الاثنين، 27 يوليو، 2009

انا


حساها اوي بكل معانيها

\\\\\\\\\\\\\\\\\\\\\\\\\\\\\\\

بعيدا عن الصورة وعن العنوان

وافترقنا يوم اللي بعدنا احترقنا وافترقنا وكان الليل كان الليل حضنه سارقنا

بس الغرام فينا بقي مطرح ما كنا نلتقي رجعنا بالصدفة مارقنا

فجأه وعي فينا الهوى رجعنا لماضينا سوى

رجعنا بالماضي احترقنا وافترقنا وافترقنا

فلينا وباقي بعينينا أشواق وحكي

ومن قسوة هالدنيي علينا بكينا البكي

هيدا مش اول وداع علينا مرق كام مره هوانا ضاع منا وانسرق

وافترقنا .. وافترقنا .. وافترقنا

بس الغرام فينا بقي مطرح ما كنا نلتقي

اول اغنية سمعتها اول لما الطيارة طارت وسابت أرض مطار مصر

الأحد، 26 يوليو، 2009

حاجه غريبة !!!

كلام على جنب :
في البداية انا اسفة يا ديدي علشان مقولتلكيش الف سلامة عليكي من الحادثة يا حبيبتي والحمد لله انك بخير انتي ومامتك وربنا يعوضك خير في الكتكوتة بتاعتك ومعلش ان شاء الله تكون اتصلحت وبقت كويسة
انا قلقانه عليكي جدا ومش راضيه اشيل الغير معرف علشانك وبدعي من كل قلبي انك تكوني بخير وفي احسن حال ربنا يكفيكي شر طريقك ويارب تطمنيني عليكي قريب


--------------------------------------
عمالة بكتب في موضوع بقالي ساعتين وكنت ناوية انشره عالمدونة وفي أخر لحظه غيرت رأيي مع انه موضوع كله امل وتفاؤل بس طويل شوية فقولت احتفظ بيه لنفسي وخصوصا كمان ان ما شاء الله ما شاء الله كلامي بيتفهم غلط اليومين دول وعالعموم مفيش مشكلة المهم انا نيتي ايه وعلى فكرة انا مش بخاف ولو أقصد حد هقوله في وشه أنا اقصدك يا فلان او يا فلانه
ولأخر مره هقول : يا قووووووووم يا أهل بلوجر الكرام الكلام اللي بقوله في المدونة مش شرط يكون عني اتفقنا بطلوا تعملوا الاسقاطات دي ربنا يكرمكوا يارب قولوا امين
ثانيا ومفيش اولا اصلا بس ما علينا ثانيا على طول
كنت بكلم كيكي صبحتي واخده بالك يا حجه كنت بكلم مين؟؟ اسمك طلع في المدونة عندي اي خدعه وش بيطلع لسانو المهم كنا بندردش في موضوع حلمي مش احمد حلمي طبعا لكن حلمي في ان يكون ليا كتاب وقالتلي على شوية بوستات عاجبينها منهم بوست كان عبارة عن قصة واسمه تأملات وانا كان رأيي ان البوست نكد نكد يعني مش اي حاجه فكنت عايزة اعرف ايه رأيكو في القصه تاني
وعلشان البوست اللي فات كان مرير اوي وكان صعب حتى عليا وانا بكتبه فكل واحد ياخد شوكولاته من اللي فوق دي اي خدعه علشان متقولوش حرماكو من حاجه نياهاهاهاها
ملحوظة : الصورة بعدستي
ملحوظة كمان : مدونتي بتهييس وجالها انفلونزا التدوين فالريدر عندكو واي حاجه تانيه ليها علاقه بالمدونة اكيد متلخبطه
فاصل ونواصل :)

الجمعة، 24 يوليو، 2009

اسمهم بشر مش ملايكة !!

غريبة ان في حد في الدنيا بيقدر يتلون كدا بيقدر يحط الماسك على وشه ويشيله في اي وقت
يقدر يوهم الناس كلها ويوهم نفسه انه طيب وبريء ويعيش في كذبة انه المظلوم والمقتول وهو الظالم والقاتل
يجرح بكل سهولة وكل قسوة وتسامحه بكل طيبة قلب ويتمادى في قسوته وجرحه ليك ويحاول يدمر قلبك وكيانك بكل سهولة وهو راسم على ملامحه علامات الطيبة
والبراءة ولما تجري تنقذ اخر حاجة في قلبك يبقى انتا كده وحش ازاي تنقذ قلبك كان لازم تسيبه لغاية لما يدمره ع الاخر

في ناس كتير كده في الدنيا وانا متأكده انهم لو استمروا كده هيدمروا نفسهم بنفسهم وهيعيشوا متعذبين دنيا واخرة وعالعموم داين تدان والقلب اللي حاولت تدمر اخر حاجه فيه هيعيش وهينجح وهيفرح وانتا هتفضل في ظلام كذبك وانانيتك وغرورك وعذاب نفسك انك ضيعت قلب شافك في يوم من الأيام ملاك بس الظاهر انه كان غلطان لأن مفيش ملائكة في الدنيا

فلطالما باركت كذبك كله
ولعنت ظني !!

ماذا أقول لأدمع سفحتها أشواقي اليك ؟؟

ماذا أقول لأضلع مزقتها خوفا عليك؟؟

أأقول هانت ؟؟

أأقول خانت ؟؟

أأقولها؟؟

لو قلتها أشفي غليلي

يا ويلتي لا لن أقول

انقذتني من زيف أحلامي وغدر مشاعري ...!

فرأيت انك كنت لي قيدا حرصت العمر الأ اكسره فكسرته !!!

ورأيت انك كنت لي ذنبا سألت الله الا يغفره فغفرته !!!

***********************

فأنا صنعتك من هواي ، ومن جنوني !

ولقد برئت من الهوى ومن الجنون !


مقتطفات من قصيدة للشاعر كامل الشناوي

الأربعاء، 22 يوليو، 2009

قصاصات من الحياة


أحلى حاجه انكو فكرتو اني هقفل المدونة البوست اللي فات نياهاهاهاهاها لا تقلقوا اطلاقا مش هقفلها ان شاء الله

*************************

للأسف easy come >>> easy go

************************

في ذكرى يوم الثورة الله يرحم الملك فاروق

********************************
اندم لو حبيت وبكيت واندم لو عمري ما حبيت !!

يعني في الحالتين ندم بس ندم عن ندم يفرق

******************************
بقى هي الدنيا كدا؟؟ بقى هما الناس كدا؟؟ يا خسارة ضحكتي يا خسارة فرحتي ... يا مين ياخدني تاني يرجعني لدنيتي .... من صغيره ع الحب لسعاد حسني
طب هي كان عندها عم حزونبل في الفيلم ورجعها لدنيتها الجميله تاني لكن انا معنديش عم حزونبل اعمل ايه دلوقتي بقى؟؟؟

****************************
كان ممثل بيدعي ربنا سبحانه وتعالى في فيلم وبيقول يااااااارب احرمها من جنتك انا كنت مستغربة الدعاء دا اوي بس بعد فترة حسيته اوي بس المشكلة اني مقدرش ادعي بنفس الدعاء لأن اولا مش عارفه اكره ثانيا انا مش ضامنة الجنة ليا اصلا علشان ادعي ربنا انه يحرم حد تاني منها
**********************************

اذا اردت شيئا بشدة فأطلق صراحه فإن عاد اليك فهو ملك لك الى الأبد وان لم يعد فهو لم يكن لك في البداية دا ترجمة مثل انجليزي قاله اسامة منير في فيلم ظرف طارق ودلوقتي بس اقتنعت انه كلام فارغ ممكن يكون راجع علشان اي حاجه تانيه مش علشان بيحبك وبيخاف عليك
*********************************
" لهذا كثيرا ما أقول للمهمومين الذين يتعذبون برغباتهم المشروعة الملحة في السعادة والأمان , إننا نستطيع أن نتحكم في انفسنا لكننا لا نستطيع ان نتحكم في الأخرين الذين تشقينا تصرفاتهم وخياناتهم واحقادهم ونذالتهم وخذلانهم لنا , وما دام الأمر كذلك فلسنا نملك إلا ان ننفذ الجزء الخاص بنا من روشتة العلاج وهو أن نتغير نحن أملين أن يتغير الأخرون للأفضل أو أن تلقنهم الحياة دروس الألم فيعرفوا لنا أقدارنا وأن علينا أن نحجم بقدر الامكان تأثير تصرفاتهم علينا فننجو من بعض المعاناة التي – يهدونها – إلينا بأفعالهم ردا على هدايا الإخلاص والوفاء التي قدمناها لهم والمهم هو ان نحدد أهدافنا ونختار من الوسائل ما يقودنا اليها وليس إلى غيرها ثم نترك الأمر بعد ذلك لمن بيده الأمر سبحانه .. فإن شاء منحنا جوائزه وان لم يشأ ادخر لنا سعادتنا المفقودة إلى أجل أخر .
من كتاب أرجوك لا تفهمني للكاتب الرائع عبد الوهاب مطاوع الله يرحمه
***********************************

ياه لو يبطلوا اللي بيعملوه معايا كل ترم
النتيجة بتاعتي تطلع من هنا والاقي مصر والدول المجاورة عرفتها وتليفونات ومسجات وانا بضايق من الحركة دي اوي اصلا النتيجة دي تخصني لوحدي لما حد يحب يعرفها يسألني لكن محدش يتطفل على حياتي ويعرف النتيجة من ورايا بجد متغاااظة متغاظه يعني
**********************************
معظم الناس هنا في صلالة طيبين بجد والابتسامة على وشوشهم

واحدة صاحبتنا عزمتني على فرح بنتها يوم الجمعه الجاية ان شاء الله وما شاء الله الفرح هنا بيستمر اسبوع مش ساعتين واقلب زي افراحنا المصرية

والجو الشهرين دول ما شاء الله جميل جدا غيوم ومطر خفيف اسمه رذاذ
وبالليل بيبقى برد شوية وانتو عندكو في مصر حر هيييييييييييه وش بيطلع لسااااانو نياهاهاهاهاها
********************************
على فكرة انا مش ناسية ردود البوست اللي فات ووعد ان شاء الله اول لما اروح ضريح النبي ايوب هدعي لكل حد سأل عليا فردا فردا لأنهم بيقولو الدعاء هناك مستجاب


اتفضلوا معايا ايس تي وجنبه شمعتين علشان لو حبيتو تتأملوا معايا

الجمعة، 17 يوليو، 2009

closed

حاسة اني انشغلت في العالم الافتراضي اوي لدرجة اني نسيت حاجات كتيرة جميلة بره النت وبره العالم اللي صنعناه من خيالنا

جميل اننا نصنع احلام وعالم في خيالنا لكن لما الخيال دا يطغى على الواقع يبقى لازم نفكر ان في اولويات في حياتنا اهم من المدونة وساعتها لازم نبعد علشان نعرف ايه الحقيقة وايه الخيال

اتمنى الاقي ليدي اللي بقت غريبة عني ووحشتني جدا

انا والمفاجئات بنحكي حكايات + تحديث

تحديث : حصل معايا النهاردة مفاجئتين بجد فرحت بيهم جدا
بجد شكرا :)
..................................
حاولت انشر الصور بتاعت رحلتنا من مصر لسلطنة عمان وبعدما الصور طلعت عينيا في رفعها ساعتين واذ بالكمبيوتر يحلف 100 يمين انه مش هيشتغل وفضلت احايله ميردش اقوله يا كمبيوتر ميردش اقوله يا جميل ميردش وفي الاخر قولتله عنك ما رديت وعملتله ريستارت طبعا البوست اتمسح عااااااااا قولت هكتب بوست تاني عن صلالة رفعت صور من صلالة وانا في نص البوست مسحته عااااااااااا وبعدين انا عايزة اكتب النهاردة بس هكتب واقول ايه؟


خير اللهم اجعله خير انا حاسة ان تنطبق عليا اغنية المطرب الفظيع رامي صبري : كلمة كلمة توديك او كلمة تجيبك اهو انا كدا بالظبط ممكن ابقى فرحانه ومفرفشه ورومانسية وفأجه كلمه تقلب مودي كله للعكس او اكون مخنوقة مثلا واسمع كلمه حلوة والاقيني بقيت ماشيه وسط السحاب مع النجوم والقمر حبيبي

وكمان من الحاجات اللي بتأثر في مودي المفاجأه بحب جدا المفاجأت والحمد لله حصلت في حياتي شوية مفاجأت كتير منها الحلو ومنها اللي مش حلو


وفي شعور مسيطر عليا جدا اليومين دول ان هتحصل في حياتي ان شاء الله مفاجأه سعيدة جدا وانا هكون فرحانه بيها جدا السنة دي بس ايه نوع المفاجأه بالظبط مش عارفه الله اعلم ويارب ظني يكون في محله وتكون مفاجأه سعيدة

من المفاجأت اللي مش قادرة انساها ولسه لما افتكرها بفرح بيها :-

في ثانوية عاميه كانو بيكرموا الطلاب المتفوقين وانا طبعا وبكل فخر مكنتش من ال3 الاوائل وكنت هموت واطلع اتكرم زي البنوتات اللي بيتكرموا وفجأه الاقيهم بيندهوا اسمي انا حسيت اني بحلم واتكرمت مرتين واخدت هديتين واحدة كأفضل نشاط في المدرسة في الموسيقى والاذاعة مع ان موضوع الموسيقى دا في حد ذاته كان اكبر هدية ليا كنت كل يوم بعزف في الطابور نسم علينا الهوا من مفرق الوادي بتاعت فيروز او بعزف فينو حبيبي فينو بتاعت هشام عباس ههههههه على اساس ان محدش فاهم حاجه في الموسيقى غيري انا وزميلتي اللي كانت بتعزف معايا
والتانية كانت الطالبة المثالية في القراءة في المكتبة المدرسية وكنت مستغربة موضوع المكتبة دا جدا لأن كان من قوانين المكتبة استعارة الكتب يومين وانا كنت بخلي الكتب عندي 4 ايام وفي تالت يوم كل مرة يقولو في الاذاعه على الطالبة ليدي انها تجيب الكتاب الفلاني وتدفع غرامه وقدرها كذا يعني الفلوس اللي دفعتها جابولي بيها هديه :)


برضه وانا في ثانوية عاميه كنت مضايقة جدا يوميها وبعيط بشكل مش طبيعي وفجأه بابا قال لنا يلا علشان هنخرج وخرجنا مع بابا وانا مش عارفه هنروح فين ولقيتنا روحنا مكان في وسط الصحرا ومن اول الطريق في حاجات ضخمة منورة زي الشموع بس مش شموع ومنظرها تحفة قمة في الرومانسية ووصلنا في النهاية للمسرح الموسيقى العربية من مصر كانو عاملين حفلة وكانت حفلة جميلة بجد نستني اني كنت في ثانويه عاميه اصلا :)


وغيرها مفاجئات كتير بس مش هطول البوست اكتر من كدا بس انا حتى بحب المفاجئات لما بشوفها في الافلام
يعني مثلا في الفيلم دا حصلت حاجات كتير خلت البطل والبطلة عمرهم ما هيتجوزوا في يوم من الأيام ومع ذلك حصلت مفاجأه واتجوزوا وفرحت اوي في الشوريرين اللي كانو في الفيلم انا بحب الفيلم دا جدا مع اني شوفته مرتين بس







جاك وروز في فيلم تيتانيك حبيب الملايين الفيلم دا اتفرجت عليه كتييييييييير بس طبعا كان محذوف منه برضه مشاهد كتيييييييير والجميل ان جاك كان كل شوية بيفاجئ روز كان عاجبني اوي مفاجئات جاك دا طبعا غير حنيته وانه بيحب روز اكتر من نفسه لدرجة انه اتسجن علشانها ومات كمان علشانها وهو دا اللي بيسموه الرومانسية الخيالية مع ان قصة الفيلم قصة واقعية بس بجد فيلم مليان مفاجئات في البداية ان جاك كسب التذاكر بتاعت رحلة السفينة تيتانيك وانه انقذ روز من الانتحار وقال لها مصيرنا واحد لو نطيتي هنط معاكي ولما وقفوا في بداية السفينة زي الصورة اللي فوق ولما روز نزلت مع جاك للطبقة التالتة من السفينة ورقصوا سوى ولما ضحكوا على اللي بيطاردوهم وهربوا منهم كلها مفاجئات جميلة

واخيرا نطلع من البوست دا بسؤالين مهمين

يا ترى بتحبوا المفاجئات زي حلاتي ولا بتحبو كل حاجه تمشي بالورقة والقلم؟

ممكن تحكي احلى مفاجئة حصلتلك في حياتك؟

الثلاثاء، 14 يوليو، 2009

احلام على الرمال


كنت بتأمل في جمال البحر وهدوئه وكان في اطفال بيلعبو وعملو بيت جميل من الرمل وكانو فرحانين اوي وسابو البيت وراحو يلعبو كورة وفجأه جت موجة كبيرة من البحر وحطمت البيت الجميل دا
ولقيتني بفكر في فكرة غريبة بفكر في العنكبوتة او زي ما بيسموها الأرملة السوداء بعد ما بتلبس الفستان الأبيض الجميل والطرحة وبتفرح مع عريسها وسط المعازيم وبعد ما بيكونو طايرين من الفرحة بمجرد ما الفرح بينتهي العنكبوتة بتقتل العنكبوت !! عملا بالمثل اتغدى بيه قبل ما يفطر بيا ولغاية دلوقتي مش قادرة افهم ازاي العنكبوت بيوافق على كدا ويا ترى بيكون عارف انه هيتقتل بعد الفرح والزفة ؟ قصص حب كتير تأملت فيها والحمد لله كلها فاشلة وفعلا محدش بينجرح اوي الا اللي بيحب اوي بس للأسف الجرح دا بيفضل اثره ظاهر مهما الانسان حاول ينسى او يسامح برضه بيفضل الألم دا يظهر من وقت للتاني ويقول للمجروح حاسب ممكن اوي تنجرح تاني وتالت حتى بعد الاعتذار انا اسف ومش هفضل كل مرة اعتذر يااااه اد ايه الكلمة دي بتضايق يعني انتا اللي جرحت وفي نفس الوقت مضايق انك بتعتذر حاجه غريبة !
نرجع للعنكبوتة يا ترى عندها حق في انها تموت العنكبوت اصل بعد الفرح هتيجي المسؤلية هتلاقي انانية العنكبوت ظهرت هتلاقيه عايزها تعمل كل حاجه وهو مش عايز يعمل اي حاجه , مش عارفه بحس ان الجواز في مملكة العناكب بيبقى قائم اساسا على الاستغلال يعني هي تعمل كل حاجه وكمان يشتكي بعد كدا انها بقت شبه رجل الكنبه ف العنكبوتة عارفه السيناريو دا من الأول فبتقتل العنكبوت عالاقل يبقى له ذكرى حلوة قبل ما يموت ومع ان دا منطق غريب بس لو اتطبق على البشر هتبقى مشكلة :)
مش عارفة ليه اي احلام رومانسية ضاعت مني مبقيتش بحلم بأي حلم رومانسي كل احلامي الرومانسية اتحطمت على ارض الواقع ومبقتش بحلم غير لمستقبلي ما انا مش هتخرج من الكلية أأقشر ثوم والا مكنلوش لازمة التعليم من الأول وان شاء الله مش هاخد الشهادة لمجرد انها شهادة وخلاص

الأحد، 12 يوليو، 2009

هوامش



اييييييه دونيا فين ايام الانطحانات لما كنت بكتب في المدونة كل شوية لكن دلوقتي مش عارفه برغم ان عندي زحمة افكار الا اني مش عايزة اكتب لكن بكتب لمجرد اني اغير مود البوست اللي فات وان يبقى في حاجه جاديدة في هذه المدونة الماثلة امامكم يا حضارات السادة المششارين

اولا : اللي في الصورة بنوتة توم كروز واياكم ثم اياكم حد يقولي مين الواد المكلبظ ده لأن التعليق دا اتقال على الصورة دي اكتر من مرة ومن كذا حد ومن كذا سبت برضه نياهاهاهاها

ثانيا : الاحاسيس السلبيه اللي كنت بمر بيها وكنت بحاول الاقيلها اسباب الفترة اللي فاتت اتضح ان في الوقت دا جدو كان في العناية المركزة وانا معرفش ومش عارفه اسمي دا ايه يا ترى صدفة ولا زي ما بيقولو في التنمية البشرية طاقة ولا ايه مش عارفه لكن كل اللي عرفته ان في الوقت اللي جدو كان فيه في العناية المركزة وانا بعيد عنه ب5000 كيلو كنت حاسه ان في حاجه مش طبيعية مسببالي كل الطاقة السلبية اللي مريت بيها ومازلت مستمرة بس مش اوي زي الاول

ثالثا : من المفارقات الغريبة اني اجيب جيد جدا في الشعر الرومانسي وطبعا المادة بالانجليزي وانا اصلا مذاكرتش الا قبل الامتحان بساعة والوقت مكنش مكفي لأني في الامتحانات مكنتش طايقة الشعر ولا الشعرا كنت حاسة انهم كذابيـــــن وبيعملو من البحر طحينة لكن فوجئت وانا طالعه من الامتحان وبراجع مع زميلاتي اني حليت كل الاسئلة صح ومغلطتش غير في اسم الشاعر بس ولذالك جبت جيد جدا وربنا يخليك لينا يا دكتور زكي

وزكي يا زكي يا زكي زكي يا زكي بجد انا بحب احضر محاضرات الدكتور ده لأسباب كتير منها ان محاضرته بتبقى الساعة 11 وانا 12 بالثانية بكون في المحاضرة وبيوافق اني ادخل المحاضرة

انه طيب القلب والطيبين قليلو وكمان لان بيعجبني اصراره لأنه بيجي من القاهرة وكمان كفيف ف تخيلو مدى المعاناة اللي بيعانيها وال8 ساعات سفر رايح جاي لكليتنا ربنا يكرمه ويجزيه خير يارب

رابعا : نسيــــــــــــــــت انا نسيـــــــــــــت عااااااااااااااااااا وبما اني نسيت فهقووووووول الحمد لله يعتبر بقيت في الليسانس بس مش عارفه خااااااااااااااايفة اوي ومش فرحانه ليه الله اعلم

خامسا : كنت لسه بكلم ماما على ان غريبة بابا بقى له 16 يوم متعصبش عليا ومذهوووولة هو الحمد لله بابا طيب جدا وحنين كمان جدا جدا ولما بأعجب بإنسان مذكر سالم ببقى شايفه فيه بابايا لكن طيبة بابا مقترنة بعصبية سريعة الانفجار وانا مع الاسف اخدت الموضوع ده منه فتخيلو اتنين عصبيين في نفس البيت حتى ماما اللي مكنتش عصبيه خليناها تتعصب معانا ولسه مكملتش كلامي وفعلا لقيت بابايا جه واتعصب عليا وعوض ال16 يوم اه يااااااااني يا مُرك يا مهجه ويا مُرك كمان مرة لما يشوف الكلام دا عاااااااااااا

سادسا : خير اللهم اجعله خير الحمد لله بدأت اكتب في الكتاب واعلي الجواب :) بس كل شوية اقول ايه اللي انا بكتبه ده وامسح اللي كتبته
ف بالطريقة دي شكلي مش هخلص الكتاب الا بعد عشرتاشر سنة ولذلك اسمحولي ارخم عليكو واخد من وقتكو السمين اللي بيعمل ريجيم :) علشان تقولولي اختار أي مواضيع وانشرها في كتابي من ضمن المواضيع اللي بكتبها وامسحها هع هع هع هع
والمواضيع هتلاقوها في الارشيف من بداية المدونة

سابعا : هرخم عليكو لتاني مرة واسألكو والسؤال دا اجباري مع او ضد اننا كمدونين هههههههههههههه يا نهار ابيض كنت كاتباها مديونين ما علينا انا بقيت بهييس

المهم يعني مع او ضد اننا نتعرف على بعضينا ونعمل تجمعات مدونين وكدا ؟ اصل انا وانتيختي كنا بنتكلم في الموضوع دا امبارح وعايزة اعرف رأيكو

الأربعاء، 8 يوليو، 2009

وايه يعني ؟؟؟


وايه يعني؟؟
ايه يعني لما اتألم لوفاة شيماء زميلتي وافتكر ذكريات ليها في كل ثانية لغاية لما قربت اتجنن ؟ الحي ابقى من الميت
ايه يعني لما خطيبة ابن خالي تغير مني وتحاول عيلة خالي كلها ارضائها على حساب انهم يزعلوني مش مشكله؟ معلش انا عليا الاستحمال لكن هي ضيفة
ايه يعني لما اكون بشتري اكسسوارات ويعجبني اكسسوار خاتم توينز واحد على شكل قلب والتاني بيكمله على شكل دبلة والبسه بكل براءة والاقي اللي بيحرجوني ها اتخطبتي وفي عنيهم اني اتعقدت يا حرام علشان متخطبتش ؟ عادي طالما انا مقتنعه ان مش ممكن اتخطب لمجرد الخطوبة والا كنت اتخطبت من وانا في اولى كلية
ايه يعني لما كل الناس تسألني هااااااااا مفيش؟؟ وارد عليهم مفيش ايه يقولولي مفيش قصة حب بينك وبين حد في الكلية وارد واقولهم لأ مفيش ويقولو اكيد مفيش حد حابب يتعرف عليها ؟ عادي برضه ميعرفوش ان كتير من زمايلي في الكلية بيحاولو يلفتو نظري وانا مطنشششششششششششه لأنهم في نظري مجرد عيال
ايه يعني لما الفرنساوي يبقى معايا لتاني سنة على التوازي واخسر تقدير السنة دي لتاني مرة ؟ نو كومنت هكتفي بحسبي الله ونعم الوكيل وربنا ينتقم منك يا حاقد
ايه يعني لما احس ان جوايا حاجه كبيرة انكسرت ومش قادرة اضحك من قلبي ولا حتى ارجع روح الطفلة اللي بعيش بيها ؟؟
يا ترى كل دا يخليني في مود كئيب؟؟ ويخلي دموعي تغلبني 4 ايام؟؟ حتى في التأمل اللي المفروض بيبقى فيه سعادة مش حاسة غير الدموع
الحمد لله انا احسن من غيري كتير في الابتلائات
الحمد لله على كل حال
اللهم عافني في سمعي وبصري واجعل لي نورا اهتدي به فيخرجني من ظلمات الاحزان الى نور السكينة والهدوء والسلام النفسي

ابكيتني وانا احسبك تكره دموعي
تُرى أسرتك دموعي وانا أبكي؟؟

الاثنين، 6 يوليو، 2009

عن مخنوقة ستان


حدث في دولة مخنوقة ستان ان اتنين من ولاد الدولة العظمى دي سافروا يتعلموا وبعدين وهما مسافرين وفي الغربة حصل للزوجة تحرش بالكلام على انها ارهابيه بسبب حجابها ومظهرها الاسلامي ولما راحت ترجع حقها ماتت شهيدة على ايد ارهابي متعصب ولما جوزها حاول يدافع عنها ضربوه بالرصاص ده غير الطعنتين اللي اخدهم
نفسي اصرخ واقول كنتو متوقعين ايه يعني؟؟؟؟؟؟ ما كل الناس بتتعامل اسؤا معاملة في مخنوقة ستان
في كل المجالات
اكل ملوث ومسرطن ومبهدل
ومية مشبعه بالكلور وبمواد تقضي على صحة اصح انسان
تعليم: زي الزفت وكله كوسة ورشاوي ومفيش مناهج اساسا
صحة : اسؤا رعاية في اسؤا مستشفيات بأسؤا ادوية
شغل : البطالة متوفرة وممكن تتصدر
تحرش وجرائم: العدد في الليمون
ترحيب بالاجانب على حساب اهل مخنوقة ستان وده انفراد لمخنوقة ستان بيرحبو اوي بالاجانب على حساب اولاد البلد
حياة كريمة : ابقى سلملي على كريمة
مستنيين ايه ؟؟؟؟
الناس في مخنوقة ستان بيتعاملوا بالشكل ده مستنيين ان الناس اللي بره يعاملوهم ازاي يعني؟ بالاحضان بالاحضان ؟؟؟ معتقدش
برغم قسوة وفاجعة اللي حصل ف ده وضع طبيعي حاليا لأن برغم كترة عدد سكان مخنوقة ستان وضواحيها الا اننا زي غثاء السيل
ومحدش ينسى العبارة ولا القطارات ولا البلاوي التانيه اللي كل يوم بتحصل في مخنوقة ستان
لما الناس تتعامل كويس في مخنوقة ستان يبقى نزعل اوي ونتأثر لما يتعاملوا وحش بره مخنوقة ستان

الخميس، 2 يوليو، 2009

همسات من القلب + لخبطات

أمنية
لا تتمنى الكثير فقط تتمنى ان ترى اسمه في صندوقها البريدي تتمنى ان ترى كلماته وتسمع همساته في كل وقت
كلمات قالها لها وحدها وبالطبع فكر فيها والا لما راسلها او كتب لها حرفا واحدا
تحمل كلماته معها في كل مكان تقرأها وتبتسم تشعر ان عطر كلماته يعطر المكان ويدفأه
يتراقص قلبها حين تشعر انه بخير وانها تشغل حيزا من تفكيره

احساس جديد يسيطر عليها لا تعلم ماذا تسميه ولكنها تعيش به وتعيش فيه
وتتمنى انه ان كان كل ما تعيشه حلما الا تستيقظ ابدا وتتمنى ان تستيقظ فتجد ما تحلم به حقيقة
اطمئنها بأن لا تخف من الزمان ولا من القدر الذي يبعدهم فأرواحهم متلاقيه
الجميع يلمح تلك اللمعه في عينيها حينما تفرح به والجميع يلمح اضطرابها وقلقها وحزنها عند غيابه
وهمست لها صديقة: اعانيتي من ازمة؟؟

فقالت لها : لماذا ؟؟
قالت : تبدو على وجهك علامات الصراع
قالت لها :واي صراع؟؟
قالت صديقتها : انتي الادرى
قالت : انه القلق من امتحانات الحياة وفي داخلها تقول انه القلق والخوف الذي كاد ان يقتلني عليه ولكن يا الهي الهذه الدرجة لا تخفي شيء ايها الوجه !!


القريبين منها يعلمون عنه فالفرحة تلمع في عيونها حين تلقاه والخوف والقلق والحيرة والشجن يبدون عليها حينما يغيب عنها
ويتسائلون بفضول عن احواله واحبوه من حبها له رغم كلمات االتحذير منه ومحاولاتهم لأن يبعدوها عنه الا ان لديها يقين بأنه صادق فهو انقى وارقى من كل الظنون وهي لا ترى من كل الوجوه سواه ولا تسمع من كل القلوب الا صوت قلبه
فليحفظه الله ولينير الله دروبهم وليجمعهم سويا في حبه وفي جنته
---------------------------------
لخبطات :_
محدش ياخد باله من الكلام ده اوي دي مجرد فضفضة بيني وبين مدونتي لأنها اقرب حاجه ليا دلوقتي وخدو بالكو انا قولت حاجه مش حد !!

متأكده انها متابعة مدونتي بإهتمام مع انها من جواها بتكرهني بس مفيش مشكلة لو حبت تشوف لحظات انكساري لأن الأيام دول بكسر الدال وربنا شاهد اني مقصدتش اضايقها او اظلمها ولأخر لحظة كنت معتبراها اختي الكبيرة

لحظات من الألم بتعتصر قلبي وبتوديني لدنيا مزعجه كلها دموع وبيوت سودا ووجوه شاحبه وعيون حمرا

نفسي دلوقتي اكون فوق قمة جبل والجبل كله مغطى بالتلج والتلج يوصل لقلبي علشان يبطل يبقى طيب في زمن انعدمت فيه الطيبة كان نفسي يكون لي جناحين

اخيرا خلصت قراءة كتاب جر ناعم للكاتب عمر طاهر كتاب جميل وشدني لتكملته رغم تحفظي على شوية حاجات فيه بس الكتاب ككل عجبني وخصوصا روح الأسرة لما كان بيوصف باباه ومامته واخواته نهال وليلى حسيت اني شايفاهم فعلا لدرجة اني حبيتهم من كلامه عنهم واتمنيت يكون لي اخوات زيهم واخ بيحب اخواته زي الكاتب


ورجعت تاني :)

وحشتوووووووني بس موحشتونيش اوي يعني لأني كنت متابعاكم من بعيد :) ودعيتلكم دعوات كتييييييييير وانا مسافرة ربنا يتقبلها يارب وصورت صور كتير اوي ومش راضية تفتح ع الكمبيوتر للأسف عااااااا

اولا كل سنة ودكتر ستيتة حسب الله الحمش طيبة وعقبال 100 سنة فرحة وسعادة وحب وراحة يارب

ثانيا بقى مش عارفة ابدأ منين ولا اقول ايه اصل الاحداث اللي مريت بيها في الرحلة كتير اوي
ليلة السفر نزلنا مع خالتو نجيب شوية حاجات وموبايل ماما اتسرق وكمان موبايل خالتو اتكسر وهو في شنطتها
واخيرا موبايلي وقع والcover
بتاعه اتكسر كان يوم بوظان الموبايلات العالمي
يوميها منمناش وكنا بنجهز الشنط وبندردش انا وبنت خالتو وماما وخالتو
وخالتو حبيبتي كانت معجبة بالريجيم اللي انا كنت ماشية عليه وعلشان كده عملتلي كل الاكلات اللي ممكن تتخن ارفع انسان في العالم
وكل شوية خالتو كانت بتقوللي
خالتو : انا معجبة بيكي اوي يا ليدي
انا : ببص لها بنظرة كلها جدية وبقولها خالتو
خالتو : ايوة؟
انا : مينفعش كده بجد الناس بقت بتتكلم علينا لازم تشوفيلك حل في الموضوع ده بقى
خالتو : ههههههههههههه
وتاني يوم روحنا المطار قبل وقت الرحلة ب3 ساعات مع ان المفروض نروح قبل الرحلة بساعتين
روحنا عالمطار القديم وبعد كده اكتشفنا ان رحلات مصر للطيران عملوا ليها مطار جديد اسمه مطار 3 وطبعا محدش يعرف الموضوع ده وناس كتير فاتهم رحلات الطيران بتاعتهم علشانهم بيروحو المطار القديم بدل مطار 3
ومطار 3 ده حكاية لوحده
الكلمة الوحيدة اللي كنت بقولها لما دخلناه : منين يودي على فين ؟؟ متاهه واللوحات الارشادية اللي في المطار تتوه اكتر ده غير الاسانسير اللي مش بياخد غير شخص واحد بعربية الشنط بتاعته
من الحاجات الجميلة في الرحلة كان في عروسة مسافرة معانا على الطيارة بس الفستان الأبيض المنفوش كان مضايقها وخصوصا وهي في الطيارة بس ما شاء الله كان شكلها عسول اوي
مصر للطيران اتغيرت كتير والخدمة فيها بقت متميزة غير السنين اللي فاتت خالص وسبحان الله شوفنا منظر عمرنا ما هننساه من شباك الطيارة نص السما لسه الشمس طالعه فيها ونص السما التاني ضلمه
كان معانا بنوتات كانو بيدرسو موسيقى في مصر واول لما الطيارة نزلت الكابتن قال ونتمنى ان تشرفونا على رحلات مصر للطيران مرة اخرى فكلهم في نفس الوقت قالو توووووووبة ما بنروح مصر ثاني بصيتلهم وابتسمت ف اتحرجو اكيد اكيد مشربوش من نيلها ولا جربو يغنولها
وطبعا الاحتياطات اللازمة ل انفلونزا الH1N1
في ناس كتير كانوا لابسين كمامات واول لما دخلنا المطار كتبنا تعهد واقرار ان مش عندنا اعراض انفلونزا ومش جايين من بلد مصابة
درجة الحرارة هنا زي مصر تقريبا
*************
كلام على جنب : ربنا يخليك ليا
في كلام كتير بيتوه ويضيع معناه لما بنوصفه