الخميس، 24 يونيو 2010

أخر أيام الكلية

صورة للمدرج من المكان اللي كنت بمتحن فيه واللي كنت باخد محاضراتي فيه واسمه مدرج المسرح

لو حكينا يا حبيبي نبتدي منين الحكاية
بإختصار نبتدي من 4 سنين لما عرفت بعد اسبوعين من الدراسة اني دخلت كلية الأداب في دمياط ووقتها كان اسمها فصول كلية الأداب بدمياط -احنا تاني دفعة انجليش تدخل الكلية-

كنت لسه محتارة بين أقسام الكلية وبالتحديد بين انجليش واعلام وكان ممكن أحضر محاضراتي في المنصورة او في دمياط ، اول محاضرة حضرتها كانت لدكتورة منى قاسم كانت محاضرة نقد أدبي ، لسه فاكرة وجوه الموجودين وكلهم مش فاهمين حاجة وأنا الوحيدة اللي استمتعت بالمحاضرة وفهمت أغلبها ، تاني محاضرة كانت لدكتور اسلام الصادي وبصراحة انبهرت من طريقة شرح دكتر اسلام في الأول كان بيكلمنا في الانجليش بشكل عام قبل ما يكون في منهج لسه فاكرة تفاصيل اليوم ده ويوميها مشيت مسافة طويلة في عز الحر والشمس وقررت اني هدخل قسم لغة انجليزية طبعا بعد صلاة الاستخارة و رأي بابا وماما

النهاردة كان أخر يوم نروح فيه الكلية كطلاب وأخر امتحان ، احساس ميتوصفش بجد احساس بالحرية زي فيلم brave heart في أخر مشهد freedoooooooooooooooom
فرحانة أوي ومبسوطة اوي وحاسة اني طايرة

على رأي كيكي ده بوست خيال علمي انا شبه اتخرجت :) الحمد لله

في اللجنة في امتحان النهاردة المراقبة كان شكلها تعبان شوية واستأذنت علشان تخرج من اللجنة لكن موافقوش انها تخرج ! وقتها انا اترعبت افتكرت المراقب اللي اتوفى في لجنة الامتحان وقلت في سري كده يا خالتو ستيتة ، كان لازم اقرأ الموضوع ده ربنا يستر :(
طلعنا من اللجنة وايمان زميلتي لقيتها بتندهلي وبتقولي انا فرحانة أوي وزعلانة كمان أوي - ده شعورنا كلنا-، سلمنا على بعض وودعنا بعض
في كذا ايمان في الجروب بتاعنا بس ايمان دي متوقعتش انها تودعني بالمشاعر الجميلة دي وخصوصا اننا كنا زمايل بس مش أصدقاء ، هي بنوتة ذوق جدا مرة كنت رايحة المحاضرة متأخرة ومكنش في مكان في البنش المفضل ليا تاني بنش فإيمان قالتلي ده احنا نقوم وانتي تقعدي يا انوسة :) وفعلا وسعتلي مكان جنبها سلمنا على بعض وخرجت من المدرج

بعدها لقيت دكتر أشرف موجود في الكلية طبعا فرحت لأن النهاردة أخر يوم وكان نفسي أسلم عليه وزعلت أوي لما شوفته الصبح بيخرج من الكلية قبل ما أسلم عليه ، والحمد لله ان تقديراتنا في الأدب الأمريكي كويسة ومفيش حد شايل المادة :) عقبال باقي المواد يارب

بعدها اخدنا وقت واتجمعنا وكنا بندور على بعض ، دخلنا الكلية وقولنا للأمن ان احنا في سنة رابعة وعايزين نتصور فسمحوا لنا نتصور في جنينة الكلية جنب المكان اللي الدكاترة بيركنوا فيه عربياتهم واتصورنا وضحكنا وكنت انا ونورا وداليا وايمان وايمان ونورهان ونورا وانوار وندى جت بعد شوية وبعدين كنت عايزة اتصور جوه الكلية بس كان في لجان وطلاب بيمتحنوا ف ايمان مسكت ايدي ومرضيتش تسيبني لغاية ما طلعنا من الكلية وانا بقولها سيبي ايدي عايزة اتصور جوه الكلية فواحد طيب من حرس الكلية قاللي انتي اصلا عايزة تتصوري جوه اللجنة :)

بعدها طلعنا عالنيل وقابلت غادة ، غادة كانت من اول البنوتات اللي عرفتهم وانا في اولى كلية وكنا الترم الأول دايما مع بعض لغاية ما اتفرقنا وأخدتنا الأيام والنهاردة أخر يوم شوفتها واتكلمنا كتير عنها وعن أصحابنا وقالتلي ان باباها اتوفى ف انا اتصدمت وقولتلها البقاء لله بعدها قالتلي وكمان هبة وسارة باباهم اتوفى ف اتصدمت تاني لأني كنت عارفة باباهم الله يرحمه لأن سارة وهبة كانوا معايا في ابتدائي واعدادي وعمو الله يرحمه كان طيب جدا فغادة قالتلي متقابلناش من زمان واخر يوم في الكلية وبقولك اخبار زبالة كده قولتلها ولا يهمك انتي بجد كنتي واحشاني

اتصورت انا والبنوتات عالنيل وبعدين روحنا للكتكوتة وركبنا احنا ال6 في الكتكوتة وعلى رأي المثل كتكوتة هنية تكفي ستة :) نورا ونورهان قعدوا جنبي وبعدين كل شوية كنت بهزر مع نورهان وبقولها أول ما بندخل الكتكوتة نورهان قومي شوية علشان فرامل اليد علشان متقوليش بس ان ده تحرش :) وقعدنا نضحك ونهزر كلنا وطلعنا على الصفوة مول اللي اول مرة اروحه كانت النهاردة وأول محل دخلناه كان محل فساتين الأفراح وطبعا صورت لكن اللي كان هناك قاللي لو سمحتي ممنوع التصوير :( قولتله ماشي ، ما انا كنت صورت خلاص نياهاهاهاها

المول في حاجات جميلة جدا ومعظم زميلاتنا كانوا هناك برضه :) ، اتصورنا كتير ومشينا كتير لدرجة ان رجلي خلاص دعت عليا وقعدت أقول أحد أحد
وبعد مناقشات عديدة طلعنا من المول وقعدنا بره علشان نقرر هنروح فين وفي الأخر اشترينا حاجات سريعة سندوتشات وعصير وروحنا قعدنا عالنيل تاني وكان في نحلة مش عايزة تسيبنا معجبة جدا بينا ، اتكلمنا كتير وودعنا أيام الكلية وكلنا حسينا النهاردة ان احنا في كلية بجد وان في حاجة اسمها صداقة في الكلية وأتفقنا اننا مش هننسى بعض وهنخرج تاني مع بعض قبل ما اسافر ان شاء الله وكمان هنتكلم عالايميل
ودعنا بعض لكن انا مش هسميه وداع هسميه وعد بلقاء جديد
وأسيبكم مع أغنية بحبها جدا اسمها it is not goodbye


">

هناك 11 تعليقًا:

حاجات جوايا يقول...

أخيراااااااا حسيتى انك فى كلية يا انوس
ههههههههههههههه
الحمد لله يا قمر انك خلصتى
كفاااااااااارة
تعالى انضمى معانا بقى لصفوف العاطلين
ههههههههههههه
مدرج المسرح ده يا ما كان فيه ذكريات بس احنا قعدنا اول سنتين بس فى دمياط وبعدين اتنقلنا دمياط الجديدة
بس الامتحانات من اول سنة كانت فى دمياط الجديدة

معقول دى اول مرة تروحى الصفوة مول
ايه اللى اخرك كل ده هههههههههه

بس شوفتى كرمالك
هيخلى الواحد يتجوز تانى هههههههههه

قوليلى هتروحى لقاء المدونين فى راس البر ؟؟


أجازة سعيدة يا قمر
وان شاء الله تفرحى بالنتيجة بالتقدير اللى تتمنيه

Ana keda يقول...

مبروووووووووووك
عقبال النتيجة يا حبيبتى
يا رب تكونى مبسوطة وارتحتى ناو
انبسطى بقى وبكره تقولى كانت احلى ايام والله
مفيش احلى من اللسعان
وحشتينى

MaNoO يقول...

بصى انا معشتش الاحساس دا بس بتمناه ومشاعرك باينه فيه اوى وروحك اللى كلها فرح وزعل بس عجبنى فى الاخر التفاؤل بتاعكم انكم هتتقابلوا واوعى تعملى غير لازم تشوفوا بعض خاصه انكم اصحاب اوى ربنا يسعدكم ويجمعكم ببعض على خير

بنـوتــــة يقول...

ياااااااااه
على أد ما أنا كمان باحلم باللحظة دي
على اد ما وجعتني أوي
إحساس إني خلاص هفارق المكان
هاسيب الناس
و ناس من شرق و الغرب
و مش هشوفها تاني غير بمعجزة من ربنا
يااااااااه ع الأحاسيس
إحساس إنك خلاص مسئولة عن نفسك
و الهم من ده كله يا حبيبتي
إحساسك بالمؤبد اللي انتي داخلاله
^ـ^
عايزة أقولك حكاية المؤبد دي لسه مكتشفاها انهرده و انا باكلم حد
و من ساعتها معلقة معايا
:D

أميرة علي كوكب مهجور يقول...

لوووووووووووولوووووولي مبروووووووووووك
مبروووووووووووووووك
مبرووووووووووووووك :))))))

Gehad mousa يقول...

ربنا يجمعكو مره تانيه وتكون صداقتكو مش علشان الكليه بس
الف مبروك مقدما على الامتياز ان شاء الله

القدر و انا يقول...

مبروك النجاح والتخرج مقدما ياليدى
ويارب عقبال الوظيفتان
الاولى زوجة وام
والثانية ما تحلمين بالعمل فيه

Lady E يقول...

حاجات جوايا : هههههههه اينعم اخر يوم
حسيت اني في الكلية بجد :)

مالها صفوف العاطلين :) زي الفل

كويس فكرتك بشوية ذكريات

هههههههه فعلا اتأخر كتير أصل انا رحت الصفوة مول قبل ما يبقى مول وكل ما أقول هروح كنت بكسل ويوم جر يوم لغاية ما رحت أول مرة أخر يوم في الكلية وأهو بقى ذكرى حلوة

هههههههه طب ما تجيبي فستان وتعمليها لجوزك مفاجعه :) فعلا كرمالك الفساتين اللي فيه رووووووعه

حسب الظروف ان شاء الله
انتي هتروحي؟

تسلميلي يا قمر وانتي كمان

Lady E يقول...

Ana keda : ينفع كده يعني الأيام الحلوة لسه جاية طول ما احنا عايشين :)

الله يبارك فيكي يا حبيبتي وانتي اخبار الامتحان اللي مغلبك ايه؟

ربنا يوصل بودي حبيبي بالسلامة ، بكرة تقولي كانت أحلى أيام نياهاهاهاها

قبلاتي يا أم حلبسة

Lady E يقول...

MaNoO : ربنا يحققلك كل أمانيك

ان شاء الله مش هننسى بعض

ده احنا دلوقتي أصحاب اكتر ما كنا أيام الكلية :)

دمت بخير وسعادة

Lady E يقول...

يتبـــــــــــــــع