الخميس، 11 ديسمبر 2008


من بين كل الروايات اللي درسناها الترم ده انا متأثرة جدا برواية هاملت وخصوصا بشخصية اوفيليا Ophelia
البنوتة الرقيقة الطيبة المصدومة في حبها من هاملت اللي كان بيحبها جدا بس للأسف صارحها بحبه لما ماتت !!
ومن حبها ليه وتجاهله ليها اتجننت ووقعت في النهر وماتت وجنازتها كانت محزنة جدا
دايما اوفيليا بتيجي على بالي مع انها شخصية في رواية بس قلبي بيتكسر وبحس بحزن شديد عليها لما بقرأ الرواية او بذاكرها
الرواية كلها جميلة وتجيب احباط لأي حد يقرأها وكفاية ان كل ابطالها بيموتوا ما عدا هوراشيو صاحب هاملت الانتيخ
اللي هاملت بيقوله وهو بيموت
(معلش خليك في الحياة واستحمل انك تعيشها دي تضحيتك ليا علشان تحكي حكايتي !!) انا بقى عاملة زي هاملت رجل الاقوال اللي بيأجل كل حاجة في حياته
وزي اوفيليا الرومانسية اللي عايشة في عالم تاني
عارفة ان عندي امتحانات وبقول هذاكر ومش بذاكر عندي حالة من الاحباط والملل من الكلية والدكاترة والامتحانات
واستبحس الامتحانات بدأ معايا
مش عايزة كلام عتاب من أي حد عايزة بس تدعولي
سلام
-----------------------------------------
كلام جاديد : ساعات بتحس انك في وسط الضلمة واليأس تايه مش شايف حاجة ولا فاهم حاجة ومخنوق من كل حاجة
ويجي نور من بعيد مكنش في بالك انك تشوفه والنور ده ياخد بإيدك وينور ويدفي حياتك في البرد اللي احنا فيه ده :)
من شوية كنت بشوف قنوات التلفزيون ووقفت على قناة كايرو سينما وكان في فيلم هندي شوفت اخر مشاهد فيه
وكان بيتكلم على بنوتة مكنتش بتشوف ولا بتسمع ولا بتتكلم وذاكرت ونجحت واتخرجت من الكلية وكانت بتتكلم
يوم التخرج وبتقول التخرج ده اخد منكم (من الاشخاص العاديين) 20 سنة ( اللي انا مستكتراهم على الدراسة) لكن اخد مني 40 سنة
يااااااااااه ايه الصبر والارادة دي واحنا اللي ربنا سبحانه وتعالى انعم علينا بالسمع والبصر بس مع ذلك مخنوقين ومكتئبين ومش عارفين نذاكر خلينا نغير نفسنا وحياتنا ونذاكر بجد و نشتغل بجد في حياتنا ونخلي عندنا امل وتفاؤل ونفوق بقى من الاحباط وان شاء الله ربنا مش هيضيع تعبنا

هناك 5 تعليقات:

كاتب مصري يقول...

ربنا يوفقك وبعدين ما أنا والله زيك يمكن صورة كربون امتحاناتي خلاص قربت جدا لا وكمان معرفش المناهج فيها ايه أصلي كنت في السعودية وجيت لسة من أسبوع ومش عارف الدنيا ماشية ازاي ومقضيها على كل يوم النهارده هذاكر لأ بكرة لأ بعده وكده
ربنا يوفقنا جميعا
ممكن أسألك إنت في كلية ايه؟
مودتي

كاتب مصري يقول...

ولا لأ افتكرت خلاص ده احنا الإتنين سوا بس اختلف القسم إعلام وإنجليزي ربنا يكرمك يارب
الديزاين بتاع المدونة الي قبل ده كان عاجبني أكتر
ربنا معاكي

mohamed ghalia يقول...

كل سنة وانتى طيبة
بالتوفيق إن شاء الله
ربنا يعينك
دمتى فى حفظ الله

مولان يقول...

اوفيليا........

ربنا معاكي يابنوتي الجميله

ومش هعاتبك لاني عارفه الانطاحات

ربنا معاكي ويوفقكك دايماااااااااا

e_emy يقول...

):

ربنا معاكى ويوفقك يارب

وكل سنة وانتى طيبة