السبت، 22 أغسطس، 2009

رمضان جانا وفرحنا به






أولا : كل سنة وانتي طيوبة وبخير وبصحة وسعادة يا مرمر _ أميرة على كوكب مهجور_ و


happy birthday to U


ايوة يا عم يا بختك اول يوم رمضان هو يوم عيد ميلادك وتقريبا كده التورتة هتتبدل
وتبقى كنافة :) معلش اهو تغيير برضه ومتزعليش انا جبتلك التورتة اللي فوق دي
فمتسأليش بعد كده على البرنيطة او طقم الكاكاو :)




ثانيا : هيييييييييييييييه أخيرا رمضان هنا زي رمضان في مصر
أول يوم رمضان بكرة ان شاء الله وصلينا التراويح النهاردة يااااااه بجد كانت وحشاني
أوي ودعيتلكم طبعا طبعا وان شاء الله تفتكروني وتدعولي




ثالثا : يلا نعمل سباق ونشجع بعضينا على ختم القرأن ايه رأيكوا ؟؟ اللي موافق/ة
يشتركوا في السباق يرفعوا ايديهم نياهاهاهاها قصدي يكتبوا انهم موافقين وانهم كل يوم
سبت يقولوا وصلوا للجزء الكام في قراءة القرأن الكريم


رابعا : ولا حاجه سلامتكم :)



دمتم بكل خير وفرحة وود ورمضان كريم

الخميس، 20 أغسطس، 2009

منوعات ورمضان كريم


أولا كل سنة وانتوا طيبين وبخير وفي أحسن حال بمناسبة شهر رمضان طبعا

ثانيا : بعتذر اني مش عارفة اعلق في معظم المدونات مع اني متابعاهم وده لأن النت عندنا بيهيس أحلى تهييس فغالبا بدخل النت من الموبايل
ندخل بقى في البوست

*******************************
وصل عدد المصابين بالاتش ون ان ون في سلطنة عمان لحوالي 700 وده المعلن وطالما اعلنوا عن الرقم ده يبقى عدد المصابين أكتر من كده بكتير وفي حالة هلع عند معظم الناس
وفي الهايبر ماركت النهاردة معظم الناس لابسين كمامات والمضحك ان بعض المصريين بيلبسوا الكمامه بطريقة غريبة بيحطوها على الفم ويسيبوا الأنف من غير كمامه لازم اللي يشوفهم يقول عليهم انهم بيختلفوا عن الأخرين خاالص
بصراحه منظر الناس وهما لابسين الكمامات النهارده حسسني اننا في اوضة عمليات
ربنا يستر بقى أمانه عليكو لو ودعت ابقوا اقرؤا على روحي الفاتحه - اي خدعه يا شيما مش مصر بس اللي فيها فيروسات-
---------------------------
طبعا مش ممكن انسى اخبار دمياط اللي كل شوية اشوفها في العاشرة مساءا وأخر خبر ان الدمايطه عرفوا يرجعوا الصيادين والسفن بتاعتهم من القراصنة الصوماليين بالرغم اني اسمع ان الصوماليين دول غلابة يعني بس ما علينا المهم ان الصيادين في طريقهم لمصر
وسمعني أحلى سلام للدمايطة اللي انا منهم طبعا ورجالة وطول عمرك يا بلادي رجالة رجالة
-------------------------------
كنت قاعدة جنب ماما على كنبتنا الجميلة اللي اسمها love seat والكنبة دي صغنونة ومعمولة علشان شخصين بس فقولت لماما وكنت بتكلم بواقعيه جدا وكإني فعلا مخطوبة
انا : للأسف يا ماما مش هينفع أقعد عالكنبة الرومانسية دي جنب خطيبي
ماما : خطيب مين ده اللي تقعدي جنبه انا هبقى قاعده معاكو
انا : طيب وانا قولت حاجه تنورينا يا مامتي والله مفيش مشاكل
ماما : لأ وايه يقوللي لو سمحتي يا طنط عايز قهوة مضبوطة من ايدك هقولو يا سلام بس كده أحلى قهوة مضبوطة ليدي تعملهالك
انا : لااااا قهوة مين متفقناش على كده مشيها فيسفاسيه او كبشتينو
ماما : اهي القهوة موجودة والنيسكافيه والكابتشينو موجودين بس العريس مش موجود
انا : هههههههههه ليه الاحباط ده يا اوختشي وعالعموم انا مش مستعجله يجي براحته يمكن مش لاقي مواصلات أو الطريق زحمه :)
----------------------------------
كنا في الهايبر ماركت وحصل موقف خنقني وحرق دمي بصراحة
بابا قابل واحد صاحبه وأسرته وفي العادي بابا بيسلم على أصحابه ومش بنتعرف عليهم لكن لقيت بابا ندهلي انا وماما وسلمنا على طنط وبابا وصاحبه قدموني لإبنه وقدموا ابنه ليا
بابا : بنتي ليدي
صاحب بابا : ابني عمرو
وانا اللي حصل اللي وقتها اني مقدرتش مضحكش حسيت اني بدبس وبيثبتوني بالحركة دي علشان عارفين اني هرفض اني أقعد مع العريس ومامته في جلسة تعارف فقالوا نعمل الموضوع كإنه صدفه ومستنتش كتير واخدت ماما ومشينا واتخنقت وكان نفسي اروح عالبيت ومن كتر خنقتي رحت جنب ماما وقولتلها أغنيه اهي قلبت بغم شكلنا كده بقى .... ولسه مكملتش فماما ضحكت قولتلها عاجبك التدبيسة دي انا غلطانه اني شيلت الدبلة من ايدي
وطبعا اول لما شيلت الدبلة من ايدي ماما تنفست الصعداء وخبت الدبلة علشان ملبسهاش تاني عااااااااااا
--------------------------------------
نفس الناس اللي قابلناهم في الهايبر عايزينني أدرس انجليش لأولاد أخت العريس وبالتالي نتكلم ونتعرف على بعض اعتقد انها حركة مكشوفة أوي وبعدين انجليش ايه اللي هدرسه في رمضان ده على اساس اني فاضية يعني ولا ايه؟ يارب اعرف أخرج من الموضوع ده على خير انا مليش نفس اشرح انجليش اصلا وخصوصا في رمضان اللي وقته بيخلص في ثانيه وبعدين بحس ان اكتر ناس بيتم استغلالهم هما الأطباء ومهندسين الكمبيوتر ومدرسين الانجليش والرياضيات وبعدهم مدرسين باقي المواد
طب لو كنت دخلت اعلام يا ترى كنت هشرح للأطفال الحلوين ايه ؟
----------------------------------------
50 مسلسل جايين رمضان السنة دي ان شاء الله
وليه الهبل ده مش عارفة واشمعنا في رمضان بالذات كل كمية المسلسلات دي برضه مش عارفه بس الأكيد اني حابة اتفرج على مسلسل ليلى مراد ومسلسل الأدهم بطولة احمد عز وطالما أحمد عز في مسلسل فأكيد بابا مش هيخليني اشوفه :( ليه معرفش أكيد الاجابة في بطن الزير وعلى رأي ابن حميدو فين بطن الزير دي :)
-------------------------------
نتكلم شوية بقى عن رمضان اللي احتمال كبير يبقى يوم السبت ان شاء الله اما بالنوسبة لهنا ف احتمال كبير يبقى يوم الأحد :) ليه ؟؟ برضه الاجابة في بطن الزير
وعن الحاجات اللي ان شاء الله ناوية اعملها في رمضان ففي فكرة عجبتني أوي شوفتها في بلوج من البلوجات السنة اللي فاتت وهي كتابة قائمة بالأحلام اللي نفسنا تتحقق ونكتبها في ورقة وندعي ان الأحلام دي والحاجات اللي نفسنا فيها دي تتحق حتى لو كنا شايفينها مستحيلة فمفيش مستحيل على ربنا سبحانه وتعالى وندعي بالحاجات دي كل يوم من أيام شهر رمضان واحنا صايمين وفي صلاة التروايح
وعلى فكرة في ناس عارفين نفسيهم دعيتلهم رمضان اللي فات كتير جدا في صلاة التراويح فياريت مننساش ندعي لبعض
وكمان أحب أقولكو معلومات جميلة أوي عن شهر رمضان ان السنة فيه بثواب فرض وان لو حد صلى صلاة في ليلة من ليالي رمضان فبيكون ثوابه ان ربنا سبحانه وتعالى بيكتبله بكل ركعة ألف وخمسائة حسنة وبيبني له بيتا من ياقوتة حمراء في الجنة ليها سبعين ألف باب وكمان مننساش ان ثواب الصيام على ربنا سبحانه وتعالى وكمان اللي بيصوم رمضان وبيصبر فيه بيخرج من ذنوبه وكإنه لسه مولود معملش ولا ذنب وكمان في باب من أبواب الجنة اسمه باب الريان بيدخل منه الصائمون


كل سنة وانتوا طيبين وبخير مرة تانية ورمضان كريم وربنا يبلغنا رمضان

الاثنين، 17 أغسطس، 2009

جربت ؟؟!

النهاردة كنت بسمع نجوم اف ام وجت أغنية لنادر نور اسمها جربت في الأول مكنتش مركزة مع الكلمات بس لفت انتباهي كلام الأغنية من اول

محتاج أقولك كلمتين ... وبجد بعديهم همشي
واعذرني يعني عشان يمكن تسمعني بس ماتفهمشي
أصل الكلام ده فيه حاجات تتحس بس ما تتقالشي

فروحت قعدت ع الكنبه علشان اسمع باقي الأغنية بتركيز بالمناسبة الكنبه اسمها Love Seat
معلومة جديده عن كنبتنا أي خدعه :)


المهم سمعت باقي الأغنية ولقيتها بجد تحفففففه وتكرم عليا النت الخنيق وعرفت اعمل داون لود للأغنية واسمعها كذا مرة وللأسف كلماتها واقعية جدا

وخصوصا :

جربت لما يكون حزين تبقى أنتا مش قادر تنام ؟
وان حد قال انه اتجرح تلقى الدموع سابقه الكلام ؟
هو يادوب يقول ال أه وانتا اللي بتحس الألام


والمشكلة لو حاسس بالمشاعر دي نحية حد وهو مش حاسس بكل ده
او ممكن يبقى حاسس ومطنش وبرضه بيجرح فيك

رأيي المتواضع ان لما حد يحب كل الحب ده ويبقى حب من طرف واحد يبقى احسن حاجه يبعد ويحاول ينسى والأيام هتداوي جراحه زي ما اول كوبليه في الأغنية بيقول :

أرجوك كفايه ومتقولهاش انا همشي وابعد من نفسي

وفي اخر الأغنية بعد كل العذاب اللي الحبيب حس بيه وشافه بيقول لحبيبه الخنيق

جرب آلامي وابقى قول هتحس ايه لما تعيشها

لحظة بقى يعني اللي محسش بكل الحاجات اللي في الأغنيه هيحس ازاي بكل الآلام دي ؟؟؟؟؟
--------------------------------
كلام على جنب : نصيحة صغنونة محدش يفكر يقرأ رواية غادة الكاميليا أو اي رواية كئيبة ومؤلمه وقاسيه زيها علشان هيجيله اكتئاب فورا وهيشوف الدنيا من غير الوان حتى من غير الأسود والأبيض

السبت، 15 أغسطس، 2009

قصاصات 2

صباح أو مساء الخير

قاعدة في امان الله بسمع أغنية رومانتيكيه جميلة جدا وسرحانه معاها واذ فجأتن موبايلي يرن
وتليفوني رن اه اه تررن تررن واللي رنت أه يا عيييييييني صوتها أحن مش عارفه ليه صوت الموبايل بقى يفزعني المهم اللي كانت بترن خالتو حبيبتي طلعتني من مود الأغنية والرومانسية اللي كنت فيها على صوت جنات مين بيعيش وفطست من الضحك لما الرنة كانت بتقول ليه ده زمان كان اللي يشوفنا يحلف بحياتنا وان احنا لبعض :)

____________________________________

ااااااااه يا وحشة يا تاعبه كل الناس وهو واحد م الناس اللي دابوا فيكي تقريبا تيمو بيغني للإنفلونزا

____________________________________

بمناسبة الفيروسات
ظهر في صلالة انفلونزا الاتش ون ان ون ولغاية دلوقتي اكتر من عشر حالات ولذالك ممنوع علينا زيارة اي مكان فيه زحمه عاااا
وظهر في الكمبيوتر وفي موبايلي فيروسات برضه ولذالك موبايلي ولا بيرسل مسجات ولا بيستهبل

--------------------------------------------------

هكذا احتمل العمر نعيما وعذابا
الله عليكي يا ثومة والله ع اللي كتب ولحن أغنية أغدا ألقاك بجد اغنية جميلة جدا
زمان كنت بترييق على كلماتها لكن دلوقتي عرفت انها اغنية جميلة

--------------------------------------------------

ساعات بتحصل حاجات في حياتنا بتخلينا نقول يارب الزمن يقف ياااااارب الزمن يقف
لكن الزمن مش بيقف اول لما بيلاقي تاكسي بيمشي على طووووول :)

---------------------------------------------------

مسمعتش الألبوم الأخير كله لعمرو دياب بس عجبني الكام أغنية اللي سمعتهم بس اللي مش عاجبني بجد استايل عمرو دياب الجديد
بجد مستفزززز ومش لايق عليه وكمان كليبات أغانيه دايما بيكون لوحده وحواليه موديلز كتير بيرقصوا وده لاحظت انه بقى اسلوب لكليبات عمرو من أول ولا على باله لغاية وياه وف وياه كمان جاب ابنه يغني معاه ووراه بنوتات أطفال بيرقصوا !!

-------------------------------------------------

على أخر الزمن بقرأ أدب فرنسي هو صحيح مترجم للغة العربية لكن أهو بقرأ في حاجه ليها علاقة بفرنسا
الكاتب فرنسي اسمه الكسندر دوما الإبن وروايته اسمها غادة الكاميليا ، الرواية دي مشهورة وقرأت قبل كده مذكرات مارجريت في كتاب اسمه العبرات للمنفلوطي وفعلا الكتاب اسم على مسمى لأن مذكرات مارجريت تقطع القلب ومكنتش اعرف ان المذكرات دي من رواية غادة الكاميليا
الرواية جميلة جدا وكئيبة جدا ورومانسية شوية بس تشجع على تكملتها للأخر مع اني عارفة نهاية الرواية
تقريبا الرواية فيها شبه من فيلم مولان روج شوية

-----------------------------------------------

لسه شايفه ايميلي دلوقتي ولقيت زميلتي في الكليه بعتالي اوف لاين مسج بتقوللي ان خطوبة نورا بنوتة من الجروب بتاعنا في الكلية بكرة ان شاء الله
بجد فرحت جدا جدا وزعلت جدا اني مش هعرف احضر عااااااااااااااا عااااااااااااااا

السبت، 8 أغسطس، 2009

الصدق منجه والكذب مش فراوله نياهاهاهاها


ملحوظة صغنونة البنوتة البيبي اللي في الصورة دي صاحبتي ومعايا صورتها في موبايلي وايميلي من وانا في ثانويه عاميه ولسه مكبرتش لغاية دلوقتي زي صاحبتها اللي هي انا نياهاهاهاها


جالي سؤال عشرتاشر مرة من البنوتات العسولين والرقيقين والأمورين انوسة عاشقة الأفراح مش الأحزان نياهاهاها وشيما اللي شكمانا كلنا وديالا دودو بنت بلدي والطفلة زي حلاتي احساس طفلة واقعية ورومانسية ومع اني مش عارفه مين اللي هيهتم يعرف أصدق عشر حاجات في حياتي بس يلا هجاوب وامري لله لأني حاسة اني عاملة زي البيبي اللي في كي جي 1 ومعملش الواجب

أصدق 10 حاجات في حياتي

اولا : أصدق حقيقة في حياتي كلها ربنا سبحانه وتعالى اللي خلقني وخلق كل شيء الرحمن والرحيم واللطيف والخبير ومن له الأسماء الحسنى

ثانيا : اني مسلمة وعلشان كده لازم التزم بحاجات كتير احيانا بتكون ضد هوى نفسي وبحاول بقدر الإمكان ابقى ظاهري زي باطني يعني مش محجبة شكلا وبس وافعالا واخلاقا لأ فأنا بحاول بقدر الامكان اكون مسلمة بجد واستاهل الاسم ده واكيد مقصرة مهما عملت بس بحاول ويكفيني شرف المحاولة


ثالثا : بابايا حبيبي اعظم واحن واجمل اب في الحياة ، لما بيكون راضي عني ببقى في قمة السعادة ولما بيتعصب عليا ببقى في قمة الكأبه
وبدأت اهدي شوية من عصبيتي واحط اعصابي في فريزر لما فهمت معنى ان عصبية بابا مش ممكن تتقارن بحنيته علشان كده يتعصب براحته :) ربنا يباركلي في عمره ويحفظه من كل شر

رابعا: مامتي حبيبتي وانتيمتي واختي مهما اتكلمت عنها مش هوفيها حقها و زي دايما ما بقولها ميتحكيش عليها زي الملايكه اما تشوفها وردايه تحلم تقطفها
ماما بالنسبة لي كل حاجه واكتر انسانة اخدت طاقة سلبيه مني واكتر انسانة ضحت علشاني واكتر انسانة قوتني في لحظات انكساري وضعفي وحزني وصبرت عليا واكتر انسانة حبها مش مشروط والحمد لله انها مامتي لان لو ام غيرها كانت رمتني من البلكونة او من فوق هرم خوفو الأكبر بس الحمد لله مامتي مش شوريرة مع اني بعلي لها الضغط كتييييييير ربنا يستر بقى ويباركلي في عمرها ويحفظها

خامسا : حبيبي معايا في كل لحظة من لحظات حياتي وروحي مقسومة اتنين نصها معايا والنص التاني معاه علشان تراعيه وتطمن عليه وتحسسه ان في انسانة بتحبه وكان نفسها تعرفه من اول ثانيه في حياتها
حاسة اني معاه وشايفاه وحساه وسامعه همساته ومش شايفة غيره رغم كل اللي شوفتهم في حياتي وحاولوا يقربوا مني او اتقدمولي الا انه مالك قلبي وروحي وبستناه وهفضل استناه طول عمري ويارب يكون بيحبني نص حبي ليه لأن حبي هيكون أقوى دايما لأنه أقوى من اي حب ودايما بيقولولي اني عايشه في وهم بس الوهم ده أصدق واقع أنا عايشاه ومفيش حاجه بعيدة على ربنا

سادسا : كرامتي أغلى من حياتي ولو هموت مش بسمح ولا هسمح لحد يقرب منها وخسرت حاجات كتير في حياتي بسببها زي درجات عالية في المدرسة و تقديرات في الكلية وصديقات راحوا في الوبا بس كل الحاجات اللي خسرتها مكسب قدام خسارتي لكرامتي لأن كل حاجه ممكن تتعوض الا الكرامة

سابعا : أحلامي الحمد لله احلامي صادقة جدا ومن صدقها في كتير اتحقق منها وعقبال الباقي ان شاء الله

ثامنا : الحياة والموت بيظهر فيهم الصدق ده غير انهم اصدق حاجه بتحصل للإنسان في حياته ومع اني مقتنعه بالموضوع ده جدا الا اني فقدت توازني بطريقة بشعه لما عرفت بوفاة جدو الله يرحمه مع اني مكنتش كده يوم وفاة جدتي الله يرحمها بالعكس كنت صابرة جدا وقوية جدا وكنت بواسي ماما لكن مش عارفة ايه اللي حصل لما عرفت وفاة جدو
تقريبا كده البنات كل ما بيكبروا بيتهطلوا
ربنا يرحم كل موتانا وموتى المسلمين ويرزقنا حسن الخاتمة

تاسعا : مشاعري أصدق حاجه في حياتي ومستحيل أأقدر اخبيها بتظهر عليا في نظراتي وملامحي ونبرة صوتي
لما بحب ، بحب بكل ذرة في كياني ولما بكره برضه بكره بكل ذرة في كياني وماما قالتلي انتي لما بتكرهي بتبقي صعبة أوي !
وعلشان كده بفكر مليون مرة قبل ما أكره حد لاني لو كرهت مستحيل احب تاني ابدا
ربنا يستر ومكرهش حد بحبه ولا حد يكرهني

عاشرا : الحاجات الصغنونة اللي بتحصل في حياتي وبتفرحني ولأنها بتبقى مش مقصودة ومش متوقعة فبتبقى صادقة جدا وبفرح بيها جدا
زي مثلا لو حضرت محاضرة حلوة ولو خلصت قراءة كتاب ممتع ولما بنقعد نضحك ونغني انا وزميلاتي في الكليه
وافتكرت موقف دلوقتي كان ليلة امتحان العربي وهدى البيبي بنت عمي كانت بتعيط وزعلانه جدا ومسكتتش غير لما اخدتها في حضني ولاعبتها وعلشان كان عندي امتحان تاني يوم فكنت شايلاها وبذاكر لها أدب عربي جاهلي نياهاهاهاها ويا عيني مستحملتش كلمتين وراحت في سااااابع نومه نياهاهاهاها وقتها كان عندها 3 شهور

وحاجات تانية كتييييييييييير صغنونة بتبقى صادقة وبتفرحني


ودلوقتي حان وقت التدبيس لازم ادبس حد في السؤال ده اشمعنى انا اتدبست فيه يعني

كتكوتتي اللي بتزعل بسرعه واللي منفضه لمدونتها ومش بتكتب جديد فيها

ودودو دعاء بنت بلدي العسولة

وصبحتي وبنت بلدي برضه أميرة على كوكب مهجور

والبنوتة العسولة رنا رنون

ولحبيبتي اللي رجعت تاني بعد غياب ساعات ساعات

وللدكتورة بتاعتنا اللي بتحب الهدوء شباك موارب منار

ولديدي حبيبتي اللي قالتلي هتعمل مدونة ونفضت وانا مليش دعوة لو سمحتي يا ديدي اعملي مدونة بقىىىىىىىىىى عالأقل علشان أقدر اتطمن عليكي

ولصحبتي الجديدة أيوية

وللبنوتة الرقيقة صمت الحنين

وللبنوتة الرومانسية زهرة الحب


وللبنوتة الجميلة والدكتورة اللي مش هتدينا حقن :)
dr.w.krm


ول صانع السعادة محمد غالية

و ل جحا المصري



الخميس، 6 أغسطس، 2009

معرفة البنوتات كنوز


النهاردة اتعرفت على بنوتة جميلة جدا وعسولة جدا ومرحة جدا وقلبها طيب وابيض جدا احسبها كذالك ولا ازكي على الله احدا وهي مدونة ومدونتها اسمها أميرة على كوكب مهجور وهي اسم على مسمى

دردشنا سوى عالايميل وكل ما كنا بنتكلم كنا بنلاقي مفاجئات بتحصل اول المفاجئات ان انا وهي طلعنا من نفس ذات المكان
سألتني في الاول انتي منين وقولتلها اني م البلد دي نياهاهاهاها قالتلي وانا كمان م البلد دي قولتلها نبقى جيران بقى :) قالتلي بس انا من الاقاليم قولتلها وانا كمان ناقص تقوليلي انك من دمياط كمان ههههههه ومكنتش مصدقه اني دمياطيه ومرمر كمان طلعت دمياطيه واستغربت واتصدمت يا عيني من المفاجئات دي
الدنيا صغيره ومش بس كده كمان كنا في اعدادي في نفس ذات المدرسة وكمان كانت زميلتي في الكليه اللي انا لسه بدرس فيها مع الاسف :) يا محاسن الصدف

ومش كده وبس كمان بتحب الموسيقى وخصوصا موسيقى عمر خيرت وبتحب القراءة والكتابة يعني تقريبا كل حاجه بنحبها سوى وزي بعضينا بجد سعيدة جدا جدا اني عرفت بنوتة زيها في الحياة البوهيميه اللي احنا فيها دي ههههههههههه ومتسألونيش يعني ايه حياه بوهيميه (وش بيطلع لسانه)



يارب تبقى معرفة خير يا مرمر وخصوصا اننا في ليلة النصف من شعبان كل سنة وانتوا طيبين
وانا سعيدة جدا اني اتعرفت عليكي يا قمرايا ومعلش بقى النت رحب بيكي احلى ترحيب نياهاهاهاها

بجد معرفة البنوتات كنوز مش معرفة الرجال كنوز:)


الثلاثاء، 4 أغسطس، 2009

بحبك اوي .. وحشتني اوي


شهر رمضان حبيبي بستناه من السنه للسنه

الشهر الوحيد اللي بحس فيه بأمان وببقى طايره مع الملايكه وليه لأ ما احنا بنصوم طول النهار ومش بناكل ولا بنشرب زي الملايكه يبقى ملايكه ولا مش ملايكه :)

الشهر اللي بستناه بكل شوق وحب هو صحيح مبقاش فيه اللمه الحلوه بتاعت العيله بتاعت زمان لما كانت ماما ستو وجدو عايشين الله يرحمهم بس لسه فيه حاجات حلوه

لما انا وصبحاتي بنبعت لبعض مسجات نشوف رمضان بكره ولا لأ

لما بنخرج الصبح نشتري الحاجات اللي هنعملها عالفطار

لما بقف في المطبخ مع ماما وبعمل اكلات جديده رمضان اللي فات عملت رز مكسيكي وكان طعمه تحفه

لما كل شويه بروح واجي قدام التليفزيون عايزة اشوف الأذان والأدعيه اللي قبله

لما بشم ريحة البخور اللي بتملاني بالدفا والحب قبل الفطار

لما بدعي ربنا سبحانه وتعالى بكل اللي نفسي فيه قبل الفطار

لما بسمع الأذان من كذا مسجد

لما بسبق ماما وبابا قبل ما يفطروا واديلهم تمرايه علشان ابقى فطرت صائم :) او عالاقل اول حاجه يفطروا عليها بعد الصيام تبقى من ايدي علشان كده بقول فطرت صائم

لما بلبس اسدال الصلاة الجديد

لما بروح المسجد وبلاقيه ما شاء الله مليان
صحيح في بنوتات بيبقوا مأفورين في الميك اب والبيرفيوم وهما جايين يصلوا بس اللي يشوف كل الناس دي في المسجد بيحس بمشاعر جميله اوي

لما بشوف ماما وهي بتصلي في أوضتها لأن ماما بتحب تصلي في البيت بحب اشوفها اوي وهي بتصلي بس من بعيد علشان ملخبطهاش في صلاتها بتبقى ما شاء الله جميله اوي واعتقد كلمة جميله قليله عليها ربنا يعينها في صلاتها يارب


لما بحس وانا في المصلى في الاستراحه بين التراويح ان حبيبي معايا وان شاء الله هصلي وراه في يوم من الأيام وان شاء الله كمان هنروح المسجد ونصلي التروايح سوى في يوم من الأيام

لما بتيجي على بالي المدونة وانا في صلاة التراويح او بتيجي صورته في خيالي وبدعي لكل اللي بيحبوني وبيزوروا مدونتي وبدعيله حتى لو هو مش بيدعيلي و حتى لو هو ميعرفش اني بحبه اصلا

لما بنتسحر وبفضل ارخم على ماما وبابا واقولهم عايزة ااخر السحوووووور ويقولولي الساعه واحده هتأخريه اكتر من كده ايه واقولهم هأخره قبل الاذان بربع ساعه مثلا :)

لما بسهر لوحدي وبقرأ القرأن ولما بنتسابق مين هيختم القرأن الأول ودايما انا بكون اخر واحده عاااااااا

لما بتفرج على شويه من المسلسلات اللي بتتعرض في رمضان

والحمد لله الحمد لله الكليه السنه دي بعد العيد انا مرة حضرت رمضان وانا في الكليه كنت هتشل بصراحه من عمايل الزملاء الافاضل بيدخنواااااا في نهار رمضان ولما سألت ولاد عمي في الموضوع ده افتوا ان السجاير مش بتفطر علشان مش بتدخل المعده ياااااااااااسلااااااااااام ونعم المنطق المنيل السجاير دي اساسا معصيه واحنا ممنوعين من الاكل والشرب اللي هو حلال في نهار رمضان يبقى ايه حكم المعصيبه بقى
ولا واحنا خارجين في يوم في نهار رمضان من الكليه واسمع صوت جهوري من واحد المفروض زميلنا وبيدخن برضه بيقول لواحد صحبه يا عم روح ظبط البت فلانه ربنا يهديهم

تعالى بقى يا رمضان بجد وحشتني جداااااااااااااا وان شاء الله ناويه ادعي ربنا سبحانه وتعالى دعوات كتيييييييير لما تيجي

يا ترى ناويين تعملوا ايه في رمضان السنه دي ؟

السبت، 1 أغسطس، 2009

البقاء لله


اولا بعتذر ل د. ستيتة واحساس طفلة على انهم قرأوا البوست اللي كتبته امبارح انا كنت بكتبه وانا منهاره وبجد أسفة انكوا قرأتوا كل الألم والحزن اللي كان في البوست اللي فات وعلشان كده حذفته

ثانيا : البقاء لله وربنا يرحمك يا جدي والله فراقك واجعلي قلبي اوي ومش متخيلة اني مش هشوفك ومش هتكلم معاك تاني لكن مش بإيدي غير اني أصبر وافتكرك بالخير وافتكر ذكرياتي معاك وانك هديتني بأحن واعظم اب في الحياه واللي بدل ما اخفف عنه وأواسيه هو اللي خفف عني وواساني وربنا يجزيه كل الخير على صبره يارب و يباركلي في عمره هو ومامتي
بجد انا كنت طفله اوي الكام يوم اللي فاتو وبدل ما اكون سبب في تخفيف حزن فراق جدي عن بابا وماما اعتقد اني زودت حزنهم بس والله كان غصب عني


ثالثا : دعاء لجدي ولموتانا ولكل موتى المسلمين

اللهم ابدله دارا خيرا من داره واهلا خيرا من اهله وادخله الجنة واعذه من عذاب القبر ومن عذاب النار .اللـهـم عاملة بما انت اهله ولا تعامله بما هو اهله .اللـهـم اجزه عن الاحسان إحسانا وعن الإساءة عفواً وغفراناً. اللـهـم إن كان محسناً فزد من حسناته , وإن كان مسيئاً فتجاوز عن سيئاته .اللـهـم ادخله الجنة من غير مناقشة حساب ولا سابقة عذاب .اللـهـم اّنسه في وحدته وفي وحشته وفي غربته. اللـهـم انزله منزلاً مباركا وانت خير المنزلين .اللـهـم انزله منازل الصديقين والشهداء والصالحين وحسن اولئك رفيقا .اللـهـم اجعل قبره روضة من رياض الجنة ,ولا تجعله حفرة من حفر النار .اللـهـم افسح له في قبره مد بصره وافرش قبره من فراش الجنة .اللـهـم اعذه من عذاب القبر .اللـهـم املأ قبره بالرضا والنور والفسحة والسرور. اللـهـم إنه فى ذمتك وحبل جوارك فقه فتنة القبر وعذاب النار , وانت أهل الوفاء والحق فاغفر له وارحمه انك انت الغفور الرحيم. اللـهـم انه عبدك وابن عبدك خرج من الدنيا وسعتها ومحبوبيه وأحبائه إلي ظلمة القبر اللـهـم انه كان يشهد أنك لا إله الا انت وأن محمداً عبدك ورسولك وانت اعلم به. اللهم ثبته عند السؤال
اللهم إنا نتوسل بك اليك ونقسم بك عليك ان ترحمه ولا تعذبه اللـهـم انه نَزَل بك وأنت خير منزول به واصبح فقير الي رحمتك وأنت غني عن عذابه .اللـهـم اّته رحمتك ورضاك وقه فتنه القبر وعذابه و أّته برحمتك الامن من عذابك حتي تبعثه إلي جنتك يا أرحم الراحمين .اللـهـم انقله من مواطن الدود وضيق اللحود إلي جنات الخلود .اللـهـم إحمه تحت الارض واستره يوم العرض ولا تخزه يوم يبعثون "يوم لا ينفع مال ولا بنون إالا من أتي الله بقلب سليم"اللـهـم يمن كتابه ويسر حسابه وثقل بالحسنات ميزانه وثبت علي الصراط اقدامه واسكنه في اعلي الجنات بجوار حبيبك ومصطفاك (صلي الله عليه وسلم) .اللـهـم اّمنه من فزع يوم القيامة ومن هول يوم القيامة وأجعل نفسه أّمنة مطمئنة ولقنه حجته .اللـهـم اجعله في بطن القبر مطمئن وعند قيام الاشهاد أمن وبجود رضوانك واثق وإلي أعلي درجاتك سابق .اللـهـم اجعل عن يمينه نوراً حتي تبعثه اّمنً مطمئن في نور من نورك .اللـهـم انظر اليه نظرة رضا فإن من تنظر إليه نظرة رضا لا تعذبه ابداً اللـهـم أسكنه فسيح الجنان واغفر له يا رحمن وارحم يا رحيم وتجاوز عما تعلم يا عليم .اللـهـم اعفو عنه فإنك القائل "ويعفو عن كثير" اللـهـم انه جاء ببابك فَجْد عليه بعفوك وإكرامك وجود إحسانك .اللـهـم إن رحمتك وسعت كل شيء فارحمه رحمة تطمئن بها نفسه وتقر به عينه .اللـهـم احشره مع المتقين إلي الرحمن وفداً .اللـهـم إنه صبر علي البلاء فلم يجزع فامنحه درجة الصابرين الذين يوفون اجورهم بغير حساب فإنك القائل " إنما يوفي الصابرون أجرهم بغير حساب "

يارب صبر كل انسان رحل عنه احبائه واجمعنا بكل أحبائنا على خير يارب العالمين