الأحد، 6 ديسمبر، 2009

لكن سمائك ممطرة وطريقك مسدود مسدود يا بنتي

بحب الصورة دي يا سلام لو فعلا امشي وسط السحاب

مش عارفة ليه بعد الأجازات بيكون في حالة ارهاق عامة النهاردة معظمنا كان شكلنا غريب في الكلية هي الأجازة بتريحنا وبتدينا دفعة للحياه ولا بتخلينا نرتاح وناخد ع الأجازة ؟

المهم حصلت حاجات كتير النهاردة اخترت لكم منها

خير اللهم اجعله خير خلصت الكلية وقولت أروح الشهر العقاري اسأل ممكن اسجل كتابي ومواضيعه ازاي وايه الخطوات اللي هعملها وكده من باب العلم بالشيء مش أكتر

المهم اني رايحة وجايه في طريق المحكمة اللي فيها الشهر العقاري كل يوم ومش عارفه مكانه ضللت الطريق في الأول وبعدين دخلت المحكمة ولقيت ما شاء الله كل المحاميين لابسين فورمال (رسمي فهمي نظمي ) ما شاء الله شكلهم يفرح بدل وحاجات كده بس هو محدش قال لهم ان الجرافت السودا معناها حداد؟ !!!!!! ما علينا

كان في انتخابات تقريبا لأن كان في زحمة غير طبيعية من المحاميين وواحد عمال يتكلم عن الغد المشرق البسام وقاعدين يسمعوه

المحكمة متواضعة جدا المهم دخلت اوضة كده مش مكتوب عليها اي حاجه علشان اسأل فين الشهر العقاري لقيت الموظفة نايمة
فسألت موظفين كانوا قاعدين جنب بعض هو فين الشهر العقاري قالولي هو ده قولتلهم اصل مفيش اي حاجة مكتوبة تقول ان هنا الشهر العقاري ( انا مسمياه شهر العقارب)
وسألتهم عن اني عايزة اسجل كتاب وشوفوا الحوار اللي حصل بس هوصف الأوضة الأول اللي كان قاعد فيها الموظفين

أوضة كبيرة فيها شباك واحد بيطل على مبنى تاني والأوضة مفيش فيها ابسط قواعد النظافة كلها تراب وشكل البلاط مش باين اساسا والدهانات بتاعت المكان باهتة بطريقة غريبة , انا وقفت شوية بقول الله يكون في عون الناس اللي بيشتغلوا هنا بجد حاجة صعبه يعني حاجه متشجعش عالشغل أصلا

أنا : السلام عليكم لو سمحت عايزة اعرف ممكن اعمل ايه علشان أسجل كتاب

الموظف : كتاب ؟

أنا : أيوة كتاب او مواضيع لكتاب

الموظف : كتاب ازاي يعني انتي كاتبة كتاب

أنا : أيوة

الموظف : كل الي بيحصل هنا هبل وعبط كل اللي هقدر أعمله اني اثبتلك التاريخ وخلاص عليكي وع القاهرة

أنا : القاهرة !!!!!!!!!!!!!!!!!!!!!!!!!!!!!!! اومال الشهر العقاري هنا فايدته ايه

الموظف : الشهر العقاري هنا مبيعملش حاجه للكتب كل اللي ممكن اعمله اني اثبت التاريخ وخلاص

أنا : التاريخ !

الموظف : بصي انا هقولك في مكان للكتب في القاهرة اسمه دار المصنفات الفنية في العجوزة عارفاها ؟

أنا : ....................

الموظف : طب بلاش عارفة وزارة الثقافة

أنا : ........................

الموظف : يبقى مش عارفاها هي المصنفات دي اللي هتفيدك هي في العجوزة والعجوزة في الجيزة على كورنيش النيل طبعا

أنا : وليه الشهر العقاري هنا مش بيسجل حاجه انا بسمع انهم بيسجلوا الخواطر او الأشعار او أي حاجه مكتوبة في القاهرة عادي

الموظف : اول مرة اسمع الموضوع ده

أنا : يعني الحل اني اروح القاهره :(

الموظف التاني : بصي ممكن تروحي رأس البر الشهر العقاري هناك هيسجلوا لك عنوان كل حاجه كاتباها في الكتاب

انا : وخلاص هنفجر عنوان طب والعنوان هيفيد بإيه ما ممكن الفكرة اصلا تتسرق انا عايزة أسجل الأفكار علشان حقوق الملكية الفكرية

الموظف : وهو في حد بيسرق الأفكار

أنا : في سري ياااااااااااااااااااااارب صبرني أيوة في ناس بتسرق الأفكار وبتنسبها لنفسها

الموظف : خلاص يبقى تروحي القاهرة

أنا : متشكرة جدا

وخرجت من المحكمة وانا مش شايفة قدامي وجوايا دموع مخنوقة يعني علشان أسجل الكتاب بس لازم اروح القاهرة اومال دار النشر بقى وباقي الخطوات هعمل فيها ايه

روحت الكتكوتة وفتحت الام بي ثري لقيت انغام بتقول دلوقتي أحسن - اني اعرف ان الطريق مكلكع دلوقتي احسن - ولسه هتنزل دموعي جت الأغنية اللي بعدها انغام برضه مهزومة ضعيفة مليش طموح قلت نيفر نيفر نيفر نيفر ناجحة وقوية وطموحة خير ان شاء الله

وفي الوقت اللي بحس ان الحياه فيه جايه اوي على احلامي ونفس السؤال بيجي في بالي هو ليه كل ما أقرب من تحقيق أحلامي الاقيها بتبعد عني يعني خلاص همسكها الاقيها طلعت تجري وتلاشت عن الأنظار
بفتكر حولم الله يرحمه لكن سمائك ممطرة وطريقك مسدود مسدود بس انا مش هستسلم ويا انا يا السفارة في قلب العمارة :) قاهرة قاهرة وانا هخاف يعني ولا ايه

وزي ما الموسيقار عمار الشريعي بيقول : في دنيتنا المجروحة ملناش الا الأحلام وانا اخدت الجملة دي وعدلتها وخليتها

في دنيتنا المجروحة ملناش الا الأحلام يمكن في يوم نقدر نحققها

ومفيش حياة من غير أمل وأميرة وإيمان :)

هناك 30 تعليقًا:

مي يقول...

هههههههه تصورى عندنا سيول فى اسكندرية انهارده ربنا يستر
بطلى تشاؤم يابت انتى عادى احمىد ربنا انه مألكيش فوتى علينا بكره وكان صدمك بعد مده
بس بصراحة ايه البوظان ده والنرفزة روتين خنيق ومالوش اى لازمة بس انا جربت ده كان فى غلطة فى شهادة ميلاد قالنا لالالالالالا لازم تروحوا تغيروا بيانات من القاهرة
الواحد بيفكر يعزل للقاهرة اهو بدل المشاوير وربنا يوفقك فى كتابك هو طريق النجاح صعب معلش

همس الاحباب يقول...

هههههههههههه
كل سنة وانتى طيبة
والقاهرةهتنور بوجودك طبعا
وده الروتبن والبيرو قراطية اللى بتقتل المواهب وتقضى على الطموح
بس ان شاء الله ربنا هيوفقك
تحياتى

Lady E يقول...

مي : ههههههههههه يعني مش ممطر بس عندكو سيول كمان :) ربنا يستر

حد قال اني متشائمة يا ميويا ؟ نيفر نيفر نيفر انا متفائلة جدا جدا جدا

ههههههه جربت شحططة القاهرة دي لما كنت بطلع البطاقة شهرين رايح جاي ومن مكان لمكان في القاهرة علشان نطلع بطاقتي وفي الاخر اخيرا طلعت من القاهرة بعد كمية روتين يكفوني لباقي حياتي :)

حد يسيب اسكندرية ويروح القاهرة :) معتقدش

أمين يارب

وفعلا طريق النجاح صعب وربنا يقدرنا عليه

سعيدة بيكي ومنوراني ومعطرة مدونتي دايما

Lady E يقول...

همس الاحباب : وحضرتك طيب وبخير وصحة وسعادة

القاهرة منورة بحضرتك وبأهلها

ولا بروتين ولا حتى فيتامين هيأثروا على طموحي واحلامي :)

امين يارب ربنا يكرمك ويرضى عليك بجد دعوة جميلة اوي

دايما بكون سعيدة بتعليقاتك

الشعب لابد له من حكومه تشكمه يقول...

تصدقينى لو قلتلك ان فى ناس تخصص تحطيم الاحلام,؟؟؟؟؟

تصدقى لو قلتلك فى ناس تخصص انها تحبطك باى طريقه؟

طب هتصدقى لو قلتلك ان اللى حصل ده طبيعى جدااا ولو حصل غير كده كنت هستغرب..

عموما مشوار الالف ميل بيبدأ بخطوه ,واول خطوه القاهره واحمدى ربنا ان القاهره هناك اهى وقريبه...
متخليش حاجه تحبطك وزى مقلتلك عاوزه احضر حفل توقيع كتاب باه والبس بربرق:))

غير معرف يقول...

عارفة انك مضايقة
بس مش قادرة امسك نفسى
القاهرة
كع كع كع كع كع كع كع
ضحكات شريرة مليانه نظرة انتصار
كع كع كع كع
القاااااااااااااااااااااهرة
وش بيطلع لسانه
كيكى عووو

بســـمة انور يقول...

انتى بس مالك ومال المحاميين
ابعدين عنهم بقولك
ههههههههههههههههه

ربنا يسعدك وان شاء الله تحققى احلاماتك كولتها
هههههههههههههههه

سلاموز ياموز

sookra يقول...

مساكى شيكولاته يابنوته صغنونه
وانا بقولك من هنا خليكى كدا متفائله على طول يمكن تعدينا كلنا
لازم نتفاؤل يكفى اننا عايشين ولازم نحلم ونحقق احلامنا كمان
وانا من هنا بضم صوتى لصوت البت شيما وانا كمان هالبس بربرق تحت النقاب واجى احضر حفل التوقيع وطبعا ليا كتاب هديه
وش شرير مبتسم كمان
هههههههههههه

أحمـــــــــــــد أبو العلا يقول...

وانتي فاكره ان الشهر العقاري ممكن يساعدك كده بالسهوله ديه

وممكن تقابلي بره مشاكل في المصنفات والحاجات ديه
بصي ياليدي
انتي عندك حلم
ومؤمنه بيه

يبقى تمشي الطريق وزي مايكون
مينفعش اليأس ولا الاستسلام

هتقابلي بيروقراطيه
هتقابلي ناس مش ؤمنين بحلمك
هتقابلي ناس تحبطك

بس هتقدري تعديه او لأ؟ السؤال ديه يجاوب عليها مدى ايمانك بحلمك

خواطر شابة يقول...

اي حلم لو سعينا له بجد بنحققه بس الواحد يكون صبور وطويل البال النجاح دائما طريقه صعب لكن ثماره ولا أحلى
بالتوفيق اختي

ستيته حسب الله الحمش يقول...

يا حبيبة القلب ليدي هانم

خديها مني حكمة
طالما فيه موظفين واجراءات حكومية
يبقى تنامي كويس
تصحي تشربي يانسون او كركادية
تاخدي الناقة وتقولي بسم الله حي على الكفاح
بسسسسسسسسسسسسسسسسسسسسسسس
وتعيشي بقى بلا زهق وبلا نفاذ صبر وبلا عصبية
دول نوع من البشرية قرر يطلع طحنته في الحياة على عيون كل مخلوق واقف قدامه

ربنا يعينك يارب

Lady E يقول...

الشعب لابد له من حكومه تشكمه :

ج1 : طبعا مصدقاكي

ج2 : اكيد مصدقاكي

ج3 : دي بقى مش مصدقاها انا كنت متوقعه غير كده

ههههه اه صح القاهرة مش بعيد اطلاقا ومش هتوه فيها اطلاقا مطلقا بالتلاتة
ده على اساس اني قاهرية ولا ايه :)

ربنا يسهل وده وعد منك عارفة لو جيتي يوميها وخلعتي هزعل منك وهعضك

Lady E يقول...

كيكي : ماااااااشي كع كع كع

طب ومين اللي هيستقبلني في القاهرة :) طبعا انتيختي حبيبتي نياهاهاهاها اضحكي ضحكات شوريرة براحتك يا أطيب وأرق قلب

امواااااااه وشوكولاته كبيرة

mohamed ghalia يقول...

هههههههههههههه
أهم حاجة أمل هى دى
ربنا يعينك يابنتى خلصى بس انتى كتابك الأول وربنا يكرمك

Lady E يقول...

بســـمة انور : ههههههههه مفيش يا بسبوسة اللي عطاهم يعطينا يا عم المحاميه :)

أمين يارب كولاتنا :)

سلامنجه يا منجه

شفـقــة و إحســــان يقول...

يا بنتى هى دى مصر وهو ده حال الموظفين والله كويس اصلا انه فهم ورد عليكى ده في مصالح حكومية تعل من المعاملة معاهم
عموما احسن انه فى القاهرة علشان تيجى ونشوفك ولا اقولك نشوف الكتكوتة مش انتى
هههههههههههههه
وحشتينى اوى
شفقة

Lady E يقول...

sookra : امين

يارب العدوى تنتشر وكلنا نتفائل يارب

حفلة التوقيع لسه بدررررررررري اتضحلي ان الموضوع مش سهل وكله كلاكيع

ربنا يسهل الكتاب يتعمل بس ونشوف موضوع الهدية ده

ميغلاش عليكي يا سكرة

Lady E يقول...

أحمـــــــــــــد أبو العلا : أيوة فاكرة انه هيساعدني اصل ليه ميساعدنيش يعني :( مكنتش حاطه في بالي اطلاقا اي كولكيعه من الكلاكيع

بيتهيألي مش هودي الكتاب المصنفات اصلا لأني لسه مش عارفه دورها ايه ومش عارفه اي معلومات عنها هضطر انزل القاهرة مخصوص علشان اسأل

"بصي ياليدي
انتي عندك حلم
ومؤمنه بيه"

كلامك فكرني بفيلم البحث عن السعادة لما الأب بيقول لإبنه

you got a dream

you had protect it

والله يا انجينير انا بدأت اقابل كل ده فعلا وبقيت مشوشة شوية بس الاحلام مش بتتحقق بالكلام بس

ادعيلي

Lady E يقول...

خواطر شابة : كلامك صحيح جدا

تسلمي يا حبيبتي

Lady E يقول...

ستيته حسب الله الحمش : يا كزوفي يا كزوووووفي حبيبة القلب وقلب مين خالتو ستيتة ده انا كده محظوظة جدااا ومحدش هيعرف يكلمني بعد كده :)

والقلوب عند بعضيها يا حبيبتي

ربنا ييسر ده احنا لسه في اول خطوة ولقيت الكلاكيع دي وباقي الخطوات كلها كلاكيع برضه

أمين يارب ربنا يباركلي فيكي يا خالتو يا حبيبتي

Lady E يقول...

mohamed ghalia : مالك ومال أمل يا محمد :) سيب البونيه في حالها مش هتعاكسها عندي في البلوج لن اسمح :)

أمين يارب ربنا يكرمك ويرضى عليك

Lady E يقول...

شفـقــة و إحســــان : تفتكري هي دي مصر بس يا شفقة عااااا

مصر احسن من كده بكتييييييييير

هههههههههه بقى كده مش هجيب الكتكوتة معايا هي مش ناقصه تتفشفش في شوارع القاهرة العامرة والزاخرة ممكن ابقي اجيب صورتها

وده وعد منك يا شفشوقة لما انزل القاهرة واكلمك هتقابليني مش كلام بلوجات :)

وانتي كمان وحشاااااااني وان شاء الله نشوف بعض ونحكي ونرغي كتير قريب

الفراشه الحائره يقول...

مع ام نيره جديد على مدونة صوت
المعاق http://sotmoaq.blogspot.com/

Lady E يقول...

الفراشه الحائره : تمت الزيارة يا فراشه

وان شاء الله المرة الجايه تقوليلي رأيك في المدونة

صوت من مصر يقول...

نفسى فعلا تمطر ولو لمده ساعه اقف وافتح ايدى وافتح فمى للحياه لانتعش ماء السحاب الالذ من قطر الندى

الفراشه الحائره يقول...

معجدبه جدا باسم مددونتك اسلوبك ما شاء الله عليه تلقائى جدا و في شيء من الحيويه استمرى و الى الامام حاضر يا لادى حهريكى تعليقات و زيارات لما تقولى يا بس ده انا لي الشرف

Somaya Kamal El Din يقول...

ربنا يكرمك
وتعملى الكتاب

بس متنسيش لما ترووحى كايرو تاخدينى معاكى احسن همووووت واسافر

Lady E يقول...

صوت من مصر : المطر بيغسل الشوارع والبيوت

يا سلام لو كان بيغسل الارواح والقلوب

وماء السحاب على ما بينزل الارض بيكون اتملا تلوث :)

Lady E يقول...

الفراشه الحائره : انا اللي يشرفني ان بنوتة جميلة زيك تقول الراي الجميل ده عن مدونتي وكمان تتابعها

في انتظارك دائما يا قمرايا

Lady E يقول...

Somaya Kamal El Din : اميـــــن

يارب ابواب السما تكون مفتوحة وربنا يستجيب يارب

دمتي بخير