الثلاثاء، 30 أبريل، 2013

أيام سيزيف 1



معركة كل يوم في محاولة النوم للإستيقاظ مبكرا للعمل الذي لا ينتهي تماما كصخرة سيزيف لا شيء مشجع ولا شيء بهي حتى الكتابة تتخلى عني في أوقات كثيرة .

بالأمس كنت في مدرستي منهمكة في الشرح حين دخلت على صفي زميلة تخبرني أنها دخلت صفي الأخر ووجدت به إمرأه هندية تخبرها بأنها هي معلمة اللغة الإنجليزية الجديدة فلم تخبرها زميلتي بشيء وركضت إلي فذهبت إليها ف ابتسمت وقالت لي : أنا معلمة اللغة الإنجليزية الجديدة لهذا الصف "صفي" رجاءا أخبري الأولاد لأنها لا تعلم العربية وحتى في اللغة الإنجليزية لا تتحدث جيدا فأخبرتها أنا معلمتهم للغة الإنجليزية وقام كل طلابي من أماكنهم يصرخون في وجه المعلمة الأخرى ويخبرونني لا تتركينا نحن لا نريدها واقتربوا مني ومنحوني حضنا دافئا أخبرتهم أن لا يخافوا وخرجت من الصف وأنا الدنيا تدور من حولي كيف لهذه المخلوقة أن تأخذ صفي وكيف حتى لم يخبروني لكي أسلم ما لدي من عهدة  وأودع طلابي وأمضي وليفعلوا ما يفعلوه ! هل أنا موعودة بالإناث اللائي تحلو في عيونهن ما أملك ويأخذوه ! وأتنازل أنا وأقول ربما سيعوضني الله وأقنع نفسي بأعذار واهيه.


ذهبت إلى الإدارة وكالعادة هم كالسراب في الصحراء لا يروون عطشان أبدا ثم ذهبت لزميلة من الزميلات أخبرتها فثارت وقالت لي لا تستهيني ولن تتركي عملك من أجل من تغتصب مكانك وحدثت المديرين المباشرين من قبل أن أذهب أنا وأحدثهم وشعرت ببرود الجميع وكانت أعصابي في حالة غليان وأنا لا أعلم ما يدور في الكواليس ثم ذهبت مرة أخرى لصفي لأرى جدول الحصص ورأيت تلك المرأه التي كانت ترتدي الزي التقليدي الهندي "الساري" وبالتأكيد هي ليست مسلمة ولكن الإدارة تموت في تراب الهنود وثقافتهم ولذلك اشتغلت في نفس اليوم الذي قدمت فيه على العمل ! تعلقت عيناها بي ومرة أخرى أخبرتني بتوسل بالإنجليزية أنا معلمة اللغة الإنجليزية أرجوكي أخبري الأطفال أن يحترموني هم لم يتقبلوني أبدا وبدأت بالبكاء أخبرتها أن لا تبكي وتأخذ الموضوع ببساطة وربت على كتفها وخرجت معها من الصف  ومرة أخرى ركض الأطفال نحوي يخبروني لا تتركينا أرجوكي إبقي معنا أخبرتهم أن الحصة بعد القادمة هي حصتهم وإن اليوم الدراسي سيستمر عاديا وأنني باقية معهم فتهللت وجوههم من الفرحة وقالوا في صوت واحد هييييييييييييييه .

مر الأمس وأتى يوم الإثنين الذي أكتب عنه الأن تحدثت مع منسقة كامبريدج عن بعض الأمور وأخبرتها عن ما حدث فأخبرتني ان تلك المرأه معتوهه وأنها ليست معلمة وهي لم تأتي اليوم ولن تأتي أبدا
 لا أعلم لماذا شعرت بالشفقة نحوها فهي بالتأكيد حينما خرجت للعمل كانت في إحتياج إليه بشكل أو بأخر ولكن هي ضايقتني وأرعبت طلابي بل وضربتهم أيضا 
أعتقد أنني سأبقى فترة متذكرة شكلها وهي منكمشة في مكتب الإستقبال في المدرسة ويظهر عليها ملامح الشعور بالذنب الذي اقترفته في حقي وحق طلابي "أولادي"



معلمة أخرى سألت طلابي عن أفضل معلمة يحبونها فأخبروها بإسمي وإنهم يحبونني وأنا أيضا أحببتهم وأحببت عالمهم النقي البريء ولكن كم هي صعبة مهنة التدريس مهنة الأنبياء والرسل ، الأمانة ثقيلة جدا وها أنا يأتي ميعاد نومي ويذهب ككل يوم ولا أنام الساعة قاربت الثالثة صباحا ومن المفترض أنني أستيقظ في السادسة والنصف لأبدأ من جديد في الأعمال السيزيفية .


الخميس، 4 أبريل، 2013

تجربتي مع الأيلتس أخيرا :)


الزمان : السبت 9-6-2012
وقت الوصول : الساعة 7 صباحا
وقت الامتحان : هييسوا فيه بدأنا متأخر المفروض ساعة و10 دقائق !لغاية 12 الا 10 تقريبا واستراحة وبعدين من 1 ل 1:15 دقيقة
المكان : الأسكندرية – الطريق الصحراوي ميراج هول عبارة عن مكان أنيق فيه قاعتين أفراح :) أمام كارفور اسكندرية
الوقت : من الساعة 9 و10 دقائق
المود : منمتش من يومين ورايحة الامتحان سايقة على طريق سواقينه فيهم حاجه مش طبيعيه :) -الطريق ده مليان حوادث- وفي نفس الوقت بغني
" ياللي غرامك في خيالي وفي روحي ودمي
امتى هتعرف امتى اني بحبك انت امتى هتعرف اني بحبك انت انت انت امتى هتعرف امتى امتى هتعرف"علشان أغير المود :)
نبدأ الأول ب يعني ايه IELTS ؟
يعني International English Language Testing system
طيب ايه انواعه ومفيد في إيه؟
في نوعين من الإمتحان الAcademic IELTS والGeneral IELTS
انا امتحنت ال Academic IELTSطيب ايه الفرق بين النوعين؟ النوع الاكاديمي بيبقى أصعب ومطلوب في الشغل في مجال اللغة الانجليزية أو في تكملة الثانوي أو الجامعة أو الدراسات العليا في جامعات بريطانيا او استراليا او نيوزيلندا وبعض الجامعات الأمريكية كمان بتقبل الايلتس أما النوع التاني العام بيكون علشان طلبات الهجرة لنفس الأماكن واستغربت جدا من كم الناس مسلمين ومسيحيين اللي عايزين يهاجروا ! - هي دي الوحدة الوطنية مش اللي بنشوفها متصنعة في التلفزيون :)) -
الlistening أرهقني جدا مدته 30 دقيقة بما فيهم كل حاجة الإستماع -وسمعنا 4 محادثات- والإجابة في نفس الوقت لأن مفيش اعادة هي مرة واحدة بس وتحت ضغط الامتحان ونقل الإجابة من ورقة الأسئلة لورقة الإجابة لأن ممنوع الإجابة في ورقة الإجابة على طول بعكس القوانين في الجامعات المصرية
الReading كان 3 مقالات وكان أول مقال عن تاريخ طباعة الكتب والألات اللي استخدمت أيامها والأسر اللي بدأت الطباعة وتاني قطعة مقارنة بين الهندسة والفن مع ذكر نماذج كتير لمهندسين أبدعوا من خلال الفن والقطعة التالتة كانت عن الفلورايد وتأثيره على صحة الانسان كل قطعه منهم كانت من صفحتين لصفحتين ونص و40 سؤال حلهم في ساعة :D انا لو كنت اخدت ساعتين كنت هجيب الدرجة النهائية لأني حسيت اني كنت بجري مش بحل .
الWriting كان report and essay أول حاجة التقرير عن شركة قطارات نكتب في تقرير مواعيد تأخير أو تعطيل الرحلات وده المفروض مدته 20 دقيقة والموضوع التاني مقال وكان عن أن مشكلة الoverweight زادت جدا وكحل للمشكلة دي لازم نغلي أسعار الأكلات المسببة للسمنة فأنا رأيي كان
ان غلاء الأكلات السريعة أو الشوكولاتة أو غيرها مش هتفيد لأن اللي بيحب الحاجات دي – زي حالاتي- هيشتريها ولأنها مش بس أكلات دي كمان ادمان وكده كمان الاقتصاد هيتأثر لو كان في غلاء لكن الحل توعية الناس بنظام صحي سليم وبيع الأكلات الصحية في أكتر من مكان وتطبيق برنامج رياضي لكل الناس وكمان ذكرت وجهة نظر المؤيدين والمعارضين.
أخر حاجة في الإمتحان كانت الspeaking وكنت تالت واحدة أدخل امتحن في البداية اللي بينادي الأسماء قعد ينادي على سالي ويقول سالي – سالي وأنا طبعا فاكراه بينادي لسالي طلع بينده لي ومش عارف يقرأ اسمي بالانجليزي ! المهم أخرني حضرته على دخول امتحان المحادثة وانا أصلا كنت دايخة وحاسه انه هيغمى عليا ومعنديش استعداد لإمتحان محادثة كمان ولسه قدامي سفر من اسكندرية لدمياط فبرضه كنت قلقانه هسوق ازاي وانا كده !
المهم أخدت معايا جواز سفري وبطاقتي ودخلت أوضة صغنونة فيها مكتب وفيها الBritish trainer والحقيقة لما اتأخرت المدربة البريطانية طلعت تشوف في ايه ف استقبلتني من على الباب وراحت بسرعة على مكتبها قولتلها good afternoon وردت عليا بgood afternoon قعدت مكاني قدامها على المكتب face to face
وكانت أنيقة جدا ومرتبة هي كبيرة في السن يعني من 50 ل60 سنة تقريبا ولفت انتباهي انها لابسة سلسلة جميلة جدا عليها صليب كبير وده ليه كذا تفسير ي إما هي متدينة وده اللي ظهر في كلامها ي إما هي متعصبة واعتقد من كلامي معاها هي مش كده يا إما هي بتفتخر انها مسيحية ولابسة الصليب كرمز لدينها زي ما أنا مسلمة وبفتخر بالإسلام ولابسه الحجاب كرمز لديني :)
بدأت المحادثة البداية الإعتيادية وبدأ تسجيل المحادثة كمان والمدربة معرفتش تنطق اسمي ولا اسم بابا ولا العيلة فساعدتها انها تعرف اسمي :) وكانت ملامحها جادة جدا وحسيت انها مش طايقاني وده غير كل اللي قرأته عن ان المدرب المفروض يبقى زي صديق وشوفت ده كمان في فيديوهات امتحانات الأيلس لكن البداية بالنسبة لي مكنتش كده معاها وده وترني كمان وكنت سامعة دقات قلبي ده غير الخلفية اللطيفة بتاعت قلة النوم والسفر والدوخة .
أول سؤال : قوليلي اسمك بالكامل
قولتلها اسمي بالكامل
تاني سؤال : بتشتغلي ولا بتدرسي؟
جاوبت : بشتغل مدرسة لغة انجليزية بس بعتبر نفسي لسه طالبة
ثالت سؤال : وليه اخترتي مجال الشغل ده؟
لأني بحبه من طفولتي – وهنا راحت كل الإجابات الخرافية اللي كنت محضراها –
رابع سؤال : وإيه خططك المستقبلية؟
هكمل تعليمي العالي . أنا عايزة أكون دكتورة في الجامعة – مع ان الحلم ده ملوش أي 30 لازمة علشان الوضع السيء لجامعات بلدنا _
وقتها المدربة اترسمت على ملامح وشها التقدير والإنبهار وكإنها عايزة تقول واو وكملت
السؤال الخامس هل بتحبي الرسم؟
طبعا بحب الرسم
السؤال السادس : بتعرفي ترسمي؟
لأ للأسف حاليا مش بعرف أرسم بس ناوية أتعلم الرسم
السؤال السابع : كنتي بتحبي الرسم وانتي طفلة وهل كنتي بترسمي؟
طبعا كنت بحب الرسم جدا وانا طفلة وكنت برسم بس للأسف معرفتش انمي موهبتي لأن مدرستي مكانتش بتوفر النوع ده من الدراسة – فعلا مدرستي كانوا بيركزوا على الأشغال اليدوية والتلوين اكتر من الرسم-
السؤال الثامن : هل الرسم مفيد في حياة الناس ؟
طبعا مفيد لأنه بيخرج أحاسيسهم – وفضلت افتكر في كلمة احاسيس كتير- وكمان الألوان بتبهجهم وبتفرحهم. – كان نفسي اقول كتير في السؤال ده بس الكلام كان تاه-
السؤال التاسع : ايه اكتر لعبة كنتي بتحبيها وانتي طفلة؟
كان عندي عروسة كنت بحبها جدا ومعتبراها بنتي :) وألفت وقلت كل لما حد كان بيجيلنا او اصحابي كنت بقولهم دي بنتي – كان ممكن برضه أقول كلام كتير هنا –
السؤال العاشر : هل الألعاب ساعدتك في التعليم وانتي طفلة؟
ساعدتني جدا وكانت مهمة في حياتي .
السؤال 11 : هل تعتقدي ان التعليم بالألعاب مهم في حياة الاطفال؟
طبعا التعليم بالألعاب مهم جدا وفي الحصص بتاعتي دايما بستخدمها وبجيب ألعاب وبخلي الأطفال كمان يجيبوا ألعابهم لأن دلوقتي التعليم بيكون خالي من أي متعة مجرد قراءة وكتابه ومدارس كتير مبتوفرش التعليم باللعب لكن في حصصي بستخدم الألعاب وكمان بقدم للأطفال ألعاب كهدايا – يالهوي عالكلام برضه كنت عايزة أقول حاجات كتير احسن من كده-
كمان المدربة تفاعلت معايا بتعبيرات الوجه والعيون لأنها متقدرش تتكلم في الجزء ده وشجعتني عالكلام .
الجزء التاني من الإمتحان وهو عبارة اني اتكلم في موضوع من دقيقة لدقيقتين
الموضوع كان عن ان لو عندي فلوس كتير إيه أكتر حاجة نفسي أشتريها :)؟
واخدت دقيقة في التفكير وكتبت ملاحظات والدقيقة مرت هوى !
قلت انه اكتر حاجة نفسي اشتريها هي عربية جديدة – يمكن علشان عربيتي حاليا تعباني وفي عمان معنديش عربية حاليا-
وبيت أحلامي يكون على البحر وحواليه نباتات وقعدت افتكر في كلمة الشجر مفتكرتش خالص مع اني عارفاها من ابتدائي
وهشتري هدايا كتير لأصدقائي
وهعمل shopping كتير :))
وهزور لندن لأن نفسي أشوفها جداااااااااا وممكن اسبانيا كمان
وهساعد المحتاجين لأن في ناس كتير في دنيتنا محتاجين حتى في ناس بيحتاجوا أكل ولبس وحاجات كتير مش بيلاقوها .
س : هل في حد تعرفيه حقق في حياته الحاجات دي؟
أيوة عندي صديق بيشتغل في لندن وبيحبها وبيقول ان لندن جميلة جدا وناسها ودودين وبيتقبلوا الاختلاف ومش عنصريين وأن الجو جميل في لندن .. وسكت شوية وقولتلها أحيانا ففطست من الضحك لأنها عارفة ان جو لندن مش حلو أصلا ولندن مدينة الضباب :) ومن السؤال ده بدأت تفك شوية التكشيرة ونتكلم عادي :) -استوحيت الإجابة من تعليق عندي عالفيس -
السؤال اللي بعده : هل أغلب الناس لما بيبقى معاهم فلوس بيشتروا الحاجات دي؟ انتي قولتي انك عايزة تشتري عربية؟
أيوة وكمان بعض الناس بيشتروا مجوهرات خصوصا النساء بيحبوا المجوهرات وبيعملوا shopping وبيسافروا أماكن كتير وبعضهم بيشتري أرض علشان يبيعها في المستقبل واللذيذ اني قولت earth بدل land
يعني يشتروا الكرة الأرضية بدل ما يشتروا قطعة أرض ههههههههه فضلت أضحك عالحتة دي كتير بعد الامتحان وقتها المدربة صلحتلي وقالتلي يشتروا لاند كإستثمار ويبيعوها مستقبلا؟ قولتلها أيوة غالبا في ناس كتير بتعمل كده .
س : هل الناس اللي معاهم فلوس سعداء؟
ممكن يكون بعضهم سعداء لكن في حاجات كتير مش ممكن تشتريها بالفلوس زي الأصدقاء الحقيقيين وزي الحبيب فقطاعتني وساعدتني في الإجابه وقالتلي الأصدقاء لا يشتروا وكمان الصحة وحاجات تانيه كتير في حياتنا مش ممكن نشتريها بالفلوس :) .
س : الأغنياء بيكون حواليهم ناس عاملين أصدقائهم ازاي لو حد غني يقدر يفرق بين الصداقة الحقيقية والصداقة المزيفة؟
انه الانسان لازم يختبر أصدقائه قالتلي : إزاي؟ قولتلها يقولهم انه خسر فلوسه ويطلب مساعدتهم ويشوف رد فعلهم وهيقفوا جنبه ولا لأ بصتلي بإستغراب وكإنها بتقول ايه الحل الساذج ده؟ وقالتلي ازاي ؟ قولتلها بإبتسامة انتي عايزة تعرفي إجابة السؤال ده ؟! فقامت ضاحكة جدا وشاورتلي على التسجيل يعني مينفعش اني أهزر ده امتحان
س : هل الغنى حظ ولا اجتهاد في العمل ؟
مفيش حاجة في الدنيا بتيجي بالحظ انا مثلا هنا علشان عايزة اكمل دراستي العليا فلكل حاجة في الحياة سبب
قالتلي : حتى اللي بيكسبوا الlottery ضحكني افتراضها وذكائها في الإجابة ومرضيتش أقول انه حرام أصلا عندنا كمسلمين بس قولت اليانصيب حاجه تانيه .
س : هل الأغنياء ممكن يبددوا أموالهم ويصرفوها من غير حساب؟
أيوة بتحصل قالتلي ازاي؟ قولتلها يلعبوا قمار مثلا قالتلي :Oh My God
وبعدين ضحكت وقالتلي طيب ما هما ممكن يكونوا بيلعبوا قمار علشان يزودوا فلوسهم؟ قولتلها ممكن يكونوا بيفكروا كده بس برضه هيخسروا :P فضحكت
وأخر سؤال كان : ليه في ناس بتخبي فلوسها ومبتحبش تصرف في أي حاجه؟
ج : قصدك البخلاء يعني؟ قالتلي : yes قولتلها على فكرة أنا بسأل نفس السؤال الناس دي بتفكر ازاي الدنيا قصيرة أوي علشان يعملوا كده قالتلي بس في ناس كويسة وبتفكر زيك انهم لما يكون عندهم فلوس بيساعدوا المحتاجين وأنا متأكده انك لما تعملي كده ده هيجلب لك السعادة قولتلها
thank you
وده كان أخر سؤال في الإمتحان
جت لحظات وفصلت من كتر الأسئلة لأني مش متعودة أتكلم كتير أساسا الا في حالات مش كتيرة :)
وقالتلي الكلمة اللي كنت مفكرة ان لسه شوية وهسمعها This is the end of the English speaking test :) ومدت ايديها علشان تسلم عليا فسلمت عليها وقفلت الريكورد وفضلت تضحك وقالتلي على فكرة أنا استمتعت جدا بالحديث معاكي . يمكن كلمة عادية اتقالت منها لكن رفعت معنوياتي جدا وضيعت كل التعب اللي كنت حاساه
وخلتني في شعور أحسن وبعدين كان لازم أرد لها التحية فقولت لها : سعيدة جدا اني اتكلمت معاكي ، أخيرا اتكلمت مع أهل اللغة بقالي كتير جدا من وقت التخرج متكلمتش مع حد انجليزي -قال يعني قبل التخرج اتكلمت مع أجانب-قالتلي لو عايزة تتكلمي انجليزي كتير ادخلي على skype هتلاقي ناس كتير جدا ممكن تتكلمي انجليش معاهم قولتلها شكرا وخرجت من امتحان المحادثة فرحانه
حلوة تجربة امتحان ال

وكان ختامه مسك IELTS