الأحد، 31 يناير 2010

الف مبرووووووووووك لبلدي مصر




برغم اني مكنتش متابعة كل المباريات

الا اني شفت الماتش النهاردة

بجد بجد الف مبرووووووووك

بجد نفسي كل الناس يبقوا متحمسين لكل حاجة في مصر زي الكورة كانت كل حاجة هتبقى أحسن

لو الاعلام اللي ع العربيات او اللي ع البيوت في قلوبنا ، كانت بلدنا هتبقى أحلى بلد

ومكنتش هقول " بلدنا بتتدهور بينا " :(

الف الف مبروووووووووووك مرة تانيه وكويس اننا متفوقين ومتفقين في حاجه :)

الثلاثاء، 26 يناير 2010

امبارح كان عمري عشرين



امبارح كان عمري عشرين لكن النهاردة تفرق بقى 21 يعني مش أي سن ده سن الرشد وسن العقل على رأي حنين الذكريات انتيمتي اللي عملتلي مفاجأه وكتبتلي بوست جميل أوي
أجمل زهره وأنا عارفه اد ايه هي مشغولة ومفيش عندها وقت (بحبك أوي يا حنين وربنا يجمعنا في الخير دائما) وتسلميلي ع الورد اللي في البوست والتورتايه الجميله اللي في البوست برضه




كمان أميرة مرمر على كوكو مهجور بعتتلي مسجات واتصلت بيا وانا بعتذرلها جداااا علشان مردتش ع التليفون لأني كنت فاصلة شحن بجد بعدما برجع من الامتحان بفصل شحن طول اليوم وأسفة مرة تانيه يا مرمر
وتسلميلي ع الورد اللي في المسج علشان انا بجد كان نفسي في الورد جدا

والنهاردة أوشي بعتتلي مسج جميلة أوي وبعدين يا أوشي مليون سنة قليلين أوي :) ربنا يخليكي ليا يا أجمل بنوته

وسومة أختي الصغننة بعتتلي مسج وعملتي بوست عنوانه كل سنة وانتى طيبة يا ارق واطيب قلب


ربنا يخليكي ليا يا سومه يا أرق وأطيب بنوتة صغنونه بجد انتي عسولة أوي

النهاردة جالي أول وأجمل بوكيه ورد جالي في حياتي كلها من بابايا ومامتي
بجد كان نفسي جدا في بوكيه ورد أكتر من أي حاحة في الدنيا
والحمد لله جالي بوكيه أحلى من اللي كان نفسي فيه
تسلمولي يا مامتي وبابايا ربنا ميحرمنيش منكم يارب


اييييييييه عشرين سنة فاتوا بحلوهم ومرهم
السنة اللي فاتت كانت أصعبهم كان فيها حاجات كتير قاسية أوي أوي منها الحادثة اللي عملتها ولولا عناية ربنا سبحانه وتعالى
كان زمانكم بتقرأوا على روحينا الفاتحة انا ومامتي ليا نصيب أوصل للواحد وعشرين :)


وبالرغم من أي حاجة الحمد لله خرجت من سنتي
العشرين وأنا أقوى قوة نفسويه داخليه وثقة بالنفس ورضا بقضاء الله سبحانه وتعالى وتحمل كامل المسؤليه عن قراراتي في الحياه
الحمد لله عملت حاجات جميله وحصلت حاجات جميلة جدا السنة دي
هقول شويه منها بالنسبة للتدوين :-
1- الصحفية الجميلة أسماء رمضان كتبت عن مدونتي في جريدة العالم اليوم وكمان عملت معايا حوار جميل بجد
وكفايه اني اتعرفت ب سومه بجد شخصية جميلة جدا
2- حضرت لقاء مدونين وكان رائع في المنصورة واتعرفت بمدونين رائعين وكمان قابلت أوشي وبجد هي في التدوين وبره التدوين جميله جدا وبنوتة تتحب بجد
3- اتعرفت بناس زي الفل من التدوين وبره التدوين ومن التدوين زي شيما الشعب ، مرمر على كوكب ، سومة اسماء احمد ، بسمة انور ، احساس طفله
اما بره التدوين
1- اخدت كورسات في التنمية البشريه ودي حاجه كنت بفكر فيها من فترة كبيرة وأخيرا حولتها لواقع وبجد الكورسات دي مفيدة جدا لحياتنا
2- تجاهلت موضوع اني لما اناقش دكتر في كليتنا واسأله في المواد اللي بندرسها يبقى ده معناه اني هشيل المادة ، في دكاترة كتير في الكلية نموذج راقي ومحترم جدا من الناس ورحبوا جدا بمناقشاتي وأفكاري وحتى أرائي عنهم ، مش كل الناس زي الضاكتور اللي ف بالي واللي قدري هيخليني اذاكر مادته لرابع وأخر مره ان شاء الله
3-صورت مع قناة النيل للتعليم العالي :) بس مسألتش عن معاد البرنامج هيتذاع امتى :)

وأخيرا بدأت في السنة الأولى بعد العشرين ، فرحانه أوي بال 21 وخلاص هقف عند السن ده أي حد هيسألني بعد كده عندك كام سنه هقلوا واحد وعشرين حتى لو بعد 10 سنين انا واحد وعشرين برضه مليش دعوة ، انا بستنى ابقى 21 من زماااااااان وانسى بقى كلمة قاصر الكلمة دي كانت بتنرفزني اوي وبتضايقني أوي

انا متفائله ان بإذن الله السنة دي هتبقى جميله مع اني بدأتها النهاردة وأنا متوعكه صحيا وعندي امتحان بكرة لسه مذاكرتوش
بس برضه متفائلة
الامتحان اللي فات تفائلت والحمد لله كان أحسن من أول امتحانين ان
شاء الله السنة دي أخد الليسانس وأحقق شوية احلام من أحلامي ان شاء الله

ع الهامش لكيكي وبس : السنة اللي فاتت نسيت عيد ميلادك بس افتكرته يوميها وللأسف كنتي تعبانه فمعرفتش أكلمك والنهاردة انتي نسيتي عيد ميلادي واحدة بواحدة :) وكده استريحت من عذاب الضمير اني نسيت عيد ميلادك

ع الهامش تاني : موبايلي معظم الأوقات مقفول أو سايلنت فمحدش من صبحاتي يضايق

الأحد، 24 يناير 2010

قلت أغير مود الامتحانات الخنيقة شوية والسيول والكوارث والبرد وكل الحاجات اللي بتضايق

بمناسبة السيول ياريت اي حد بيكلم موني الشريف يطمنني عليها علشان هي في اسوان وانا قلقانه جداااااا عليها

الفيديو اللي فوق ده أغنية الرقصة السلو اللي كانت في فرح ابن خالي يوميها لما روحنا من الفرح دخلت عالنت وعملتلها داون لود

الأغنية هادية ورمانسية جدا وجميلة بجد أنا بحبها أوي وان شاء الله لما تسمعوها هتحبوها انا محبتش اترجمها لأنها زي ما هي أحلى ما تكون مترجمة

ع الهامش : موضوع النقاب والمشاكل اللي كانت عليه خلصت الحمد لله من تاني امتحان اللي هو كان امبارح وكان نكد بمعنى الكلمة (نكد= نقد أدبي ) ومع ذلك اللجنة برضه كانت منيلة بنيله وفي بنوتات كتير جالهم اغماء اقربهم البنوتة اللي كانت في البنش اللي قدامي والضاكتور خريج كلية الزراعه مش الطب اللي في كليتنا معملهاش حاجة !

لو انا لوحدي كنت حاسة ان الامتحان صعب كنت هقول في حاجة غلط لكن الامتحان الحمد لله كان صعب علينا كلنا نكد فعلا يعني وكمان الكتكوتة عملتها معايا وحلفت مش هتوصلني الكلية ومرضيتش تدور

بس انا ان شاء الله متفائلة بإمتحان بكرة ان شاء الله مع انها مادة نفس ذات الدكتر اللي بيدرسلنا المادتين الاولنيين واللي امتحاناتهم كانت صعبة نوعا ما لكن بكرة ان شاء الله عندي احساس اني هحل كويس في ال classical drama متفائلة ويارب ظني يطلع في محله

اللي غايظني بقى ان مكاني في اللجنة السنة دي متغير عن ال3 سنين اللي فاتوا وكمان مكاني على طرف البنش ف المراقبين والدكاترة رايحين جايين بيبصوا في ورقة الاجابة بتاعتي عااااااا انا بكره الحركة دي جدا

الأربعاء، 20 يناير 2010

اغتصاب


بغض النظر عن ان الامتحان كان بشع النهاردة كان سؤالين اللي يعرفهم ينجح واللي يتلخبط يبقى بالسلامه يا حبيبي بالسلامه بس في حاجة تانية
الاغتصاب يعني ان حد ياخد حاجة من حد غصب عنه بس للأسف في مجتمعنا ارتبط الاغتصاب بمعنى الاغتصاب الجسدي بس زي ما معاني كتير اتغيرت وارتبطت بمعنى واحد بس زي مثلا
لما نقول الحب يبقى حب بين واحد وواحدة مش الحب بمعناه الشامل زي الحب الالهي وحب الخير وحب الوطن ....الخ
المهم انا عرفت قرار وزير التعليم اللي المفروض عالي انه هيمنع النقاب جوه اللجان ولازم اللي لابسة النقاب تكشف وجهها طول وقت الامتحان جوه لجان الامتحانات وقلت الكلام ده هيتطبق في القاهرة وعين شمس يعني الكليات اللي في القاهرة بس لكن اتفاجئت النهاردة ان القرار ده اتطبق في اللجنة في كليتنا اللي هي كلية اقليمية منفيه
ولجنة الامتحان كان كلها دوشة واعتراض اول نص ساعة من الامتحان وفي بنات لابسين النقاب جوه اللجان خرجوا
عجبني موقف المراقبة اللي على لجنتنا انها قالت للبنت حاولي متظهريش انك لابسة نقاب (وكأنها لابسة بكيني مش نقاب) علشان محدش يخليها تشيله ، لكن دكتور من الكلية جه وتقريبا امين الكلية في نفس الوقت وزعق للبنات اللي مش شايلين النقاب وقال لهم
(كل واحدة تكشف وشها ، انتي يا بت شيلي النقاب ده ) الهي يشيلوك انتا ويتزحلقوا وتقع وتتفشفش في يوم كله مطر ومش باين اوله من اخره ده غير ان المراقب اللي في اللجنة اللي قدامي كان عمال يزعق عالنقاب برضه
يعني بكل بجاحة كده ممكن مراقب عيني عينك يقول لبنت شيلي حجابك او شيلي الجاكت اللي انتي لابساه ده ؟ محدش يقوللي في فرق لأ مفيش فرق المبدأ هو نفس المبدأ
الموضوع ده ضايقني اوي انا مش لابسة النقاب بس احساس بشع ان واحدة تفرط في حاجة هي مقتنعة بيها
يعني ماشي هو مش فرض وفي اختلاف اراء عليه والبنات لابسينه فضل عايزين ياخدوا ثواب أكبر هما مقتنعين انهم كده صح او انهم حلوين اوي فممكن يعملوا فتنة بجمالهم هما احرار في وجهة نظرهم وفي لبسهم طالما مش بيأذوا حد
لو حصلت مشاكل كتير بسبب النقاب خلاص خلوا موظفة من الكلية تمر على المنتقبات وتشوف هما اللي في البطاقة فعلا ولا لأ او حتى عالبوابة لكن كده بجد الوضع مقرف
الله اعلم ايه اللي حصل علشان القرار ده يطلع بس القرار فعلا صعب
ومش فاهمه ايه اللي كاتبينه على اللجان من بره " تحقيقا لمبدأ تكافؤ الفرص النقاب اتمنع جوه لجان الامتحانات " مين تكافؤ الفرص دي هو احنا بنقدم على شغل ولا ايه ! انا مش فاهمه حاجة وبجد دمي محروق من الصبح
على فكرة فتشوا شنطنا واحنا طالعين ل لجنة الامتحانات الجديد ان واحد هو اللي بيفتش الشنط مش واحدة زي كل سنة
يارب اخد الليسانس قبل ما يمنعوا الحجاب جوه لجان الامتحانات ما هما بيقولوا انه طريقة للغش

الاثنين، 18 يناير 2010

لا شيرين ولا واحد وعشرين


الحج تي اس اليوت T.S Eliot كاتب ومفكر وشاعر وفيلسوف م الأخر مخلاش حاجة الا واشتغلها زي الداكتور اللي في الصورة الموضحة أعلاه :)
الحج اليوت بقى كاتب متشائم وعنده طاقة سلبية كفيلة بإنها تجيب اكتئاب وفسفس هستيري وطبعا الكلام ده متوفر من غير حاجة عند معظم الناس والحمد لله لأنهم بيبصوا لنص الكوباية الفاضي (نفسي اعرف فين الكوباية أصلا )
المهم اليوت مقرر ليه عندنا قصيدتين من اروع قصائد القرن العشرين هو صحيح متشائم بس كلامه يوزن دهب وهو يا ضنايا يا ابني كان متشائم علشان الحرب العالمية الاولى اخدت هنادي في الوبا وييييييييييين هنااااااااادي يا اماي ( الرقم الذي تطلبه مش هيرن لأن هنادي راحت في الوبا هذه رسالة مسجلة )
وكمان بيقول ان الانسان في القرن العشرين وفي الحياة الحديثة والمستقبل مش هيدمر نفسه بس لأ هيدمر الكون كله ( للأسف عنده حق)
عالعموم خير ان شاء الله خير انتوا عارفين ان اليوت اخرته كانت مصحة عقلية (معلومة مش متأكده منها بس قرأتها في كتاب ارز باللبن لشخصين لرحاب بسام ) بس كتاباته بتقول انه ذكي يا ذكي يا ذكي زيادة عن اللزوم
في مسجتين من امطار المسجات اللي عمالة تجيلي عجبوني وقلت اكتبهم بالمرة عن الانطحانات اللي هتبدأ بعد بكرة وانا برضه بكتب بوست جديد نياهاهاهاهاه (ضحكات شريرة متقطعة)
اول مسج
ذاكر وفك من الصياعة
لا تدعها تتوقف عندك
انشرها
طالب نشرها وجاب جج و2 إمتياز
وطالب تاني استهزأ بيها
شال السنة كلها (مش عارفة شالها ازاي وهي ثقيلة يعني؟)
تاني مسج من كيكي :
ترقبوا قريبا وحصريا على قناة محناش نافعين الفيلم المرعب
(الامتحانات) الحاصل على جايزة كله كلام فارغ لتعذيب الطلاب
نرجو لكم مشاهدة مفزعة
بالمناسبة اللذيذة دي ادعوكم انكم تبكوا معانا ليه بقى؟ علشان كنت بدردش مع
مرمر على كوكو مهجور و بعتتلي لينك موسيقى جميلة اوي
ومن موقعي هنا ولأني بعشق الكمنجات بس الرومانسية مش اللي بتعيط بدعوكم انكم تسمعو الكمنجه الزعلانه ومتأثره
وكمان بناءا على طلب مرمر ولأني بحب الموسيقى جدا فهقول المعلومات التالية اسم العازف مروان أنور هو عازف مصري موهوب مش بيعزف بس ع الكمان لكن كمان عنده مهارات رائعة ومتمكن من العزف على البيانو والعود والناي (يا بخته )
واللي هيسمع الموسيقى هيتضحله انها اغنية اه م الفراق اللي بتوجع قلبي بس الموسيقى فعلا روعه
نرجع للواقع (مش عارفة مين اللي كعبله ووقعه)
عندي امتحان شعر ودقن في العصر الحديث القرن 19 و20:) بعد كام ساعة مش هقول يومين بقى ما العد التنازلي بدأ خلاص
وعلى رأي خالتو يا فاشل يا فاشل :) ربنا ميجبش فشل ابدا ان شاء الله

السبت، 16 يناير 2010

راحة الأرواح




وسط زحمة الحياه والدوشة والدوامة اللي واخدانا كلنا

جرب تاخد دوش وتسترخي وتصفي ذهنك من كل الأفكار والهموم وتشعل البخور او اي معطر بتحبه والشموع العطرية الجميلة وتسمع القرآن الكريم

في ثانية هتلاقي نفسك هديت وروحك ارتاحت وهتسمع أيات كريمة من القرآن الكريم تطبطب على روحك وتدفي البرد اللي ماليك

قال سبحانه وتعالى "مَا يَفْتَحِ اللَّهُ لِلنَّاسِ مِن رَّحْمَةٍ فَلا مُمْسِكَ لَهَا وَمَا يُمْسِكْ فَلا مُرْسِلَ لَهُ مِن بَعْدِهِ وَهُوَ الْعَزِيزُ الْحَكِيمُ "يَا أَيُّهَا النَّاسُ اذْكُرُوا نِعْمَتَ اللَّهِ عَلَيْكُمْ هَلْ مِنْ خَالِقٍ غَيْرُ اللَّهِ يَرْزُقُكُم مِّنَ السَّمَاء وَالأَرْضِ لا إِلَهَ إِلاَّ هُوَ فَأَنَّى تُؤْفَكُونَ " الاية 2،3 من سورة فاطر

الأية الكريمة دي سمعتها من شوية وحسيت براحة فعلا يعني محدش من البشر هيقدر يمنع رحمة ربنا سبحانه وتعالى ولا رزقه عننا

طب ليه نخاف بقى؟ وليه نحزن؟ سبحان الله

"وَقَالُوا الْحَمْدُ لِلَّهِ الَّذِي أَذْهَبَ عَنَّا الْحَزَنَ إِنَّ رَبَّنَا لَغَفُورٌ شَكُورٌ" سورة فاطر الأية 34

ربنا يذهب عننا الحزن واليأس ويفتح قلوبنا لذكره ولحب الحياه والناس لأن الحياه تستحق انها تتحب برغم اي حاجة صعبة فيها ولأنها رحلة قصيرة اوي ومرحلة انتقالية لحياة أبدية ان شاء الله هتبقى كلها فرحه وحب

ربنا يرزقنا جنة الدنيا والأخرة

الخميس، 14 يناير 2010

ده انجليزي ده يا مرسي ؟

امبارح كنت عالفيس توك توك وشوفت شوية صور تضحك

علشان بس محدش يستهون بالانجليش ويقول على كليتنا كلية قاع وعن نفسي قدرت قيمة الbachelor of English Art

عقبال لما اخدها يارب بس انا ابطل استهبال واذاكر



وزي ما احنا شايفين ممنوع الخروج بالعربي بقت ممنوع ركن العربيات بالانجليزي (العلم نورن) :)

شارع عبد الله فكري بالعربي في الانجليزي بقى شارع عبد السلام زكي (اتحول ) :) (العلم نورن) :)


طب وليه هابي فلانتيم؟ ودي معناها ايه بقى؟ بتحطوا نفسكوا في مواقف باااااااااايخة ما كنت تكتب عيد حب سعيد وخلاص ولا احنا في لندن؟ (العلم نورن) :)

في المسفشتى

قسم الجراحة للحريم ومفيش مانع يكون قسم الجراحة للذكور برضه بس مخبيين وكاتبينها بالعنجليزي عشان تبقى مفاجعه

مشي حالك (العلم نورن ) :)

الاثنين، 11 يناير 2010

الحمد لله الفرحة صالحتني شوية


صدق اللي قال اللي تخاف وتكتئب منه ميجيش أحسن منه

امبارح كنت محبطة جدا ان عندنا امتحانين في نفس ذات اليوم ومكنش ليا نفس افتح كتاب خالص
المهم خلصت الsheets الحمد لله وقرأت شوية عن المادتين اللي كنت مطنشاهم وقررت ولأول مرة اني مش همتحن شفوي
وصحيت الصبح على اساس اني مش همتحن شفوي لبست براحتي وفتحت المدونة لقيتها زي ما هي مفيش جديد
واتصلت بزميلاتي زعقولي وقالولي لسه مجيتيش ليه دايما متأخرة بس انا مع مقولة ان تأتي متأخرا خيرا من أن لا تأتي

المهم من غير تفاصيل كتير دخلت المدرج ودورت على البنوتات زميلاتي (الجروب بتاعنا) ولقيتهم وبدأت أغير رأيي في اني أقول للدكتور مش عايزة امتحن أصل انا لو مكان دكتور أنور وطالب قاللي كلمة مش عايز امتحن دي هتستفزني وممكن ادي للطالب اللي قاللي كده صفر كبيييييييييييرة وبعدين هو بيدرسلنا مش مادة او اتنين دول تلااااته يعني لو شلتهم تبقى السنة كلها طارت
حلو ان الواحد يحط نفسه مكان الأشخاص اللي بيتعامل معاهم أحيانا

خليت داليا شرحتلي شوية حاجات في النقد أو اللي انا مسمياه نكد
وركزت على شخصية الناقد الفوق الفظيع ماثيو ارنولد وقولت مهما حصل مش هجاوب غير السؤال ده وخير وسيلة للدفاع الهجوم :)

قعدت اهزر مع داليا وباقي البنوتات وأقولهم فاكرين فيلم مورجان احمد مورجان لما كان بيمتحن شفوي
الدكتر قال له what is your name
فمورجان قال له : what?

فالدكتر قال له : what is your name

فمورجان قال له :yes yes yes Morgan

أهو انا دلوقتي لو الدكتور سألني عن اسمي هعمل زي مورجان

بعد شوية انتظار وانا على اعصابي لمبة من اللمبات الكبيرة في المدرج وقعت بس الحمد لله مفيش اصابات واسكتوا مش الحفر اللي اتكلمت عنها في الكلية رحت لقيتها كأنها مكنتش موجودة :) بجد حاجة غريبة

المهم بعدها بشوية الدكتر نده اسمي وسط جروب يعني الاحراج مش بيبقى خاص بيبقى عام ودي اكتر حاجة كانت مخوفاني اصل مش انا اللي اتحرج وسط زمايلي علشان سؤال هزولت وتنيلت وتبهدلت جدا
وأصلا من كتر الاسترس والاستبحس كنت باكل نص الكلام وانا بتكلم وأخيرا أخيرا جه دوري
والدكتر قال اسم بابا غلط فبكل أنفه وعزة نفس وثقة في النفس رديت ع الدكتر
وكإني واسيق في الفوز واسيق في الفوز :)
وقولتله اسم بابا صح اومال ايه من جوايا مرعوبة بس من بره هادية جدا وواثقة من نفسي جدا وبعدين الا اسم بابا التار ولا العار
وبعدين الدكتر نده زميل لينا اسمه أمير وسأله سؤال ماثيو ارنولد (السؤال اللي انا ناوية اجاوبه)
وأمير قال كلمتين وبس المهم الدكتر استنى شوية وبعدين قاللي yes
Can you answer >>>>>>>>> art>>>>>>>
انا : can we talk about Matthew Arnold?
الدكتر : this question about Mattew
انا : but I want to introduce him
الدكتر : ما شاء الله انتي بتختاري السؤال كمان
انا : ده سؤالي أصلا يا دكتر بس أمير جاوبه ( كان دوري في الامتحان ونده زميلنا يجاوب انا مالي؟ )
الدكتر : ضحك وقاللي بالانجليزي لكي ما تريدين جاوبي :)

وطبعا انا وقتها حسيت اني معرفش ماثيو ارنولد ده ولا عمري شفته عاااااااا بس الحمد لله اللي افتكرته قولته
وفجأه سكتت خلاص حسيت اني ناسية كل حاجة بجد

فالدكتر قاللي : مستواكي حلو ويجي منك بس نظرة عينيه بتقول كان ممكن تجاوبي احسن من كده

انا : يا دكتر اللي بيقعد هنا أساسا بينسى كل حاجة ( كنا كلنا اللي هنتسأل قاعدين على بنش وعلى حسب دورنا في كشف الأسماء بنتسأل ) فالبنات اللي جنبي كلهم في البنش قالولي ينصر دينك كلنا نفسنا نقول الكلمة دي والله عندك حق وابتسموا كلهم وبعدها الدكتر قاللي thank you

وعدى الامتحان على خير وامتحنت الحمد لله هييييييييييه ونفسوياتي في السما وفرحانه بجد
لسه بقى امتحانات الترم (التحريري) وربنا يسهل ان شاء الله خير

الأحد، 10 يناير 2010

وده اسمه ايه ؟!


عندكو امتحانات شفوي يوم السبت والأحد والاتنين
- التلت أيام ورى بعض فيهم امتحانات !
-- اذا كان عاجبكو
- طب وهتفرق ايه اذا كان في يومين او 3 بين كل امتحان ؟
-- انفلونزا الخنازير انتي مش خايفة منها ؟
- وهي انفلونزا الخنازير مش هتيجي الا ايام الامتحانات ! ما هي ممكن تيجي واحنا في المحاضرات او واحنا بنمتحن كل يوم ؟!
----------------------------------------
- 3 امتحانات ورى بعض؟
-- الحمد لله في كليات غيرنا بيمتحنوا مادتين في اليوم
- كويس انتوا احسن
تاني يوم امتحاننا اتأجل وبقى عندنا بكرة ان شاء الله امتحانين شفوي ورى بعض
الغريب بقى ان محدش قال لنا الامتحان هيبقى ازاي ولا أصلا هيبقى الساعة كام
والأغرب ان الكلية فيها حفر كتير اوي حافرين فيها حفر كتير ولازم علشان تدخل للمبنى اللي فيه المدرجات تنط
كان ايه اللي هيحصل لو اشتغلوا في الكلية في اجازة نص السنة ليه لما الكلية بتبقى كلية لازم يبوظوها كذا مرة دهانات ومرة حفر ومرة تجديد سور الكلية ، هو احنا مش من حقنا نتعلم في مكان مريح للروح والعين ولا ايه !
وعايزيين الجامعات المصرية تبقى في ترتيب الجامعات العالمية هيهات
وعلى رأي ثومة : وعايزنا نرجع زي زمان قول للزمان ارجع يا زمان

الجمعة، 8 يناير 2010

أيام الإنطحانات

أيام الانطحانات

النوم بيحلى ، الكمبيوتر بيحلى ، المدونة بتحلى ، التليفزيون بيحلى ، الشوكولاتة بتحلى ، الشيتوس بيحلى

القراءة في كل حاجة ما عدا كتب الكلية المؤكسدة بتحلى ، الخروج بيحلى ، السفر بيحلى ، وبالنسبة للبنوتات الميك اب بيحلى ، الموسيقى والأغاني بتحلى
وبالمناسبة البوم اليسا الجديد مش حلو الالبوم اللي قبله كان احلى بكتير

بيستحي اغنية هطلة بيتهيألي تليق ان مطرب يغنيها لحبيبته بس مش لايقه ان واحدة تغنيها لحبيبها

امري لربي اغنية كلماتها عاجباني لكن لحن وصوت :( لا تعليق

سلملي عليه تقليد باين اوي لأغنية سلملي عليه بتاعت فيروز بس الكبير كبير يا اليسيا

ما عاش ولا كان لذيذه

متعرفش ليه جميله بس بالنسبة لي كلماتها عادية علشان لسه محستش الاحساس ده مع حد

مصدومة غريبة

تصدق بمين وعيشة والسلام تحففففففففه

اليسا اتفزلكت كتير الالبوم ده ، هي مطربة استديو ممتازة لكن لايف بتنشز وصوتها مبيتسمعش ، يا ترى هتغني الالبوم ده ازاي لايف وهي اصلا بتنشز في الاغاني العادية !

، كمان عاجبني مطربة اسمها أمنية سليمان اغنيتها الاولانيه الحب بيجي في ثانية وأغنية مش هوه وبتحنلي

صوت يتسمع بجد لسه مسمعتهاش لايف بس شكلها بتغني بجد

وكمان في الامتحانات التهييس وقلة التركيز بيبقوا عاليين شوية ، النهاردة رحت لتالت مرة مع روفي للدكتور
والنهاردة مكنش خنيق واصلا مسألتوش عن حاجة بس ارتحت لما روفي الحمد لله بقت كويسة احسن من الأول بكتير الحمد لله – تقريبا انا خلفتها ونسيتها - وقعدنا سوى في الكتكوتة انا وروفي (روفان بس انا بدلعها)


ماما راحت تجيب لها الدوا وبتاعة كده الأطفال بيحطوها في بقهم فيبطلوا يعيطوا وفي الفترة اللي ماما راحت فيها الصيدلية روفي مبطلتش تعيط وفرجت عليا أمة لا اله الا الله وكل الناس بيبصولي على اني أم قاسية ومش بأكل بنتي يا جماعة والله مش انا مش اناااااااااااا انا مش مامتها واحدة من الواحدات بصتلي شذرا وكنت متوقعة انها تفتح باب الكتكوتة تضربني وتمشي علشان روفي بتعيط ، واحد تاني شخص كبير كنت بركن الكتكوتة فقاللي اهدي اهديييييييييي –كان بيزعق لي - قولتله حاضر مش عارفة ليه لغاية دلوقتي قولتله حاضر ولا عارفة ليه قاللي اهدي هو انا اللي كنت بعيط ولا روفي ؟ بس مع انه حرق دمي الا اني فعلا هديت لأني كنت متوترة جدا وروفي بتعيط وبصيت لروفي وقولتلها عارفة يا روفي كل ده هيتنسى انتي نفسك دلوقتي مش عارفة انا بعمل ايه علشانك مش عارفة انا خايفة عليكي اد ايه ومش عارفة انا بحبك اوي اد ايه مش عارفة حاجات كتير
يا ترى لما تكبري هتفتكريني الله اعلم ومسحت دموع روفي وتأكدت انها لسه مش بتشوف علشان لما ايدي جت جنب عنيها مرمشتش واخيرا ماما جت وانقذتني من بكاء روفي

وأخيرا في الامتحانات بيحلى الهروب وهو ده اللي انا بعمله دلوقتي وانا بكتب البوست :)

طبعا الكلام ده عن الطلاب العاديين اللي زي حلاتي ، الكلام ده مش للطلاب الدحاحين اطلاقا

ولكل الطلاب المطحونين بهديلهم الأغنية اللي بهدلتها :

ليلي نهاري بنااااااام يا حبيبي لا ملامة حبيبي واعمل ايه

ليلي نهاري مخنوقة يا حبيبي والكتاب عايزة ارميه

مش عايزة انا اشوفك قصادي (يا كتاب)

ياريت امتحانك امتحان عادي

قدامك حياتي دي اصعب حياااااااااااة


يوم الامتحان يصبح العقل بتنجان

الأربعاء، 6 يناير 2010

أخيرا عرفت السر



عمالة اسأل نفسوياتي هو في ايه؟ بجد ليه كده؟ هو كل ما يجي معاد امتحاناتي لازم أي حد يتعب وأروح معاه عند الضاكطور كل يوم أو يومين؟

اشراقة سابقا و روفان حاليا -البيبي بنت عمي بدأت مشوار المرمطة- تعبانة وانا معاها عند الضاكطور من كام يوم ونقدر نوصف الضاكطور في كلمتين رهيب والله رهيب وفرحان بنفسه وكاتب انه معاه ماستر من القصر العيني -يا عيني عليه يا عيني -

ده طبيب اطفال ازاي؟ ازاي بقى حد يفهمني !

مش عايز حد يسأله عن حاجة ومكشر وكشف ع البنوتة وكإنه ماسك عروسة لعبه بيفعص فيها بكل همجية وكأنها مش روح قدامه ، ولولا اني مش عايزة اعمل مشاكل كنت اتخانقت معاه بس احنا رايحين للضاكطور ده علشان عمو اللي قال لنا نروحله بس انا قررت بعد عمر طويل ان شاء الله مش هوديله ولادي
وقال ايه بيوجهلي كل الاسئلة عن روفان طيب هو سيادتك شوفت في ايدي دبلة مثلا ! هبقى مامتها ازاي هه حد يفهمني
كان المفروض يسأل مين مامة البيبي بدل ما يحرجني

المهم كل مرة بنروح العيادة بتعب جدا وبصدع وحالتي بتبقى حالة وببقى مضايقة وتعبانة وعايزة اناااااااااااااام وده مش وقت نوم خاااااااااااالص انا مش عارفة اذاكرلي كلمتين على بعض
حد رخم هيقوللي وبتكتبي ليه ما تذاكري هقوله يا عم الحج ويا عمة الحاجة الضغط بيولد الانفجار وانا قربت انفجر فبكتب لكي لا انفجر - رحماك يا ربي - والموضوع ده ليه تفسير علمي على حد علمي - يا سلام ع الجناس :)

التفسير العلمي اللي درسته في الH.R ان الإنسان المريض وتعبان بيحتاج طاقة كبيرة علشان يخف ويرجع تاني صحته كويسة وبياخد الطاقة دي منين يا حلوين؟ منين ؟ أيون مننا احنا الأصحاء فنبقى عاملين زي البطارية اللي بتفضى حبة بحبة ونبقى محتاجين نشحن بطاريات طاقتنا تاني والشاحن هو النوم وبرضه بيبقى شاحن بايظ :)

وانا ما شاء الله بدي طاقتي لأي حد محتاجها وأقعد محتاسة بعد كده أقول لله يا محسنين شوية طاقة لله
طاقة قليلة تمنع بلاوي كتيرة وهنيالك يا صاحب الطاقة والثواب :)

المهم ليه كل الدنيا بتفتكرني ايام امتحاناتي او ايام أكون فيها محتاجة للراحة وعايزة انام فعلا يعني من غير دوشة وليه بفتكر مقولة هاملت
ليه كل الأحداث جاية ضدي وانا ماشي في حتة والأرض بتلف في عكس اتجاهي

واخيرا اكتشفت السر العظييييم اسمي حبيبي يا نور عيني هو اللي مخلي حياتي ثرية ومخلي الناس تفتقدني وتسألني السؤال خالد الذكر : انتي فين يا بنتي ؟ ومعنى اسمي الألفة ، اليقين ، الملاطفة ، الطمأنينة

ان الناس تأنس بقربي والاسم يشير الي الشيء القريب للقلب والروح

إحساس بالشيء والناس

طيبة النفس محبوب قربها وحديثها :) فهو ده قدري ولما بكون اسم على مسمى وببطل انطواء بسعد نفسي قبل ما بسعد الناس اللي حواليا ، صحيح أخدت كام لسعة محترمين من ناس يا سبحان الله مظهرهم غير جوهرهم خااااااااالص بس ده ميمنعش ان الدنيا فيها ناس كتير راقيين ورائعين ومحترمين وطيبين
وموجودين في حياتي

واكتشفت كمان حاجة مهمة أوي اني بعامل ربنا سبحانه وتعالى مش بعامل البشر بمعنى اني بعمل خير ومش عارفة بعمله ليه ومش منتظرة ليه مقابل بس في وقت ما بعمله بقول يارب الخير اللي بعمله ده ملوش معنى غير اني بعمله ليك بجد لاحظتها كتير في حياتي وان بتجيلي فرص كتير اني ادوس على اي حد اذاني وجرحني في يوم من الأيام بس مبعملش كده مش معنى كده اني ملاك انا بتحمل كتير لكن لما بقفل من حد بتبقى قفلة سودا وبيبقى ملوش وجود ولا اعتبار بالنسبة لي
-------------------
ع الهامش ليك لواحدك : بحبك اد عمري قبل عمري بعد عمري ، حبي ليك فوق المشاعر والحدود
كل سنة وانت طيب وربنا يبارك في عمرك يا أغلى الحبايب

الجمعة، 1 يناير 2010

فرح ...

اولا : بعتذر اني مش عارفة ارد عالتعليقات بتاعت البوست اللي فات بس بجد شكرا على تعليقاتكم جميعا


برغم ان الكعب العالي بهدل البنوتات جميعا بلا استثناء وانا اولهم وفي اخر الفرح وبعد الزفة مكناش عارفين نمشي اساسا :) وبرغم اننا لبسنا فساتين السهرة في عز البرد عاااااااااا وبرغم حاجات تانيه كتير بس الفرح كان تحفففففففففه كان فرح خيالي وكنت حاسة اني أميرة من أميرات ديزني

محضرتش كتير للفرح لأني مش فاضية اساسا ومفيش وقت اني انزل اجيب فستان سهرة جديد وبالتالي عملنا نيولوك لفستاني اللي بيصوت بقاله كتير في الدولاب وبيقول اغثيوني حد يلبسني بقىىىىىىىىى طلعوني م الركنة اللي انا فيها

المهم رحت امبارح الكلية الصبح وتوالت المفاجأت اخر محاضرة وباقي المنهج مقرر علينا ده غير اللي منه لله اللي حط جدول الامتحانات
الاسبوع الجاي كله امتحانات شفوي وتسليم الشيتات ومناقشتها واللي بعده الامتحانات التحريري ويوم ورا يوم حبيبي :(all English all the time


نقلت الجدول وكل ما اقابل حد من زميلاتي مرسوم على ملامحنا ملامح الصدمة ورحت لماما قولتلها : مصدومة بجد ومش بنطق ومش عايزة ارد وكل اللي كنت عايزاه اني اعيط وقفلت اكتر ما انا مقفولة من الفرح


مكنش وقت افراح اطلااااااقا دلوقتي ورددت كلمتي المشهورة مش عايزة اروووووووح الفرح
كالعادة سافرنا وحسيت بهبوط في الطريق وبعدين وصلنا نمت شوية واتغدينا ولبسنا وجدة بنت خالتي دعتلي كام دعواية كتير وقالتلي اني زي القمر :) علشان عيونها حلوين بس


ووصلنا مع وصول العريس والعروسة لباب القاعة من بره ، لقيت كل الناس بتبصلي وانا داخلة كنت محرجة جدا وقعدت اقول في سري يا جماعه والله مش انا العروسة محدش يبصلي بقىىىىىىى

المهم ابن خالي عمل لفتة حلوة اوي وهو داخل القاعة ومندمج مع العروسة بصلي وابتسم وقاللي عقبالك وطول الفرح كان مهتم بيا وسلم عليا ولما رحت اسلم عليه في الكوشة ساب ايد عروسته وسلم عليا
برغم انه عارف اد ايه مراته بتغييييييييير مني كان في حد هنا في المدونة تقريبا شلاطة كان بيقوللي استمتعي بغيرتها وهو ده كان احساسي في الفرح كنت مستمتعة جدا جدا انها غيرانة مني :) نياهاهاهاها
وكمان رسالتها وصلتني واللي بتقول فيها يعني انا عاملة الفرح في عز امتحاناتك وبرضه جيتي
في بداية الفرح جت مروة بنت خالي وسلمت عليا وما شاء الله بقت خليفتي في الملاعب :) عاملة نفس الميك اب بتاعي برغم ان بقالنا كتير مشوفناش بعض بس حتى الوان فساتيننا كانت شبه بعض


ومرضيتش ترقص زيي مع انها اخت العريس ، المهم في اخر الفرح عملنا دايرة للبنوتات وخليتها ترقص وبعدما سلمت على مروة طنط مامة العريس قالتلنا نقف جنب الكوشة (على فكرة وانا بكتب عن مروة دلوقتي رنت عليا :)
وطول الفرح بسلم على طنطاتي المعزومين وبيقولولي عقبالك من غير شدي حيلك :) وجالي عريسين ماماتهم كلموا مامتي قدامي:) طول عمري بسمع ان الافراح بتجيب افراح بس اول مرة تحصل معايا


اول طنط منهم سلمت عليا وبصت في ايديا الاتنين وقالتلي اوعي تكوني مخطوبة قولتلها لأ يا طنط لسه بدري
قالتلي عريسك عندي دكتور وزي القمر واتكلمت كتير مع طنط وضحكنا سوى وقولتلها اني مش عايزة اتجوز في المنوفيه :) قالتلي محدش عارف نصيبه فين


وطنط تانيه زي القمر شبه كيكي صبحتي قالتلي ان شاء الله نحضر فرحك عن قريب قولتلها عن بعيد قالتلي لأ قريب ، يا طنط عن بعيد وطنط تقول عن قريب طب اقنعها انه عن بعيد ازاي :) مش عارفه

ابن خالي كان زي القمر في بدلة العريس والعروسة كمان كانت عسولة اوي برغم انها مش طايقاني بس بجد كانت أمورة
بجد فرحتله من كل قلبي اخيرا الباشمهندس هيستقر وهيكون أسرة وبيت وهشيل البيبي بتاعه
فرحت لفرحته وفرحت اني ضغطت الوقت وجيت حضرت الفرح لأن بجد الفرح امبارح عمل لي ري فريش كنت فرحانة اوي وطايرة اوي
ربنا يكتر افراحنا وافراح المسلمين يارب وعقبالنا كلنا

ع الهامش : عارف يا حبيبي في رقصة السلو وأغنية جنات اسمع كلامي وأغنية We're in heaven كنت حاسة انك معايا ومرضيتش أرقص سلو مع حد علشان مش هرقص سلو مع غيرك مش هطير غير معاك ومش هحب غيرك
وعارف كمان في أغنية بغيرعليها لتامر كنت حاسة انك بتغنيهالي ، ان شاء الله فرحنا يبقى أحلى فرح وقصة حبنا اللي هتتولد في النور تكمل قصص الحب الجميلة اللي أكيد ناقصها قصة