الأحد، 1 مارس، 2009

انتي جاية اشتغلي ايه ؟؟

انا بقيت الحمد لله 4 في واحد يعني احسن من الشامبو والبلسم كمان :)

الصبح طالبة جامعية كل وظيفتها انها تاخد المحاضرات وتدور على العميد تصدقو محدش من الطلبة يعرف شكل العميد ده اصلا
بقالي يومين بدور عليه ومش لاقياه _ وسمعني اغنية من حق العميد يدلع _

وبعد الكلية المفترية ببقى مودلسة ايون ببقى بعيد عنكو مدرسة انجليزي ولسه مفرحتش بكلمة ميس نونا لأن ببساطة العيال ولاد عمي بيندهولي بإسمي عااااااااااا وكمان طنط مرات عمي عايزة تجيبلي اطفال تانيين علشان ادرسلهم انجليش علشان انا قال ايه مودلسة شاطرة _ ربنا يستر والاطفال الحلوين ميخذلونيش ويجيبو درجة حلوة في الانجليش_ وعلشان بس امنع الأر ده عمل تطوعي يعني محدش يقوللي المرتب النص بالنص :)

وبعدين ببقى سواقة اي بسوق السيارة لما اروح الكلية او اخرج مع ماما واحيانا بوصل قرايبيننا او جاراتنا لدرجة اني احيانا بحس ان عربيتنا ميكروباص مش ملاكي ودي حاجة اتعلمتها من بابا ان يكون عندي ايثار شوية

اما في اوقات كتير من اليوم ببقى مدونة مركزة في التدوين وقابعة امام شاشة الكمبيوتر بتابع مدونتي اللي هي جزء من كياني وحياتي وبتابع المدونات اللي في المفضلة وبشوف مدونات جديدة

ولو في وقت بقرأ كتب دينية وكتب كوميدية ساخرة وكمان تنمية بشرية

ومن الرغي ده كله نستفيد ايه؟؟

قال رسول الله صلى الله عليه وسلم : « اغتنم خمسا قبل خمس: شبابك قبل هرمك، وصحتك قبل سقمك، وغناك قبل فقرك، وفراغك قبل شغلك، وحياتك قبل موتك » بجد نصائح عظيمة جدا ولازم فعلا ننتهز كل الفرص دي ونعمل الخير ونساعد نفسنا ونساعد الناس


وقال رسول الله صلى الله عليه وسلم: (من كان له فضل ظهر فليعد به على من لا ظهر له، ومن كان عنده فضل زاد فليعد به على من لا زاد له) ويا سلام لو كل حد خالف نفسه _ لأن النفس طبعها البخل شوية_ وعمل كده مكنش حد تعب قي دنيته




هناك 32 تعليقًا:

كاتب مصري يقول...

ربنا يكرمك فعلا نصايح رائعة لإغتنام الحياة صلى الله على قائلها عليه الصلاة والسلام
حياتك كده حلوة قوي ربنا يوفقك
أنا بقى طالب وصحفي وكاتب ومصور في وقت واحد طبعا مبتدئ في كل ده
طبعا بقسم وقتي بس أحيانا الخيوط بتدخل في بعضها وبمارس مهنة مع التانية
مودتي

Blind Sniper يقول...

lool mashy ya 3m 2l super
bass keda enty 3ndek fara3' raheb ya3ni fien 2l korsat 3alashan terf3y men mostawaky :P we fien 2l 3mal 2l 7'ayreya
we kaman lazem matdi3ish wa2t 2odam 2l computer :P im just kidding rabena yewafa2ek we yekremk be ezn ellah
mesh ana mal2etsh 2l blog bet3ty fe 2l fav 3ndek howa ana ba2et kofta wala 2h

Lady E يقول...

كاتب مصري : وربنا يكرمك ويعينك يا كاتب وان شاء الله تبقى كاتب وصحفي مشهور واعمالك محبوبة
وموضوع تقسيم الوقت ده مشكلة لسه بحاول اقسم وقتي كويس وكتير مش بعرف

دمت في حفظ الله

Lady E يقول...

Blind Sniper : كوفتة ؟؟ اكيد لسه متغديتش يا سنيبر
بالنسبة للكورسات فأنا للأسف هبدأ الكورسات كمان يومين عااااااا

وبالنوسبة للبلوج بتاعك فهو في الفيفوريت دور عليه تاني هتلاقيه

وربنا يباركلك بلاش الفرانكو اراب ده لأني بتخنق منه وبيجيلي حول في عيني لغاية لما بقرأه

د.خالدأمين يقول...

ربنا يكرمك

يا مجتهده


كلامك جميل ربنا يخليكي

حسام غانم يقول...

وسمعني اغنية من حق العميد يدلع

هههههههه




ربنا يوفقك في ده كله

كيــــــــــــارا يقول...

هههههههههههههههههههه عثل زي ماقولتلك

خليكي ورا العميييييييييد وحاولي تشوفي اي حد اول اما يشوفه يرنلك مثلا كدا يعني

دا مستقبلك يانونا

e_emy يقول...

ربنا يوفقك ويكرمك يارب

وتحققى كل الى بتتمنيه

(:

لجين أبو الدهب يقول...

اتصدقى ببوستك ده قعدت افكر كده مع نفسى بشتغل كام شغلانة ..

لقيت نفسى بشتغل كتير اوى شغلانات ومن غير مليم زفحلوئى ..

وأحب أبشرك انك مش هاتشوف صورة معيدك الافى التلفزيون لو كان كويس وحابين يكرموه فى حاجة D:

ربنا يجعله فى ميزان حسناتك لتذكيرك بالحديث ..

أسيبك بقى واكمل البطاطس بالكاتشاب ..

دُمتِ بخير ..

مهندس / على درويش يقول...

بوست جميل
وخير ما فيه هو حديث سيدنا محمد صلي الله عليه وسلم


وهذا الحديث لو أدققنا النظر فيه لوجدنا فيه نجاتنا في الدنيا والأخرة



تقبلي مروري

mohamed ghalia يقول...

اكيد الى قولتيه أكبر إستفادة
دمتى بكل الود يا ليدى

هانى زينهم يقول...

انا نهجت من الكلام امال الفعل بقى هاعمل فيه ايه !! ربنا يديكى الصحة

شفقة هانم واحسان بك يقول...

حلو اوى استثمارك لوقتك بجد
انا معجبة بيكى جدا
بس زعلانة فى نفس الوقت
قال ايه كل ما تعلقى على بوستات احسان الاقيكى بتنصفيه عليا ماكانش العشم يا ليدى
ولك يوم يا قمر
شفقة

Lady E يقول...

د.خالدأمين : وربنا يكرمك يا د.خالد
شكرا على تعليقك الجميل

أحمـــــــــــــد أبو العلا يقول...

هههههه
منادي -على العميد- الصبح
ومدلسه
وسواقه
ومدونه
هههههههههههههه

بس كل الشغل ده كده من غير فلوس؟
يعييييييييييييييني
هههههههههههه


شويه جد بأه
استغلال الوقت ده شئ وصى به الرسول. الوقت من النعم اللي الانسان بينساهم وبيضيعهم


بوست جميل as usual
صح ياميث نونا؟

غروب يقول...

بجد بوست جميل والله

وربنا يقدرك على الافعال التطوعيه

شكلنا كده تخصص واحد

بس انا بقه مش هاعمل اى شئ تطوعى
نياهاهاها
انا عايزه حقى
ههههههههههههههه

Lady E يقول...

حسام غانم : أمين

وربنا يوفقني والاقي العميد في الكلية مرة واحدة بس وبعدها يغيب براحته

احساس طفلة محبة للرومانسية بس واقعية يقول...

ربنا يبارك فيك يا ليدى
الواحد معاه شغلنتين مش قادر عليهم
ولو ضفتى عليهم عدم خوفى من الزلازل يبقى 3 هاهاهاهاهاهاهاهاهاهاها

بجد شكرا ليكى على التذكرة بالحديث الشريف بيخلى الواحد يقف مع نفسة ويسئلها انتى عملتى اية من الكلام دا
وحققتى اية فى دنيتك

ربنا يسعدك يجازيك خير
تقبلى مرورى

ABOALI يقول...

جميل اليوم الحافل ده
ولذيذ

وكويس انك بداءتى مشوارك فى الدروس الخصوصيه
علشان تبقى مؤرخ اللغه الانجليزية الاول
والغول نمرة واحد

يااااااااا عينى عليك وانت بتعملى اول مليون هههههههههه

اما عن الاحاديث الجامعة لخير الخلق

فهى دستور حياه
تعطى العنوان للطريق
فمن فقد العنوان
فقد الحياه


لك كل التحية

بنوتة يقول...

السلام عليكم
حلو أوى عارفة اعملى نيتك في مذاكرة ولاد عمتك زكاة عن علمك
ربنا هيكرمك ان شاء الله
تحياتى ليكى
بوست جميل

ستيته حسب الله الحمش يقول...

هي دي البوستات
هم دول فعلا الجيل الصاعد الواعد
عارفة يابنت ياليدي لما اقرأ اللي بتكتبيه بحس بأمل في دنيا فيها اصلاح

اهم شيء كل واحد فينا يخلي تجديد النيه ملازمة لأعماله وياريت دايما نفكر بعضينا

تعرفي اني الترم ده ولأول مرة نسيت اجدد النيه في تعليم العيال ولادي واللي في الكلية .. الحمد لله انتي فكرتيني .. ربنا يكرمك يارب

بحبك يا بنت انتي يا دماغ

romansy يقول...

الله عليكى
بجد انتى كتبتى حاجات اسعدتنا
الحمد لله
على كل شئ

ميرام يقول...

(:


وحشتيـــــــــــــني
كتيــــــــــر كتيــــــــــر
وبعدين ايثار ايه بس اللي بتقولي عليه ..
(:
ده انتي جايبه في سيره الجيران وبتذليهم على أجهزة العالم العربي والغربي عشان توصيله ..
مش خايفه اطلع واحده منهم ):
(:
هههههههههههه
تحيـــــــاتي

مسدس صغير يقول...

يا سلاااااام

جميع التخصصات

انتى بجد فرصة لأى مدرسة او حضانة.

تعليم وتوصيل وكمبيوتر. وتحفيظ قرآن

واحاديث.

دى حاجه فل.

جزاكم الله خيرا على الحديثين الحلوين اوى

دول والنصايح الغالية من النبى صلى

الله عليه وسلم..

اشكرك..

إيمان يقول...

مدلسة إنجليزى نيا هاهاها
إنتى ساكنه فين بقه ونجيلك إزاى
مادام عمل تطوعى إلحقيناااااااااا
بجد بوست جامد جدا جدا
ربنا يعينك
وإن شاء الله هتبقى حاجه كبيره قريب
بحبك جدا وبحب مدونتك العثثثثثل
ربنا يحميكى

عاشقه الرومانسيه يقول...

جميله صوره البيبى قوى
والموضوع حلو
طيب كويس انك4x1
امتى هينزل الاعلان بقى؟
احسن من الشامبو والبلسم فعلا
اجمل مافى الموضوع انك عارفه تستغلى وقتكوالاجمل انك مستمتعه بده
ربنا يبارك فى عمرك ياقمر ويوفقك

BAsMA يقول...

ربنا يعينك
هقولك ايه يعنى اربع شغلانات
بس تعرفى احلاهم التدوين(صح ولا لاء)

مش عارفة الدنيا وخداني علي فين يقول...

انا بقي أشطر منك
بقيت ستة في واحد
بشتغل دور العاملة في الصبح
و دور الطالبة علشان بعمل دراسات عليا
و دور المدرسة بذاكر لبنت صغيرة عربي و انجليزي

و دور ربة منزل في تنظيف البيت و عمل الأكل و بشوف طلبات أخواتي

و دور المدونة بس لسة مبتدأة في المجال ده و لسه بتعرف علي أصحاب جديدة
و طبعا انتي منهم

صمت المشاعر يقول...

انا بردوه زيك كدا بالظبط

ان شاء الله عن قريب ابقي ميس

بس حاليا بردوه العيال قرايبنا بعطيهم وبيقولولي باسمي عاوزين نضع انا وانتي حد للموضوع دا ههههههه

ومرسي ليكي جداااا علي النصايح الغاليه دي

الشموع البيضاء يقول...

اسمك جميل طفله مش عاوزه تكبر
انا كمان نفسى افضل طفله علطووول بس مش بمزاجنا بقا اوقات لازم نكبر
بجد نصيحه حلوه ان الواحد يعمل حاجات مفيده ويستثمر وقته
بس نسيتى وظيفه مهمه ههههه انط تذاكرى ولا المذاكره كم يوم قبل الامتحان وبس عموما ربنا يوفقك وتتفوقى كمان

تحيااااتى وياريت تزورينى بمدونتى

فتافيت يقول...

جمييييييل يا جوووومر
ربنا يعينك وتكمليهم سبع صنايع
بس يارب البخت ما يبقاش ضايع

وحشتيني جدا

د. ياسر عمر عبد الفتاح يقول...

ربنا يباركلك فى وقتك أمثر وأكثر
فى الأول قلت موضوع رغى من المواضيع اللى بنشوفها فى المدونات
وده مش عيب ولا حاجة .. الرغى حلو

لكن حلوة الإسقاطة اللى حصلت فى الأخر على الدين والحديث الجميل جداً

ربنا يجعل كل ده فى ميزان حسناتك