السبت، 19 يونيو 2010

عندما يسكنني الحزن ويبكيني الضجر



اخر امتحانات وأخر سنة في الكلية سنة الليسانس ، السنة اللي احيان كتير حسيت اني مش هوصلها مشاعر كتير متداخلة بين التفكير في ان خلاص هسيب المرحلة الجامعية وبين يا ترى اللي جاي هيبقى شكله ايه ويا ترى الدنيا من غير كلية ودراسة عموما عاملة ازاي
النهاردة كان عندي امتحان اللغة العربية والحقيقة اني بقيت بخاف من نفسي ، معظم الأسئلة اللي بتنبأ بيها او ببقى حاسة انها هتيجي بتيجي بالرغم اني مش ببقى متأكده انها هتيجي في الامتحان او لأ بيبقى مجرد احساس
الكتاب امبارح كان كبير اوي 400 صفحة ومش محذوف منه اي حاجة وبرغم انه لونه بمبي بس ميشجعش اي حد انه يذاكره
امبارح بالليل معرفتش انام خالص ومع ذلك معرفتش اذاكر وعرفت انام شوية بعدما نور الصبح طلع وسمعت صوت العصافير وبعدين صحيت من النوم والصداع مفارقنيش لغاية بعد الامتحان

قبل اللجنة كنت بفكر هو ليه مفيش ولا مرة الامتحانات جاتلنا أسئلة اختيارية ، ليه كلها اجبارية كانت مجرد فكرة بس فكرة قوية شوية فكرت فيها كتير
رحت الامتحان واتفاجئت ان الأسئلة النهاردة كانت اختيارية :) نختار الأسئلة اللي نجاوب عليها :) ،
وعكس ما توقعت الامتحان كان كويس الحمد لله

نيجي بقى للجو العام بتاع المدرج طبعا حر جدا كالعادة واحنا معاد امتحاناتنا من الساعة 12 ونص للساعة 2ونص يعني في أكتر وقت حر في اليوم وانا داخلة المدرج قلت الأذكار اللي قبل الامتحان ومعاها حان الأن موعد الانصهار اليومي في المدرج حسب توقيت مدينة دمياط وكلياتها وعلى المقيمين خارجها انهم يحمدوا ربنا علشان مش بيمتحنوا في الحر ده

س : ايه فايدة ورقة الأسئلة؟
ج : طبعا علشان نعملها مروحة علشان متطلعش روحنا من الحر وكمان المراقبين بيعملوا كده
س2 : ايه فايدة البنش اللي بنحل الامتحانات عليه؟
ج2: البنش مش لحل الامتحانات البنش معمول علشان في الجو الحر اوي الدهان بتاع البنش يلزق في ورقة الاجابة ويبهدلها ويخلي شكلها مش حلو وبما ان البنش لونه بني فأكيد ورقة الاجابة بتبقى بني في بيج في رصاصي من القلم الرصاص في ازرق وطبعا الدكاترة او المعيدات اللي بيصححوا مش هيعرفوا ان الورقة بتبقى كده من الحر


س3 : هما الطلاب بيغشوا ليه؟

ج3: علشانهم اغبيا واغلبهم اليومين دول بيتطردوا من اللجنة وبيتبهدلوا ومش كده وبس ده انا عرفت فتوى كمان والعهدة على المفتي ان اللي يغش في مادة من المواد وشغله بعد كده يعتمد عليها يبقى فلوسه كلها حرام !

س4 : هو مش سؤال ده شعار : " المراقبين بيهيسوا واحنا معاهم " النهاردة قبل معاد انتهاء الامتحان بنص ساعة واكتر المراقبين قالولنا لسه ربع ساعه وقبل ما ينتهي معاد الامتحان بربع ساعة قالولنا لسه 5 دقايق ! صباحو كدب على الطلاب المعذبون في الأرض

بعدما خلصت الامتحان ، طلعت من بوابة الكلية كالعاده ، مليش نصيب احب الكلية دي كل ما بحبها بتحصل حاجة تخليني مش قادرة احبها ومش قادرة احس اني دخلت كلية اصلا ، بصيت على الكتكوتة واتخضيت نسيت انا ركناها فين ! وخصوصا ان قبل كده كنت راكناها في مكان خرجت من الكلية ملقتهاش ولقيتها في مكان تاني علشان ماما كانت جاية تاخدني من الكلية ، والنهاردة اخدت حوالي دقيقتين لغاية ما افتكرت مكان الكتكوتة.

مفتقدة بابا بطريقة مش عادية ، بابا السنين اللي فاتت كان بيوصلني كل يوم الامتحانات ويديني شوية حماس وتفاؤل قبل الامتحان
بابا بجد واحشني ومفتقداك جدا وربنا يهون الأيام وربنا ميحرمنيش منك ويباركلي في صحتك وعمرك

كنت خلاص همشي بعد الامتحان لكن لقيت زميلتي بتتصل بيا ، استنينا علشان جايين معاكي والجو حر جدا وشمس جدا والدريكسيون في الكتكوتة بيلسع جدا وقولتلهم يا جماعة متتأخروش ولما اتأخروا كنت همشي لكن ماما قالتلي استني زميلاتك ووصليهم يمكن لما نستناهم في الحر ده"تتسد عننا فوهه من فوهات جهنم " واستنيتهم فعلا ومشينا مع بعض

الامتحان الجاي ان شاء الله ترجمة وربنا يستر بعد الترجمة اللي حصلت مع ثانوية عامية ، سحاب الرماد البركاني والهجرة الغير شرعية ودول ثانوي مش تخصص اومال التخصص بقى يا ترى هيعملوا فينا ايه؟ ان شاء الله خير


-------------

ع الهامش : فتحت التعليقات
عنوان البوست مأخوذ من قصيدة كن صديقي ل د. سعاد الصباح

هناك 18 تعليقًا:

حاجات جوايا يقول...

ربنا يعينك يا جميل
هانت
مش عارفة ازاى مش قادرة تحبى الكلية
ده انا دلوقت وبعد 9 سنين من تخرجى نفسى ارجع لايام الكلية تانى

امتحانات الليسانس بتاعتنا كانت غير اى امتحانات
مش فارق معانا المادة الصعبة من السهلة
كله من الكلية حلو وجميل حتى عذابها حلو .. واهون كتير من بعدها
وده اللى اقدر اقولهولك دلوقت واكده وانا فى كامل قواى العقلية

افتكر اخر يوم فى الامتحانات كان عندنا حالة شجن فظيعة .. قد ما احنا فرحانين اننا خلصنا كل حاااااااجة .. قد ما كنا زعلانين اوى وبندارى فى دموعنا عشان هنسيب بعض والدنيا هتاخدنا بقى وكله هيروح
اخر يوم كنا كل ما نعمل حاجة رباب صاحبتى تعلق وتقول دى اخر مرة هنعملها هنا ..اخر مرة هنقعد هنا .. اخر مرة هنشوف الشمس من هنا .. وكل حاجة بقى كده

انا على فكرة كنت تربية دمياط برضه بس تخصص فرنسى

يلا ربنا معاكى وان شاء الله تخلصى والجاى يكون اجمل يارب

Lady E يقول...

حاجات جوايا : فعلا هانت كلها امتحانين :)

مش قادرة احبها لأني مش حاسة انها كلية اصلا
احيانا حسيت انها كلية لكن في اغلب الوقت حاسة انها حضانة !

يمكن ايام الكلية حلوة بس مش كل الحياة هتبقى ايامنا في الكلية دي مرحلة من مراحل الحياة واكيد زي ما بتبدأ بتخلص

انا في كلية الاداب مش في تربية بس رحت كلية تربية وشوفتها بجد كلية جميلة جدا

اللهم امين وليكي مثل دعائك يا قمرايا

نورتيني

Gehad mousa يقول...

ربنا معاكى وتوفقك يا قمر وان شاء الله تكون كل امتحاناتك كويسه
سلمت اناملك ودوما ننتظر الجميل من الاجمل
وباذن الله الامتحانات تعدى على خير

اختك الصغيرة
gehad mousa

صوت من مصر يقول...

ربنا يعينك

Just waiting يقول...

كلنا لها
انا كمان بمتحن والامتحانات جاية رخمة وطويلة قوي
بس ان شاء الله شدة وتزول دونت وري خالص وربنا يجعلها اخر تثبيته ان شاء الله

ماما أمولة يقول...

ربنا معاك يا رب حبيبتي وينجحك

والله دي احلى ايام رغم صعوبتها

ربنا ينجحك في امتحان الحياة

Malooka Yousef يقول...

ربنا معاكى وتخلصى ع خير ان شاء الله فعلا احلى ايام ايام الكليه والاصحاب اكيد هتفتكرى الايام دى طول حياتك وهتحبى كليتك بعد ماتخرجى منها ربنا معاكى ان شاء الله

أميرة علي كوكب مهجور يقول...

خير ان شاء الله

SHAPE YOUR LIFE (ABOALI) يقول...

مش عارف يا ليدى اعلق
الكلام بين سطوره محبط شوية
التعليم اضافة كما تعلمى لنمو الفكر وارتقاء الكيان
بس اليومين دول بقى عبء لاسباب كتيرة

بس كل اللى اقدر اقوله
ايام الكلية والمذاكرة ايام من حياتك
ابتسمى فيها وشجعى نفسك وقويها
لاءن اى نفس بتحب انها ترتاح وتقول بلا مذاكرة بلا كلية بلا امل بلا نجاح

والكلمات اللى بالمنظر ده بيكون احساسها مؤلم اذا استسلمنا ليها

انتى شكلك ماشاء الله انسانة واعية مطعية
مشرقة للحياه
بس حساسة نتيجة انى ليكى طموح وفكر تتمنى ان يتم تطبيقه
بس الحياه يا ليدى مش كل اللى فيها نقدر نخليه كما يجب
بس نقدر نطور فيه ونحسنه علشان يكون طعمه مستساغ مثل الدواء الطبى

حاولى فى حياتك يكون ليكى توابل تصنع منك شعلة للنشاط والحياه

وتفتكرى دايما كلام التنمية البشرية
واد ايه اثر فيكى وكان جميل ومشجع

وربنا يهبك الفهم الصادق ويهب الفهم لك


تقديرى

واثقة بربها يقول...

احساسك انك فى اخر سنة و خلاص هتسيبى الكلية احساس مختلف عن اى حاجه معظمنا مرينا بيه ...ان شاء الله تكون نهاية سعيدة و خير

Lady E يقول...

Gehad mousa : ربنا يكرمك يا جهاد

دايما قمرايا

Lady E يقول...

صوت من مصر : وانت كمان

Lady E يقول...

Just waiting : ربنا معانا

هانت

اللهم امين ، اخر تثبيته في الليسانس

نورتيني يا قمرايا

Lady E يقول...

ماما أمولة : اللهم امين

تسلمي يا حبيبتي على الدعوات الجميلة

دمتي بخير دائما

Lady E يقول...

Malooka Yousef : اللهم امين

يمكن :)

نورتيني

Lady E يقول...

أميرة علي كوكب مهجور : ان شاء الله يا مرمر

Lady E يقول...

SHAPE YOUR LIFE (ABOALI : انا بنقل الواقع يا ابوعلي ، لكن للأسف ممكن يكون فيه حاجات محبطة

اكيد اي كلمات سلبية بيبقى مؤلم جدا لو استسلمنا ليها

بجد كلام جميل من شخصية جميلة

متحرمنيش من تعليقاتك الرائعة

دمت بخير

Lady E يقول...

واثقة بربها : اللهم امين

برضه هسجل اعجابي الشديد بإسمك

ربنا يكرمك ويبارك فيكي