السبت، 26 ديسمبر، 2009




يرضيكي يا جوجو (الدبدوبة بتاعتي) يقدمو امتحاناتنا ويخلوها 9/1 وباقي الامتحانات 20/1 وكمان يوم ويوم انتي عارفة يا جوجو اننا أصلا مش بنذاكر الا ايام الامتحانات يبقى هنذاكر امتى معلش يا جوجو ما انا بقيت في سنة رابعه

عارفة يا جوجو اخيرا هخلص دراستي وتبدأ ملامح حياتي تظهر او ده اللي انا بحلم بيه وطبعا مليون حاجة هتقف في طريقي وتكسر جناحاتي أصلها باينة من دلوقتي جناحاتي بتتكسر لما قربت ابقى مش عارفة اطير ومع ذلك لازم نتفائل برضه وبكرة احلى والكلام الحلو ده


عارفة يا جوجو في ف كليتنا حالات كتير للانفلونزا العادية وال اتش ون ان ون وادارة الكلية عارفين ومطنشين واحنا الطلاب عارفين ومطنشين وعايشين حياتنا عادي سلامنا متغيرش وبنشاتنا الزحمة برضه متغيرتش ومفيش اي اجراء وقائي اتخذته الكلية عادي جدا حياتنا ماشية بالبركة ، بيقولوا الحياه زي ما بنشوفها وانا مش قلقانه من الانفلونزا الجديدة لأنها لسه ضعيفه المشكلة لو طورت نفسها وحتى لو اتطورت مش هخاف منها :)

يا ترى ايه معنى الفرح ؟ هو الفرح حفلة ودي جي ورقص وطبعا اغاني شعبيه غريبه وفستان أبيض وبدلة سودا او بيضا (على حسب نفسوية العريس او الموضة ) ولا الفرح بيبدأ من جوه العريس والعروسة من فرحتهم ببعض ، هو الفرح ساعتين وبيعدوا ولا الفرح بيبقى بين اتنين هيكملوا عمرهم مع بعض وهيتنفسوا نفس الهوا وهتجمع بينهم نفس المساحه وهيشوفوا بعض كل يوم ( اهو يوفروا في فواتير التليفون وكروت الموبايل) بجد ايه معنى الفرح

والسؤال اللولبي ده من زمان في بالي بس فكرت فيه تاني اصل فرح الواد ابن خالي يوم الكريسماس

ولازم نروح او بمعنى اصح لازم نسافر علشان نروح طيب اروح الفرح علشان انكد على العروسة؟ البونية بتغير مني جداااااا مع اني بريئة برائة الذئب من دم ابن يعقوب معملتش اي حاجة تخليها تغير ومع ذلك جيت على نفسي وفهمت انها غيرانة فأوهمتها ان في مشروع خطوبة قريب بعدها هي فرحت وارتاحت نفسيا وانا زعلت وكرهت نفسي علشان كدبت علشان ارضي واحدة أقل ما يقال عليها انها تافهه ومعندهاش ثقة في نفسها ، أنا بجد محتارة أروح هنكد عالبونية مروحش هنكد على العريس :( لأنه مأكد على ماما كذا مرة انها لازم تيجي وكمان مش عارفة شعوري هيبقى ايه لما اشوف واحدة اضطرتني اني اكدب اكيد مش هبقى مرتاحة

ده غير ان الجو برد على فساتين السهرة وجو الأفراح أصلا بيبقى خنيق وبيبقى المفروض طول الوقت ان الحضور يكونوا مبتسمين ومزقطتين ومرسومين بيبقى جو كله مش طبيعي

شوفتي يا جوجو حياة البني أدميين مكلكعة ازاي احمدي ربنا انك دبدوبة

هناك 22 تعليقًا:

Mr.Hazem يقول...

يلا ان شاء الله يااارب بتخلصي من الكلية وبتحققي احلامك
على فكرة انا بحبش الناس المتشائمة , وانتي لقيتك متشائمة كتييير جداً
تفائلوا خيراً تجدوه , واكيد اللي عندو هدف حيحققه ولا لأ يا عيني :)
موفقة ياااااااااارب

أسماء أحمد فى حفلة تنكرية يقول...

ريحي نفسك شوية يا ليدي
كل شىء هيتحل باذن الله حاولى انتى بس تركزى فى المذاكرة وبس اليومين دول
و بالنسبة للفرح من رأيي تروحى وترقصى ومش ترقصى وبس لا ترقصى كمان مع ابن خالتك نياااااااااااااهاااااااااا
علشان العروسة تتنكد فعلا
بتغير منك انت
ده انت ملاك برئ بجد ذى ماقولتى والله
يلا بالتوفيق وذاكرى كويس اوى علشان تحققي كل احلامك يا كتكوتى

a7med-Mado يقول...

هههههه
على فكرة أنا ميرضنيش وقررت إنى أضحك على طول علشان إنتى بتحبى الناس الرايقة
أول مرة أدخل المدونة بس بجد جميلة
وربنا يوفقك يارب وتخلصى دراستك وتبدأى تشوفى حياتك
سعيد جدا بزيارتى لمدونتك

MǿиY El-Shreef يقول...

يارب تخلصي دراسه ع خير ده اولا

ثانيا بقى ف اي حتة ف الدنيا لو كان العريس قريبك يبقى العروسه هتغير من كل ذرة انثى ف العيله التانيه :))

عرايس هبله مش بتثق ف خلقتها :))

كبري دماغك وروحي فرفشي شويه

ABOALI يقول...

يااااااااااااه كل ده لجوجو ؟؟ليه كده بس تشيليها همك ....بس يلا اهى برضوا فضفضه بدل ما يحصلك حاجه بس ياترى بقى هى ردت عليكى كده وحلتلك اى مشكله ولا بتسمعك وخلاص ؟
على العموم شكلكوا والله رايقين انتم الاتنين وبتسمعوا فى الجاسمى وعايشين حياتكم.
قووووووووومى ذاكرى قوووووومى الامتحانات قربت
هههههههههههههههههههههه

Lady E يقول...

Mr.Hazem : أمين

مين ده مين الناس المتشائمه

تشائم في بلوجي اطلاقا مش متشائمة اطلاقا

طبعا تفائلوا بالخير تجدوه

أمين

ربنا يكرمك دعواتك بترفع من روحي المعنوية

Lady E يقول...

أسماء أحمد فى حفلة تنكرية : في واحدة صحبتي واختي الصغننه مش راضية تخليني اعرف اذاكر بتزعل لما مش بدخل عالايميل وبتزعل لما بقفل الموبايل واسمها سومه وخدالي بالك :)

ههههههههه ارقص مع ابن خالي لأ حرام كده هيجيلها شلل أطفال وبعدين مش عايزة انكد عليها يوم فرحها علشان محدش ينكد عليا يوم فرحي بعد عمر طويل ان شاء الله :)

والملاك البرئ دي اغنية عمرو دياب ايه حكاية اغاني عمورة معاكي يا بكاشه
وبعدين انا مقولتش الملاك البرئ اطلاقا مطلقا بالتلاته

تسلميلي يا سومه

Lady E يقول...

a7med-Mado :

حلو القرار ده وكويس ان مدونتي كانت السبب فيه

شكرا على رأيك في المدونة

امين امين امين 3 امين :)

سعيد ولا أحمد :)

دمت بخير

Lady E يقول...

MǿиY El-Shreef : وانتي كمان يا موني ده اولا يا انجينيره :)

هههههههه عرايس هبلة فعلا ما هي الموضة اليومين دول العرايس الهبله

ربنا يسهل مقررتش لسه هروح ولا لأ

ويلكم باك يا موني بالانجليزي مش بالعربي :)

Lady E يقول...

ABOALI : أومال لأ دي دبدوبتي الأنتيخ :)

هههه ليه الاحباط ده احلى حاجة في جوجو انها مستمعة جيدة وهو الانسان عايز ايه غير مستمع جيد :) يقعد يرغي وهو سامعه

اها متخلينيش بس اقول يارب تبقى رايق زيينا انا وجوجو :)

اغنية الجسمي بجد دمها خفيف

"قووووووووومى ذاكرى قوووووومى الامتحانات قربت"

بسمع الكلمة دي كتيييير اليومين دول كل الناس بيقولوهالي عاا عاااااااا عااااااااا

أسماء أحمد فى حفلة تنكرية يقول...

ع فكرة بأه ركزى فى كلامك هتلاقيكى كاتبه انك بريئة بريئة براء الذئب من دم ابن يعقوب
وحكايتى بأه مع عموووووووووووورة
بحبه حب محبتوش لحد
بجد هو فنان رائع واحساسه عالى اوى
بالنسبة لبكاشة بأه فى دى قولتلك قبل كده انى والله ما بكاشة خالص
بجد انا بقول كل حاجه من قلبى يعنى كل حاجه بقولها بتكون بجد وحقيقى يا امورتى......

حلم بيعافر يقول...

ربنا يخليلك جوجو
ههههههههه بس بلاش تتقلى عليها كتير باخبار البنىادمين دى
تحياتى

(Joudy) يقول...

انتى عارفة الحمد لله انها دبدوبة ده انتى عقديتها فى البنى أدمين وابتديتى بالدراسة وبعدين الجواز يعنى عندى إحساس على أخر البوست تكون انتحرت شنقا بالرصاص ههههههههههههه

بس بجد روحى الفرح وهتنكدى عليها ليه يعنى ماهى هتبقى معاها ويعنى اللى بتغير وتبين دى بصراحة بيبقى عندها ضعف فى الثقة بالنفس وانتى بلاش تزعلى إنك كذبتى إنتى عملتى ده علشان خاطر قريبك مش يتنكد عليه مش علشان خاطرها ربنا يهديها ويوفقك يارب ويكرمك بالخير

تقبلى مرورى ويارب أكون ضيفة خفيفة على قلبك

دمتى بكل الخير والسعادة

sookra يقول...

الفرح بيبدأ من جوانا
وكل المظاهر اللى بتبقى حواليه بتبقى ديكور مكمل فقط ولو الفرح موش جوانا يبقى كل اللى بيحصل دا تمثيل
تحياتى وعاوزه احكيلك روايه شيكاجو لكن شكلى هافصل النت
معلش
بقى

موناليزا يقول...

كنت مستنية أعرف مين جوجو
وأخيرا عرفتها:)
عجبنى نظرتك للافراح وهى تقريبا نفس نظرتى بس انا اخدت قرار من بدرى انى ماروحش افراح
واذا كان على صاحب الفرح(سواء العريس او العروسة) بروح لهم قبل الفرح بيوم او يومين وبعده فى شقتهم

Ana keda يقول...

ان شاء الله تخلصى كليتك على خير وجناحاتك تطول وتكبر كمان وكمان يا حبيبتى وتحققى كل حاجة

بس الفرح ده احساس تانى خالص وانا بتكلم عن تجربة يعنى احساس بكل حاجة فى نفس الوقت خايفة وفرحانة وقلقانة ومطمنة ومية حاجة فى بعض لو بيحبوا بعض بتبقى الدنيا اهدا بكتير وبتبقى حاجة حلوة اوى ولو فى تفاهم وحجات كده بتحسى لافرح ريتمه عاقل وكده
انا فرحى الناس كلها قالت مجانين والله

اهم حاجة فى الفرح انك تفرحى من جواكى اوى وتطمنى اوى بالحياة الجاية

وانتى يبنتى تروحى طبعا وتقولى لنفسك
انا جدع
واوعى تانى ترضى حد على حسابك
نصيحة من اختك يا حبيبتى

Lady E يقول...

أسماء أحمد فى حفلة تنكرية : ايوة قلت كده فعلا بس مقولتش الملاك البريء هناك فرق

ماشي يا سومة يا بكاشه :) نياهاهاهاهاها (وش بيطلع لسانه)

Lady E يقول...

حلم بيعافر : ليه خليها تعرف علشان متتمناش تكون بني ادمايه خليها دبدوبة احسن

Lady E يقول...

(Joudy) : او تنتحر غرقانه بالنط من البلكونه :( ماشي يا جوجو ماشي متنسيش ان دلع اسمك على اسمها :)

امين يارب

وعيب عليكي مش ضيفة صاحبة مكان ومدونه يا جوجو بلاش قلبي يدخل في الموضوع :)

وانتي كمان

نورتيني

Lady E يقول...

sookra : قشطة

ده نفس ذات رأيي

لااااا لن اقبل احكيهالي الاول يا سكره مليش دعوه عااااااا عااااا عااااا

لأ بجد تفصلي النت ليه روقي

Lady E يقول...

موناليزا : جوجو اتشرفت يا موناليزا :)

تصدقي حلو الحل ده انا كمان مش عايزة احضر افراح عايزة احضر افراح المقربين جدا جدا غير كده هطنش واعمل زيك

بجد عجبني الموضوع ده انك تزوري العروسة او العريس قبل الفرح او بعده بس احنا عندنا في دمياط ممنوع زيارة العرسان قبل اسبوعين فغالبا الزيارة بتبقى قبل الفرح

Lady E يقول...

Ana keda : أقولك على سر انا بقيت بنتظر وجودك في كل بوست

امين يارب تسلميلي يا حبيبتي

حلو اوي وصفك للفرح الف الف مبروك
بارك الله لكما وبارك عليكما وجمع بينكما في خير و ربنا يجعل حياتك كلها فرح

وبعدين احلى حاجة في الدنيا هي الجنان :)

"اهم حاجة فى الفرح انك تفرحى من جواكى اوى وتطمنى اوى بالحياة الجاية"

الله عليكي

وفعلا مفيش اصلا حد يستاهل ان الانسان يرضيه على حساب نفسه

بجد بجد سعيدة بتعليقك ده