الأحد، 20 ديسمبر 2009

اعمل اييييييييييييييييييييييييييييه


مآااااااااااااسي وكوارث وبلاوي ده منهجنا السنة دي بإختصار

بدأ العد التنازلي للإمتحانات وزي النهاردة ان شاء الله هيبقى اول امتحاناتي وفي عندي امتحانات شفوي الله اعلم هيحددوها امتى بس الأكيد انها هتبقى في اول شهر واحد

يعني انا عايزة اذاكر وبعد محايلة لنفسي وتوبيخ لنفسي برضه علشان اذاكر وفيلم التجمد الفظيع في الشتا اللي احنا فيه ده

الحمد لله الحمد لله مسكت الكتاب هيييييييييييه بقالي كتير مبمسكش كتاب من كتب الكليه طيب ده تطور رائع

فتحت اول موضوع في اول chapter ما علينا اني كنت باخد الكلمات بالشبه واترجمها وتطلع غلط يعني مثلا rarely أقرأها really وهكذا

مش دي المشكلة اطلاقا المهم بعدما قرأت اول 4 سطور لقيت ان الموضوع فيه ناس فقراء والناس دول قرروا انهم يبيعوا اطفالهم لحد دلوقتي عادي بتحصل وبنسمع عنها كل يوم بيبعوا اطفالهم علشان يعلموهم صح ويربوهم مش فقراء لكن اللي حصل في المقال انهم بياخدوا الأطفال لغرض تاني خالص وهو الأكل !!!!!!!!!!!!!!!

بيبيعوا الأطفال علشاااااان يتاكلوا

يعني واحدة تقول لجوزها انا عملالك شوربة بيبي بالصلصة يا ابو بؤله

وابو بؤلة وام بؤلة وبؤلة نفسه يقعدوا كده على السفرة او الطبلية او الترابيزة او اي حاجة وياكلوا بيبي


والكلام ده مش في مصر لكن في ايرلندا في القرن ال17 بس في المقال رموا كلمه كده تحرق الدم اللي هي الكلام ده كان بيحصل من زمااااااان قبل الحضارة في بلادهم لكن دلوقتي بيحصل في بلاد العالم التالت والحدق يفهم قصد الكاتب ايه

مشكلتي اني بتأثر بالحاجات اللي بقرأها بحسها اوي وبعيش مع ابطالها ودي حاجة بتتعب اي قارئ بيعيش جوه الأحداث

طب انا اعمل ايه دلوقتي افتح كتاب الاقي فيه قصة واحد بيتعدم واحلامه ولحظات موته

كتاب تاني الاقي فيه وصف لأكل الأطفال وان الناس من فقرها باعوا الأطفال للأغنياء علشان ياكلوهم ولو اني معتقدش ان الفقر يوصل للدرجة دي

كتاب تالت عطيل وديدمونة والغيرة القاتلة والخيانة هو خانها لما صدق انها خانته وخانها لما قتلها وبين ان جريمة قتلها حادثة ووقع سقف البيت عليها بعد ما خنقها وخان نفسه لما انتحر لما عرف انها بريئة

كتاب رابع مدرسة الفضيحة "سلطة" مش عارفه مين بيحب مين ومين اتجوز مين حاسة اني تايهه بين الأبطال ومأساه برضه

كتاب خامس انعدام البرائه اطفال همجيين ومتوحشين بيحبوا مناظر الدم والدمار وبتوصل بيهم الهمجيه لأنهم يقتلوا بعض وياكلوا بعض برضه

.......... الخ

اذاكر ازاي انا كل ده الله اعلم وهستوعب كل المآسي دي ازاي الله اعلم برضه


(( اللهم لا سهل إلا ما جعلته سهلا، و أنت تجعل الحزن إذا شئت سهلا))

هناك 37 تعليقًا:

Timo.. يقول...

يااا فتاح يا عليم...يا رزاق يا كريم..
ع الصبح كده..مآااسي وفقر.. واكل اطفال..!!
هو ايه مجال الدراسة اللذيذ ده..؟؟
عشان لما ابقى فرحان شويتين ذيادة وعاوز اظبط نسبة النكد في حياتي ابقى آجي عندكوا شوية..؟

Timo.. يقول...

أه صحيح...كل سنة وانت طيبة :)

Lady E يقول...

Timo..: اداب انجليزي حضرتك

زورونا تجدوا ما لا يسركم نياهاهاهاها

واتفضل والله كل الكتب متغلاش عليك ظبط النكد براحتك لما تقرأها يعني انا هتنكد لوحدي :)

Lady E يقول...

Timo..: وحضرتك طيب وبصحة وسلامة

mhmdwahab يقول...

حا جة بسيطة خالص اتفرجى على المذابح والماسى والتى يتعرض لها المسلمين فى كل مكان سوف تشعرى بالام والكابة ساعتها راح تقولى لما اروح عن نفسى واتسلى شوية بالمذاكرة

mhmdwahab يقول...

طيب ما انا كنت اداب انجليزى برضة ما كان عندنا البلوى دى دى جامعة اية السكرة دى لالا جامعة القاهرة ارحم بكتير دة احنا كنا فى نعمة بقى

Lady E يقول...

mhmdwahab : للأسف مقدرش اشوف أي حاجة من دي :(

Lady E يقول...

mhmdwahab : ايه ده بجد ! زميل :)

بس زميل من ايام كليات الزمن الجميل :) هي الكليات دلوقتي تتقارن مع الكليات زمان مستحييييل

mhmdwahab يقول...

احنا افظع حاجة درسنها كانت تاجر البندقية بس يمكن علشان التخصص كان ترجمة فالتركيز كان على السياسة والقانون الدولى

Hager Za3bal يقول...

وااااو
حاجه لذيذه خالص :)))))

ربنا معاكي يا بنتي
معلش استحملي الشهر ده ..

وربنا يوفقك والنتيجه تطلع وتبقي مبسوطه اوي ان شاء الله :)

Mo7ammed يقول...

ههههههههه
مش اخر سنة خلاص ؟

انتى فاكرة هيسبوكو بالساهل

امال اسمها سنة التخرج ليه

هههههههههه

ربنا معاكى

شاب فقرى يقول...

صباح الفل

شدى حيلك

ربنا معاكى

ان شاء الله بالتوفيق يارب وتنجحى وتحفظى كل الكتب الحلوة دى وتجيبى تقدير

مادام خايفة يبقى هتقدرى تعملى حاجة

خالص التحية والتقدير والاحترام

شاب فقرى :)

ملحوظة : ( هوا فعلا كانوا بياكلوا الاطفال عالعشا ؟؟؟)

sookra يقول...

اااااااااااااااه ياغلبى
بنت ياليدى هى ناقصه كئابه
كل سنه وانتى طيبه
انتى هتيجى لقاء الجمعه ولا لا؟
صباحك شيكولاته

sookra يقول...

هو تعليقى وصل ولا لا
اصل النت عمل الدنيئه وفصل وانا ببعته
لو موش وصل
هاقولك تانى بطلى وارحمينى لانى موش ناقصه اكل عيال
انا باكل رجاله
ههههههههههههههه
هتيجى اللقاء ؟
اه صحيح انتى بتقولى عندك امتحانات ربنا يوفقك
وايه اخر اخبار كتابك
صباحك شيكولاته

كيكى عوووووو يقول...

طب اقولك
حاجة انا النهاردة كان عندى امتحان شفوى مهم لمحاسبة انجلش هناخد اعمال السنة عارفة عملت ايه؟؟؟!!!

محضرتش المحاضرة
لاتعليق
وتستفيدى ب دة بايه انك متخديش بالك من كلامى اصلااااااااااا

أسماء أحمد فى حفلة تنكرية يقول...

ليدي مش عارفه اوصلك خالص
المهم انا كنت برن ع الموبايل لقيته مفتوح
وبعدين اتقفل تانى مش عارفه بأه ايه النظام....
يارب تلاقيه علشان بجد انا كده مفتقداكى جامد

Lady E يقول...

mhmdwahab : افظع حاجة درستوها كانت تاجر البندقية !

اوبجيكشن بقى دي المسرحية دي من كوميديات شكسبير وكمان بيغلب عليها قصتين اساسيين قصة حب بورشيا لبسانيو وصداقة انطونيو وبسانيو طبعا غير شايلوك التاجر اليهودي الطماع
يعني المسرحية تعتبر خفيفة مش فظيعة جنب الحاجات اللي درسناها زي ماكبث وهاملت وغيرهم

بالنسبة للترجمة هو حاليا مفيش تخصص في الكلية التخصص بيبقى اختياري بعد الكلية سواء في الماجيستير او دبلومه

وأكيد الترجمة مجال مش سهل خصوصا الترجمة السياسية ممكن كلمة غلط تبوظ الدنيا

Lady E يقول...

Hager Za3bal : هو ايه اللي لذيذ يا هاجر :) اوعي يكون البيبهات اللي بياكلوها عااااا

يارب اللهم امين

تسلميلي يا قمرايا وربنا يوفقك في دراستك وحياتك

Lady E يقول...

Mo7ammed : ههههههههه تصدق اول مرة اخد بالي انها سنة التخرج كنت فاكراها سنة الليسانس :)

افتكر كلامك بس لما توصل سنة رابعة ان شاء الله

فراشة يقول...

ياحبيبتى لا عندك حق بيبيهات بيتاكلوا ع العشا دا الدكاتره شكلهم جايبين المناهج دي مخصوص من كتر حبهم فيكم ههههههههه

لا ربنا معاكي يارب ومع كل اللى بيذاكروا

وحاولي تتعاملي مع المنهج كأنه فيلم خيال علمي مش حقيقه عشان متزعليش نفسك وتنخرطي مع الأحداث وتزعلي عليها

فكرتينى ليه ان فاضل شهر هههههه
ربنا يوفقك يارب وبالنجاح الجميييييل

Mr.Hazem يقول...

يععععععععععععععععع
هو اللي بيدرس عندكم كده بيتعذب على طول
ان اجاه نفس يدرس بتنسد نفسه من المكتوب بالكتاب ههههه

بجد مش قادر اتخيل انه طفل قدامي مشوي او مقلي يييييييععععععععععع

يسلموا :(

كفايـة طيبـة يقول...

ربنا يكرمك يارب ويوفقك ان شاء الله
عقبال ماتتخرجى وتخلصى من المواضيع دي

كفايـة طيبـة يقول...

نسيت اعلق على صورة البيبي ده

كميلة خالص :D

Lady E يقول...

شاب فقرى : صباح ومساء الورد

ربنا كريم

انا مش بس خايفه انا تايهه بندرس 8 مواد و10 كتب

بيتهيألي كانوا بياكلوهم عالغدى :(

Lady E يقول...

sookra : ههههههههه بتاكلي رجاله يا ساسو طب الحمد لله اني بنوتة :)

بالنسبة ل اللقاء ربنا يسهل ان شاء الله

امين يارب

كتابي كويس الحمد لله :) ربنا يسهل ويخرج للنور قريب وتلبسي بربرق تحت النقاب وتيجي حفلة التوقيع ان شاء الله

هتيجي اللقاء ؟

صباحك ومسائك شوكولاته

Lady E يقول...

كيكى عوووووو : منه لله الانجليش اللي مضايق الناس

ان شاء الله لما اشوفك هعضك

مي يقول...

هههه معلش ياقمر هانت السنة بقى ربنا معاكى بس فرفشى كده
والف سلامة عليكى
اموواه

Lady E يقول...

أسماء أحمد فى حفلة تنكرية : ربنا يخليكي ليا يا سومة واسفه اني قلقتك يا قمرايا

لجين أبو الدهب يقول...

معلش ياليدى ياحبيبتى انتى متاكدة انك بتمسكى كتب وبتذاكرى ولا بتمسكى جورنال الحوادث

بجد الله يكون فى عونك

قلبى معاكِ يابنتى :(

Lady E يقول...

فراشة : بيحبونا جدا :) بس مش كلهم بيحبونا اوي كده

أمين

حلوة الفكرة دي بس تنفيذها صعب

تسلميلي يا فراشة ومنوراني دايما

Sometimes يقول...

:D

كميل خالص
وحشانى يا بنوته

Lady E يقول...

Mr.Hazem : يع هو يع فعلا
بس اعترض بقى انا بس اللي اقول يع :)

وانتا تتخيل ليه بس يا مستر الكلام ده كان في ايرلندا مش عندنا

Lady E يقول...

كفايـة طيبـة : أمن ربنا يستجيب منك يارب يا قمرايا

سعيدة جدا بتعليقك وبدعوتك الجميله

Lady E يقول...

كفايـة طيبـة : عيونك هما الحلوين

البيبي جميل علشان شوفتيه جميل هو عنده صداع

Lady E يقول...

مي : الله يسلمك من كل شر يا مي

Lady E يقول...

لجين أبو الدهب : تسلميلي يا لوجي

امين

احلى حاجة في الموضوع ان قلبك معايا

ان شاء الله خير

Lady E يقول...

Sometimes : هو كميل بس ده كميل جدا

وانتي كمان وحشااني يا قمرايا