الأحد، 11 يوليو 2010

شنطة سفر

فقدت شهيتي للكتابة وبحاول ارجعها تاني ، زي كل سنة خلاص هسافر وبرغم ان البلد دي خنيقة لأي حد عايش فيها الا ان ليها حنين كبير جدا والأصعب من السفر تحضيراته وأرقه أصعب من السفر نفسه


وعلى أي حال في البوست ده نقلت كلام انا كاتباه من فترة علشان مسيبش المدونة فترة طويلة من غير كتابة


رواية في كل أسبوع يوم جمعة

أخر رواية قرأتها واخدت وقت كبير لغاية لما خلصت الرواية وفعلا زعلانة على وقتي اللي ضيعته فيها !

من أول ما خلصتها وأنا عايزة أكتب عنها انها كانت رواية قبيحة ووقحة وأغلب تعبيراتها فجة ووصف بعض المشاهد فيها فج وبدور على كلام أكثر لطفا بس مش لاقية

بس واضح ان ده رأيي لوحدي لأن الكاتب ترجمت ليه أعمال كتير والطبعة اللي قرأتها من الكتاب كانت الطبعة الرابعة

يعني الرواية مش وحشة وبتتباع كويس

على أي حال ده رأيي العام لكن الرواية فيها مميزات زي فكرتها الجديدة انها بتتكلم عن الانترنت وبتتكلم بلغة الإنترنت وزي التنوع الكبير اللي موجود في عالم الانترنت والعلاقات اللي بتربط المدونين مع بعض

يعني مثلا في اللي داخل التدوين في الموقع وهدفه دنيء وفي اللي داخل التدوين علشان يفضفض وفي اللي داخل التدوين علشان يحل مشكلة وفي اللي بيعمل دور الواعظ والفيلسوف وكل ده موجود عالنت زي العالم الحقيقي

الرواية فيها سخرية كبيرة جدا وتضاد بين اسمها اللي بيحمل رمز ديني وروحاني عند المسلمين وهو يوم الجمعة وبين محتوى الرواية اللي يبعد كتير عن المعنى ده

اعلان ميلودي السخيف

اعلان ميلودي الجديد شعاره ميلودي تتحدى قلة الأدب ، برغم ان الاعلان يبان هادف لكن الطريقة المقززة لكلام الميلودي مان واللي بيتكلم بطريقة كلها ملل لما بيقول : البنت اللي في الشارع دي أختك بتبين الولاد المؤدبين والمحترمين واللي بيحترموا البنات في الشارع بصورة عكسية يعني بمعنى اصح الإعلان عكسي !


سلام يا مدونتي ، ان شاء الله هرجعلك تاني قريب

هناك 10 تعليقات:

sony2000 يقول...

انا عرفه الحاله الخنقه دي
يارب ترجعي قريب
اللهم امين

mrmr يقول...

تروحى وترجعى بالسلامه
ربنا معاكى ويحافظ عليكى

حاجات جوايا يقول...

خلاص مسافرة يا انوس
ملحقتيش يا بنتى
يلا معلش بقى عشان تبقى مع بابا
تروحى وترجعى بالف سلامة ان شاء الله

قلم رصاص يقول...

تسافري وترجعي بالسلامه
بس تقصدي انهي بلد اللي خنيئه.. مصر ولا عمان....... ^_* ؟!

الوسيلة والأسلوب اللي بنوصل بيهم فكره معينه عن اي حاجة احيانا بتكون اخطر من الفكره بل وعلى الفكره نفسها

يعني موضوع مثلا زي اللي ذكرتيه وهو اعلانات ميلودي .. لو مثلا الاعلان هدفه يناقش فكرة سيئة منتشره في المجتمع بهدف التحذير منها .. في أحيان كتير جدا بسبب ردائة الطريقه المتبعه بتكون النتيجة هي تعميق الفكره اللي مفروض هو بيحذرنا منها.....!

الموضوع دا بيشغلني جدا وبينرفزني بجد
لأني باختلف مع اصحاب فكرة طرح السلبيات ومناقشتها بهدف محاربتها والحد منها

انا من انصار التركيز على الايجابيات حتى لو كانت أقليه في المجتمع.. لأن دا هيعمق من وجودها بيننا وهتكون بمثاية القدوه

لأني مؤمن بكلمة السيئة تعم والحسنه تخص .. ودي اخطر أمراض المجتمع

اتمنى تكون زيارتك موفقه وترجعي بالسلامه
وياريت متنسيش المدونه

تقبلي مروري وتحيتي

أميرة علي كوكب مهجور يقول...

توصلي بالسلامه ان شاء الله

غير معرف يقول...

تروحي وترجعي بالسلامة إن شاء الله يا ليدي ، تغيري جو ومناظر ويمكن تلاقي أفكار جديدة تكتبيها .
ديدي

الشـــــوكه النــاعمه يقول...

بصى انا ماقريتش الروايه
بس ممكن اقدر اقولك ان الصراحه الفجه اللى وصلت من وجهه نظرك لدرجه الوقاحه
دى اكيد مقصوده
الكاتب اكيد قاصد يوصل فكره بالطريقه دى بالعكس ده ممكن يكون طريقه كتابته دى بتغلف الوضع اللى بيحكى عنه
ع العموم ها قراها وها سيب لك تعليق تانى
اما ميلودى انا ماليش فى التيلفزيون اصلا
مااقدرش افيدك بس اللى انا عارفاه ان ميلودى راعى قله الادب
اهوالله انا فاكره اعلان بوبى
ايه يا قطه فاكراه
ع العموم ترجعى بالسلامه
تحياتى

just waiting يقول...

تروحي وترجعي بالسلامة ياليدي
بالنسبة للكاتب انا مش قراته
اما بالنسبة لاعلانات ميلودي فهي الراعي الرسمي لقلة الادب
واعلانتهم وقحة بجد وعيب

شاب فقرى يقول...

ترجعى يارب بألف سلامة
بالنسبة للرواية
ففى عك كتير فى الكتابات اليومين دول
رغى فاضى بيتحط فى مجلد
للأسف
وبالنسبة لميلودى
واحد صحبى قالى القذارة هتبقى فى الفكرة مش فى المشهد
إفتكرته بيهزر
ولقيت دا اللى حصل فعلا
بالنسبة للسفر
تروحى وترجعى بألف سلامة يارب
شاب فقرى

Malooka Yousef يقول...

تروحى وتيجى بالسلامة ياقمر ومتغبيش عننا كتير