الاثنين، 5 يناير، 2009

الدنيا بتمطر نـــــــــــــــار

مش عارفة اقول ايه عندي كلام كتير وافكار كتير حرماني من النوم وتوصلت الى اني لا أجيد فن الكلام بس لازم اتكلم

النهاردة الفجر الباب بتاعنا خبط تخبيط عنيف طبعا نطيت من السرير مفزوعة
طلع جيراننا الموقرين جايين يصحونا بهمجية علشان نودي بنتهم المستشفى مع ان احنا مش اصحاب اوي مع جيراننا دول ومع ان عندهم موتوسيكل ومع انهم كمان ناس مش ودودين وغالبا بيضايقونا بس في وقت الشدة مستعانوش بحد غيرنا لأنهم عارفين ان مفيش حد قلبه طيب غيرنا هينزل الوقت ده وفي البرد ده يروح المستشفى معاهم !!
اخدت اول شال على البيجاما بتاعتي ولبست حجابي بسرعة ونزلت معاهم كانت طفلة صغنونة ومامتها وباباها ونزلت في عز البرد وانا بتكتك واسناني بتخبط عالجيران شيلت غطا العربية وسخنتها وطلعت بيهم ع المستشفى

وطبعا في المستشفى الكل كان نايم وطبعا برضه المستشفى مستواها زي الزفت لأنها للأسف مستشفى عامة وامكانياتها محدودة
كنت اول مرة (الحمد لله) ادخل المستشفى دي لأن وانا في سن الطفلة دي بابا وماما (ربنا يحفظهم ويرعاهم) كانوا بيودوني لدكتور متابع حالتي من وانا بيبي بالرغم انهم كانوا زي اي زوجين شابين في بداية حياتهم الزوجية لسه بيكونوا نفسهم وبيبنوا حياتهم لكن كانوا مهتمين بيا وبيعملوا اي حاجة علشاني بعكس اللي شوفته النهاردة ناس الحمد لله متيسرين جدا ماديا لكن مستخسرين يودوا بنتهم لطبيب/ة اطفال !!

المهم ان الطفلة مطلعش عندها حاجة نزلة برد بسيطة وحرارتها كانت طبيعية
اللي ضايقني جدا ومخليني عايزة اعيط بعد ما رجعنا من المستشفى الاخوة الجيران سابوني لوحدي اركن العربية واغطيها (وطبعا غطيتها غلط وبسرعة ) وكمان راحوا اتكلموا بكل ود مع الناس اللي محدش منهم بيحترمهم ولابيعبرهم ومع ذلك على قلبهم زي العسل وانا وبابا وماما مهما عملنا من خير فيهم واحترام ليهم كأننا معملناش حاجة
والناس اللي بتعاملهم معاملة بقسوة وقلة احترام هما اللي بيحترموهم وعجبي !!

:((((((((((((((((((((((((((((((((((((((((((((((((((((((((((

الزمان : الساعة 12 الظهر قبل الامتحان بتاعي بساعة
المكان : الجيران برضه بس جيران تانيين
الحدث : سمعت كلام بحدة وزعيق وتخبيط وضرب طلع الكلام ده بين مين ومين بين اخين (يعني اخ واخوه)
مركزين معايا اخ واخوووووووووووووووووه
الاخ الصغير بيشتم الاخ الكبير مع ان الاخ الكبير سمعته طيبة جدا بين الجيران
وعجبي !!

الزمان : 12 بالليل
المكان : جيران تالتين
الحدث : برضه اخين بيتخانقو مع بعض وبيضربوا بعض الله اعلم بإيه
اخوااااااات بتاااااااااااكل في بعض واكيد كل ده م الفلوس وعجبي !!

الزمان : الساعة 2 قبل العصر
المكان : في الشارع وانا وزميلاتي راجعين من الكورس
الحدث : واحدة زميلتي عايزة تروح في المظاهرات ودار بيني انا وهي حوار
زميلتي : هي الساعة كام دلوقتي ؟؟؟؟
انا : الساعة 2
زميلتي : يا خسارة تفتكروا هلحق المظاهرة
انا : مظاهرة !! انتي عايزة تمشي في مظاهرة؟؟
زميلتي : طبعا علشان غزة
انا : علشان غزة ؟؟ وغزة هتستفيد ايه بالمظاهرات لو عايزة تفيدي غزة بجد روحي اتبرعي بالدم في المستشفى
وانا هاجي معاكي وتشجعيني نتبرع سوى ده عمل بجد لغزة مش مجرد كلام
زميلتي : اتبرع بدمي ليه م ابويا بيدفع لهم فلوس (لغزة)
انا : عرفتي ان الموضوع موضوع كلام وشعارات وخلاص
المظاهرة مش هتعمل حاجة
زميلة تانية : والله عندك حق فعلا مجرد كلام لكن مفيش افعال

خلاصة الكلام :-

غزة كشفت لنا حاجات كتير مكناش مكتشيفنها في نفسنا
وخلتني افكر لو كانت السما بتمطر نار هنا زي غزة يا ترى كان هيبقى تصرفي ايه وانا مستنية الموت كل لحظة
وخلتني افهم حدودنا كويس واعرف اننا امة ضعيفة ومغلوبة على امرها ولو فعلا اتفتح باب الجهاد زي ما الناس بتقول
بلدنا هتدمر في دقيقتين لأنها حرب غير متكافئة هما معاهم كل حاجة
الوحدة حتى لو بيكرهوا بعض فظاهرين انهم متوحدين
واحنا هنا الاخ بيقتل اخوه هما معاهم تكنولوجيا واسلحة مش موجوده عندنا
علشان كده مبقيتش اشوف اجتياح غزة لكن متابعه اخبارها من بعيد
مقدرش اشوفها وابقى متكتفة مش عارفة اعمل حاجة
واللي يحزن اكتر واكتر يا سادة يا عرب ان لو شوفتو الخرائط الجديدة في تليفون او غيره هتلاقوا مكتوب فيها اسرائيل بالبنط العريض مكان فلسطين
اتمنى يجي اليوم اللي نرجع فيه تاني عظماء !!


هناك 8 تعليقات:

blue-wave يقول...

اولا الموقف اللى انتى عملتيه ثوابك فيه عند ربنا
انا عارف ان الواحد اللى بيعمل كدا مش بيكون مستنى حاجه من حد لكن على الأقل الناس تقدر اللى عمله معاهم
لكن فعلا فيه ناس كدا كتير
وعموما ثوابك عند ربنا
ثانيا فعلا مستوى المستشفيات العامه لا يسر عدو ولا حبيب وبجد مش عارف ايه الحل
اما بالنسبة لغزة
فلها الله

شفقة هانم واحسان بك يقول...

معاكى حق يا ليدى للاسف هو ده فعلا حالنا ضعفاء وعلى اتفه حاجة بنمسك فى بعض
كل واحد بيقول يلا نفسى ومفيش لا ترابط ولا تماسك
علشان كده هنفضل طول عمرنا مهزومين
تحياتى ليكى ولموقفك النبيل مع جيرانك

e_emy يقول...

ربنا يجزيكى كل خير ع الى عملتيه مع جيرانك

والكلام الباقى عن حال المصريين ومصر

وغـــــــــــــــزة

): ):

مش عارفه اقول ايه بجد .......

بنت الغربة يقول...

حبيبتى ليدى
اعمل الخير وارميه البحر
ماتقعديش تفكرى كتير انت عملتى خير لمين وماقلكيش حتى شكرا
الناس مش كلها كويسه فى نفوس وحشه قوى عايزة تاخد وماتديش حاجه
بس كله عند ربنا
ونصيحتى عزلى من العمارة الغريبه دى
او اقولك خلصى الجامعه وانا اجيبك دبى ايه رايك؟؟؟

Lady E يقول...

blue-wave : ربنا يتقبل يا دكتر لأني فعلا مش منتظرة اي حاجة من اي حد انا عملت كده علشان الثواب ورحمة بالطفلة مش اكتر

بالنسبة للمستشفيات العامة ف ربنا يصلح الاحوال (كويس ان في مستشفيات اصلا هي الناس هتنهب يعني؟؟؟؟)

وبالنسبة لغزة ربنا معاهم ومعانا

شكرا لزيارتك اللي بقت نادرة يا دكتر

Lady E يقول...

شفقة هانم واحسان بك : ده فعلا اللي بيحصل يا شفقة لكن برضة عندنا امل ان الحالة دي تتغير وتتحول الهزيمة لنصر حتى ولو بعد اجيال

وبعدين مين نبيل ده يا شفشوقة ؟؟؟!

بجد بفرح كل ما بشوف تعليق ليكي في المدونة الغلبانة دي :)

Lady E يقول...

e_emy : ويجزيكي كل خير يا ايمي


واحساسك عن حال المصريين وغزة واصلني من غير كلام

دمتي في احسن حال

Lady E يقول...

بنت الغربة : عندك حق في كل كلامك يا بنت الغربة بجد متشكرة جدا

وبالنسبة للعمارة فمش جيراننا في العمارة اللي بيتخانقوا مع بعضيهم دي البيوت اللي حوالينا

وبالنسبة لدبي متشكرة جدا لكلامك واسمحيلي ادبسك واقولك موافقه ههههههههه انا بهزر اكيد وبعدين احنا نعتبر جيران عمان والامارات جمب بعضيهم وفي الخطة الخمسية لما اخلص الكلية ان شاء الله هزور دبي مرة تانيه وان شاء لله اشوفك
نورتيني يا قمرايا