الأربعاء، 9 يونيو 2010

فضفضة سريعة


حاولت مكتبش لأن النهاردة مش وقت كتابة علشان لسه كام ساعة على امتحان الفرنساوي
انا قلقانة أوي أوي أوي ، انا ماشية على نظام ان لو في مادة صعبة عندي في الكلية بروح الامتحان على اساس انه مثلا انترفيو لشغل او مقابلة تلفزيونية أو كورس المهم اني مبحطش في بالي انه امتحان والطريقة دي كانت بتنفع جدا اني ابطل توتر وقلق واحل كويس في الامتحان
بس مع الفرنساوي مش عارفة أعمل كده ، انا فشلت في النجاح في المادة دي مرتين وعايزة انجح في التالتة ، من كل قلبي نفسي انجح بكرة
حاسة اني لوحدي اوي
قرأت مقولة للأم تيريزا بتقول : God doesn't require us to succeed; he only requires that you try.
Mother Teresa
علشان كده انا بحاول اني انجح بس ارجع وأقول يخرب بيت القلق
الامتحانات فترة غريبة بجد مجبرين عليها زي ما بنكون مجبرين على السكوت في النوم
الامتحانات كابوس وفي نفس الوقت درجة من درجات السلم لازم نطلعها علشان نحقق احلامنا
شكرا يا فراشة وشكرا يا اميرة على وقوفكم معايا
لفتة جميلة اوي من بنوتة زميلتي قالتهالي اخر محاضرة : كنت مروحة فقالتلي ايناس ازيك عاملة ايه واحشاني والله
عارفة امبارح جمعت اخواتي الصغيرين وقعدنا انا واختي ندعيلك ان ربنا ينجحك ويوفقك
انا عارفة ان ربنا مش بيضيع تعب حد بس بجد الساعات من هنا للصبح من أطول الساعات اللي بعيشها بالرغم ان الأسابيع اللي فاتت مرت بسرعة أوي
كانت نكتة بهزر بيها الأيام اللي فاتت ان السنتين اللي فاتوا معرفتش انجح بكتاب واحد فرنساوي اومال بقى والسنة دي كتابين ومنهجين مختلفين لكن لما قربت من الامتحان مبقتش نكتة :(
على أي حال ربنا كريم

هناك 26 تعليقًا:

Ana keda يقول...

اهدى بس كده يا حبيبتى
وربنا معاكى ويوفقك ويذكرك كل حاجة وقت حاجتك اليها
اقعدى اتوضى واقرى قرأن كده وربنا ييسرلك الحال
بلاش تفكرى كويس ونامى كويس عشان تعرفى تحلى
وحشانى اوى اوى وعارفة الفترة المنيلة دى
ربنا يعديها ع خير يا انوس يا رب

just waiting يقول...

ربنا يوفقك وينجحك وان شاء الله هتعدي السعات هوا بس مش تفكري كتير في الموضوع دا التالته تابته وهتخلصي من الفرنساوي للأبد وتتخرجي بإذن الله

أميرة علي كوكب مهجور يقول...

انا مش بيهمنا امتحانات يا ماما الامتحانات هي اللي بتخاف مننا :))

ان شاء الله خير

كريم يقول...

اولا بحييكى على روحك الجميلة فى الكتابة وثانيا على الموضوع الجميل ده لكن بالنسبة للامتحانات انا خلصت تعليم الحمد لله لكن عمرى مافكرت فى قلق الامتحانات ده وربنا معاكى

E73 يقول...

بسم الله الرحمن الرحيم
السلام عليكم ورحمة الله وبركاته

سيبيها على الله يا أنوس
إن شاء الله هتحصل المعجزة وتلاقي نفسك عديتي كدة من غير أي مبررات

ربنا لما بيحب يكافئ حد

بابا طول عمره بيقولي حاجة وأنا مببقاش مقتنعة بيها في وقتها إلا أنها فعلا بتتحقق

بيقولي اللي تخافي منه مفيش أحسن منه

يعني إن شاء الله خير بس انتي زودي إيمانك بربنا وهو عند ظنك بيه

ربنا يوفقني ويوفقك يا رب ويكرمنا وينجحنا جميعا

صوت من مصر يقول...

ادعيلى معاكى
شكرا

c'est la vie يقول...

ربنا يوفقك ويارب تكونى عملتى كويس فالامتحان انا حاسة بيكى بنتى كمان عندها عقدة من الفرنساوى مع انها فمدرسة لغتها الاولى فرنساوى بس بعيلك من قلبى ربنا يفتحها فوشك قولى اميين

هي وظروفها يقول...

ربنا يوفقك يا ايناس متوجعيش قلوبنا عليكي الله يباركلك وطمنينا
وباذن الله هيحصل كل خير ...
شدسي حيلك عايزين نشوفك اديبه قد الدنيا ونتفشخر بيكي امام الناس
يارب يارب يارب تحلي ف الفرنساوي اللي انا عن نفسي بكره ام اللغه دي
بس يلا انت مجبره والمجبر لا يتراجع
دوسي بنزين وربك كريم

!! a7mad sala7 !! يقول...

خير ان شاء الله

التالتة تابتة :)

هوبتي يقول...

بصي ربنا يوفقك يارب وانتي ما تعرفيش الخير فين
ربنا بيقول اسعي ياعبد وانا اسعي معاك وطول ما انتي سايبه تكالك علي ربنا خلاص
وادعي له انه ينجحك يمكن دعائك الي بصدق دا هو الي يساعدك ولا ايه؟

يالي ربنا يوفقك يا جميل
وادعيلي انا بقي اتجوز عبد الفتاح هههههههههه

قولي يارب

Gehad mousa يقول...

ربنا يوفقك وتنجى يارب وباذن الله امتياز ...
وبجد حتى وانتى فى ايام الامتحانات مش نسيتى المدونه والمتبعنها علشانك بجد ربنا يكرمك ويوفقك وتنجحى ودوما ننتظر الجميل من الاجمل فهيا يا قمر

Lyssandra يقول...

خديها تحدي يا إيناس
وان شاء الله التالتة تابتة وتنجحي :)
ماتخوفيش نفسك وسيبيها علي الله

هاتخلصي امتي عشان عاوزة اكلمك وتكوني فاضيه ؟

Tarkieb يقول...

وياتري رفعتى راسنا ؟ ولا كالعادة..

Lady E يقول...

Ana keda : وحشاني اد البحر يا مرمر انتي وبودي حبيب خالتو

اللهم أمين

تسلميلي وان شاء الله هتعدي على خير

Lady E يقول...

Just waiting : اللهم أمين

حصل :)

يارب من بؤك لباب السما

I'm just waiting ان ده يحصل :)

Lady E يقول...

أميرة علي كوكب مهجور : ههههههه اومال ايه :)

يارب

Lady E يقول...

كريم : تسلم يا كريم الجميل هو روحك

يا بختك :)

اللهم امين

Lady E يقول...

E73: وعليكم السلام ورحمة الله وبركاته

اكتر من كده وربنا بيزيح :)

ربنا يكرمك انتي وباباكي وكل اللي بتحبيهم

اللهم امين

Lady E يقول...

صوت من مصر : ربنا يوفقك يا كيمو

وانت كمان ادعيلي

Lady E يقول...

c'est la vie : هي دي الحياة بالفرنساوي اه يانا :) كلام فرنساوي في مدونتي هعديها المرة دي :)

ربنا يباركلك في بنوتك ويخليهالك وتفرحي دائما بنجاحها

تسلميلي ويسلملي قلبك

اميـــــــــــــــن

Lady E يقول...

هي وظروفها : ربنا يكرمك يا وليد بعد الشر عليكم من وجع القلب

اللهم أمين

وانا كمان هتفشخر بيكم اومال ايه عيلة تدوينية جميلة وأي حد لازم يبقى فخور بيها

عندك حق ، دوست بنزين :)

Lady E يقول...

!! a7mad sala7 !! : يارب يا احمد التالتة تبقى ثابتة :)

ربنا كريم

Lady E يقول...

هوبتي : ربنا يكتبلك الخير يا قمرايا

يارب تتجوزي عبد الفتاح لو فيه خير ليكي

Lady E يقول...

Gehad mousa: ربنا يكرمك يا جوجو

انتوا والمدونة في قلبي يا قمرايا مستحيل تتنسوا :)

انتي اللي جميلة ورقيقة بجد

Lady E يقول...

Lyssandra : يارب يا ليسا :) ربنا كريم

ونعم بالله

جاوبت على السؤال :)

Lady E يقول...

Tarkieb : هههههههه طيب تصدق بقى لا تعليق :)