الثلاثاء، 22 ديسمبر 2009

ربع جرام



فاكرين من شهرين كده اتكلمت على رواية ربع جرام في البوستات دي دماغ نام ننا هو و
دعاء السكينة

اللي شاف الرواية دي هيعرف انها لسه في الأسواق وبتتباع ب50 جنيه وطبعا مش اي حد ممكن يشتريها ده غير الطبعة الخاصة اللي شوفتها في مكتبة الشروق في المطار ب 95 جنيه ما شاء الله حاجة تحبط :)
المهم انا لقيت الرواية في مكتبة مبارك عندنا وفرحت جدا وقرأتها وبجد عجبتني جدا


يااااه مش مصدقه أخيرا خلصت قراءة رواية ربع جرام 635 صفحه أول مرة اقرأ كتاب كبير كده (الكلام ده من شهر وشوية)

بجد بجد الرواية أرهقتني كانت في شنطتي في كل مكان في الكلية وفي السفر وعند خالتو حتى أيام كورس التنمية البشرية وأخدت شوية تعليقاااات كتيييييير وأشهر تعليق كان (ربع جرام؟) يعني ايه ربع جرام؟؟

فكنت بقول ربع جرام هيروين :) ودايما كنت بلمح نظرة التعجب مع نظرة يا ضنايا يا بنتي ايه اللي خلاكي تقرأي حاجات غريبة كده في عيون أي حد بيسأل

اما تعليق بابا فكان أنا بكره الرواية دي – لأني كنت بسهر في قرائتها وبقعد مع نفسوياتي كتير علشان اخلصها –

وتعليق زميلاتي في الكليه : طب خلصي كتب الكلية الفظيعه اللي ورانا الأول وبعد كده اقرئي براحتك – بصراحه عندهم حق-

وتعليق غادة لما كنا في كورس التنمية البشرية تصفحت الكتاب وقالتلي زمالة المدمنين المجهولين وقعدت تهزر فالمستر قاللي استنيها تحت وضحكنا كلنا بجد الرواية كانت من أساسياتي الأيام اللي فاتت من حوالي شهر وشوية

الرواية بدأت بتقديم الشخصيات والشخصية الأساسية صلاح اللي حكى حكايته مع المخدرات طول الروايه وفي البداية وضحوا ان المخدرات كان تأثيرها كويس عليهم وازاي بدأوا بالخمور والحشيش لغاية لما دخلوا في سكة الهيروين وكنت متغاظة في بداية الرواية ان الأبطال عايشين حياتهم وكويسين ومحدش أصلا مكتشف انهم بيتعاطوا مخدرات

في الفترة دي كنت حاسة اني عايشة مع أبطال الرواية وشايفاهم لأن لما بقرأ رواية أو أي حاجة وأكون حباها بتقمص الشخصيات واندمج في الاحداث وأعيش معاها فكنت حاسة اني هتجنن قريب :)

أكتر شخصيات أثرت فيا

طبعا شخصية صلاح (صاصا) الشخصية الرئيسية واللي الرواية بتتحكى على لسانه شخصية ذكية جذابة أنيق ومرح ودون جوان وساعات الادمان كان بيخليه دون بس من غير جوان
بدأ الادمان في سن صغير أوي بدأ بخمور وحشيش


والادمان غير طبيعته تماما وخلاه يسرق ويأذي الأشخاص اللي حواليه بس عالأقل الشخص المدمن بيبقى مريض لكن يا ترى اللي بيسرق ويأذي مشاعر غيره وهو مش مدمن عذره ايه ؟
بعد رحلة الشفاء من الادمان صلاح بقى انسان تاني رائع

رامي ريكو : زميل وصاحب صاصا ومن شلته كان مهتم أوي بنفسه وكان مدلل جدا لكن للاسف بعد الادمان اتغير تماما وبقى مبهدل وخس جدا وفي النهاية اتمسك في قضية مخدرات اتجار ودخل السجن ووالدة اللواء في الجيش مستحملش الخبر واتوفى في نفس اليوم


راندا : طول الرواية بقول عليها غبيه جدا مش هقول عليها اكتر من كده


البوست الجاي ان شاء الله هكمل باقي الشخصيات اللي أثرت فيا من الرواية واجتماعات المدمنين المجهولين وعلاقتها بالتنمية البشرية

هناك 10 تعليقات:

Cute Kitty **sookra يقول...

مساء الشيكولاته
انا اشطر منك
خلصت روايه شيكاجو فى ليله ونص ليله
بس هاجيب ا/4 جرام بكره وانا فى اليكس
تسلمى على الدعاء وانا باقيلى بس امتحانين غير الباوبوينت
اكسل واكسيز

Ana keda يقول...

ياه فكرتينى بنفسى لما اول ما جبتها والابتسامة الفظيعة الى كانت على وشى وانا بقراها ونفس التريقة دى واكتر لما كنت البيت وخصوصا انى كنت ابتديت
معايا فى الكلية وبرضه فى
البيت واتاثرت بيها وكنت عاملة بجد عليها زى المدمنة وهى كبيرة جدا وانا عاملة اقراها لحد ما انسجمت فيها اوى وفيها حتت عيطتنى كتير وحتت خليتنى اموت من الضحك بالذات لما يتسطلوا ويروح يقول لمامته يا حاجة وكده وهو اصلا فاتح التلاجة بس بجد رواية تستاهل وواقعية الى اقصى درجة

ستيتة يقول...

الرواية دي مقرأتهاش
ها ادور عليها واشتريها

سكرا سكرا يا عثل على العرض اللي خلاني متشوقة اقرأها انا كمان

تحياتي

Lady E يقول...

sookra : مساء الورد

يا عيني ما شاء الله بجد بجد برافو عليكي

وان شاء الله ربع جرام هتعجبك

ربنا معاكي في ال3 امتحانات

Lady E يقول...

Ana keda : أهلا بيكي يا قمرايا وبجد بجد منوراني وفرحت جدا بتعليقك و بإن مدونتي في الفيفوريت عندك :) ده اولا

ثانيا : حلوة اوي تجربتك مع الروايه وفعلا اللي بيقرأها بيبقى مدمن عليها لغاية لما يخلصها ومع انها رواية كبيرة بس مبتحسيش انها كبيرة

وطبعا بتضحكي كتير في الاول بس فاكرة ان اول حاجة عيطت فيها لما عاطف مات وبالطريقة الصعبة دي في حمام النادي وبعدها في حاجات كتير عيطتني

بس فعلا الرواية تستحق القرائه وأسلوبها تلقائي وجميل جدا

دمتي بخير يا قمرايا

Lady E يقول...

ستيته حسب الله الحمش : هييييييييه خالتو ستيتة عندنا يا مرحبا يا مرحبا

لسه الجزء التاني هتكلم في اكتر عن الرواية يا خالتو

منوراني وهستنى رأيك في الرواية لما تقرأيها لأنها بجد رواية جميلة وواقعية وتستحق القرائه

أميرة علي كوكب مهجور يقول...

للأسف مش قرائتها
بس هقرأها او تحكيهالي:)
الراويه دي عمل شغل جامد اوي
بس ياتري اسلوب كاتباتها اخباره ايه؟

يارب تكوني بخير

hend mossallam يقول...

dii bardo awel rowaya kebiira a2raha :D ana ba7ebaha awii 3ashan bet3ayeshek belgaw

fakartiini lama kont f cours computer w kan f 7owaer toiil w sa2aloo kol wa7ed beye2ra 2h now fa ana 2olt rob gram fa sa2aloni bete7ki 3an 2h w ana ba2ol 3eyal modmena la2et 2l nas amet basetli awi w liih ya3ni te2rii 7aga keda ana kol 2li nezel 3alaia 2l de7k

bas ana 3agabetni awii w aretha mara tanya awel ma5alastaha 3adshan awel mara dii a5adet wa2t tewiiil

ta7eyatii :D :D

لجين أبو الدهب يقول...

ياريت تكملى الشخصيات ياليدى

علشان شكلى كده ممكن اجيبها ..

بس هى من الناحية الادبية لغة عربية ولا عامى ؟؟

واسلوبها راقى وظريف ولا اسلوب ناس مدمنين بقى ؟؟

محمد فؤاد (صاحب عمود النور) يقول...

الرواية دى مهمه جدااا وانا شايفة من اهم الروايات اللى بتعاصر فترة من الفترات اللى ظهر فيها الادمان بشكل كبير وانا قريت الرواية دى فى 5 تيام من كتر التشويق والاثارة اللى فيها يمكن هو دا اللى ميز اسلوب الكاتب لكن انا فى رائى انها تعبتر من الرويات التى تسمى السيرة الزاتية ولو فعلا كل الكلام اللى مكتوب فيها حقيقى ومافهوش اى اضافة من الكاتب يبقى الكاتب هنا كان ابداعة فى خلق جو من التشويق للقارئ

انا تاثرت جدااا بالشخصيات وخصوصا بهاء بونو