الأحد، 29 مارس 2009

قليل من اللخبطة وكثير من السعادة

ومازالت اللخبطة مستمرة في حياتي ومش بعرف انام بالليل كويس فين وفين لغاية لما اعرف انام والنوم بيحلى جدا الصبح وقت المحاضرات بتاعت الكلية وافتراضا صحيت وروحت الكلية ببقى مرهقة جدا ولا الاحلام يا عيني ع الاحلام اخر لخبطة وعاملين زحمة يعني انا اعرف ان كل الناس بتحلم حلم واحد في اليوم اما انا بقى فعندي زحمة احلام يعني حلمت امبارح كذا حلم منهم حلمين فاكراهم كويس
اول حلم كنت بكلم صبحتي عالايميل وبتتكلم انجليزي انا فاهمه كلامها بس مش فاهمه هي بتتكلم انجليزي ليه هو مين فينا اللي بيدرس انجليزي ؟ تاني حلم بقى انا مكنتش شايفة فيه ولا سامعه كويس وكنت هعمل حادثة كبيرة اوي لكن الحمد لله شفت الطريق على اخر لحظة
اخدنا في الكورس بتاع العنجليزي النهاردة رواية اسمها الطريق الى الهند طبعا بندرسها بالانجليزي المهم اني اندهشت اوي لما لقيت ان بعض المبادئ اللي اخدناها في التنمية البشرية هي مبادئ موجودة في الهندوسية زي مبدئ ان البشر كلهم كيان واحد مفيش حد فيهم احسن من حد واننا لازم نتقبل الاخر ونحبه لأن كلنا من اصل واحد والكلام ده موجود في الاسلام بس محدش بيدور وبيعرف دينه وبعدين ايه المانع اننا ناخد المفاهيم الجميلة دي ك قيم انسانية ونطبقها في حياتنا طالما مش بتتعارض مع ديننا وتقالدينا
وانا طالعة من الكورس قابلوني بنوتات من المحافظة عاملين حملة للتوعية بالنظافة قالولي انتي من المنطقة هنا قولتلهم لأ قالولي طب قوليلنا اسمك انا في سري هو في ايه ؟؟ ولقيت بنوتة تانيه بتقول للي معاها يا ستي ادهوملها وخلاص ؟؟ نعم؟؟ لقيت واحدة منهم طلعت شنط سودة وقالتلي اسمك ايه ؟؟ انا : ليدي بريييييييييييييئة معملتش حاجة يا لهوي اه ياااااانا
قالولي طب عايزين اسم جيرانك كمان ؟؟؟ وخديلهم معاكي دول وادولي شنط سودة علشان القمامة وروحت للكتكوتة وانا متنحة ومندهشة لانهم مقالوليش اي معلومات عنهم المهم ماما كانت مستنياني ولقيت معاها اكياس من دي برضه وقالتلي هما قابلوكي انتي كمان جبتي لمين قولت لماما لينا انا مكنتش هاخدهم لولا اصرارهم الغريب ماما بصت للشنط وقالتلي ما استحق ان يولد من عاش لنفسه فقط عارفين الايموشن بتاع الياهو اللي بيوقع من كتر الضحك انا عملت كده برضه اصل الموقف كان غريب بصراحة يعني هما كسلانين يطلعو البيوت وبيوزعوا الاكياس على الناس اللي ماشيين في الشارع
وبعدين فأجه ماشية في الشارع وطالعة من مفرق لقيت شاب راكب موتوسيكل واقف قدام العربية بيقول اه خبطتني اه وانا مجيتش جنبه اساسا واتخضيت حتة خضة وفجأه لقيت اللي فطسان من الضحك عارفين طلع مين طلع احمد ابن عمي دايما بيحب يعمل المقالب البايخة دي فيا
اما عن اليومين اللي فاتو فحصللي حاجات جميلة برضه منها امبارح كان في طفل عنده 3 سنين مش بيمسك ايد حد وبيحب يجري المهم روحت جنبه ومسكت ايده فمسك ايدي ومشينا نغني سوى واطفال تانيين كنا بنزورهم عندهم في البيت ف وهما بيستقبلونا حضنوني حتة حضن وقالولي بنحبك اوي يا طنط يااااااه بحب اسمع يا طنط دي من الاطفال وبحب اوي اسمع اسمي من الاطفال بحس ان اسمي جميل اوي لما بيقولوه
برضه بحاول ابص للجانب الايجابي وانسى اي حاجة مضايقاني وانسى ان الامتحان باقي عليه شهر بس يا رب أأقدر اطلع من الدوامة دي
نفسي طاقتي الايجابية ترجع تاني لان البطارية فضيت جدا


هناك 17 تعليقًا:

أحمـــــــــــــد أبو العلا يقول...

هترجع ان شاء الله
كل اللي مكلوب منك ببساطه انك تبصي للأمور اللي مضيقاكي وقلقاكي, اقفي قدامهم وقوليلها مش هتهزموني

انا بتكلم بجد
حاولي انك تتخيلي كل الحاجات ديه قدامك

قولي لقلقك من الامتحانات, مش هسيبك تبوظ أيامي. أنتي ياما امتحنتي قبل كده ايه المشكله كله بيخلص ويعدي

الأحلام الكتيره في الليله الواحده شئ غريب بس بيدل أن فيه عصافير كتير بتزقزق في دماغك
حاولي تهدي تفكيرك وان شاء الله هتعدي الحياه ببساطه

mohamed ghalia يقول...

لحقتى خلصتى الطاقة ايه يابنتى ههههههههههه
أوك ركزى كده
والمهم إحساسك بالسعادة

مسدس صغير يقول...

بوست هايل
النظافة من الايمان.
لازم تخدى الكيس الاسود وتعبى فيه الزبالة ولو العربية بتاعة الزبالة مجتش تاخد الكيس اعملى له اعادة تصنيع .
نعى منه كيس زبالة تانى وخليه عندك لما العربية تيجى.
وسلملى على النضافة.
هههههههههه
بوست جميل اوى
احييكى على الاسلوب الجميل.

*بسمة انور* يقول...

يخرب بيت شياطينك
هههههههههههههه

والله انتى زى العسل
تعاونو تحابو فيها ايه لما تاخدى الاكيس توزعيها
ياااااه عمل انسانى بجد
هههههه
انا بمووووووت ف الاطفال
وببقى فرحانه جدا لو حد منهم اتصاحب معايا وقعدنا نتكلم

تحياتى
بسمة

عاشقه الرومانسيه يقول...

ياحبيبتى الاكياس دى مش للقمامه
لازم يكون عندك نظره مستقبليه للامور اكتر من كده
اه
يعنى تحتفظى بالاكياس وان شاء الله تشترى ساطور فى بيتك لما تتجوزى
صدقينى ده من اساسيات الجواز
ده اللى هيخلى جوزك يمشى معاكى على الصراط المستقيم
ههههههههههههه

حلاوتك وانتى بتمثلى فيلم المرأه والساطور
ولا كورسات ولا تنميه بشريه ولا وجع دماغ
ده المستقبل ياااااأمى
هههههههههههههههههه

الشاعر الحزين يقول...

ايه يا بنتى المواقف دى ؟

وبعدين تعالى هنا

أنا اتضايقت قوى لما قولتى انك عندك زحمة أحلام

أصلى مش بحلم خالص الا فـــــــيــــن وفـــــيــــــن

والنبى ابقى احدفى عليا شوية أحلام أصلى غلبان

بجد بوست جميل قوى ودمه خفيف

تقبلى خالص تحياتى

هانى زينهم يقول...

قدامك كدة 4 او 5 سنين كمان . هى مراحل عمرية ونفسية محفوظة وكلنا بنمر بيها . لا تقوليلى تنمية بشرية ولا تنمية صناعية . هتخلصى الجامعة وتقعدى سنة فى البيت وبعدين يا تجوزى يا تشتغلى وفى الحالتين هتبطلى تحسى بالحاجات دى والعيشة هتتظبط لوحدها واللخبطة هتختفى لانك مش هتلاقى وقت تفكرى فى حاجة اصلا .

لجين أبو الدهب يقول...

كولكشن حلو ..

ما شاء الله ..

ربنا يديم هناكِ واستغل كل لحظة احساس حلو بتعيشها لانك هاتشتاقى لها فى فترة ..

وما تقلقيش من الامتحانات هاتعدى زى ما غيرها عدى يامان ..

دمتِ بخير ..

blue-wave يقول...

ماعاش اللى يدايقك:))
بس نركز فى المذاكرة ونسيبنا من حوار الطاقه والبطاريات ونجيب شاحن ونخلص:))

Gemy يقول...

هههههههههه
بجد احلى حاجه عجبتنى المقلب اللى عملوا فيكى ابن عمك
جامد جدا جدا(الايموشن بتاع الياهو اللى فطسان على روحه من الضحك)
بجد بوست جميل جدا
واسلوب لذيذ موت فى الحكى
وبعدين دا انت بتشحينينا يا بنتى ازاى تقولى بطاريتك تبقى فاضيه؟
يارب يوفقك يارب
وتنجحى
يارب تنجح يا تتح
يلا كفايه كده
ويارب نسمع دايما عنك كل خير

شفقة هانم واحسان بك يقول...

يا عم انت يا بتاع الاطفال
يعنى عايزة تفهمينا انهم بيحبوكى ليه بامارة ايه
ولا علشان طفلة شقية زيهم؟؟
بطلى تنامى فى المحاضرات وذاكرى كويس

Lady E يقول...

أحمـــــــــــــد أبو العلا : عودي يا طاقة عودي لأخناتون عودي لأخيتاتون عودي ل ليدي :))

انا فعلا عملت بنصيحتك يا انجينير وواجهت الحاجات اللي قلقاني + اني اتبعت استراتيجية هذا ايضا سوف يمر يعني كل اللي انا بعيشه ده مش هيستمر للأبد يعني _ ايه الكلام الكبير ده :)))) _

جزاك الله خيرا يا انجينير وربنا يكرمك ويسعدك وتعرف تحضر كوباية ليمون :))

Lady E يقول...

mohamed ghalia : ماشي يا محمد مش هقولك اللهم لا حسد ان الطاقة الايجابية بتاعتك مش بتخلص :) لأننا بنستمد الطاقة الايجابية من مدونتك

Lady E يقول...

مسدس صغير : الله يسلمك يا مسدس
انتا مش شايف الشوارع في بلدنا بربرق ولا ايه ده حتى النظافة عنوان رقي وتحضر الشعوب :)

Lady E يقول...

*بسمة انور* : هههههههههههه يخربيتهم مليون مرة

وبعدين انا سمعت على تهادوا تحابوا مش تعانوا تحابوا :) وعالعموم انا فعلا كنت متعاونة ووديت الأكياس لأصحابها يا اوختشي :)

بالنوسبة للأطفال فهما احلى حاجة في الحياة وخصوصا لو كانو مش مشاكسين وخصوصا كمان وهما بيبي ضحكتهم بتاخدني لدنيا تانيه

وبجد انتي اللي زي العسل والسكر وكل الحلويات كمان يا قمرايا
ربنا يوفقك في الثانوية العامية يا رب

كيــــــــــــارا يقول...

ركززززززززززززززى في المذاكرة وسيبك من اي حاجه

*****

الاطفال نعمه ربنا يحميهم ويحفظهم

حسام غانم يقول...

كلام جميل جدا .. يا طنط !!