الجمعة، 27 فبراير 2009

حالي من حالك



ماشية في الطريق والليل حالك

والليل طويل وحالي من حالك

ومفيش ضيا في القلب والحب هالك

والظلم ظلام وظلام وبحور وجبال بعيدة

يا روحي متستسلميش وخليكي عنيدة

بكرة تتعدل والشمس تيجي جديدة

ويروح الظالم ويموت الظلام وتتبسم الحياة سعيدة

وتهمس النجوم بحب مش قولتلك هيجي اليوم ومش هتبقي وحيدة


LADY E

الثلاثاء، 24 فبراير 2009

يوم كميل في الكلية


هو ده الاعلان اللي اتكلمت عليه البوست اللي فات


النهارده صحيت من الساعة 6 ونص صباحا وانا مش واخده على الشقا ده , وليه صاحية بدري كده كفا الله الشر؟؟ علشان عندي محاضرة الساعة 8 ومش عارفة ليه كنت كل شوية بغني كله الا عفيفي ودي تبقى دنيا الا ويا عفيفــــــــي انا ليا مين في الدنيا بعد عفيفي - مين عفيفي ده؟؟-

ونزلت من البيت 8 وشوية :) ولقيت جارة لينا انا معرفش هي مين اساسا معدية فقولتلها السلام عليكم لقيتها عارفاني ياااااادي الكثوووف وانا مش عارفاها وبتقوللي انتي من دور احفادي مع انه ميبانش عليها خالص اني من دور احفادها لأنها ما شاء الله عسولة جدا وكأنها في العشرين من عمرها وسالتني شوية اسئلة جاوبتها على الطريقة الستيتية _ اي بتاعت دكتر ستيتة _ سوقت الهبل في الجبل واللي عايزة اجاوب عليه جاوبته واللي مش عايزة اجاوبه مجاوبتوش وعلى فكرة يا دكتر حبيت الطريقة دي اوي وبقيت اطبقها كتير لأن المتطفلين كتييييير نياهاهاهاهاها

طبعا وانا نازلة الكلية الكميلة كان وقت مدارس واجاركم الله لما تسوقو في وقت مدارس بتبقى خيبة بعيد عنكو الشوارع بدل ما بتبقى سودا بتبقى زرقا وحمرا .

وصلت طنط جارتنا اللي اتحرجت اسألها عن اسمها لشغلها ورحت ع الكلية ولقيتني ببيع لبن مفيش حد في الكلية غيري يادي الخيشة انا ايه اللي جابني

5 دقايق ولقيت زميلة تانيه لينا جت وبعدها زميلة تالتة قعدنا اتكلمنا في حاجات كتير وسلينا بعض وقعدنا نص ساعة لغاية لما باقي زميلاتنا جم _ اتوا الى الكلية :)

وشوية بشوية لقينا الدكتورة جت بعد 3/4 ساعة انتظار وكانت محاضرة لذيذة بتتكلم عن الميثولوجي او علم الاساطير بس الرخم فيها انها بتتكلم عن صراع الانسان مع الألهة زي هركيوليز وزينا كده على ما انا فاكرة ان الالهة كانو مضطهدينهم واخدنا مثال على كده حرب طروادة _ طبعا الكلام ده هبل اصلا_

سبحان الله الواحد القهار

بعد المحاضرة عرفنا ان علينا عربي جاهلي وزغرطي ياللي منتيش غرمانة خلصنا المحاضرة الساعة 11 والمفروض نستنى المحاضرة للساعة واحدة وشايلة عيل واستنينا المحاضرة للساعة 2

وفي الفترة دي رحت اوضة الدكاترة بتاعة اللغة العربية اسلم على قريبتي وقالتلي اقعدي معايا شوية

المهم في الاوضة دي الدكتور بتاع العربي اللي بيدرسلنا عربي جاهلي السنة دي ودرسلنا قبل كده في سنة اولى فأنا كنت محرجة بطريقة بشعة اني أأقعد في اوضة الدكاترة _ والله وبقيتي دكتورة يا ليدي لولولولولي_

المهم كنت بكلم قريبتي على النتايج وان في دكتور عندنا سكرة احسن دكتور في الكلية كلها بيحددلنا المنهج وبيديلنا تقديرات

_ مكونتش اعرف ان الدكتور قاطع ودانه وراميها معانا وعرفت انه سمع كلامنا لأنه اتكلم عنه في المحاضرة_ توبة مش هقعد في اوضة الدكاترة تاني


شوية وطلعت لزميلاتي وقفت معاهم ساعتين كاملين مفيش مكان نقعد فيه اصلا وفضلنا نتكلم ونضحك ونهزر احنا المعذبين في الكلية ولفت نظري اعلان تاني هههههههههه

احلى حاجة انهم عرفونا الملخصات بتتباع فين لاني مش ناوية اخد كورس السنة دي :)

واخدين بالكو من المساءلة القانونية والجنائية هيسجنونا بتهمة شراء الملخصات وقتل الكتب نياهاهاها

صورنا مناظر كتير للكلية ولقيت الدكتور بتاع العربي اللي في الكلية بشكل وعلى قناة دينية بشكل تاني وقولت لزميلاتي عايزة اصور الدكتور ده طبعا هما مش عارفين ليه وميعرفوش حاجة عن البلوج اصلا فقالولي اوعي انتي كده هتبقي صورتي دكتور في اثناء تأدية وظيفته

وبعدين مر علينا واحد المفروض انه طالب يعني وشكله كده كان راجع من مكان مليان سجاير والجو من حوالينا بقى ريحته سجاير وكنا هنفطس ولقيت ايمو زميلتي بتقول على فكرة دي مش ريحة سجاير بس دي ريحة سجاير محشية

دودو ردت عليها وقالتلها محشية كوسة ولا بتنجان هههههههههههه

في الوقت ده زميلة ليا منتقبة قصدتني اني اجيبلها النتيجة من قريبتي اللي في الكلية وطبعا مقولكوش على السخافة اللي قابلتها من امن الكلية واحنا داخلين الكلية بس انا رديت عليهم وقولتلهم على فكرة احنا جايين الكلية من قبلكو وانتو مكنتوش موجودين _ ايه الرزالة دي_ المهم للأسف جبت النتيجة لزميلتي هي اتجوزت الترم الأول وحامل دلوقتي وحماتها جابت بيبي في وقت امتحانات زميلتي ف للأسف معرفتش تذاكر عرفت من قريبتي ان زميلتي شالت 3 مواد وحاولت امهد لها وهي قالتلي انها حلت وحش في 3 مواد عشان ملحقتش تذاكرهم وقلبي كان بيتقطع وانا بقولها اخر اليوم على النتيجة حسيت انها داخت للحظة ومع اني قولتلها النتيجة بيني وبينها حفظا على شعورها الا انها قالت لزميلاتنا عن نتيجتها بجد قلبي موجوع عليها اوي

شوية ورحنا المدرج نستنى الدكتور اخدت موبايل واحدة زميلتي وعندها مقاطع صوتية تفطس من الضحك منها مقطع اسمه الحقيقة اب بيكلم ابنه بيقوله خد يا واد يا بؤلة

وبتتوالى الاحداث لغاية لما الاب بيقول لابنه لازم اقولك عالحقيقة المرة

الابن بيقول : لأأأأأأاأأأأأأأأأأأأأأأأأأأأأأأأأأأأأأأأأأأأأ - انا مش فاهم حاجة يا بابا _

الاب : اومال بتصوت ليه يا ابن العبيطة ...... الخ بس بجد مقطع ضحكني جدا

وشوية روحت اسأل على الدكتور انا وزميلتي لقينا مراته الدكتورة بتقولنا ده بيديكو المحاضرة من نص ساعة _ نعم يختي احنا مستنينه كل ده وبعدين تقوليلنا بيدي المحاضرة من نص ساعة_ قولنا للدفعة الكلام ده وزي التائهون في الارض فضلنا ندور على الدكتور فين ولقيناه في مدرج في الركن البعيد الهادي ولسه مبتداش ولا حاجة وبداية الكلام كانت على رأي عايش على الهامش

وتبحتر الحطاء غير معمعم وتداخل البعبيط بين تخبرا وتناهوا بين السماميك تحضرا(يعني ازيك بالفصحي) نياهههها

وباقي المحاضرة على رأي مستر هاني زينهم :

... تدفق في البطحاء بعد تبهطلِ *** وقعقع في البيداء غير مزركلِ .... وسار بأركان العقيش مقرنصاً *** وهام بكل القارطات بشنكلِ .... يقول وما بال البحاط مقرطماً *** ويسعى دواماً بين هك وهنكلِ ....إذا أقبل البعراط طاح بهمةٍ *** وإن أقرط المحطوش ناء بكلكلِ .... يكاد على فرط الحطيف يبقبق *** ويضرب ما بين الهماط وكندلِ.... فيا أيها البغقوش لست بقاعدٍ *** ولا أنت في كل البحيص بطنبلِ .

الحمد لله يا رب اني بدرس انجليزي هههههههههههه وربنا يعينني على العربي

وبعد يوم شاق ومتعب كنت فرحانة بجد اني صحيت بدري ورحت الكلية وعلى عكس السنتين ونص اللي فاتو مكنتش بحضر او كنت بحط سماعات الموبايل في وداني وانعزل عن العالم الخارجي النهارده كان يوم جميل بجد والحمد لله ان معايا عربية حسيت بقيمتها بجد النهارده حتى لو بعمل بيها حوادث بس الحمد لله ربنا بيستر واول اغنية سمعتها كانت لتامر عاشور بتقول _ لحد كده كتر خيري بصراحة ريحت ضميري_

فعلا انا ريحت ضميري لما حضرت المحاضرات انا كنت في يوم من الأيام نسيت اني بدرس اصلا وكل ده بسبب الكورس اللي كنت معتمدة عليه بس ان شاء الله الترم ده مش هاخد كورس لو حصل ايه

وعلى فكرة طردونا برضه من الكلية النهارده علشان كنا اخر دفعة وعايزين يقفلو الكلية بس المرة دي مسكتش وقلت لزميلتي وعارفة ان العسكري سامع ياااشي الفشايح شكلنا بقى زبالة وسط الكليات كل ما نيجي الكلية يطردونا فلقيت العسكري بيرد وبيسبل عينيه - يادي النيلة- لأ طبعا مش بنطردكو بس عايزين نقفل الكلية قولتله اقفلو الكلية براحتكو بس مش بالطريقة دي مش بإنكم تطردونا

بالنوسبة للردود اللي على البوستات اللي قبل كده ان شاء الله هرد عليها يوم الاجازة بتاعت الكلية

BEST WISHES

الاثنين، 23 فبراير 2009

حفلة الأميـــــــــــــــرات


امبارح وانا ماشية في الكلية في وسط الدوشة والزحمة لمحت اعلان للأسف مصورتوش مش عارفة ليه _ لو روحت الكلية ولقيته لسه متعلق هصوره_
الاعلان خلاني اسرح وقلت مستحيل كليتنا تبقى بالتحضر والذكاء ده
بداية القصيدة كفر زي ما بيقولو في اول الاعلان مكتوب ويلكم بارتي _ ويلكم بارتي الترم التاني واخدين بالكو _ ما علينا عدوها يا ساتر بتمسكو ع الوحده ليه كده
اصلا احنا دخلنا الكلية ومحدش عبرنا ولا عرفنا عليها ولا احتفلو بينا ولا اي حاجة خالص مالص بالص
قولت اخيرا افتكرونا وهيعملولنا ويلكم بارتي صحيح فات سنتين ونص دراسيتين لكن موش مشكلة خاااااالص نحتفل بالبارتي ليه لأ
تكملة الاعلان :
الى اميرات وامراء الكلية _ اللي هما مين الامراء والاميرات دول تجاوزا صدقت انه الامراء والاميرات دول احنا الطلبة_
دعوة لحضور الحفل الملكي _ حفل ملكي مرة واحدة كده_ يوم 24/2 وعلى الراغبين في الحضور ارتداء الملابس الرسمية الملكية للأمراء والأميرات _ لا متقولوش بجد مش مصدقة عنتيني حفلة تنكرية في كليتنا المفترية لالالا قولو كلام غير ده_
بعد الاعلان بشوية رحت اتحاد الطلبة _ اللي هما في قمة السخافة وواخدين في نفسهم مقلب للأسف_ سلمت عليهم وسألتهم على المكتوب في الاعلان وقالولي ايوة الحفلة الساعة 12 الظهر في الكلية
انا : طب ايه موضوع اللبس الملكي اللي في الاعلان ده
واحدة من اتحاد الطلبة : لا عادي ده علشان الاعلان شو مش اكتر
انا : شو ازاي يعني انا كنت مفكرة الحفلة هنيجي بفساتين وكده
نفس الواحدة : فساتين هاهاهاهاها طب بصي تعالي يوم الحفلة بفستان سواريه _ طب دي نكتة؟؟ اضحك يعني ولا ايه؟؟_
انا : يعني الحفلة عاديه
نفس الواحدة : اه وعلى فكرة في اجتماع للعميد يوم مش عارفة ايه
انا : ابقي قابليني لو حد حضر
نفس الواحده : عارفه ان محدش هيحضر
انا : سلام
وطلعت من اتحاد الطلبة ونفسي اولع فيهم وفي الكلية اصلا احنا مخترناش الناس دي يبقو اتحاد طلبة ولا علشانهم من اعلام يعني
ودايما اعلاناتهم مستفزة
خير خير كلها 3 ترمات بما فيهم الترم ده واخلص من الناس اللي تجيب شلل رباعي دي ان شاء الله
في النهاية احب اقول ان ده بوست رخم بس انا كتبته علشان محدش يرد ع البوست اللي قبله تاني :)

السبت، 21 فبراير 2009

كابوس وراح الحمد لله + تحديث

يمكن كتير استغربو اني كتبت بوستين في يوم واحد وده البوست التالت بس انا كنت بحاول اخفف عن نفسي القلق والخوف اللي كنت فيه
وكنت شبه متأكده ان في حاجة صعبة هتحصل النهارده بعد ما قمت من النوم وانا بعيط
كنت خارجة مع ماما بالكتكوتة للأسف وكان في حادثة موتوسيكل وعربية
وبعد 300 متر تقريبا كان في تقاطع - شارع جانبي- وانا ماشية قلبت النور على اساس اني أقول للي طالع من التقاطع خد بالك في عربية جاية
وفوجئت ان في ميكروباص مجنون طالع من التقاطع بسرعة كبيرة جدا وكان ممكن اعدي من قدامه وبسرعته دي كنا هنتفرم وسرعة الميكروباص هتحدفنا على الطريق التاني ومنه للنيل يعني كانت هتبقى كذا حادثة كان لازم اتصرف في ثواني هديت السرعة ووقفت قبل التقاطع على اخر لحظة والعربية اللي كانت ورايا جت بسرعة وطاااااااخ خبطت فينا طلعت من نص الطريق مكان الحادثة علشان منعملش حوادث تانيه وركنت على جنب
ونزلت انا وماما نشوف ايه اللي حصل للعربية والكتكوتة بقت موديل جديد الشنطة شكلها اتغير وبعدين اللي خبط فينا جه بعربيته ونزل وعنيه زي ما بيقولو بتطق شرار ولسان حاله بيقول عايز اولع روما بحالها فقولت لو هيتشاكل هتشاكل بس اضايقت لما شوفت ان هو كمان عربيته اتبهدلت زي عربيتنا المهم قولتله ع اللي حصل من الميكروباص وانه مكنش ممكن بأي حال من الأحوال اني اعدي والا كنا هنتكسر احنا والعربية فالراجل فهم الموقف وبدأ يغير كلامه وقال لنا لازم اصلح العربية - مروريا هو الغلطان- لكن انا وماما مرضيناش خالص وقولناله كفاية ان عربيتك اتبهدلت ربنا يعينك على تصليحها والحمد لله حصل خير فقال الحمد لله انها مجتش في الارواح واخدنا الكتكوتة ومشينا
المشكلة مش في الخبطة لواحدها
المشكلة في الخضة اللي كنا فيها واللي على أثرها ماما تعبت وضغطها علي وانا ضغطي انخفض _ المفروض كنا نقلب الضغطين مع بعض علشان ضغطنا احنا الاتنين يتظبط_

كله من الميكروباص حسبنا الله ونعم الوكيل فيه طبعا سواق الميكروباص اللي كان السبب في الحادثة جري ولأن احنا بالليل فمحدش لمح نمرتة بس انا فوضت امري لله وربنا ينتقم منه
اما انا فمش هركب الكتكوتة تاني الا لما اعصابي تهدى
وقررت اسميها الفشفوشة بدلا من الكتكوتة لان كلها خبطات فيها حوالي 5 خبطات من كل ناحية
وحسبنا الله ونعم الوكيل وبيتهيألي كده ممكن اغير اسم الكتاب واخليه حوادث ليدي بالفوفو والكتكوتة نياهاهاها
--------------------------------------------------------
رحت الكلية النهاردة متأخرة نص ساعة مع اني منمتش من امبارح بالليل لغاية معاد الكلية غير ساعتين وكل شوية احس اني في العربية والعربية بتتخبط يعني كانت ليلة ما يعلم بيها الا ربنا
وفضلت اقول لماما مش هركب الفشفوشة _ مجنونة بكون يا حبيبي غلطانة اكيد يا حبيبي لو جيت اليوم بعد اللي في صار عيد اللي كااااان _ لا لا للفشفوشة الميكروباز اهون مش عايزة اتحمل المسؤلية دي تاني
المهم ماما اقنعتني وقالتلي لو كل واحد عمل حادثة عمل زيك كده مكنتيش هتلاقي عربيات ماشية
انا:يا ماما اعصابي تعبانه ومنمتش امبارح
ماما :يلا بس اتشجعي وربنا يحفظك وانا هنزل معاكي
وماما نزلت معايا واستجمعت قوتي وانا من جوايا مرعوووبة والحمد لله ان بكرة معنديش محاضرات مش هضطر اخرج
وبعدين اخيرا اخدنا محاضرة لولولولولي فاكرين الدكتور اللي وريتكم عربيته هو اللي جه النهارده وكمان نزل الكتاب
وقالنا خدو بالكو الامتحان بعد 9 اسابيع ذاكرو ومتفوتوش يوم البويتري صعب البويتري يعني الشعر بعيد عنكو
والعيال زميلاتي كانو متعشمين اني اوصلهم فحكيتلهم على الحادثة وقعدوا يضحكوا بس هما ضحكوا علشان انا حكيتلهم بسخرية اصلا بقولهم كنت بفادي حادثة فعملت التانية وطبعا صرفوا نظر عن اني اوصلهم

بحلم هو الحلم حرام؟؟

نمت الساعه 2 صباحا استعدادا للكلية النهارده وحلمت بس الحقيقة الحلم مكنش حلو خالص
في الحلم كان كل الناس بتزعقلي على حاجة انا مش فاهماها حتى ماما اشتركت معاهم في الزعيق ليا ولقيتني بقول لماما بعيني في الحلم كل الناس تزعقلي مش ههتم لكن انتي يا ماما صعب مقدرش استحمل وتكملة الحلم او نقدر نقول الكابوس اني رحت حفلة التوقيع بتاعت كتابي اللي لسه في علم الغيب ومحدش حضرلي واللي جه, جه اتريق على الكتاب ومشي حتى قبل ما يقرأه



لقيتني وحيدة جدا وصحيت من النوم ولقيت دمعة نزلت من عيني وكأنها كانت البداية بس
الدمعة دي ندهت لأخواتها قالتلهم تعالو بسرعه ولقيت الدمعة الوحيدة بقت بكاء صامت حسيت بضعف وان البطانيه خنقاني شلت البطانية وبصيت في كل انحاء الاوضة بدور على ملجأ ليا حاجة تخفف دموعي لقيت صورة بابا واتسمرت عينيا على الصورة وفضلت اقول كلام كتير واشتكي له

ياااااااه يا بابا وحشتني ووحشني حضنك نفسي ارجع طفلة صغيرة تاني علشان تحضني زي الطفلة الصغيرة دي اللي كل ما بشوفها في مدونة كيكي بقولها يا بختك

قمت من النوم الفجر ولسه برضه مش قادرة امسك دموعي رحت فتحت التلفزيون على قناة المنهل للقرأن الكريم و وانا رايحة على القناة كان في حوار على قناة المجد سمعت جزء منه وانا بقلب في القنوات الشيخ كان بيقول لو حد فقد جزء مما فقده الانبياء لفقد عقله من شدة الحزن سبحان الله وانا اللي زعلانه على توقيع كتاب فقدته في الحلم رحت اتوضيت وضربت طبق مهلبية بالفواكه والمكسرات من اللي ماما عملاهم وصليت الفجر حسيت بروح فوق روحي حسيت اني لاقيت الحضن اللي نفسي فيه حسيت اني مش هتخلى عن حلمي والحلم ده بالذات مش هسيبه ولو طول معايا لسنين ولو فشلت فيه برضه هحققه ان شاء الله

ياريت تبصو بصه عالبوست ده في مدونتي التانيه

http://sun-east.blogspot.com/2009/02/blog-post.html

اللي جوزها يحبها

عااااااااااااااااااا وكمان عااااااااااااااااااا عاااااااااااااااااااااااا

بيقولو اللي جوزها يحبها الشمس تطلع لها عاااااااااااااااا

امبارح قولت اساعد مامتي حبيبتي في شغل البيت وامري لله يلا اهو نكسب ثواب برضه

وفعلا فضلت اغسل في الغسيل 10 ساعات ونص من غير مبالغة مع ان في الوقت ده كله الناس ممكن تغسل غسيل جمهورية مصر كلها

ومع ان كمان مكنش في هدوم كتير عايزة تتغسل يعني الغسالة مكنتش مليانه اصلا

ودلوقتي اوفاجأ بمطر مطر يعني سيووووووووووول نازله عالغسيل وهو منشور عاااااااااااا يا خسارة العشر ساعات ونص يا غسيل

ليه كده يا غسيل يعني انا قصرت معاك في ايه ؟؟ ده انا حتى غسلتك ب بونكس نضافة ريحة توفير بريحة الياسمين
وبكلوركس الوان بريحة الورد يعني جنينة يقوم المطر ينزل عالهدوم ويبوظها عاااااااااا يا الهي رحمتك

دايما لما ماما بتطلب مني حاجة بقولها هنشر البوست وأجي
فبتقولي مفيش مرة تقوليلي انشر الغسيل
اديني غسلت الغسيل والدنيا مطرت عاااااااااااااااااااااااا عااااااااااا
وفي النوهاية احب أقول اللي جوزها يحبها الدنيا تمطر لها - غيرت المأثورة-
والا كده يبقى سيادة جوز المستقبل المجهول مش بيحبني اومال انا ليه حاسة انه بيحبني
ما علينا
سلام

الجمعة، 20 فبراير 2009

انا عربيـــــــــــــــــــة


انا عارفة اني بقيت بكتب كتير اوي في المدونة بس بجد انا محتاجة اتكلم عايزة افضفض نفسي اعرف وبجد لو حد مضايق من كتاباتي انه بعفيه من انه يضيع وقه ويقرأ الشخابيط اللي بكتبها


من شوية كنت بقرأ كتاب فقه السيرة للشيخ محمد الغزالي وكنت سعيدة وانا بقرأ الكتاب جدا غير ان بعض مفردات اللغة العربية وقفت في وشي تطلعلي لسانها وتتحداني وتقولي مش هتفهميييييييييييني هاهاهاها - الكلمات بتضحك عليا-

ولقيتني بقف مع نفسي وبقول انا مين انا فين انا ليه ما خلاص طه انتهىىىىىىىىى لا بجد لقتني بقول لنفسي انتي عربية صح ؟؟ مش عربية بمعنى سيارة لكن عربية بمعنى ان لغتي عربية وهويتي عربية وملامحي عربية وعايشه في مجتمع عربي طب ليه اللغة العربيه معصلجه معايا ده انا كنت ايام المدرسة بجيب الدرجات النوهائية في اللغة العربية طب ايه اللي اتغير ايه الي حصل

ايه الغربة اللي حصلت بيني وبين اللغة العربية دي ؟ هل انا اللي قصرت في اللغة العربية مع اني بقرأ كل حاجة بره كتب الدراسة باللغة العربية ولا الكتب الدينية اصلا اسلوبها صعب ومحتاجة قاموس


قرأت في مجلة ان اللغة الانجليزية مصيرها هيبقى زي اللغة اللاتينية وانها بدأت في الانقراض

طب ايه اللي انا شايفاه ده ان كل الناس بتتفزلك وبتتكلم انجليزي ولو شافو حد انجليزي مش هيعرفو يتكلمو كلمتين على بعض انجليزي

يا ترى انا غلطت لما فكرت ادرس اللغة الانجليزية ؟؟

لسه انا وزميلتي في الكلية بنتكلم عن الموضوع ده واننا هنتخرج من الكلية لغويا زي ما دخلنا الكلية ولا كأننا درسنا انجليزي - يا خسارة-


تعرفو ان الانجليزي بيخوف الناس مني بجد انا نفسي مش مصدقه واحدة جارتنا قالتلي كان لازم تدرسي انجليزي يعني ؟؟

بيخوف الناس مني على اعتبار ان اللي بيدرس اداب اللغة الانجليزية بيبقى مثقف زيادة عن اللزوم وبيتكلم عنجليزي عمال على بطال ومستوى التفكير بيكون عالي - هع هع هع ده المفروض-

يا ترى لو كنت درست عربي كنت هبقى مرتاحة وفرحانة معتقدش كنت هبقى طول الوقت ندمانة اني فوتت دراسة اللغة الانجليزية عليا


الحمد لله على كل حال انا مش هفكر كتير

الخميس، 19 فبراير 2009

الضلمة متخوفش يا سمكة ملوونة


اعترافا بالمقولة اللي بتقوووول نورت مصر واعترافا كمان بالأغنية الوطشنية اللي بتقول مصر يا أول نور في الدنيا شق ظلام الليل لولولولولي احسب عمر النور في الدنيا يطلع عمر النيل لولولولولولي
النور بيقطع عندنا كل 5 ثواني مره نياهاهاها لا مش للدرجة دي بيقطع 5 مرات في اليوم بس ومن اسبوع
في الاول كنت ببقى فرحانه ان النور قطع سامعه حد بيقول حد يفرح ان النور بيقطع هرد عليه وأقوله ايون انا
الدنيا بتبقى هدوووووء والقمر منووور - مع ان مفيش قمر دلوقتي- لكن بعد كده بقيت بضايق الكهربا دي بجد نعمة كبيرة جدا في حياتنا
كنت بشوف النهاردة برنامج اي تي شو عالنايل كالتشر او على رأي ماما النيل الثقافية بطلي الانجليزي بتاعك ده
كانوا مستضيفين الصحفية اللي بحبها جدا اسماء رمضان اللي بتكتب في باب المدونخانة في جريدة العالم اليوم
واللي اختصارا بقول عنها المدونخانة اللي مدوخانة لأني بدوخ على ما بلاقي عدد الجرنال يوم الخميس
انا كنت سعيدة جدا وانا بشوف اسماء لانها كانت بتتكلم بتلقائية وبعلم عن المدونات اما الاخ المذيع احمد يوسف فللأسف افتقد المعرفة عن المدونات
مع اني قرات عنه انه اخد شهادة تقدير كأحسن مذيع في مجال التكنولوجيا (لا تعليق)
للأسف مكملتش البرنامج لأن النور قطع لكن في بعض الحاجات استفزتني ك مدونة في الحوار
مثلا كان في اتصال من بنوتة صاحبة اسماء البنوتة دي بتكتب في المنتديات ف المذيع سألها سؤال ما معناه لاني مش فاكره نصه بالضبط
انتي مش بتخافي تدوني في المنتديات لانك ممكن تتعرضي لمضايقات من الشباب وغيرهم ؟؟ ده على اساس ان احنا رايحين ندون في ديسكو او كباريه صح؟؟ لو فكرنا بالطريقة دي مش هنفتح النت اصلا
تاني حاجة كان بيسأل اسماء سؤال ما معناه برضه ازاي بتصاحبي ناس من عالنت لأن الناس عالنت مش بيبقو معروفين ؟؟
واسماء ردت رد عجبني جدا ان كل انسان بيبان من اسلوبه
اما عن رأيي ( ليدي) فأنا عرفت احسن ناس من النت
وكمااااان من ضمن اسئلة المذيع لأسماء : انتي متابعة ايه من المدونات اليومية زي ما بتتابعي اخبار اليوم والاهرام؟؟
والله؟؟ هو في حاجة اسمها مدونات يومية وانا معرفش
ولما اسماء ردت عليه وقالتلو انها بتتابع مدونة البحث عن السعادة لأنها مدونة جميلة وهي اللي بتبعث الامل في حياتنا
رد الاخ المذيع وقال ومين الكاتبة بتاعت المدونة دي ( اسمحولي بقىىىىىىى كااااااااااتبة في عينك )
ده كاتب واسمه محمد غالية وانا لا اسمح ان حد يقول عليه كاتبة ومحدش يقوللي مكنش يعرف لان ده عذر اقبح من ذنب
وده ان دل على شيء فيدل ان المذيع للأسف محضرش للقاء كويس وانه مش عارف يعني ايه مدونات ومقرأش مدونات اساسا - ده اللي انا فهمته من متابعة الحلقة النهارده- وعلى العكس اسماء لانها لسه داخله التدوين جديد بس متمكنة من معلوماتها وبتتكلم بكل معرفة وثقة
عمار يا اعلامنا عمااااااار وكفاية علينا مية سنة سينما سينما يا سينما
على فكرة انا مش بتكلم الكلام ده من فراغ انا كنت من اطفال التلفزيون بس مش المصري طبعا وبابا ليه اصحاب اعلاميين كتير يعني عارفة كويس انا بتكلم على ايه

الثلاثاء، 17 فبراير 2009

خطوبة مع دردشة الجزء التاني+ تحديث

صورة من كليتي الكئيبة لالالا متفهمونيش صح أقصد الحبيبة ودي عربية ابن المحظوظة ضاكتور من الدكاترة اللي عندنا (ربنا يوسع عليه) بحس انه دكتور طيب جدا وفي نفس ذات الوقت عايز يبان شرير وع العموم هو شرير الى ان يثبت العكس

رحنا الكلية يوم الاحد اللي فات واتطردنا منها - اي وعهد الله اتطردنا من الكلية- طبعا مش مصدقين ان ممكن الطلبة تتطرد من الكلية لان ذنبهم الوحيد انهم عايزين ياخدوا محاضرات
ولاد التيت طردونا من الكلية وقالولنا مفيش دكاترة هتدي محاضرات الاسبوع ده انتو ايه اللي جايبكو ؟؟ اه صحيح ايه اللي جابنا اما احنا وحشين صحيح

---

بابا عايز يسحب مني الكتكوتة عاااااااااااا يا غولبي ياني يا مرارك يا ليدي الا الكتكوتة حبي الوحيد متفرقش بين قلبين محبين يا بابا عاااااااااا

---

لقيت مادة حلوة اوي لكتابي والفكرة وضحت قدامي الحمد لله بس لسه برضه عايزة اللي مصوتش على السؤال اللي في اول المدونة على ايدكو الشمال يصوت يالهووووووووووووي

------------------------

اكملكو موضوع الخطوبة بقى اكيد متشوقين والله انا بكتبه علشان خاطركو بقى يلا اعمل خير وارميه البحر - تصدقو النور قطع وانا بكتب وفضلت اغني الضلمة متخوفش يا سمكة ملونة الضلمه حلوة خالص واحنا مع بعضنا , النور غمض عنيه غمض عنيه غمض عنيه واللمبة نايمه ننه نايمة ننه نايمه ننه - وجيت اكمل البوست تاني بعد لما النور جه-اي خدعه-







عمو والد مها جهز كل حاجة وظبط الكوشة زي ما انتو شايفين - دي صورة للكوشة بالنهار ملحقتش اصورها بالليل وعلى فكرة دي كانت قراءة فاتحه وخطوبة في نفس ذات الوقت وعندهم في جمهورية منوفيا مفيش حفلات تانيه الا في الفرح لكن عندنا (سنو بلدنا) ان قراءة الفاتحة ليها حفلة والخطوبة حفله وكتب الكتاب حفلة والفرح حفلة يعني اهل العريس والعروسة بيبعوا الحديده م الاخر

المهم جوز رشا اخت مها اتصل بالعريس وقاله انه جاي الساعه 7 ونص فأنا أجلت اللبس لغاية الساعه 7 وربع هههههههه هلبس من بدري ليه يعني , ماما كوتلي لبسي كان تايير لونه بني في نحاسي وبعدين اخت مها ال ....... قالت لماما انتي بتكوي ل ليدي هدومها ليه هي طفله
-هو انتي متعرفيش طفلة وست الطفلات كمان - امي بتدلعني مالك انتي يا غتييييييييييييتية يا سئيلة يا بقدونس بصراحه اتحرق دمي وخصوصا انها قالت الكلام ده لماما من ورايا وعرفت الكلام ده بالصدفة المهم العشا أذنت وبعدها شغلوا الدي جي على اغاني غريبة طول ما انا سامعاها كنت بقول مين ولاد التيت اللي مشغلين الاغاني دي في الدي جي يعني مثلا مشغلين اغنية اشتروني لوردة ومشغلين اغنية تسلم بتاعت تامر عاشور - الاغنية دي بحب اسمعها لما اكون مضايقة او مخنوقة يعني الموود بتاعها بيبقى مود عادي مش مود فرح يعني
وبعدها مها وصحباتها اخدو بعضيهم وراحو بيت اخوها علشان تلبس هناك انا كنت عارفه انها هتروح هناك بس من باب الذوق حتى انها كانت تعرض عليا اني اروح معاهم طبعا اضايقت جدا وقولت ياريتني ما حضرت الخطوبة الزفت دي يعني انا مسافره مخصوص علشان احضر خطوبتها وقضيت وقت كبير ادور على هدية مناسبة ليها لغاية لما جبتلها هدية اعتقد انها حلوة وسيادتها مقدرتش اي حاجة عالعموم اعمل خير وارميه البحر برضه و بقيت كل ما اتضايق من حاجة افتح شوكولاتايه واكلها :) بهدي اعصابي
بعدها كملت لبسي ونزلت رحت عند مها وصحباتها كل البنوتات كانو هناك ومها برضه كانت عايزة تنزل تقعد في الكوشة وبتقول هسيب المعازيم قاعدين لواحدهم عايزة انزل اقعد معاهم وكلنا قولنالها يا بنتي هتنزلي ازاي قبل ما تامر يجي ياخدك بطلي هبـــــــــــل المهم تامر مجاش في معاده وجه الساعه 8 ونص و طلع لمها وكان رقيق جدا جاب لها بوكيه ورد ابيض وفيه ورده حمرا في نص البوكيه وهي كانت متوترة جدا وقلقانه من رد فعل تامر لما يشوفها
وبعدين تامر راح لمها واخدها من اديها وقالها انتي زي القمر وادالها بوكيه الورد ونزلو قعدو في الكوشه ومها واصحابها واخواتها نزلو رقص اما انا فمكنش ليا نفس ارقص - مفيش مشكله في الرقص لأن مكنش في شوباب شايفيننا - ومها فضلت تقول في الاول تعبانه ومش قادره ارقص وبعدها فضلت ترقص حتى بعدما الناس مشييت فضلت ترقص مع تامر لنص الليل
وبعدين جه وقت انهم يلبسو بعضيهم الدبل ويا دبلة الخطوبة عقبالنا كلنا مها لبست تامر دبلته وتامر لبس مها الهدايا الدهب اللي جابهالها واللي باباها جابهالها ولبسها الدبله وباسها في ايديها وقالها بحبك
شوية كده وحاولت اندمج في مود الخطوبة بس معرفتش افرح للاسف اللي متابعين مدونتي هيعرفوا اني كنت مضايقة من قبل الخطوبة وكمان الحاجات اللي حصلت قبل الخطوبة ضايقتني اكتر وبعدين وصلت لنص الخطوبة ولقيتني ميته من التعب والارهاق قولت لخالتو وطلعنا البيت وشوفنا العروسة والعريس من البلكونة وبعدها اتسامرت انا وماما وكنا بنضحك وكنت فرحانه جدا لأن ماما كانت بتخفف عني الكأبه اللي كنت فيها قبل السفر واللي حتى فرح مها معرفش يخفف عني حدتها
والجميل في الموضوع ان فستان مها صحيح نفس ذات اللون اللي كنت بتمناه في فستان خطوبتي واللي اخدت فكرته مني لكن موديل الفستان كان وحش بمعنى الكلمه وكل الناس قالولها كده حتى هي قالت كده قبل الخطوبة مع ان الفستان اختيارها بس من حفر حفرة لأخيه وقع فيها


-----------------------------------------------

كلاكيت تالت مرة التحديث ده طلع عيني

انا اسفة يا كياااااااااااراااااااااا

مبروووووووووووك عالنجاح يا ميرووووووووووو

ممكن تبصو بصه عالبوست ده
http://sun-east.blogspot.com/2009/02/blog-post.html












السبت، 14 فبراير 2009

حكاية الخطوبة يوم الفلانطين علشان خاطركو مع دردشة

لسه بكلم البت صبحتي من شوية وعندها نفس احساسيسي ومشاعيري هيجيلنا نقطة بكرة واحنا شايفين كل الاحبة اتنين اتنين واحنا ماشيين منفضين ولا قلوب حمرا ولا ورد احمر ولا لبس احمر ولا حصبة ولا حاجة
ده غير ان بكرة هيبدأ النكد أأقصد المخفية (الكلية ) وبالعند فيهم مش هلبس احمر مع ان كل الكلية هيلبسوا احمر
عمالة اسمع اغنية امتى هتعرف امتى بتاعت اسمهان وماما عمالة تغيظني وتقولي بتغنيها لمين انا بغنيها لنفســــــــي عااااااااااا انا حاسة بمود رومانسي النهارده وبسمع اغاني رومانسيه واتفقت مع ماما تجيبلي ورد بكرة على اساس ان حد عبرني في الفلانطين ايييييييييييه دنيا
وما شاء الله النهارده كنا ماشيين بالكتكوتة وشوفنا كذا زفة لعرايس وعرسان وفي زفات ماشي فيها عربيتين وفي زفات ماشي فيها عربيااااات من اول الشارع لأخره وكل العربيات متزوقة بالورد وشكلها تحففففففففه ومنهم عربيه كانت متزوقه بالنور (السلوك اللي فيها لمبات الوان صغنونة) واللمبات مكونة شكل قلوب بجد العربية كان شكلها جمييييييل ما شاء الله وانا بقى كنت بستنهز فرصة أي شارع فاضي وعمالة ازف انا كمان بيب بيب بيب بيب بيب وماما عمالة تقولي ايه رأيك ابقي زفي نفسك يوم الفرح وتبقي اول عروسة تزف نفسها وانا اعترضت بشدة هو انا هتجوز علشان ازف نفسي ولا ايه
اومال العريس فين وفين بابا؟؟ ربنا يديك الصحة يا والدي وتزفني انتا وعريسي المنتظر ده لو طلعت حية من كلية الهباب ان شاء الله لو ليا عمر يعني

---------------------------------------
نيجي بقى للخطوبة بتاعت البت مها

وصلنا عند خالتو في ساعتين ونص بدل 4 ساعات وطبعا طول الطريق كنت عايزة انام لاني كنت مرهقة جدا ومنمتش كويس قبل السفر وماما كانت نفس ذات الموضوع بس الحمد لله ربنا كان مييسر الطريق والدنيا مكنتش زحمه وصلنا وركنت الكتكوتة ونعمة الصغنونة (بنت اخت مها) اول لما شافتني باستني وجت قالتلي بحبك اوي يا نونا وبعدين طلعنا لخالتو وكان اصحاب مها واخواتها (كلهم متجوزين) كلهم عند خالتو وكل اللي كانوا موجودين اول لما شافوني قالولي الكلمة الغبية عقبالك ( الكلمة دي ساعات بتبقى سخيفه وبتوجع) وبعدين شغلو اغاني فرح في الكمبيوتر
منها اخيرا اتجوزت وكمان اغاني شعبية تانيه ومها كانت هايصه عالاخر وبعدين طلعنا شنطنا ودخلنا المطبخ نجهز الغدى مع خالتو كان كل بنوتة بتعمل حاجة اما انا فسخنت العيش ومها كانت حريصة انها تقولي عقبالك كل 5 دقايق (كانت بتضايقني) ف وانا بسخن العيش ايدي اتلسعت وقولتلها هي والبنوتات اللي كانوا في المطبخ بعد عمر طويل ان شاء الله لقيتهم طلعوا فيا وقالولي ليه يعني وحاجات تانيه
(قال ايه بيدافعوا عني من كلامي )
وبعدين قولت لخالتو مش قادرة اتغدى عايزة انااااااااااام قالتلي اتغدي الاول واخدتني من ايدي وروحنا اتغدينا
وبعد الغدى الساعة 4 مها كانت عايزة تلبس الفستان وتعمل الميكب اب بس انا وصحباتها مرضيناش وقولنالها بطلي هبل المفروض محدش يشوفك بالفستان دلوقتي خالص علشان انتي نجمة الحفلة ولازم تبقي مفأجه للمعازيم ولتامر وكمان من هنا لبليل اكيد الميك اب هيبوظ
وبعدها دخلت الاوضة بتاعت خالتو وحاولت انام معرفتش انام جت نعمة وقعدت تقولي احكيلي حدووووووووتة
انا :
يا نعمة يا حبيبتي انا مش فاكره حواديت دلوقتي انا عايزة انام
نعمة :
لالالا والنبي والنبي احكيلي حدوتة انا عارفه انك عارفه حواديت
انا : طب ايه رأيك انتي اللي تحكيلي حدوتة ؟
نعمة :
لأ انتي اللي احكيلي حدوتة
انا : ماشي يا نعمه في حدوتة بحبها اوي كنت بسمعها لما كنت ادك بس مش فاكراها اوي
نعمة
: احكي وانتي هتفتكريها
انا :
صلي على النبي
نعمة :
عليه الصلاة والسلام
انا :
كان يا ما كان في قديم الزمان كان في راجل طيب وعنده 3 بنات واحده كبيرة وواحده متوسطة وواحدة صغنونة
نعمة : اااااه اه القصة دي عارفاها بتاعت لما ابوهم كان مسافر والوردة صح
انا : صح يا نعمة طالما عارفاها سيبيني انام بقى
نعمة : لا ماليش دعوة كمليها
انا : هكملها بس تحكيها معايا
وحكيت شوية في القصة ونعمة شوية
واعترضت اوي لما قولتلها ان الراجل المخيف اللي كان بيخوف كل الناس
لما اتجوز اطيب واحن بنوتة واصغر بنوتة من البنوتات التلاتة بقى جميل و شكله حلو لان السحر اللي كانت عملاه الساحره الشريرة راح لما اتجوز وفضلت تسألني يعني هو بقى حلو بعد لما جابوا المأذون؟ ولا بعدما الفرح خلص ؟والساحرة سابته يتجوز عادي كده طب وهي كانت فين وقت الفرح؟؟
(كأني كنت معاهم يعني) وبعدين اخيرا عرفت اقنع نعمة اني عايزة انام وقالتلي خلاص هنام جنبك بقى انا كمان صحيت بدري
واول لما نمنا جت خالتو
خالتو :
ايه ده انتو نايمين قومو قومو العريس جاي بعد ساعة
انا : سيبينا ننام شوية يا خالتو انا لبسي جاهز هقوم البس على طول
خالتو : لأ صحصحوا وقوموا البسو من دلوقتي
واضطريت اسفة اني اصحى وانا منمتش اصلا عااااااااااا عااااااااااااا
والبوست الجاي اقولكو ايه اللي حصل في حفلة الخطوبة

ان شاء الله




الخميس، 12 فبراير 2009

ورجعت من السفر

أنا جييييييييييت تااااااااني لسه راجعين من عند خالتو حاااااااالا (ده لما كنت بكتب البوست)
وأكيد مش شايفه قدااااااامي بس انتو وحشتووووووووووني ووحشتني مدونتيييي فقولت احكيلكم عن الرحلة بتاعت النهارده وأأجل موضوع خطوبة البت مها كمان كام يوم مش عارفه نفسي مسدودة عن كتابة البوست بتاع خطوبتها ده ليه ما علينا

النهاردة صحيت بدري عاااااا (للأسف ) علشان نسافر الحقيقة انا عايزة اسافر وارجع بيتنا من تاني يوم في خطوبة مها ولو كنت اقدر ارجع يوميها كنت رجعت بس كان الوقت اتأخر وكل يوم كنت بتعطل ومش بعرف اسافر يوم ماما تعبانة جدا وحاجزة عند الدكتور والدكتور كان عنده مؤتمر طبي فأجل كل الكشوفات
ويوم تاني ضاع في الشوبينج وعند الدكتور اللي ربنا يكتر من عيانينه برضه حاجزين ومدخلناش غير بعد ساعتين وعلى فكرة قالنا شوية تعليمات عن العمود الفقري والحقن هبقى اكتبها ان شاء الله
ويوم خالتو تعبانه وبتودع ويوم العروسة (مها) عايزة تعمل شوبينج ونتفسح معانا واخيرا امبارح خلاص صحينا بدري وماشيين وهووب الكتكوتة عطلت فروحنا نصلح الكتكوتة واخدت وقت كبير ومعرفناش نسافر واخيرا النهارده ماصدقت اني اسااااااافر وقولت لماما عايزين نخلي السفر فسحة ورحلة ومامتي حبيبتي وافقت
وروحنا المطعم المفضل بتاعنا فطرت (الظهر) هناك وبعدين اخدنا الغدى ديلفري لأننا لما بن
روح بنكون مرهقيين جدا من السفر وبعدين مشينا على الطريق السريع وبعدين حسيت ان ضغطي انخفض كالعاده وماما جابتلي بمبوناية كالعاده برضه وشوية وحسيت ان ضغطي بقى طبيعي الحمد لله بس والوقت كان بيعدي في ثواااااني مكناش حاسين بيه وقولنا هنعدي على جمهورية المنصورة الشقيقة علشان اشتري كتب المدونين
والطريق كان زحمـــــــــــــــــة جداااااااااااا ودخلنا المنصورة فعلا وماما ال tourist guide
بتاعتي ومش راضية اننا نسأل حد فين المشاية لغاية لما مشينا كتير وضللنا الطريق فعلا يعني ولقيت تاكسي
قدامنا واخيرا ماما وافقت اني اسأل على الطريق
وسألنا سواق تاكسي ابن حلال ربنا يكرمه ويبارك فيه ويكفيه شر طريقه قاللي هدلك على المشاية وفعلا مشينا كتير جدا ورى التاكسي ولما كنت ببعد عن التاكسي كان بيستناني وكان بيديلي اشارة انه هيحود علشان استعد اني احود او ادخل تقاطع لغاية لما وصلنا المشاية وقاللي دي المشاية ومشي على طول مستناش حتى كلمة شكر (لسه فيكي رجاله يا مصر) ورحنا المشاية وهناك غالبا الدنيا بتبقى زحمة جدااااااا بس لاقيت مكان اركن فيه الكتكوتة (الحمد لله) وفضلنا ماشيين وقولت لماما هنفضل
ماشيين برضه ومنسألش؟؟ دي جزيرة الورد واحنا في المشاية فين المكتبة ؟؟؟
المهم رحت سألت واحده في محل ايشاربات واكسسورات محل روش يعني وقولتلها مكتبة books and beans فين لو سمحتي
قالتلي : هاه ؟؟ مين؟؟ قولتلها مكتبة اسمها books and beans
قالتلي : لا معرفش حاجة بالاسم ده (الصدق منجه وفراوله كمان)
قلت اسأل حد ممكن يفهم اكتر
رحت اسال على المكتبة في الصيدلية سألت الدكتورالصيدلي اللي كان هناك
وقاللي : مكتبة؟؟ اه ممكن تكون هناك في شارع ثانوي في حودة كده على الشمال
وروحنا الحودة اللي على الشمال ولسه ماشيين ماما قالتلي المكتبة اهي ولولا مامتي مكنتش عرفت ان في مكتبة هنا اشاسا



الصورة دي انا اللي صورتها دي صورة المكتبة من بره واتحرجت اصور جوه المكتبة

بصراحة المكتبة من جوه تحفــــــــــه , راقيه جدا وفيها كل حاجة كتب عربي وانجليش وسي ديز بتاعت موسيقى ورسومات بصراحة مكتبه تجنن وتستاهل المشوار والزحمة اللي مشيت فيها

اول لما دخلت كان في بنوتة قولتلها : اخيرا لقيت المكتبة عايزة كتب المدونين (وانا كلي حماس وتفاؤل)

قالتلي : مين المدونين؟؟ (اتاري كتب المدونين كتير ما شاء الله)

قولتلها : اتنين مخطوبين (ليه معرفش الكتاب ده جه على بالي مع اني معرفش مين الكاتبه بتاعته اصلا)

قالتلي : خلص بس هيجيلي الاسبوع الجاي

فقولتلها : طيب عايزة كتاب مبسوطة يا مصر (الكاتب أشرف توفيق مدونته اسمها اخف دم)

دورت عليه ولقيته فقولتلها وكمان كتاب مذكرات فتاة في الغربة (الكاتبة ريم جهاد مدونتها مذكرات فتاة في الغربة وكان في مدونة تانيه بس حذفتها)

وفضلت تدور وتدور في المكتبة على كتاب مذكرات فتاة في الغربة المهم في هذه الاثناء ماما كانت بتشوف الكتب معايا

وبعدين قالت للبنوتة اللي هناك مفيش هنا مصلى؟؟

البنوتة قالت لماما : لأ بس لو عايزة تصلي هفرش السجاده وتصلي في المكتبة من جوه

وماما قالتلي هروح اصلي يمكن تلاقي الكتاب اللي بتدوري عليه وفعلا اول لما ماما خلصت صلاة الشاب اللي بيشتغل في المكتبة مع البنوتة لقى الكتاب وريم كاتبه في مدونتها ان الكتاب ب5 جنيه لكن المكتبة بتبيعه ب8 (طب ازاي صاحبة الكتاب مش عارفه سعره؟؟)



دي صورة الكتابين ومعاهم الكارت بتاع المكتبة انا طبعا اللي مصورة الصورة دي

بصراحة تخيلت نفسي كاتبة بقى وبعمل توقيع لكتابي في المكتبة الرائعة دي ومعايا كل المدونين والمدونات اللي بحبهم اوي اوي اوي

وخصوصا كيكي وكيارا ودكتر ستيتة وبنت الغربة لو كانت في مصر وايمي واسماء وميرو (انا ودماغي)

(ياااااااااارب الحلم ده يتحقق) واعمل كتاب والناس تحبه وتقرأه ويتعمل منه كذا طبعه كمان (خياليه شوية بس مفيش حاجة بعيد على ربنا)

نفسي احلامي تتحول لحقيقة وعلشان كده صوتوا معايا (يالهووووووووووووووووي) على السؤال اللي في اول المدونة عاليمين

سلاموز

الاثنين، 9 فبراير 2009

وحشتوني وحشتوني وحشتووني

محضرة كلام كتيييييييير بس نسيته بصراحه

انا لسه ف الاجازة التدوينية بس قولت اسلم عليكو وامشي تاني

كيارا وكيكي لا تقلقوا اطلاقا مش هرد عالموبايل :)

ده بوست صغنون كده على ما ارجع تاني للتدوين واحكيلكو بالتفصيل الممل ايه اللي حصل في خطوبة البت مهاميهو

سلام واشوفكم بخير

الأربعاء، 4 فبراير 2009

حديث الصباح والمساء حياة وموت




بداية انا لسه في فترة الأجازة بس وحشتووووووووني جدا
وحشتووووني الشوية الصغنونين دول
فأخدت أجازة عارضة من الأجازة وجيت تاني وأجلنا السفر كمان يومين
انتو متعرفوش؟؟
مش البت بنت خالتي هتتخبط يووووه قصدي هتتخطب

حد من اصديقائي المدونين اللي متابعين مدونتي هيقولولي هو انتي مش قولتي ان بنت خالتك دي اتخطبت قبل كده
هقولهم مبسووووطه انكم اخدتوا بالكوا من ام لاواحظ دي
(الملحوظة )
مهاميهو لما قولتلكو انها اتخبطت يوووووه قصدي اتخطبت كان زي كده ما بيقولو هنية ل ياسين
وياسين مش هياخد غير هنيه وبعدين قرأوا الفاتحة ونزلوا اشتروا الدبل وخاتم وشوية حاجات علشان الخطوبة
(واوعوا حد يفكر ان الدبل والحاجات التانيه دي محسوبة من الشبكة لا سمح الله)
ومهاميهو
كان نفسها تلبس الدبلة والهدايا بتاعت تيمو لكن عمو باباها قال لها خلصي الترم والخطوبة هتبقى رسمي نظمي شافكي
( اصل البت دي في سنة 3 زي حلاتي بس هي كلية نجارة يووووه قصدي تجارة بس ربنا استجاب دعواتي ليها
واتخبطت قصدي اتخطبت كنت دايما بقولها يا رب تتخطبي قبلي يا مهموها )

وبعدين الحجة مهاميهو خلصت الانطحانات والواد تيمو خد اجازة من الشغل وهيفرسونا أأقصد هيتعسونا يوووه أأقصد هيسعدونا بخطوبتهم وهنقيم الأفراح وليالي الملاح وهسافر علشان احضر خطوبة مهاميهو ربنا يسعدها يا رب مع انها اخدت فكرتي عن الخطوبة وبتنفذها مثلا قولتلها على لون فستان خطوبتي ( فيما سيكون بعد عمر طويل ان شاء الله ) فالحلوة مكدبتش خبر وراحت جابت نفس اللون (لسه مشوفتش الفستان) لو كمان نفس التفصيلة يبقى مش هتتخطب هولع فيها وفي الفستان :) وفي العريس بالمرة
طيبة انا صح ؟؟ بصراحة اتنرفزت شوية لما قالتلي على لون الفستان بس لقيت ا لحياة مش مستاهلة هو انا يعني خطوبتي بكره محدش ضامن عمره وعالعمووووم قولت يعني اسيب المدونة كده من غير بوست قبل ما اسافر وقرقرت احط شعر عامي من تتر النهاية بتاع مسلسل حديث الصباح والمساء

ايوة هو المسلسل الكئيب ده اللي كان بيجي في رمضان وانا كنت بتفرج عليه ومبهورة وبسهر مخصوص في عز البرد اتفرج عليه وكان لااااازم كل حلقة حد يموت وكمان لازم في نفس ذات الحلقة حد يتجوز او حد يتولد
سبحان الله هي الدنيا كده حياة وموت وعلى فكرة بجد انا بحب فلسفة المسلسل ده جدا وناوية اقرأ الرواية ان شاء الله بعد ما اخلص الكتب اللي معايا حاليا
( دون جوان ؛ احدب نوتردام) هما بيقولو ان الرواية دي لكاتب نوبل نجيب محفوظ
اسيبكم مع كلمات تتر النهاية واللي بتغنيه انغام (بس طبعا مش هسمعكوا الاغنية ) (وش بيطلع لسااااانو) انا بجد بحس بإحساس غريب لما بسمع التتر فعلا هي دي الحياه

الصبح طفل برئ ومساه يبان تجاعيد

وفوق طريق الايام تجرى الحياه مشاوير

ونشوف ملامح الزمن متعاده فى المواليد

واحنا البشر كلنا اعمار ورق بيطير


دايره تدور بالبشر وياّ الزمان بتفوت

دمعه على اللى مضى و دمعة فرح للجاى

يا حىّ طول مانت حىّ مسيره ييجى الدور

دى حكايه متكرّره من يوم ولادة الضىّ


ياللىّ انت عايش حياه بص لها تلقاها
سبحة هنا و تنفرط بالعمر مانشوفهاش
ولا شئ يعطّر حياتنا يمد فى مداها
غير سيره عاشت هنا اكتر صاحبها ما عاش



الاثنين، 2 فبراير 2009

استراحة تدوينية للراحة النفساوية

انا هبعد عنك وانا وياك قلبي (يا بلوجي)
هتحمل تعبي بعدك الله يعنني

قفلت الموبايل ومش بفتح الايميل وكمان هاخد اجازة من المدونة
عايزة ابعد عن العالم الالكتروني شوية
عايزة اغير الموووووود ونويت الرحيل شوية
هتوحشوني واوعوا اوعوا اوعوا تنسوني