الاثنين، 23 مارس 2009

شخبط شخابيط لخبط لخابيط


*اغنية عن التنمية البشرية سمعتها لما كنت في الكورس في فيديو لحفلة استلام الشهادات بتاعت مستر اسلام والاغنية دي كلماتها عمالة تتكرر وشغالة في دماغي زي ما بيقولو وكأني مشغلاها سي دي , الحقيقة كلمات الاغنية دي حماسية جدا واللي كان بيغنيها وكاتب كلماتها طلع وغنى في حلقات من برنامج دكتور ابراهيم الفقي اللي كان على قناة عين هو اسمه احمد تقريبا وصوته بسم الله ما شاء الله رائع واحساسه كمان بالاغاني اللي بيغنيها بيوصلك اوي وانتا بتسمعه ومن كلمات الاغنية على ما اتذكر يعني : مشوار الالف ميل تمشية لكن تلقى نهايته بتقرب , متقولش موش قادر حاول اوي وعافر


*انا حاسة ببعض اللخبطة في حياتي ومش هقول ان حياتي كلها ملخبطة لكن فيها بعض اللخبطة عارفين لما طفلة تتوه في حديقة كبييييييييرة اوي اهو انا حاسة بنفس ذات الاحساس بس مش خايفة على اد ما انا متلخبطة وحاسة اني مش فاهمه كتير من اللي حواليا


*عارفين احساس لما تكونو ماشيين مع حد في طريق واحد وفرحانين جدا وانتوا مع بعض وبعدين كل شوية تحسو ان الطريق الواحد بقى طريقين لأن كلامكم بيتفسر وبيتفهم غلط وكل كلمة الانسان ده يقولهالك تحس انك بتبعد اكتر وتمشي في طريق لواحدك اكتر وفي نفس الوقت متقدرش تروح للطريق اللي كنتو ماشيين فيه سوى تاني ؟؟


*انك تتوهم الجنة والنار والحساب والصراط اصعب تجربة ممكن الانسان يتعرضلها في حياته وده كان تمرين من التمرينات اللي اخدناها في الكورس ولما فتحنا عنينا لأننا بنقفل عنينا علشان نتوهم او نتخيل لقيت ان كلنا عيطنا وبكينا بلا استثناء حتى الشاب اللي كان معانا في المجموعة بكى معانا وفي بنوتة مستحملتش تكمل باقي الكورس ومشيت بعد التمرين متتخيلوش اد ايه الموقف صعب وده وهم ما بالكم بالحقيقة يا الله انك عفو تحب العفو فاعفو عنا
انا كنت مطمئنة في وقت كبير من التجربة مش لأني معنديش ذنوب مفيش انسان معندوش ذنوب لكن لاني متأكده ان ربنا سبحانه وتعالى رحمان ورحيم وخلقنا علشان بيحبنا مش خلقنا علشان يعذبنا لكن برضه قلبي رق وبكيت في جزء كبير من التمرين او التجربة


*خلصت الكورس بتاع التنمية البشرية واخدت الشهادة بس عندي احساس قوي ان مش دي النهاية واني ان شاء الله هكمل دراسة في المجال ده لأني حبيت الدراسة دي جدا بالرغم اني بحس انها احيانا بتجيب هسهس , الكورس اللي نجحت فيه واجتازته اسمه :
HUMAN ENERGY AND SECRETS OF INNER PEACE
او الطاقة البشرية وأسرار السلام الداخلي

حاجة جميلة جدا حصلت معايا النهاردة افتكرتها دلوقتي وانا بكتب البوست , بصيت في السما وكانت في طيور صغنونة بتتطير بشكل منظم وجميل جدا والطيور كلها مع بعضيها كونت شكل قلب 3 مرات ( ايه الرومانسية دي :)

هناك 24 تعليقًا:

mohamed ghalia يقول...

تعرفى أجمل حاجة إنك تلاقى نفسك فى مجال معين
دمتى بكل الود أختى

Lady E يقول...

mohamed ghalia : ماشي يا محمد بقى انا كاتبة كل الرغي ده علشان تعلق على نقطة واحدة بس من البوست ماااااااشي :)

وفعلا اجمل حاجة ان الانسان يلاقي نفسه في مجال معين بيحبه والمجال ده يكون بيقربه من ربنا ومن نفسه وانا لسه بدور في مجالات كتير ويارب الاقي نفسي قريب

نفس تايهة يا ولاد الحلال :)
دمت بخير يا محمد

عاشقه الرومانسيه يقول...

يعنى الصوره اللى فوق دى حقيقيه؟
ياعيييينى على الرومانسيه

Lady E يقول...

عاشقه الرومانسيه : حتى انتي يا عاشقة سيبتي البوست كله ومسكتي في الصورة اهيء اهيء ماشي
بالنوسبة للصورة الطيور كانت بالشكل ده النهاردة لكن انا ملحقتش اصورها لأنها كانت بتطير بسرعة اوي والصورة من جوجل بس انا بحبها اوي وحطاها الخلفية على تليفوني

حسام غانم يقول...

ده كلام جميل

وزي ما قلت قبل كده حلو إن الواحد يتعرف على نفسه

بس مش عايزين التنمية البشرية تأثر عليك أكتر من كده

شوية شوية هتشوفي المخدات عندوا عاملين قلب

وكرسي المكتب بيسلم عالترابيزة

:))

حسام غانم يقول...

عندكوا*

ELMASRYA - MOSLEMA LELLAH يقول...

ياريت تكملي كورسات تاية في نفس المجال يا ليدي

التخصص ده أكتر من رائع ويعتبر مزج بين العلم ومعرفة أسرار النفس وتطويرها للأفضل

الجمع بين العلم والحياة بيكون رائع ومفيد وبيفتح عيونك على مناطق أكثر رحابة وسعة في حياتك ويعلمك ازاي تستفيدي منها لتطوير نفسك

تمنياتي لكِ بكل الخير

ستيته حسب الله الحمش يقول...

انتي جننتيني بالكورس
عااااااااااااااااااا
لازم ادور عليه واخده واطير انا كمان في سماء المعرفة

بس على فكرة القصة مش في الكورس
القصة في البني أدم اللي اداكم
ده شخص جميل قوي ربنا يكرمه

تحياتي والى الأمام دائما ياقمر

Lady E يقول...

حسام غانم : هههههههههههههه ماشي يا حسام بس انا فعلا شوفت الطيور عملت شكل قلب وهي بتتطير
مش مرة واحدة لكن 3 مرات
وبعدين دي حاجة جميلة اصلا لما اتخيل كرسي المكتب بيسلم على الترابيزة ليه لأ

Lady E يقول...

ELMASRYA - MOSLEMA LELLAH : ربنا يوفقني ويقدرني اني اخد كورسات وادرس المجال ده بجد لأنه مجال مفيد وانا بسعى لدراسته من اول ما عرفته وانا في اولى ثانوي
دايما بفرح بتعليقاتك الرائعه يا اختي الغالية
ربنا يسعدك ويكرمك

احساس طفلة محبة للرومانسية بس واقعية يقول...

الانسان لما يقابل حاجة بيحبها وتكون بتفيدة بيحس بلخبطة وبيعيد ترتيب نفسة و حياتة من تانى

جميل يا ليدى كل اللى انتى اتعلمتية
والاجمل سعادتك وحبك للموضوع وحماسك للتكملة ربنا يوفقك

تقبلى مرورى

Lady E يقول...

ستيته حسب الله الحمش : هههههههههه معلش يا دكتر
الفكرة في الكورس والمستر الاتنين
في الكورس لأني كنت بدور عليه ونفسي ادرس اي حاجة في التنمية البشرية وبدور وبقرأ مقالات وكتب وبشوف برامج دكتور ابراهيم الفقي من وانا في اولى ثانوي لغاية لما طلعت اول سلمة في الحلم واخدت الكورس

اما بالنسبة للمستر فهو شخصية جميلة جدا قدر يوصلنا اننا نحس اننا اسرة واحدة هو صحيح كان شورير احيانا ولما سألته عن شخصيتي قاللي اني كائن روحي وانا حسيت الرأي ده سلبي شوية لأن اي انسان في الدنيا كائن روحي حتى لو شورير ف ده اللي احبطني شوية لكن حفزني اكتر اني اكمل في التنمية البشرية

لجين أبو الدهب يقول...

ألف مبروك على الشهادة ياجميل ..

والمجال فعلا تحبيه جدا ..

انا فكرت زيك كده بس جت فترة حسيت انى احضر كورسات فيه افضل لان الميول اللى جوايا ناحية شئ تانى ..

حكاية التخيل دى صعبة فعلا ..

احنا ابتدى معانا بحاجات حلوة زى غمضوا عينكوا فى فراوولة اودمك انت بتاكلها دلوقتى وكل واحد كان بيحرك فمه زى كانه بياكل بالظبط وحاسس بطعمها جميل جدا ..

بعد كده تخيل انك بتشم وردة لغاية الموقف اللى انتى حكتي .. وحكاية التخيل بتفيد الواحد فعلا كتير ..

يالا عقبال الكورس الجاى ..

وجميا اوى شكل الطيور .. بس عايزة تشوف طيور بجد وبتعمل اشكال تحفة تشوفيها فى المدينى .. أعداد هائلة هناك من الحمام ..

دمتِ بخير حبيبتى ليدى ..

أحمـــــــــــــد أبو العلا يقول...

مجال التنميه البشريه جميل وممتع جدا

لاني متأكده ان ربنا سبحانه وتعالى رحمان ورحيم وخلقنا علشان بيحبنا مش خلقنا علشان يعذبنا
الجمله ديه جمييييييييييييله اوي بجد



الطيور كانت بتعمل شكل قلب؟
العين بتشوف اللي نفسنا نشوفه

هانى زينهم يقول...

لاحول ولا قوة الا بالله .

dramaqueen يقول...

من اجمل البوستات الللى قريتها
يمكن لانى حسيت بنفس الاحاسيس
انك تبقى تايهة
انك كلامك يتفسر غلط

مبروك على النجاح فى الكورس
ربنا يوفقك دايما
تحياتى الكتييييييييير ليكى

شفقة هانم واحسان بك يقول...

ده ايه البنات الشطورة دى اللى بتاخد كورسات
ماشى ياعم
بس بجد برافو عليكى ايوا كده عايزين جيل جديد مثقف واعى متطور متحضر بيعرف يعمل بتنجان
شفقة

كاتب مصري يقول...

السلام عليكم
أنا مش جاي النهارده هنا بصفتي زائر وهعلق وأمشي لا أنا جاي أدعوكي دعوة خاصة جدا عشان تكوني أحد فريق العمل وأسرة التحرير في المجلة الي أنشئتها الحمد لله على النت واختارت حضرتك عشان تكوني معايا ضمن فريق العمل
تقدري تدخلي على المجلة وتشوفي تصميمها وأقسامها وإن كان التصميم عادي فهي بداية ولما نطورها سوا بإذن الله هتتغير وتبقى أحلى بس المهم نبدأ ممكن تدخلي وتشوفي الأقسام وتختاري منها الي يناسب عشان تكوني مسؤولة عليه تجمعي المادة بتاعته وتتواصلي مع الأطراف الي لها علاقة بيه وممكن تفيدك من المدونين أو أي حد تعرفيه..
مش هقبل أي عذر أبدا المجلة أسبوعية وهتصدر السبت من كل أسبوع يعني عندك فترة طويلة تجهزي فيها نفسك والمادة بتاعتك وتبعتيهالي على إيميل المجلة
معلش بجد مش هقبل عذر لو هتنسحبي تجيبيلي حد مكانك بنفس مهارتك لإني الي اختارتهم اختارتهم بدقة وتعبت قوي عشان أنقيهم..
http://roayahmg.blogspot.com/
ده لينك المجلة طبعا هيا فاضية والجدول الي في النص ده يعني هيكون شكل الصفحة الرئيسية بس لما يتعبى هيبقى شكلها أظرف وأحسن..
مش هقول تاني مش هقبل أعذار ومستني ردك في أسرع وقت على البوست الي عن المجلة في مدونة أوراق وأسرار بتاعتي
وده اللينك بتاعه بردو
http://awraqwasrar.blogspot.com/search/label/%D9%85%D8%AC%D9%84%D8%A9%20%D8%B1%D8%A4%D9%8A%D8%A9

خالص تحياتي ومودتي

Lady E يقول...

احساس طفلة محبة للرومانسية بس واقعية : فعلا كلامك صح يا احساس طفلة
بقيت بدور على تعليقاتك في كل بوست
بجد منوراني دايما

Lady E يقول...

لجين أبو الدهب : الله يبارك فيكي يا احلى لوجي

احنا التخييل بدأ معانا بالتمرينات الصعبة زي تمرينات قوس قزح وتمرين فتح الشكرات واخيرا الاسقاط النجمي اللي توهمنا فيه الجنة والنار والصراط والحساب بس كان من اصعب التمارين ومن اصعب التخيلات

ولو تقصدي الطيور بتاعة المدينة فالطيور بتاعت مكة والمدينة اروح طيور بجد بتبقى رائعة ربنا يوعدنا بزيارة مكة والمدينة تاني

بجد بيبقى ناقصني كتير لما مش بشوف الكومنتات بتاعتك

Lady E يقول...

أحمـــــــــــــد أبو العلا : مكنتش بهييس يا احمد الطيور فعلا عملت شكل قلب 3 مرات مش مرة واحدة

Lady E يقول...

هانى زينهم : ونعم بالله

Lady E يقول...

dramaqueen : الله يبارك فيكي يا قمرايا

Lady E يقول...

شفقة هانم واحسان بك : كنتي وحشاني جدا بجد وكنت مفتقداكي
نورتيــــــــني