الثلاثاء، 31 مارس 2009

محب عمره ما حب !!

شوفتو الاعلان بتاع فودافون بتاع اصحاب بلاس في واحد اسمه محب بيكلم 3 بنات وكل بنت يا حرام فاهمه انه بيحبها
وطبعا هو بيتسلى بالتلاتة , الاعلان تحسوا انه زي نكته او دمه خفيف لكن لما بفكر في فكرة الاعلان وان في شباب فعلا كده بحزن أوي
طب ليه هو انتا معندكش قلب ياللي بتعمل كده ؟؟ ازاي تحب تلاتة وتوهمهم ان كل واحدة فيهم هي فتاة احلامك واللي مش هتقدر تكمل من غيرها وازاي تبقى بتكلم واحدة منهم وتقولها كلام وتقفل معاها وتقول للتانية نفس ذات الكلام طب ليـــــــــــه ؟؟ حد يفهمني؟؟ ايه الاستفادة ؟؟ ليه الشباب متخيلين ان قلوب البنات لعبة ؟؟ يعني هو المطلوب مننا كبنات اننا نقفل على نفسنا ومننزلش نتعلم ومنفتحش النت ونعزل نفسنا عن الدنيا كلها علشان منتجرحش ؟؟ المشكلة ان ال3 بنات دول ممكن يكونو عارفين ان حبيبهم كده وكل واحدة بتمني نفسها انها هي اللي في قلبه وان باقي اللي يعرفهم مجرد اصدقاء وبتصدق كلامه وهي من جواها في حاجة رافضة في حاجة بتقولها فوقي من الوهم اللي جواكي فوقي قبل ما تصحي على بحر احزان تغرقي فيه وتموتي وانتي عايشة
يا ترى ليه الحب بقى وهم وكدبة كبيرة ؟ يا خسارتك يا حب في زمن انعدم فيه الحب والمشاعر البريئة
اسيبكم مع خاطرة كتبتها عن الحب :

لماذا يا قلبي ؟؟
انك تدري ان الحب هو سبب الشقاء
بل هو الشقاء نفسه
ولكنك تعاندني
اسمعني لن ادعك تحب مهما حدث
فلتبقى كما انت بلا ضعف , بلا عناء , بلا حب
اصمت لا نقاش ولا تقول اني قاسية
لأنك تعلم انني لست كذالك
لماذا لا تفهم ؟؟؟!
هل تريد ان ترى دموعي كل ليلة
هل تفضل ان اسهر لأكلم القمر والنجوم عن حببيبي
هل تحب أن يقسو عليا الحب ويجرحني؟
تُرى هل علمت ماذا يفعل الحب بالقلوب؟؟
انه يكسرها ويكويها بنار الشوق واللهفة
ثم سرعان ما تنخمد النيران وتخلف ورائها
رماد الدموع والحسرة والألم والندم
يا قلبي تمهل وتعقل فالحب
الحب مجنون مجنون مجنون
وإذا وجد طريقه اليك
فلن ألوم الا عليك


هناك 39 تعليقًا:

Gemy يقول...

هييييييييييييييييه اول تعليق
انا معاكى فى كل كلمه بجد
انا شايف ان فى شباب كتير بيعمل الموضوع ده
واظن ده من الفراغ العاطفى الموجود جواهم
وكمان عدم تقدير لمشاعر الناس
والاستهانه بيها
......................
بس انا قريت الكلام ده فى مجله اييييييه؟
ايه يا واد يا جيمى؟...مش فاكر..ممكن تقوليلنا كانت مجله ايه؟والعدد الكام؟

Gemy يقول...

وكمان نسيت اقول حاجه...الخاطره اللى انتى كاتباها تحفه بجد.........
بس بعد كده قولى انك نقلاها ...بلاش الحركات النص كم دى...(وش مطع لسانه)

Lady E يقول...

Gemy : مبروووووك على اول تعليق كسبت ربع جنية :)

ويا ترى الشباب دول مفيش عندهم احساس خالص ولا ايه؟؟

هههههههههههههه بقى بتجرب فيا البوست بتاع بلوجر اخر غلاسة مااااااشي يا شورير

غروب يقول...

فعلا والله عندك حق لسه كنت باتكلم عن موضوع مشابه عندى

مش عارفه العالم دى هتستفيد ايه؟؟؟؟

بس الخاطره جمييييييله

تسلم اييى وربنا يهدى الجميع

ويسعدك يارب

Lady E يقول...

Gemy : تاني لااااااااا لا اسمح الا الخاطرة دي من بنات افكاري
يا حراااااس البلوج طلعوووووووه بره البلوج

Lady E يقول...

غروب : توارد افكار مش اداب انجليش زي بعض يا اوختشي هههههههه

انا كمان نفسي افهم هيستفيدوا ايه وياريتهم معترفين انهم كدابين

والخاطرة جميلة علشانك قرأتيها

ربنا يتقبل دعائك ويسعدني ويسعد الجميع

نورتيييييييني ومتغبيش عننا تاااااني

mohamed ghalia يقول...

أكيد ده مش حب ده إستهبااااااااال
جميلة كلماتك
دمتِ فى سعادة

الشموع البيضاء يقول...

والله هو الاعن ده اصلا معجبنيش
حتى لو من باب الضحك والنكته دى حاجه مش صح مفروض نطلعها وحشه مش حلوة بس كالمعتاد احنا دايما نجمل الغلط
الحب دلوقتى بقا حاجه نادرة ولها ناسها اما بالنسبه لمحب وصحباته فدول ميعرفوش حاجه عنه
تحياتى

الشاعر الحزين يقول...

فعلا وللأسف أغلب الشباب كده

بيكون حاسس انه كده يبقى واد جامد

لكن بالعكس بيكون ندل وندل قوى كمان

لكن هنقول لمين ؟؟؟؟؟؟؟؟ هو ده السؤال

لكن بجد موضوع مميز قوى

تقبلى خالص تحياتى

لجين أبو الدهب يقول...

اسكتى ياليدى انا متغاظة اوى من الاعلان ده ..

فرحانين اوى ان الولد بيواعد تلات بنات وبيضحك عليهم فيعينى عاملين له عرض علشان يضحك على البنات براحته ..

كان فى بنت صاحبتى حبت شاب وانا الصراحة كنت حاسة انه زى حالات محب كده ..

ومرة قاعدة مع بنت بالصدفة لاقتها بتتكلم عن واحد دايب فى دباديبها وواحدة واحدة عرفت انه هو ..

وصاحبتى قلبها انجرح جدا ..

حسيت انه اضحك ليها ..

مش عارفة ايه متعة الشاب فى كده ..

وهل يرضى لاخته انه يتلعب بيها زى ما بيلعب ببنات الناس ..

ربنا يهدى الشباب ويبعد عن اللى زى محب ..

دمتِ بخير حبيبتى ليدى ..

كيــــــــــــارا يقول...

نيران الشوق واللهفه ماجملها

مش في اجمل من ن يكو في قلب خايف عليكي

قلي بيحتويكي وواخدك في حضنه وبيحميكي من الايام

الورد جميل بس فيه شوك واي شي لازم يكون فيه حاجه ناقصه

ياااااااااااااااه لما تحبي ومش تقدري تكتمي بسمتك

فكري لو اتحبيتي بجد وحبيبك سهران جنبك بيداويكي

ولا لما يكون مرهق او بعيد وانتي هتموتي من كتر الشوق والحب واللهفه واول اما تشوفيه تحسي ان انتي اسرتي العالم كله وانتي في حضنه وحاسه بحنانه وامانه

العيب مش في الحب

**********

ياللي ظلمتوا الحب وقلتو وعيدتو عليه مش عارف ايه

العيب فيكوا يافي حبايبكوووووووو

اما الحب


اما الحب

يارووووووووحي عليه

نشتكي منه لكن بنحب

احساس طفلة محبة للرومانسية بس واقعية يقول...

اااه الاعلان دا بيستفذنى بسمعوا على نجوم اف ام كتير
ولا الاعلان اخوة البنت اللى محتارة تلبس فستان لونة اية
مش عارفة اية الهيافة دى

بس انا مش معاكى
انتى ظلمتى الحب
لان الحب الحقيقى بيعيش قد ما بيعيش ومش بتلاقى فية اى جراح اى نعم ممكن يكون فى مشاكل وسهر بس مش جراح ابدا

لكن اللى فى الاعلانات والاغانى دا كلام
وعمر المشاعر مكانت كلام

ربنا يسعدك و يوفقك فى حياتك
وتلاقى الحب الحقيقى

تقبلى مرورى

Lady E يقول...

mohamed ghalia : ده استهبال فعلا يا محمد
تسلم وشكرا ليك

Lady E يقول...

الشموع البيضاء : كلامك سليم يا قمرايا

Lady E يقول...

الشاعر الحزين : طب لما بتشوف حد كده يا شاعر يا ترى موقفك منه بيكون ايه؟؟ ويا ترى في امل ان شخصية زي شخصية محب تتصلح ويتعدل حالها؟؟
ربنا يهديهم ويهدينا

Lady E يقول...

لجين أبو الدهب : حاجة تغيظ فعلا يا لوجي

ربنا يهدينا ويهدي الجميع ويحفظ قلوبنا من الجرح
دمتي في حفظ ورعاية الرحمن يا حبيبتي

e_emy يقول...

واحد فاضى بقى D:
بس ربنا هيجازى كل حد ع تصرفاته


وخاطرتك جميلة جداااااااااا
ربنا يوفقك ..

dramaqueen يقول...

معاكى الحب بيسهر وبيقلق بس قلق لذيذ
وسهر مع احلى نجمة فى السما
اما الشباب اللى بيعملوا كدة هيجى وقت يتعمل فيهم كدة
ودول اصلا شباب هايف
ميعرفوش يعنى ايه حب

دى خاطرة كنت كتبتها يارب تعجبك


عارف الحب بيعمل ايه؟؟؟؟؟
بيملى الدنيا فرح وسرور
لو يوم تايه او حيران
تلقاه فى عز العتمة النور
لو زعلان..... تلقى حبيبك جاى يطبطب
لو فرحان .....تلقاة اول حد يزغرط
لو حبيته بجد تلاقى
كل الناس جنبك فرحانة
حب بجد وميهمكش
واوعى الخوف يوم يدخل قلبك
انسى الدنيا وعيش ايامك
عيشها بفرحك ويا غرامك
وادعى ربك من جوه قلبك
عمر ما حاجة تفرق بينكم
ويزيد حبه فى قلبك حبة
لحد ما تملوا العمر محبة

أحمـــــــــــــد أبو العلا يقول...

اللي بيعمل كده يبقى ميعرفش معنى الحب

الحب مش كده
الحب شئ جميل وطاهر وبرئ

مفيش حب مش برئ
مفيش حب مش طاهر

هدفه معروف
ولو مش معروف ميبقاش حب

صمت المشاعر يقول...

يا خسارتك يا حب في زمن انعدم فيه الحب والمشاعر البريئة


فعلا عندك حق بجد في كلامك الحب انعدم قيمته اووي في الزمن دا بقي لعبه الكل بيلعبها

شكرا ليكي علي التوبيك

دمتي بكل خير

هانى زينهم يقول...

والله الموضوع يطول شرحه يا ليدى بس مش الحب اللى مفهومه اتغير فى الزمن ده حاجات تانية كتير زى الصداقة والعشرة والوفاء . كل ده اتغير . فكك انتى من حوار الحب ده ما فيش احسن من روقان البال بلا حب بلا كلام فاضى .

سمكه واحده يقول...

ايه الحلاوه دي
الحب مجنون مجنون مجنون ياااااااولدي!

اممممممم والله موضوع كبير يا ليدي اوي
كمان ناس كتير بتفهمه غلط وناس كتير مبتعرفش تعبر وناس كتير بنستهبل وحاجات كده كتير

وهو ليه معاني وافعال كتير
لكن كون ان ولد يضحك علي بنت ويفهمها انه بيحبها ومع غيرها وغير ده عبيط وبعدين لازم العقل بسيطر اوي ويبفكر اكتر وفعلا مش اي حد او الواحد يحب وخلاص اشمعني غيري
اصل في ناس كده عايزه تحب او تشعر بالحب وخلاص
بقلك ايه الموضوع كبير والناس كلها بتتكلم فيه وحاجه تبرجل انا مالي ياختي
بس الخاطره حلوه
تحياتي

الشاعر الحزين يقول...

للأسف لما بشوف شخصيه زى دى
أول حاجه بعملها بقول بينى وبين نفسى حسبى الله ونعم الوكيل

وبعدين بحاول بقدر الامكان النصيحه الهادئه

وان لم تقتنع فبالنصيحه الجارحه مثل أن أقول له أن له أهل منهم البنات فيجب أن يخاف عليهم وغير ذلك

فإن لم يقتنع فأقولها له فى وجهه

حسبى الله ونعم الوكيل

وأتركه لضميره

وعلى فكره ممكن جدا ربنا يهديهم

ولكى منتى كل التحيه

عمرو وجيه يقول...

انا عن نفسي مش بلعب

ببقي صريح

بوست جميل بجد


و خاطرة أجمل


تحياتي

nona يقول...

اولا مدونتك جميلة
ثانيا الشباب بيعملوا كدة مع البنات بدافع النقص
لان كل واحد عايز يثبت نفسه انه راجل وبيعرف يحب ويتحب
لو الشاب فيهم عاقل وبيتقى اللى خالقه مش هيحب ولا واحدة الا لما يختبر مشاعره من ناحيتها بصدق و تكون هى الوحيدة

انما البنات غلابة ورومانسيين مبتفكرش غير فى واحد وبس وتضحى بكل حاجة علشانه

تحياتى

Lady E يقول...

كيــــــــــــارا : روح ثومة ام كلثوم متمثلة في كياراااا
امشي يا روح امششششي يا روح سيبي البونية في حالها


بصي يا اوختشي لو الحب بجد يعني حب صادق وانتي متأكده انه حب حقيقي هيستمر ويحميكي من الأيام يبقى هنيئا ليكي بالحب وتبقي لقيتي كنز نادر مبقاش موجود
لكن لو هبل زي محب كده يبقى ابعدي عنه او امشي فيه واجرحي قلبك في الاخر !!
وبالنسبة لنيران الشوق واللهفة فعن نفسي بحس انه عذاب مش احاسيس جميلة
والاختلاف في الراي لا يفسد للود قضية
يارب دايما منوراني يا كيارا

Lady E يقول...

احساس طفلة محبة للرومانسية بس واقعية : فعلا الاعلانين ارخم من بعض

أمين يااااااااااااارب
نورتيني يا احلى احساس طفلة وشكرا على الدعوة الجميلة

Lady E يقول...

dramaqueen : بجد المفروض تاخدي جايزة أفضل تعليق متميز

الخاطرة بجد رائعة وكلها احاسيس حب وسعادة

يا رب نلاقي حب بالشكل ده

Lady E يقول...

أحمـــــــــــــد أبو العلا : عندك حق

Lady E يقول...

صمت المشاعر : للأسف !!

نورتيني يا قمرايا

Lady E يقول...

هانى زينهم : هههههههههه ماشي يا مستر انا نفسي مامة ملك تيجي تشوف الكلام ده

Lady E يقول...

سمكه واحده : تعليقك هو الأحلى يا أحلى سمكة

نورتيني بجد

بسبوسة يقول...

لقد أصبحنا فى زمن لايقدر اى شئ واصبح الحب مجرد أسم نادر اذا وجدتى معناه!!

Lady E يقول...

الشاعر الحزين : ربنا يجزيك خير يا شاعر
وربنا يهدينا ويهديهم
شكرا على متابعتك الجميلة للبوست

Lady E يقول...

عمرو وجيه : ياريت كل الناس يبقى عندهم صراحة

Lady E يقول...

nona : اسمي المفضل :) بحب الاسم ده
اولا : مدونتي جميلة علشانك زورتيها يا قمرايا
ثانيا: صح لسانك زي ما بيقولو فعلا كلام سليم

بجد نورتيني وان شاء الله تكرري الزيارة على طول

Lady E يقول...

بسبوسة : هو ده تأثير الثانوية العامية للأسف :)
والله بدعيلك يا اوختشي
عندك حق بس ادينا بنحاول نحافظ ع الحب اللي جوانا للحياة من الضياع

2wzeyad يقول...
أزال المؤلف هذا التعليق.
ليكوريكا يقول...

الحب احيانا يكون

"شقاء لابد منه" :)