الاثنين، 16 مارس 2009

الحمد لله مبتهجة يا رب دايما




التنمية البشرية والسلام الداخلي

خير اللهم اجعله خير قررت أخد كورس في التنمية البشرية
الكورس لمدة 6 ايام و6 ساعات في اليوم والنهاردة كان اول يوم
طبعا في الاول كنت متوترة وحاسة اني وحيدة وغريبة ولسه مكنتش اعرف حد بس اثناء وبعد الكورس الشعور ده اتبدل تماما واتحول لسكينة وطمئنينة وهدوء داخلي
وبعدين في الاول المستر قاللي ان في ساعة تعارف
قولت في سري لو كنت اعرف ان في ساعة تعارف مكنتش جيت اهيء اهيء اهيء ليه بقى لأني كنت انطوائية نوعا ما متواتوروناش يا ناس على رأي كرومبو :)
المهم بدأنا الكورس ومستر إسلام عبد اللطيف رحب بينا وبدأنا نتعرف على الجروب احنا حوالي 12متدرب في المجموعة
الاسئلة في الاول كانت الاسم والشغل او الدراسة وليه اخترنا ندرس الكورس واهم انجاز انجزناه
المهم فضلت افكر وافكر ايه الانجاز اللي انجزته عارفين قولت ايه؟؟
قولت ان عندي مدونة عالانترنت والمدونة محبوبة وانا بكتب فيها واسلوب الكتابة بتاعي اتطور وده اهم انجاز دي الحاجة اللي جت في بالي وقتها , لقيت الكلام ده طالع من قلبي مش بقوله علشان اجي اقولكم اني قولت كده في الكورس ومش بقوله علشان اتمنظر ان عندي مدونة بقول كده علشان فعلا حاسة بكده
ولما كنت بقول اني بحبكم في الله كان احساسي بجد لكن بعد الكورس حسيت بالمعنى ده جدا وبجد بحبكو في الله وكان نفسي تكونو معايا النهاردة في الكورس علشان نستفيد كلنا

اخدنا حاجات كتير مفيدة جدا والحمد لله استفدت جدا جدا من اول محاضرة في الكورس
الحقيقة الكورس كله مهم لكن اكتر حاجة حبيتها بجد هو تقبل نفسي زي ما هي لان الانسان عبارة عن روح حولها جسد , اذا الروح اهم من الجسد وكمان لأن روح كل انسان جميلة جدا لأنها نفخة من روح الله سبحانه وتعالى وان احنا كلنا كيان واحد
وفي واجب المستر قال لنا عليه وبصراحة الواجب ده عجبني جدا واتمنى انكم تعملوه معايا
الواجب ده ركعتين توبة بيبقو قبل النوم يعني ركعتين ب نية التوبة والركعتين دول بيعملو راحة داخليه ولو حد بيعاني من الارق مع الركعتين يحاول يقرأ صفحة من القرأن الكريم مع التسبيح
وبجد الصلاة قرة العين لما نفهمها ونفهم انها روحانيه وبتنعش وتنظف الروح وتطمئن القلب هنحبها اوي وهنواظب عليها
شكرا يا مستر اسلام لأنك وافقت اني اكتب عن الكورس في مدونتي المتواضعة
وللحديث بقية ما دام في العمر بقية .....

هناك 38 تعليقًا:

القدر و انا يقول...

ليدى
اول تعليق يالاااا
سعيدة لسعادتك
ويارب دايما
ومهم قوى نتعلم ونتعلم
وفى انتظار المزيد من الكورس
تحياتى وتقبلى مرورى

Lady E يقول...

القدر و انا : ازيك يا قمرايا
بجد مع انك اول مرة تنوري مدونتي بتعليقك الرائع بس حسيت اني اعرفك من زمان وحسيت اني بحبك في الله
ربنا يحميكي ويحفظك بصيت على مدونتك لقيتها جميلة جدا زيك ان شاء الله هقرأها كلها
وبما انك اول تعليق فبقولك مبرووووووووك كسبتي ربع جنيه بحالو :)

ستيته حسب الله الحمش يقول...

oh baby HR course
والله وباضت لك في القفص يا أوسة
انا كمان عاوزة من ده عااااااااااااااااااااا

خلاص فتحتي نفسي
اروح اطور زناخة نوفوخي

انا برضيك لما باخد كورسات بنشكح وبعرف ناس جديدة

شاطرة ياليدي
تصقيف معاه زغاريد كمان

بحبك

mohamed ghalia يقول...

بالتوفيق فى الكورس
وربنا يكرمك وفى إنتظار البقية

صفة صلاة التوبة
صلاة التوبة ركعتان، كما في حديث أبي بكر الصديق رضي الله عنه .
ويشرع للتائب أن يصليها منفرداً ، لأنها من النوافل التي لا تشرع لها صلاة الجماعة ، ويندب له بعدها أن يستغفر الله تعالى ، لحديث أبي بكر رضي الله عنه .
ولم يرد عن النبي صلى الله عليه وسلم أنه يستحب تخصيص هاتين الركعتين بقراءة معينة ، فيقرأ المصلي فيهما ما شاء .

عاشقه الرومانسيه يقول...

بوستك جه فى وقته بصراحه

السلام الداخلى والتصالح مع النفس

انا عايزه الكورس ده
يمكن اعرف اصالح نفسى

romansy يقول...

شكرا يا ليدى انك اتكلمت عننا كده والتنميه البشريه علم جميل
وجميل قوى الواجب دا
ربنا يهدينا جميعا يارب

ELMASRYA - MOSLEMA LELLAH يقول...

حبيبتي ليدي المبتهجة

طبيعي بلزم تبتهجي

ده انتي كلامك أصلا سبب ليا ابتهاج

ربنا يبارك فيه الأستاذ بتاعك

ويجعل ثواب صلاة ركعتي التوبة التي سوف نصليها له منها بالمثل في حسناتها

في انتظار المزيد من هذه الدروس النافعه

نفع الله بك يا ليدي

سلامي لماما وياترى بلغتيها كلامي ليها ولا لأ؟

دمتي سالمة

ABOALI يقول...

الاحساس والادراك
باءن هناك نعم فى انفسنا ونحن لم نزيل الستار عنها
احساس راقى
فاءن ازلنا الستار عرفنا عناوين فينا
تتزين لنا طالبه المشى فيها
لاءنها تشبع باقى ملكاتنا


الانسان فى البدايه يكون عدوا لما لا يعرفه
فاءذا عرفه كان ما عرفه صديق وقرين له


تحياتى يا تنمية

احساس طفلة محبة للرومانسية بس واقعية يقول...

انا معرفش فى التنمية البشرية جامد
بس قريت كام موضوع كدا بجد بتمس الروح

بس الجميل بجد انك تتخلى عن الرهبة و تتعرفى على ناس جديدة وتندمجى معاهم
ويارب تستمتعى بالكورس وبوقتك

مستنية باقى حديثك
تقبلى مرورى

BAsMA يقول...

الحمد لله انك مبسوطه
ويارب تفضلى علطول مبتهجه

لجين أبو الدهب يقول...

ان كنت بموت فى كورسات التنمية البشرية ..

وكنت احب احضرها كلها بالرغم ان الكورس ممكن يكون مقرر ..

بس انا بحبها جدا بحس كل مرة بفهم نفسى اكتر ..

وبستفاد حاجة جديدة ..

بجد هاتستفاد منه جدا وهاتعملوا اختبارت وحاجات لذيذة جدا واسنشاق 4,2,8 وجزا ظريف كده ..

أحبك الله ياليدى ..

وانا كمان بحبك فى الله .. معلش بقى دفست نفسى فى اللى قلتى عليهم بحبهم فى الله D:

دمت بخير ..

أحمـــــــــــــد أبو العلا يقول...

الله
حلو أوي البوست ده
والنصيحه مقبلوه وواجب العمل بيها

شكرا بجد

مسدس صغير يقول...

ايه الانجازات دى
وكمان كورس تنمية بشرية؟
دى حاجة فل اوى
جزاكم الله خيرا على النصائح الغالية بتاعة الصلاة دى.
يا ترى انتى قلتى ان من اهم انجازاتك ان انا بعلق عندك فى المدونة دايما وللا نسيتى كالعادة؟؟
هههههههههه
سلام

قبلاوى يقول...

السلام عليكم

التنمية البشرية ..

مجال جميل جدا

و مفيد جدا

وفرق معايا أنا شخصيا كتير

بس هو على فكره أهم حاجه فيه التطبيق

بمعنى إنك تستخدمى إللى بتاخديه فى كورساتها على طول ، مش مجرد يبقى إنى باخد كورسات وخلاص


بس هى إيه الدورة دى ؟ إسمها إيه يعنى ؟

blue-wave يقول...

الحمد لله
وياااااااااارب دايما
وربنا يوفقك فى الكورس دا

فليسيتى يقول...

عايزة اعرف هو فين الكورس ده؟؟؟؟؟؟؟؟؟؟؟؟

e_emy يقول...

يارب دايما مبسوطه

وربنا يوفقك يارب

Lady E يقول...

ستيته حسب الله الحمش : مكنش العشم تقوليلي HR يا دكتر هههههههههههه

علشان نعرف باقي المشاركين في البوست ان HRدي مش شتومة H يعني Human
R يعني Resource
يعني بالعربي الثروة البشرية او التنمية البشريه :)

سعيدة اني شجعتك وفتحت نفسك لكورسات التنمية البشرية وغيرها يا دكتر

سعيدة بتشجيعك ليا يا دكتر في وقت ناس كتير بيقولولي ده مش وقت كورسات

Lady E يقول...

mohamed ghalia : احلى دعوة والله يا محمد ربنا يوفقنا كلنا في حياتنا يارب

جزاك الله خيرا على توضيح صفة صلاة التوبة بجد فرحت بتوضيحك ليها

دمت في حفظ وعناية الرحمن

تامر علي يقول...

فعلاً التنمية البشرية علم شيق جداً ومفيد لأقصى درجة .... وكمان لو كملتي فيه بتبقى (مرتبات ) العمل به مجزيه جداً لأنه فرع من فروع الإدارة المطلوبة على مستوى عالي

* نصيحة غالية فعلاً صلاة التوبة وجديرة بالتنفيذ :)

دمت بخير

هانى زينهم يقول...

يا عم يا عم . امال كنتى بتشتكى





من ضيق الوقت ليه بقى لما انتى فاضية للتنمية البشرية . المهم اكيد ما دام انتى مبسوطة يبقى اكيد هتستفيدى بس المهم تفيدينا معاكى باهم اللى درستيه . ثانيا بقى اللوحة اللى فى الاخر بتاعة خير الناس بخط مين ؟؟ لو تعرفيه قوليله ان خطه حلو اوى .

Lady E يقول...

عاشقه الرومانسيه : ان شاء الله بعدما اخلص الكورس هكتب حاجات كتير عن التصالح مع النفس وغيرها ويارب تستفيدي منها يا دودو

عودا حميدا

Lady E يقول...

romansy : شكرا ليكم انتو يا رومانسي لأن المدونة مكنتش هتبقى مدونة الا بمتابعتكم ليها وتشجيعكم اني اكتب فيها
وفعلا الواجب جميل جدا مفيش احلى من ان الانسان يتقرب من ربنا سبحانه وتعالى

Lady E يقول...

ELMASRYA - MOSLEMA LELLAH : الحمد لله ان حضرتك حسيتي بإبتهاج بجد انا فرحت جدا بشعورك ده

وربنا يبارك في مستر اسلام ويكرمه بجد انسان راقي جدا ومعظم الناس اللي يعرفوه بيتكلمو عليه كلام كويس


وماما بتسلم عليكي وبتقولك الله يسلمك

نورتيني

Sometimes يقول...

حاضر يا ليدى هعملها النهارده
جزاكى الله خير لانى بجد كنت محتجاها
الحمد لله رب العالمين انى دخلت عندك فى الوقت ده بالذات
وحشتينى اوى
ويارب دايما تكونى مبتهجة وسعيده

Lady E يقول...

ABOALI : كلامك سليم جدا يا ابو علي

Lady E يقول...

احساس طفلة محبة للرومانسية بس واقعية : عارفة انا مهتمة بعلم التنمية البشرية ده من وانا في اولى ثانوي وكنت بحاول الاقي اي فرصة اني اخد كورس فيها واخيرا الحمد لله اخدت الكورس وبجد سعيدة جدا الحمد لله

بالنوسبة لأول يوم انا فعلا كان عندي رهبة اني اتعرف بحد بس بجد دلوقتي معظم الجروب بقو حاجة مهمة في يومي

بجد نورتيني وشكرا على كلامك الجميل دائما

Lady E يقول...

BAsMA : تسلميلي يا قمر
يا رب انتي كمان تبقي سعيدة ومبسوطة ومبتهجة

Lady E يقول...

لجين أبو الدهب : دفستي نفسك ايه بس يا لجين انتي من اول اللي بحبهم في الله

وفعلا عملنا تمرين 8.2.4 وتمارين تانيه بجد رووووعه

وفعلا علم التنمية البشرية علم جميل جدا ومفيد جدا جدا

احبك الله الذي احببتيني فيه
نورتيني

Lady E يقول...

أحمـــــــــــــد أبو العلا : لا شكر على واجب يا انجينير

الشكر ليك انتا علشان هتعمل الواجب بتاع صلاة التوبة

ربنا يكرمك

Lady E يقول...

مسدس صغير : نسيت كالعادة طبعا يا مسدس :)
وبعدين بطل الار ده يا عم الحج
جزانا الله خيرا واياكم

Lady E يقول...

قبلاوى : وعليكم السلام ورحمة الله وبركاته

وفعلا عندك حق المهم التطبيق وربنا يقدرني واطبق اللي بدرسه

الكورس اسمه
Human Energy and Secrets Of Inner PEACE
الطاقة البشرية واسرار السلام الداخلي

Lady E يقول...

blue-wave : تسلم يا دكتر

Lady E يقول...

فليسيتى : كان هناك وخلص :)

Lady E يقول...

e_emy : تسلميلي يا قمرايا

Lady E يقول...

تامر علي : فعلا التنمية البشرية علم اكثر من رائع

وجزاكم الله خيرا على تقبل النصيحة

Lady E يقول...

هانى زينهم : لسه وقتي ضيق يا مستر بس موش عايزة اشتكي الشكوى لغير الله مذلة

بالنسبة للصورة بتاعت خير الناس فأنا جايباها من على جوجل للأسف معرفش صاحبها

Lady E يقول...

Sometimes : جزانا واياكي يا قمرايا
وحشتييييييييييييني
فكي التكشيرة دي وسيبيها على الله