الخميس، 28 أغسطس، 2008

أفكار جميلة لرمضان أحلى (ان شاء الله)





بسم الله الرحمن الرحيم
رمضان جانا وفرحنا به بعد غيابه وبقاله زمااااااان

لسه فاضل كام يوم على رمضان كل سنة وانتم بألف خير وصحة وسعادة وهنا دايما يا رب
رمضان كريم علينا في كل حاجة في روحانياته وفي أمانه وفي انه بيجمع بيننا على الخير وكفاية ان الفرض فيه ثوابه أكبر من ثواب الفروض في كل الشهور وكمان الشيطان بيقيد ومبيقدرش يوسوس لنا في الشهر الجميل ده

فبالمناسبة السعيدة دي حبيت أقول لكم بعض الأفكار اللي بحاول انفذها كل رمضان واسأل مجرب نتائج الأفكار دي بتكون جميلة جدا وبناخد ثواب وفي نفس الوقت بنحس بسعادة كبيرة جدا

افكار يوم الشك (أخر يوم من شهر شعبان وليلة رمضان)

1- ليلة رمضان ننزل نشتري مجموعة فوانيس صغنونه سعر الفانوس تقريبا جنيه يعني مش مكلف أوي وناخد الفوانيس دي ونديها للأطفال اللي مفيش عندهم فانوس سواء الأطفال دول من عيلتنا او جيراننا او اي حد نعرفه (الأطفال هيفرحوا جدا بالفوانيس وخصوصا ان مش كل الناس تقدر تشتري فانوس لأطفالها)

2- ايه رأيكم اليومين دول قبل رمضان او ليلة اول يوم رمضان نجمع الاطفال اللي نعرفهم ونجهز شوية اوراق والوان وقلم ونعمل مطويات زي اللي بتتباع ونكتب في المطويات دي أذكار او نتكلم عن فضل رمضان او العبادات او نكتب تهنئة بشهر رمضان وبعد لما نخلص المطويات دي احنا ناخد عدد من النسخ والاطفال كمان كل واحد ياخد نسخة وكمان نوزع نسخ على جيراننا او ممكن لو في استطاعة مادية نشتري المطويات دي جاهزة وهي مش بتبقى غالية وناخد منها جزء ونوزع باقي المطويات على عيلتنا وجيراننا (هنقرب المسافات اوي بيننا وبين الناس وهيفرحوا بينا ونفرح بيهم)

3- انا وصحباتي بنحب جدا نشتري بخور خاص بشهر رمضان والبخور متوفر في اي محل عطور او عند العطار غالبا بحب اختار بخور بروائح منعشة زي اللافندر او التفاح الأخضر لأن العطرين دول نفاذين وبيعطروا البيت فترة كبيرة وكمان مننساش جيراننا من البخور ولو حتى الجيران القريبين لينا علشان تبقى كل بيوتنا عطرة في استقبال أجمل شهور السنة
وعلى حد علمي البسيط ان البخور او العطور (جوه البيت) بتساعد الصائم انه يصحصح ويستريح نفسيا لأن قبل المغرب والافطار مستوى السكر في الدم بيكون في أأقل نسبة ليه فالصائم ممكن يحس بإرهاق او عدم ارتياح او عصبية فالبخور او الرائحة العطرة بتقلل كل ده

وممكن ناخد ال3 حاجات دول وممكن نزود عليهم تمر مثلا او اي حاجة تانيه ونلفهم بطريقة حلوة ونوديهم لأقاربنا او اصحابنا او جيراننا

قال رسول الله صلى الله عليه وسلم (( تهــــــــــــادوا تحــــــابوا) فما بالكم لما نتهادى وفي رمضان كمان


قبل الإفطار

أولا : أهم حاجة اننا نساعد ماماتنا او الزوجة او الاخت او اي حد بيحضر الفطار
لأن تحضير الفطار بياخد وقت كبير والعبء كله بيكون على اللي بيحضر الفطار وبالتالي مبيبقاش في وقت للصلاة او لقراءة القرأن علشان الانشغال بالمطبخ فنحاول ندخل المطبخ ونساعد اللي بيحضر الفطار وعلى فكرة الكلام ده للشباب قبل البنوتات لأن كتير من الشباب بيستكبروا يدخلوا المطبخ واحب اقولهم انهم مش احسن من الرسول صلى الله عليه وسلم لأنه كان بيساعد زوجاته وكان خيرا لأهله

ثانيا : قبل الافطار نجهز الأطباق والكوبيات ونحاول اننا نرتبهم بشكل جميل سواء على السفرة او الطبلية او اي حاجة المهم انها مائدة في الأخر فلازم نخلي شكلها حلو

ثالثا : خلال اليوم الرمضاني نختار فرض من فروض الصلاة ونصلي جماعة مع اهل بيتنا و بالنسبة للبنوتات مع بنات الجيران مثلا او مع صحباتنا او مع بابانا او مع اخونا الكبير او حتى ناخد الاطفال ونصلي بيهم جماعة
ويا سلام كمان لو الزوج صلى مع زوجته جماعة هيحسوا بحب كبير جدا لأن طاعة ربنا بتجمعهم
ومحدش من الشباب يقوللي ما انا بصللي في المسجد جماعة هقولو ده فرض واحد بس مش كل الفروض وتقدر تصلي جماعة براحتك في المسجد بس تبقى فرحت أهل بيتك لما صليت معاهم وحسستهم انهم مسؤلين منك وانك الامام

رابعا : احنا كشباب صعب او يكاد يكون مستحيل اننا نعمل مائدة لافطار الصائمين طب نعمل ايه
البديل اننا لو قدرنا نشتري تمر او اي عصير متوفر في البيت نوديه للمسجد علشان المصليين اللي بينتظروا المغرب يفطروا على التمر ده او العصير ونبقى اخدنا ثواب افطار صائم ولو حتى نفذنا الموضوع ده ليوم واحد بس احسن من اننا منعملش حاجة خالص


عند الافطار

1- نغتنم الفرصة وندعي على اد ما نقدر لأن الصائم ليه دعوة مستجابة وده اللي بشرنا بيه الرسول صلى الله عليه وسلم ومتنسونيش في دعائكم

2-لازم ننتظر بعض عند الافطار مش كل واحد يفطر لواحده ونحاول نكون اول حد يقدم التمر لكل اللي بيفطروا معانا (يعني يبكون احساس جميل لما يبقى اول حاجة الصائمين يفطروا عليها تبقى من ايدك وكمان نحتسب ثواب ان الموضوع ده صدقة عند ربنا سبحانه وتعالى )

3- نعجل بالافطار لما نسمع الأذان و نحاول يكون اول افطارنا على تمر ولبن (حليب) لأننا كده بنتبع السنة النبوية في الافطار وكمان الافطار كده ليه فوائد صحية كتير


في استراحة صلاة التراويح


إيه رأيكم نقضي الفترة دي في الاستغفار والتسبيح والذكر وبلاش ننم وشوفي فلانة لابسة ايه
وشوف فلان شكله عامل ازاي

وكمان ممكن نستغل الإستراحة ونبعت رسائل (مسجات) لأهلنا او اصحابنا اللي بعيد عننا
سواء هما بيصلوا في مكان تاني او مسافرين ......... الخ
يعني مثلا لو زوج يبعت لزوجته رسالة فيها أذكار او تهنئة او يقولها (( يا رب دايما متجمعين في طاعة الله ))وخصوصا ان كل واحد منهم بيصللي في مصلى يعني مش بيكونوا مع بعض في مكان واحد

وفي الأخر ربنا يبلغنا رمضان يا رب ويتقبله منا خالصا لوجهه الكريم
كل عام وانتم الى الله أقرب وعلى طاعته أدوم ولجنته أقرب

----------------------------
كلام جاديد :

كده اشطة اوي حبايبنا الحلوين اتفقوا على الا يتفقوا
وكل واحد بيصوم مع نفسه
وبما اني خارج حدود البسبوسة فرمضان عندنا يوم الثلاثاء ان شاء الله

الجمعة، 22 أغسطس، 2008

طب ازاي في حاجات بتموت وتيجي الصدفة تحييها؟؟!



ملحوظة بسيطة علشان نبقى على نور البوست حزين شوية ف اللي مش عايز ينكد على نفسياته ميقرأش البوست (وقد أعذر من بعجر)
على بعد من العربية الربع نقل لقيت بنوته عمرها حوالي ما بين السنتين ل3 سنين متكومة ع الأرض (العربية خبطتها) طبعا انا حسيت اني اتشليت وانا واقفة مقدرتش اتحرك وقلبي كان هينخلع على الطفلة دي(ايوة ما احنا طفلات زي بعضينا ولازم اخاف عليها) بابا جري على الطفلة يتطمن عليها والحمد لله العناية الإلهية انقذت الطفلة هي حصل لها بعض الكدمات البسيطة ومكنتش قادرة تقف من الخضة (طبعا اذا كان انا اللي شوفتها مكنتش قادرة اتحرك اومال هي تعمل ايه) بس ان شاء الله هتخف بسرعة
المهم والد الطفلة دي اخدها وجري ع المستشفى وام الطفلة اللي انا كرهتها جرت على العربية وسابت اولادها السبعة عالبحر من غير ما تعديهم الطريق حتى والاطفال دول كلهم صغيرين (يعني مأخدتش عبرة من اللي حصل لطفلتها وكل اللي عملته انها صرخت وخلاص لكن تتعلم من الموقف لأ)
الموقف ده فتح في قلبي جرح كبير مش قادرة انساه
لمحت دموع صامتة في عيون مامتي ودموع صامتة في عنيا حاولنا نخبيها علشان منبوظش الفسحة وافتكرنا حادثة حصلت من فترة بس نهايتها كانت مختلفة
انا وبنت خالي كنا قريبين جدا في السن لبعض وكانت اطيب طفلة شوفتها في حياتي
وفي يوم جت عربية سريعة وخطفتها من الدنيا وراحت بنت خالي عند اللي خلقها (وكان عمري وعمرها وقتها 3 سنين يعني في نفس عمر الطفلة اللي شوفتها النهارده)
راحت وسابتني محتارة بدور عليها في كل طفلة اشوفها لأنها كانت أكتر من أختي, وسابتني ل ليالي كتير كنت ببكي فيها عليها وبتمنى اروح لها
وبعترف اني بجد طول حياتي هفضل مفتقداها وهفضل فاكرة ان كل الناس كانت بتخبي عليا وفاتها ما عدا ماما اللي قالتلي ان (مروة) راحت عند ربنا في الجنة وزمانها فرحانة وحياتها في الجنة جميلة وكنت بقول لماما طب انا عايزة ازورها وترد فورا وتقوللي بعد الشر عليكي(جنة وشر ازاي يعني مكنتش فاهمة وقتها )ومستحيل انسى يوم جنازتها والستات اللي لابسين اسود وقاعدين في اوضتها وحواليهم لعبها وصورها
ربنا يرحمها ويرحم موتى المسلمين اللهم أمين
ويا جماعة اي حد عنده اطفال سواء كانوا اطفاله او اطفال اسرته او اطفال الجيران او اي طفل حاولوا تاخدوا بالكم منه لأن فقدانهم رهيب وصعب جدا ومش ممكن يتنسي
ويا رب منشوفش اي مكروه في احبائنا واهلنا ولا حد من المسلمين يا رب العالمين يا رب ربنا يحمينا من الحوادث ويحمي كل المتهورين في القيادة زي حضرتي
ويا رب متعرضش لأي موقف من مواقف الحوادث بتاعت البني أدميين دي
والحمد لله ان فوفو مكنتش معايا
---------------------------------
تحديث مهم : انا حذرت في بداية البوست انه حزين ومع ذلك معظم الردود لاموني اني كتبت حاجة حزينة
وكل حد رد على البوست نسي انه كان بيبي واول لما شاف الدنيا بدأ حياته بحزن وبكاء
وكمان انا مأجبرتش حد انه يقرأ البوست
اعمل ايه اكتر من اني كتبت ملحوظة في الاول؟؟؟؟؟؟
انا بجد اضايقت لأنكم اضايقتم ولأني قرات بوستات ناس كتير وصلوني لإني اعيط ومع ذلك ملومتش عليهم ابدا
لأني عارفه ان بكتاباتهم بيحاولوا ينسوا احزانهم
انا اسفة جدا اني ضايقتكم ومش هعبر عن احزاني تاني وهحتفظ بيها لنفسي
شكرا لكل اللي ردوا ع البوست
وشكر خاص للرائع - أحمد أبو القاسم وmohamed ghalia و للقمرين كيكي وe_emy
لأني استفدت من ردودهم جدا جدا جدا

الاثنين، 18 أغسطس، 2008

وحشتينيييييييييي يا فوفو

من أول الأسبوع وأنا مفتقدة فوفو بشكل كبير جدا أحب أعرفكم ب فوفو هي رفيقة دربي من 5 شهور تقريبا من أول لما أخدت الرخصة
فوفو هي عربيتي حبيبتي واخر اسم ليها واقرب اسم لقلبي هو اسم فوفو والاسم ده جه بعد اسمين لأن اول ما شوفتها سميتها البطيخه لأن لونها أخضر ومكعورة او مكببة (دوروا في القاموس على معنى الكلمات دي انا مش مسؤله )وبعدها سميتها الهمر علشان كنت باخد كمية تريقة رهيبة على فوفو حبيبتي علشان موديلها قديم شوية وكنت بزعل جدا فسميتها همر علشان هي بالنسبة لي همر (وهمرك العارجه تغنيك عن سؤال اللئيم) وفي الأخر جه اسم فوفو من فولكس (شبه عربية مصطفى قمر اللي بتيجي في الاعلان بتاع فيلمه الجديد وعربية احمد حلمي في ميدو مشاكل وافلام واغاني تانيه كتير) المهم هبقى احكيلكم على فوفو اكتر بعدين
النهارده حصل حاجة خلتني احمد ربنا ان فوفو مش معايا
كنا رايحين مكان نتفسح وبعدين كنا قريبين من البحر فاستأذنت بابا نروح نتعشى على البحر وبابا وافق الحمد لله
المهم نزلنا من الكتكوتة (لا الكتكوتة دي تبع بابا لكن فوفو تبعي انا) ولسه بهزر مع ماما وبتكلم معاها وفجأه سمعت صوت رعبني صرييييخ
واحدة بتصرخ بصيت ناحية الصوت لقيت عربية ربع نقل واقفة في نص الطريق بالعرض
(علما ان الطريق رايح جاي وضيق يعني ممكن جدا العربية كانت تتخبط)
المهم علشان مطولش عليكم هقولكم ايه اللي حصل بالتفصيل البوست الجاي ان شاء الله
وعلى فكرة أغنية افتكرت الجديده بتاعت محمد حماقي بتبعبر شوية عن اللي حسيت بيه
وخصوصا الكوبليه اللي بيقول ( طب ازاي في حاجات بتموت وتيجي الصدفة تحييها , وافتكرت مسكته في ايدي وايدي خلاص سايباه)
والكوبليه ده كان في بالي طول الطريق لبيتنا بعد لما شوفت اللي حصل وكمان أغنية انا وشادي لفيروز

السبت، 16 أغسطس، 2008

حاولت وأحاول ...


كثيرا ما حاولت ان اخفف الآم واحزان من اقابلهم في الحياة ولكن دائما كنت اتلقى الصدمات
الواحدة بعد الأخرى ومازال قلبي يعاني حتى احسست انه لم يعد للحب والعطف أي مكان في قلبي

فقد اصبح قلبي كالصخرة حتى مع أقرب وأعز الناس الى قلبي

من الممكن ان اتلقى الضربة القاضية وحينها لن استطيع العودة للحياة فالصخر لا يتحمل الضربات

عندما أحب أحب في صمت ولكن هناك من هي أجدر مني على اظهار حبها على حساب حيائها
انها مجرد أقنعة تسقط الواحدة تلو الأخرى لتكشف الحقيقة القبيحة ان بداخل كل انسان شيطان اسود استحوذ على قلوب الكثيرين فأصبحوا يخفون شرورهم وراء كلام المديح أو كلمات الحب المعسولة
حقا لن اهتم كثيرا بعد الأن وسأمضي في طريقي
فربما أعثر على قلبي الضائع ذات يوم

lady e

الجمعة، 8 أغسطس، 2008

رمضان يا أحب الشهور لقلبي

بجد انا محتارة كاتبه كذا موضوع في الأجنده بتاعتي وبالرغم من كده مش حابه اكتب ولا واحد منهم في المدونة دلوكيت




المهم انا قولت هكتب بقى واحاول ابعبر عن نفسي شوية

اقتراب شهر رمضان الكريم شاغل معظم تفكيري

ولقيت موضوع مستفزني جدا اليومين دول شوفتو التلفزيون واللي بيعمله فينا اعلانات كتييييييييير على مسلسلات رمضان بجد حاجه تغيظ وتخنق اشمعنا رمضان بالذات اللي بيحطوا الكم الرهيب ده من المسلسلات والبرامج فيه كنت بتفرج على برنامج الدين والحياة على قناة الحياة وفأجه الاقي سيل من المسلسلات وكلها جايه على قناة واحده وهي قناة الحياة وطبعا في رمضان ووقتها اللي بيقدم المسلسلات دي بيقول رمضان يقربنا رديت من غير ما افكر في الكلام (كده رمضان هيبهدلنا مش هيقربنا) ماما ردت عليا وقالتلي( لا فعلا رمضان كده هيقربنا بس من المعاصي انتي شوفتيه حدد وقال رمضان هيقربنا من ايه اهو قال هيقربنا وخلاص)طبعا مش هنكر اني كنت مبهورة السنين اللي فاتت بالتلفزيون في رمضان وكنت مش بقوم من قدام التلفزيون وطبعا ده كان بيأثر على مستوايا الدراسي بطريقة فظيعه بس الحمد لله قللت جدا من التلفزيون في رمضان اللي فات واكتفيت بمسلسلين كنت بشوفهم السنه اللي فاتت واحد ساعة الافطار والتاني وقت السحور لمجرد شغل الفراغ مش اكتر
واول مره احاول انتظم في صلاة التراويح وبجد هي اسم على مسمى لأني بحس ان الصلاة دي بتروح عني وبتشيل اي هموم او حزن
نفسي رمضان السنة دي يكون خير علينا ان شاء الله ونكثر من الطاعات اللي ثوابها في رمضان اكبر من ثوابها في اي وقت تاني
نفسي اختم القرأن الكريم ونفسي اجرب صلاة التهجد في الثلث الأخير من الليل


اللهم بلغنا رمضان وارزقنا حب طاعتك فيه بجد اللي بيضيع منه ثواب شهر رمضان مفيش حاجه ممكن تعوضه

السبت، 2 أغسطس، 2008

البعد جرح من غير دوا

السلام عليكم






انا من عشاق فكر وافلام المخرج العملاق والكبير والعالمي : يوسف شاهين -رحمه الله- مع اني متعاملتش معاه ابدا في حياتي يعني مفيش اي هدف من البوست ده غير اني احاول اظهر بعض الحاجات اللي يمكن تكون غايبة عن ناس كتير بمعنى:

مثلا البوست اللي فات زوار كتير للمدونة معلقوش على وفاة الرائع يوسف شاهين وبعض الناس بعتتلي تلومني اني اتكلمت اساسا عن يوسف شاهين وده شيء احزنني جدا لأننا مصريين وكتير مش عارفين قيمة يوسف شاهين وكمان مش بيحبوه وبيقولوا ان اعماله مش مفهومه ايه اللي مش مفهوم فيها مش عارفه

ده غير كمان كتاب كنت لمحته من كام سنه بيهاجم يوسف شاهين وكل اللي بيحبوا فنه وابداعه

انا مش هتكلم عن رأي اي حد لأن دي حرية شخصية والابداع مش محتاج حد يشاور عليه لأنه ظاهر بس للأسف كتير جدا مش شايفينه

لكن هتكلم عن فكري ورأيي المتواضع

وهبدأ بأحب فيلم لقلبي فيلم الناصر صلاح الدين اللي اخرجه يوسف شاهين بصورة رائعة وعمل مساحة كبيرة للشخصيات والأحداث الرئيسية بعدما كانت قصة الفيلم الرئيسية هي حب عيسى ل لويزا يعني كان هيبقى اكتر مشاهد الفيلم عن قصة الحب مش عن الناصر صلاح الدين والمعارك الحربية لكن هو عدل في الفيلم لغاية لما ظهرلنا بصورته الرائعه دي

الفيلم اللي كل ما اشوفه افتخر اني مسلمة وافتخر بتاريخ الاسلام وعظمائه والرجال العظماء مش اشباه الرجال الموجودين في عصرنا حاليا (مش كلهم )

اما فيلم جميلة أبو حريد : فهو فيلم رائع واتكلم عن البطلة العظيمة جميلة اللي ضحت بحياتها علشان استقلال بلادها الجزائر
وانا درست شخصية جميلة بوحريد في المدرسة لكن مفهمتهاش وحبيتها الا لما شوفت الفيلم اللي وضح اد ايه هي كانت عظيمة واد ايه في بنات يعتمد عليهم مش زي بنات دلوقتي (مش كلهم )


وفيلم المصير : اللي اتكلم فيه عن ضياع الأندلس والاشخاص اللي تدينهم كاذب وفكرهم متطرف وفي منهم كتير جدا في اي دين اللي بيتظاهروا بالتدين والورع ويستغلوا الدين لمصالحهم الشخصية وكمان اتكلم عن ابن خلدون المفكر الاسلامي اللي عرفته لما شوفت الفيلم وان اي حد بيفكر وبيكون فكره مختلف ناس كتير بيحاولوا يموتوا فكره
وده اللي حصل وبيحصل في كل العصور واكبر دليل على كده بعض دكاترة الجامعة اللي بيحجروا على فكر الطلبة وبيخلوهم يشيلوا المادة او يشيلوا منهم التقديرات العالية لمجرد ان الطالب رأيه مختلف مع الداكتور

فيلم الأخر : اللي بيصور الطبقية والفكر المختلف بين العرب والغرب وقصة الحب الجميلة بين ادم وحنان
وبرضه المتطرفين اللي بيحاولوا يتخذوا الدين شعار لمصالحهم الشخصية

فيلم باب الحديد : فيلم جميل جدا لانسان بسيط ((قناوي) اللي كل احلامه انه يحب ويتحب والناس تحترمه ودي احلام كل الناس تقريبا و لما شوفت الفيلم تخيلت ان يوسف شاهين هو قناوي من براعته في تمثيل الدور وطبعا لاخراجه الرائع للفيلم

المهاجر : الفيلم الي عمل فوضى والناس قالوا ان رام هو سيدنا يوسف لا طبعا لو كان يوسف شاهين عايز يعمل فيلم عن سيدنا يوسف كان عمله لأنه جريء وعنيد ومبيخفش من اي شيء لكن هو بيحترم الأنبياء ومستحيل يعمل فيلم عن اي نبي من الأنبياء او يمس اي دين بأي شيء

نيجي لفيلم عودة الابن الضال : كنت بفتكر مشاهد كتير منه وخصوصا الاغاني الرائعه بتاعته اغنية عودة الابن الضال وباي باي والشارع لنا واختيار يوسف شاهين لكل الرائعين اللي في الفيلم واخراج احساسيسهم بالصورة اللي بتخلي المشاهد يتفاعل معاهم وممكن يبكي وفاكرة اني لما كنت بروح المدرسة الصبح ايام الثانويه العامه وانا بكره اصحى من النوم بدري كنت بفتكر اغنية عودة الابن الضال غناء الفنانة العظيمة : ماجدة الرومي : (ساعات أقوم الصبح قلبي حزين )
ولما اضايق من درس مش فاهماه او امتحان صعب عليا او مدرسات عندهم 5000 كلكوعه في الثانيه وكانهم بينتقموا مننا مش بيعلمونا
اصبر نفسي وافتكر : ( وارجع واقول لسه الطيور بتفن والنحلايات بتزن والطفل يدح ويرن مع ان مش كل البشر فرحانييييين )
ولما بيكون عندنا امتحانات عملي ( انا كنت علمي) ايام ثانويه عاميه برضه كنت بقول لصحباتي - ايه العمل في الوقت ده يا صديق -
وكمان يوم لما خلصت ثانويه عاميه وكنا بنودع المدرسة غنيت اغنية باي باي طول اليوم

طبعا الراحل العظيم يوسف شاهين عمل افلام كتير للأسف انا مشوفتهاش كلها لكن دي الأفلام اللي شوفتها وبحبها جدا لدرجة ان لما بيجي فيلم منهم كنت بسهر مخصوص اشوفه (ايام المدرسة) ولغاية دلوقتي لما بيجي اي فيلم منهم بنسى اي حاجه وبشوف الفيلم
طبعا في حد هيقول ان نجاح الافلام كانت بالممثلين والموسيقى وكلمات الاغاني وخصوصا في فيلم عودة الابن الضال لأن كانت كلمات الأغاني للرائع : صلاح جاهين بس لكن هقول كل ده كان ممكن يبوظ لو مكنش في اخراج قوي من العظيم يوسف شاهين

طبعا كل الكلام اللي قولته من وجهة نظري البسيطه وطبعا الكلام عن الشخصيات العظيمة عايز مجلدات مش بوست واحد وكان عندي كلام كتير جدا بس مش هطول اكتر من كده وهقولكم

( ايه العمل في الوقت ده يا صديقي غير اننا عند افتراق الطريق نبص قدامنا على شمس احلامنا نلقاها بتشق السحاب الغميق)

وداعا يوسف شاهين وداعا للموهبة اللي مش هتتكرر ابدا حتى على ايد تلامذته
وداعا لمصور اساسيات في تاريخ وحياة مصر زي جنازة جمال عبد الناصر
وداعا للانسان العنيد المقاوم والمتجدد واللي فكره سبق عصره