الثلاثاء، 15 ديسمبر، 2009

حكايات الصباح

ليست قصص ولكنها قصيرة (العنوان ده مأخوذ من كتاب عمر طاهر جر ناعم)

شعور :

الساعه 7 صباحا عندي محاضرة كمان ساعة ونص
منمتش من امبارح علشان أعرف اروح الكلية ومع ذلك مليش نفس اخطي خطوة بره باب بيتنا
حالة من الصمت بتسيطر عليا عايزة اسكت وبس مش عايزة اتكلم يمكن بكتب لكن مش عايزة اعمل اي حاجه
حاسة اني بتجمد وايدي لما بكتب في الأجنده بتبقى كتلة من التلج وحركتها بطيئة جدا
حالة من السكوت في اليقظة وحالة من الكلام في النوم وعجبي !

ضاكطور او بمعنى أصح طوووور :

رحت لضاكطور العيون وانا عيني بتوجعني بس مش أوي وبعد انتظار 3 ساعات كان نفسي اديلو بالبوكس في مناخيره
ودلوقتي بعدما استعملت القطرة الأجنبية اللي
كتبهالي عيني بتوجعني اوي اوي اوووووي
ومنك لله يا فخري
الهدوم :

هي الهدوم بردانة أوي كده ليه مع انهم حاضنين بعض في الدولاب !


اصوات :

صوت فيروز وانغام وعلي الحجار وعمر خيرت وزقزقة العصافير
واحساس غريب النهاردة عايزة انزل من البيت الاقي كل الناس شفافين محدش في الشارع غيري
واسيب خصلات شعري للهواء والبرد ومش عايزة أشوف أي حد ولا حد يشوفني
ومع ذلك هنزل الكلية وهلاقي ناس كتير رايحه وجايه وهفضل لابسة الحجاب
لسه نص ساعه عالمحاضرة ومضطرة انزل بسرعه جدا
ادخل المطبخ واعمل مج قهوة بالفانيليا اتأخر اكتر عن المحاضرة

الجو بره :

افتح باب بيتنا تقابلني موجة عنيفة من البرد احضن كشكول المحاضرات والكتب واتدفى بالمج الاستانلس اللي فيه القهوة بالفانيليا اللي اكيد مش هحلق اشربها الا بعد المحاضرة
وأغير رأيي في موضوع الحجاب ده حجابي حبيبي تسلملي يارب

حنين

اعدي على بيت جدو واتخيله بيدعيلي زي كل يوم وانا نازلة الكلية - الله يرحمه -

" ر
بنا يوفقك وتنجحي وتخلصي الكلية "

" ربنا ينصفك نصفة كبيرة لغاية ما كل الناس يستغربوا ويحكوا ويتحاكوا عن نصفتك " دعوة جدو وخالة ماما الله يرحمهما

" بطلي جنان وامشي واحدة واحدة

- متأخرة يا جدو انا هطيييييييير مش همشي

- ربنا يكفيكي شر طريقك ويبعد عنك ولاد الحرام

ياه اخدتني الذكريات يا خبر ابيض اتأخرت اوي عالمحاضرة
تممت عالكوتشات ودورت الكتكوتة وقرأت الأذكار وطرت ع الكليه
الحمد لله وصلت في معادي ركنت الكتكوتة والدكتر بيركن عربيته بس هو دخل بعربيته جوه الكلية
ما شاء الله عربيته سودا موديل السنه اوباااااااا ملاكي دمياط علشان كده المحاضرة الساعه 8 ونص

في المدرج :

دخلت المدرج وبعدها بثواني دخل الدكتر وعملت مناوشات مع الشخصيات القميئة والهلامية اللي كانوا قاعدين في تاني بنش مكاني ومع اني مسالمة جدا بس ده مكاني ومبفهمش غير فيه ايووووووون بتلكك :)

الكائنات الهلامية : انتي عارفة انفلونزا الخنازير والنفس
انا : على فكرة ده مكاني اصلا وانتوا ضيوف عليه
كان نفسي اقولهم اوي انا اخدت دوش قبل ما انزل من البيت انتوا بقى بقالكم كام سنة ما اخدتوش دوش ؟ يا بتوع انفلونزا الفرافير بس بلاش الطيب احسن ومش بحب احرج حد

في المحاضرة :

بدأت المحاضرة والدكتر قال لنا اللي قلبه ضعيف او مكسور يطلع بره المحاضرة من دلوقتي لأن محاضرة النهاردة هتوجع وتكسر القلب فكرت اخرج فعلا من المحاضرة وخصوصا اني كنت بردانة بشكل غريب
فعلا المحاضرة كانت توجع القلب وتجيب الغثيان والدوخة من التعبيرات الدموية وجريمة زنا المحارم اللي ارتكبها اوديباس من غير ما يعرف والمصيبة انه جاب اطفال كمان والملكة امه انتحرت وهو فقأ عينيه ووضع مكانهما حجرين اهئ اهئ اهئ ما اسوأها من محاضرة منيلة بنيله معلش هي المحاضرات كده قسم ونصايب
منك لله يا شكسبير اوديباس على التوالي واثيللوا في ترم واحد عاااااااااااااااااااا عا


على الطريق :

بعد المحاضرة خرجت مع رشا علشان تشتري لجوزها ورد والبونيه ازبهلت ان معايا عربيه وسألتني بتاعت مين قولتلها بتاعت واحد صاحبي نياهاهاها مكدبتش ما هو بابا صاحبي وأخويا وباباتي وسالتني بتعرفي تسوقي كويس ولا عملتي حوادث؟ قولتلها عملت حوالي عشر او حداشر حادثة بس قالتلي هههههههههه بتهزري صح
قولتلها لا والله بتكلم بجد هتركبي ولا لأ؟ قالتلي يلا اهو نموت شهداء قولتلها خليكي متفائلة
بس بصراحة كانت اسئلتها كتير عن العربية وقالتلي نفسي انا وجوزي في عربية زي دي قولتلها يا بنت الحلال واحدة واحدة انتوا لسه بتجهزوا شقتكوا وواحدة واحدة ان شاء الله هتجيبوا عربية احسن من دي كمان انا من سنة كان معايا فوفو وكنت باخد كمية تريقة لا تتخيليها – مبحبش انا نظام الأر ده – زميلاتي بيركبوا معايا بقالهم كتير عمرهم ما علقوا على العربية ولا مرة مع اني دايما بوصلهم
جبنا الورد ووصلتها ورجعت على مكتبة مبارك مكاني المفضل ورجعت تاني رحت الكورس دووووخه والله دوخة ، اشتريت مصاصات من اللي فيهم لبانه وبائعة الحلوى انا مسمياها كده استقبلتني ب ابتسامتها الجميلة وقالتلي وحشتيني انتي فين؟ قولتلها انا اهو :) وفتحت اول مصاصة واهي حاجة تشغلني علشان منمش وانا في الطريق وعليت الام بي ثري منك لله يا ضاكطووووووووور عيني بتووووجعني ااااااه يا عيني
ووصلت العيال صحباتي وكان المفروض اخد
ماما ونروح مشوار وعديت من قدام ماما ومأخدتش بالي ان ماما واقفة اصلا مستنياني كنت بناااااااام بس لما رجعت شوفت ماما
يقطع النوم وسنينه
الامتحانات قربت أوي والمراقبين هيراقبوا اربع فترات واحنا اللي هنتبهدل وهو ده التطور الطبيعي لسنه رابعة بيحتفلوا بينا

هناك 27 تعليقًا:

مي يقول...

الف سلامة عليكى ياقمر مالها عينيكى يا بت
معلش خدى القطرة بس
وذاكرى كويس خلاص ياجميل دى اخر سنة بلاش لعب بقى
بومك كان لذيذ اوى
هههههههههههههههه
اقعدى يالعافية
امواااااااااه تبقى طمنينى على عينيكى

El_Tahan يقول...

فعلا هو ده التطور لسنه رابعه ربنا يوفقنا ويوفقك

Hager Za3bal يقول...

عجباااااني اوي الحواديت دي :)))

رغم انها حاجات يوميه ممكن تحصل لاي حد بس عجباني روحك في كتابتها :)

ربنا معاكي يارب والتطور الطبيعي يقلب بتقدير حلو :)

rayane naciri يقول...

مرحبا بك انا ابو ريان من المغرب ..
اعجبتني مدونتك ورأيت أنني وقد دخلت حديثا عالم التدوين يجب أن أقدم لك التحية والدعوة لزيارةي عسى أن تنال كتاباتي إعجابك.. تحياتي

الشعب لابد له من حكومه تشكمه يقول...

##***هي الهدوم بردانة أوي كده ليه مع انهم حاضنين بعض في الدولاب !##

عجبتنى اوىىىىىىىىىىىىىىىىىىىىىى,
يمكن لان معناها مش حرفى,,
معناها معنوى اكتر منها حرفى,
وتتفق مع حجات كتير اوى فى حياتنا,,

*اوقات ناس تحضنى ومحسش فى حضنهم دفا,,,
*اوقات ناس تبصلى وراسمين فى عنيهم حنيه,بس محسش انها حنيه...
* اوقات ناس تتطبطب عليكى واديهم تكسر كتفك مش تطبطب..

مش كل حضن ياليدى,,بيدفى..


النص الاولانى من البوست دخل جوه دماغى واستربع:))

بالمناسبه عكلتى عشره اتناشر حادثه:( ربناااااااااا يسترررررررررررررررر اومال هنسافر مع بعضينا ان شاء الله ازاااااااااى؟
ارجوكى عاوزه ادخل دنيا مش اخره..
طمنتى قلبى الله يكرمك:)

Wanda يقول...

اولا
من شار حاسد ازى حسد
ارقيكى بعد الحسد الى اخذتية على العربية
فى لسه حد بيحسد عربيات :-؟

ثانيا جملة "الهدوم الباردانة مع انها حاضنة بعضها" تعبير رهيب بجد
صح مش كل حضن بيجفى :-)

ثالثا
احكيلى عن مكتبة مبارك دى فى الزمالك على النيل صح ؟؟ و لا عند كورنيش النيل من ناحية الجامعة انت رايحة الدقى؟؟

رابع رهيب الصورة و الدعاء الى فى اول البوست ايه ده الكلام ده مكنش على ايامنا دا انتم تطرتم قوى فى الجامعة

اخيرا معلش طولت :-) ضيفة ثقيلة لازم تاخذ راحتها
ربنا يوفقك و تخلصى الكلية على خير :-)

Timo.. يقول...

بصيت بسرعة هنا وعجبتي الحواديت الـ (مش سريعة) دي.. وكمان عجبني قوي بوست "لكن سمائك ممطرة وطريقك مسدود مسدود يا بنتي" :)

Mo7ammed يقول...

يااه بوست لزيز
بس انا زعلت انك بتقعدى فى البنش التانى
ياجماعة البنش الاخير فيه الخير الوفير

:)

هابى نيو يير وربنا معاكو يابتوع رابعة عقبالنا اما نوصلها واحنا احياء ان شاءالله

أسماء أحمد فى حفلة تنكرية يقول...

وحياة ربنا انت مشكلة مالكيش حل
بجد بجد انت عسولة اوى
وطريقتك مطقطقه حطى 1000 خط تحت مطقطقه دى
لانى اصلا مش عارفه معناها ايه بس هى معبرة اوى عن الطريقة السكر بتاعتك دى
حلو اوى البوست
ويوم جميييييييييييل اوى
وتعبيراتك جامده
وفعلا النهاردة ضحكت علشان الكومنت يطلع حلو ذيك كده يا قمرايا

ستيته حسب الله الحمش يقول...

طب انا مضحكش على الصورة دي إزاي
مش ممكنة
تحفة
انا ها أطبعها مكبرة جدا وها أحطها على باب أوضتي في الجامعة
عندك مانع
اصلي بحب أسلي العيال واخليهم فاني قبل ما انكد عليهم
بس مش بأوديباس
بتشريح الضفادع والصراصير
نيهااااااااااااااااااااااااااااااااييييييييييييييييييييي

الله يرحم جدو
دعواته فعلا كانت حلوة قوي
وربنا ما يحرمك من ماما وبابا

بالمناسبة صاحبتك بس صريحة واللي في قلبها على لسانها
مش معنى ان حد ركب معاك ولم يعلق نفس تعليقها انه مختلف او متفق معاها في الطباع
ولكن كده كده ربنا يستر طريقك يا متهورة
ياللي بتنامي على الدركسيون زي ستيتة :)

mimi يقول...

شدي حيلك .. الامتحانات قربت .. بقالي كتير بدور علي لينك مدونتك أخيرا لقيته

ربنا معاكي ، أتدفي كويس ، الجو برد

تحياتي

هتشوفوا يقول...

أحداث شخصية لكن مليئة بالعبر

والصراع النفسي بتاع الحجاب, أصل لازم الواحد ياخد ويدي مع نفسه

عجبني أسلوب سردك,

تحياتي

Lady E يقول...

مي : الله يسلمك من كل شر يا حجه

وبعدين بت احنا فينا من الكلام ده طوويب محرومه من كتابي بس اما يتطبع نياهاهاهاهاهاها

وعويناتي بيسلموا عليكي
دلوقتي احسن الحمد لله لما بطلت القطرة هو شكله دكطور خريج صنايع

Lady E يقول...

El_Tahan : امين يارب

Lady E يقول...

Hager Za3bal : كويس انها حلوة مش ملتوتة :)

امين يارب انا وانتي وكل اللي بيدرسوا

Lady E يقول...

rayane naciri : اهلا بيك

سعيدة جدا برأيك

ربنا يباركلك في ريان ما شاء الله زي القمر

دمتم بخير

تامر علي يقول...

ممكن تكتبي على العربيه من روا
يا ناس يا شر كفايه قر أو
ماتبصش وتزيط دي بالتقسيط أو
حابس حابس وخمسة وخمسين في عين كل الحاسدين

أو ممكن تعلقي فردة جزمة ولد صغير :))

ربنا يسترها علينا وعليكي:)

mhmdwahab يقول...

ياريت بعد كدة تعملى حسابى فى القهوة بلاش بخل وعندى ليكى عنوان دكتور عيون جنان وبعدين اغلقى الباب بسرعة الدنيا برد

Lady E يقول...

الشعب لابد له من حكومه تشكمه : 100 فل وتمناشر فهمتيني يا شيما والله برافو عليكي :)

بالنوسبة للحوادث خليها على الله المكتوب على الجبين اكيد هتشوفه العنتين :)

Lady E يقول...

Wanda : اهلا بيكي

اكيد من شار حاسد بس انا مشورتش حاسد البنوتة ميبنش عليها انها ممكن تكون بتحسد بس ده اللي حصل لما ركبت العربية معايا

ثانيا : سعيدة ان الجملة عجبتك

ثالثا : مكتبة مبارك امتداد لكورنيش النيل في دمياط مش في الزمالك ولا الدقي :)

صاحبة مكان مش ضيفه يا قمرايا

نورتيني

Wanda يقول...

دمياط
جميل يعنى المكتبات منتشرة مش احتكار قاهرى حاجة تفرح و انا اقول الكتب الى كنت قارتها زمان فى المكتبة راحت فين
بصلى عندك كده فيه كتاب اسمه على باب زويلة ؟؟؟:-)) اصلى قراته زمان فى مكتبة مصر الجديدة بس اختفى من كام سنة و قولت اكيد راح مكتبة مبارك

المهم يا ستى الحسد اعتقد رد فعل لا ارادى بس المهم اننا منتماش زوال النعمة و متقلقيش لن يصيبك الا ما كتبه الله و انشاء الله كله يكون خير :-))

Lady E يقول...

Timo..: متشكرة جدا على رأيك
وسعيدة ان البوستات عجبتك

Lady E يقول...

Mo7ammed : حلوة المقولة دي :)

بس انتا بتسمع حاجة في البنش الأخير ؟ يبقى ازاي فيه الخير الوفيييييير

امين يارب ويارب توصلولنا يا بتوع اولى وتانية وتالتة وعلى ما توصل لرابعة اكيد هتكون بتشد في شعرك :)

Lady E يقول...

أسماء أحمد فى حفلة تنكرية : تسلميلي يا سومة
سعيدة برأيك المطقطق :) والمترقع كمان

يارب دايما مبتسمة وبتضحكي

Lady E يقول...

ستيته حسب الله الحمش : ربنا يسعد ايامك يا خالتو مع انك دكتورة جامعة بس اخدتي الموضوع بهزار ربنا يكرمك والكلام ده مش لكل دكاترة الجامعة طبعا

اللهم امين وربنا يخليلك احبابك يا حبيبتي


يا خالتو ايه فايدة الأسئلة الكتير طب هي مالها جبنا العربية بكام ومن اد ايه ؟ يبقى ده حسد ولا مش حسد وبعدين النظرات بتبان نوعها ايه للأسف

ربنا يكفيني ويكفيكي شر طريقك يا خالتو وحاجة تشرفني اني اكون زيك في حاجة :)

Lady E يقول...

mimi : كله على الله

بجد بجد فرحانة جدا بكلامك والحمد لله انك لقيتي المدونة ويارب تنوريني على طول

وفعلا الجو برررررد عاااا

a7med-Mado يقول...

ههههههههه
بجد المدونة تحفة ومرة تانية حبيت أسجل إعجابى فى البوست دة
وحلوة أوى عربية واحد صاحبى اللى هو بابكى دة
وربنا يكون فى عونك فى موضوع المحاضرات وشكسبير