الخميس، 26 مارس 2009

الحوار علينا حق :)



نايمة امبارح بحلم بالحوار بتاعي مع اسماء وكالعادة بدور على الجريدة مش لاقياها وفضلت ادور وامشي من محل جرايد لسوبر ماركت وبرضه مش لاقيه الجريدة المهم صحيت من النوم وقولت ان ده كان حلم وراح انساه وارتااااااح ان شاء الله هلاقي الجريدة وماما كانت بتصحيني كل 5 ثواني لغاية لما قمت من النوم غصب عني اهيء اهيء اهيء ونزلت مع ماما وروحت طريق مش طريق الكلية اصلا علشان اجيب الجريدة , وفعلا نزلت سالت على الجريدة ولقيتها هيييييييييه وجبت 3 نسخ وماما دورت على باب المدونخانة وجابت الحوار ولقيتها بتضحك فسألتها : بتضحكي على ايه يا ماما قالتلي اسماء حاطة صورة شوية اطفال حلوين وماما ربنا يخليها ليا ويكرمها قرأتلي الحوار وانا ماشية بالكتكوتة وبعدين طلعت ع الكلية وللأسف لحقت سكشن الترجمة من اوله
وطول السكشن عايزة اقرا الجرنال ومش هينفع انا قاعدة في الاول والمعيدة بتركز عليا في السكشن ده مش عارفة ليه المهم شوية وطلعنا علشان الفرنساوي حبيبي حبيبي مدرستوش في ثانوي فنطلي في الكلية ترجمة وجرامير وكلام يطير النوفوخ وارفع رأسك يا اخي لم يمضي عصر الفرنساوي بعد
الغريب ان اوائل الدفعة معاهم الفرنساوي وانا طبعا منهم :) بس انا اوائل من الاخر لأ وايه والافظع من كده ان في ناس خلصت كلية ولسه قاعدين عالفرنساوي بس , والافظع كمان ان في ناس شايلين مادة الفرنساوي بتاعت اولى وتانيه يعني هيمتحنوا امتحانين وبيدرسوا منهجين لنفس ذات المادة المهم دخلت المدرج وانا عاصرة على نفسي فدان لمون مع نص الدفعة بتاعت تالتة ومعظم دفعة تانيه وبعدين ركزت على التنفس علشان التنفس بطريقة معينة بيهدي الاعصاب بالطريقة دي ناخد نفس شهيق عميق والزفير نطلعه من الرئتين شوية شوية شوية ببطئ على رأي المستر وركزت على مبدأين بيهدوا النفسوية وفضلت اكرر جوه نفسي لليوم فقط لا تغضب لليوم فقط لا تغضب انا هاااااااااادية جدا وباردة جدا وبعدين ده تحدي وان شاء الله هنجح فيه
والضاكتور ده جزء من الكيان الواحد بتاع البشر مش انا اللي هاحسبه على ظلمه لطلابه
ربنا اللي هيحاسبه مش هو كان بيشتم في الكلية وطلابها اهي بنته دخلت نفس ذات الكلية يمهل ولا يهمل المهم بعد المحاضرة لقيت بنوتة زميلتي قاعدة في الركن البعيد الهادي وعماله تسمع في اغاني م اللي بتوجع القلب وتفقع المرارة – جديد اللي انتا بتقوله بجد طريقة مختلفة برافو قدرت تخدعني وخانني ذكائي معترفة , كان عندي سلامة نية مكنتش اصدق تلعب بيا بس انتا دخلت عليا رسمت الطيبة مع الحنية مكنش عندي شك ثانية ان في ناس كده في الدنياااا في ناس في الغش محترفة بجد طريقة مختلفة – وشوية وشغلت لو اذيتو انا لو اذيتو كان عملي زيادة عن كده ايه , ده مشفش غير حنية مني مشفش غير الخير وانا لو قاتلو حد اسهل من كده بكتير خايف لا يعرف قيمة اللي ف ايده لما يروح _ وكوكتيل كأبه قاعد قدامي قولتلها ياااااه كل ده من الفرنساوي معلش يا اوختشي معلش انا قولت مستحيل اسيبك لواحدك في الفرنساوي وجيت معاكي احسن تضلي الطريق ولا حاجة بس اعملي حسابك السنة دي ان شاء الله لا ممكن تنزل الارض ابدا فضحكت قولتلها ايوة كده روقي وسيبك من اي حاجة وبصي للجانب الايجابي للمشكلة العاطشيفية اللي انتي عايشاها دي قالتلي سمعته بوداني بيقول لصاحبتي نفس كلام اللي بيقوله ليا قولتلها ازاي يعني ما يمكن فاكر انه بيكلمك قالتلي لأ قالتلو في بداية المكالمة انا فلانة وعندي برنامج بيسجل المكالمات سمعت مكالمتهم والنهاردة لقيت رقمه في تليفونها تخيلي واغرورقت عينتينها بالدموع قولتلها برضه ربنا بيحبك عرفك انه مش مناسب ليكي وعايش دور كازنوفا ودون جوان وحتى لو اتجوزتو مكنتيش هتحسي معاه بالأمان وكل شوية كنتي هتنجرحي فمن دلوقتي احسن _ ده يوم بدري يريحني وانا بنساه ومش يمكن لو انا كملت اعيش ندمان_ مش حماقي بيقول كده ولا ايه اما بالنوسبة لصابحتك ربنا عرفك انها مش صاحبتك ومش امينة على صداقتكم وداين تدان روقي بقى واطلعي من مود في ايه بينك وبينها بتاع امال ماهر ده قالتلي ريحتي قلبي شوية ربنا يريح قلبك قولتلها ماشي يا قمر مش عارفة دي دعوة ليا ولا عليا اصل لو قلبي ارتاح هموت ههههههههههه سلام واشوفك على خير يوم السبت ان شاء الله
وروحت للكتكوتة فتحت الراديو لقيت تامر يا حوستي بيقول هغني لكل واحد حبيبتو رايحه منو واقوله الجرح واحد قلوبنا شاربه منه وانا الحقيقة بحب الاغنية دي وبعدما خلصت الاغنية جت اغنية تامر تاسوع هو انتا مين بيصدقك علشان عايزني اصدقك وارجع واسامحك من جديد من تاني وارجع اعشقك ........_ قولت يا خبر يوم اغاني الخيانة العالمي ههههههه هما عملو احتفال من ورايا ولا ايه
ونطلع من الرغي ده بحاجتين اول حاجة اني مزقططة وفرحانة بالحوار وبصراحة بقى حاجة مهمة حصلت في حياتي
واني اتكلت على خالتو تجيبلي نسخ من الجورنال ومجبتش فالحمد لله اني لقيت الجريدة هيييييييييه
شكرا يا اسماء بجد على الكلام الجميل اللي كتبتيه عني ربنا يكرمك
تاني حاجة خلينا نبقى متفائلين بالخير لأن فعلا لما بنتفائل بالخير بيحصل وصدقت المقولة بتاعت حياتك من صنع أفكارك تخليها حلوة تبقى حياتك حلوة تخليها وحشة تبقى حياطك مطينة بطين :)

هناك 44 تعليقًا:

ضايع يقول...

فكرتينا بايام الجامعه والدراسه والشقاوة

والله فيكي الخير

بوست جميل جدا قلب عليا البطاطس وفكرني بالذي مضى وراح وانقضى

تحياتي .......

Lady E يقول...

ضايع : تسلم يافندم
نورت المدونة

حسام غانم يقول...

هههههههه

مبروك الحوار

زمان العدد ده حقق رقم قياسي في المبيعات طبعا

اعملي الاتي بقى
1- افتحي الجورنال على صفحة الحوار
2- صوريه بالموبايل
3- ارفعيه عالمدونة

مستنيين :)

Lady E يقول...

حسام غانم : كده يا حسام مااااااااااشي انسى مش هرفع الحوار عالنت انا نوهت عالمدونة من قبلها علشان اللي عايز يشوف الحوار يشوفه في الجورنال (وش بيطلع لسانو)

احساس طفلة محبة للرومانسية بس واقعية يقول...

يا ليدى انا عايزة اشوف الحوار اجيب الجريدة ازاى دلوقتى انا طيب
لو سمحتى عايزة الحوااااار عااااااااااااااااااا
لحسن هجبلك زلزال واجى لحد عندك
انا مش بخااااااااف انتى عارفة

جميل جدا الكلمتين اللى قلتيهم لزميلتك
الا انتى متعرفيش مين اللى قال ان البنات بتحب الفرنساوى
عشان هو لغه رقيقة
عايزة اقولة لالالا مش بنحبة خالص
اليابانى اسهل بكتير
هاهاهاهاهاهاها

تقبلى مرورى

Lady E يقول...

احساس طفلة محبة للرومانسية بس واقعية : هههههههههه من عنتيني يا احساس طفلة هبعتهولك اكسليوسف على مدونتك مش فارقة علشان فيها موديريشن على الكومنتات

وبعدين تعالي بس من غير زلزال تنوريني يا قمرايا

والفرنساوي لغة حلوة بس لما يكون في امتحان بتبقى لغة حلوة جدا جدا جدا يعني :) وبالنوسبة للياباني فأنا هتكل عليكي علشان تعليميني بقى :)))

Ahmed يقول...

بمبي بمبي بمبي
خلينا نتفائل أحسن
مهو لو متفائلناش الاختيار التاني مش حلو

انتي متعقده ليه من الفرنساوي بس؟
ده لغه لذيذه
مد بؤك مترين قدام, اكتب كلمه طويله وانطق فيها حرفين بس, رفع صوتك, واقفل بؤك وانت بتتكلم
ههههههههه

ربنا يقويكي

لما تبقي متفائله بتقدري تساعدي اللي حوليكي, وده اجمل حاجه عملتيها
ناس كتير بتبقى محتاجه تسمع كلمه واحده حلوه عشان تساعدها

طولت عليكي؟
قوليلي براحتك
ههههه

KEBLAWYAT يقول...

ألف مبروك ع الحوار

أكيد طبعا هيبقى جامد


بالمناسبه

اللغة الفرنسية دى جميلة وبنت ناس

Resala يقول...

هههههههههههههههههههه
بجد جامده جدا جدا البوست ده
وبجد اسلوب اكتر من رائع
تقبلى مرورى ومنتظر تشريفك ليا فى مدونتى
ويارب تعجبك
كلها كوميديا (مفيهاش كابه ولا لو اذيتو)
هههههههههههههه

د. ياسر عمر عبد الفتاح يقول...

الف مبروك على الحوار

الشاعر الحزين يقول...

أحلى حاجه
لما تعبرى عن اللى أنتى عايزه تقوليه
بمنتهى البساطه
بيكون فعلا الكلام خارج من القلب

تقبلى خالص تحياتى

mohamed ghalia يقول...

احنا برده مبهدلنا فى الضرايب
يلا إن شاء الله خير
وأسماء فعلا شخصية روعة
دمتى بكل الود

مهندس / على درويش يقول...

ان شاء الله ربنا ينجحك في الفرنساوي


اما بالنسبه للحوار فانا عايز اجيب الجرنال دا

أجيبه منين وازاي واسمه ايه ؟



تحيايتي

blue-wave يقول...

ممكن اعرف ايه اللى حصل؟
من حقى صح ولا ايه؟

ELMASRYA - MOSLEMA LELLAH يقول...

موضوعك مزأطط فعلا النهارده زيك يا كتكوتة هانم

اولا مبروك إنك بقيتي من أصحاب الحوارات الصحفية وذلك يدل إن دل على شيء إنك شخصيى عسلية بسكوتاتية

ثانيا عاجبني روح التفاؤل الجميلة دي والأفكار الإيجابية اللي بتستخدميها في حياتك

ثالثا قولي لصاحبتك ماتزعلش نهااااااااائي واللي يبيعها تبيعه ببلاش وهي الكسبانة

وسلميلي عليها وقوليلها طنط المصرية بتقولك برنامج تسجيل المكالمات ده بتجيبه منين وبتستخدمه ازاي

إياكي تنسي أحسن أخاصمك

مواااهين علشان واحده ليكي وواحده لماما

dramaqueen يقول...

بجد انتى عسل وسكر وقمر

تستاهلى كل خير
ربنا معاكى فى الفرنساوى

لجين أبو الدهب يقول...

هههههههه..

طب كويس انك خفتتى عليها المواجع ..

ياما كنا بنشوف فى الكلية والبت تفضل تعيطى وما تجيش ..

فلان ما جتش ليه ياجدعان ؟؟

أصل نفثيته تعبانة اكمن الواد حمو كذب عليها ..

اخس عليك ياحمو .. D:

الف مبروك ياجميل على الحوار ..

وياريت لو مافيهاش ضرر تنقلهولنا لانى للاسف ما عرفتش احصل على الجريدة ..

او ليها سايت قوليلى ..

دمتِ بخير حبيبتى ليدى ..

Lady E يقول...

أحمـــــــــــــد أبو العلا : هههههههه لا براحتك مين هو البلوج بلوجك ولا ايه وبعدين خد بالك انا بحقد عليك كاتب فرنساوي في البلوج بتاعك وانا مش عارفة اكتب كلمتين فرنساوي على بعضيهم عاااااااااا
بخر نفسك واقرا المعوذات بقى :)


ناس كتير بتبقى محتاجه تسمع كلمه واحده حلوه عشان تساعدها عندك حق

ربنا يكرمك يا احمد

Lady E يقول...

قبلاوى : الله يبارك فيك يا قبلاوي
والحوار كان جامد فعلا

وبعدين انا ممكن اكلملك عيلة الفرنساوي علشان تخطبها بدام بتحبها كده :)

عاشقه الرومانسيه يقول...

هههههههههههههههههههه
حلوه قوى موضوع حياتك مطينه بطين دى
تعرفى انى ساعات بامسك فى النكد واتبت واديها اغانى خيانه على ودنه
وساعات بانفض للدنيا كلها واعيش اللحظه
بس تعرفى ؟
انتى بنت عسسسسسل
ربنا يسعدك كمان وكمان

KEBLAWYAT يقول...

وبعدين انا ممكن اكلملك عيلة الفرنساوي علشان تخطبها بدام بتحبها كده :)

طيب ياريت

ويابخت مين وفق راسين ف الحلال وهنيالك يا فاعل الخير

Lady E يقول...

Gemy : تسلم يا جيمي مدونتك هي اللي اكثر من رائعة

Lady E يقول...

د. ياسر عمر عبد الفتاح : الله يبارك فيك يا د. ياسر

Lady E يقول...

الشاعر الحزين : شكرا على رأيك الجميل ده يا شاعر

Lady E يقول...

mohamed ghalia : خير يا محمد فاضلك زلطة وتطلع بره بالتقدير اللي بتحلم بيه ان شاء الله

واسماء فعلا شخصية جميلة ورائعة

تامر علي يقول...

كويس انك عرفتي تتفألي في يوم النكد العالمي ده ... وبعدين مش تعملي سكان للحوار وتحطيه علشان الناس اللي معهاش تجيب الجريدة تتثقف برضو :) ومنها تعملي إعلان للجريدة يمكن يشوفوكي بحاجه :)

لاءبجد هاشوف الجرنال ده وأقول رأيي في الحوار ان شاء الله

تحياتي :)

Lady E يقول...

مهندس / على درويش : أمين يارب يا باشمهندس

الجورنال اسمه العالم اليوم ومعاه ملحق اسمه تيلي بيزنس باب المدونخانة العدد كان امبارح يوم الخميس مش عارفة ممكن تلاقيه ولا لأ

Lady E يقول...

blue-wave : :((((((((

مسدس صغير يقول...

مبروك على الحوار اللى اكيد جميل.
بوست ظريف وجميل
احييكى عليه.
سلام بالموز

Ahmed يقول...

ليكي عندي تاج ياريت تزوريني وتجاوبي

ميشيل حبيب يقول...

مرحباً Lady E،
لقد قام أحد المعجبين بمدونتك بإضافتها إلى تدوينة دوت كوم، بيت المدونات العربية.

قام فريق المحررين بمراجعة مدونتك و تصنيفها و تحرير بياناتها، حتى يتمكن زوار الموقع و محركات البحث من إيجادها و متابعتها.
يمكنك متابعة مدونتك على الرابط التالى:
http://www.tadwina.com/feed/1030

يمكنك متابعة باقى مدونات تدوينة دوت كوم على الرابط التالى:
http://www.tadwina.com

لعمل أى تغييرات فى بيانات مدونتك أو لإقتراح مدونات أخرى لا تتردد فى الإتصال بنا من خلال الموقع.

و لكم جزيل الشكر،
ميشيل حبيب.
فريق عمل تدوينة دوت كوم.
http://www.tadwina.com

كيكى عوووووو يقول...

ياحلاااااااااااااااااااااوة يا ولاد
نونتى اسمها اتكتب وبقت مشهورة
لولولوولولىىىىىىىىىىىىىىى
وسلمولى عليه
***هو مين دة**
انا عايزة اعرف هى كتبت اييييييييية بسررررررررررررررررعة ابعتيلى على الميل
***خلاااااااص يبقى كدة مفيش شيكولاتة ما انتى خلاص بقى عديتى وبقيتى مشهورة**
مبروووووووووووووووووووووووووووك
مبرووووووووووووووووووووووووك
يالهوى مش عارفة اكتب اية ولا اية؟؟
اة صحيح ايييييييييييية الكوكتيل الكئيب دة الى انا شفتوه
**سمعينى بقى اغنية**
والشيكولاتة راحت راحت مطرح ما راحت**
عووووووووووووووووووووووووو

احساس طفلة محبة للرومانسية بس واقعية يقول...

ليدى
شكرا على الحوار الرائع دا مش عارفة كنت هوصلة ازاى لو انتى مبعتهوليش
دا انتى اصلا وفى مصر وكنتى خايفة
متلحقيش العدد:)
بصى انتى ليك تاج فى زمتى
ياريت تيجى تخدية
:)

Lady E يقول...

ELMASRYA - MOSLEMA LELLAH : تسلميلي يا اختي الكبيرة في المقام بالنوسبة ل طنط دي صعبة اوي حضرتك لسه صغنونة عليها

والمشكلة بالنسبة لصاحبتي ان اللي بتحبه مش بيعترف انه مش بيحبها حتى بعدما سمعت بودانها كلامه مع صاحبتها
فمش قادرة تنساه وتبعد عنه

اما بالنوسبة لبرنامج تسجيل المكالمات ف ممكن يعمل مشاكل كتير ملهاش لازمة لكن لو فعلا محتاجاه فهتسألي عليه في اي محل موبايلات وهيحط لحضرتك البرنامج اللي يمشي مع الموبايل بتاعك وبعد كده البرنامج بيسجل اوتوماتيك او بيسألك قبل المكالمة تحبي تسجليها ولا لأ على حسب البرنامج نفسه

Lady E يقول...

dramaqueen : أمين يا رب
تسلميلي يا قمرايا انتي اللي عسولة وقمرايا وسكرة

Lady E يقول...

لجين أبو الدهب : الله يبارك فيكي يا حبيبتي
واخص عليك يا حمو زعلت البونية ههههههه
ان شاء الله هجيب الحوار قريبا على المدونة مع اني مكنتش عايزة انشره هنا بس انتي تأمري يا لوجي

Lady E يقول...

عاشقه الرومانسيه : انتي اللي عسل وسكر وشوكولاته كمان يا دودو :)

Lady E يقول...

قبلاوى : وحسنة قليلة تمنع بلاوي كتيرة

:)

Lady E يقول...

تامر علي : والله بحاول اتفاءل اليومين دول حتى في اسوأ الظروف والحمد لله على كل حال

وان شاء الله هنقل الحوار قريب على المدونة يا تامر بس كل تعليق هيبقى بربع جنية

Lady E يقول...

مسدس صغير: الله يبارك فيك يا مسدس
سلاموز بالموز والمنجه كمان

Lady E يقول...

أحمـــــــــــــد أبو العلا : مع اني مش بحب التاجات بس تاج مقبول وشكرا انك اهدتهولي يا انجينير

Lady E يقول...

ميشيل حبيب : شكرا ليك ولفريق عمل تدوينة دوت كوم وكمان شكرا للمعجب بمدونتي اللي اضافها عندكم في الموقع المتميز والجميل وشكرا لكل قراء مدونتي اللي من غيرهم المدونة مكنش هيبقى ليها قيمة

بجد انا سعيدة جدا ان مدونتي موجودة في الموقع الرائع ده وشكرا لحضرتك مرة تانيه

Lady E يقول...

كيكى : هييييييييييييييه نورتي المدونة والنت كله يا كتكوتتي
وكده انتي اللي هتجبيلي شوكولاته بقى
ومن عنتيني هبعتلك الحوار شوفتي التفرقة العنصرية دي :)))))

Lady E يقول...

احساس طفلة محبة للرومانسية بس واقعية : بتغيظيهم ولا ايه يا احساس طفلة بجد انا سعيدة جدا برأيك الجميل ده وسعيدة ان الحوار عجبك

وبالنوسبة للتاج تاجين في بوست واحد وهو نفس ذات التاج احمدك ياااارب :)))) هدية مقبولة يا قمرايا شكرا ليكي ع التاج الجميل