الخميس، 15 يناير، 2009

من غير عنوان

لتالت مرة من بداية الامتحانات اتاخر ع الامتحان ربع ساعة بسبب المظاهرات (لا تعليق)
ولما متأخرش من المظاهرات فوفو تعطل واتأخر برضه !!
--------------------------------

يا تامر حسني اتلهي
من فترة وانا كاتبة عن تامر حسني ومش راضية انشر كلامي في البلوج لكن خلاص بقى زهقت من اللي بيسموه ملك الجيل
ملك جيل ايه ؟؟؟؟؟ تامر بيغني لفلسطين وهو زور في اوراق الجيش بتاعته اساسا يعني واحد بيتهرب من جيش بلده هيدافع عن بلد تانيه ازاي يعني ؟؟ مش قادرة افهم بصراحة ان عنده احساس اساسا باللي بيحصل ومش فاهمه ايه غرضه من اغنيته
وقال ايه تامر فلته بيكتب وبيلحن معظم اغانيه دي بالذات مش مصدقاها
وبصراحة لو تامر ملك الجيل يبقى ملك جيل التافهيين

--------------------------------
الكابتن شوبير استفز كل زملكاوي في برنامجه بعد ماتش الاهلي والزمالك
جاب شوية كومبارس لابسين احمر وبيهتفوا للاهلي وبيقولوا على الزملكاوية اللي معاهم في الاستديو قاعدين ليه ما تقومو تروحو !!
والله ولا كأننا في حضانة وبنغيظ بعض
ايه الاسلوب السخيف ده ؟؟؟؟؟؟

--------------------------------
في زميلتين معايا في الكلية كل ما يشوفوني وانا ماشية بالعربية لاااااااازم اعمل حادثة
اول مرة قولت انا بيتهيألي
وتاني مرة مختش بالي اوي وقول اكيد صدفة
انما تالت مرة اتاكدت ان عيونهم مش كويسة
ربنا يستر

-------------------------------

لسه 3 امتحانات واخلص امتحانات الحمد لله

-------------------------------

كان في دماغي كلام كتير جدا لكن كل الكلام طار اول لما بدأت الكتابة :(
المهم وحشتوووووووني

هناك 7 تعليقات:

فارس القمر يقول...

السلام عليكم

سيبك انتى من اللى بيغنى ولا اللى هربان من الجيش

ربنا يوفقك فى الامحانات اللى فاضلين معاكى

واقرى قران كتير

العين فقلت الحجر

دمتى بخير وحفظك الله من كل شر

Lady E يقول...

وعليكم السلام ورحمة الله وبركاتة

مقدرش اتغاضى عن حد عامل فيها وطني وهو مزيف اصلا وقصر في حق بلده وفي نفس الوقت بيغني لفلسطين مفيش مصداقية

ويااااااارب ربنا يستجيب منك ويوفقني ويوفق كل اللي بيمتحنوا

والحمد لله دايما بقرأ قرأن
وبقرأ المعوذتين وأية الكرسي وسورة الاخلاص دي حاجة اساسية قبل ما اخرج من البيت بس في الايام اللي بعمل فيها حادثة بكون نسيت اقرأ قرأن قبل الخروج

متشكرة جدا لمتابعتك للمدونة ولتعليقاتك الجميلة

دمت في حفظ الرحمان

ABOALI يقول...

اول مرة ادخل مدونتك
بس واضح ان الفرش بتاعها مبهج وجميل
وكله تفاؤل
ممن يعنى انك تلحقى نفسك لاءن الطفله كبرت (وش بيغمز)
اما عن البوست
ده هو كوكتيل الحياه يا سيدتى
فيه ناس نقتنع بارئهم وناس نص نص
وناس لالا
وهكذا
ودى توابل الحياه ومعانيها
المهم الا يحدث تشاحن وتفاعلات قلبيه يعنى يكون فيه رغبه فى زوال النعم عن صاحبها (الحسد والكره والظلم)
ونكون دايما داعين بالهدى والخير

ولولا اختلاف الاراء لبار الادباء والعلماء والشعراء وخريجى كليات الاداب

ولالالالالالالالالالالالالالالالالالالا ايه

اسعدنى مروك عندى
وسعدت بفرش الشقه وجمالها واصحابها

تحياتى الراقيه

Che يقول...

ربنا يسهل و تخلصى الامتحانات على خير
و بالنسبه لملك الجيل الاستاذ شعر الصدر حسين مش هاقول تعليق لانه كل التعليقات الرقابه هتشيلها
و انا معاكى فعلا فى ان اللى عمله شوبير ماكنش ظريف بس الاهلويه ماكنش المفروض يعملوا كده عشان احنا بقالنا اكتر من اربع سنين بناخد الزمالك رايح جاى يعنى المساله بأت عادى

Lady E يقول...

ABOALI : وان شاء الله متكونش اخر مرة
وبالنسبة للفرش فلو كنت قدمت دخولك للبلوج شوية صغنونين كنت هتلاقي تمبلت حزين ويقطع القلب بس انا غيرته الحياة مش ناقصة نكد

وبالنسبة للطفلة لا والف لا عمر الطفلة ما هتكبر هفضل طول عمري طفلة مش عايزة تكبر

والمهم لما نقتنع برأيي او نرفضه نكون على حق وفكرنا كتير قبل اتخاذ القرار بالرفض او الاقتناع

ولولا اختلاف الاراء لبارت كل حاجة

وبجد فرحت بتعليق حضرتك
وان التمبلت (ذوقي المتواضع) عجب حضرتك
دمت في حفظ الرحمان

Lady E يقول...

Che: أميـــــن يااااااارب

وبالنسبة لملك جيل التافهيين فعلا مفيش كلام ممكن يتقال عليه

وعلى فكرة الزمالك بيفوت للأهلي الاجوان بمزاجه عادي لأن الناس حاسه ان الاهلي بيمثل غزة ولما الاهلي بيجيب اجوان خصوصا في الزمالك الناس بتفرح وبتنسى اي حاجة ( عبارة غرقت , غزة اتبهدلت) مش مشكلة المهم الاهلي كسب !!

شكرا لزيارتك للبلوج
دمت في حفظ الرحمان

Randa El- Adawi يقول...

اسلوبك ظريف وجميل اوى
وان شاء الله اتابعك يا جميل
:)