الثلاثاء، 23 يونيو، 2009

مبسوطة يا مصر اني راحلة بقى






حقوق النشل محفوظة للمبدع البيج بوص :)



مين اللي قال اني هرتاح بعد الامتحانات بعد الشر بعد الشر طبعا مفيش راحة في الدنيا
من بعد ما خلصت امتحانات وخالتو بتاعة مامتي تعبانة وكل يووووم نروح معاها عند الضاكتور خريج كلية الزراعة لأنه واضح انه مبيفهمش حاجه في الطب اساسا وطنط حالتها بتسوء يوم بعد يوم
وبعدين بدأنا نحضر نفسياتنا للسفر والتحضير للسفر بجد بيكون مرهق اوي تحضير الشنط وبنشتري حاجات وبنوضب البيت وبنعمل مشواير في عز الحر علشان نلحق وقتنا عاااااااااااا
الحقيقة السنة دي كانت سنة كبيسة بجد كانت صعبه بكل المقاييس وكان فيها حاجتين اتنين حلوين بس ومش هقول عليهم بس برضه الحلو مبيكملشي عااااااااا
المهم طبعا مش عارفة اناااام خاااالص اليومين دول وخصوصا خصوصا امبارح منمتش الا ساعه واحدة
خرجنا الصبح بدري والحمد لله كان يوم عسل عسل عسل روحنا نخلص شوية ورق في مصالحنا الحكومية الكميلة وطالعين نازلين نازلين طالعين وفوت علينا بكرة يا سيد وسمعني احلى سلام وتحية للروتين
طبعا مفيش اي حاجه من اللي كنا ناويين نعملها اتعملت والحمد لله فقولنا نطلع على راس البر
وقال ايه خير اللهم اجعله خير لقيت صف كبيييييير قبل بوابة راس البر ليييييه؟؟ طلعت اوشاعه انهم مش فاتحين الا باب واحد من ابواب البوابة ليييييييييه برضه؟؟
عرفت انا ليه بعد كده طلع في ف البوابة ولأول مرة كمين
وجه عمين شرطة قاللي الرخصة واخد الرخصة بتاعتي وقاللي اركني و تعالي جيبي رخصة العربية استغربت اوي لان المفروض العمين بيشوف الرخصتين مع بعض لكن جديد موضوع اني اركن على جنب واروح انا بنفسي اودي رخصة العربية وبعدين ركنت وروحت لقيت واحدة واقفة هناك بصتلي وابتسمت وانا مش فاهمه في ايه
وشوفت واحد معلق 3 نجوم على كتفه اليمين و3 على كتفه الشمال فاكر نفسه سما تقريبا مش عارفه هو ظابط ولا رائد ولا ايه وعايش الدور اوي وحاسس انه عم الوسيم وقاللي اني لازم ادفع مخالفة علشان مش لابسه الحزام
وبعد كلام كتير اتكلمته حنان اللي كانت واقفة قبلي وانا واقفة ساكته اما اشوف وبعدين؟؟ اخدنا الرخص ومشينا بعدما سيادته تأمل شوية في الرخصتين
واتضحلي حاجتين من الموقف ده
اول حاجه : ان الكمين مكنش بيوقف غير البنوتات مع ان في رجالة وستات كتير مكانوش رابطين الحزام ومحدش وقفهم اظاهر كده سيادته كان بيدور على عروسة وبعدين المفروض القانون يتطبق علينا كلنا مش يطبق على ناس وناس بس للاسف مش ده اللي حصل
تاني حاجه : حاميها حراميها الشخص اللي المفروض يحمينا من المعاكسه هو نفسه اللي كان بيعاكسنا وعلى رأي شيمو فاكرني هدوخ وهحبه علشان البدلة الميري اللي لابسها
وبعدين دخلنا راس البر ومعظم المحلات كانو قافلين الصبح
صورة من جوه مطار السيب الدولي بعدستي بس الصورة من اخر رحلة وانا راجعه مصر

طلعنا من راس البر على دمياط واخيرا حجزنا تذاكر الطيران ان شاء الله هنسافر الاسبوع ده لحبيبتي وبلدي التانيه سلطنة عمان وتحديدا ل صلالة وطبعا مش هقول المعاد علشان محدش يتعب نفسه ويجي يودعني في المطار ده على اساس اني متخيله ان حد هيعبرني ويجيلي المطار اساسا نياهاهاهاهاهاها
بجد الفراق والوداع صعبين كنت بكلم انتيختي النهاردة ولقيت صوتها اتخنق ولقيتني انا كمان هعيط قولتلها ايه هنعيط ولا ايه قالتلي لا نعيط ليه هنضحك قولتلها طيب سلام بقى علشان انا اللي هعيط علشان كده مبحبش الوداع

ويا عيني على الزيارات العائلية اللي بتبقى قبل السفر كلهم زعلانين اننا مسافرين ولازم الزيارة تبدأ وتنتهي بالسلام وبما انه سلام فمينفعش يبقى سلام اجانب لا ازاي ده احنا مصريين
طنط 1,2,3,4,5 : ازيك يا ليدي يا حبيبتي اموااااااااااة اموووووااااة اموووووووواة امووووواة
انا : هما لازم يبقو 4 بوسات ولا ايه
كل الطنطات : طبعا هو في سلام من غير بوس
انا : افتكرت الاعلان اللي كنت بقرأه في الكلية كل يوم وانا داخلة لجنة الامتحان سلام باليد خير من قبلة بالعدوة
بس مين محدش بيهتم بالموضوع ده وربنا يستر بقى من كوكتيل الفيروسات اللي عايش ومتعايش حدانا ومتربص بكل الناس

بجد هتوحشوني اووووووي اووووووي اوووووي واكتر حاجه مضيقاني ان النت هناك مش زي النت في مصر
النت هناك نظامين نظام الكروت والنظام ده هو والنت من الموبايل مضيعين كل مدخراتي الشخصية والحمد لله ونظام الفواتير والحقيقة علشان انا مفترية في النت فبستخبى من بابا لما بيروح يدفع فاتورة النت وبحس اني شوريرة اووووي عااااااااااااااا
اكتر حاجه مش هفتقدها في مصر الكلية طبعا

وزي ما بقول قبل كل سفر ياريت اي حد زعلته يسامحني لاني مش ضامنة عمري

باي باي يا اودتي في حد في الدنيا يبقى اسم الاوضه بتاعتو فلانتينو ههههههه

باي باي يا كتكوتة هتوحشييييييني اوي اوي اوي وبرغم كل الحوادث اللي عملتها وكنت هعملها بيكي بس بجد هتوحشيني يا انتيمتي ورفيقة دربي بعد المرحومة فوفو

باي باي يا خالتو هفتقد الرغي معاكي في التليفون كل يوم بالليل وهفتقد ضحكنا واغانينا سوى والنصائح اللي بتقوليهالي كل 5 ثواني مع اني بتخنق منها بس متحرمش منك يا خالتو

باي باي يا نيل هيوحشني منظرك وخلودك واللي لما ببصلك بفتكر ان كل حاجه في الدنيا بتعدي بحلوها ومرها زي امواجك الهادية

باي باي يا مكتبة مبارك هتوحشيني بكل كتبك ومحاضراتك وصحباتي امينات المكتبة وكورساتك كان نفسي اكمل باقي كورسات التنمية البشرية بس ما باليد حيلة

باي باي يا هوا بلدي ياللي دايب فيك عطر حبايبي

اشوفكم بخير ان شاء الله واستودعكم الله الذي لا تضيع ودائعه

الأحد، 21 يونيو، 2009

نغمات الجميلة انغام







من كام يوم كنت بفكر ليه انغام معملتش البوم جديد من فترة كبيرة

انا بحب اسمع اغانيها وبحس انها بتعبر اوي عن حاجات كتير جوانا وكفاية انها صوت بجد يتسمع صوت فيه طرب وشجن وع الفيس بوك بيقولوا عليها مطربة مصر الأولى اعتقد هي تستحق اللقب ده
ولسه مستغرقة في التفكير لقيت اعلان البوم انغام الجديد على روتانا قريبا :)
وعملت سيرش على الالبوم عالنت طبعا لسه منزلش بشكل رسمي بس سمعت اغاني كاملة زي ساعات كتير ومهزومة وعجبوني وسمعت سيمبلات للاغاني زي لو اعيش معاك وواحدة بتحبك و حبيبي مالك و دلوقتي احسن

و والله حلوة وعجبتني بجد حسيت انها اغنية دينية وفي نفس الوقت طاقتها الايجابيه عالية و بتدي دفعة للحياة

ودي كلماتها :-

والله حلوة

لو جه في بالنا نحلم بجنة قوة ايماننا هي السلام

والدين معاملة ورسالة كاملة يعني الحكاية مفيهاش كلام

غني وحب وصلي جماعة لقلبك ساعة وربك ساعة

والدنيا حلوة والله حلوة مش ضاحكه علينا وخداعه

متقولش خلصت وذنوبي كترت

متعيشش فكرت جايلي العذاب

صاحب الجلالة الله تعالى م الاستحالة ينسى اللي تاب

ربنا مخلقناش نتألم عادي بنغلط وبنتعلم

والدنيا حلوة والله حلوة اوعى تسيب نفسك وتسلم

************************************

عجبتني الرومانسية والكلاسيكية اللي في اغنية لو اعيش معاك
حسيت ان صوت انغام حالم ده غير صوت البيانو والكمنجات :) اللي في بداية الأغنية والكلمات طبعا جميلة


*************************************

عجبني التحدي والقوة اللي في اغنية مهزومة
في الاغنية دي حاسة ان انغام بتغني من روحها فعلا


*************************************

اغنية دلوقتي احسن حسيت بألم ومرارة وانا بسمع السيمبل بتاع الاغنية دي
بجد احساس قاتل


دلوقتي احسن على الأقل مبقيتش بحزن انه عمره ما حس بيا
انا بس بندم عشان زمان مقدرتش افهم ان هو مكنش ليا
دخل عليا بكل حاجه بحبها صدقته وارتاحت لهواه ....

*************************************
عجباني الشقاوة اللي في اغنية ساعات كتير وكلماتها كمان جميلة جدا وعلشان كده حطيت الاغنية في البلوج حاليا
ودي الكلمات :-



سنين فاتت عليا وقلبى على حاله

لا انا بنسى ولا قادره انى اصفاله

بحبه لكنى شايله ف قلبى منه كتير

ونفسى ااقوله انى لحبه محتاجه

وفى حاجز بيمنعنى وميت حاجه

عشان دا جرحنى ف غرامه وجرحه كبير

وساعات كتير بحتاج للمسه من اديه

واشتاق لحضنه ونظره واحده من عنيه

وانا رغم دا برجع واقول مش راجعه ليه

علشان بخاف ضعفى يبان ويحس بيه

مقدرشى اتحمل ف يوم واصعب عليه

انا عندى اموت ولا انى اعيش اللحظه دى


يجبو ف سيرته قلبي يحن جوايا

وبحلم يبقى في للبعد دا نهايه

لا منى نسيته ولا مني بعيش وياه

لا يمكن غيره يسكن جوه احضانى

بموت م الشوق وعزة نفسى منعانى

اروحله وااقوله ان انا لسه بستناه



وساعات كتير بحتاج للمسه من اديه

واشتاق لحضنه ونظره واحده من عنيه

وانا رغم دا برجع واقول مش راجعه ليه

علشان بخاف ضعفى يبان ويحس بيه

مقدرشى اتحمل ف يوم واصعب عليه

انا عندى اموت ولا اني اعيش اللحظه دى



**********************************


بجد من وجهة نظري الالبوم ده جميل زي الالبوم اللي قبله وان لسه انغام في القمة ومنزلتش عن مستواها الراقي في اختيار الاغاني وتوصيل احساسها بشكل رائع

السبت، 20 يونيو، 2009

كيف ؟؟!


كيف يكتمل حب لم يرى ولم يسمع ولم يتكلم

كيف يحيى حب كان قوته الكلمات فقط

كيف يستمر حب لم يعطر الحياة ولم يبدد الظلام

كيف تحب ولم ترى عيون حبيبك ولم تسمع صوته ولم تترقرق الدموع في عينيك حين رحيله

ولم تشرق الحياة حين رأيت روعة ابتسامته

كيف تحبه ولم تقف امام المرآة بالساعات للتزين له

كيف تحبه ولم ترقص طربا للقاءه

كيف يكون حبا من وحي الكلمات ؟؟ الكلمات فقط ولا شيء سواها

حيث الجميع ملائكة حيث الصغار بملابسهم الجميلة والفراشات بألوانها الزاهيه وعبق الشوكولاته يملأ المكان

يا عزيزتي لم يكن حبا بل كانت مملكة جميلة من نسج الخيال

كنتي فيها انتي الأميرة وهو الأمير في عينيكي

ولكن هو لم يراكي ابدا اميرته فاستيقظي واجمعي شتات نفسك

يا عزيزي كف عن تمثيل دور الملاك فكلنا بشر

يكفي وارحل فلم يدق قلبك يوما الا لقلبك

بقلمي / lady E

الخميس، 18 يونيو، 2009

كوكتيل أفكاري

سؤالات

انا مين ؟؟ رايحة فين ؟؟ احلامي ايه ؟؟ حققت ايه منها ؟؟ طب ايه المهم ؟؟ ايه اهم حاجه نفسي اوصل ليها في حياتي ؟؟

100 سؤال ماسكين ايد بعض وبيطلعولي لسانهم وبيلعبو جوة دماغي والاجابة الوحيدة ليهم
لسه محققتش اي حلم حقيقي من احلامي غير حلمين منهم اني عملت مدونة بكتب فيها وكمان مش راضية اوي عنها
يا ترى انا بس اللي بفكر كده ولا في ناس بتفكر كده برضه بعد الشر عليهم من الهسهس


الارادة الحرة :-

في فيلم من الافلام الاجنبيه كان في ملاك اسمه ثيس نفسه يبقى بشر علشان حاجات كتير منها الارادة الحرة
يعني لما يحب يعمل حاجه يعملها لأن عنده ارادة حرة ولما اتحول من ملاك لبشر ومتسألونيش ازاي لأن ده فيلم وطبيعي مش انا اللي مألفاه يعني ثيس جرب حياة البشر وكنت فرحانه فيه بعد ما اتحول لبشر وعمالة اقوله شوفت حياة البشر تستاهل وفي الاخر الارادة الحرة اللي كان بيدور عليها معملتلوش حاجه وحبيبتة ماجي ماتت

انا اللي جبت ده كله لنفسي :-

كلمه بقولها كتير اليومين دول , اختياراتي ولازم استحملها

كلام الناس :-

عمري ما اهتميت اوي بكلام الناس طالما اني صح وطالما الشخصية اللي اعرفها مشوفتش منها حاجه مش كويسة يبقى مش مهم اهتم بكلام الناس عليها وده عملته مع شخصيتين قابلتهم وتجاهلت كلام الناس عليهم
منهم زميلتي في الكلية والشخصيتين طعنوني بخنجر مسموم نفذ سمه الى قلبي وعقلي
المرة دي روح شكسبير هي اللي حضرت مش اوفيليا وبرضه مش هصدق كلام الناس عن حد !!

دعاء :-

اللهم ياجامع الناس ليوم لا ريب فيه انك لا تخلف الميعاد ..اجمع شملى وشمل من جعلت فى قلبى محبته..آمين

برغم اعجابي بفكرة الدعاء ده بس مرتاحتلوش ومعتقدش اني ممكن ادعي بيه في يوم من الأيام
لأن الحب اعمى وانا اضمن منين ان اللي بعد الشر احبه ممكن اعيش معاه في سعادة وحب
وممكن اوي واحد يحب واحدة محبتوش او العكس يبقى حب اتجاه واحد اللي يروح ميرجعش
وغير الحب ممكن حاجه تكون نفسنا فيها تتحقق وبعدين نلاقي انها لو مكانتش اتحققت كان يبقى احسن


اغنية :-

بغض النظر عن الكليب المستفز للاغنية دي بس الكلمات بتقول

مبتقفش الدنيا ابدا ع اللي راح , ناس تروح في ثانية تيجي مكانها ناس
يعني زي ما كنت من غيرك بعيش مش هسيبك تاني تتعبني وخلاص

وبغض النظر عن باقي الاغنية كل ما بشوف او بسمع الكوبلية ده بالتحديد بقول ياريت الموضوع بالسهولة دي


اغنية كمان :(

احمد سعد
معروف بالاغاني الدراما بتاعته وانا ساعات بحب اسمعها لكن لما شوفت اخر كليب ليه واغنيته يا خسارة عينيا دمعت ونزلت الاغنيه من عالنت وسمعتها تاني برضه عينيا دمعت
ليه النكد ده يا احمد عااااااااااا

جنات وحب امتلاك
الاغنية دي محصراني بطريقة غريبة افتح التلفزيون اسمعها ادخل سوبر ماركت او محل الاقيهم مشغلينها
امشي في الشارع اسمعها لدرجة اني خايفة افتح الحنفية الاقي حب امتلاك طالعه بتقولي بخ
وبالمناسبة دي بقترح ان العرايس والعرسان يرقصو سلو على انغام اغنية حب امتلاك ما هو ده اللي ناقص

دعوة للتغيير :

كتاب عجبني وبدأت في قرائته واسمه ذكريات سمين سابق حبيت اضيف اللينك عندي يمكن حد يحب يقرأ الكتاب ده ويغير حياته

http://www.4shared.com/file/21081004/3a096601/___online.html

ونط في دماغي اخر مرة كنت في المطار اننا مسلمين والمفروض اننا بنمثل ديننا ادام الدنيا كلها وديننا بيقولنا اننا نحافظ على صحتنا فالمفروض نبقى قدوة للغير مسلمين مش العكس وألمني جدا فكرة ان حد يقول شوفو المسلمين مش مهتمين بصحتهم ولا برشاقتهم وهو ده اللي مخليني مستمرة في الدايت
وعلى راي الشوام كرمال الله ما حدا يفكر اني كتير ناصحه
ومش هترجم على فكرة :)
الامتحانات :

اخيرا خلصت امتحانات ودخلت على موقع الجامعة من شوية قولت يمكن بعد الشر اعوذ بالله النتيجة ظهرت
والموقع بطييييييييء وسامعه دقات قلبي بتخبط عالجيران وفأجه لقيت المفاجعة كلية الأداب قسم لغة انجليزية
سنة تالتة النتيجة بتاعتها ظهرت طبعا كنت هعيط من هول المفاجعه وببص ع التاريخ بتاع النتيجه لقيت ايييه؟؟
خير اللهم اجعله خيييييير ؟؟؟ التاريخ 22/3 يعني دي نتيجة الترم الاول الحمد لله ارتحت مؤقتا
يارب كل الدكاترة يجيلهم تجمد مفاجئ في الحر اللي احنا فيه ده ودكتور واحد بس اللي هو الدكتور السكرة حبيب الملايين هو اللي يصحح كل الامتحانات امييييين




الأربعاء، 17 يونيو، 2009

يا عيني عالبنوتات من وسائل المواصلات

دي شوية من وسائل المواصلات

اولا : موتورجل


عملا بالمقولة اتعشى واتمشى فنبدأ بأول وسيلة للنقل وهي الموتورجل والطريقة دي بتعتمد على انك تكوني لابسة شوز مريح اما لو كنتي بتحبي الشوياكة على حساب الراحة ف ممكن تلبسي شوز كعب عالي بس بشرط لما تكوني رايحة تقيسي طولك متكونش صبحتك دكتورة صيدلانيه وعلشانها صبحتك فجاملتك في 20 سم زيادة بمعنى انها متكونش قالتلك انتي مش قصيرة ازعة انتي طويلة وهبلة وانسي الكعب العالي ده خالص وتفضلي تقولي لنفسك نووووو مينفعش البس كعب عالي كده هبقى عمارة ماشية في الشارع كده هشوف الناس بميكروسكوب وتتفاجئي بالحقيقة المرة انك مش طويلة وهبلة ولا قصيرة ازعة عاااااااااااا
وبعدين دايما لازم يكون معاكي شوز استبن زي الكاوتش الاستبن كده ده في حالة لو هتلبسي كعب عالي
علشان الكعب العالي بيعمل مقالب كتير منها انك تكوني رايحه فرح مثلا وانتي لسه داخله القاعه وفرحانه تلاقي الكعب اتكسر وهيبقى قدامك حل من الاتنين تكسري كعب الفردة التانيه من الشوز او تلبسي الشوز الاستبن

ثانيا : لو بعد الشر عندك كتكوتة

لو عملتي سبع رجالة في بعض زي حلاتي وبتسوقي او بتسوئي من السوء يعني الكتكوتة وباباكي قالك في متاعب هتقابلك وانا خايف عليكي منها وعملتي فيها راجل استحملي بقى اللي هيحصلك

اولا : بالنوسبة للمشاة
الغير بشريين


وخصوصا القطط هتلاقي القطط بتعدي الشاعر بهدووووووء وخصوصا لو كنتي ماشية على طريق سريع فتضطري تعملي فرملة كبيرة
وتخبطي في الازاز الامامي للكتكوتة انتي واللي معاكي وتلاقي القطة ماشية بكل ثقة في النفس ومنتظرة انك تقوليلها
يا قطططططططة خربش
وتعدي القطة بسلام بعد ما تكون طلعت روحك
ثانيا : المشاة البشريين
بتلاقيهم واقفين في نص الشارع ومهما الكتكوتة تقول بيب مبيتحركوش بييييييب ولا يعبروكي بييييييييييييييييييييييييب يبصولك شذرا وبرضه يفضلو واقفين وفي الوقت ده بيبقى مطلوب منك تركني الكتكوتة بتاعتك وتنزلي تمشي احسنلك
ثالثا : العربيات والموتوسيكلات اللي بيكون راكبها شباب متخلفين عقليا
فخدي بالك هيعاكسوكي وهيقفلو عليكي الطريق وهيضيقو عليكي الشارع بحيث انك تدخلي في اي حاجه قدامك زي الشطورة والموضوع ده بيحصل كتييييير واحيانا بيوصل لحوادث ممكن توصل للوفاة او لإصابات خطيرة
رابعا : خدي بالك ان نص السواقين مبرشمين او بيشمو خليط من النمل على الدبان المحروق وده بيعمل مزاج فظيع بيخليهم ماشيين مش شايفين قدامهم فتلاقي العربية بتاعتهم بتتمرجح او واحد ماشي في نص الطريق بشوييييييش وانتي والعربيات اللي وراكي مش عارفين تعدو علشان تمشو بسرعه علشان الطرق الجميلة الواااااسعة في بلدنا ويا سلام لما تكوني ماشية بسرعه وتلاقي عربيات هاجمه عليكي والكتكوتة بتاعتك ما بين العربيات دي ويا سلام كمان لما تكوني بتعدي اتوبيس او مقطورة او عربية نقل كبيرة وتبقي وصلتي لنص المقطورة وفأجه تلاقيها بتحود عليكي ويبقى قدامك فرصة انك تقولي الشهادة بس او تبقي ماشيه على الطريق السريع
وتلاقي قدامك حفرة كبيييييرة وجنبك عربيات مش راضيين يدوكي طريق وتبصي تلاقي انك اترزعتي انتي والكتكوتة في الحفرة دي او على العكس ودي الاخطر فأجه تلاقي هرم من الزلط والرمل وده برضه على الطريق السريع قدامك مباشرة من غير اي تنبيه وفي الحالة دي برضه مفيش حد بيديكي طريق وبالتالي ممكن بعد الشر بعد الشر العربية تعمل زي افلام الاكشن ومش هكمل الباقي عاااااااااااااااااااا

ثالثا : الميكروباظ وده مش هتكلم عليه كتير كفاية ان اوله ميكروب واخره باظ ف يجب القضاء عليه اصلا


الجمعة، 12 يونيو، 2009

بفرح لما


اكون بتفرج على موبايل حبيبي وارن عليه واكتشف ان اسمي في موبايله رحيق الورد والرينج تون بتاعت رقمي عنده بدي شوفك كل يوم يا حبيبي ولا تغيب عني ولا يوم يا حبيبي

اكون قاعدة مع نفسي وحاسة بوحدة وغربة وفجأه الاقي مسج من صديقة غالية عليا بتقولي انتي ع البال ومش ممكن تتنسي بحبك اوي

لما اشوف صورتي في موبايل حبيبي برضه والاقي اسم الصورة بنتي وحبيبتي وعمري

لما بحس ان حبيبة عمري هي اختي وصحبتي وانتيمتي واخيرا مامتي

لما بشوف ضحكة هدى اللي عمرها شهرين ضحكة بريئة بتنور الدنيا وبتملاها سعادة


لما بحس ان حد بيحبني بجد مش مجرد كلام

لما بروح المدينة المنورة واحس بسكينتها وجمالها يارب ازورها تاني قريب

لما بشوف البحر واحس بعطر البحر مالي المكان حب ودفء وغموض


لما بشتري عطر جديد وانا وصبحتي بنطلع من محلات العطور كإننا ازازة برفيوم من كتر العطور اللي جربناها وبنضحك على نفسنا

لما بشوف صبحتي شيري بعد سنة كاملة غياب وكإننا مبعدناش عن بعض غير كام ساعة

لما باكل شوكولاتة :)

لما اكون بتمنى حاجه من كل قلبي والاقيها بتتحق من غير ما حتى اقول عليها

لما بكون ماشية بالكتكوتة ويلفت انتباهي فساتين السواريه والافراح بحس بفرحه غريبة لما بشوف الفساتين دي وبحس اني انا وكل بنوتة بنبقى في اللبس ده أجمل برينسسز


لما الكتكوتة بتبقى نيتها صافيه ومش عايزة تتصلح مش زي امبارح طلعت عينينا الكاوتش والبطارية كانو نايمين والبنزين خلص والزيت كان عايز يتغير حتى الام بي فور اللي مستحملة اغاني جنات عليه من اول الامتحانات كان صوته مش حلو وبيقطع واخيرا المراية الجانبية اتفشفشت يا عيني عليكي يا فشفوشة

لما بدخل قسم لعب الاطفال في اي مول


لما بمشي بسرعة على اي طريق وبخرج ايدي من شباك الكتكوتة وبحس اني طايرة

لما بسمع اغاني بحبها ولما بغني اغنية بحبها ولما بشوف افلام بحبها ولما بسرح مع كتاب بحبه ولما بتوه في سحر الكلمات لما اقرأ لحد أنا حباه
وطبعا لما بكتب حاجه بحبها


لما ادخل المطبخ واطبخ اكلة جديدة وتطلع حلوة

لما بسافر وانا في قمة احباطي وحزني وبدوب احزاني في مسافات الطريق

لما بشوف منظر السحاب والشمس والسما الزرقا والبحر من شباك الطيارة

لما بلاقي تعليق جديد عالمدونة

حاجات بسيطة بتحصل في حياتنا وبتفرحنا ويمكن كتير مش بياخدو بالهم منها

دي شوية من شوية حاجات لما بتحصل بفرح بيها
يا ترى انتو بتحسو بسعادة لما بيحصل ايه؟

الأربعاء، 10 يونيو، 2009

باللغة العربية الفصحى




باللغة العربية الفصحى ... استيقظ وركز واصحى دي جزء من كلمات اغنية ل ايمن بهجت قمر وبتغنيها سيرين
كان ياما كان مش في قديم الزمان اوي يعني من حوالي 3 سنين قبل ما ادخل كلية الهباب قرأت المقررات بتاعت قسم لغة انجليزية وقسم اعلام عالسايت بتاع الجامعة لاني كنت محتارة جدا بينهم
و كان المفروض ندرس لاتيني ولا تغديني في سنة تالتة اللي انا فيها حاليا وبعد يومين ان شاء الله هسيبها بلا رجعة والسادة الموقرين في الجامعة قرروا انهم
يلغو اللاتيني ويبدلوه بلغة الضاد اللي هي بتاعت عربي انا اخشيني الويل اذا احببتني بتاعت يوري مرقدي
او
عربي انا...... اخشيني!!!!!!!
عربيٌّ أنا أ رثيني.. شقّـي لـي قبـراًً .. و اخفينـي
ملّت من جبني .. أوردتى... غصّت بالخوف شراييني
ما عدت كما أمسى أسداً.. بـل فـأر مكسـور العيـنِ
أسلمت قيادى كخـروفٍ... أفزعـه نصـل السكيـنِ
ورضيت بأن أبقى صفراً.. أو تحت الصفـرِ بعشريـنِ

للشاعر احمد مطر


عندنا 3 اجزاء في منهج العربي هننطحن فيهم بكرة ان شاء الله
اولا : الادب في العصر الجاهلي
ثانيا: الشعر في عصر النبوة وصدر الاسلام
ثالثا: الشعر في العصر الاموي


وبكل ثقة ااقدر اقولكو ان التلت اجزاء ارخ .. احم اجمل من بعض وخصوصا بتاع العصر الجاهلي اللي فيه مين؟؟ مين؟؟
ايوة امرؤ القيس اللي انا مخنوقة منه من وانا في ثانوي بس كنت بحب اشعار ليه كلها تشاؤم

وليل كموج البحر ارخى سدوله .... علي بانواع الهموم ليبتلي
الا ايها الليل الطويل ألا انجلي .... بصبح وما الإصباح منك بأمثل

سمعت ان امرؤ القيس حامل لواء الشعراء الى النار بس لما بحثت شوية عرفت ان ده حديث ضعيف والله اعلم

اما عن اشعاره فحدث ولا حرج في ليه اشعار جميله جدا
وفي ليه اشعار المفروض مندرسهاش اصلا بس موجودة في الكتاب بتاعنا ومطلوب مننا نحفظها للأسف
منهم قصيدة اسمها مهفهفة بيضاء

ندخل على العصر الأموي : في 3 انواع من شعر الغزل منهم الغزل العذري
ومن حسن حظي اني كنت عاملة بحث عن الغزل العذري وانا في ثانوية عامية

ربنا يصبرني وانا بذاكر النوع ده من الشعر علشانه شعر يقطع القلب


ما علينا نرجع لموضوعنا جبتلكو كلام من اللي مكتوب في كتابنا العربي بتصرف


( الشعراء في الشعر ده اهتموا بوصف احوالهم النفسية في الحب ووصف عذابهم حين يشتد الحب والجوى ولكل منهم قصة حب فاجعة تنتهي بالجنون او بالموت وتموت الحبيبة إثر محبوبها , ومن الجدير بالذكر اننا نجد في شعر بعض العشاق انهم وضعو المحبوبة في مكانة عالية فهي ليست كباقي النساء بل هي ملاك او روح الحياة وجوهرها بصراحه ناس بتفهم
والملمح التاني هو المزج بين الحب والموت سواء في قصة العاشقين او في الشعر فكأن الموت هو الخلاص الوحيد من اعباء هذا الحب الفادح الذي يستهلك حياة صاحبة اوعو حد يسمع الكلام ده ويروح ينتحر وبعدين يقول ليدي هي اللي قالت-
ومنهم وانا موافقة جدا على الرأي ده من يعتبر الحب مرضا طارئا صعب الشفاء منه
وللأسف ده المرض الوحيد اللي ملوش علاج رحماك يا ربي

اما مجنون ليلى فيرى ان الحب ابتلاء من الله ينزل بالقلب فلا يجد القلب عنه حولا او منه شفاء

خليلي لا والله لا أملك الذي ... قضى الله في ليلى ولا ما قضى ليا
قضاها لغيري وابتلاني بحبها فهلا بشيء غير ليلى ابتلانيا


اما الملمح الثالث فهو الولع بالوحدة وبالخروج من دائرة الناس لتذكر ذكريات الحبيب
وعدم تذكر اي حاجه الا الحبيب

جميل بثينة بيقول : وإن قلت ردي بعض عقلي أعش به تولت وقالت : ذلك منك بعيد

والملمح الرابع تمني العودة للطفولة حيث الحب بلا تكاليف ولا قيود

واخيرا : الرغبة في النوم لعل الأحلام تحقق للمحب لقاء يسعد فيه بعد ان عز اللقاء
وحال المجتمع دون العاشق وما يشتهي ويريد

وفي ابيات انا بحبها جدا لقيس لبنى بيقول :


وإني لأهوى النوم في غير حينه لعل لقاء في المنام يكون
تحدثـــــــــني الأحلام أني اراكم فيا ليت احلام المنام يقين


وبكده ابقى لخصت معاكم الدرس بتاع الشعر العذري في العصر الاموي
ولسه 180 صفحه باقي المنهج
حسبي الله والله العظيم عااااااااااااااااااااااااااااااااااااا



الأحد، 7 يونيو، 2009

مش قادرة اسامحـــــــــــه

ملحوظة : الخاطرة دي نتيجة مود شوية اغاني زي الفل لثومة والاغاني دي للصبر حدود , هجرتك , جددت حبك ليه ياض :) ف أي حد هيربط بيني وبين الخاطرة هيتعلق على باب المدونة

ملحوظة كمان : بالعند في اللي بيسرقو مواضيعي هكتب خواطري ولا يهمني منهم وحقي هاخده لو مكنش في الدنيا يبقى من حسناتهم



عايشة وحيدة متغربة

بدور على روحي ومستغربة

غاب النور عن حياتي

والبسمة والفرحة وضحكاتي

كل كلامي عنه وحكاياتي

ايوة كان وكان وكان

بس في لحظة قلبي على قلبو هان

مش قادرة اسامحه

بس ببكي على جرحه

هسامحه ازاي وهو اناني

بيقول بيحب وبينسى الاماني

وازاي ممكن انسى دموعي

وازاي انسى عذابي

طريقنا مش واحد

صعب اديه الامان

وهو جرح وباع وخان

يارب صبر كل حبيب

وصبر قلب جواه

دموع والم ولهيب


بقلمي طبعــــــــــــا lady E

الجمعة، 5 يونيو، 2009

انا كمــــــــــــان اتســـــــــرقت !!! + تحديـــــــــــــــــــــــــث


النهاردة كنت بكلم ماما على اني بشوف مدونات بيستخدمو فيها نفس تعبيراتي وكلامي واسلوبي في الكلام ودي حاجه ضايقتني
فماما قالتلي بالعكس دي حاجه تفرحك ان اسلوبك مؤثر وده دليل نجاحك بس انا كنت معتبرة الموضوع ده سرقة لان دي مفرداتي ودي حياتي وبعدين كلمت خالتو المصرية في نفس الموضوع قالتلي ان علشان سننا متقارب في التدوين فممكن تكون المفردات دي مشتركة ما بيننا واني مأخدش الموضوع بحساسية
المهم قرات بوستين واحد ل احساس طفلة محبة للرومانسية بس واقعية والتاني لمنوش بيتكلمو فيها عن السرقة
ولاني قولت وده مين ده اللي هيسرق افكاري فطنشت وبعدين بعد لما شوفت بوست منوش دورت على بوست من البوستات بتاعتي
ولقيت نفس ذات البوست نازل في منتدى في نفس اليوم اللي كتبته فيه بس انا كتبت البوست الساعة عشرة ونص واللي سرقته نقلت البوست الساعة 4 الا ربع http://shatawy-dj.ingoo.us/montada-f4/topic-t5804.htm
انا بجد دمي محروق اني اتسرقت ولو انها سرقة افكار بس بجد احساس وحش اوووووووووووي ومؤلم اووووووووووي ان افكاري ومشاعري تتسرق بالسهولة دي لأ ومش كده بس كمان تتنسب لحد غيري
طبعا انا لسه مبحثتش عن باقي المواضيع لما افضى بعد الامتحانات ان شاء الله واشوف ايه اللي اتسرق تاني
يا عالم ما خفي كان افظع !!!!!!!!!
--------------------------------

تحديث : في مدونين انضمو لموكب المسروقين اشمعنى هما يعني :) وده بيدل على اننا ما شاء الله مواهب فذه
كيكي اتسرق منها موضوعين الاول اسمه خبر عاااااااااااااااااااااااجل وده اللينك بتاعه
http://fokaakmeny.blogspot.com/2009/05/blog-post_13.html
وطبعا اللي سرقته مكتبتش انه منقول وبالتالي كل التعليقات كانت بتشكرها على كتابتها للموضوع طبعا حاجه تضايق وتزعل وتحرق الدم
ده لينك الموضوع المسروق :
واللي سرقت البوست ده عندها مدونة بس انا مش هكتب اللينك بتاعها
اما البوست التاني بتاع كيكي واسمه قسم يا عمدة قسم بس من غير صداع وده اللينك بتاعه
وكمان فكرت شوية ان معظم الحاجات اللي بتتسرق بتكون شعر او مواضيع ساخره فعملت سيرش على اشعار مدونة كلام من القلب
ولقيت ان في قصيدتين مسروقين من المدونة ومنشورين في منتدى اسمه اصحاب فور يو
بس الجميل اني لما فتحت المنتدى ده لقيته مش بيفتح بس النتائج بتاعت الشعر طالعه على جوجل يعني القصائد دي كانت مسروقة فعلا والقصيدتين اللي عملت عليهم سيرش وطلعو مسروقين هما حوار مع الحبيب ولون عنيكي
وكمان عاشقة الرومانسية في ليها بوستات اتسرقت
وكمان مدونة اخف دم اتسرق منها بوستات كتير
وعلى رأي أ- تامر علي كلنا اتسرقنا بس كنا رجالة ووقفنا وقفة رجالة
وارجع واقول ما خفي كان افظع !!

الأربعاء، 3 يونيو، 2009

مشـــــوارك لـــــو يطــــــــــــــــــــول



مشوارك لو يطـــــــــول .... جمد قلبك وقول همشي ومش هتعب

خطوة ورى خطــــــــوة ..... تتعب لكن تلقى نهايته بتقرب

متقولش موش قادر ...... حاول اوي وعافر

مهما الطريق يقسى ....... هتحبه في الأخر


جزء من اغنية تنمية بشرية