الأربعاء، 28 يناير 2009

قمر الأقمار


ملحوظة : مسحت البوست اللي فات لأني كنت مخنوقة شوية فيه وكنت بكتب بعصبية وكويس ان كان لسه محدش علق عليه

جلست في نافذتي أُناجي القمر فهو رفيق ليلي في ايام الحزن و البرد والظلام
ايها القمر العالي يا من تنير ليلي تُرى هل تسمعني؟؟ هل تشعر بوحدتي؟؟
ايها القمر حيرتني في امرك فكلما اراك أحس انك حزين ودموعك تنهمر
اتدري اشعر انك وحيد بالرغم من وجود النجوم حولك
اتدري ايضا اشعر ان النجوم هي فيض من دموعك الحزينة
يا قمر كم تمنيت ان اجلس بقرب حبيبي فيقول لي (شايفة القمر يا ليدي)
فأرد عليه (طبعا شايفاه هو انا عميت ولا ايه)
يا قمر يا من تنير ليل العاشقين بأشعتك الفضية
با من تصبر الحيارى والراحلين بعيونك الجميلة
يا قمر يا رفيق حياتي ويا ساكن قلبي
فكك بقى من الكلام ده كله وادفع الايجار اللي عليك
ايون مش كل اخر شهر ادور عليك ومش بلاقيك
فيرد القمر قائلا : ايتها الحسناء (حسناء مين يا عم انا ليدي ) الا يكفيكي ان نوري يضيء قلوب البشر
يا عم القمر كلامك ده مبيأكلش عيش ما في لمبات ونجف ممكن تضيء قلوب البشر
اذن فلا تنظري الي وتهمسي لي بدموعك ايتها الفتاة
لالالا انتا بتتكلم ازاي انتا مش عارف بحبك ازاي يا قمر
فأنتا القديم الجديد البهي العنيد
حبيبي الذي ارى ضوئه من خلف نافذتي فتطمئن روحي
شكرا لك يا قمر يا اجمل قمر
يا قمر الاقمار يا احلى من كل الاقمار الصناعية
ملحوظة برضه : البوست ده ارتجال تماما مكنتش محضراه

هناك 5 تعليقات:

ستيته حسب الله الحمش يقول...

حوار واقعي جدا
لو كانت واحده كتبته من تلاتين سنة ايام الحب العذري "حلوة عذري دي" كانوا قالوا أيه قول تاني كده
بما اني للأسف علومانجية فدايما ببص للقمر واقول ياكوكب يامظلم يا من تقع عليك اشعة الشمس بميل محدد فتبقى يا اما هلال يا اما بدر انت يابني تراب قمر ايه دي حتى الارض فيها مية واكسجين ياعديم الهواء
يعني لو انتي ارتجلتي النهارده هات ياقمر الايجار اللي عليك
انا بقى بذاكر عليه هع هع هع
كان نفسي اطلع على بوست الخنقة بس يالا بعد كده اقف ليكي ع الباب قبل ما تمسحي بالاستيكة

عاشقه الرومانسيه يقول...

حلو البوست جدااااااا
ودمك شربات
وانا جيت ادخل على البوست اللى فات لقيت الصفحه مش موجوده لان حضرتك طبعا مسحتيها
عموما انا واقفه مع ستيته على باب المدونه بعد كده علشان ناخد البوستات اول باول

تحياتى يا احلى ليدى فى الدنيا

Eng. Ahmed Abo El-Ella يقول...

انت بتتخانقي مع القمر ولا ايه بالضبط

كل ده ارتجال؟ كل ده جواكي؟


طيب ياليدي
لو فضلتي تكلمي القمر كده مش هيرد عليكي

بوست جمييييييييل

Blind Sniper يقول...

انا بقول نستنة علية شوية محدش عارف الظروف يمكن عندة مصاريف زيادة الشهر دة او بيحوش علشان يجيب خلاط يا او عايز يشحن يا او بيستهبل و كدة يستاهل الى يحصلوا... لو عزتي حاجة الرجالة قاعدين على القهوة و ممكن يخلصوا علية ....انا حصلى العصر و احصلكوا...عمتو مسائن(مساء)

كيكى يقول...

**وش مبتسم *على كلامك دة كلوا
على كلام نحوى على عصرى على كول قشطة خالص عليكى يانونتى***
*******************************
واية حكاية البوست الحزين؟؟ دة لسة ياقمر فرحة عيد ميلادك معدتش!!!!
فكك..فكك
******************
عاجبتنى اوى دى
ايها القمر حيرتني في امرك فكلما اراك أحس انك حزين ودموعك تنهمر
اتدري اشعر انك وحيد بالرغم من وجود النجوم حولك
اتدري ايضا اشعر ان النجوم هي فيض من دموعك الحزينة!!1
عوووووووووووووووووو