شنطة سفر

فقدت شهيتي للكتابة وبحاول ارجعها تاني ، زي كل سنة خلاص هسافر وبرغم ان البلد دي خنيقة لأي حد عايش فيها الا ان ليها حنين كبير جدا والأصعب من السفر تحضيراته وأرقه أصعب من السفر نفسه


وعلى أي حال في البوست ده نقلت كلام انا كاتباه من فترة علشان مسيبش المدونة فترة طويلة من غير كتابة

رواية في كل أسبوع يوم جمعة

أخر رواية قرأتها واخدت وقت كبير لغاية لما خلصت الرواية وفعلا زعلانة على وقتي اللي ضيعته فيها !

من أول ما خلصتها وأنا عايزة أكتب عنها انها كانت رواية قبيحة ووقحة وأغلب تعبيراتها فجة ووصف بعض المشاهد فيها فج وبدور على كلام أكثر لطفا بس مش لاقية

بس واضح ان ده رأيي لوحدي لأن الكاتب ترجمت ليه أعمال كتير والطبعة اللي قرأتها من الكتاب كانت الطبعة الرابعة

يعني الرواية مش وحشة وبتتباع كويس

على أي حال ده رأيي العام لكن الرواية فيها مميزات زي فكرتها الجديدة انها بتتكلم عن الانترنت وبتتكلم بلغة الإنترنت وزي التنوع الكبير اللي موجود في عالم الانترنت والعلاقات اللي بتربط المدونين مع بعض

يعني مثلا في اللي داخل التدوين في الموقع وهدفه دنيء وفي اللي داخل التدوين علشان يفضفض وفي اللي داخل التدوين علشان يحل مشكلة وفي اللي بيعمل دور الواعظ والفيلسوف وكل ده موجود عالنت زي العالم الحقيقي

الرواية فيها سخرية كبيرة جدا وتضاد بين اسمها اللي بيحمل رمز ديني وروحاني عند المسلمين وهو يوم الجمعة وبين محتوى الرواية اللي يبعد كتير عن المعنى ده

اعلان ميلودي السخيف

اعلان ميلودي الجديد شعاره ميلودي تتحدى قلة الأدب ، برغم ان الاعلان يبان هادف لكن الطريقة المقززة لكلام الميلودي مان واللي بيتكلم بطريقة كلها ملل لما بيقول : البنت اللي في الشارع دي أختك بتبين الولاد المؤدبين والمحترمين واللي بيحترموا البنات في الشارع بصورة عكسية يعني بمعنى اصح الإعلان عكسي !

سلام يا مدونتي ، ان شاء الله هرجعلك تاني قريب

دمياطية أنا

برغم اني تقريبا مش شايفة قدامي وكمان مكسلة أنزل صورة للبوست دلوقتي لأني لسه هوصل الموبايل بالكمبيوتر وبعدين ادور ع الصورة وبعدين انقلها ع الكمبيوتر وبعدين اعمل لها ابلود كل ده ! وبرغم ان عندي تعليقات عايزة ارد عليها بس في نفس الوقت عايزة انام واروح لعالم الأحلام لكن لازمن ولابندق اتكلم عن النهاردة قبل ما تفاصيله تروح من بالي وتتبخر كالعادة -وحتى بعدما بقينا الصبح لسه عندي نفس الاحساس-

واحنا في طريقنا للمنصورة الMP3 علق على كوبليه في أغنية لمنير والكوبلية بيقول : ده بكرة جايب نهار يستاهل المشوار ..... يبقى المصير في اليد " ومن كتر ما المقطع اتكرر زهقت من الMP3 وقولتله والله عرفت ان بكرة جايب نهار يستاهل المشوار
وكمان سمعت الأغنية اللي في المدونة حاليا وكانت عجباني جدا

النهاردة رحت المنصورة بقى بيني وبينها عمار وبدأت احفظ ملامحها ، المهم رحت بوكس اند بينز كالعادة بس مش عارفة ليه النهاردة مغليين أسعار الكتب بس برضه اشتريت كتب المدونين طبعا في الاول زي الضرب في الميت لأحمد الصباغ ووظيفة ماتمت لمايكل وكتاب اسمه تحولات في كيميا البشر مش عارفه هو بتاع مدونة ولا لأ بس الاسم مش غريب عليا ولغير المدونين سحابة صيف لكريم الشاذلي والخطوبة لبهاء طاهر وقبل أن تنتحر ل عبد الله دينور

ملقيتش ضحك مجروح لبلال فضل مع اني رايحة وناوية اجيبه اول كتاب وملقتش هل تبحث عن السعادة لمحمد غالية كلاكيت تاني مرة
في كتب استفزتني هناك زي كتاب اسمه طظ فيكم طبعا مستحيل هشتري كتاب ده اسمه وأصلا مفكرتش اشوف محتواه ، حسيت انه بيقول كده للقراء مع ان وارد جدا يبقى قصده حاجة تانية وده الاحتمال الأكبر وكتاب تاني كان اسمه عطر الأنثى تقريبا
رواية عجبني اسمها وفتحت أول صفحة لقيت مكتوب تحذير الرواية دي مينفعش اقرأها ولا أي حد من جيلي فقفلت الكتاب وحطيته مكانه ، صعب اوي لما تألف كتاب وتتعب فيه وبعدين هفوات زي دي تضيع تعبك وتخسرك حد كان ممكن يقرأ ليك

بعدها طلعنا على كوك دور مطعم اكله حلو طبعا ده غير انه بيفكرني بأول لقاء مدونين وبشيما أختي الكبيرة اللي حذفت مدونتها ونسيتنا على أد ما انا مفتقداها على اد ما انا فرحانه ليها وبدعيلها ربنا يوفقها في حياتها الجديدة بس طول الوقت في كوك دور كنت بفتكر لقاء المدونين في المنصورة بجد كان يوم جميل مستحيل يتنسي
وانا في كوك روحت أطلب الأوردر واخدت دوري ولسه هطلب لقيت واحد جه وطلب قبلي فاللي بتسجل الطلبات قالتله مش سمعاك تعالى الناحية التانية ، ف أنا سكتت خالص لكن استخدمت طاقتي الذهنية وقلتله في عقلي انت قليل الذوق انت قلييييييييييييييل الذوووووووووووووق فيظهر انه فهم او ظهر المعنى ده على تعبيرات وشي واتحرج وقاللي اتفضلي اني اطلب الأول وطبعا طلبت الاوردر قبله
بعد كده جه شباب قعدوا في الكرسي اللي ورايا ولأن الكراسي مرتبطة ببعض فالكرسي اتحرك بعنف لما قعدوا عليه وانا طبعا اتخضيت أصل مفيش حد عنده ذرة عقل يقعد على الكرسي وكأنه عايز يكسره وبعدين يفضل يضحك بهيستريا وفعلا أصحاب العقول في راحة
مع ان الأكل كان حلو أوي بس الغريب اني مش بعرف أكل كويس في المطاعم أو في الطيارة ! مفيش احلى من أكل ماما ربنا يباركلي في عمرها وصحتها

بعدها كنا في الشارع شفت أب وطفلته طالعين من محل ألبان . البنوتة كانت لابسة شنطة حمرا وباباها حضن ايديها بكل حب واهتمام
شوفتهم ولقيتني بتنهد من أعماق قلبي فكرتني بطفولتي وبحاجات مفقودة . في الوقت ده ماما كانت بتجيب فواكه جه على بالي انها هتجيب كرز أو بالمصري كريز وبعدين قلت لنفسي يا سلام كرز فريش في مصر ! ونفيت الفكرة من تفكيري وبعد شوية ماما جت بتقوللي عارفة جبتلك ايه؟ قولتلها ايه؟ قالتلي كرز ابتسمت وانا مش مصدقة قولتلها مستحيل أنا لسه كنت بفكر انك هتجيبيه ومتخيلتش انه يكون موجود
يبقى أنا كده في الجنة بقى بمجرد ما بفكر في حاجة بتجيلي الحمد لله

طبعا لأني في الكتكوتة مش بعرف أتفرج عالمحلات وأنا ماشية ، بس في نفس الوقت عندي عشق لفساتين الفرح بحب أوي أشوف تفصيلاتهم وأشكالهم وفساتين السهرة عموما شكلها مبهج جدا وموديلاتها راقية جدا في المنصورة وتقريبا كده ان شاء الله هجيب فستان فرحي من هناك ده بعد عمر طويل ان شاء الله :) من كام يوم كنت بشتري هدوم فصاحب المحل قاللي انتي ذوقك عالي أوي متأكد ان فستان فرحك هتجيبيه من بيروت :) اشمعنى بيروت مش عارفة

كلية الآداب في المنصورة كاتبين اسمها على مبنى الكلية باللون الأحمر مش فاهمه مين الذكي اللي خلى اسم الكلية يتلون باللون ده ولا تعليق

قابلنا أصحابنا في المنصورة وبعدين طلعنا على دكتور أنف وأذن أسمه يوسف شبانة المفروض كان معادنا الساعة 8 لكن وصلنا هناك 9 ونص والشارع ده فظيع على طول زحمة ، من كتر الزحمة اللي بيسوق بيتوتر ورجله بتوجعه لأنه ماشي على أقل سرعة لمدة كبيرة ده غير الحذر الشديد انك متخبطش حد من الماشيين ولا تخبط العربيات اللي بتقف فجأه قدامك ولا تطلع دماغك من العربية وتخبطها في أقرب حيطة انك نزلت المنصورة بالعربية
ساعة ونص بندور على مكان نركن فيه لكن مفيش ، في الأخر رحنا جراج مش قريب ومش بعيد عن الشارع اللي معظم عماراته فيها اطباء

المواصلات في المنصورة صعبة جدا وسواقين التاكسي بشوات مش بيركبوا أي حد معاهم ولازم اللي يركب معاهم يكون رايح أماكن محددة
ده غير المواصلات عموما لا تطاق هناك يعني لا اللي معاه عربيه مرتاح من الزحمة ولا اللي بيركب مواصلات عارف يلاقي مواصلات
ده أكبر عيب في المنصورة لكن غير كده المنصورة جميله جدا

وصلنا للعمارة اللي فيها عيادة الدكتور في الدور الخامس وطبعا الأسانسير بايظ والباشمهندس اللي مخطط العمارة عامل السلم صغير جدااااا جداااااااا علشان واخد كل مساحة السلم في الاسانسير فيادوب واحد بس اللي يطلع السلم ولو اتنين اتقابلوا ع السلم لازم يستنوا بعض علشان السلم مينفعش اتنين يمشوا جنب بعض فيه سلم غرييييييب صغير جدا ، بعدها طلعت الدور الخامس وروحي طبعا طلعت معاه ، في سلم تاني في العمارة الغريبة دي فلقيت بسم الله ما شاء الله واحد في الأربعينيات طالع السلم بكل رشاقة - فكرني بأوباما لما كان طالع سلم الطيارة-
المهم شوفته وبعدين كملت طريقي فسمعت واحد بيقول له ازيك يا دكتر انا جه في بالي دكتر ازاي يعني مش باين عليه خالص انه دكتر لابس كاجوال وجاي متأخر الساعه 10 ونص يبقى اكيد دكتر تاني غير اللي رايحين له ، دخلت العيادة وكانت زحمة جدا ولقيته دخل العيادة وسلم على المرضى ، بعد فترة انتظار دخلنا انا وماما ، لقيت حوض سمك فضلت العب معاه بس طبعا مش بشكل طفولي علشان البرستيج بس :)
بس بجد السمك كان شكله حلو أوي ، وطبعا مطلعتش هعمل عمليات ولا أي حاجه واخد بالك يا د. قبلاوي وبا د. بطوط حبوب وباقي المدونين اللي درسوا او بيدرسوا طب اللي كلهم قالولي طالما دكتورين قالولك تعملي العملية يبقى لازم تعملي العملية ! لما قولت عالمدونة ان المفروض اني اعمل عملية في الجيوب الأنفية وانا رافضة

طلع عندي حساسية ضد الملوثات أو الروائح النفاذة طبعا اتصدمت لأني بعشق البخور والبرفيوم وماما سألت الدكتور هستمر عالدوا أد ايه قالها كل ما الحساسية تنشط قلت للدكتر معنى كده ان الحساسية دي مش هتخف وهتفضل معايا طول العمر قاللي في وشي أيوة ولازم متتعرضيش لملوثات ! طب متقولهاش في وشي واستنى لما امشي لازم يعني تقولي الحقيقة المرة دي :(
الغريب ان ماما وأنا الحساسية دي ظهرت عندنا في نفس الوقت ! وللأسف دمياط كلها ملوثات علشان تصنيع الأثاث وللأسف كمان أعلى نسبة اصابة بالحساسية في دمياط من كتر التلوث اللي فيها وفاكرة لما كنت في الكلية وبتكلم مع زميلة في الموضوع ده قالتلي ان هي وجوزها جالهم حساسية برضه ومش هما بس ده في كتير برضه مصابين بالحساسية ويا شماتة أبلة ظاظا فينا

الحمد لله رحلة الرجوع كانت سلسة بس كان بيجي على بالي أخر حادثة عملتها و فجأه وانا ماشية لقيت عربية بوكس سودا واحنا بالليل وطافيه النور راكنه على الطريق السريع قدامي وبتبعد عني خطوتين وانا رايحه عليها بسرعة الطريق وثواني وهخبط فيها وطبعا ماشي جنبي بالضبط ميكروباص مش عايز يديلي سكة ولا طريق لأنه حيوان واللي راكن في نص الطريق من غير حتى اشارة انه راكن حيوان أكتر منه ، مكنش قدامي غير اني اخبط فيه
هديت السرعة على أد ما قدرت وجبت غيارات عكسية في السرعة و الحمد لله السرعة قلت ونجينا بأعجوبة من الحادثة اللي لو كنا عملناها كنتوا هتسمعوا في برنامج من برامج التوك شو عن حادث اليم على طريق دمياط وكنا هنبقى مجرد خبر ويموت

يخربيت الحكومة اللي تتصرف مع شعبها كده ، عربيه بوكس يعني المفروض اكتر واحد يحترم القانون

حسبنا الله ونعم الوكيل ومنه لله أي حد بيدمر البلد دي أو بيأذي أهلها

appearance and reality

">

"تبدو قطرة الماء نقية شفافة كبلورة فإذا ما كبرتها العدسات ظهرت فيها آلاف الشوائب ، ويظل القمر جميلا صافيا ما دام بعيدا فإذا ما اقتربت بدا لك كشاطئ قذر مهجور . حتى وجه التي تحب ، بشرتها الغضة المتوردة التي تأخذ قلبك، ما إن تضاعف قدرتك على رؤيتها حتى تتبدى لك كنسيج قبيح مجعد . في كل مرة تتأكد الحقيقة . ليس إعجابنا بالجمال إلا خداعا للنظر وكلما اتسعت الرؤية بانت التجاعيد."

من كتاب نيران صديقة لعلاء الأسواني

بلدي

بلدي بتتكلم اللغة الأولى في العالم ، اللغة اللي بيتاخد منها كل العلوم والناس كلها في كل بلد بيتعلموا اللغة دي لو عايزين يتقدموا في علمهم أو تجارتهم أو فنهم او حتى ثقافتهم وحياتهم

كل سنة بيجي لبلدي ملايين الطلاب المتعطشين للعلم واللي بيلاقوا كل ما تشتهي الأنفس من علم وتقدم في كل مجالات العلم في بلدي وبيروحوا بلدهم بعدما بيتأثروا بثقافة بلدي الراقية والعظيمة والمتألقة

بلدي هي محور الفن والتحضر كل سنة فيها أفلام مبتكرة بتسلب اللب وبتفرح القلب
وفي بلدي بتسمع أحلى الأصوات الملائكية اللي بتدخل على القلب على طول مع أحلى الألحان والكلمات المبدعة والمبتكرة
ومن بلدي وفنانين بلدي كل الدنيا بتتعلم

بلدي بتهتم بالإنسان وبتقدس الروح والانسان فيها بيحس بقيمته وبحريته وبيقدر يحقق ذاته لو اجتهد

الإنسان في بلدي طموح جدا وبيسعى للأفضل ومتفائل وبيحب الحياة وبيحتضن كل أهل الأرض وبيعاملهم بحب وسعادة

البنات والولاد في بلدي دايما فرحانين ومرحين وبينهم احترام متبادل

الطب في بلدي متطور جدا وفي علاج لكل مرض في الدنيا وعندنا أحسن مستشفيات وأحسن أطباء وممرضات وعلشان كده كمان في سياحة علاجية عندنا

في بلدي بتمشي بأمان ومبتخافش من سرقة أو تحرش أو حد يسرق نهار حريتك

وفي بلدي كل قصص الحب بتكمل ومفيش فيها دموع ولا حزن ولا حتى فراق

الناس صادقين ومعطائين ورائعين ولذوذين في بلدي

والناس كلها بتحترم القوانين وفرحانين بحياتهم

ولو عايز تعرف أخر كتابات الأدباء وأخر أنواع الموسيقى وأخر خطوط الموضة والبرفيوم وأي حاجة مهتم بيها هتلاقيها في بلدي

كمان في بلدي مفيش فقراء لأن كل الناس بتشتغل ومش بتحقر من أي عمل علشان كده كل ما تسافر في أي بلد في العالم بتلاقي مكتوب على المنتجات " صنع في مصر" وأد ايه بتكون فخور وفرحان

الناس بتقف بالطوابير علشان يهاجروا لبلدي لأنها مكان أحلامهم واللي بيزور بلدي وبيسافر لازم يحس بحنين ليها

كل ده وأكتر في بلدي بس من 7000 سنة ولأنه حصل مرة فممكن جدا يتكرر تاني وبلدي توصل لنفس المرحلة تاني - قادر على كل شيء-

روحانيات

أول حاجة عجبتني حوار اتقال امبارح في فيلم هندي بين الممثل الجميل سلمان خان وبين ممثل تاني
الحوار جاوب على سؤال بسأله لنفسي بقالي فترة بكلمات بسيطة

سلمان : الله بيننا وحولنا
الممثل التاني : لا بل هو في قلوبنا وفي صميم أعماقنا
سلمان : إذن لماذا يجعلنا نتألم ؟
الممثل الثاني : يجعلنا نتألم لأننا لا نتذكره وقت الفرح

سلمان : نعم لا نتذكره في الفرح
الممثل التاني : يجب أن نتألم لننجايه وندعوه ونطلب منه يد العون ونحس به



رواية الرجال والمال والشيكولاتة لمينا فان براج
الراوية بتدور حول اكتشاف الذات والروحانيات في الحياة ، حبيت الرواية دي أووووووووووي ولو كنت أعرف أحولها pdf وانزلها عالمدونة كنت عملت كده
الرواية بتتكلم عن الأحلام اللي عند كل انسان فينا وازاي أوقات كتير بنحط قيود على قدراتنا ومواهبنا والقيود هي الخوف بشكل عام من الفشل أو من التغيير أو حتى من المخاطرة الممتعة اللي طبعا في حدود المعقول يعني محدش يأذي نفسه ويقول بغامر لكن المغامرة واستكشاف الجديد ومواجهة الحياة هما اللي بيساعدوا الانسان انه يحقق طموحه وينجح
الرواية عجباني جدا وبنصح البنوتات أكتر من الشباب انهم يقرأوها ، مايا بطلة القصة حسيتها شبهي جدا وقريبة مني جدا
عجبني اقتباسات كتيرة جدا في الرواية علشان كده قررت اني احتفظ بيها واقرأها كل فترة بس اكتر اقتباس عجبني لغاية دلوقتي وانا وصلت لنص رواية هو :

" تحتاجين الى إرضاء رغبات قلبك من خلال عملك أولا قبل أن تبحثي عن الحب"

" من الأفضل أن تشعري بتحقق الذات أولا قبل أن تعثري على شريك حياتك . حينئذ ستدركين القيمة الحقيقية لنفسك ، لأن مفتاح سعادتك سيكون في يدك أنت . وفي ذلك الوقت لن تكوني عند وقوعك في الحب مجرد انسانة سهلة التعرض للجرح وتستجدي الحب من الطرف الأخر وتشعر بإرتباك عواطفها " ، " لقد حان الوقت لتفكي الأغلال عن روحك"

أخر أيام الكلية

صورة للمدرج من المكان اللي كنت بمتحن فيه واللي كنت باخد محاضراتي فيه واسمه مدرج المسرح

لو حكينا يا حبيبي نبتدي منين الحكاية
بإختصار نبتدي من 4 سنين لما عرفت بعد اسبوعين من الدراسة اني دخلت كلية الأداب في دمياط ووقتها كان اسمها فصول كلية الأداب بدمياط -احنا تاني دفعة انجليش تدخل الكلية-

كنت لسه محتارة بين أقسام الكلية وبالتحديد بين انجليش واعلام وكان ممكن أحضر محاضراتي في المنصورة او في دمياط ، اول محاضرة حضرتها كانت لدكتورة منى قاسم كانت محاضرة نقد أدبي ، لسه فاكرة وجوه الموجودين وكلهم مش فاهمين حاجة وأنا الوحيدة اللي استمتعت بالمحاضرة وفهمت أغلبها ، تاني محاضرة كانت لدكتور اسلام الصادي وبصراحة انبهرت من طريقة شرح دكتر اسلام في الأول كان بيكلمنا في الانجليش بشكل عام قبل ما يكون في منهج لسه فاكرة تفاصيل اليوم ده ويوميها مشيت مسافة طويلة في عز الحر والشمس وقررت اني هدخل قسم لغة انجليزية طبعا بعد صلاة الاستخارة و رأي بابا وماما

النهاردة كان أخر يوم نروح فيه الكلية كطلاب وأخر امتحان ، احساس ميتوصفش بجد احساس بالحرية زي فيلم brave heart في أخر مشهد freedoooooooooooooooom
فرحانة أوي ومبسوطة اوي وحاسة اني طايرة

على رأي كيكي ده بوست خيال علمي انا شبه اتخرجت :) الحمد لله

في اللجنة في امتحان النهاردة المراقبة كان شكلها تعبان شوية واستأذنت علشان تخرج من اللجنة لكن موافقوش انها تخرج ! وقتها انا اترعبت افتكرت المراقب اللي اتوفى في لجنة الامتحان وقلت في سري كده يا خالتو ستيتة ، كان لازم اقرأ الموضوع ده ربنا يستر :(
طلعنا من اللجنة وايمان زميلتي لقيتها بتندهلي وبتقولي انا فرحانة أوي وزعلانة كمان أوي - ده شعورنا كلنا-، سلمنا على بعض وودعنا بعض
في كذا ايمان في الجروب بتاعنا بس ايمان دي متوقعتش انها تودعني بالمشاعر الجميلة دي وخصوصا اننا كنا زمايل بس مش أصدقاء ، هي بنوتة ذوق جدا مرة كنت رايحة المحاضرة متأخرة ومكنش في مكان في البنش المفضل ليا تاني بنش فإيمان قالتلي ده احنا نقوم وانتي تقعدي يا انوسة :) وفعلا وسعتلي مكان جنبها سلمنا على بعض وخرجت من المدرج

بعدها لقيت دكتر أشرف موجود في الكلية طبعا فرحت لأن النهاردة أخر يوم وكان نفسي أسلم عليه وزعلت أوي لما شوفته الصبح بيخرج من الكلية قبل ما أسلم عليه ، والحمد لله ان تقديراتنا في الأدب الأمريكي كويسة ومفيش حد شايل المادة :) عقبال باقي المواد يارب

بعدها اخدنا وقت واتجمعنا وكنا بندور على بعض ، دخلنا الكلية وقولنا للأمن ان احنا في سنة رابعة وعايزين نتصور فسمحوا لنا نتصور في جنينة الكلية جنب المكان اللي الدكاترة بيركنوا فيه عربياتهم واتصورنا وضحكنا وكنت انا ونورا وداليا وايمان وايمان ونورهان ونورا وانوار وندى جت بعد شوية وبعدين كنت عايزة اتصور جوه الكلية بس كان في لجان وطلاب بيمتحنوا ف ايمان مسكت ايدي ومرضيتش تسيبني لغاية ما طلعنا من الكلية وانا بقولها سيبي ايدي عايزة اتصور جوه الكلية فواحد طيب من حرس الكلية قاللي انتي اصلا عايزة تتصوري جوه اللجنة :)

بعدها طلعنا عالنيل وقابلت غادة ، غادة كانت من اول البنوتات اللي عرفتهم وانا في اولى كلية وكنا الترم الأول دايما مع بعض لغاية ما اتفرقنا وأخدتنا الأيام والنهاردة أخر يوم شوفتها واتكلمنا كتير عنها وعن أصحابنا وقالتلي ان باباها اتوفى ف انا اتصدمت وقولتلها البقاء لله بعدها قالتلي وكمان هبة وسارة باباهم اتوفى ف اتصدمت تاني لأني كنت عارفة باباهم الله يرحمه لأن سارة وهبة كانوا معايا في ابتدائي واعدادي وعمو الله يرحمه كان طيب جدا فغادة قالتلي متقابلناش من زمان واخر يوم في الكلية وبقولك اخبار زبالة كده قولتلها ولا يهمك انتي بجد كنتي واحشاني

اتصورت انا والبنوتات عالنيل وبعدين روحنا للكتكوتة وركبنا احنا ال6 في الكتكوتة وعلى رأي المثل كتكوتة هنية تكفي ستة :) نورا ونورهان قعدوا جنبي وبعدين كل شوية كنت بهزر مع نورهان وبقولها أول ما بندخل الكتكوتة نورهان قومي شوية علشان فرامل اليد علشان متقوليش بس ان ده تحرش :) وقعدنا نضحك ونهزر كلنا وطلعنا على الصفوة مول اللي اول مرة اروحه كانت النهاردة وأول محل دخلناه كان محل فساتين الأفراح وطبعا صورت لكن اللي كان هناك قاللي لو سمحتي ممنوع التصوير :( قولتله ماشي ، ما انا كنت صورت خلاص نياهاهاهاها

المول في حاجات جميلة جدا ومعظم زميلاتنا كانوا هناك برضه :) ، اتصورنا كتير ومشينا كتير لدرجة ان رجلي خلاص دعت عليا وقعدت أقول أحد أحد
وبعد مناقشات عديدة طلعنا من المول وقعدنا بره علشان نقرر هنروح فين وفي الأخر اشترينا حاجات سريعة سندوتشات وعصير وروحنا قعدنا عالنيل تاني وكان في نحلة مش عايزة تسيبنا معجبة جدا بينا ، اتكلمنا كتير وودعنا أيام الكلية وكلنا حسينا النهاردة ان احنا في كلية بجد وان في حاجة اسمها صداقة في الكلية وأتفقنا اننا مش هننسى بعض وهنخرج تاني مع بعض قبل ما اسافر ان شاء الله وكمان هنتكلم عالايميل
ودعنا بعض لكن انا مش هسميه وداع هسميه وعد بلقاء جديد
وأسيبكم مع أغنية بحبها جدا اسمها it is not goodbye


">

كلها بكرة بس وبعده :)

اليوم اللي قبل الأخير اللي هكتب فيه يومياتي في اخر ترم في امتحانات الليسانس

كلها بكرة بس وبعده واخلص الامتحانات ان شاء الله

الحمد لله ، الحمد لله ، الحمد لله

يارب بس ايام الامتحانات تكمل على خير والنتيجة تفرحنا احنا وطلاب الثانوية العامية بجد قلبي معاهم

امبارح صحيت من النوم مفزوعة ، فكرت ان امتحان الترجمة فاتني مع ان الامتحان كان النهاردة :)

وامبارح كانت حالة الاحباط عندي عالية جدا لغاية لما جالي ايميل جميل اوي اسمه ألست تسعد اذا جعلت الأخرين سعداء ، بمجرد ما قرأت الايميل فعلا حسيت بسعادة وعلشان كده هنقله ان شاء الله للمدونة بس بعدما اخلص يوميات الامتحانات اللي بعد يومين هتبقى ذكريات

امبارح كلمت ايمان زميلتي في التليفون وقولتلها تحاول بقدر الإمكان متتأخرش عن اللجنة وخصوصا انها قريبة من الكلية ، والنهاردة الصبح انا اللي اتأخرت :) عن الامتحان ، كان يوم غريب اوي الصبح ، مكنتش قادرة اصحى من النوم وانزل الكلية علشان معاد الفرن اليومي اللي مجازا اسمه مدرج

الكتكوتة كانت بعافية شوية النهاردة فيها مشاكل في الميكانيكا ووصلتني للكلية بالعافية وكانت كل شوية تطفي ومش عايزة تمشي اكتر من سرعة 30 وبعد السرعة دي بتبقى عاملة زي ما تكون جمل او دبابة مش بتمشي بإنسيابية بتبقى غريبة اوي ، ده غير كمان ان الطريق كان زحمة اوي وواقف وفين وفين على ما الزحمة فكت شوية

بدأ الامتحان وكان 4 أسئلة نعلق عليها و4 مقالات قصيرة نترجمهم وطبعا الوقت سرقنا وبالرغم اني بحب الترجمة من الانجليزي للعربي الا ان تاني قطعة كانت مكلكعة بطريقة غريبة

تخيلت حلول للحر المرعب اللي بيبقى في المدرج ومن ضمن الحلول ان يبقى في ناس بيبعوا مشروبات مثلجة وحاجات ساقعة عصائر , قهوة متلجة , شاي مثلج ، ايس كريم ، بيبسي او كولا مع اني بكره الاتنين الاخرانيين دول وطبعا وهما ماشيين في المدرج هيقولوا حاجة ساقعة بيبس وقد كان شوية ولقيت ام محمود معاها مية وعمالة بتهزر وبتقول حاجة ساقعة بيبس اشرب يا حرااااان :) والمية مش ساقعة اطلاقا عرفت لأن البنوتة اللي جنبي كانت هتشرب مية فوديت لها الكوباية

ورقة الأسئلة كانت متوحشة بقرأ فيها وبحط الورقة على جنب ، الورقة جرحت ايدي ! استغربت اوي فعلا ورقة متوحشة ، والبنوتيين اللي قاعدين ورايا عمالين يتكلموا ويرغوا وانا عندي رغبة مكبوتة اني ازعق فيهم ، ده غير المراقبين اللي مجرد كلامهم بيطير الأفكار والترجمة أصلا بتبدأ بفكرة

رحت النهاردة جددت الاشتراك في المكتبة ، واستعرت روايتين رواية مترجمة اسمها الرجال والمال والشيكولاتة لمينا فان براج ورواية تانية بدأت فيها النهاردة ووصلت للصفحة ال14 ومكملتش قرائتها علشان تأنيب الضمير علشان عندي امتحان والمفروض اني اذاكر ، الرواية اسمها في كل اسبوع يوم جمعة

اخدت من الرواية شوية صدمات في الاول من بعض الكلمات ومن الحقيقة المخيفة اللي ظهرت في اول شخصية

مكتوب على الغلاف ان الرواية جريئة ، شفت الكلام ده بالصدفة بعدما استعارتها وفي فرق بين الجرئة والوقاحة

اتمنى ان الرواية متكونش وقحة وعلشان كده مش هحكم عليها من اول صفحات ومش هقييمها دلوقتي

النهاردة كان اخر يوم نتجمع فيه انا وزميلاتي ونراجع العنواين الأساسية للإمتحان اللي جاي واحنا ماشيين كل واحدة فينا كانت حاسة بمرارة الفراق ، لكن انا كنت عاملة حسابي على اللحظة دي من سنة اولى وخبيت شوية سكر في روحي وقلبي علشان اللحظات المرة دي

اخر امتحان ان شاء الله الامتحان الجاي تحليل نصوص

عندما يسكنني الحزن ويبكيني الضجر

اخر امتحانات وأخر سنة في الكلية سنة الليسانس ، السنة اللي احيان كتير حسيت اني مش هوصلها مشاعر كتير متداخلة بين التفكير في ان خلاص هسيب المرحلة الجامعية وبين يا ترى اللي جاي هيبقى شكله ايه ويا ترى الدنيا من غير كلية ودراسة عموما عاملة ازاي
النهاردة كان عندي امتحان اللغة العربية والحقيقة اني بقيت بخاف من نفسي ، معظم الأسئلة اللي بتنبأ بيها او ببقى حاسة انها هتيجي بتيجي بالرغم اني مش ببقى متأكده انها هتيجي في الامتحان او لأ بيبقى مجرد احساس
الكتاب امبارح كان كبير اوي 400 صفحة ومش محذوف منه اي حاجة وبرغم انه لونه بمبي بس ميشجعش اي حد انه يذاكره
امبارح بالليل معرفتش انام خالص ومع ذلك معرفتش اذاكر وعرفت انام شوية بعدما نور الصبح طلع وسمعت صوت العصافير وبعدين صحيت من النوم والصداع مفارقنيش لغاية بعد الامتحان

قبل اللجنة كنت بفكر هو ليه مفيش ولا مرة الامتحانات جاتلنا أسئلة اختيارية ، ليه كلها اجبارية كانت مجرد فكرة بس فكرة قوية شوية فكرت فيها كتير
رحت الامتحان واتفاجئت ان الأسئلة النهاردة كانت اختيارية :) نختار الأسئلة اللي نجاوب عليها :) ،
وعكس ما توقعت الامتحان كان كويس الحمد لله

نيجي بقى للجو العام بتاع المدرج طبعا حر جدا كالعادة واحنا معاد امتحاناتنا من الساعة 12 ونص للساعة 2ونص يعني في أكتر وقت حر في اليوم وانا داخلة المدرج قلت الأذكار اللي قبل الامتحان ومعاها حان الأن موعد الانصهار اليومي في المدرج حسب توقيت مدينة دمياط وكلياتها وعلى المقيمين خارجها انهم يحمدوا ربنا علشان مش بيمتحنوا في الحر ده

س : ايه فايدة ورقة الأسئلة؟
ج : طبعا علشان نعملها مروحة علشان متطلعش روحنا من الحر وكمان المراقبين بيعملوا كده
س2 : ايه فايدة البنش اللي بنحل الامتحانات عليه؟
ج2: البنش مش لحل الامتحانات البنش معمول علشان في الجو الحر اوي الدهان بتاع البنش يلزق في ورقة الاجابة ويبهدلها ويخلي شكلها مش حلو وبما ان البنش لونه بني فأكيد ورقة الاجابة بتبقى بني في بيج في رصاصي من القلم الرصاص في ازرق وطبعا الدكاترة او المعيدات اللي بيصححوا مش هيعرفوا ان الورقة بتبقى كده من الحر

س3 : هما الطلاب بيغشوا ليه؟
ج3: علشانهم اغبيا واغلبهم اليومين دول بيتطردوا من اللجنة وبيتبهدلوا ومش كده وبس ده انا عرفت فتوى كمان والعهدة على المفتي ان اللي يغش في مادة من المواد وشغله بعد كده يعتمد عليها يبقى فلوسه كلها حرام !

س4 : هو مش سؤال ده شعار : " المراقبين بيهيسوا واحنا معاهم " النهاردة قبل معاد انتهاء الامتحان بنص ساعة واكتر المراقبين قالولنا لسه ربع ساعه وقبل ما ينتهي معاد الامتحان بربع ساعة قالولنا لسه 5 دقايق ! صباحو كدب على الطلاب المعذبون في الأرض

بعدما خلصت الامتحان ، طلعت من بوابة الكلية كالعاده ، مليش نصيب احب الكلية دي كل ما بحبها بتحصل حاجة تخليني مش قادرة احبها ومش قادرة احس اني دخلت كلية اصلا ، بصيت على الكتكوتة واتخضيت نسيت انا ركناها فين ! وخصوصا ان قبل كده كنت راكناها في مكان خرجت من الكلية ملقتهاش ولقيتها في مكان تاني علشان ماما كانت جاية تاخدني من الكلية ، والنهاردة اخدت حوالي دقيقتين لغاية ما افتكرت مكان الكتكوتة.

مفتقدة بابا بطريقة مش عادية ، بابا السنين اللي فاتت كان بيوصلني كل يوم الامتحانات ويديني شوية حماس وتفاؤل قبل الامتحان
بابا بجد واحشني ومفتقداك جدا وربنا يهون الأيام وربنا ميحرمنيش منك ويباركلي في صحتك وعمرك

كنت خلاص همشي بعد الامتحان لكن لقيت زميلتي بتتصل بيا ، استنينا علشان جايين معاكي والجو حر جدا وشمس جدا والدريكسيون في الكتكوتة بيلسع جدا وقولتلهم يا جماعة متتأخروش ولما اتأخروا كنت همشي لكن ماما قالتلي استني زميلاتك ووصليهم يمكن لما نستناهم في الحر ده"تتسد عننا فوهه من فوهات جهنم " واستنيتهم فعلا ومشينا مع بعض

الامتحان الجاي ان شاء الله ترجمة وربنا يستر بعد الترجمة اللي حصلت مع ثانوية عامية ، سحاب الرماد البركاني والهجرة الغير شرعية ودول ثانوي مش تخصص اومال التخصص بقى يا ترى هيعملوا فينا ايه؟ ان شاء الله خير

-------------

ع الهامش : فتحت التعليقات
عنوان البوست مأخوذ من قصيدة كن صديقي ل د. سعاد الصباح

كلياتنا بتتقدم بينا !

نفسي مرة واحدة بس ارجع من الامتحان فرحانة ، بس حتى الاحساس ده مبقاش مهم لأن مش مهم الطالب يحل كويس في الامتحان او لأ ، المهم هو نتيجة الامتحان ايه ودي اللي بتفرح او بتزعل ودي غالبا بتبقى ببركة دعاء الوالدين

بيتهيألي خلاص اخدت مناعة ضد الامتحانات المزعجة وهانت كلها 3 امتحانات

بنوتة صحبتي بتقول عايز تعيش من غير اكتئاب؟

قوم وولع في الكتاب على اد ما النكتة بتضحك لكنه ضحك كالبكا

احنا نسينا ان ديننا بيقول لنا " طلب العلم فريضة على كل مسلم ومسلمة" ونسينا كمان حديث الرسول صلى الله عليه وسلم : قَالَ رَسُولُ اللَّهِ ( صلى الله عليه وسلم) : " مَنْ سَلَكَ طَرِيقاً يَطْلُبُ فِيهِ عِلْماً سَهل اللَّهُ بِهِ طَرِيقاً إِلَى الْجَنَّةِ ، وَ إِنَّ الْمَلَائِكَةَ لَتَضَعُ أَجْنِحَتَهَا لِطَالِبِ الْعِلْمِ رِضًا بِما يصنعِ ، وَ إِنَّهُ يَسْتَغْفِرُ لِطَالِبِ الْعِلْمِ مَنْ فِي السَّمَاءِ وَ مَنْ فِي الْأَرْضِ حَتَّى الْحُوتِ فِي الْبَحْرِ ، وَ فَضْلُ الْعَالِمِ عَلَى الْعَابِدِ كَفَضْلِ الْقَمَرِ عَلَى سَائِرِ النُّجُومِ لَيْلَةَ الْبَدْرِ ، وَ إِنَّ الْعُلَمَاءَ وَرَثَةُ الْأَنْبِيَاءِ ، إِنَّ الْأَنْبِيَاءَ لَمْ يُوَرِّثُوا دِينَاراً وَ لَا دِرْهَماً وَ لَكِنْ وَرَّثُوا الْعِلْمَ ، فَمَنْ أَخَذَ مِنْهُ أَخَذَ بِحَظٍّ وَافِرٍ " .[1]

امتحان الأدب المقارن النهاردة كان غير كل امتحانات الأدب المقارن السنين اللي فاتت وكان في علامات استفهام كتير قبل الامتحان محدش جاوبلنا عليها –ساعات بحس ان الاستفسار عن الامتحان جاي ازاي سر من الأسرار الحربية- أبسط الاستفسارات اننا لازم نجاوب بقلم لونه أسود طيب ليه؟ هو كده

ولازم تسيبوا صفحة بين كل صفحة اجابة ليه؟ هو كده

بس القلم الأسود اكيد ليه معنى كبير اوي ان نفسيتنا كطلاب شبهه

والصفحات الفاضية بتعبر عن الفراغ العاطفي تجاه الكلية

دخلنا الامتحان واحنا ملتزمين بالتعليمات اللي اتقالتنا في المحاضرة وبعدين جت واحدة بعد ربع ساعة من الامتحان – مش عارفينها أساسا- قالت لنا متسيبوش صفحات واكتبوا بأي قلم ازرق او اسود ، طيب ليه الكلام ده متقالش في المحاضرة وليه اللخبطة دي!

هو من حقنا ان يكون عالأقل في مروحة في المدرج ولا احنا كده بنطلب كتير ، طلاب كتير ومراقبين ودكاترة في مكان واحد وبيجمعهم انهم في فرن كبير اسمه المدرج ، مفيش فيه تهوية كويسة والجو حر بطريقة لا تطاق . انا مش لاقية مبرر ان المدرج يكون كده حتى لو مفيش ميزانية في الكلية ممكن يخلوا الطلاب أبسط حاجة يجيبوا مراوح علشان عالأقل يقدروا يتنفسوا وهما بينطحنوا :(

على أي حال الفاشل مش هو اللي حاول ومتوفقش لكن الفاشل هو اللي بيستسلم ويرضى بالفشل مهما كانت الظروف .

وفي الأخر"اوعى تسمح لأي حد يقولك متقدرش تحقق أحلامك ، عندك حلم لازم تحميه وتكافح علشانه لأن أحلامك مش هتتحق الا بيك ومحدش هيحققها ليك غيرك ".

الامتحان الجاي ان شاء الله أدب عربي حديث

">">