الأربعاء، 22 أكتوبر، 2008

يوم أخر من حياتي

تنويه :بجد انا عارفة اني مقصرة جدا في اني اعلق عند كل المدونين اللي بحب اتابعهم بس اللي لازم تتأكدوا منه اني بزور كل المدونات ومتبعاها بس مش بعرف ارد لان بجد معنديش وقت خالص حتى البوستات بكتبها بين المحاضرات في الكلية وكمان النت عندي فاصل فبدخل النت من الموبايل او بالدايل اب
-----------------------

كالعادة لازم اصحى من النوم بدري علشان اروح للمحروسة من عين الحساد كليتنا الموقرة
بابا حبيبي ربنا يشفيه وميحرمنيش منه يا رب بيصحيني من النوم كل 5 ثواني ( ليدي قومي علشان الكلية)

وماما كل 3 ثواني ليدي قومي إتأخرتي عالكلية

في الأخر بضطر اقوم غصب عني لأن خلاص النوم بيكون طار من عنتيني

قال يعني رايحة اكسفورد ولا كامبريدج

وكالعادة برضة بقف قدام الدولاب نص ساعة اختار هلبس ايه؟؟؟!

وبعد تثاقل لبست ونازلة من البيت ماما قالتلي كلمة كل يوم (( كل يوم احضر الفطار اللي بتحبيه وانتي متفطريش )) وانا مبررة موقفي : معلش بقى يا مامتي مليش نفس واتأخرت عالسيكشن

وبابا حبيبي وصلني ياااه من فترة كبيرة موصلنيش الكلية واخر مرة وصلني زميلاتي حسدوه يا عيني

وقالولي اول لما دخلت الكلية : مبروك الخطوبة لما انتي اتخطبتي معزمتيناش ليه

انا : اتخطبت ؟؟؟؟؟!

زميلاتي : بلاش انكار مش القمر اللي بيوصلك ده خطيبك

انا : خطيبي ازاي يعني ده بابايا

زميلاتي : واو باباكي ازاي ده أمور اوي

انا (وانا بغلي من جوايا من كلامهم)والله بابايا خلاص بقى يلا نلحق المحاضرة
وبعدها على طول رجلاية من رجلتين بابتي اتكسرت كسر خفيف ومقدرش يوصلني تاني الكلية وبصراحة انا خفت عليه اوي وقلتله ميوصلنيش الكلية تاني وحكيتلو ع اللي حصل مع زميلاتي
الكلام ده كله افتكرته واحنا في طريق الكلية الى جانب اني كنت مخنوقة من اني رايحة الكلية اصلا

فبابا لمح اني مضايقة ومكشرة وقاللي : مالك يا نوننة (اسمي برضه)
قلتله : مضايقة يا بابا رايحة الكلية واتأخرت عالسيكشن
قاللي : كإنك رايحة جامعة القاهرة هو ناقص ايه على جامعة القاهرة يعني الساعة طيب
تن تن تن تن تن تن تن تن

انا : :) :)

وصلنا الكلية وانا بسلم على بابا قاللي : افتكري تن تن تن تن تن تن تن تن

انا : :) :)ماشي يا بابا سلام

طبعا فضلت ادور على مكان السيكشن وتايهه وبعد فترة وصلت لمكان زحمة واوضة شبه اوضة الفيران
فيها البني ادمين كإنهم في علبة سردين وعرفت ان ده عقاب اللي يدخل كلية حكومية
المعيدة العتيدة قالتلنا هتشرح للجروب التاني كمان 3/4 ساعة قلنا كويس هتكون الزحمة دي خفت
ورحت انا وباقي زميلاتي المكتبة علشان نشتري باقي الكتب
وللأسف رجعنا لقينا المعيدة الشوريرة بدأت السيكشن التاني قبل معاده بربع ساعة
وتخيلو المشهد رؤوس فوق بعضيها وبنوتات قاعدين ع الشبابيك واحنا في الدور التاني عايزين ينتحروا تقريبا
وموجة حر طالعة من السيكشن ومفيش ولا ذرة اكسجين
وقفت شوية ع الباب انا وحشد هائل من البنوتات وكنت بسمع شوية وبطلع اتنفس شوية وخلص السيكشن ومحاضرة الدراما

وطلعت من الكلية وماما اصرت اني اسوق الكتكوتة علشانها تعبانة

لأول مرة اضطر اسوق الكتكوتة بتاعت بابتي في عز الزحمة وشكلها غارت من فوفو حبيبتي اللي وحشتني وجت في عز الزحمة ووقفت فأجه والعربيات اللي ورانا كانت هتعملنا سندويتش لولا ربنا ستر

ومحمد ثروت وقتها كان بيستفزني وعمال يغني حلوة حلوة الدنيا حلوة يا حياتي حلوة بيك في الكاسيت ومخليني مش مركزة

وبعد شوية لما الكتكوتة دارت بضحك مع ماما و بقولها ما احنا لو كنا مشغلين شريط حماقي مكنتش الكتكوتة عطلت ماما ضحكت وقالتلي ايوة هو العيب في الشريط المرة الجاية نسمع حماقي :)

بس بجد كان يوم لذيذ
واهو يوم مر من ايام حياتي بيقربني من ان يبقى عندي عشرين سنة

ايييييه يلا حسن الختام

سلام



هناك 8 تعليقات:

mohamed ghalia يقول...

المهم إنك تستمتعى بحياتك حتى رغم مشاكلها هيا المشاكل كده عمله زى الملح فى الأكل. بس يارب الملح ميزدش
كل يوم بيعدى بيقربك للعشرين ويلا حسن الختام إيه يا بنتى فى إيه إنتى خسستينى إنك داخلة على الستين
على كده أنا خلاص عجزت بقى أنا لسه مكمل عشرين سنة من كام شهر أروح أشوف حد يساندنى عشان اروح الكلية ههههههههههههههههه
تحياتى
دمتى بود

كـــيــــــــارا يقول...

ههههههههههههههههه

عثل ياصبحتي

ويوم فله

بتفكريني بسكشن دكتوره عايده

زي السكشن بتاعك بالضبط

كنت بروح قبله بساعه عشان الاقي مكان اقعد

انا حره يقول...

هيروغليفى ايه بس ياقمر هههههههههه

انتى كدا بتظلمى الهيروغليفى برجلايا دى

بس تعالى هنا قوليلى اموت واعرف جبتى شريط محمد ظروت دا منين

كباريه يقول...

هي الدنيا كده يوم حلو ويوم مر وبعضنا بيبحث عن السعاده والبعض الآخر يصنعها

romansy يقول...

هيه دايما كده الناس مش بتسيب حد فى حاله دايما بيقولوا عليه اشاعات
بس انتى اسلوبك بسيط وجميل

عايش علي الهامش يقول...

ياه عشرين بس علي كده خلاص انا طلعت معاش من زمان
خديها قاعده من واحد عجوز جدا تقريبا كل المعيدين اشرار الي ان يثبت العكس واليوم الي تعرف تنام فيه وتسيب كليتك بركه وكل سنه وانتوا طيبين و...
انا كنت جي اقول ايه مش عارف بس كل ده من اثر البقاء في سكشن مزدحم وثاني اكسيد الكربون اثر علي ....
لا كده البطريات فصلت رنا يخليلك والدك ويخف وبلاش يوصلك هو انتي صغيره ده انتي خلاص حشن الختام
بهزر طبعا ربنا يديك طولة العمر
شكر ليكي

Lady E يقول...

mohamed ghalia : عندك حق الملح لما بيزيد بتبقى مشكلة
وبعدين انا عمري المفروض 19 بس بحس ان عندي 120
ربنا يبارك في عمرك واعتمد على نفسك متخليش حد يسندك علشان الكلية هههههه
دمت بخير

Lady E يقول...

كـــيــــــــارا : انتي اللي عسل يا كوكي

عارفة اللي غاظني اني صحيت بدري ومع ذلك معرفتش احضر لا اول ولا تاني سيكشن لأن كده يعتبر محضرتش عااااا

ادعيلي يا كوكي