الأربعاء، 23 ديسمبر 2009

ليه كده ! عن الانجينير احمد ابو العلا

yesterday is a history
tomorrow is a mystry
but today is a gift that is why it is called the present

ده شعار مدونة الانجينير م. احمد أبو العلا واللي بفتح المدونة بتاعته النهاردة ملقتهاش موجودة وكمان البروفايل غير متاح !!!!

أخر مدون كنت اتوقع انه يسيب التدوين ويقفل مدونته في صمت وأول مدون كان بيشجعني اني استمر في التدوين ومقفلش مدونتي

أحمـــــــــــــد أبو العلا يقول...

يادي النيله هما الناس دول وصلولك انتي كمان

بصي ياليدي انا مش هقولك كلام انتي عارفاه
مش هقولك ان الدنيا فيها الحلو والوحش والنت زي الدنيا والكلام ده
بس هقولك قفل المدونه ده مش صح
انتي عامله زي المسؤل اللي شاف واحد بيعاكس واحده على الكورنيش راح طلب هد الكونيش
وكده هيحرم ناس كتير بتستمتع فيه وناس عايشه
بصي بأه ومن الآخر لو فكرتي تقفلي المدونه معنديش غير بلاغ صغير لشرطه المدونات ودول بعيد عنك ملهمش عزيز وهيعرفوا يوصلولك لو كنتي فين وعلى فكره مش هيكون عندك فرصه للدفاع, هيتحكم عليكي على طول وبرضه المدونه هتتفتح (وش مطلع لسانه)كل سنه وانتي طيبه وصلي على النبي كده واستهدي بالله وسيبك من الناس ديه
30 نوفمبر, 2009 08:36 م


ده غير تعليقات تانيه كتير خلتني انسى موضوع اني أقفل المدونة مهما تعرضت لمضايقات من ناس غبيه

وده تعليق تاني لما قلت اني هاخد استراحة من التدوين

Eng. Ahmed Abo El-Ella يقول...
لو كان ينفع كنا قلنا ماشي الدنيا بتتقدم قدام مش بترجع وراااه

احنا نقدر نقفل الموبيل والتليفونات والميل والبلوج
بس النتيجه اننا هنبعد عن عالم مبيتقفلش
على العموم ياريت متتأخريش علينا

انا بجد حزينة على مدونة جميلة كنا كلنا بنحب نقرأها تتقفل بسهولة كده وكأن ملناش حق فيها ولا لينا حق اننا نعترض لما تتقفل

وزعلانة اكتر على مدون أحسبه على خير ولا ازكي على الله احد مدون محترم وعلى خلق ومثقف وبحترم رأيه جدا يستسلم للظروف ايا كانت ويقفل مدونته

هناك 26 تعليقًا:

ليس فقيرا من يحب يقول...

احتمال تكون فترة مؤقته

وباذن الله يرجع تانى

الشعب لابد له من شيما تشكمه يقول...

لا يتهرجى؟؟؟؟؟؟؟؟؟
مصدومه,لا مش مستوعبه,اقولك انا لسه جايه من بره هشوف الموضوع ده على مستوعب الكلام..
احمد ابو العلا؟؟؟!!!!!!!!!!!!!!!!!!

Mr.Hazem يقول...

:(
دائماً تجدين من هم اصدقاء من معدن ثمين فجأه تشتاقين لأقلامهم
دون سابق انذار تأخذهم الدنيا من بيننا , ولكن صدقيني القلم والقلب الوفي حتماً لن يترك اصدقائة
وانا متأكد تماماً , ان أحمد لن يطيل غيابة ويوماً ما سيكون بيننا ,

صدقيني اشعر احياننا بالألم من بعض اصحاب المدونات , وكنت افكر كثيراً في ترك التدوين , وأبحر الى عالم اخر , ولكن حينما اتذكر المخلين منكم وكأمثالك , اتوقف وافكر الف مرة
قائلاً , لا لان هناك من يستحق منا ان نكون الاوفياء لهم ..

سيدتي
بصراحه نيال اصدقائك فيكي , لأخلاصك
وسؤالك عن ابو حميد
ان شاء الله بيرجع وبيكون بيناتنا قريباً
مع اطيب المنى

mhmdwahab يقول...

انا نفسى اعرف حاجة ليه كل زائر جديد لى يبداء بقراءة الفرصة الاخيرة يعنى هو انتى ناقصة مش كفاية مواد الجامعة ما كان عندك فضيحة او سوبرماركت نشنت يافالح

Lady E يقول...

ليس فقيرا من يحب : يارب يكون كده فعلا

Lady E يقول...

الشعب لابد له من شيما تشكمه : وانا كمان

Lady E يقول...

Mr.Hazem : عارف يا مستر في رباط روحي بيني وبين كل زوار المدونة وبالخصوص المدونين اللي بيعلقوا في مدونتي واللي كانوا معايا من بداية المدونة ووقفوا جنبي في الشدائد وفرحوا معايا في الأفراح وكتير بتلاقي تعليقات بتتحفر جوه روحك وبتكون دليل ليك

الابتعاد مرة واحدة كده صعب جدا ويارب يكون احساسك صح ويرجع الانجينير تاني ينور مدونته ومدوناتنا

أصل صعب ان كل انسان محترم وعنده اخلاق يسيب التدوين كده مش هيفضل حد ومش هنحطم نفسنا علشان شوية ناس مبيفهموش وبيحبوا يضايقوا الناجحين

اوعى تقفل مدونتك يا مستر لأنه هيبقى صعب عليك وكمان صعب علينا ان مدون محترم زيك يسيب التدوين

Lady E يقول...

mhmdwahab : انا هتكلم عني مش عن كل زائر جديد

فرصة أخيرة موضوع حسيت بيه وفي بالي على طول وان شاء الله ناوية اكتب عنه

اما باقي مدونات حضرتك ففي كتير منها بالانجليش وانا حقيقة كفاية عليا جدا كتب الكلية كلها انجليش :)

كفايـة طيبـة يقول...

ايه ده فعلا؟ :(

لا اكيد هييجي .. اكيد فى حاجة غلط حصلت بس
تلاقيه كان بيضبط حاجة فى المدونة وحاجة تانية باظت

mhmdwahab يقول...

هما اثنين فقط بالانجليزى بس انجليزى واضح والله والباقى عربى التحرش والمبروكة ماعلينا هى الصورة اللى فى حسابك دى صورة طبعية ولا عروسة بلاستك؟شكلها غريب شوية

أميرة علي كوكب مهجور يقول...

متهيالي مش هيقفالها قرائتله اكتر من بوست متفاءل كده معتقدش يقفلها ان شاء الله يرجع

Ana keda يقول...

ان شاء الله يكون راجع تانى وبس ممكن تبقى فترة وتعدى
اكيد ليه اسبابه سات ممكن نساعد حد غالى علينا بس ممكن كتير منقدرش نساعد صوت تعب او خنقة مننا ساعات كتير بيبقى اقوى مننا

Mr.Hazem يقول...

لا ما بقدر سيبكم
لأنكم مخلصين :)
ربي ما يحرمنا منك
ويرجعلنا ابو حميد

ستيته حسب الله الحمش يقول...

عارف يا احمد
أنا اتكسفت منك
حقيقي اتكسفت
قلت يعني عثرة ويوم سيء يخليني ازعل احمد
لا يمكن ابدا
انت وبكاء دودو خلوني اقول عيب علي وعلى سني اني ازعل ناس صح عرفتها
انت راجل صح
ومش ممكن اصدق انك تعملها
يابني مؤكد ها تقرأ البوست ده
ومن فضلك سيب لي رقم موبيلك في ميل
انا فعلا زعلانة انه مش معايا

شكرا يا ليدي
وان كان خبر مكئب وانا اقسم بالله مش ناقصة
بس لما نشوف اخر اكتئاب البلد دي ها يودينا فين

أحمد ابو العلا يقول...

استاذه ليدي
ازيك يارب تكوني بخير

من غير بس زعل ولا حاجه
ياريت نفهم بعض


كلنا بدأنا التدوين لاسباب مختلفه, وكلنا في الآخر وصلنا لنفس النتيجه, كلنا مستمرين في التدوين عشان مستمتعين بيه
بس ده فقد معناه
اتحول التدوين عند ناس لعبئ
وناس اتحول عندهم التعليق لواجب بيأدوه من غير مايقروا
وناس اتحول عندهم مجرد القراءه والزياره موسميه
وناس وناس وناس

بصي انا بصراحه اكتأبت من الوضع ده
ناس مش بتكتب وناس مش بتقرأ وناس مكتأبه
انا عارف ان كل واحد حياته صعبه, بس مش كده

لو مشغولين, كلنا مشغولين, انا بروح شغلي الساعه 7 صباحا وممكن ارجع 7 أو 8 مساءأ
لو عندنا مشاكل, كل واحد فينا عنده مشاكل ملهاش أول من آخر وملهاش حلول وكل واحد بيشوف مشكلته انها اكبر مشكله في الكون
بس كنا عايشين عادي وبنتأقلم مع الوضع

بس في مجتمع التدوين اللي بيقوم اصلا على فكره التواصل مينفعش كل واحد يكون بيكلم نفسه, وبعدين كمان شويه يقول لا كفايه انا بقى مش هتكلم انا هقرأ بس
خلاص بهدوء كده خلينا كلنا نقرأ بس

كلامي صادم؟
معلش
بس عايز بني آدم واحد بس يقولي انت غلطان وان انت كداب والناس دلوقتي بتدون زي الأول واحسن
عايز واحد بس يقولي اللي بتقوله مش حقيقي
بس قبل ماتقول الله يكرمكم, زوروا قائمه المدونات اللي بتابعوها واقروا آخر تلاته ولا أربعه بوست, وشوفوا الناس وضعها ايه, شوفوا الناس بتقول ايه, من وسط كل تلات بوست هتلاقي عشره بوست كلهم استسلام وانسحاب
خلااااااااااص بأه واحد زي كل الناس, ننسحب كلنا ونقعد نقرا وخلاص ونشوف مين اللي هيكتب

انا مش هذكر اسماء حد وبجد كلامي مقصدش بيه حد معين ولا حاجه عشان انا عارف كل واحد هيفسر الكلام على اشخاص هوا بيتابعهم, وده دليل على ان الكلام ده ينطبق على ناس كتير, انا بقصد بالكلام ده كل الناس اللي في التدوين دلوقتي على الأقل اللي على القائمه اللي انا بتابعها

والله الموضوع مهواش استعراض ولا غيره
لو كان استعراض كنت عملت بوست طويل عريض كل الناس تخش تقراه وكل الناس تعملها مظاهره, بس ده والله مش الهدف
بهدوء لو مش هنقدر نعمل وضع احسن يبقى بنفس الهدوء ننسحب

بصي ياليدي وافهميني ارجوكي من غير انفعال وبهدوء
انا قرأت التعليقات عندك وخصوصا دكتوره ستيته
بس دلوفتي ببساطه انا مش برتبط بالناس بسهوله بس لما برتبط بحد برتبط بيه بقوه وببقى مش عايز اسيبه ابدا
وده اللي بيحصل في التدوين, الناس كلها اللي بزورهم انا بحترمهم جدا وبعزهم جدا جدا جدا فلما يجي وقت ويقولوا لا كفايه كده احنا ماشيين, ده بيتعبني فعلا وبيقرفني, وبصراحه زهقت من كتر الناس اللي بتحايل عليهم عشان مايمشوش. فعلا مش هقدر افضل ازور ناس واكتب واستنى ناس تزورني وبعد شويه يمشوا بسهوله, ومعنديش ثقه ان الناس ظروفهم مش هتجبرهم في يوم انهم يسيبوا اللي اتعودنا عليه ويمشوا

بتقولي اني قفلت المدونه ولا كأن ليكم حق فيها, لأ ليكم في حقوق مش حق واحد, ليكم فيها يمكن اكتر ما ليا, احترمت كل واحد فيكم واحترم كل كلمه كتبتوها عندي او عندكم

وبعاق عندك دلوقتي لنفس السبب اني بحترمكم وبحترم جدا كلامك وخصوصا مدونتك ياليدي اللي اتمنى فعلا انها ميجيش يوم وتتقفل بس ياريت تفهميني. وعشان كده انا انسحبت بهدوء ومن غير مظاهرات ولا دوشه


وبعدين سيبك من ده كله
مش تقوليلنا اخبار كتابك ايه, يلا بأه نفسنا نقرا حاجه تفرحنا ولا اليأس وصلك انتي كمان

Lady E يقول...

كفايـة طيبـة : هو جه فعلا يا قمرايا لسه الخطوة اللي بعد كده انه يفتح مدونته ان شاء الله

Lady E يقول...

mhmdwahab : ايوة انا اخدت بالي انها simple English بس انا فعلا مش عايزة اقرأ اي حاجة انجليش حاليا غير كتب الكلية
بالنسبة للصورة فهي صورة طفلة صغنونة مش عروسة

Lady E يقول...

أميرة علي كوكب مهجور : ان شاء الله

ربنا كريم

حنين الذكريات يقول...

شوف يابشمهندس من مده كبيره وانا اتابع المدونات بدون تعليق
وعملت مدونه علشان اكون مشاركه فى عالم التدوين بالرأى والموضوعات
وعارفه ان مدونتى فيه ناس بيمرو عليها دون تعليق
ومع ذلك بكتب وبشارك بموضعات متواضعه ومش بيعجبنى تعليقات المجامله
وبحب التعليقات الموضوعيه والا مش مهم التعليق
مش هقول ان كتابتنا هتحل المشاكل لكن بتخفف عننا بس

MaNoOoSh يقول...

ازيك يا ليدي
الموضوع جابلي زهول
وبعد ما قريت تعليق البشمهندس احمد
مش قادرة اقول كلمة اقل من اني فعلا مكسوفة من نفسي
على الاقل اني سمحت لظروفي تبعدني عن الناس اللي فعلا وقفو جنبي وقت حتياجي لنصيحة
وعن العقول الجميلة اللى بتناقش معاها
بجد مكسوفة من نفسي

norahaty يقول...

يصعب علينا
اوى (توقفك)
ياباشمهندس
أحمد بس أرجع
اقولك خلى عندنا
امل وقول انك أحتمال
ترجع ولو حتى للسؤال !

Lady E يقول...

Ana keda : ان شاء الله يا قمرايا

عندك حق

Lady E يقول...

ستيته حسب الله الحمش : انا اسفة يا خالتو هو خبر مكئب فعلا

ربنا يبعد عنك اي حزن واكتئاب يا حبيبتي

Lady E يقول...

أحمد ابو العلا : شكرا على اهتمامك وردك في الأول يا انجينير

ومقدرش اقولك غير ان كلامك صحيح فعلا والتدوين اتغير ومبقاش زي الأول وكل الحاجات اللي قولتها بس دي مش اسباب كافية تخليك تحذف مدونتك فجأه وتحرم ناس كتير بيحبوا يتابعوها ويقرأوها ويقرأوا كتاباتك الرائعه

موضوع انك بترتبط بالناس بقوة ومش بتبقى عايزهم يمشوا ف ده مش في التدوين بس ده في الحياه العاديه كمان
يا ترى هتوقف حياتك ومتعرفش حد علشان خايف انهم يمشوا يسافروا مثلا ؟

هي الحياه كده كلها اصلا مبنية على الفراق
محطات وبنتقابل علشان نتفارق

اسمحلي اقولك انك عملت الحاجات اللي مش بتحب ان حد من المدونين يعملها قفلت مدونتك من غير ما تهتم ان ممكن حد يزعل او يضايق او يجيله احباط من انه يلاقي مدونة بيتابعها وبيستمد منها الأمل مقفولة في وشه
مدونة قضى وقت كبير في تصفحها وقرائتها والتعليق فيها

كل التعليقات عايزاك ترجع المدونة تاني والقرار النهائي ليك

واتمنى ان الاكتئاب ميستمرش كتير عندك لأنك دائما كنت مصدر التفاؤل والمرح والتخفيف عن اي حد مكتئب ودي حاجه عظيمة ومش اي حد ممكن يعمل كده

مش عيب انك تكتئب بس اللي مينفعش انك تهد حاجة بتحبها وغيرك كمان بيحبها

شكرا على سؤالك عن الكتاب والخطوة الجاية ان شاء الله هتكون دار النشر ومش هستسلم برغم كمية الروتين والاحباط اللي بتقابلني

Lady E يقول...

حنين الذكريات : كلنا في بداية التدوين مكنش بيجيلنا تعليقات يا حنين

وعندك حق الكتابة مش بتحل كل المشاكل لكن بتخفف عننا

MǿиY El-Shreef يقول...

مش عارفه اقول ايه والله :(

بس انا كتبت البوست الاخراني ده عشان خاطرك يا انجنير :((