الاثنين، 21 يونيو، 2010

كلها بكرة بس وبعده :)

اليوم اللي قبل الأخير اللي هكتب فيه يومياتي في اخر ترم في امتحانات الليسانس

كلها بكرة بس وبعده واخلص الامتحانات ان شاء الله

الحمد لله ، الحمد لله ، الحمد لله

يارب بس ايام الامتحانات تكمل على خير والنتيجة تفرحنا احنا وطلاب الثانوية العامية بجد قلبي معاهم

امبارح صحيت من النوم مفزوعة ، فكرت ان امتحان الترجمة فاتني مع ان الامتحان كان النهاردة :)

وامبارح كانت حالة الاحباط عندي عالية جدا لغاية لما جالي ايميل جميل اوي اسمه ألست تسعد اذا جعلت الأخرين سعداء ، بمجرد ما قرأت الايميل فعلا حسيت بسعادة وعلشان كده هنقله ان شاء الله للمدونة بس بعدما اخلص يوميات الامتحانات اللي بعد يومين هتبقى ذكريات

امبارح كلمت ايمان زميلتي في التليفون وقولتلها تحاول بقدر الإمكان متتأخرش عن اللجنة وخصوصا انها قريبة من الكلية ، والنهاردة الصبح انا اللي اتأخرت :) عن الامتحان ، كان يوم غريب اوي الصبح ، مكنتش قادرة اصحى من النوم وانزل الكلية علشان معاد الفرن اليومي اللي مجازا اسمه مدرج

الكتكوتة كانت بعافية شوية النهاردة فيها مشاكل في الميكانيكا ووصلتني للكلية بالعافية وكانت كل شوية تطفي ومش عايزة تمشي اكتر من سرعة 30 وبعد السرعة دي بتبقى عاملة زي ما تكون جمل او دبابة مش بتمشي بإنسيابية بتبقى غريبة اوي ، ده غير كمان ان الطريق كان زحمة اوي وواقف وفين وفين على ما الزحمة فكت شوية

بدأ الامتحان وكان 4 أسئلة نعلق عليها و4 مقالات قصيرة نترجمهم وطبعا الوقت سرقنا وبالرغم اني بحب الترجمة من الانجليزي للعربي الا ان تاني قطعة كانت مكلكعة بطريقة غريبة

تخيلت حلول للحر المرعب اللي بيبقى في المدرج ومن ضمن الحلول ان يبقى في ناس بيبعوا مشروبات مثلجة وحاجات ساقعة عصائر , قهوة متلجة , شاي مثلج ، ايس كريم ، بيبسي او كولا مع اني بكره الاتنين الاخرانيين دول وطبعا وهما ماشيين في المدرج هيقولوا حاجة ساقعة بيبس وقد كان شوية ولقيت ام محمود معاها مية وعمالة بتهزر وبتقول حاجة ساقعة بيبس اشرب يا حرااااان :) والمية مش ساقعة اطلاقا عرفت لأن البنوتة اللي جنبي كانت هتشرب مية فوديت لها الكوباية


ورقة الأسئلة كانت متوحشة بقرأ فيها وبحط الورقة على جنب ، الورقة جرحت ايدي ! استغربت اوي فعلا ورقة متوحشة ، والبنوتيين اللي قاعدين ورايا عمالين يتكلموا ويرغوا وانا عندي رغبة مكبوتة اني ازعق فيهم ، ده غير المراقبين اللي مجرد كلامهم بيطير الأفكار والترجمة أصلا بتبدأ بفكرة

رحت النهاردة جددت الاشتراك في المكتبة ، واستعرت روايتين رواية مترجمة اسمها الرجال والمال والشيكولاتة لمينا فان براج ورواية تانية بدأت فيها النهاردة ووصلت للصفحة ال14 ومكملتش قرائتها علشان تأنيب الضمير علشان عندي امتحان والمفروض اني اذاكر ، الرواية اسمها في كل اسبوع يوم جمعة

اخدت من الرواية شوية صدمات في الاول من بعض الكلمات ومن الحقيقة المخيفة اللي ظهرت في اول شخصية

مكتوب على الغلاف ان الرواية جريئة ، شفت الكلام ده بالصدفة بعدما استعارتها وفي فرق بين الجرئة والوقاحة

اتمنى ان الرواية متكونش وقحة وعلشان كده مش هحكم عليها من اول صفحات ومش هقييمها دلوقتي

النهاردة كان اخر يوم نتجمع فيه انا وزميلاتي ونراجع العنواين الأساسية للإمتحان اللي جاي واحنا ماشيين كل واحدة فينا كانت حاسة بمرارة الفراق ، لكن انا كنت عاملة حسابي على اللحظة دي من سنة اولى وخبيت شوية سكر في روحي وقلبي علشان اللحظات المرة دي

اخر امتحان ان شاء الله الامتحان الجاي تحليل نصوص


هناك 14 تعليقًا:

Selfmeaning يقول...

ربنا معاكى فى امتحان بكرة

و مبرووووك مقدما على التخرج

اما بالنسبة للصحبة متخفيش

لان الصحبة اللى بجد بتبان بعد التخرج

ان شاء الله تلاقى كل اصحابك جمبك و معاكى

عالطول

mrmr يقول...

كلها بكره وبس وبعده
هاااااانت
ربنا يوفقك ويكملك على خير انتى واللى ذيك والرعب اللى اسمه ثانويه عاميه
ربنا يفتحها ان شاء الله علشان تشوف قد ايه الامتحانات صعبه على الطلبه
ربنا يمد ايديه ويساعدكم
و بالنجااااااااااح

غير معرف يقول...

من الناجحين إن شاء الله ، أما الفراق ده سنة الحياة .
ديدي

Silver Eyes يقول...

صباح الفل يا ليييدى :)

ربنا يعدى اخر مادة على خير وتطلعى منها مبسوطة وتعلنى ماتش اعتزالك p:

عندى بكرا امتحان ترجمة .. ربنا يستر
يااااااه كلها مادة وتيجى تغيظينى عشان لسالى سنة كاملة :(

لما تخلصى الروايات .. قوليلنا رأيك فيها

خلى اخر يوم يكون لذيذ بالنسبالك بعيدا عن عملتى ايه في الامتحان .. بس خليه ذكرى جميلة بينك وبين صحابك تتمنى يتكرر تانى ويوم ما تفتكريه تلاقى نفسك بتبتسمى :)

ربنا معاكى ف المادة اللذيذة دى
تحياتى .. واسفة ع التقصير بس انا هنا كتير من غير كومنت :)

Gehad mousa يقول...

بجد ربنا معاكى ويوفقك يارب
و ننتظر امتياز باذن الله

لـــولا وزهـــراء يقول...

يارب بالتوفيق والنجاح ياااااااااااااارب ومتتاخريش تاني ع الامتحان والف سلامة ع الكتكوتة هو مافيش مرة اقرا فيها انها مثلا بتجري زي الحصان...بتشارك في مسايقات عدو مع اخواتها ههههههههههه..الحر بقى فظيييييييييييييييييييع
لولا

الشـوكة الــنـاعـمـة يقول...

ربنا معاكى يارب
انشالله النتيجه تبقى حلوه عشان اقولك مبروك
وانتى كمان تجيبى لى بيبسة ساقع تلج وقطعه اكلير
ههههههههه
ربنا يوفقك يارب
قلبى معاكى

Lady E يقول...

Selfmeaning: ربنا يكرمك ويبارك فيكي

عندك حق

نورتيني

Lady E يقول...

mrmr : اللهم امين

ربنا يكرمك يا مرمر

نورتيني

Lady E يقول...

ديدي : يااااااااااه عااااااش مين شافك يا ديدي اخيرا افتكرتي المدونة

بجد ليكي وحشة

Lady E يقول...

Silver Eyes : صباح الورد يا سيلفر

ههههههههه اعلنته خلاص والحمد لله :)

بجد انتي جميلة اوي ولسالك سنة استمتعي بيها على اد ما تقدري

أخر يوم في الكلية كان أجمل يوم فيها

ولا يهمك المهم انك بتيجي :)

نورتيني

Lady E يقول...

Gehad mousa : وانتي كمان يا قمرايا

وانا كمان بنتظره :)

نورتيني

Lady E يقول...

لـــولا وزهـــراء : هههههههههه ما انتي مبتجيش يا لولا الا في الأوقات اللي الكتكوتة بتكون تعبانة فيها

الحر فعلا اليومين اللي فاتوا كان لا يطاق وبعدما خلصنا امتحانات بقى احسن شوية :)

Lady E يقول...

الشـوكة الــنـاعـمـة : وعندك واحد بيبيسي وواحد اورنج جوس واتنين اكلير وصلحووووووووووو

خدي بالك انا عازماكي عليهم بس هاكلهم معاكي ههههههههههه :)

نورتيني