السبت، 31 يناير 2009

يا فاشل ... يا فااااااااااااشـــــــــل


كلمة خالتو المشهورة ايام الامتحانات دايما تقولي انا وبنتها يا فاشل يا فاشل قابلوني لو فلحتوا
وانا بقولها وكأني مش فاهمة : أقابلك فين يا خالتو ؟؟
وانا في الامتحانات كنت رافعه شعار أهي جت يا مجتش بقى وأكيد انا ندمانة على الشعار المهبب ده دلوقتي بس الحقيقة اول مره الامتحانات اللي فاتت ميجيليش استبحس الامتحانات بصورته اللي بيجيلي عليها كل سنه (العيى التام او الموت الزئام )
ايوة صحيح كنت ببقى مصدعة طول يوم الامتحان ومخنوقة اليوم اللي قبل الامتحان كله وكان لازمن ولابند اصحى مفزوعه من النوم (يوم الامتحان )على اساس ان راحت عليا نومه ومروحتش الامتحان مع ان ماما حبيبتي ربنا يكرمها ويحفظها كانت بتصحيني وتفطرني بالعافيه قبل ما انزل اللجنه ولازمن ولابند برضه نتخانق سوى علشان افطر انا مبحبش افطرررررررررر وبعدين تقوللي بالتوفيق والنجاح مع قبلة اموية
( مش في قبلة ابوية يبقى في قبلة اموية ولا ايه) قبل ما انزل علشان اروح الانطحان
وسبحانك يارب كل ايام امتحاناتي تقريبا كان فيها مظاهرات علشان اللي ما تتسمى ازرائيل واكيد كنت بتأخر ع اللجنه (علشان الطرق مقفولة بسبب المظاهرات) وفي مره من المرات (يوم امتحان الرواية) فوفو عطلت وكان في مظاهرات وبابا مكنش فاضي يوصلني الامتحان فأخدت تاكسي بعد عذاب وروحت ال (كل لية وانتا تتخن) الكلية لقيتهم قافلين
بوابة الكلية ولسه هتشاكل لقيت الامن فتح البوابه وكل الناس اللي جوه الكليه من اصغر فراش لأكبر حيتان (ضكاتره) بيزعقولي علشان التأخير طب وانتوا عارفين اتأخرت ليه يا شوية اغبيا ??
انا كنت نازلة قبل معاد الامتحان بوقت كافي اني اوصل بفوفو المهم وقتها في ضكتور بتاع قسم لغة عربيه بص علينا اللي كنا رايحين متأخر وقال لنا ولو قولنالهم متأخرين ليه هيقولو مواصلات رديت عليه بصوت ضعيف لا وانتا الصادق دي المظاهرات بس بصراحه حرق دمي طول اللجنه وفضلت فاكره كلامه وهو اصلا انسان منافق بكل معنى الكلمه يعني بيطلع على قناة دينية وعامل فيها شيخ وفي القناة دي بيلبس جبة وقفطان وسبحه وحاجات كده وفي الكلية بيلبس بدلة وبيعمل فيها مهم وهو ما علينا (مش دول اللي بيمثلوا ديننا ) الاسلام كله تسامح ومحبه مش تجهم وعبوس وكلام جارح
كان نفسي اقوله الكلمتين دول في وشه بس للأسف لما خلصت امتحان كان مشي

المهم سيبنا من ذكريات الانطحانات دلوقتي انا بجد حاسة بالفشل يعني مثلا مش متميزة في دراستي اللي اخترتها لسببين بسببي وبسبب الروتين والامخاخ المزفته
بسببي : مبحبش المذاكرة اطلاقا مطلقا بالتلاته
بسبب الضكاترة : الكتب ورقها اصفر ومنيله بنيله ونص الكلام ممسوح ولما كان بيجيلي هس هس وافكر اذاكر من الكتاب كنت بصدع وبيجيلي عته في فص الجمجمه الشمين علشان الخط صغير جدا ولا صور ولا احزانون ده غير ان الكتب اسعارها غالية جدا مقارنة بجودتها المنيلة بستين نيله وكمان في ضكاترة بتستخسر فينا التقديرات تصدقوا في واحدة منهم قالتلنا انا اتمرمطت على مخت الدكتوراه ولازم امرمطكو زي ما انا اتمرمطت والضكتورة دي وعينتها بهديلهم اغنية ( اشوف فيك يوم ع اللي انتا عملته فيا ) و ( ولا بد من يوم معلوم تترد فيه المظالم ابيض على كل مظلوم واسود ومنيل على كل ظالم)

وكمان حاسة بالفشل لأني مش ست بيت شاطره يعني بكره شغل البيت موووووووووت ممكن اعمله احيانا على مضض لكن مش على طول
بحب المطبخ احيانا برضه مش في كل الاوقات لكن يوم لما بطبخ بعمل اكل على حق بابا بيقوللي انتي نفسك حلو جدا في الاكل (طبعا بيجاملني هو وماما)

وحاسة بالفشل لأني بدرس الانجليش من خماشر سنه منهم 3 تخصص في المدعوقه الكليه وكنت داخله الكلية بأحلام وردية وعلى اساس ان الانجليش ده هيبقى لغة لغة يعني وفوجئت ان الدفعه بتاعتنا منهم ناس كتير مبيعرفوش الالف من كوز الدره ونطقهم في الانجليش يهلك من الضوحك
يعني مثلا قبل كده في بنت من دفعتنا بقولها لو سمحتي عايزة الfile

قالتلي :عاه ؟؟؟؟؟ ( وبؤها مفتوح زي نفق الازهر)
انا : البتاع اللي بيتحط فيه الورق ( كنت ناسيه اسمه)
ردت : مين دهو
انا : افتكرت اسمه الملف ممكن الملف بتاعي
صحبتها قاعده معاها : يا بت فايل يعني ملف كسفتينا بقالك سنتين في انجليزي ومنتيش عارفه
انا مشيت قبل ما يجيلي شلل رباعي (طلعت معانا في دفعتنا)

ومرة تانيه رحت الكلية متأخر ع المحاضرة واضطريت اقعد في البنشات اللي ورى في اخر المدرج ولقيت بنتين ورايا بينطقوا الكلام(الانجليش)بطريقة فطستني من الضحك وكانت جنبي زميلتي عمالة تسكت فيا علشان منطردش من المحاضرة مش فاكره الكلمات اللي كانوا بيقولوها لكن اخر كلمه واحده منهم كانت بتقول للتانيه الداكتور قال ايه خليه يسبلها تاني ولا انتي اسبليهيه اسبليهيه
انا : اسبليها واشربي مايتها :)

ولا يوم لما صبئت عن الدين الجديد وقولت لزميلاتي طالما احنا في الكلية وبنقعد وقت طويل سوى ومش لاقيين حد نتكلم معاه انجليش تعالوا نتكلم انجليش سوى علشان ننمي اللغة والصوتيات عندنا فكلهم برقولي وقالولي : النبي عربي يختي نتكلم انجليزي ليه احنا

وزميلة تانيه قالتلي : انتي جايه من باريس في علبه ( حد يفهمني يعني اييييييييييه)

وكفاية كده ولو ليا نفس اكمل باقي الحاجات اللي حاسه اني فاشله فيها هكملها

سلاموووووووز بالفراولة والموز

هناك 13 تعليقًا:

romansy يقول...

اول تعليق

ل




رومانسى

Lady E يقول...

romansy : ايوة اللي هو فين التعليق ده يا رومانسي؟؟ ولا مظهرش علشان المواصلات صعبه ولا ايه

romansy يقول...

هههههههههههههههه
انا كنت بحجز بس الحمد لله وصلت فى الميعاد
ومجتش متاخر زيك
ولا قولت مواصلات ولا مظاهرات
كان نفسى تقول الكلمتين للدكتور
وتريحى نفسك منهم
اما بقى بخصوص شغل البيت
فاكيد هتتعلمى يعنى
وبلاش تكررى كلمه الفشل فى حياتك كتير
احسن تثبت

Lady E يقول...

romansy : وانا كمان كان نفسي اقول الكلمتين يا رومانسي

وبعدين ازاي الثقة دي جتلك اني هتعلم شغل البيت
رومانسي عليك غرامة ربع جنيه عقابا ليك

وبالنوسبة للفشل فهو ثابت فعلا ولازق بأمير ومش راضي يطلع عااااا

طلاب من أجل مصر يقول...

بوست جميل بجد


دومتى

بنوتة يقول...

السلام عليكم
بوست جميل أوي
على فكرة انا وانت طلعنا زمايل بس مش في الجامعة فى التخصص
تحياتى ليكى

بنوتة يقول...

يا ريت تزورينى في المدونة وتقوليلي رأيك بصراحة في القصة ايللي بكتبها

Ahmed يقول...

يابوستاتك الجميله
اوعي بس بتاع العربي بتاعك ده يعطر على البوست ده احسن هيجيلوا شلل رباعي وبعد مايفوق من الصدمه ول حاجه هيعملها هيرجع لامتحانك ويعيد تصحيحه

بالنسبه للانجليزي, ديه مشكله عامه. بس فعلا الممارسه هي الحل
احنا كذا مره عملنا الموضوع ده (انا واصحابي في الشغل) وخدنا الموضوع بجد
انت محتاجه بس حد يتكلم معاكي
اطمني الحياه مليانه واكيد هتلاقي حد

وسلميلي على الامطحان
ههههههههههه
سلاااااااام

mohamed ghalia يقول...

واضح إنى الفشل محاصرنا من كل مكان
بس اقلك على حاجة الى عايزين نكونه بإذن الله هيحصل المهم نحط هدف ونسيبها على الله ونسعى أنا عارف انى التعليم فااااااااااااااااااااااشل
بس برده لازم يكون فيه هدف نعيش ليه
تمنياتى دوما بالسعادة
دمتى بكل الود

شبـــاك موارب يقول...

ههههههههههههههه
فكرتيتني بالذي مضي
أيام الإمتحانات
ربنا مايرجعها تاني ابدا
و فكرتيني بالمذاكرة و سنين المذاكرة

بصي انا كنت بحب المذاكرة جدا لما كنت صغيرة
علي الثانوية العامة كرهتها جدا
اما بقي في الكلية لما خرجت منها حسيت إني فقدت الذاكرة مرة واحدة

ههههههههه
عموما دي أول زيارة لمدونتك الجميلة دي
و شكرا علي مرورك عندي و تعليقك
وتمنياتي ليكي بالتوفيق و النجاح
صحيح انت في جامعة ايه؟

blue-wave يقول...

ههههههههههههههههههههههه
والله انتى عسل:))
بس على فكرة
الإحساس بالفشل هوا اول طريق النجاح
تحياتى

Lady E يقول...

عبدالهادى_سارة : تسلم يا عبد الهادي انتا وسارة

مسدس صغير يقول...

يا فاشل يا فاشل
انا انصحك لما تلاقى المظاهرات فى سكتك وانتى رايحة الانتحان ابقى اتظاهرى معاهم وسيبك من الانتحان .. وبعدين انا عارف حكاية البهبهات اللى يقولو لبناتهم انتى عيكى حتة نفس فى الاكل واساسا يبقى الاكل مينداقش... ههههههه اشكرك على البوست الروش ده