الأحد، 6 يونيو 2010

شكرا




النهاردة في مكتبة مبارك حضرت ندوة أو seminar عن المنح الدراسية ل اللي بيتقدموا لدراسة البكالريوس والماجيستير والدكتوراة في الجامعات الأمريكية في أمريكا
المحاضر كان أ- أحمد نجيب مدير مركز التعليم الأمريكي ومعاه أ- هالة
شرحولنا عن نظام الدراسة في أمريكا ولما نيجي نقارن بين دراستنا اللي بنشد في شعرنا منها هنا وبين الدراسة هناك هنلاقي ان هناك التعليم أصعب بكتير بس بيخرج ناس فعلا متعلمين وفاهمين في مجال دراستهم

انا مش هتكلم عن المعلومات الكتير اللي قالوها لنا النهاردة حاليا لكن هتكلم عن دكتور وحيد في كليتنا اللي فعلا طبق نظام التعليم الصح – بغض النظر اني مرعوبة من امتحان الأدب الأمريكي لأنه هيبقى كبير جدا-
دكتور أشرف قوطة دكتور ومحاضر في الأدب الانجليزي
دكتر أشرف كان بيشرح لنا المحاضرات والأفكار الرئيسية مكتوبة في برنامج الباور بوينت وكمان كان بيفهمنا بالأفلام القصيرة الرواية اللي بندرسها Native Son أو عن الshort stories القصص القصيرة اللي بندرسها
وكمان طلب مننا بحث نعمله للمادة
-وبالنسبة لنا الدراسة بالطريقة دي كانت نوع من أنواع الخيال العلمي -

النهاردة عرفت في الندوة ان لو طالب عمل بحث من النت وقدمه للكلية مش بعيد انه يترفد لأنه متعبش في البحث وعلشان حقوق الملكية الفكرية وعلشان الطالب مرجعش لمراجع

دكتور أشرف كان بيجيب عن كل أسئلتنا وبيقعد معانا ويشرح لنا ويفهمنا أخطائنا ويصححها
أول مرة دكتور يصحح لنا أخطائنا ويكون قريب من طلابه وقليل جدا من الدكاترة اللي بيعمل كده
دكتور اسلام الصادي كان بيعمل معانا كده وكمان دكتور سامح في الترجمة يعني 3 دكاترة من الكلية كلها
في حين ان في دكاترة كنا بنسألهم عن المواد كانوا بيقولوا لنا متسألوناش واحنا أصلا مش مطلوب مننا شرح !!!!!!!

كمان في دكاترة كانوا عاملين حدود فاصلة كبيرة جدا بإعتبارهم دكاترة كبار واحنا كطلاب ولا حاجة ومش حاسين بينا
من كام يوم دكتور أشرف قال لنا طبعا انتوا دلوقتي بتعيطوا على طول وبيجيلكوا كوابيس يعني حاسس بينا
وانا قبلها بيوم كنت كاتبة الكلام ده عالمدونة وفعلا أيام الامتحانات بتبقى من أصعب الأيام ف ان دكتور من الدكاترة في كليتنا يحس بينا ويفهمنا دي حاجة كبيرة جدا

دكتور أشرف أول دكتور يقول لنا عبروا عن رأيكوا ويسألنا عنه – أخيرا رأينا بقى ليه قيمة-
وكمان دكتور أشرف أول وأخر دكتور نقدر نسأله عن طريق ايميله
وأكيد النظام ده مميز بالنسبة لينا كطلاب لكن مزعج بالنسبة لدكتور جامعة بيدرس لأكتر من 2000 طالب وطالبة
وكمان علشان ترد على كل الكمية دي من الطلاب وفي غير مواعيد العمل الرسمية ده مجهود كبير اوي
في أول لما دكتر أشرف قال لنا موضوع الايميل الحقيقة انا مكنتش مصدقه ان في دكتور مصري في جامعة مصرية هيتعامل بالايميل وكمان هيرد على ايميلات طلابه لغاية لما فعلا بعت لدكتور أشرف ايميلين وشرفني بالرد عليا وطبعا فرحت جدا
بالايميلين وفرحت جدا بالاهتمام ده من دكتور فعلا عايز يعلمنا

أنا ممتنة لكل دكتر أو دكتورة علمونا في الكلية وبعد التخرج بنفتكرهم بالخير وبننسب الفضل في تعليمنا حاجات كتير ليهم
وفي نفس الوقت مضايقة جدا من أسلوب دراسة مستفدناش منها أي حاجة طول 3 سنين كلية وفي السنة الرابعة عرفنا شوية يعني ايه دراسة جامعية

انا مش عارفة أقول ايه أكتر من كده ولا عارفة ايه احسن اني أجيب تقديرات عالية من غير ما يكون في دراسة حقيقية ولا يكون في دراسة حقيقية ومجبش تقدير ومعرفش أكمل ماجيستير ولا أتقدم خطوة واحدة في طريقي

في نكتة بتقول

- واحد صعيدي نفسه يعلم ابنه انجليزي في ابتدائي مش

نافع واعدادي مش نافع وثانوي برضو مش نافع وجامعه مش نافع قال بس انا أجوزه

واحده من انجلترا يتعلم انجليزي صح بعد شهر راح يزوره في انجلترا رن

الجرس مراته فتحتله قالها مستر هريدي موجود قالتله : نجوله مين
:)


شكرا دكتور أشرف قوطة لأنك شرحتلنا بأسلوب جديد وعيشتنا في جو الدراسة اللي بجد في الكليات
وشكرا د- أنور اللي علمني فعلا احترام الوقت وعلمني فهم الشعر والدراما
وشكرا ل د- اسلام ود- سامح انا بجد اتعلمت منكم كتير جدا

وسواء جبت تقدير أو جبت التقدير الشعبي مقبول فكله مكتـــــــوب والمكتوب مفيش منه هروب
وربنا مش بيضيع تعب انسان

هناك 8 تعليقات:

Gehad mousa يقول...

اولا ربنا معاكى ويوفقك ان شاء الله
تاثيا :
مقبول ايه احنا عاوزين حاجات اعلى منك طبعا لاننا نتظر الجميل من الاجمل ليس الا

يشرفنى معرفتى بمدونتك

gehad mousa

قلم رصاص يقول...

مشكلة التعليم في مصر انه بيعتمد على مبادره شخصيه من الأستاذ تجاه طلابه
احنا معندناش الفكر المؤسسي اطلاقا ودا سر تراجعنا وتقدم الأخرين

انا بقدر جدا أستاذ الجامعه اللي بيحاول يكون قريب من طلابه ويفيدهم ويشعرهم بأهمية إبداء أرائهم بحريه بعيدا عن التعالي والغطرسه في احيان كتير

انا بأضم صوتي لصوتك واقول لمثل هذا الأستاذ : شكرا

النكته عجبتني اوي

انتي مش هتمتحني بقى؟
بقالك كام شهر عامله لنا إرهاب فكري بإنك هتمتحني وكل كام يوم بوست جديد
ههههههههههه

ربنا يوفقك
وتجيبي تقدير ان شاءالله

تقبلي مروري وتحيتي

Lady E يقول...

Gehad mousa : اللهم أمين وليكي مثل دعائك يا جهاد

ثانيا : ربنا كريم - وش مكسوف-
انتي الأجمل والأحلى يا حبيبتي

واكيد يشرفني انك صديقة المدونة

دمتي بخير وسعادة

Lady E يقول...

قلم رصاص : القارئ المتميز

للأسف مفيش فكر مؤسسي وفي سوء ادارة في كل حاجة مش بس في التعليم

دكتر أشرف من الدكاترة اللي فعلا متميزين وعلمنا بجد طلعنا من الترم عارفين الأدب الأمريكي وكلمة شكرا كمان مش هتوفيه حقه

يا نهار أبيض ارهاب فكري مرة واحدة :)

خد بالك بالمصطلح ده ممكن ارفع عليك قضية :)

هبدأ امتحاناتي اخر الأسبوع ده ان شاء الله

وعادة لما مش بيكون عندي امتحان بكتب كل يوم بوست أو 2 في اليوم :) كده يعتبر مش بكتب :)

اللهم أمين

دمت بخير وسعادة

قلم رصاص يقول...

قارئ متميز !

أشكرك على الإطراء الجميل دا
دي حاجة فرحتني فعلا

على فكره انا اما قلت انه مفيش فكر مؤسسي في العمليه التعليميه مقصدش التخصيص .. عشان انتي كنتي بتتكلمي تحديدا عن التعليم .. لكن من حيث التوصيف السليم ، احنا معندنش بالفعل أي فكر مؤسسي في أي حاجة في مصر إلاااااا شيئ واحد ..... وهو السرقه !

وسرقة بمعناها الشامل
سرقةالحريات والديمقراطيه
والأخلاق العامه
وثروات الشعب
الخ الخ الخ

___

انا مقصدتش بصراحه مصطلح إرهاب فكري بالمعنى اللي وصل لك ، هي فلتت مني واللي مفروض يتحاسب فيها هو لوحة المفاتيح
ههههههههه

وربنا معاكِ في المذاكره والامتحانات

وكما قلتي :

يا أهلا بالانطحانات

تقبلي مروري وتحيتي للمره التانيه

حنين الذكريات يقول...

الحمد لله التعليم فى مصر بقى مسخ من تجارب كتير فى بلاد أجنبيه وبلاد عربيه
وللأسف التطبيق بيكون بطريقه خطأ لأنه بدون فكر أو حتى هدف
والنتيجه لتجارب الفاشله هو فشل التعليم وتخريج أشخاص لايعلمون شئ عن التغليم
والشكر الجزيل لكل معلم يريد ان يفيد المجتمع بعلمه ويفيد طلابه لكى يستفاد منهم أخرين

Selfmeaning يقول...

جيتى على الجرح بحكاية المنح ديه

كل مرة اقدم فيها و اتقبل و بابا يرفض

ياريت فعلا بجد تحطى التجربة ديه فى

بالك و تجتهدى عشان تجيبى تقدير تمام

و تكملى المسيرة فى امريكا

Bent Men ElZaman Da !! يقول...

صراحه انا اول مره اشوف نوعيه الدكاتره اللى بتقولى عليهم
انا اعرف النوع التانى
اللى بيهزق الطلبه دايما :D
ربنا معاكى يا جميله وتخلصى على خير وتكملى مستقبلك زى ما انتى عايزه