روحانيات

أول حاجة عجبتني حوار اتقال امبارح في فيلم هندي بين الممثل الجميل سلمان خان وبين ممثل تاني
الحوار جاوب على سؤال بسأله لنفسي بقالي فترة بكلمات بسيطة

سلمان : الله بيننا وحولنا
الممثل التاني : لا بل هو في قلوبنا وفي صميم أعماقنا
سلمان : إذن لماذا يجعلنا نتألم ؟
الممثل الثاني : يجعلنا نتألم لأننا لا نتذكره وقت الفرح

سلمان : نعم لا نتذكره في الفرح
الممثل التاني : يجب أن نتألم لننجايه وندعوه ونطلب منه يد العون ونحس به



رواية الرجال والمال والشيكولاتة لمينا فان براج
الراوية بتدور حول اكتشاف الذات والروحانيات في الحياة ، حبيت الرواية دي أووووووووووي ولو كنت أعرف أحولها pdf وانزلها عالمدونة كنت عملت كده
الرواية بتتكلم عن الأحلام اللي عند كل انسان فينا وازاي أوقات كتير بنحط قيود على قدراتنا ومواهبنا والقيود هي الخوف بشكل عام من الفشل أو من التغيير أو حتى من المخاطرة الممتعة اللي طبعا في حدود المعقول يعني محدش يأذي نفسه ويقول بغامر لكن المغامرة واستكشاف الجديد ومواجهة الحياة هما اللي بيساعدوا الانسان انه يحقق طموحه وينجح
الرواية عجباني جدا وبنصح البنوتات أكتر من الشباب انهم يقرأوها ، مايا بطلة القصة حسيتها شبهي جدا وقريبة مني جدا
عجبني اقتباسات كتيرة جدا في الرواية علشان كده قررت اني احتفظ بيها واقرأها كل فترة بس اكتر اقتباس عجبني لغاية دلوقتي وانا وصلت لنص رواية هو :

" تحتاجين الى إرضاء رغبات قلبك من خلال عملك أولا قبل أن تبحثي عن الحب"

" من الأفضل أن تشعري بتحقق الذات أولا قبل أن تعثري على شريك حياتك . حينئذ ستدركين القيمة الحقيقية لنفسك ، لأن مفتاح سعادتك سيكون في يدك أنت . وفي ذلك الوقت لن تكوني عند وقوعك في الحب مجرد انسانة سهلة التعرض للجرح وتستجدي الحب من الطرف الأخر وتشعر بإرتباك عواطفها " ، " لقد حان الوقت لتفكي الأغلال عن روحك"

وتجمعنا الصدف يا عيني - عن عمر طاهر وأخرين-

بدأ الموضوع بإيميل جالي ع الفيس توك توك فتحت الايميل ولقيت مفاجأه - يمكن بالنسبة لغيري عادي بس بالنسبة لي مفاجأه-

الصيف اللي فات قضيته في قراءة كتب أنيس منصور وقرأت غادة الكاميليا ولباولو كويلو وشوية لماركيز وبالصدفة البحتة لفت نظري كتاب اسمه جر ناعم

الاسم غريب وشدني وعملت داون لود للكتاب والغريب اني وصلت لنص الكتاب أول مرة أقرأه ودي كانت اول مرة تحصل مع كتاب ، فضلت أقرأ من الساعة واحدة صباحا وفجأه لقيت نور النهار طلع وانا لسه مندمجة في الكتاب ، و ده ميمنعش ان كان في في الكتاب بعض المفردات اللي كانت بتخليني أذبهل قدامها

وبعدين بحثت عن كتب تانية لنفس ذات الكاتب وجبت كتاب شكلها باظت وعجبني برضه وبعدها قهوة وشيكولاتة ولأني بعشق الشوكولاته فقرأت الكتاب هو عبارة عن شعر وعجبني برضه أشعار فيه

يا ترى عرفتوا انا بتكلم عن مين ؟ بتكلم عن الكاتب الساخر عمر طاهر كان حفلة توقيع كتبه النهاردة في مكتبة بوكس اند بينز في المنصورة

هما في الايميل عالفيس توك توك كاتبين حفلة توقيع عمر طاهر مش عارفة مين اللي عايزين يوقعوه :)

المهم طبعا معرفتش انام كالعادة وبعدين كنت قلقانة من فكرة السفر لوحدي للمنصورة وخصوصا انها أول مرة أسافر لوحدي -جوه مصر- علما اني بتوه قدام بيتنا :)

بين دمياط والمنصورة حوالي 67 كيلو ، الميكروباصات بياخدوها في ساعة وانا باخدها بالكتكوتة في ساعتين ازاي معرفش :)

ركنت الكتكوتة وأخدت تاكسي للموقف بتاع الميكروباصات وكان في ميكروباصين ميكروباص مليان وميكروباص فاضي فيه واحدة بس ف رحت الميكروباص المليان على امل ان الميكروباص مش هيستنى ناس كتير وهيبدأ الرحلة على طول ، لكن اللي حصل العكس :) الميكروباص الفاضي اتملا ومشي قبل الميكروباص اللي كنت فيه - اييييييييه دنيا-

سواق الميكروباص راااااااااايق وماشي بطيء أوي فرسني وبعدين لقى الكاوتش مهوي شوية فوقف عند بتاع كاوتشات زود الكاوتش وشوية ووقف في محطة غاز :) لو ركبت جمل كنت وصلت أسرع ، اللي عجبني اني كنت قاعدة جنب بنوتات طيوبين أوي وكانوا عمالين يتكلموا عن الامتحانات - لا حديث يعلو فوق صوت المعركة-

طبعا طول الطريق حاسة اني بحلم علشان مسافرة لوحدي ، مع ان العيال اللي أصغر مني وكلياتهم في محافظات تانية بيسافروا كل يوم :) بس هي حاجة جديدة عليا ودي متعة ان يبقى عندك 21 سنة بحالهم بتحس انك بقيت كبير ويعتمد عليك
طول الطريق بفتكر ذكريات سفري مع ماما وبابا - وهي ذكريات كتير لأننا رحالة -

وصلت الموقف بتاع طلخا الجديد في المنصورة وفي ثانية لقيت تاكسي ، ورحت على طول على بوكس اند بينز وكويس متوهتش المرة دي :) هيييييييييييييه لكن شفت حشد بره المكتبة ف اتوترت شوية وافتكرت اني نسيت أكل من الصبح - مع انه ميبانش عليا اني بنسى اكل - :)
فجبت عصير وبسكويت وحطيتهم في الشنطة

دخلت المكتبة ، متألقة كالعادة ومفيهاش ولا كتاب من اللي عايزاهم كلهم خلصانين :) لحقت أخر نسخة من قهوة وشيكولاتة وأخر نسخة من جر ناعم - قرأته قبل كده بس نسخة الكترونية - وكمان جبت رصف مصر والخيانة مشوار محرج لحد الحزن وكلهم لعمر طاهر - كنت حاسة اني مستلمة كتب المدرسة :)

لفترة حسيت بالوحدة ومفيش اماكن ، معظم الناس جايين جروبات وأصحاب مع بعضيهم وانا ALONE وفجأه لمحت حد ، وقعدت افتكر شوفته فين شوفته فييييييين فيييييييين انطقي يا ذاكرة فين في لقاء مدونين المنصورة مصطفى فك زنقة كان هناك ، بعدها بشوية ببص على باب المكتبة بالصدفة شفت عمر طاهر داخل ومعاه ولاد داخلين المكتبة مكنش يفرق كتير عنهم لكن عرفت ان هو عمر طاهر واتأخر 8 دقائق عن معاده

وبدأت الندوة وبدأ الحشد يبنوا الحيطة حيطة حيطة ومشوفتش أي حاجة من اول الندوة وبعدين قلت يعني انا مسافرة كل المسافة دي ولسه راجعه تاني لسفر علشان لا اسمع ولا أرى ولا اتكلم ، رحت لمسؤل المكتبة ولقالي مكان حلو في أخر المكتبة بس سمعت ورأيت والمفأجه اني كمان اتكلمت وانا مكنتش ناوية اتكلم أصلا ، بس عمر طاهر كان بيقول والجماعة اللي ورى دول معندهومش أي أسئلة :) والله كان عندي كتير بس بيطيروا وفي المواقف اللي زي دي بتحايل على صوتي يطلع وغالبا مبيطلعش

المهم سألته عن التدوين ورأيه في التدوين ؟ قاللي كلام كتير حلو عن التدوين وان في مواهب بجد بتطلع من التدوين زي رحاب بسام و غادة عبد العال ، بس ده ميمنعش ان في ناس كتير مدوناتها تهييس ، فقولتله بس ممكن نكتب حاجات شخصية ويبقى فيها قيمة وافكار - بيتهيألي انا بكتب بالطريقة دي - فقاللي أيوة دي حاجة كويسة جدا المهم ان اللي بيكتب يكون عنده حاجة يقدمها ، حاجة يضيف بيها للقارئ ..... الخ
انا مش فاكرة الكلام نصا انا بس فاكرة محتواه

وفي غيري سألوه عن برما - اللي متابع جريدة الدستور هيعرفه - المهم ان برما طلع شخصية خيالية ودي حاجة كنت متوقعاها

وقال كمان ان كتبه في الأول فشلت ودي حاجة تخليني ابقى واثقة ان تأجيل أول كتاب ليا قرار صح ، لأني مش ناوية انشر الكتاب الا لما اكون حباه جدا علشان لو لا قدر الله فشل مبقاش زعلانة لاني عملت حاجة بحبها
مع اني ومن غير غرور واثقة انه ان شاء الله هينجح بيكم قبل ما يكون بيا

عمر طاهر كمان قال احنا في زمن الأقزام ودي حاجة انا مقتنعة بيها ، المحدودين الموهبة بقوا عمالقة لكن كمان قال ان التاريخ هو اللي هيحدد مين بجد اللي كان عملاق ومين اللي هيمحيه الزمن
ويارب اكون واحدة من اللي الدنيا مش هتنساهم وتذكرهم بالخير ، امتى؟ الله اعلم ، ازاي؟ برضه الله اعلم

الوقت جري بسرعة جدا ولازم أسافر علشان متأخرش ومش ضامنة المواصلات ف رحت مرة تانية لواحد من المسؤلين في المكتبة ، وقولتله هو لسه على الندوة أد ايه قاللي عالأقل نص ساعة قولتله طيب انا مسافرة والمفروض اخد التوقيع دلوقتي على الكتب أعمل ايه ؟

قاللي : خلاص روحي قوليله انك مسافرة وخليه يوقع لك على الكتب وقد كان بعد ما انتظرت شوية واقتحمت الحشد ووقتها لقيت كمان المدونة العسولة مي حلم كان واتكلمنا شوية ، وبعد شوية استأذنت من الكاتب عمر طاهر انه يوقعلي على الكتب علشان هسافر وفعلا وافق وأخد الكتب والقلم بتاعي كمان وفضلوا في ايده نص ساعة :) وماما كانت بتتصل بيا كل 5 دقائق وبينهم مسجات :)

اخيرا وقعلي على الكتب وقاللي اوقعلك على ال4 كتب قولتله أيوة ياريت انا اتمنى

فوقع لي على الكتب وقلت مش هشوف التوقيعات الا لما ابعد عن المكتبة

اللي لفت نظري ان التوقيع كلمتين وبس :)وكمان مكتوب اسمي الأول بس مع اني قولتله اسمي وأسم العيلة

وكمان مردش على سؤالي ليه مفيش تعليقات القراء على مقالاته في صفحة جريدة الدستور عالنت :( مع اني تقريبا عارفة الاجابة

المهم عملت زي سندريلا لما اتأخرت وسيبت المكتبة وبعدما بعدت عن المكتبة قرأت التوقيعات وابتسمت منهم توقيع بيقول : - اسمي - وبعدين
فرصة سعيدة جدا :) والغريب ان التوقيع ده على كتاب الخيانة مشوار محرج لحد الحزن :) طب ازاي الكتاب فيه حزن وخيانة وازاي فرصة سعيدة
ده اكتر توقيع خلاني أبتسم

العربيات بتجري جدا في منطقة المشاية واللي عايز يعدي الطريق أحسنله يشرب ريدبول لأنه بيعطيك جوانح علشان تطير وتعدي للناحية التانية ، لقيت تاكسي بسهولة وكان السواق ومراته والعربية 128 وأول مرة اسمع الكلام الشعبي لايف
ولقيت سواق التاكسي بيوجهلي الكلام : يا انسة عاييه عشه ولا عشين ؟
انا بإذبهلال : نعم؟
عشه ولا عشييــــــن؟
انا برضه : - طبعا مش فاهمه في ايه- مين؟
سواق التاكسي : لو عايزة فكه يعني عشه ولا عشين
انا : - ااااااااه عشرة ولا عشرين - لأ شكرا معايا فكه

وصلت الموقف اللي بره المنصورة وطلعنا على طول وفي دمياط ركبت تاكسي علشان أوصل للكتكوتة ، سواق التاكسي من أكتر نماذج البشر اللي بحترمها ، شاب في العشرينات معاه بكالوريوس تجارة من جامعة حلوان ، كلامه راقي جدا وعنده حس دعابه رهيب ، وقولتله والله كويس انك مستنتش الوظيفة واشتغلت على طول ، قاللي ما هو ده مكتبي والسكرتيرة اسمها اسماء بس مش فاضية النهاردة :)
بجد فخورة ان في شاب في بلدي ما شاء الله متفائل كده وروحه مرحه كده ومستناش فرصة الشغل ، هو اللي عمل لنفسه فرصة شغل

الحمد لله اليوم كله كان حلو ، ربنا يحلي أيامنا كلها

شكرا ماما وبابا

شكرا بوكس اند بينز

شكرا عمر طاهر

شكرا ليكم كلكم وبصراحة يبقى بطل اللي يقدر يقرأ كل ده ويعلق كمان :)

ربع جرام

فاكرين من شهرين كده اتكلمت على رواية ربع جرام في البوستات دي دماغ نام ننا هو و
دعاء السكينة

اللي شاف الرواية دي هيعرف انها لسه في الأسواق وبتتباع ب50 جنيه وطبعا مش اي حد ممكن يشتريها ده غير الطبعة الخاصة اللي شوفتها في مكتبة الشروق في المطار ب 95 جنيه ما شاء الله حاجة تحبط :)
المهم انا لقيت الرواية في مكتبة مبارك عندنا وفرحت جدا وقرأتها وبجد عجبتني جدا


يااااه مش مصدقه أخيرا خلصت قراءة رواية ربع جرام 635 صفحه أول مرة اقرأ كتاب كبير كده (الكلام ده من شهر وشوية)

بجد بجد الرواية أرهقتني كانت في شنطتي في كل مكان في الكلية وفي السفر وعند خالتو حتى أيام كورس التنمية البشرية وأخدت شوية تعليقاااات كتيييييير وأشهر تعليق كان (ربع جرام؟) يعني ايه ربع جرام؟؟

فكنت بقول ربع جرام هيروين :) ودايما كنت بلمح نظرة التعجب مع نظرة يا ضنايا يا بنتي ايه اللي خلاكي تقرأي حاجات غريبة كده في عيون أي حد بيسأل

اما تعليق بابا فكان أنا بكره الرواية دي – لأني كنت بسهر في قرائتها وبقعد مع نفسوياتي كتير علشان اخلصها –

وتعليق زميلاتي في الكليه : طب خلصي كتب الكلية الفظيعه اللي ورانا الأول وبعد كده اقرئي براحتك – بصراحه عندهم حق-

وتعليق غادة لما كنا في كورس التنمية البشرية تصفحت الكتاب وقالتلي زمالة المدمنين المجهولين وقعدت تهزر فالمستر قاللي استنيها تحت وضحكنا كلنا بجد الرواية كانت من أساسياتي الأيام اللي فاتت من حوالي شهر وشوية

الرواية بدأت بتقديم الشخصيات والشخصية الأساسية صلاح اللي حكى حكايته مع المخدرات طول الروايه وفي البداية وضحوا ان المخدرات كان تأثيرها كويس عليهم وازاي بدأوا بالخمور والحشيش لغاية لما دخلوا في سكة الهيروين وكنت متغاظة في بداية الرواية ان الأبطال عايشين حياتهم وكويسين ومحدش أصلا مكتشف انهم بيتعاطوا مخدرات

في الفترة دي كنت حاسة اني عايشة مع أبطال الرواية وشايفاهم لأن لما بقرأ رواية أو أي حاجة وأكون حباها بتقمص الشخصيات واندمج في الاحداث وأعيش معاها فكنت حاسة اني هتجنن قريب :)

أكتر شخصيات أثرت فيا

طبعا شخصية صلاح (صاصا) الشخصية الرئيسية واللي الرواية بتتحكى على لسانه شخصية ذكية جذابة أنيق ومرح ودون جوان وساعات الادمان كان بيخليه دون بس من غير جوان
بدأ الادمان في سن صغير أوي بدأ بخمور وحشيش

والادمان غير طبيعته تماما وخلاه يسرق ويأذي الأشخاص اللي حواليه بس عالأقل الشخص المدمن بيبقى مريض لكن يا ترى اللي بيسرق ويأذي مشاعر غيره وهو مش مدمن عذره ايه ؟
بعد رحلة الشفاء من الادمان صلاح بقى انسان تاني رائع

رامي ريكو : زميل وصاحب صاصا ومن شلته كان مهتم أوي بنفسه وكان مدلل جدا لكن للاسف بعد الادمان اتغير تماما وبقى مبهدل وخس جدا وفي النهاية اتمسك في قضية مخدرات اتجار ودخل السجن ووالدة اللواء في الجيش مستحملش الخبر واتوفى في نفس اليوم


راندا : طول الرواية بقول عليها غبيه جدا مش هقول عليها اكتر من كده

البوست الجاي ان شاء الله هكمل باقي الشخصيات اللي أثرت فيا من الرواية واجتماعات المدمنين المجهولين وعلاقتها بالتنمية البشرية

أرواح شوريرة وأشباح مريرة 2

بسم الله الرحمن الرحيم
النهاردة هكمل الجزء التاني واللي هحكيلكو فيه ايه الموقف الي حصل معايا وشبه المواقف اللي ذكرها الكتاب
بس في البداية ياريت نقرا الفاتحة على أرواح الناس اللي توفوا او استشهدوا في حادث مطروح
-----------------------------------------

في يوم من ذات الأيام وفي ليلة عادية من ذات الليالي برضه نمت وخير اللهم اجعله خير حلمت اني ماشية عالبحر
وع البحر في حديقة الحديقة دي فيها أشجار ونخيل والطبيعة هناك روووعة (رومانسية رومانسية مش أي حاجة)
وكان شكل البحر والحديقة جاديد عليا مشوفتوش ابدا قبل كده

المهم صحيت من النوم وأنا مستغربة وشكل البحر والحديقة في خيالي وقلت أكيد الحلم ده علشان ضغط الانطحانات والاستبحس اللي انا فيه وان نفسي اهرب من الانطحانات لمكان جميل كده فروحت هناك بأحلامي لكن كل شوية صورة البحر والحديقة تيجي على بالي

وفات عالحلم ده 3 شهور وكنت تقريبا نسيت الحلم ده لغاية لما في يوم سافرنا وكنا ماشيين في طريق عادي يعني شكله مش غريب بس أول مره نمشي فيه فأنا مأخدتش بالي من الطريق وركزت مع أغنية فيروز( بيقولو الحب )
وفأجه لقيت بابا بيقول الحديقة دي كذا وكذا انا بصيت عالحديقة ونطيت من مكاني وفضلت اقول باااااااااباااااااااا بجد بجد دي حديقة

بابا مستغرب: أيوة يا ليدي اومال انا كنت بقول ايه؟
(وانا في بالي وجدتوها وجدتوها) والله شوفتها هي دي بجد هي دي مستحيل هي ........

ماما : مالك يا ليدي في ايه بس

ليدي : هي الحديقة دي يا ماما والبحر ده شوفتهم من 3 شهور وحيروني مكنتش مصدقة انهم موجودين فعلا

بجد انا مش بهييس انا شوفت المكان ده في الحلم

بابا انا مش بهيييييييييس وبعد تكرار الكلام 3 مرات

بابا: ايه بهييس دي اتكلمي كويس (صراع الأجيال مع ان الجيل اللي قبلنا كان عنده كلامه ومفرداته الخاصة بيه برضه)

ليدي : كويس؟؟! اتكلم كويس ازاي يا بابا

بابا: يعني انا عارف ان السهر والنت خلاص سيح عقلك وخلى السلوك تضرب وتشيط عندك وحاجة طبيعية انك تقولي كده

ليدي : (انا في سري وانا بقول الدنيا بتبقى حر ليه اهااااا علشان عقلي سااااح يا عيني عليك يا عقلي)

يا بابا انا في أجازة مفيش كلية عادي يعني لما اسهر واصحى من النوم براحتي

ماما : قال يعني ايام الكلية مبتسهريش

انا : ( طب اعمل ايه مش بعرف انام بالليل بحب الليل وهدوءه لما بقعد اكلم القمر والنجوم اللي بتنور في وسط الضلمه واتأمل في جمالهم سبحان الله خلق كل شيء فأبدع في خلقه وبالليل بيبقى الجو جميل ونسمة هوا جميله بتلاقيها عدت عليك صحت روحك وريحت بالك)

وبكده انتهى الحوار و خلص معاه موضوع حلمي الجميل اللي طلع حلم وعلم موجود في الواقع ومكنتش بهييس الحمد لله


يمكن كلنا تقريبا اتعرضنا لمواقف شبه الموقف ده يعني مثلا تبقى ماشي في الشارع وتحس انك مشيت في الشارع ده قبل كده مع انك اول مرة تشوفه , تبقى راكب تاكسي او ميكروباص وتحس ان موبايل السواق او الركاب هيرن وفعلا يرن

تبقى بتفكر في حد وفجأه تلاقيه بيتصل بيك او انتو الاتنين تتصلوا ببعض في نفس الوقت

مواقف كتيييييييير غريبة بتحصل في حياتنا وملهاش تفسير سبحان الله

كل حد هيقرأ البوست ياريت يقول موقف حصلله وانا هكمل الجزء التالت ان شاء الله اذا حكيتولي عن مواقف حصلتلكم





----------------------
كلام لا بد منه
مضطرة ابعد عن البلوج كام يوم علشان انا نفساوي وصحيا تعبانه جدا فياريت لو حد شاف الكلام ده يدعيلي
مكنتش اتمنى اني ابعد عن النت في بداية البلوج كده
الحمد لله على كل حال

-------------------------

تحديث لابد منه برضه هههههههههه

عدت الى ارض الواقع والحمد لله عرفت ان الدنيا كلها احزان والانسان المفروض يتغلب على الحزن وميخليش الأحزان تغلبه

متشكرة جدا ومفيش كلام ممكن يوفيهم حقهم :

بابايا لأنه ساعدني وخفف عني ووقف جنبي وحسيت بحنانه الكبير جدا الأيام اللي فاتت وقدرت اكمل في الحياة ويا رب مكونش سبب انه يزعل أو يضايق ابدا

مامتي خففت عني كتير ووقفت معايا واعطتني امل في الحياة

نيمو صاحبة مدونة ضي القمر وأيام زمان كلمتها لما كنت مضايقة وساندتني جدا

كيكي : من أول لما شوفت كومنت ليها في بلوج من البلوجات كان نفسي اتعرف عليها وبجد انا فرحت جدا بدعائها ليا اللي الحمد لله ربنا استجابه

ربنا ميحرمنيش منكم ابدا يا رب

شكرا لأي حد مر من هنا ودعا لي جزاكم الله خيرا

أرواح شوريرة وأشباح مريرة

أخيرا خلصت قراءة كتاب أرواح وأشباح للكاتب الكبير : أنيس منصور

بجد الكتاب مفيد ومخيف في نفس ذات الوقت ومش عارفة ليه كنت مبحبش اقرأ الكتاب الا والدنيا ضلمه يمكن علشان احس اني في فيلم رعب نياهاهاها . وحصللي كذا موقف مخيف لما كنت بقرأ الكتاب مثلا اول يوم قرأته سمعت أصوات مخيفة وقولت أكيد دي تهيؤات من الكتاب قعدت أقرأ أية الكرسي وأيات من القرأن الكريم حسيت بإطمئنان وفورا طفيت الكمبيوتر ومكملتش قراءه ...

وفي يوم تاني كنت بقرأ في الكتاب وعايشه مع الاحداث ومرعوبة وطبعا الدنيا كانت ضلمه وانا حاطه الهدفون ومشغلاه على اغاني بصوت عالي علشان مسمعش أي صوت مخيف ومفيش فايده لقيت صوت بيشخط فيا لييييييييييييدي ليييييييييييييييييييييدي

شيلت الهيدفون وبصيت في كل الاوضه مش شايفه حاجه وقلت بأعلى صوت عندي ب بسم الله الرحمن الرحييييييم
ولقيت صوت بيقوللي بسم الله الرحمن الرحيم !!!؟؟؟ عرفت ان الصوت ده صوت باباتي وقلت لبابا : خضتني يا بابااااااااااااا
طبعا بابا اضايق مني يوميها وقاللي مش هتقرأي الكتاب ده تاني وابقي افتحي النور وشغلي السماعات مش الهدفون بدام انتي خوافه كده

المهم بعديها قرأت كذا في كذا كتاب تاني برضه شوية منهم للكاتب أنيس منصور وبرضه رجعت لكتاب أرواح وأشباح تاني ...

لاحظت أن معظم (الشبحات) يعني الأشباح بس مؤنثة (Female Ghosts) يعني الشبحة والشبحة والشبحة جمعها (الشبحات) اتعذبوا جدا

واتظلموا وكانوا ضحايا واحدة أخوها موتها والتانية جوزها قطعها نصفين والثالثة (ماري انطوانيت) ماتت بسبب الثورة الفرنسية (مقطوعة الرأس) والرابعة اتخنقت من أبوها ومن معاملته السيئة ليها فانتحرت وبعد كده ظهروا على شكل أشباح منها الرقيقة ومنها الشوريرة .

والغريب ان وأنا بقرأ الكتاب كنت بعيط كتير وساعات كنت بسرح في ولا حاجه وكنت بحس بحزن مش عارفة معناه يمكن حزن على الشبحات والأشباح واللي حصلهم في الدنيا

ومش ممكن أنكر ان أسلوب الكتاب كان رائع واني استفدت جدا منه وتنحت وازبهليت لما افتكرت حاجة حصلتلي قريب ومذكورة في الكتاب

صــــــــــ203ــــــ ((نعم كنت هنا من قبل))

والبوست الجاي ان شاء الله هتكلم عن الموقف اللي حصللي واللي شبه المواقف اللي مذكورة في الكتاب