا ENGLISH ART
وفضلنا نتكلم عن المناهج والدكاترة وباعتراف البنوتيين ان مناهجنا أصعب بكتير من تربية
وقولتلهم ان التربوي عندهم اصعب
بنوتة منهم طلع عندها 30 سنة ومش باين عليها نوهائيا انها 30 سنة
وانا والبنوتة التانية في سنة رابعة في الكلية
البنوتة اللي في الكلية بصتلي وتنحت قالتلي انتي في سنة رابعة؟
قولتلها وانا ببتسم أيوة
قالتلي انا مفكراكي في ثانوي :)
كنت هقولها أومال لو عرفتي روح طفلة مش عايزة تكبر كنتي قولتي ايه بقى :)
كلمة اني في ثانوي دي اتقالتي كتير من وانا في اولى كلية :)
واحنا راجعين للبيت بالكتكوتة عربية كسرت عليا وانا طبعا اعصابي سابت ما هي ناقصة
اسانسير وعربية تكسر عليا وتخبط فينا
المهم فاديت العربية المتهورة وانا اعصابي سايبه لقيت اللي في العربية لما عدى جنبنا قاللي
اجمدي ومتخافيش ، انا عايزك تبقي جامدة !
يعني تموتنا وتقولي متخافيش ايه الناس الغريبة دي

الأحد، 25 أبريل، 2010




خلينا نتفق في الأول ان اسمي في المدونة lady E
لو كنت عايزة ادخل بإسمي الحقيقي عالمدونة مكنتش كتبت اسم مستعار
وبعدين كمان مبحبش حد يندهلي بإسمي غير المقربين جدا مني وعلشان كده فضلت في التدوين سنتين تقريبا محدش يعرف الا اسم ليدي
فياريت فضلا لا أمرا انا عالمدونة اسمي lady E اتفقنا :)

مش عارفة ليه النهاردة حاسة ان جيلنا مظلوم اوي
في حاجات كتير في حياته بقت مزيفة
التدين بقى مزيف بقى تدين شكلي وبس
الحرية بقت مزيفة ده لو أصلا في حرية
التعليم بقى مزيف بقى مجرد ان احنا رايحين المدارس والجامعات وجايين م المدارس والجامعات :)
الصحة برضه بقت مزيفة أغلب جيلنا معندوش طاقة لا نفسية ولا جسمانيه
الصداقة بقت صداقة مصالح ما عدا القليل جدا منها والحمد لله انا عندي أصدقاء نادرين في الزمن ده

وكمان جيلنا جه في وقت غريب يعني مكنش في تكنولوجيا خالص وفأجه بقى في تطور غريب
فمفيش جيل قبلنا كان عنده تكنولوجيا فيفهمها ويفهمها لنا والجيل اللي قبلنا مش بيفكر زي جيلنا حتى لو كانوا احسن مننا بكتير

وأخيرا الفن الراقي اللي بيسمو بالشعوب مبقاش موجود لا في مصر ولا في الوطن العربي عموما
أغلب الكليبات والأفلام بقت موجهة للغريزة مش للروح وفي الحالة دي عندهم حق يقولوا الفن اللي من النوع ده حرام وده أصلا مش فن دي تجارة
بعد لما شوفت وسمعت أغنية Je suis malade ل داليدا ول لارا فابيان اتأكدت ان حاليا مفيش حاجة اسمها غنا جنب الناس دي ولولا فيروز وأم كلثوم وكل العباقرة مطربين زمان مكناش هنعرف يعني ايه فن راقي أصلا !
أول ما سمعت Je suis malade من داليدا عينيا دمعت برغم ان مكنش في ترجمة عالأغنية وبرغم كمان اني مش فاهمه كل الكلام لكن فاهمه بعضه و داليدا ، كنت حاسة في عنيها انها بتقول ل اللي حواليها
انها اد ايه حزينة ووحيدة وبرغم ان مش هي اللي كاتبه الكلمات الا انها غنتها بشكل رائع
وقدرت توصل الاحساس كويس اوي هي ولارا
على فكرة الأغنية دي كانت أخر أغنية ل داليدا وبعدها انتحرت !

وعلى رأي فؤاد المهندس لما كان عايز يتكلم هندي
انه بياكل منجا هندي وبيستحمى حمام هندي
وامبارح جاب فيل هندي صغبر
انا بقى بسمع أغاني فرنساوي
وبقرأ كتب فرنساوي _ مترجمة طبعا _ :)
وعندي برفيوم فرنساوي :)

وأخيرا

كان يا مكان كان في انسان بيحب يساعد الناس وبعدين في يوم من الأيام جتله انسانة غلبانة ومن حياتها زهقانه
فساعدها ماديا وعمل لها مرتب تاخده كل شهر وفاتت الأيام والراجل في يوم نسي يبعت فلوس للانسانة الغلبانه
فرفعت علية قضية :)

معنى الكلام ان اذا انت أكرمت الكريم ملكته واذا اكرمت اللئيم تمردا
المشكلة اننا نعرف مين الكريم ومين اللئيم

People never tell you
The way they truly feel


تنويه بسيط : لما اتكلمت على فيلم ليجيا البوست اللي فات
مكنتش لسه شوفته وحيث انه مفيش عليه تنويه انه للي عمرهم فوق ال150 سنة فأنا مكنتش عارفة ان في مناظر خارجة ده غير كمان انه فيلم رعب
وفي اختلافات كتير بين الفيلم وبين القصة وان شاء الله هقول الاختلافات دي في بوستات جايه
دمتم بخير

الخميس، 22 أبريل، 2010

كلاسيكيات من زمن فات


قبل ما أرد على تعليقات البوست اللي فات وقبل ما أكتب أي حاجة لازم أقول اني مش مصدقة عينيا

دخلت موقع myegy النهاردة وأنا فعلا مخنوقة من مشروع التخرج وبدور على فيلم ليجيا ومش لاقياه وفجأه لقيته قدامي ولغاية دلوقتي مش مصدقة عينيا :) بجد الفيلم هيسهل عليا كتير أوي في الكتابة عن القصة وبرغم ان القصة من أدب الرعب الا اني محظوظة علشانها اتعملت فيلم :) هيييييييييييييييييييييييييييييييييييييييه الحمد لله
وقبل ما أبدأ بالأغنيات كمان في حاجة استفزتني النهاردة وانا في الكلية غير ان الدكتر مجاش ومعتذرش وخلانا نستناه ساعتين ، في بنوتة كانت بتتكلم عن خطيبها وهي مبتسمة ومنشكحة أوي وبتقول أصله بيغير عليا أوي بيغير عليا حتى من هدومي مش بيسمحلي ألبس بيجامات في البيت :)
بجد بجد هبل واحدة سامحة لواحد يتحكم فيها كل التحكم ده لدرجة انه يقولها تلبس ايه ومتلبسش ايه جوه بيتها !
وفي نفس ذات الوقت هي فرحانه ليه يعني علشان لقب مخطوبة !
على راي الخليجيين تغيب الخطوبة اللي بالشكل ده
*********************
أول أغنية يا شمس غيبي لأميرة
الأغنية دي بحبها أوي وطلعت تقريبا سنة 94 وأنا طفلة ومن الوقت ده وانا بحب أسمعها
جت على بالي امبارح ولقيتها عاليوتيوب وفضلت أسمعها للصبح ولما رحت الكلية النهاردة ومأخدتش محاضرات برضه فتحت النت م الموبايل وسمعتها
تاني أغنية بناءا على طلب صديقي العزيز وهو عارف هو مين :) هوتيل كاليفورنيا أغنية بالانجليش لل ايجلز ومترجمة للعربي والأغنية بجد جميلة أوي عرفتها بالصدفة بس حبيتها أوي
أما أخر أغنية فباللغة اللي بيني وبينها عمار لدرجة اني بقيت معيدة في المادة سنتين ورى بعض
يا عيني العيال بتوع تانيه لما بيعرفوا اننا في رابعة ومعانا الفرنساوي بيجيلهم حالة من الاحباط عالرعب عالفسفس الهستيري
الأغنية دي غنتها يسرا في فيلم عمارة يعقوبيان وبرغم ان يسرا رقيقة وهي بتغنيها ومصطنعة شوية لكن بجد المطربة اللي غنت الأغنية الأصلية اديت ابيتاف صوتها قوي جدا و معاني الأغنية رائعة والمفروض كان يبقى في ترجمة في الفيلم للأغنية
عالعموم الأغنية بجد جميلة ومترجمة للعربي

الثلاثاء، 20 أبريل، 2010

البحر بيخطفني



البحر عاللسان النهاردة كان هادي

تملأ روحي رائحة الشوكولاتة والبندق ، برغم اني في سوق السمك ذو الروائح النفاذة

شعور ماليني بالحنين لحبيبي الأولاني ( البحر)

هخطف ماما ونروح رأس البر ، برغم أي انشغال وأي مسؤليات ورانا هسرق من الزمن شوية وقت وأروح أشوف البحر ، ياااااااااه احساس جميل أوي احساس انك تعمل حاجة مش اعتيادية

وأنا ماشية في الطريق سامعة في وداني أغنية رجعتلي روحي لأنغام

بحب البحر أوي ومرتبطة بيه لدرجة إني بحس أحيانا إني أصلا سمكة :)

صورة للفنار من بعيد

ماشيين في الطريق وأصالة بتغني : خليك شوية قدام عينيا ملحقتش أشبع حب فيك
لا بلقى راحة في البعد عنك ولا بلقى روحي الا ف عينيك الزرقا طبعا :) ما هو البحر المفروض يبقى أزرق بس لأنه البحر الأبيض المتوسخ ف لونه دائما رمادي

عمري ما تخيلت أني أعيش في أي مكان مفيهوش بحر ، وبرغم أن أغلب حياتي سفر الا ان البحر كان معايا في كل مكان ، وكنت بذاكر وأنا شايفاه من بيتنا في اعدادي وثانوي

البحر ده مش مية أو موجة فوق صخرة ، البحر ده أغنية بسمعها 100 مرة من تاني بتوحشني البحر بيخطفني

أنا بعشق البحر وبعشق السما وبعشق الطريق لأنهم حياة وانت يا حبيبي أنت كل الحياة

ويا ساكني مطروح جنية ف بحركم :)

الاثنين، 19 أبريل، 2010

الشهادة بتحمض يا رجالة



أول مرة أعرف ان الشهادات زي الأكل بتحمض لو متحطتش في التلاجة :)

التويفل وهو امتحان في الانجليش

TOEFL اختصار للأحرف الأولى من (
Test of English as a Foreign Language

مدته سنتين وبينتهي يعني الاكسباير وتاريخ الصلاحية بتاعته سنتين

يعني شهادة مؤقته عااااااااااااا

هي حاجة طبيعية ان مستوى طالب اللغات بشكل عام يتغير ، بس ما هو كل حاجة في الدنيا بتتغير


والغريب ان مراكز التدريب معظمها شهاداتها مش معترف يبها غير في مصر وكمان ممكن أدفع مبلغ معين بعد الكورس وأطلع شهادة دولية من كامبريدج في انجلترا ، طيب هعرف ان دي شهادة كامبريدج فعلا ازاي :( سؤال يطرح نفسه

لو أي حد يعرف أي معلومات عن الكورسات في الجامعة الأمريكية ياريت يقوللي

السبت، 17 أبريل، 2010

أكتب لأتداوى




* بداية العنوان مش كلامي ده كلام الكاتبة التشيلية ازابيل الليندي واللي كتبها كانت بتغمزلي وانا في معرض الكتاب السنة دي بس زي حيرة البنوتات لما بتشتري دهب أو اكسسوارات بيبقى قدامها حاجات كتير جميلة وكلها ليها قيمة وغالية ومحتارة تختار ، أنا كنت كده في معرض الكتاب كنت واقفة وسط الكتب الانجليش ومحتارة اختار لأن كل كتاب ليه قيمته وقررت اني مش هجيب كتب الا بالعربي برغم دراستي للإنجليش بس لسه معنديش صبر اني اقرأ رواية أو كتاب انجليش من أوله لأخره

الكتابة من زمان أوي وهي صاحبتي لكن دلوقتي بقت بتزورني حُمى الكتابة بكتب لأتداوى
زي ما تكون في نداهة بتندهني وتخطفني لبحور الكتابة وتلح عليا لغاية ما اكتب ويا سلام بقى لو مكتبتش تفضل الافكار تلعب استغماية جوه دماغي وتحرمني من التركيز والنوم أحيانا ولو نمت أفكاري مبتسبنيش بتجيلي في أحلامي


* بودع حياه استمرت 4 سنين – حياة الكلية- وبستقبل حياة جديدة الحياة العملية وأتمنى انها تبقى أحلى
عارفة انه برغم ان الكلية مكنتش الكلية اللي بحلم بيها لكن برضه هفتقد أيام التزويغ من الكلية :) يوم لما بحب أطنش المحاضرات مفيش مشكلة لكن مينفعش أطنش الشغل

*أحلام كتير عايزة أحققها في مصر قبل ما أسافر وأسيبها ان شاء الله بعد التخرج ، الحلم القديم بتاع الجامعة الأمريكية بيزغزغ خيالي وصوت العقل بيقول اللي ميتحققش النهاردة يتحقق بكرة وصوت القلب بيقول خير البر عاجله ، انتي لسه في الكلية وفاكرة اللغة لكن بعد الكلية حتى لو اشتغلتي هتنسي كتير من دراستك
محتارة ومش عارفة أوصل لقرار حاسم وربنا يسهل وأوصل لقرار


* مش مطلوب مننا يبقى في ألفة بيننا وبين دكاترتنا في الكلية أو رؤسائنا في العمل
اتعلمت السنة دي اني أحترم الانسان لعلمه من غير ما أبص عليه انسانيا عامل ازاي
الموضوع ده صعب شوية على الشخصية الحسية اللي بتتعامل بإحساسها والاحساس جزء كبير من شخصيتها
ومع ذلك قدرت أوصل للمعادلة دي وأنفذها ، ده بالنسبة للدراسة أو الشغل لكن بالنسبة للصداقة أو الزمالة أو غيرها ببص للناحية الانسانية والاخلاقية كمان وفي الحالة دي ليا الاختيار بالرفض أو القبول



* سواء بتمثلي أو انتي كده فعلا ، مش مصدقاكي في الحالتين ومن أعماق قلبي الجوانيه بجد كرهتك من أفعالك الغبية وكلامك السلبي وانك مبتراعيش شعور حد غير نفسك ، لكن في نفس الوقت انتي صعبانة عليا ومتعاطفة شوية معاكي برغم انك قولتيلي قبل كده انك بتحقدي عليا !

من فترة وانا شايفة مبدأ نفع واستنفع في كل مكان وكل حاجة ليها مقابل ، والماديات بقت مهمة أوي والناس بيتعاملوا على الأساس ده
لكن أقتنعت ان لسه في ناس مش كده مثلا في المدونة
، زي متابعين المدونة اللي مشتركين في المتابعين عالمدونة
وزي قراء المدونة الكتير اللي بيقرأوها وزي القراء والمتابعين للمدونة اللي بيتابعوها وكمان بيعلقوا على المواضيع اللي بكتبها ومش منتظرين مقابل اني اعلق في مدوناتهم بيكتبوا تعليقات لأنهم فعلا بيحبوا المدونة
وزي الناس اللي أصلا معندهاش مدونات وبياخدوا من وقتهم القيم وبيتابعوني

ليكم كلكم شكرا


وأحب اختم كلامي بكلام عاجبني من مسلسل ورق التوت ومن كلام أبو الأداجير ادجر الان بو اللي كتب قصة ليجيا اللي مطلعة عيني


تتوه الحواجز

تتهد السدود

وأقولك وتفهم حتى السكوت


اما ادجر وأول مرة اخد بالي دلوقتي ان اسم ادجر شبه كلمة ضجر اللي معناها ملل :)

المهم أبو الأداجير بيقول في مراته


طفلة كانت وطفلا كنت

في تلك المملكة بجوار البحر

الا اننا عرفنا الحب الذي هو اقوى من الحب ذاته

حبا اثار حسد الملائكة ذوات الاجنحة علينا


الله عليك يا حبيب ولديك ايه الكلام ده ، اهو الكلمتين الرومانسيين دول بيصبروني اني اكمل مشروع التخرج بتاع المرعبة ليجيا


ودي صورة ليجيا كلارك البطلة المرعبة ل أبو الأداجير
وجمعة مباركة علشان امبارح كان الجمعة

bonne nuit طابت ليلتكم بالفرنساوي نياهاهاهاها

------------------------------------------------------
ع الهامش : سعيدة جدا برأيك الرائع عن مدونتي ، لأنك اكتر انسان في الحياة يهمني رأيه
بحبك أوي

الأربعاء، 14 أبريل، 2010

فراشتي ماتت



فراشة فضلت طول شهر ونص ترفرف حواليا وتسليني في وحدتي

فراشة فجأه لقيتها في البيت وفجأه لقيتها عماله تطير حواليا وعامله حياه وروح

فراشه حبيتها واتعلقت بيها وافتكرت كلام جدتي ان الأرواح الطيبة بتتمثل في الفراشات وقلت يبقى دي روح حنونة جايه تدفيني في عز البرد

فراشة كنت كل ما ادخل مكان في البيت الاقيها فيه ، كل لما أبص في ناحية الاقيها طايرة وبترفرف او كانت بتستنى لما أدخل أي أوضة وتيجي ورايا تطير حواليا وكإنها صاحبتي وتعرفني من زمان

عندنا ورد وأرواق شجر بلاستيك ، الفراشة اتخدعت فيهم فكرتهم حقيقيين ، حبتهم واستخبت فيهم

وغابت الفراشة عني كام يوم ، فكرت انها طارت وراحت تاني للسما الواسعة ونسيتني

النهاردة لقيت حاجة بتقع من الورد وورق الشجر البلاستيك مهتمتش قلت يمكن ورقة وقعت ولا حاجة ، دلوقتي بصيت لقيتها فراشتي ، فراشتي اللي حبتني واهتمت بيا من شهر ونص ماتت

ماتت من حبها ليها ومن خداعها في ورق شجر مزيف

فراشتي ماتت ، وانا مقدرتش قيمتها الا لما ماتت

انا بجد حزينة جدا وفي عينيا دموع كتير لكن مش هبكي big girls don't cry

يا اللي اتخدعت فيكو وفكرتكم ورد حقيقي زي فراشتي ، أرجوكم أخرجوا من حياتي وكفاية بقى فكرة اننا نبقى اعدقاء وكفاية حب مزيف ، انا بجد تعبت ومبحبش الا الوضوح وانتم مش واضحين ولا عمركم حبيتوني

فراشتي انا حبيتك لكن كل حاجة بنحبها بيجي يوم وبتروح وهنعمل ايه هو ده حال الدنيا

بجد حزينة عليكي

الثلاثاء، 13 أبريل، 2010

ليست قصص لكنها قصيرة 1

الدكتور أعتذر

من ساعات وانا مش متحمسة للمحاضرة ولا للكلية ولا لأي حاجة في الدنيا غير النوم ، طبعا ما الامتحانات قربت وانا قبل الامتحانات ببقى فلة يا روحي وبحب الهروب من الواقع المتقوقع الى قيعان العقل الباطل
النهاردة كان عندنا محاضرة أدب والأدب فضلوه عن العلم بندرس رواية اسمها جوزيف اندروز وبإختصار القصة بتتكلم عن واحد كل الستات اللي في الرواية بيغروه وهو بيتمسك بمبادئه للنهاية وبيقولوا ان الكاتب أستوحى القصة من قصة سيدنا يوسف وبطل الرواية اسمه جوزيف يعني يوسف برضه
لكن المحاضرة مقدرش أقول انها مملة وبرضه مش مملة والضاكطور اللي المفروض قدوة مضايق ان تلميذاته محجبات وعايزنا نعيش حياتنا وبلاش الكبت اللي احنا فيه - بالحجاب-، الضاكطور غلط في في أيات القرأن قبل كده في المحاضرات وكلنا بننسى لكن طالما هو مش متأكد من معلوماته بيقول قرأن ليه؟ احنا في محاضرة أدب ولا دين ؟ وهو أصلا مش قدوة في الدين
كفاية لما أي طالب/ة يبصوا في ايده بيلمحوا دبلة دهب
بجد سعيدة ان الضاكطور اعتذر عن المحاضرة النهاردة ويارب يعتذر باقي الترم

رباعيتي

مش هتقدر تحب بعدي
أيوة عارفة هتموت في بعدي
كل حاجة حلوة عدت
هيجي يوم تندم عليها


يا خسارة

ليه بيقربوا وليه بيبعدوا فجأه ، رحيل المدونين بقى بالجملة وبصراحه في منهم اللي فرحت انه ذهب ولم يعد
وفي منهم اللي اتفاجئت جدا انه ذهب ولم يعد
الانجنير احمد ابو العلا كان اولهم وبعدين صيدلانيه طالعة نازلة وبعدين شيما الشعب لابد له من حكومة تشكمه
وفي مدونات بقت مهجورة بمعنى الكلمة زي مدونة شريف باشا اللي قفل التعليقات وزي مدونة هاجر زعبل اللي برضه قفلت التعليقات وزي مدونة فتافيت اللي مفيش فيها غير موضوع واحد مبيتغيرش وزي مدونة MY GRAVEYARD اللي مفيش فيها مواضيع جديدة من شهر
يا ترى ايه اللي بيحصل للمدونين وليه الانسحاب الجماعي ده ؟ وليه جو الاحباط ده

مشروع تخرج (ليجيا)

عندي مشروع تخرج في مادة الأدب الأمريكي وهو اني أختار قصة أمريكية لكاتب أمريكي وأحللها وأعرف ليه الكاتب كتبها في الوقت ده - على أساس اني اخته الكبيرة فعارفه كتب القصة دي ليه - :)

يعني هل كتب القصة دي علشان كان بيناقش ظاهرة في المجتمع ولا في ايه بالضبط
طبعا مشروع التخرج ده مزهقني لأنه مش وقتـــــه خااااااااالص ومش مهم أصلا ومش عارفة هنستفيد منه ايه
كان قدامي أكتر من 1000 قصة والاختيار بينهم كان حاجة تجنن ، ولأن من سماتي الشخصية اني مبحبش يبقى قدامي اختيارات كتير أوي فلجأت لمساعدة خارجية من مستر محرم وهو اللي اختارلي قصة ليجيا LIGEIA ل إدجار ألان بو واللي أصلا لما بحثت شوية عرفت ان حياته كانت فيلم رعب ، كان كل ما يحب حد يموت ، ده غير انه كان يتيم واتربى بالتبني واتطرد من كل كلية راحها بسبب انه كان بيلعب قمار وبيشرب خمور لدرجة رهيبة
واتجوز وهو صغير ومراته كان عندها 13 سنة بس لكن في النهاية ماتت ومش مهم أكمل باقي المأسي
هو نفسه مات وهو عنده 40 سنة يعني كان شاب
قصة ليجيا بإختصار بتحكي عن واحدة مرضت بمرض نادر وأكتشفت انها هتموت فحبت تبقى خالدة وعملت كل حاجة ممكنه علشان توصل للخلود بس مقدرتش - ده اللي فهماه من القصة لغاية دلوقتي - لأنها قصة رعب بمعنى الكلمة وكئيبة أخر حاجتين تلاتة

شكرا للمدون الرائع psycho لأنه عرفني أدب الرعب وشوية من كُتاب أدب الرعب ف وانا ببحث في مشروع التخرج فاهمة شوية انا بقرأ عن ايه

اكتفي بهذا القدر من الرغي وجاري الرد على تعليقات البوستين اللي فاتوا

الأحد، 11 أبريل، 2010

يارب كتر أفراحنا


ملحوظة قبل ما ابدأ في البوست : تعليقات البوست اللي فات ان شاء الله هرد عليها ده مش تطنيش اطلاقا بس انا فعلا مضغوطة كلها شهر ع الامتحانات ومشروع تخرج وشيتات ودوفوار وبلاوي سودا وأؤكد لكم اني مبعملش ولا حاجه من دول والوقت بيروح في ايه؟ الله أعلم وبعترف بتقصيري الشديد في الرد في المدونات لكن الأكيد اني متابعاكم وربنا يسهل وأزهقكم من كتر التعليقات

انا طاااااايرة عاملة دماغ رومانسية انما ايه رهيبة ، النهاردة كان فرح بنوتة صحبتي وانا فعلا بدور ع الفرح فين اليومين دول عااااااايزة أفرح بقىىىىىىىى ولقيت ايمان العروسة بتعزمني ع الفرح
ايمان صحبتي من وانا في خمسة ابتدائي وفضلنا أصحاب لغاية ما دخلت اعدادي بعدها الدنيا شغلتنا وخدت كل واحدة في طريق ، كنت بحب مامتها جدا وكانت حنينة جدا وكريمة جدا ومعطائه جدا الله يرحمها

هختصر الأحداث وهبدأ من أول لما دخلنا على الزفة قبل القاعة
الزفة الدمياطي مفيش زيها فيكي يا مصر ودي حاجة معروفة طبعا ، حاجة جميلة بجد ويمكن أحلى من الباند والدي جي كمان وبيعملوا روح جميلة في الفرح

أخت العروسة زي القمر والعروسة ملاك في الفستان الأبيض والجو كان برد جدا وهوا جدا ، ماما سابتني ودخلت القاعة وانا وقفت في الزفة مع العروسة والعريس
العروسة من بحري دمياطية والعريس من قبلي من أسيوط وهكذا تلتقي الحضارات :) وعلشان كده الزفة كان فيها فقرات رقص صعيدي ورقص بحري :) ابتسمت ابتسامة ذات مغزى :)

بعد شوية ماما جت بتقولي انتي بردانه قولتلها لأ اطلاقا ومسكت ايديها وايدي من كتر البرودة بتلسع :) زي شويبس بالضبط الجو كان برد بطريقة غريبة بره القاعة وكملنا الزفة وكان في واحد في الزفة شبه دكتور اسلام بالضبط – دكتور في كليتنا – تقريبا دكتر اسلام بيشتغل دكتور الصبح وبيزود دخله بالفرقة بالليل :)
بجد نفس الشكل ونفس الصوت ونفس الحركات ونفس الزعيق :) كان بيزعق للمعازيم علشان يبعدوا عن العروسة


اكتشفت اكتشاف هائل ان صعب التعامل مع الفستان الأبيض وانه بيبقى تقيل وعايز معاملة خاصة وعايز تدريب من العروسة ازاي تمشي فيه وازاي تقعد بيه قبل الفرح :) طول الزفة كنت مفتقدة مامة العروسة بطريقة غريبة الله يرحمها

بس برضه مهما شفت من زفاف تبقى زفة مامتي وبابتي أحلى زفة ويارب الزفة بتاعتي تبقى في جمال الزفة بتاعتهم

أه صحيح انا جالي عريس زي القمر كفاية بس نظرة عينيه ولا ضحكته ولا الغمازات ومرضاش يشيل عينه من عليا طول الزفة وعنده 6 شهور بحالهم :)

ودخلنا القاعة وحبسوا العريس والعروسة في أوضة لغاية لما الزحمة تخف شوية وبعدين يدخلوا القاعة
ودخلوا القاعة على أغنية طلي بالأبيض طلي يا زهرة نيسان لماجدة الرومي انا بعشق الأغنية دي ومعرفش ليه دمعت لما سمعتها ، وأول رقصة سلو كانت ع بالي حبيبي ل اليسا حسيت كإني أول مرة أسمعها

ع بالي تكملني واسمك تحملني ، بقلبك تخبيني م الدنيي تحميني ، وتمحي من سنيني كل لحظة عشتا بلاك – يعني من غيرك – بس ممكن تبقة بلاك بمعنى سودا يعني كل لحظة سودا عشتها من غيرك :)

ورحت في دنيا تانيه وحسيت ان انا اللي برقص سلو مع عريسي وسرحت بقى وتخيلت كيكي معايا ما هي على طول بتقولي هتبقى معايا يوم فرحي انا حاسه انها فشاره ولو عملت فرحي في دمياط مش هتيجي لازم اعمله على سطح بيتهم علشان تحضر :( بجد يا كيكي تخيلتك معايا يوميها ومع عريسك برضه وبترشي بيرسول بس مش عالعريس هههههههه زي ما احنا متفقين وعالعموم يا اختي انتي مدعيه عالفرح من قبل العريس :) ولما يجي أبقى اعزمه عالفرح زي فرحه برضه :)



حاجة معجبتنيش حماة العروسة وقفت بينها وبين العريس في الزفة ، يارب انت عارف انا ان شاء الله هحب حماتي لأنها السبب في وجود حبيبي في الدنيا لكن مش هقدر استحمل ان حاجة زي كده تحصل في يوم انا بحلم بيه طول عمري

يارب يفرح كل البنوتات والشوباب
يارب كل الناس تلاقي الحب اللي بجد اللي يفرحها ويقر عينها طول الحياه
الحب اللي يطلع أحلى حاجة في الزوج والزوجة ، الحب اللي مبني على مودة ورحمة
يارب كتر أفراحنا وابعد عننا الكدابين والمزيفين والحاسدين زي ما باعدت بين المشرق والمغرب
وعقبالنا كلنا

الأربعاء، 7 أبريل، 2010

مجتمع غبي وعايز الحرق


النهاردة بنوتة زميلتنا جت الكورس وهي في حالة صدمة ، مالك يا فلانه مبتردش
مالك في ايه؟ مبتردش

وفي الأخر أخدتني على جنب بعد الكورس وقالتلي وهي ماشية في الشارع واحد اتحرحش بيها - في الشارع في عز الضهر ومعرفتش تتكلم -

طبعا الولاد هيقولوا البنت لبسها مش حلو الحجه المتخلفة والخايبة اللي بيتحججوا بيها

البنت منتقبة وزي ما بتقول عن نفسها انها خيمة ماشيه عالأرض يبقى بأي سبب الحقير ابن الحقارى يتحرش بيها

واشمعنا التحرش ده موجود في مصر بس ومش موجود في اي بلد عربيه تانيه ، وحياة اغلى حاجه عندكو محدش يقولي المعيشة ويخترع ومبررات ملهاش لازمة

والله لو اديت لواحد أقصى مرتب ممكن يحلم بيه واديتله كل أسباب الغنى وهو أخلاقه وحشه وزباله ومش متحضر برضه هيفضل كده مش بالمادة ولا بالمكانة اطلاقا

وبعدين في مصر بس برضه اكسكلوسف في التحرش من نوع أخر التحرش بالمشاعر

واحد يفضل يمثل على واحدة انه بيحبها وبيموت فيها وفي الاخر يسيبها ويروح يتجوز صالونات وممكن اوي تطلع البنت اللي اتجوزها مشيت مع كل سكان البلد وضواحيها وعلى المقيمين خارجها مراعاة فروق التوقيت بس هو غباء مستحكم

واحد يفضل يكلم واحدة عالنت ويقولها يا حياتي وذكرياتي وامنياتي ف الحياة والخ الخ الخ وفي الأخر تكتشف انه متجوز وعنده اربع عيال أوعنده 60 سنة وبيمثل انه شاب

عمالة بسأل نفسي مين ال....... اللي اخترع المدارس والكليات

الأطفال في مصر دونا عن كل اطفال العالم عمرهم بيتسرق بيرجعوا من المدرسة مدروخين والدروس بتقضي عليهم وبعدها يناموا
وهكذا زي الحيوانات اللي مربوطة في ساقية ولا بيستمتعوا بطفولتهم ولا بيمارسوا أي نوع من أنواع الأنشطة ولا حتى بيتعلموا لأنهم بيحفظوا وخلاص وفي نهاية الترم بيرموا كل اللي حفظوه في ورقة الاجابة وخلاص وكل عام وانتم بخير

* كل عرض من العروض التجارية أو البنكية أو حتى التعليمية أو الصحية او الاعلامية لازم ميكونش فيها صدق ، مفيش حاجة ممكن تثق فيها في مصر لأن أكيد هتتسرق ويتنصب عليك للأسف

* واقفة كتير مش عارفة أعدي الشارع النهاردة والعربيات هاين عليها تدوس على الناس اللي ماشية
وكل ما بتزيد تناحة السواقين بتزيد تناحة المشاة وبينتج عن كده الوضع المزري اللي في الشوارع دلوقتي

انا خلاص تخليت عن كل احلامي اللي ممكن احققها هنا طالما انا عايشة في مجتمع زي ده وأعترف اني خايفة انزل القاهرة وأعيش فيها لوحدي ، خلاص هنسى حلم الدراسة في الجامعة الأمريكية ، هنسى شهادة HR TRAINER
هنسى دراسة الموسيقى ف الى الجحيم وفي داهيه يا كل أحلامي لأني خايفة من المجتمع ده ومش هعرف أعيش لوحدي فيه

متلعنونيش يا احلامي اني حلمت بيكم ومقدرتش أحققكم ومتزعلوش مني

يا محمد منير دي مش بلد البنات زي ما انت بتقول دي بلد الدراع ، كل واحد بياخد حقه بدراعه والانسان المتحضر اللي عنده عقل ملوش مكان فيها

وعلى رأي أبو الليف الندالة دي حالة عامة

الأحد، 4 أبريل، 2010

1000 مبروك


الفيلم ده مهما كنت متضايقة بيطلعني من أي مود مش حلو على شرط اني مكملوش للأخر
هذا الفيلم أحــــــــــــــبــــــــــــــــــــــــــــــه
كتير المظهر بيبقى غير الجوهر