السبت، 5 ديسمبر 2009

أقول ولا بلاش :)



بعد الانتخة والأجازة لابد ولا مفر ان يكون عندنا امتحانات شفوي طول الأسبوع الجاي

بالنسبة للبوست اللي فات قبل ما أقول بطلب الأمان :) طيب اقول ولا لأ

أقول ولا لأ ؟

يلا هقول وأمري لله حبايبي الحلوين اللي بيدرس English Art لازم ولا بد ولا مفر انه مياخدش الكلام بمعنى واحد يعني لازم يحلل الكلام ويفصصه ويفهمه ويعرف ما وراء الكلام ويستنتج كذا معنى ويطلع للقصة القصيرة او المقال أكثر من معنى وبكدا المقال او القصة بتكون ثرية

ودي اسمها الكتابة الرمزية أخت رمزي :) وحيث ان عندي امتحانات فقلت اجرب الأسلوب الرمزي ده البوست اللي فات وانا بكتب الموضوع بيبقى عندي كذا معنى بفكر فيه غير المعنى الواضح والصريح اللي كل اللي قرأوا البوست اللي فات فهموه

ولو فكرتوا في البوست اللي فات ومأخدتهوش زي ما هو ظاهر بالضبط هتلاقوا معاني جديدة :)

تاني حاجة على اعتبار اني قولت اول حاجة انا مش عارفة ليه مش برتاح للقاهرة زحمة ودوشة ولما بروح بالكتكوتة بحس ان شوية وهيجيلي انهيار عصبي مع اني مش بدخل وسط البلد والأماكن الزحمة يمكن اسكندرية زحمة بس فيها حبيبي البحر فمش بحس بالغربة لكن القاهره بحس انها غريبه هي بعد الساعه 1 بتكون ساحرة وبتبدأ الزحمة تقل لكن لسه خوفي من القاهرة زي ما هو وخصوصا لما بشوف عربيات الاسعاف اللي مش عارفه توصل للمستشفى من كتر الزحمة والحقيقة انا سميتها عربية الاتلاف لأن المريض بيتلف لغاية لما يروح المستشفى ويكمل تلف هناك :(

تالت حاجة بفرح أوي وبحس ببهجت :) لما اسمع كلام المدونين عن مدونتي

كلام خالتو ستيتة حبيبتي اللي بجد بجد نفسي اقابلها جدا لما قالتلي بحب اقرأ كلامك وحاجات تانيه كتير :)

كلام سومة لما قالتلي على فكرة انتي بتكتبي حلو أوي يا خبر ابيض انا حالتي وقتها اني كنت تعبانه جدا ونايمه بعد ما سمعت الكلمتين دول حسيت ان شوية وهطير في السما لأن نبرة صوتها مكنش فيها مجامله لكن كلام بجد

خالتو المصرية حبيبتي هي بقى لها كتير مش بتدخل المدونات بس برضه بحب رأيها جدا في أي حاجه بكتبها

وأخيرا أميرة كل ما بنتكلم بتفاجئني انها فاكرة بوست من المدونة وبتقتبس حاجات منها وبتقولهالي :) هيييييييه مع ان برضه قبل كده قالتلي انها مش بتحب المدونات اللي بيكون فيها يوميات :) ده على اساس اني بكتب شهريات مش يوميات

بجد بجد شعور جميل لما تلاقي حد مهتم بكلامك يمكن وأكيد ميكونش أحلى كلام ولا انا كاتبة بمعنى الكلمة انا بس بحب الكتابه ومن غير التشجيع ده اعتقد اني مكنتش هقدر استمر وعلشان كده بجد شكرا

هناك 20 تعليقًا:

الشعب لابد له من حكومه تشكمه يقول...

القاهره دىىىىىىى ,بجد بستغرب اللى فيها عايشين ازاى بجد,,كنت وانا هناك اقعد اقولهم المنصوره احلى من القاهره محدش بيصدقنى ,بس انا مقتنعه ان المنصوره احلى برضه:) مع اننا فى طريقنا ليهم بأينا زحمه اوى..

_وبعدين قلتلك اعملى كتاب باه وخلصينى عاوزه احضر حفل توقيع واجى لابسالك بربرق:))

sookra يقول...

تانى تعليق انا ولا لا
هاضرب
ماشى ولايهمك هنقراه تانى ونفهم المدارى
هههههههههه
مساكى شيكولاته

ستيته حسب الله الحمش يقول...

القاهرة دي يا ليدي متعة وإدمان
اه والله ادمان
اهلها ميعرفوش يعيشوا في منطقة تانية
يملوا بعد مدة قصيرة جدا جدا جدا
القاهرة مش بس شوارع زحمة يا ناس
القاهرة الحسين والسيدة وابواب القاهرة
انا كنت في باب الفتوح امبارح ومشيت في شارع المعز لدين الله الفاطمي وشفت مساجد وبيوت تفضلي فاتحة بؤك من جمالها
شفت جمال تحلمي بيه
القاهرة مش شوارع بس يا ليدي
بس اللي منها وبيحبها ها يقولك تقرف بس ادمااااااااااااااااااااان

بحبك قوي وميرسي لكلامك الجميل يا رقيقة انتي
انا كمان نفسي اشوفك وربنا يكتبها لنا

El_Tahan يقول...

انا مش هستعجب انك فكرتينا بالامتحانات لانى لسه كاتب بوست عن الامتحانات بس بقولك هما دول اللى بيهمك رايهم بس يعنى اى حد تانى مايقولش رايه

Lady E يقول...

الشعب لابد له من حكومه تشكمه : هي مشكلتها الزحمة يا شيما لكن القاهرة عموما جميلة وفيها اماكن كتير للفسح بس مشكلتها اني مش بكون مرتاحه فيها وبحس بغربه اكاليم بقى :) الشعور ده لغاية دلوقتي الله اعلم بكرة في ايه

ومااااااااااشي شوفتي يا شيما لما قولتيلي اعملي كتاب ايه اللي حصلك :) علشان تبطلي تقوليلي اعملي كتاب تاني الموضوع مش سهل
لكن ان شاء الله انتي اول المدعوين في حفلة التوقيع يا قمر ده لما يبقى في كتاب اصلا :)

Lady E يقول...

sookra : هههههههه احنا فينا من ضرب :) هدي اعصابك

يا احلى مساء

منوراني دايما يا سكرة

مي يقول...

انتى اصلا عسولة وياعسولة انا فرحانة فيكوا يالاااااااااااا ياللى بتذاكروا هههههههه شفتينى وانا شريرة
بس بجد انتى روعة وكتاباتك بتعجبنى وتلقائيتك جامدة
ربنا يوفقك يا قمراية

Lady E يقول...

ستيته حسب الله الحمش : طبعا القاهرة مش بس زحمة ودوشة وضوضاء :)

القاهرة اجمل بكتير زي ما حضرتك حكيتي ونفسي اعرفها مكان مكان وشارع شارع ده السياح بيجوا يشوفوها من ابعد البلاد انا قصدي ان مشكلتها الدوشة ولما بيكون معاكي عربيتك مش بتلاقي مكان تركني فيه ده غير القيادة اللي بتشد الأعصاب وكمان احساسي بالغربة والخوف فيها بيكون كبير شوية لأن طبيعي اي حاجه مجهولة بتخوف

وكلامي عنك يا خالتو مستحيل هيوفيكي حقك ده كلام بسيط جدا يعتبر واحد من مليون بجد ما شاء الله ربنا سبحانه وتعالى بيحبك فكل الناس بتحبك يارب دايما يا خالتو

وان شاء الله ربنا يكتبهلنا قريب

Lady E يقول...

El_Tahan : ربنا يوفقنا كلنا في الامتحانات يارب والحمد لله ان دي اخر سنة ليا ومفيش امتحانات كلية تاني بس اكيد الحياة كلها امتحانات


طيب انا هسيبك تجاوب السؤال ده مع نفسوياتك
تفتكر لو اي حد تاني ميقولش رأيه كنت هتكتب الكومنت بتاعتك في المدونة ولا كنت هتيجي تعلق مش هتلاقي تعليقات ؟

طبعا رأي كل الناس يهمني بس في ناس معينين بحبهم جدا وبثق في رأيهم جدا ورأيهم يهمني اكتر من اي حد

Lady E يقول...

مي : ههههههه لما انا عسولة يبقى انتي ايه يا ميويا انتي خلية العسل كلها نياهاهاهها خافي من النحل بقى :)

ومااااشي كلها كام شهر ان شاء الله ولا مذاكرة بعدها

يا كزوفي يا كزوووووفي ربنا يكرمك يارب انا سعيدة برأيك ده وحاسه انه مش مجاملة صح؟ :)

انا كمان بتعجبني كتاباتك جدا
اخبار الاكتئاب ايه :) شكله فك ومشي بعيد

ربنا يسعدك دايما يا قمرايا

كيكى عوووووو يقول...

اولا لخبطينى فى بدايه البوست!!
ثانيا:مالكم ومال القاهرة!!!
انجى برضة لمة بتيجى هنا بتحب تمشى علطول يعنى والله ياجماعه بتحسسونى كانكم جاييين من برة واحنا قاعدين فى كفر عم حتاته!!!
كل الحكايه انكم ممكن بتروحوا حتت معينه زحمه
غير كدة انا فى جملة ليكى برضة قريب هكتبثها منك جمله حستها اوى وعشتها
ماعلينا
اخبارك ايه بعد 3 جنية؟

Lady E يقول...

كيكى عوووووو : ههههههه انتي انجليش ارت ؟ لما تبقي انجليش ارت ابقي اتكلمي ده اولا

ثانيا : عيب عليكي كفر عم حتاتة ايه بس ده احنا اللي اكاليم يا بنتي مش واخدين على العاصمة وصخبها (حلوة صخبها دي)
وبعدين يا بنتي انا غالبا بروح المطار ومرة رحنا مصر الجديدة تفتكري دي اماكن زحمة والمعادي كمان


صباح الاقتباثات اقتبثي يا حبيبتي براحتك انا وانتي واحد ومش خسارة فيكي اي جملة يا حبي :)

التلاتة جنيه لما خلصوا فرقوا جامد معايا :)

اقصوصه يقول...

بالتوفيق يا رب

mohamed ghalia يقول...

ربنا يعينك وبالتوفيق فى الإمتحانات إن شاء الله

فارس عبدالفتاح يقول...

يا ستي انا اول واحد هشجع لغاية ما تزهقي من كتر التشجيع

dramaqueen يقول...

ازيك يا بنوتة
واحشانى اوى اوى
مش تقوليلى مبروك
انا اشتغلـــــــــــــــــــت

اخبار الكلية ايه والمزاكرة
ربنا يوفقك يا قمر
طمنينى عليكى

Lady E يقول...

اقصوصه : تسلمي يا قمرايا

Lady E يقول...

mohamed ghalia : تسلم يا محمد

Lady E يقول...

فارس عبدالفتاح : حضرتك بتتكلم عن البوست ولا عن منتخب مصر ؟ :)

Lady E يقول...

dramaqueen : وانتي كمان يا حبيبتي بجد وحشاني جدا وكنتي على بالي امبارح وزرت مدونتك وتصفحتها من كتر ما انتي وحشاني

الف الف الف مبرووووووووووك بجد بجد فرحتيني بالخبر ده ألف مبروك وربنا يوفقك في شغلك وحياتك
خدي بالك المرتب النص بالنص بقى نياهاهاهاهاهاه

الحمد لله ماشي الحال

سعيدة بتعليقك يا كوين وكده فعلا القلوب عند بعضيها